Day 6 彰化-嘉義
騎行里數︰78公里
琴晚訓得唔係幾好,始終係訓地下,所以查少少按摩膏先出發,照舊出發前book定民宿先,搞完一輪9點正式出車。一出路口就有間7仔,食個手卷當早餐,其實台灣7仔啲壽司係幾好食
。食完就搵路出翻台1線,今日主要都係沿台1線行。
大約11點到員林,但係又未肚餓住,所以唔入市區繼續行台1線。
見到有間咩生活超市,入去買幾枝寶礦力,7仔賣25呢度賣23。
諗起孫燕姿首天黑黑
點知影完呢幅相真係落雨
,出盡力爆去幾百米前嘅7仔順路食lunch。
枝奶茶幾好飲
,喺香港係唔會捨得買
。
好彩落咗陣就出翻太陽,於是繼續行程。
跟住去到下一間7仔,check check google map發覺再下一間7仔要過咗西螺先有,於是入去買定幾枝寶礦力,點解買寶礦力唔買舒跑,因為嗰期響應緊支持寶礦力,人在外地乜都做唔到唯有用呢個方式支持下
。
7仔嘅尿兜前永遠都有呢啲
補給完就出發去西螺大橋,一路都係逆風再加埋無盡嘅紅燈,嗰下踩到好燥。
10幾公里嘅大直路
係幾靚嘅
繼續沿台1線就會去咗新西螺大橋,而新西螺大橋係乜春都冇得睇,所以要右轉145縣道去舊西螺大橋,不過唔洗擔心,指示都幾清晰。西螺大橋全長1.9公里,係觀光橋嚟,大貨車唔比上,所以雖然橋窄,但係唔洗太擔心安全
,不過橋上面全程逆風真係想死
。
落咗橋踩段路就匯合翻台1線,沿路都冇乜特別,所以決定播下歌提神
。由呢日開始基本上一離開市區就播歌,不過唔係播無盡之類嘅打氣歌,而係聽下普通情歌,感覺更舒服
。
樹蔭下回氣
去7仔食個手卷先
藍天白雲
5點幾,仲有大約二十幾公里先到民宿。
喺西部可以望住夕陽踩車
好中意夕陽踩車嘅感覺,所以日日10點先出發
。
隔咗陣忍唔到手影多幅
但係另一邊開始多黑雲
到咗民雄嘅時候已經7點,距離嘉義市中心仲有5,6公里。
放煙花
到市中心已經7點半,又要天黑踩車
大約7點9左右就到咗民宿,咁啱老闆娘都揸車翻到嚟,跟住就叫住我︰「你就是那個環島的男生嗎?來來來,這邊。」跟住就帶我泊車,又捉住我影相,話︰「可以跟你拍張照嗎,一個人來環島很厲害喔!」無可否認,嗰下係飄咗,但當然就口裡說不啦︰「不厲害不厲害啦」為免自爆合照就唔放出嚟,影完一輪就帶我上去。
今晚盛惠170左右,成間屋我住曬,老闆一家住樓上。
沖完涼老闆娘就問一唔一齊食嘢,因為佢啱啱台中翻嚟未食飯,咁梗係話ok啦
,跟住就同老闆一家人出去食。
老闆揸車
一路上佢地一家人都好關心香港嘅情況,咁當然又不厭其煩講一次,基本上問得香港咩情況嘅都好支持香港
。
跟住喺文化路夜市落車,老闆同老闆娘就一路介紹夜市有啲咩特色呀,邊檔好食呀之類,嚟到嘉義冇理由唔食嘉義雞肉飯,所以老闆娘就帶咗我去一間嘉義雞肉飯度食。佢講過一句都幾深刻嘅︰「每個嘉義人心中都有一間好吃嘅嘉義雞肉飯,就好像你們心目中都會有好吃的燒味。」不過我覺得魚蛋燒賣好似貼切啲
。
又真係幾好食嘅
食完埋單嘅時候老闆娘就話︰「誰點的誰付錢。」跟住唔洗我俾錢,真係好多謝你地呀
。
文化路夜市
老闆娘推介,沙茶魚頭
飯後甜品,好好食。
跟住又係「誰點的誰付錢」,於是又係老闆請
。食完之後仲不斷問我係咪真係夠飽,唔夠可以繼續食,講真繼續食真係會唔好意思,何況已經夠飽,所以就上車回程,臨走前喺夜市嚟張大合照,為免自爆,呢張都唔會po出嚟。點知老闆話唔好翻去住,車住我周圍兜介紹嘉義嘅景點,正因為老闆一家嘅熱情同埋覺得嘉義幾有feel,所以決定喺嘉義留多一日
。冇plan就係有呢度好,去到有feel嘅地方想停就停
。翻到民宿洗埋衫9hea一陣就訓,第一晚係超過12點先訓。