DAY5
大約5點一天光架車就到咗,但係原來佢係去到Safranbolu附近一個車站要再轉免費接駁車,等咗成個幾鐘都仲未有我架車
一路擔心我會唔會miss咗架車唔知一路撚貓影下相
當地人見你揸相機就會好興奮叫你幫佢影相
就算明知佢只係可以喺你個mon睇返張相都會好開心
差唔多兩粒鐘終於等到啦
仆你個街原來去到落車個位都仲未係目標個小鎮
比多1蚊搭架校巴咁樣嘅巴士落去啦(去到呢度我係周圍問堆唔識英文嘅土耳其人Carsi點去先知有巴士搭落去
)
我都唔知Carsi係咩,我淨係見到書入面個地圖寫個小鎮係Carsi,聽讀音我估係集市掛
Safranbolu係出發前最期待嘅一個地方,因為事前睇過資料佢係成個小鎮全部屋仲保留住幾百年前嘅鄂圖曼時期建築,歷史野我唔多熟,只係知道成個鎮都納入世界文化遺產而且真係好靚
終於到達呢個小鎮啦,係時候contact返前一日識個香港人啦,佢話佢住間hostel仲有一個位叫我過去喎,又好近個小鎮中心,咁就過去啦間野我仲記得叫EFE GUEST HOUSE,都係25TL包早餐,嗰陣有個日本女仔環遊緊世界喺呢間打工換宿,又有對日本夫婦環遊緊世界啱啱check out去下一站,個香港男仔同一個韓國仔過嚟,個韓國仔又係環遊緊世界
到呢個時候仲年青嘅我發覺自己嘅世界真係好細,環遊世界對於我嚟講係幾咁遙不可及嘅事,但出到嚟原來對於好多國家嘅人都係一件好平常嘅事,特別係日本人佢地英文真係好差,但佢地就係有咁嘅能力咁嘅決心去環遊世界
順帶一提個韓國仔同我好有緣,之後成個trip好多都有佢存在,甚至喺希臘都撞得返佢
食個早餐入房擺低野就出去啦
呢日係一時興起喺本書度見到一個地方叫Amasra,本書無咩點介紹呢個地方,只係佔一小格過佢係黑海沿岸一個小鎮,但張圖有條古老石橋吸引咗我
於是我就決定要去
去完之後完全無後悔,好撚正好舒服嘅地方
一個外國遊客都無(當然唔係誇張到一直都無遊客去過,只係真係好少人去,一日都未必有一批外國人入去),就算本地遊客都唔多,物價極平,食個Gelato只係1TL一球
個香港男仔都無咩plan,佢有聽過呢個地方但本來無諗過去,見我打算去就join埋啦,而個韓國仔話病咗唔出去啦,瞓足全日
問題嚟啦,本書只係話搭巴士去,完全無講邊度搭咩巴士,咁唯有搭返車上去巴士站問啦,佢話個半鐘就到,但係仆你個街搭搭下佢停撚咗車話要轉車,停停下轉撚完車成三粒幾鐘先到
不過因為好早出發,所以去到都好多時間,佢都係一個小鎮唔係行好耐
1TL Gelato
就係為咗呢條石橋
好似好多人會由橋上面跳落去游水,有個告示牌叫人唔好頭向下咁跳
沿住一條路會行到上個城堡廢墟,上面可以睇到成個鎮
鎮中心有架小火車周圍載小朋友坐,個司機仲叫我地上車
hea下hea下又一日,又坐幾粒鐘車返去,返到去天都黑晒
又完一日
好似夜晚買咗pizza同韓國仔一齊食
附近有間土耳其浴本來想試下,但係個價錢太過遊客價所以算鳩數
DAY5完