[長文慎入]逃犯條例與香港樓市、經濟之關係

借人ac開post，肺腑之言，希望大家俾耐性睇。二樓有short version。另外勿quote一樓。

1. 香港背景
香港一直以來有內地無法媲美既法治優勢，雖然民主進程緩慢甚至用停滯倒退黎形容亦不為過，但香港對商業發展極其重視，商人既利益得到保障，要做生意唔使咁多潛規則。私有產權亦受到保護，吸引投資者買入香港既資產。另外，2001年中國加入世貿，內地經濟開始騰飛，從中牟取暴利既貪官自然會將一部份財產轉移出去，英美澳加不在話下，香港亦係走資者上上之選。但係逃犯條例會對呢一切有咩影響？

2. 香港樓價高之原因
2003年香港經濟從低位中復甦之後，失業率大多長期維持在低位。樓價不斷上揚，再無出現過九七咁大既調整。樓價不斷突破高位，有人歸因於內地人來港同本地人搶資源：上有有錢人買豪宅，下有窮人搶公屋。但係，樓價永遠唔係一兩個因素就可以完全解釋到。而我個人認為，香港政府既放任政策、同長期經濟好，係主因。

政府可笑既賣地政策，長期利益輸送俾大財團，又無租務管制、反壟斷措施。地產商唔囤地、唔炒高樓價、租金，簡直對唔住自己良心。人口、房屋政策又差得令人髮指，基本上完全偏幫外地人，推本地人去死。

只係，我唔認為政府管治差係樓價高既全部原因。香港長期經濟好，係第二個主因。04至19年，其實香港大部分時間經濟都唔錯。08金融海嘯，並無傷及香港之根本，加上美國隨後量寛，十年內熱錢不斷湧入香港。造成香港資產價格不斷上升，甚至有樓價只升不跌既神話。

十幾年既大升市可能令好多香港人覺得經濟週期不適用於港樓，已經有無數專家估錯樓市會有大調整。不過我有啲擔心，呢一切只係一個狼來了既故事。

九七樓價開始大跌，其中一個原因係港元受狙擊，政府要出手同時救匯率同股市，息率被挾高。我有一個猜想，當香港貨幣/經濟環璄有異動，引致大量資金流出、息率出事時，樓市就有大調整既可能。呢種情況，自九七以來未曾出現。

3. 逃犯條例
逃犯條例，適逢貿易戰之時推出，自然不難明白中共既意圖。除咗捉拿外國人增加政治籌碼之外，收割商人財產、控制香港財閥亦係一個理由。面對貿易戰，中共要利用一切可用既資源補充力量，自不可放過香港。

中共要用逃犯條例對付既有錢人大概有兩種：第一種係自內地走資而來既內地人，呢種人大陸掌握晒佢地既資料，只係苦無手段去收割佢地，逃犯條例係不二之選。第二種係本港商人同外國商人，前一種人開始收割之後，中共慢慢掌握捉人竅門，亦會對佢地落手。

內地走資者面對逃犯條例自然十分驚青，我唔清楚佢地仲有幾多仍然留喺香港，換轉係我，我一定儘快賣出轉走香港資產，然後逃走到外國。另外，習近平敵對派系亦可能有可觀資產喺香港，亦係收割對象。之前內地打貪補完血，喺香港繼續補血。

逃犯條例通過之後，香港有錢人就面對住無處不在既危機，終日惶恐幾時被人收割。我唔係上流人士，我唔知道佢地有幾驚，有幾大打算帶走資產離開香港。我只可以估計會有相當數量既資金流出。

貿易戰既環境係動態既，五月初談判破裂打破多人既幻想，證實中共唔容許自己管治權力受到任何動搖。至此，貿易戰變成不死不休既局面，美國必定要打破中共對中國市場既控制，從而分一杯羮，確保自己技術優勢可以得到最大發揮，佔領市場。而中共賭上一切去維護政權，即使人民生活倒退幾十年亦在所不惜。雙方不斷擺出籌碼施壓，香港係一個重要角力場。上年有唔少風聲香港政策法會被取消，年初和談之際風聲又減弱，現時則風聲再起。目前為止，美國制裁手段集中於關稅，所以大家只能夠觀望，美國施壓手段會唔會從經濟轉向政治層面，以政策法、凍結中共高官資產出手。

4. 資金流出與經濟影響
逃犯條例會引起資金流出，幾大規模我唔知，但假設有幾百億以上既話，會對香港經濟、銀行體系造成一定衝擊。現時銀行體系結餘大概有五百億港元。資金流出之下，要保持銀行體系穩定，息率一定上升。會有人大量拋售港元，匯率會受壓。以香港外匯儲備要保住匯率基本上無問題，但係息率同股市好大機會成為犧牲品(參考97)，因為聯繫匯率係香港既命根，絕不可失。(與其相信中共用外匯儲備補血，我比較相信佢用逃犯條例補血。)

息率上升，令借貸成本上升，香港經濟發展會大幅減緩。如果息率升得太誇張，會有唔少公司周轉不靈倒閉，亦可能有人供唔到樓。

另外，外商撤資，會減少香港就業崗位。失業率上升，消費緊縮。香港會進入衰退週期，而且同08、15年短暫回調唔一樣，之前只係外圍經濟既波動，今次經濟環境係香港本質上既變差，復元期將會更長。香港經濟成果大部分由地產托住，泡沫如果爆破，可以輸剩條底褲。供緊樓既中下層同中產會被洗劫。

以上我講既只係提出一個可能性，唔確定會唔會發生/幾時發生。但係一切問題都會係連鎖反應咁爆發出黎。大家要留意最新情況，居安思危。以上情況發生既徵兆我諗到兩個：銀行體系結餘跌至近零、短時間大量豪宅賣盤出現(有錢人開始走佬)。

Short Version:
逃犯條例如果導致大量資金流走，小心提防好似97息率同股市既危機，同以往十幾年情況有根本性分別。另外留意兩個徵兆：銀行體系結餘跌至近零、短時間大量豪宅賣盤出現(有錢人開始走佬)。

唔太確定，我覺得多數唔會。唔打大既，打細既，一樣會激嬲中共，但香港高官對中共可有可無，威嚇力唔大。

[撤資] 政Whats噏：林健鋒突減持3個住宅連7個車位
https://lih.kg/1154051
- 分享自 LIHKG 討論區

我都正想講依單野

lm

除左傳媒報導知仲有幾多銀行體系總結餘, 自己有無方法查到實數?

所以你見民主黨，平時 hea 吓 hea 吓，今次駁老命同港共死過，就知呢鑊好嚴重

顛狗幾時死
https://lih.kg/1154053
- 分享自 LIHKG 討論區

人算不如天算

不過錯嘅，又點止佢地