Day19 花蓮一日遊
騎行里數︰21 km
Sally 7點幾已經走咗出發去墾丁,就係咁,青旅又得翻我一條友了。Jessica知我到咗花蓮,極力推介我去一間食冰嘅,叫壽豐冰菓,但係壽豐離花蓮都幾遠下,所以決定搭火車去。到火車站見到有車去台東方向又經壽豐就上,但係搭搭下俾人check飛要補錢
,到而家都唔知悠遊卡係咪唔可以搭火車
。大約11點就到壽豐,間鋪喺火車站行兩步就到,一朝早已經排曬長龍
。
50蚊台幣,出奇地好食,個冰底係攞庶整嘅,等佢溶咗可以當庶水飲
。
食完就搵車搭翻花蓮,個人嚟講比較中意搭巴士,但係巴士要等到12點9先有車,所以喺度食個lunch先。行兩步見到有間池上便當,就決定入去食,因為去池上嗰陣唔記得咗食
。
75蚊台幣,不過唔知係咪真正池上味。
因為間鋪得我一個客,食食下老闆娘就聊我傾計,又叫我教佢用line
,補充翻,老闆娘真係幾老下,跟住教完之後佢話屋企種嘅香蕉豐收,叫我攞啲走,但係我攞翻青旅都冇用,所以食咗一條就算。
蘋果香蕉,真係有蘋果味,第一次食
。
跟住老闆又問我對台灣感覺如何,中唔中意台灣之類嘅問題,當你讚台灣佢地會好自豪,當然,係真心讚嘅
。老闆對香港冇乜概念,所以都問好多關於香港嘅問題,當佢聽到香港有700幾萬人住而地方細過台灣唔知幾多倍嘅時候︰
-->
-->
因為要趕車所以傾多陣就走,等緊巴士嘅時候有個阿婆行埋嚟問路,仲要用台語,我好盡力咁話俾佢聽我唔係台灣人,不過佢都係一輪咀繼續問,後來我話部車係去花蓮火車站,佢就好滿意咁靜落嚟。上咗車之後佢問司機,好彩司機終於答到佢問題,原來係去志學站
。
個巴士司機就咁著件白色背心咬住檳榔單手揸軑,幾chill
,可惜影唔到。
落到花蓮火車站之後就翻青旅坐陣,因為琴日發現原來大廳有個藍芽喇叭,高音甜低音準,於是攤喺度聽陣歌先。
hea到2點左右有人嚟做清潔,所以我都出發,第一站松園別館。
踩上嚟條斜路都幾甘
30蚊台幣入場費
一場嚟到入埋個防空洞
若有風,清爽;若有霧,迷茫,好似好玄咁
成個松園別館俾我嘅感覺係幾舒服,嚟放空一流,不過真係冇乜嘢睇
。
下一站文創園區
離遠見到有個展館有冷氣,於是入去涼下,點知一入去就俾人捉住簽名,原來係搞緊啲拯救東南亞細路嘅活動,成個展館都係佢地義工團喺柬埔寨影嘅相,跟住就有個義工有熱心咁捉住我講解啲相
。佢講解完我都吹翻乾個身,所以就出翻去睇表演,因為4點半會有個原住民跳舞表演。
準備中
講真,不論男女,原住民顏值係極高
。
寧願睇呢啲都唔想睇屯門公園班人妖
同場加映的波表演
睇完之後就去七星潭,踩去七星潭都有啲遠,去到已經成六點。
認真,一去到一車車中國人,成地垃圾,周圍嘈到拆天咁,當堂咩mood都冇曬,所以行咗圈就走人,踩翻去火車站搵嘢食。
嚟台灣唔食多啲牛肉麵翻香港就冇機會
跟住翻民宿hea陣就訓覺,準備打最後大佬,蘇花公路
。
一間好靚嘅青旅