【為何在北歐終結】《原來瑞典沒有貓》【之三】

17歲（毒男） 2020-01-15 20:56:56

想嫁去日本

confirmed gay

西樓月如鈎 2020-01-15 21:17:49

我這個人甚少發夢，只會在睡不好的環境才會發夢，而一發必定為惡夢，而且夢境多數都會重覆，可能幾年都發着一個夢。被周采蘋睡着大脾一定睡不好，我根本就不知道自己怎睡得着。

在夢中，我又預見前女友。

我們坐在一張圓桌上，她微笑地把枱上的一件一件物品打碎，杯、戒指、筆。

一、二、三、四。

直到第五件，我才發現所有物件都是有我的樣子。

一個兩個三個男人圍着她，然後我就驚醒過來。

醒過來後，發現自己不知何解正睡在周采蘋的大脾上，而她則望住我，報上笑容說：「早晨，醒啦？」

我嚇得坐起身，說：「我明明記得唔係咁⋯⋯」

「你發惡夢？」她沒有回應我，反問。

「係，嚇親，真係好黑仔。」

「發惡夢好過發好夢。」

「又點解呢？」

「因為你發好夢醒咗，發現現實無發生過會好Sad，如果係惡夢，醒咗發現好彩係惡夢，你會鍾意現實多啲。」

聽她這樣一說，我又覺得挺有道理，反正我多數都會聽從她的意見。

「醒咗不如出去玩下。」她說。

「咁早？」

「十點幾啦而家。」

「嘩。我瞓咗咁耐？」

「搵埋牙膏。」

牙膏因為宿醉頭痛的關係，決定不跟我們出市區。

她帶我到一間瑞典自助餐店吃了一個午餐，不過我本來就不喜歡自助餐，每次拿食物的份量都是極小。

「嘩，你嘥唔嘥啲呀？」她說。

「無乜拎嘢都嘥？」

「嘥咗隻碟。」

她看見我這樣，就每次出去都拿多一份，然後把那一份給我。

「廢事你餓親。」她說。

完了午餐，我們在老城逛了一逛，她好奇問：「你朝早發咩惡夢？」

「嗯⋯⋯」

「諗起EX？」

「其實如果妳識讀心不如直接講。」

「哈哈，你個樣出晒嚟嘛。」她又買了一杯雪糕，一邊吃一邊說：「佢究竟有咩魔力令你咁迷佢？」

「咁人係有感情㗎嘛，同埋其實佢真係好好，好溫柔，好體貼。」

「係因為你對佢有感情先覺得佢好，世界上咁多人，大把好好。」

「或者啦，咁佢條件唔差嘅。」

「你係一個嘥嘢嘅人。」

「點解咁講？」

「你EX都唔鍾意你，你仲單方面掛住佢，對方都接受唔到你嘅愛，仲付出，唔係嘥係乜嘢。」

「講就易，做好難，慢慢啦，妳做乜長篇大論？」

「因為我唔想你嘥緊自己。」她認真望着我，眼神瀅瀅通透，我好像第一次見她認真的樣子。

「生命每刻都屬於當下，好珍貴，被一年前嘅你困住當下嘅你同未來，係好可惜。」她忽然指着一個窄巷：「呢度係咪魔女宅急便嘅場景。」

「好似有取景，但我唔肯定。」

「唔緊要啦，當係。」她拉着我的手，叫我閉上眼。

我感受到她手的溫暖，好像握着一個暖蛋。

閉上眼之後，我忍不住笑。

「唔畀笑，好認真㗎。」

「係係。」

「而家魔女對你施法，過咗呢條路之後，從此你唔再會夢起你前女友。開始你人生嘅一頁。」