【絕無轉機】我坐上咗一架盛載住絕望嘅航班。（3）

New post lm

新post留名

喂快啦

──雖然好似突然有嘢令你下定咗決心，但齋有決心係唔夠……
Rex。因為你根本唔知道之後應該點做。

我冇回應到佢，記得Fiona話過裝住病毒嘅盒子可以用嚟打破詛咒。
如果我真係成為咗「盒子」，咁應該要點做先可以解決件事？點睇都唔似係搵醫生或者科學家去解決……

──頭痛係應該㗎……雖然你已經非常貼近事情嘅核心，
但仍然有太多嘢你係唔清楚。例如你頭先提到嘅Fiona，
佢哋嘅真正目的當然唔係為咗解決呢件事咁簡單……

「你係有嘢想講就直接講，唔好喺度轉彎抹角……」

──佢哋正正就係一班為咗利益不擇手段嘅人類，
目標係為咗得到病毒裡面嘅頂尖科技。相信我，
如果呢啲科技真係落入佢哋手上，就算打破咗詛咒，
阻止咗病毒爆發，人類其實遲早都會毀滅……真正嘅毀滅。

「呢個只係你嘅講法，我夠可以話人類世界從此變得更美好。」

我注意到，越接近機場，就有越多車同無臉人由機場嘅方向離開。

「但如果俾病毒擴散出去，」我繼續講落去，「99%人類會死……呢點係你頭先親口講出嚟。」

──呵呵，事實會證明我所講嘅嘢。就快到喇，Rex……我哋呢次愉快嘅公路對話好快就會結束。

反而前往機場嘅就一個人都冇，感覺就好似發生咗咩事需要撤離一樣。

──最後，為咗呢次對賭可以公平少少，就等我同你講多幾樣嘢喇……
第一，你真正應該擔心嘅人從來都唔係我；第二，你哋如果真係想打破詛咒，就需要返番去「桃園機場」……

「吓？」

──我將一條鎖匙收埋咗喺嗰度。冇呢條鎖匙嘅話，盒子（你）最後都係一個普通嘅盒子……

我終於恍然大悟，原來阿曉當時同白女士講嗰樣嘢，就係一條鎖匙。

如果呢句並唔係謊言，即係最後我哋都係有必要返去嗰度……完全係俾「掠奪者」嘅首領講中咗。

「嗰個地方到底係乜嘢一回事？」我趁著最後一段路問清楚。

──就好似人類需要發電廠供電一樣，
我呢度都需要一種能源去維持落去，而嗰度就係提供能源最好嘅地方……

我剎停咗的士了，因為呢刻我已經駛去到一號客運大樓隔離。但我並未落車，因為想聽埋佢講落去……

──入面幾乎每個人被賦予咗一個目標。為咗可以達成呢個目標，
為咗有日可以離開嗰個地方，返去現實世界……佢哋不斷殺死新嘅外來者，
慢慢失去人性、變得墮落……而途中不斷產生出嚟嘅絕望感，就係最佳嘅能源，用嚟供養呢個地方。

我又諗返起阿曉曾經講過──「佢哋有個扭曲嘅信念，就係殺人……」

「但呢個目標根本就係錯嘅……」

──冇錯，由第一日開始就已經錯，就算有人勇敢去提出質疑，
最後都會反過嚟成為刀下亡魂。而真正嘅目標其實從來都喺佢哋眼皮底下……
一條鎖匙。只係視而不見，聽而不聞。係咪好可悲？
但現實世界偏偏一樣係咁可悲，虛假嘅真理、盲從嘅人類……「桃園機場」純粹係一個縮影。

旁邊嘅的士門突然「噠」一聲打開咗，但並唔係我做成嘅。

──Rex，落車喇……睇嚟裡面都發生咗啲事。如無意外你應該唔會再聽到我講嘢㗎啦。

聞言，我推開咗車門，臨落車之際又望一望車裡面，始終係見唔到文啟猶嘅真身。

「你本人到底喺邊度？」我最後一問。

我曾經有一刻諗過，如果佢真係一個瘋狂嘅科學家，
咁好可能已經同病毒同化，換句話說即係喺我體內……越諗就越覺得噁心。

──我已經死咗。

但佢竟然係咁樣回答。

──但我嘅靈魂仍然存在喺呢個地方，所以當呢度毀滅嘅時候，
無論病毒最後有冇擴散出去，我都會真正咁離開……
走喇，唔好回頭，呢場賭博邊個回頭就係失敗者。

「呢點唔需要你講。」語畢，我就離開車廂走入大樓裡面，再冇回頭。

好快就上到去旅行登記區，呢刻我再見唔到任何無臉人，反而見到幾個熟悉嘅身影……

(待續)

好睇

新post留名

鬼打鬼喇

Yo

留名睇故

lm

又要等了