2015年4月28號朝早六點,我喺法國最後一站、海港城市Calais嘅Jeremy屋企瞓醒,準備出發前往碼點,登上七點半嗰班駛往英國Dover嘅大輪船。
剛剛日出嘅Calais
同Jeremy食過早餐,執好嘢,出發嗰陣已經係六點八。雖然Calais好細,但我亦不禁心急起嚟,怕錯過班船,唔能夠準時踩到London。向住碼頭進發,離遠見到一條條貨車長龍,我就知道冇嚟錯地方。
排隊入碼頭登船嘅車龍
對於我哋香港人嚟講,揸車搭船呢樣嘢似乎比較陌生。實情係,喺西方國家,揸車上去更加大型嘅交通工具係非常常見嘅事,例如荷蘭、比利時等地都有大船畀車上,渡過英法海峽去英國;而法國亦有Eurotunnel,畀車上去喺地下隧道運行嘅列車,來回英法。
穿過車龍,尋找出境處
原來貨車群有貨車群嘅路,我行埋去,其實係行錯路。花咗啲時間離開車隊,終於到達Calais碼點嘅office,點知職員話唔係呢度出境!畀佢哋叫我直接去排隊離境,好彩呢度唔係用咗好多時間。
喺Calais呢度,離開法國國境之後,係即時有另一個好似過隧道畀toll咁嘅counter入英國境。問題就出喺呢度喇,嗰陣都唔知英國海關放人入境係幾咁嚴格,問九十幾條問題咁,基本上我朝早以後嘅節奏就係喺呢環被打亂。
英國入境
喺counter度,英國海關問咗我好多問題,例如我點樣嚟、諗住喺英國留幾耐、點解拎咗visa咁耐先入境等等,因為我行事光明磊落,根本冇嘢隱瞞,所以佢哋都冇懷疑過我。唯一嘅問題係,佢哋對比我護照個樣,望住我依家個乞衣樣,根本就唔相信我係護照嘅持有人!
我費盡唇舌同關員解釋,佢哋仍然唔打算信我。最後關員問我:「你有冇其他證件證明到你嘅身份?」
讓開一邊,等候答覆時唔好阻住後面
我隨身攜帶嘅係得身分證同歡樂卡,當然第一時間係拎張身分證出嚟啦!當時我都打定輸數,佢見到我張十八歲影嘅身分證一撚定唔收貨,吖屌你老鼠!竟然畀我過喎……
即係咁呀,個樣會唔會仲差得遠呀?