Day 11 屏東-恆春
騎行里數︰63 km
由屏東去恆春應該要踩90公里左右,但係最終淨係踩到63公里,下面會解釋翻發生咩事。今日8點就起咗身,食咗兩個杯麵做早餐,8點半左右就出發,點解去恆春唔去墾丁?好簡單,墾丁啲民宿太貴。
踩咗陣又重回台1線嘅懷抱,今日係最後一日喺台1線上面。
踩踩下嘅時候有個機車大叔從後閘停我,當我以後係咪cut線阻到佢時,佢問我係咪要南下,提我一出海岸會好大風要小心啲,跟住送咗兩枝寶礦力俾我。多謝完想影佢個背影時佢已經去到好遠,而摸落兩枝寶礦力仲係凍嘅,所以都幾肯定佢係見到我先買再追我再送俾我,而唔係隨身帶定。
真心好warm
大直路
台1線411公里處,仲有49公里就行完成條台1
呢段路都舒服
跟住到咗潮洲鎮開始落雨,咁啱有間7仔,於是去換拖鞋著雨褸,嘉義老闆娘送俾我件雨褸可以大派用場,跟住用密實袋套住部手機,所以原諒我之後冇乜影相。btw密實袋真係要帶,一來防水,二來仲可以隔住個袋禁電話。
要打水戰了
整理完就繼續出發,越踩越大雨,只要一見到路邊有啲簷篷只入去停一停抹眼鏡,因為成塊眼片都係水珠完全睇唔到路。去到某一個簷篷諗住入去嘅時候,原來有隻狗喺度,但係我完全冇為意,隻狗直程邊吠邊撲埋嚟,好彩有條繩鎖住佢,嚇到我嗱嗱臨繼續踩。
入family fart整理下,基本上馬鞍袋同個頭已經濕曬,戴唔戴頭盔都冇乜分別。
順路serach下可唔可以搭火車去恆春,發覺恆春係冇站嘅,姐係幾大雨都好我都要繼續踩。踩多幾公里到下一間7仔,見到有成20部單車泊喺度,都幾肯定係環島嘅,但係冇理咁多,嗱嗱聲食個飯都抹乾個身先,因為成身濕曬所以都唔敢喺室內食,唯有喺室外食。食食下有個阿叔行埋嚟吹水,都係問嗰啲問題所以唔重覆啦,佢就提我越南下只會越大雨,同埋聽日都會係咁大雨,叫我考慮下喺恆春停一日。傾完之後都繼續出發,嗰團人都準備出發,原來個個只係讀緊小學,有幾個大人帶住咁踩,咁就約埋喺下一間7仔等一齊踩。
之後繼續都係踩下停下抹眼鏡,個阿叔冇講錯,越南下越大雨,仲要不停行雷閃電,大雨到有雨褸都冇用。踩多一個鐘到下一間7仔,即刻著多件衫喺面,費事感冒,跟住同環島團吹下水,佢地仲話寧願咁嘅天氣踩都唔想出太陽,呢個時候已經大雨到啲車要著住死火燈行,跟住佢地問我一唔一齊行,我就話等細雨啲先,於是佢地就繼續踩,真係好佩服啲細路。
其實個天係好黑,唔知點解影到咁光
等多陣都冇細嘅跡象,唯有繼續踩,踩多幾分鐘已經頂唔順,見到有間廟就入去避雨。
咁啱都有pair機車夫妻入嚟避雨,跟住就on99咁你眼望我眼眼咗成粒鐘,大家都好無奈,但係雨根本冇停嘅跡象,嗰陣已經成4點,睇一睇google map仲有30公里先到恆春,根本冇可能入黑前去到,所以check下楓港有咩住宿,見到5公里外有間motel,於是決定去嗰度過夜,呢個時候成條馬路已經係黃泥水,但係都冇辦法都要踩,終於都motel,櫃枱話1000蚊,都冇諗咁多,嗱嗱臨入房沖個熱水涼,同埋同恆春老闆講聲sorry去唔到,因為係經airbnb過數,所以都冇得退錢,但係都冇辦法。沖完涼嘅時候收到老闆message,話佢可以開車嚟接我,叫我send個位置俾佢。
成車泥,幫架車沖沖水,費事整臭老闆架車。
半個鐘後老闆嚟到,架車又真係啱啱好夠位擺單車,跟住就坐車去恆春。
係有啲遺憾,因為影唔到台1線終點個牌,同埋沿路乜風景都冇曬,好天時台26嘅風景真係冇得頂,跟住喺車上面老闆都一路笑我,話早啲call佢就唔洗蝕1000蚊,但係又點會諗到台灣人可以好到咁,唯有自我安慰用1000蚊沖個涼所以唔洗感冒,所以都值嘅。而沿路都已經水浸,係唔會踩到車嗰隻,唔知求先班環島團咩情況。而呢段路都係唯一一段冇踩要坐車嘅路,就係標題嘅水浸25公里。
大約半粒鐘後到民宿,老闆娘已經喺門口等緊,話︰「快點進去喝杯熱水,不然會感冒喔。」又幫我掛起啲雨褸毛巾,係幾感動嘅,而好好彩最後都冇感冒。
盛惠170蚊
搵完一輪落街食個單機邊爐,100蚊
因為今朝阿叔話聽日都會落雨,所以同老闆講住多晚,順路吹翻乾啲衫褲,照舊skip咗airbnb當面交錢。