【絕無轉機】我坐上咗一架盛載住絕望嘅航班。（3）

7.

一聽到槍聲，我同羽姬兩個即刻撐起身，
同一時間望向貴賓室大門嘅方向。

「係邊個開槍？」老陶睜大雙眼開聲問。

「邊個都好，嗰個人隨時都有可能會走入嚟。」我行埋去老陶旁邊，
「我哋過去廚房嗰邊先……利用吧檯做掩護。」

語畢，我即刻扶起老陶向住吧檯嗰邊走過去，羽姬跟嚟身後面。

呯──走咗幾步，外面又傳嚟另一下槍聲，今次距離更加近了。

好快我哋就趕到去吧檯後面，安放好老陶之後，我凸出半個頭竊探大門嘅情況。

「會唔會係Fiona？」老陶繼續講，「照計而家應該得佢同埋個男同伴有槍……」

「仲有我……」羽姬開聲，然後將佢手上面枝槍遞畀我，「Rex，
枝槍交畀你……萬一真係有敵人闖入嚟……我冇能力喺呢個距離打中目標，但你可以。」

我聽完之後猶豫咗幾秒，唔係因為我唔想背負呢個責任。
而係越嚟越肯定羽姬佢已經知道關於我嘅「秘密」。

「嗯。」但我最後都係接過槍，屏息以待。

之後嘅一分鐘都過得相當平靜。本來老陶已經放下戒心，想伸手去拎地上面一枝水嚟飲……
但就喺下一瞬間，有「人」推開貴賓室大門走咗入嚟。

……係一個著住一身機師服嘅男人。雖然有段距離，
但可以睇得出佢並唔係無臉人，而佢手上面確實係握住一把槍。

如果我冇估錯嘅話，佢好大機會就係Fiona嘅同伴。
其實只要俾羽姬或者老陶望一眼就可以確認清楚（因為佢哋見過），但呢刻佢哋兩個都唔敢望出去。

當然，我係可以喺唔出聲嘅情況下叫佢哋去確認。問題係，
就算佢真係Fiona嘅同伴，都唔代表佢唔會傷害我哋，因為而家嘅情況已經唔同咗。

到底應該點做好？

諗到呢度，我見到個男人已經關埋貴賓室嘅門，一瘸一拐咁行去梳化嘅位置，
最後喺我哋頭先坐低嘅位置停低腳步，垂低頭望茶几上面。

弊……頭先趕住避嚟呢度，完全忘記咗要整理茶几上面嘅水同埋食物。

就喺下一瞬間，男人將目光放到旁邊嘅梳化，再將左手掂落梳化面上……
顯然係想確認上面嘅溫度。見狀，我下意識縮低頭。

「你哋唔洗匿埋喇。」然而，就算望我哋唔到，
留低嘅訊息已經足夠佢去確認我哋嘅存在。「我已經知道你哋喺度。」

聞言，我先嘆咗口氣，然後慢慢企返起身，直視嗰個男人。

「哦……我認得你。」雖然男人冇舉起槍，但我並冇因為咁而放下戒心，
「你應該就係Rex，估唔到你真係有命可以返嚟呢度……」

而家近啲再睇清楚，可以睇到佢小腿係受咗傷，臉同身上都有唔少血跡。

「你冇事……」就喺下一瞬間，羽姬都企起身望向嗰個男人。

「人冇事，但病毒就俾人搶走咗，」男人無奈咁搖搖頭，
「真係百密一疏，估唔到機上面班人竟然識得去伏擊我……」

講到呢度佢先攤喺個梳化上面，再繼續講落去：「睇嚟……
你哋都應該係俾人趕咗落機，先會喺呢度喇，係唔係？」

「係……」羽姬點點頭。

「全部都係個崇拜者搞嘅鬼。」男人繼續講落去，「目的係唔想我哋得到病毒……」

「但而家機上面嘅人都係想解開詛咒……」

「哈，」男人冷笑一聲，「嗰班連飛機都唔敢行出去，只係識得內鬥嘅廢柴，
點會有能力去完成呢件大事？你哋心裡面應該都好清楚，佢哋係俾人利用……
好快，病毒就會落入壞人手中，擴散到外面世界嘅每一個角落。」

「就算事實好似你咁講，我哋都阻止唔到，」我接著講，「飛機已經飛走咗。」

「你咁諗就錯喇。」佢回應，「嚟咗呢度咁耐你哋竟然仲未明？
永遠唔好用常理去分析呢個地方。」佢拎起枝水飲咗啖再講落去：
「除咗飛機之外，係仲有其他方法可以去返『桃園機場』，問題係你哋識唔識得去捉緊呢個機會。」

「咁到底應該點做？」連老陶都忍唔住撐起身，
「既然你講得出口，你應該知道點做先係？」

「當然知，」男人嘅眼神變得銳利起嚟，
「但我冇諗住話畀你哋知應該點做。」

「咩話……」老陶大感錯愕。

「你哋唔好會錯意，我哋嗰陣願意救你同埋Kathy，完全係因為我同Fiona需要阿琪。
但而家阿琪已經俾人捉走咗，你哋對我哋嚟講就再冇存在價值，
如果我話畀你哋知點過去，分分鐘會影響到Fiona……」

「你咁講即係Fiona已經趕緊去。」我腦海開始飛快咁轉動，
「既然你哋已經匯合咗，點解唔一齊過去？」

「因為，以我而家呢個狀態只會拖累佢。」男人抬起頭望向天花，
「但為咗完成任務，我仲可以為佢做多一件事……」

聽到呢度，我突然搞清楚佢剛才點解要開槍。喺所有無臉人都走哂嘅情況下，
開槍只會帶嚟一個後果……就係將嗰隻「怪物」引過嚟。

「你哋而家走嘅話，可能仲走得切。」男人注意到我個神情之後笑咗笑。

情況就好似頭先喺空橋，Fiona開槍殺死軒少嗰陣咁。

「我哋要即刻離開呢度！」意識到呢點，我即刻扶住老陶，「廚房嗰邊仲有另一條路！」

就喺下一瞬間，大門傳嚟一聲可怕嘅巨響，一個漆黑嘅身影從貴賓室外面破門而入。

「Fiona……之後嘅事就靠妳喇。」

說時遲那時快，再下一秒怪物又轉換形態化成為淤泥，
直衝去男人面前將佢整個人吞噬。

估唔到，佢為咗Fiona可以順利趕返去，竟然主動做餌去引走隻怪物。

咪住……

既然係需要「引走」，咁係咪代表呢隻怪物係有屬於佢嘅「巢穴」？

「我哋而家應該點做好！？」轉返出去走廊之後，老陶即刻問。

「羽姬，老陶……帶我去第一次見到怪物嘅行李分流區……」




「我哋或者可以喺嗰度搵到返去『桃園機場』嘅方法。」

望穿秋水

等到天荒地老了

終於出啦

推

雖然呢刻情況可以話係非常危急，但因為老陶有傷在身，
所以我哋實在係冇辦法跑得太快。

「Rex、Kathy……你哋拋低我喇，」走到中途，
老陶忍唔住開聲講，「唔係隻怪物追到嚟就唔洗旨意走得甩……」

我並冇回應，只係回頭望咗一眼。表面睇嚟隻怪物並冇追嚟，
但就算係咁都唔可以鬆懈。

「留我喺度，就算隻怪物追嚟我都可以拖延一陣……」

「唔好傻喇，要走就一齊走！」羽姬打斷咗老陶嘅說話，「呢邊！」

從佢嘅眼神，我睇得出佢已經唔想再失去任何一個同伴。

如是者，我哋再穿過幾條迂迴曲折嘅走廊，再推多幾道大門之後，
終於到達佢哋所指嘅行李分流區。然而，一走入去，馬上可以感受到一鼓熱浪洶湧而至。

「點解……」見狀，羽姬同埋老陶都顯得好驚訝。

呢刻，分流區嘅各處都燃起咗大火。可以睇得出運輸帶依然係運作當中，
火勢應該就係因為咁而蔓延開去，至於源頭……應該就係中央一部類似圓塔嘅大型機器。

「我哋就係喺嗰度搵到病毒……」羽姬開聲講。

見到現場火頭處處，我哋都唔敢多行半步。
喺烈火燃燒嘅情況下，乘托住運輸帶嘅支架隨時都有倒塌嘅危機。

「我哋而家應該點做好？」羽姬問我。

以現時嘅情況睇，堅持入去絕對唔係一個明智嘅做法。講到尾，
我都係一廂情願咁認為呢度可以搵到方法去「桃園機場」。實際嘅情況可能根本唔係咁……

……但好地地呢度又點解會火燭？

彷彿回應我一樣，老陶佢突然舉起手指向前方。
呢刻，有個人出現咗喺烈火之後，望住我哋三個……

……係Fiona。

「你哋竟然識得嚟呢度。」Fiona開聲講，「可惜已經太遲。」
「太遲？」老陶不解。

「另一個去『桃園機場』嘅方法，已經俾我燒毀咗。」Fiona揮手向我哋展示佢嘅「成果」。

「妳點解要咁做？」羽姬問道。

「成個任務嘅發展已經同我哋當初嘅預期偏差得太遠，唔可以再錯落去。」
Fiona回應，「我哋只需要阿琪，而你哋幾個就只係變數……冇必要存在嘅變數。」

佢嘅說法同佢嘅同伴大致相同，講到尾都係唔相信我哋。

「既然妳一早知道有另一個方法，點解仲要同我哋上飛機？」我問。

「因為可以嘅話，我都唔想用呢招……」講到呢度，Fiona向住烈火行前一步。
「嗰塔裡面有個座標，只要清楚記住座標，然後去『死』，就可以喺嗰邊重新出現。」

「妳癲咗呀？」老陶好大反應，「萬一呢個所謂嘅『方法』係呃妳呢！？」

「咁結果我就真係會死……」Fiona講到呢度停咗停，
「但另一個事實係，被困喺度根本就同死冇分別。而任務嘅成功，
比起我同埋其他人嘅命都重要……」



「……我哋係冇可能將希望託付俾飛機上面嗰班人。」

說罷，佢就一腳踏入火中，烈火瞬間就將佢整個身體吞噬。

直到佢倒地不起，整個過程都冇發出任何一下喊聲，
佢嘅覺悟係如此咁強烈……

呢刻，我不禁問自己……

假設最後真係有幸搵到座標，我哋又會唔會有覺悟去面對「死亡」？

(待續)

閱

lm

已經儲左兩個幾月先睇

聽晚出下集

另外《絕望走廊》實體書已經上架了，
各位有興趣可以去書局支持下

聽晚出下集

另外《絕望走廊》實體書已經上架了，
各位有興趣可以去書局支持下

聽晚出下集

另外《絕望走廊》實體書已經上架了，
各位有興趣可以去書局支持下

咁係咪即係會密啲出返故 ？

等左大半個月居然得一篇

等左大半個月居然得一篇

不過係幾好睇既

聽晚出下集

另外《絕望走廊》實體書已經上架了，
各位有興趣可以去書局支持下

走數？