不如講下大家遇過嘅靈異經歷

我都分享下之前喺公司遇到嘅經歷：

嗰陣公司係D單位，隔嚟E單位一直丟空，門口塞咗好多信無人收，有個做咗好幾年嘅reception同事話E單位轉咗好多間公司，最長都係半年，好多兩、三個月就執

之後老細話想擴充，租埋E單位，打通咗，連公司門口都改咗喺E單位嗰邊，對到正條走廊同防煙門（老細話想啲客一眼就望到公司門口）一星期左右，reception同事盆富貴竹就黃晒，我哋都覺得唔係幾老泥

跟住有日，我同啲同事做到6點幾，聽到窗出面花槽有聲，見到有個全白嘅人影好快咁跑過，但個人影無踩到任何花草，係凌空咁跑

嗰次之後，有好多日子，我哋ot時都聽到E單位嗰邊有打字聲，但明明坐嗰邊嘅同事同另一個老細都放咗工，咩人都無。我哋大家一齊停手唔打字，都仲聽到嗰邊有keyboard聲，無幾耐仲有斟水時嘅水機聲，但我哋個個都喺自己位。我哋每次都有共識，大家save低手頭上嘅嘢，熄電腦一齊放工

喺辭職之前仲遇過少少靈異嘢，有興趣嘅再分享

有興趣呀 繼續

嗰份工係要返alternative Saturday嘅，我同個reception同事返唔同日子。佢返開9點，其他人返9點半，但佢一向8點9左右已經到公司。

事發當日佢照常8點9番到公司，見到個女同事喺房入面邊哼歌邊梳頭（房係玻璃外牆，當時無閂門無拉簾，睇到好清楚房裏面）reception同事就同個女同事打招呼，問佢點解咁早返到，但對方無應，佢當時諗可能對方因為哼歌所以聽唔到，無乜在意。

呢個時候，坐嗰間房嗰個女同事拎住早餐外賣返到公司，reception同事呆咗，問佢乜唔係啱啱先喺房咩。女同事話佢係早咗出門口，所以去買早餐，但真係啱啱先返到公司... 當下大家都知係見到嗰味嘢，reception同事再望下嗰間房，個女人影消失咗，但reception同事無見到佢行過

個女同事入咗去自己間房，食完早餐之後，話覺得陰風陣陣好唔舒服，之後下晝就發燒，但佢話本身都幾精神

跟住嘅星期一，佢哋講番呢件事畀我聽，我聽完都有啲毛管棟

其實個post入面一個人都冇

「幻覺嚟啫！」「一定係我太攰」「要睇精神科了」「呢個世界邊有鬼架」

朋友都有單好似
話讀書果時企係學校門口等人放學
見到有個同學出黎一次 又一次
後尾先知佢個孖生（唔同校）同佢一齊返
上就細既上堂 下就變大果個既

嘩屌 如果係真 嚇死

講個同樓主差唔多嘅
以前有次撘mtr由九龍塘往觀塘方向，咁我就企喺門邊，留意到有個阿伯拎住好大袋野。
後尾佢就喺鑽石山落車啦，咁都正正常常冇乜野。但係到咗彩虹，我又見到佢上返車
我到宜家都唔知發生咗乜撚野事，因為佢拎住好大袋野所以我唔會認錯，但有乜理由鑽石山落車會喺彩虹上返同一班車

果度發生過d事 你google下

叫Doppelganger

細個大約小三小四個時
同我兩個fd一齊落樓下公園過中秋
因為我地個屋邨行多15mins已經有一個好大既公園
基本上個個都會去大個個公園過中秋
但我地三個就廢是咁夜番歸
所以就近係樓下公園hea下算

仲好記得我個時用緊iphone4 有前置鏡
我就話：不如我地自拍阿
跟住影左
我就即刻睇番張相影成點
發現多左個人
女人黎 長頭髮 個樣蒙蒙地咁
佢係同我地一齊影相
好似你自拍 有人攝鏡咁
我即刻放低電話周圍望
講緊係成個公園連周圍啲路都係一個人都冇
好肯定個時公園得我地三個

最後我即刻del左
話：岩岩影到我好樣衰 再影過阿
之後張相就正常番 得我地三個
直到而家我都冇同佢地講過呢件事

我覺得似部lift真係壞左多d
因為我都試過部lift衝上去但又唔開門
個下淨係好驚會墮lift
嗱嗱聲㩒哂樓下所有樓層既掣 部lift是但sense到一層都會停
最後好似係3 4樓停左開門
我驚到唔敢再搭lift由3 4樓行上去

初中放學搭lift返屋企
去到屋企門口準備開門
見到門口由上到下都痴曬白事啲野同字句，同埋啲白色花
嚇到我O撚曬嘴
心諗個排屋企都冇人走咗
個刻我真係以為撞野，原來出錯層
雖然係衰on9，但活到依家覺得最靈異嘅經歷就係呢樣

上面一半都係matrix嘅bug

可能嗰個女人一上上層
見到同自己同樣嘅女人都嚇死

希望係
但遊𨋢河真係嚇餐飽

做鬼都要返工

好似人類觀察其中一集都係咁