時區變咗GMT+0,終於入到旅程中最後一個時區。
喺法國Calais已經入咗境,因此一拎車落船,我哋已經可以直接出碼頭,自由離開。一同跟住碼頭地下嘅指示路線出去,因為Graeme同Kerry會留喺Dover一日遊玩,之後再搭火車去London,我就同呢對澳洲夫婦先行道別。
順帶一提,應該係因為碼頭好多員工都係用單車返工放工,所以地下有好清晰嘅指示係畀單車行。照計唔會淨係畀我哋呢啲旅客行嘅,可想而知英國嘅單車使用率都唔低。
就好似咁,前面係Kerry
Dover同Calais一樣,只係一個小城市,但明顯有分別嘅係,呢度真係好英國(仆街廢話嚟),成個feel好唔同,無論係路牌、店舖同耳邊聽到嘅,都係熟悉嘅英文,諗落竟然係成個旅程中,除咗香港同大陸某啲地方,唯一一個講我聽得明嘅語言嘅國家。
感覺實在太好。
就連車牌,佢都同歐洲嘅唔同,因為歐盟用嘅車牌係左面藍色一個框,有歐盟星星旗,下面係個國家嘅簡寫,例如法國係「F」、德國係「D」(唔係G,因為係跟返佢哋本身語言嘅串法,德國係「Deutschland」),有撞嘅,好似丹麥咁,就「DK」。雖然英國都係歐盟成員(暫時仲係),亦有部分車係用歐盟車牌(「GB」,Great Britain),但更多嘅係用緊佢哋傳統前白後黃,即係香港跟佢用緊嘅最普通車牌。
Dover海岸
由此可見,英國一直自豪於佢哋嘅與別不同,脫歐呢家嘢,依家唔脫,遲早都會好似AKB48啲女咁脫。
淨係個海唔臭,都秒殺星光大道
Dover都係一個十分靚嘅地方,建議大家有機會嘅話,都要去遊覽吓。
我光速屌西咁離開Dover,就向住London進發。本身諗住沿住單車徑踩,但經過一輪上山下海,發現英國對單車徑嘅保養可以話係停留緊喺史前時代,或者咁講,好多時佢哋嘅單車徑係會穿過運河、郊野公園同行山徑等等嘅地方,根本就唔係一條正正式式嘅單車徑,佢預你行山呀跑步呀,又何從保養呢?情況就同法國等地一樣,只係英國更加常見,我又喺英國留得耐啲而已。
山上望英法海峽
真心美麗
啲路堅係唔掂
其實忍者龜跟我南徑北討咗咁耐,負荷實在太重,用人體嚟形容的話,佢絕對係「五癆七傷」,每踩一下,佢都發出「咿咿」聲嘅悲鳴,聽到我都心痛。
但只要捱多陣!只要捱多一陣,我哋就到London架喇!
不過為咗你……同埋我個屎忽,我決定踩返出馬路,挑戰繁忙嘅A20公路。