[多圖多字]台灣單車環島-水浸嘅25公里

台灣環島呢個idea大約喺大半年前產生，某日天地堂hea緊嘅時候碌連登見到呢位巴打嘅遊記︰
https://lihkg.com/thread/844026/page/1
台灣都去過唔少次，但係用單車環島嘅方式真係第一次聽，越睇嗰位巴打篇遊記就越心動，正所謂心動不如行動，嗰陣就不斷睇舊登同連登關於環島嘅資訊同遊記，以下呢兩篇我覺得幾好睇︰
(唔好介意小弟share舊登)
https://forum.hkgolden.com/view.aspx?message=6030121&page=1
https://forum.hkgolden.com/view.aspx?message=5078659&page=1
跟住就開始買頭盔呀，手套呢啲裝備，去到7月就正式出發。
寫呢篇遊記有幾個原因︰第一係因為好驚自己有日會唔記得曬呢次旅行嘅人同事，想幫自己留個紀錄。第二係之前追遊記嘅時候發覺有唔少都係爛尾，所以希望寫一篇完整嘅出嚟，將來如果有巴絲想去環島又咁啱睇到小弟呢篇，希望資訊會對你地有幫助。

呢次環島總共用咗24日，全程1303km，平均速度14km/hr，洗費方面萬二萬三左右，如果有伴去share房錢應該可以再平啲，不過一班人有一班人嘅玩法，一個人有一個人嘅玩法，正正因為一條友所以先夠膽去多啲接觸當地人，體會到更多好人好事。

Day 1 關渡-士林
騎行里數︰9.8km
等咁耐終於到攞車嘅日子，但係同時間開始有少少淆，始終要一條友踩二十幾日。租車方面其實來來去去都係嗰幾間，咁我見唔少巴絲都係搵租車瘋，所以都決定搵鳥哥，車方面幾個禮拜前搵鳥哥講定就ok。咁八點半左右就出門口去搭捷運，搭到關渡大約九點四左右，見有啲早，搭多個站再搭翻轉頭。


落捷運大約行十分鐘就到租車瘋，鳥哥仲未開門，咁就周圍行下先。

台灣周圍都係呢啲廟

大約十點二左右，鳥哥終於到啦，跟住就攞咗部車出去，鳥哥就叫我踩去後山兜個圈試車，咁發覺部車轉到某啲齒輪比會有怪聲，跟住鳥哥換第二部俾我，今次終於正常，跟住鳥哥就up一大堆原因講部車點解咁，但係太複雜聽唔明。跟住就開始教基本單車知識，拆胎，換胎，補胎呢啲，一邊教一邊吹水，問我做乜咁多香港人嚟環島，邊位巴絲搵過鳥哥快啲認咗佢。咁教教下嘅時候就有位巴打回程，用兩句國語講咗陣就相認，呢位巴打踩到中途因為手痛踩唔到，跟住都講咗啲注意事項俾我聽，叫我一定要著長褲，好後悔冇聽呢位巴打講，之後就瀨嘢了。傾完就繼續學，去到十二點左右就學完，鳥哥表示：「要下課囉」，意味住環島之旅正式開始。
由於影埋相搞得嚟都成一點，又未試過踩長途單車，最多都係大圍去大尾督，所以決定短短地踩去士林過夜聽朝再作打算。

都幾遊閒下
幾年前去我13日完
average都20/30km/h
每日大約100km
仲留多咗日係墾丁浮潛
唔計機票成個trip好似洗咗3000都無

因為有啲地方想停下玩下
點解可以3000都冇

我去到租車2500TWD10日 extra一日多100TWD
踩到邊住到邊 係airbnb拎line同佢deal 100-150HKD一個人要有得擺單車
食嘢就去到邊都咁平
最貴可能係個浮潛都係6/700蚊咁上下

我都係咁上下，唔知點解用咗成皮嘢

自推+幫推
[url][一人一票]「8月內大型遊行」的遊行、死線、升級日期
https://lih.kg/1439116
- 分享自 LIHKG 討論區[/url]

6月去完，踩過時太趕，忘記睇多d地方，真係預多少少時間周圍行吓

Day 2 士林-中壢
騎行里數︰61km
咁今日大約10點出發，一出大馬路已經要轉左，咁唔識點樣二段左轉嘅我就落車推車。就算環完島我都係唔太識點樣喺台北轉左，因為唔係個個路口都有待轉區，反而其他城市又冇呢個問題。踩下推下搞完一輪之後終於出到台2乙線，咁呢個時候就諗住懶醒唔睇gps靠記憶都出到關渡，點知就出事了。去過台灣都知條條橫街個格局都差唔多，結果早咗一個路口轉，行咗成公里先發覺唔對路，最終都係死死地氣用翻gps。
Google map點我行埋曬啲小路


終於上翻單車徑

又翻到關渡宮

沿住條單車徑一路行就會見到關渡大橋

大約十一點鐘終於上到關渡大橋，第一次感受到逆風

一落橋就有條單車徑，沿住呢條單車徑就可以踩出台15線

不過可能唔係假期，所以條單車徑上面大部份嘅鋪頭都冇開，想買枝水都冇得買，最後決定喺啲巷仔穿翻出去大路，但係一出大路就後悔啦，沿路都係不停上上落落，對於冇單車經驗嘅我真係好痛苦。踩咗陣見到間family mart，嗱嗱臨買幾枝舒跑。

再踩多半粒鐘左右見到間7仔，入去食個飯順路避下太陽。
盛惠60蚊，其實都幾飽肚。

食完飯坐到1點左右就出發，因為距離中壢仲有3,40公里。之後嘅一段台15都算輕鬆，因為未出到海邊，所以唔洗逆風住。
好中意影呢啲牌

踩多陣就到咗同台61線共線路段，姐係出咗海邊，基本上大風到踩唔旭，出盡力都係得5,6 km/hr，唯有踩下停下回氣。
曾經以為西部嘅海已經好靚，但去完台東之後真係翻唔到轉頭

鏡頭嘅右手邊有個踩RB嘅台妹喺度睇海

不停上上落落+逆風

踩過台15嘅都知道一出海邊係冇曬補給，而求先買落嘅舒跑又飲曬，嗰下真係好絕望好彩踩多陣落翻橋嘅時候有間賣檳榔嘅，嗱嗱臨叫杯紅茶嚟飲。飲完之後後面有2個環島嘅走埋嚟say hi，知道我要去中壢之後佢地話仲有好遠，嗰下即刻灰咗，心諗淨係踩咗30公里已經得翻半條人命，之後仲點踩壽卡同蘇花。踩到3點左右終於可以離開海邊，見到間7仔就入去買舒跑，呢個時候無嗱嗱一陣怪風，成部單車吹跌咗，本身都諗住冇乜嘢，但係之後踩踩下發覺個碼錶壞咗計唔到時速，搵個地方停低inbox鳥哥睇下點整，但係整極都整唔到，最後唔鬼理佢繼續踩。
準備左轉113縣道，對比起其他縣道其實113條路都算幾靚。

幾中意喺日落踩車

基本上之後都冇乜影相，因為真係太攰，淨係想快啲到民宿。

大約6點半左右終於到民宿，環境幾好，冇記錯好似170蚊港紙。

沖完涼洗完衫就去中壢夜市搵食

行行下落狗屎，求其搵檔坐低，叫咗個麻油雞飯，都幾難食下。

食完就翻民宿，成身痛到用按摩膏都唔掂，睇咗陣電視就去訓覺。

有機會再去過

自推+幫推
https://lihkg.com/thread/1441682/page/1

721
我冇嘢講

Day 3 中壢-頭份
騎行里數︰59 km
咁今日9點左右訓醒，個膝頭同背有啲痛，所以決定踩去頭份就算，book完民宿加執嘢已經10點，咁走嘅時候咁啱見到老闆同老闆娘，傾咗一陣，老闆就話之後有咩問題可以隨時line佢，又塞水俾我，第一次感受到台灣人嘅熱情。佢地揸車走咗之後我都出發，一轉出台1線就見到間單車鋪，順路入去整一整個碼錶，整緊嘅時候老闆知我係香港嚟，就問下香港咩情況，咁我都好詳細咁解釋一次成件事，之後嘅旅程好多人都問呢樣嘢，其實好多台灣人都好支持我地。搞完一輪發覺拆個碼錶出嚟再裝翻就冇事，戴翻頭盔準備走，老闆見到就話咁樣戴保護唔到個頭，幫我較過條帶再幫我戴，成程老闆都好似冇打算要收錢，但係唔比錢又好似好怪，跟住問下老闆要幾多，佢就話100塊就算啦，咁say個bye就繼續行程。
台1線坡度

離開中壢之後仲有15km嘅上坡，但係都唔算太辛苦，因為內陸地區冇海邊咁大風。
長命斜

女人的天堂，男人的戰場，所以話台灣真係

12點左右正式離開桃園

跟住就開始下坡，見到有間7仔就入去食個飯，52蚊，味道一般

照舊hea一粒鐘左右就出發，呢個時候發覺隻腳曬到好痛，所以一路都留意沿路有冇運動用品店，咁啱見到一間，就入去買條legging，1200台幣，但係總好過曬傷。(其實已經曬傷咗)
走嘅時候老闆個fd提我叫我踩快啲，因為好快會落雨，但最後去到頭份都平安無事。
真係好曬

仲有19公里，但係去到市區起碼25,26公里

環島1號線

好彩冇雨

我飲水咋，唔好咬我

有條橋機慢車唔上得，要喺火車軌隔離踩

又係暗斜，臨入頭份前有大約7公里爬坡路段

台灣啤酒其中一個產地

今日冇夕陽睇

大約5點半入到頭份市區，係咪每個地方都有呢啲石頭

民宿主人好貼心，book房嘅時候叫我到前半個鐘搵佢，原來就係想開定冷氣。幾中意呢啲style嘅房，好似170港幣左右。
Do what u love, love what u do

沖涼嘅時候就瀨嘢啦，因為已經曬傷咗，所以用暖水沖涼都會好痛，唯有用凍水。沖完涼洗完衫就去搵嘢食，印象中呢日都幾痛苦，你講得出嘅位都又酸又痛，特別係屎忽，如果冇著單車褲應該仲大鑊。
210台幣嘅邊爐，雪糕飲品無限供應，抵玩過吉邊

食完去大潤發買幾條蕉就翻去休息。

幫推
[突發] 原來大家要死咬住721 先有機會嬴 ! ! !
- 分享自 LIHKG 討論區
https://lih.kg/1442224

還台真係好正 想一戰

計劃下啦

LM

支持

啱啱環完，記得做足防曬

原來你已經完成咗
自膠

幫推
一個老婆婆教我地依家應該點做
https://lih.kg/1452124
- 分享自 LIHKG 討論區

我認得你個po呀巴打

返咗香港未？

今次環島經歷咗人生第一次地震，又有颱風

返咗
我就淨係打風

Day 4 頭份-沙鹿
騎行里數︰70 km
今日照舊9點先起身，一起身都係全身酸痛，唯有查啲按摩膏頂住檔先。原來book民宿打算book台中市中心，但係要踩成80公里同埋爬一個幾百米嘅坡。
到台中市中心就要行台13線

自問仲未有心理準備爬咁高，所以決定繼續行台1線去啲市郊地方過夜，避開上斜路段。咁book完民宿執完嘢大約10點就起行。
民宿地下，老闆一家已經走咗。

跟住就去搵早餐鋪，好好彩一出翻台1就見到一間，台灣好似冇乜人10點先食早餐。

食食下嘅時候老闆娘就聊我傾計，知道我一條友香港嚟仲要係環島就覺得好驚奇，因為喺台灣人嘅concept入面好少外地人會特登嚟環島，跟住走嘅時候佢送咗個飯包俾我，話︰「一會兒你走台1線沒有什麼便利店，這個你留著吃吧。」嗰下真係。咁跟住就繼續行程，踩咗陣就到造橋鄉。

好曬

等等下燈有個阿伯行埋嚟叫加油

一過咗造橋鄉就開始爬坡，上上落落咗好幾次，仲要真係冇補給，嗰下真係好想放棄。
最後嘅山頂

跟住就下滑到後龍鎮，由食完早餐兩個鐘後先見到第一間7仔。
60蚊，陣味幾似譚仔麻辣，不過食落甜嘅。

爬坡爬到頹咗，真係驚連壽卡都上唔到，跟住check一check坡度圖，發覺出咗後龍鎮仲要爬多2個百幾米嘅山先完，最後決定經台6線出翻海邊踩。
台6線行2公里就出翻海邊

台6線終點

跟住問題就嚟啦，台6終點係駁住台61線，但係台61係高速公路嚟，但係google又話可以照行，咁啱見到有條乜鬼苗栗自行車道，就以為係行嗰度，點知踩到盡頭係地盤嚟。唯有搵個地盤工人問路，原來台61隔離係有條路專比機慢車行，咁佢就教我行條捷徑上翻去。
同高速公路嘅共線

唔好睇少呢啲暗斜，加埋逆風真係得3,4km/hr咁轆上去。人就係咁，當你逆風嘅時候就寧願爬坡，爬坡嘅時候就寧願逆風。踩多半粒鐘左右就落翻白沙屯同台1線匯合，大約3點9左右就到通宵鎮。
老闆娘送嘅飯包，有啲榨菜肉鬆喺入面，幾好食。

5點鐘正式進入台中市，其實個屎忽已經痛到痴線，一等燈位就企起身放鬆下。

又係望住夕陽踩車


大約6點8終於爬完最後一個坡到大甲，之後到沙鹿都係落斜路段。
大甲溪橋外望

準備落斜

入到沙鹿已經天黑，第一次踩夜車

8點左右到咗民宿，由於真係好攰，所以冇影到間房，房錢都係160左右，幾乾淨。沖完涼求其搵間7仔食，點知最近都要2公里，唯有踩車去。
事彈食個頹面麵。

跟住翻到民宿幾到有部琴，手痕嘅我就問可唔可以彈下，好彩都識少少周杰倫嘅歌，就係咁，老闆娘就放咗我彈琴嘅片上fb。

咁啱佢老公個細佬生日，咁就順路整首生日歌助興，跟住齊齊食蛋糕。


搞到十點左右就散band，翻房碌陣連登就訓了。