第九章(4)
「喂喂喂,唔好走住。」肥仔文拉着準備離開課室的阿祖說。
「做咩?」阿祖不解地問道。
肥仔文把頭探出走廊看了看,發現目標人物還未到,只好隨便找些話說:「我想問你,究竟點樣先可以成功溝到條女?」
肥仔文是個不會說謊的人,阿祖一早便看穿了他,還是敷衍他道:「你呀?減個肥先會快啲。」
這雖是敷衍,卻也是事實。其實肥仔文的五官並不差,且皮膚又白又滑,若能稍減一下,說不定真能成為小鮮肉。可惜,對於美食他總是無法抗拒,又抱着「能坐就不會站,能躺就不會坐」的左右銘做人,自然是不可能成功減下來的。
「點呀,你究竟等緊邊個,放得我走未?」阿祖從褲袋掏出手機,不耐煩地問道。
要不是猜到Miss Lam應該還未可以離開學校,阿祖應該早就撇下肥仔文了,才沒耐性在這和他一起不知道在等甚麼。
「唔係呢,你等多陣啦。」肥仔又看了看走廊,續說:「你估減肥咁易呀?仲難過打機。話時話我打嗰隻新Game,打極都破唔到關,你幫我破呀,我連隻Game都帶埋返黎架啦。」肥仔文指着背包說。
「你帶隻Game返黎做乜?都要有部機先玩到架,你媽仲要對我落埋封殺令,點幫你破呀,醒目仔?」阿祖不解地看着肥仔文。
「喂,你兩個做咩唔等埋我?」
就在這時候Yuki突然出現在課室門前。
「你唔係走咗架咩,做咩又行返番黎?」阿祖問道。
「走你個頭,我啱啱去咗隔離班還野咋嘛。」
「我差啲就攔佢唔住。」肥仔文說道。
「做咩,你攔住我就為咗等佢?」阿祖指着Yuki問道。
「哇,楊祖耀,你依家咩態度,好唔想等我咩?」
在Miss Lam還未來這所學校任教、肥仔文和阿祖還未下那個賭注之前,只要Yuki和阿祖那段時間沒有拍拖,三人都會一起下課。
然而,這回Yuki明明已分手了好一段時間,阿祖也沒有在談戀愛,三人卻再沒合體過,頂多是肥仔文和Yuki二人一起下課。
「係咩,好似已經係三萬年前嘅事啦喎。」
「你仲因為上次淋水嘅事嬲呀?好心你咪咁小器啦。」Yuki問道。
「無喎。你鍾意淋邊個咪淋邊個囉,我邊管到Yuki姐你。」
確實,從前Yuki和阿祖曾是最佳好友——自小學一年級,也是因為阿祖,Yuki才會和肥仔文成為朋友。雖然在那段阿祖迷失的時期,他們曾失聯過,可是後來也重新走在一起了。
Yuki以為這次也是這樣,然而,現實卻不如她所願。
而她比他更在乎這段關係,她唯有棄械投降。
「OK,我認我唔應該屈Amy,但我都唔想架,我會比人踢出校架。」Yuki解釋道。
「咁你一開頭就唔應該淋人水。」
「唔係因為你我會淋佢水?」Yuki試圖把責任都推到阿祖身上。
「你自己唔妥Miss Lam唔好賴我喎。」阿祖攤開雙手,一臉無辜地說。
「你日日掛住溝Miss,你講你幾耐無同我地一齊放學呀?」Yuki理直氣壯地問道。
雖然阿祖拍拖時也會把他們二人拋諸腦後,可是阿祖拍的拖都是來得快,去得更快,可這次卻好幾個月沒找他們了。
Yuki的話讓阿祖有些許內疚,可這明明是他和肥仔文的賭注,又反駁道:「係,咁但係我同肥仔文落咗賭注,緊係要溝啦,你知我不嬲講得出做得到架。」
「咁你溝到未呀?」
算係溝到?阿祖心想,自己也對現狀感到混亂,無法為二人關係找到一個確實指稱。
「你又無份賭,唔話你知。」阿祖故作神秘地說道。
三人之間很少有秘密,Yuki不喜歡這種被排擠在外的感覺。
「肥仔文,你話我知,佢係咪已經溝到Miss Lam?」
「我剩係知最近隔離女校有條新女溝佢咋,其他我咩都唔知呀。」肥仔文把雙手舉到耳邊作投降的姿勢說道。
肥仔文看似蠢鈍,卻正正如此,別人才不會懷疑他說的話,於是蠢鈍成了他最佳的保護色。
「邊個?」Yuki好奇地問道。
這時,阿祖手機一震,是Miss Lam傳來的信息:「今日要帶活動,OT到8點,嗚⋯⋯」
8點咁夜?阿祖心想,發了則信息問道:「係邊到完?」
Miss Lam馬上回覆:「深水埗啊T-T」
八點深水埗,依家先得嗰四點未到,我要去邊Hea到你放工?定我返屋企先,再出黎接你?阿祖在心裏盤算着,不自覺地思緒都繞着Miss Lam轉。
阿祖在Miss Lam家住了一段時間後,Miss Lam為免阿祖每次都要等她回來才能進門,便多配了一條鑰匙給阿祖,所以現在的阿祖已能自由進出她的家。
「個女仔WhatsApp你呀?」Yuki把頭探到阿祖手機前,阿祖連忙按下鎖屏鍵。
「係囉,咪就係嗰條條女囉。」阿祖索性順水推舟地說道。
「你唔覆人呀?」Yuki問道。
「難得Yuki姐親自黎搵我一齊放學,我仲邊夠膽覆其他女仔?行啦。」
「去邊呀?」
「去Namco夾公仔啦,你最鍾意架啦。」
Yuki以為阿祖還記得自己的喜好,卻不知道那時的她不過是阿祖為了等Miss Lam而用來填補空檔的工具。
--------------
今晚打咗好多文
大家滿意嗎?
IG:
https://www.instagram.com/jessie_lannn/