由於本身鐘意行山,所以一直有興趣去Nepal,然後睇完蝦條哥嘅vlog,就辭職說走就走。我一直好渴望可以好似好多巴打咁去周遊列國流浪,但你問我打工買樓買車重唔重要,我嘅答案係其實都真係好重要,所以就決定只用一個月時間比自己放低吓工作壓力,有時返工耐咗好似搵唔返自己咁。而其實呢23日係3月嘅時候出發,最後點解呢篇野咁耐先出,係因為返到嚟又做返奴隸,但最近發生好多唔開心嘅事,睇返旅行嘅相,決定用文字寫返出嚟,希望感受返當時嘅自在,所以可能會寫得好詳細原諒我慢慢寫想感受多啲,同埋希望比到經驗有興趣嘅巴絲因為我路線係先去尼泊爾再去西藏,網上自己搵過好多文都好似無咩人係調轉去。
我無儲過文,希望每日都可以update到一日,如果大家嫌慢又有興趣可以睇咗下面呢篇石垣遊記先,隔咗成年早幾日找埋條j數但發覺舊po好似已經推唔到
https://forum.hkgolden.com/thread/6925909/page/1
2019年3月6日-14日尼泊爾
2019年3月15日-28日西藏
回想到3月6日
Day1
一照早執好野揹好背囊,個心竟然有啲唔想去,覺得呢個trip好長,離開屋企嘅時間係咁大個仔最耐,不如呢個月係香港hea吓就算,但最後就諗男人老狗淆乜就出發上廣州轉機去尼泊爾
十幾kg親愛嘅Mary,呢個旅程靠哂佢
坐火車到羅湖出境
沿指示方向去羅湖火車站
廣深城際線(即係高鐵)
左邊會有自動售票處
揀好就買飛(小心 廣州有勁多分站 廣州南廣州東廣州北 去之前查清楚你嘅目的地 搵完google就買咗廣州東站嘅車去白雲機場 仲有小心高鐵都有分好多型號 趕時間就要查清楚撘個架嘅車程)
比多幾蚊坐頭等嘆吓先 可能會有人問點解咁鳩麻煩 直接香港機場去咪得 係嘅有錢咪咁做 廣州去尼泊爾平好多 窮撚搵咗好耐都無平機票
廣州東站直接可以轉廣州鐵路3號線就有站去白雲機場
好耐無返過大陸 原來白雲機場都幾靚 checkin完 仲有幾多時間剩 食啲野先
成日無食野好肚餓 食返個最後午餐就上路
可能係出發前幾日先買機票 我記得一邊係機場食野一邊諗 做乜鳩咁突然嚟咗廣州 又做乜就嚟會去咗尼泊爾 好似發夢咁 唯有希望唔係惡夢啦
心諗咩事去尼泊爾都咁full
一上機就屎忽黑過墨斗我個位嘅mon壞咗 本身個空少話睇吓有無得調位 最後比部pad我自己睇片算
不過不失嘅飛機餐
見到咁多燈都鬆口氣 網上介紹尼泊爾夜晚係經常停電 可能自己好彩呢個trip都經歷唔到
5個鐘左右機程就到咗尼泊爾 當地時間已經係大約22:30
[img]://na.cx/i/m0MAvAE.jpg[/img]
第一眼嘅感覺係 比想像中仲落後 好似返咗80年代咁 但我鐘意 夠味道
成班排住隊就係做visa 前面條大陸佬揼我勁耐波鐘 睇唔明英文亂咁㩒 最後要職員幫手
一出境第一件事係兌錢 因為港幣都兌到 所以無專登唱人仔美金 可以講講仲記得出境關口 真係好簡陋 行兩步就出境完全無保安措施
第二件事就係買電話卡 記得帶大頭相 因為無論電話卡定之後嘅登山PASS都要用到
第三件事一出境會有一大堆尼泊爾佬問你係咪要車 直接無視直出停車場搵的士司機 多數會平啲 但當然尼泊爾治安其實唔差 但最重要係乜都要講價 講價叻基本上嚟尼泊爾係優勢嚟 傾掂數就上車
基本上無咩選擇機場一出嚟大家嘅目的地都係泰米爾(Thamel)地區 交通住宿呢到係最中心最方便 落到車見到好多夜店仲有低胸女 但無咩心情望 而家呢刻係好撚肚痛 心諗唔係咁快水土不服 嗱嗱聲搵吓咩hostel好住同方便去聽日嘅巴士站 (早知一早搵定hostel) 最後唔想搵真係好肚痛 揀咗幾出名嘅長城賓館
估唔到就中伏 去嘅巴絲記得小心 除咗幾貴之外(無記錯要1100尼幣) 仲要天花爛哂啲灰趺哂係床
肚痾完 已經凌晨1點幾 攰到即刻攤落床休息
Day1完