[極多圖遊記]N前年土耳其乜都唔book就出發之旅[多貓]

首先要講係呢段旅程已經六年前，如果要去嘅巴打做參考就算，我都唔知而家土耳其變成點
但呢段旅程真係好難忘，當時喺舊登已經想打篇遊記分享下呢個咁正嘅地方，但一直都懶 因為最近發現以前有好多相都唔見咗，怕呢堆相都唔見埋就打咗出嚟先
可能會有舊登巴打認得我

呢次係人生第一次backpacking，唯一一次咩都無book無planning咁旅行

話說六年前我仲係一個讀完濕鳩ive打緊散工嘅廢青，買咗部垃圾Pentax相機想去旅行影下靚相，某一日去書局屎忽撞棍見到有本書講土耳其遊記就拎起睇睇啦，一睇之下就買埋返屋企，本來都係睇下就算，又有一日喺網上面見到講緊伊斯坦堡係一個橫誇歐亞嘅神奇地方，就開始燃起呢個出發嘅念頭啦，又咁啱當時卡塔爾航空出promote去歐洲來回六千幾蚊，見自己單身一個咁鬼得閒又賺到少少錢，即刻買咗佢啦，又見佢話open jaw一樣價，以我呢啲窮撚心態又未去過歐洲嘅人，心諗喂一樣價錢緊係去多個地方啦！ 於是睇下地圖，希臘原來喺隔離，結果就買咗一張飛去伊斯坦堡再喺希臘走嘅機票啦
兩個細個都只喺歷史書睇過嘅地方，諗都無諗過自己有朝一日會有機會去嘅情況下，就係咁比我去到 結果去咗一個好撚正嘅國家
買完機票第二日就炒咗老細等出發，一路搵好多資料，當時都無咁多巴打去，資料都幾難搵，又去書局買左本類似lonely planet咁字多過圖嘅書，於是乜都唔book 就出發啦。
住宿，交通全部都無book，想可以好自由咁喺某個地方留幾日就留幾日。

當時真係好少土耳其自由行資料，手機資訊又無咁發達，真係要拎住本書搵資料搵路 對比起而家去旅行真無完全唔會買書去

貼幾張圖先，人喺外國未必夾到香港巴打時間出post

出發坐卡塔爾航空轉機點樣唔講啦我諗都好多人講過，貼張臨落機影嘅歐亞交界相先啦，都代表住坐爛屎忽終於都第一次踏足歐洲土地啦


好彩小弟無時無刻都可以好好瞓，所以瞓足全程機落機好好精神，過完關出到市區就面臨第一個大挑戰：搵地方住
雖然知道hostel係可以walkin,但係都會怕可能walkin比人劏 我個樣又生得細個，但係唔驚得咁多啦，一間一間問格咗價先算
去到大部份backpacker會住嘅舊城區Sultanahmet就開始搵啦，(住Sultanahmet好處係多hostel同所有大景點都係幾分鐘路程)
終於搵到一間15euro一晚包早餐，貴少少不過照住啦，其他都開價20euro，hostel係邊間已經唔記得，不過正正常常啦
同班德國學生同一間房住左一晚飲下酒吹下水，瞓醒見到班德國妹喺你面前換衫 大個咗住得多hostel再見到已經習以為常

check in 完就出去周圍睇啦，無目的亂鳩咁行影下相



好先進嘅土耳其地面鐵路系統，幾年前啲車都仲靚過港鐵
一路行一路好多人同你搭訕，有條友同佢吹咗好耐水又問我有咩plan點點點，結果佢係旅行社搵生意諗住幫我book晒之後巴士同酒店，仲話希臘都可以幫我book埋，但夾埋夾埋成千蚊euro 想水鳩我？ 同佢講第二日去搵返佢就走咗人，不過都係多得佢我知道可以搭船跳島玩希臘 就係咁我決定好土耳其嘅終點放落Kusadasi,但係中間行程仲未決定

行行下行咗去埃及市集，一去到有好多好濃烈好獨特嘅香料味，呢個時候終於明白點解旅行要親身去，呢股味道真係形容唔到，未喺其他地方聞到過


都好多香料茶賣

土耳其周街都係嘅evil eye,傳聞爛一粒就係幫你擋咗一劫，土耳其人放喺自己車度同屋企好普遍，呢啲應該都比人講到爛唔多講啦


旁邊有個Yeni Cami清真寺
又亂行下過橋去新城區睇一睇，好快天黑就返返hostel




毒撚第一餐唔知有咩好食，求其買咗個包就返去，夜晚喺hostel天台同班德國學生飲啤酒，土耳其得一個牌子啤酒可以買就係EFES，好彩都唔難飲
第一日完 多人睇就update得密啲啦

留名! 4月尾跟團去，希望成到團

有無人知點解我upload啲相比起就咁喺電腦開張相出嚟睇淡色啲 ，無upload個問題定張相問題？

貓呀

6年前1TL兌4HKD，唔計機票一個月計埋希臘大約萬一萬二HKD
係咁上下唔係好記得，希臘洗貴係貴好多好多，我諗如果淨係土耳其一個月應該7000-8000一個月都得

以5,6月計（6月尾開始旺季成個夏天都會貴）建議5，6月去，30日得一日天氣唔好，又舒服唔會太熱，又未到歐洲旺季
當時一晚hostel 20-25TL，包一份好豐富早餐
去餐廳食一餐晚餐6-10TL，想慳食kebab 2-3TL
飲品零食去超市買好平
雪糕檔買個雪糕1，2TL就有
車厘子2TL 講緊買一大袋1kg，好甜

交通方面去其他城市長途巴士大約20TL一程，大部份長途都可以揀通宵巴當住宿瞓咗佢，又慳錢又慳時間，而且好多都係用benz車，好舒服

平均每日見到二十隻街貓

Lmlm

留名
土耳其+希臘一齊去

算係窮遊啦，但我覺得係應洗就洗
食野我唔會慳，就算去到希臘餐餐都百幾蚊港紙一個意粉我會照食，通宵巴士我自己覺得舒服瞓得好所以慳返住宿，住hostel又係純粹搵個地方過夜無咩所謂，因為backpacking都買唔得多野，買咗少少手工藝品做souvenir都好平
有個地方玩滑翔傘呢度都無慳，加埋錢買相買片
門票有時幾貴會諗下自己係咪真係有興奮先入

始終去旅行食方面我覺得係最體驗到一個地方文化，點慳都好想食我就會比錢食

黎緊二月去，希望坐到熱氣球

熱氣球我反而無坐😂太貴，而且我發現有個山仔行上去就可以影到我想要嘅畫面
最重要係臨出發前先發生完埃及熱氣球單野，去到Cappadocia同hostel有人話早兩日巴西又一單
當時嘅我就算真係想坐都未必夠膽去坐

DAY2

天都未光晒就醒咗，唔係因為早瞓，係因為hostel附近就係藍色清真寺，每日會定時響幾次鐘提人禮拜，不過小弟真係好瞓得，響完無幾耐就瞓返 到真係起身就走去藍色清真寺行下啦
一入去首先見到一隻看門貓 內部都係睇佢天花板清真寺啲圖案




幾靚幾靚，不過好快行完，之後就去隔離聖索菲亞大教堂


呢個要比入場費，好貴 但一場嚟到無理由唔入，我又特別鍾意古蹟，所以豪比佢啦，呢座教堂歷史意義重大，佢開頭係東正教教堂，之後比天主教搶咗，然後東正教又搶返，最後係變咗清真寺 所以成座野個風格好獨特
其實入面真係好靚好值得睇，可惜如圖所見有半邊維修保養中 好似話要整幾年






參觀完先係中午，街邊買咗個kebab卷食飽又撚下貓就返hostel瞓個晏覺 夏天個歐洲去到9點幾先日落，好多時間用

瞓醒又出去行，順帶一提我係帶歐元過去再用歐元喺當地找換店唱錢，一嚟兌率比較好，二嚟我可以用幾多唱幾多，剩返啲歐元可以去希臘用，部份hostel可以直接比歐元同幫你唱錢，當然兌率比較差
出去草地坐下，大部份土耳其人會用好好奇嘅目光望下你，夠膽少少會過嚟問你可唔可以合照，因為佢地好少見東方人 一見到就好似見到明星咁，成個trip好多學生妹搵我合照 係一個為毒撚尋找存在感嘅國度呀


呢兩婆孫都唔識講英文，但個男仔阿媽識少少，嘗試同佢地傾下計，佢地係土耳其東部過嚟旅行，近住敘利亞附近，嗰邊更加少東方人，而且佢地都仲比較保守女人仍然戴頭巾，土耳其西部近歐洲已經好西方，好多女人都唔洗戴頭巾，遊客甚至本地人去沙灘都可以著bikini
之後去地下水宮殿，個名咁靚都只係千幾年前一個地下蓄水池
但行到落去睇又真係好靚喎，好驚訝千幾年前可以起到個咁宏偉嘅地下建築，入面啲水仲見到有魚



唔知係咪要鎮壓梅杜莎
出返嚟又有隻貓瞓得好舒服

甘地講得好：一個國家嘅文明程度就係視乎佢地點樣對待動物
睇得出土耳其啲街貓係完全唔驚人，行到過去會反晒肚任摸唔嬲，證明佢地根本唔會無啦啦走去嚇啲貓，而且成日都見有人餵啲街貓，而土耳其人絕對係我見過最nice最熱情嘅一個民族，詳情後面劇情會繼續講
開呢個post都係想比大家知道伊斯蘭教唔係想像中咁恐怖，其實土耳其人人真係好好好好
又過橋去新城橋，今次深入少少，首先上Galata Tower 睇日落，唔係好高，但都望到新舊城區，歐亞分界








之後行去Taksim Square，中間經過間街角小店坐低食下野，叫咗個雞肉飯，三十蚊港紙咁上下啦，雞肉多到見唔到飯
土耳其啲飯好正，好似海南雞飯個油飯咁有股油香，雞肉係kebab片出嚟啲燒雞，隔離塊面包係送嘅無咩特別，靚仔店主叫我幫佢影張相想share埋但張相已經唔見咗



又叫咗杯蘋果茶飲，基本人喺土耳其同街都會有人撩你入佢間舖睇下野吹下水沖杯蘋果茶你飲，就算同佢講我係backpacker無可能買到野佢都會話無所謂，入嚟飲杯茶吹個水啦my friend
行到去Taksim Square，都係名牌店，大酒店，酒店，無野啱我
返去瞓覺


夜晚晚諗住行條偏僻小路直落去地鐵路，屌你突然見到迎面有兩個麻甩佬鬼鬼崇崇咁行埋嚟 心諗今次仆街啦，隻手已經準備拎枝腳架同佢地死過，打劫還打劫留返張記憶卡比我就得啦，點知佢地好開心咁同我say hi 嚇到我hi返佢地就快快腳跑去搭地鐵

安全上地鐵
路過藍色清真寺又影張夜景

咁又完一日

DAY3


又係打算比入場費睇遺蹟，今日去Topkapi Palace
出發前悠悠閒閒食個早餐，呢間早餐係自助式，不過不失為求醫肚啦

食完過到reception個哥哥仔話有間香港人waiting for me,即時呆咗呆心諗我邊會喺土耳其識人呀
原來係有位巴打聽見有個香港人住喺度就等我出現求救
位巴打喺英國讀書一時興起就過嚟土耳其旅行，點知張匯豐卡唔比佢拎錢，於時佢乜錢都無打算問我借幾十歐元，難得見到香港人緊係諗都唔諗即刻借啦，之後仲一齊玩咗兩日
佢有錢比返hostel做住宿費就即刻出發去皇宮
沿途有班小學生野餐緊，見到我地又好興奮咁，我地就講笑咁問可唔可以join啦，點知佢地即刻嗌好，二話不說成埋學生拎晒紙碟膠叉比我地 咁我地唔客氣啦



仲有張好多人嘅大合照，不過自己入咗鏡就唔出啦
食飽又同佢地踢下波又影下相就走人啦，臨走位老師留咗email叫我地send返相比佢睇下，聽位巴打講第二日佢地全校個話題都係講緊呢件事，佢地好開心
Topkapi Palace都係睇皇宮啲豪華建築啦，特別在入面有粒八十幾卡嘅鑽石 不過重兵駐守唔比影相，我又對金銀珠寶無咩興趣，睇完就算







之後去咗旅行社買飛下一晚通宵巴士去Safranbolu，個人覺得中文名好靚，叫番紅花城，買完無野做陪位巴打去當地匯豐嘈下，好似話明明英國定香港方面個匯豐同佢講可以拎錢，土耳其個匯豐唔比佢拎，反正嘈完都係話第二日先比佢拎到

搞掂就喺舊城區慢步





突然醒起當時喺土耳其經過每間舖個店員都會覺得亞洲人就係日本/韓國人，一係因為土耳其人好鍾意日本，因為土耳其同日文屬於同一種語系，兩國又友好狀態，二係當時gangnam style好hit，去到邊佢地都唱gangnam style，直至我話我來自香港，佢地第一句實係講bruce Lee，第二句就話佢有N個女朋友，其中有一兩個係香港人
之後都係亂行無咩特別，去咗一間睇落比較高級嘅餐廳



買雪糕包比人撚嘅土耳其雪糕 成個trip食咗好多次，而家香港好似已經無得食 煙煙韌韌其實好好食

第三日hea行之下完咗，其實伊斯坦堡算係比較悶 如果時間唔多留一兩日都夠

留名睇貓相

土耳其 今年5月都想去

早幾個月去
聖索菲亞大教堂同一位置仍然裝修緊

我上次去土耳其係八年前，仲耐
但到而家都好回味，主要係啲人，正如樓主所講，毒撚搵到存在感
如果再有機會去土耳其，我會去東部果邊走走

一樣，想去東部再去埋伊朗

唔好猶豫，有平機票就去

我仲以為而家可以睇到全貌 太天真

6年前土耳其冇東方人去既咩
會搭訕即係少見
仲以為土耳其一早就hit到仆街