［多圖][長途遊記] 八個月中南美

係呀

我地有能力去實踐自己想做既事，真係好難得架，人真係好化學，你永遠唔知聽日會發生咩事，會唔會再可以健健康康咁做想做既事。

返黎香港要生活，當然要腳踏實地搵工賺錢，但我唔後悔呢一年走左去，因為我學到好多，領略到好多比賺錢更珍貴既事，荷包係會空洞左，但靈魂變得好富足。

係Oaxaca既第三日, 我地去左附近一個好出名既景點 Hierve el agua，意思係water that boils，係位於山上面既水泉，因為礦物質太豐富，仲形成左石化瀑布。世界上得兩個地方有石化瀑布，一個係土耳其 (棉花堡?) ，另一個就係呢度了。

佢位置有啲偏僻，要去首先要由oaxaca市區搭巴士去Milta，再係Milta搵colectivo上山。呢次係我地第一次搭colectvio，呢樣係中美好常見既交通工具，有啲睇落似豬欄車，有啲就似小巴，總之都係坐夠人就開車，無指定既站，中途大叫就可以落車，沿途都會不時停車拉客。

等左一個鐘終於坐齊人出發啦！大家都好興奮

沿路都係佈滿石仔既爛泥上斜路，鄧左半個鐘就上到山啦

呢度之所以叫＂煲滾的水＂，原因係泉水冒出黎既時候因為氣壓而冒出好多泡泡，睇落好似滾水咁

以為係暖水，但實情係凍到入心入肺架。
聽人講呢度可以游水，我地原本都著左泳衣黎諗住浸下水，但山上面又凍又大風，啲水又好凍，所以都係踢下水算。
流水形成一格格既台階，好靚，踩落去會有麵粉咁幼細既石灰濺起，軟綿綿好舒服。



原本以為成個區域都係天然，但原來兩個游水既大池係人工整既，我地去果日仲洗緊池添。


無游水，就搵左塊空地曬下太陽，睇下風景，訓個晏覺，平平靜靜好舒服。

下一站：Palenque

推

LM

由頭睇到尾，我都覺得人生唔可以欠缺呢一種經歷

由Oaxaca 去Palenque 要搭17個鐘巴士，ADO巴士其實好唔錯，有冷氣，車上面又有廁所。不過好不幸地今程車個廁所壞左，沖唔到廁，儲埋滿滿的排洩物 中途司機隔兩三個鐘就停一停中途站比我地去下廁所

Oaxaca ADO站，好似機場咁好大好光鮮

長途巴夜晚無風景睇，準備左啲野整三文治醫肚

牛油果吞拿魚三文治～食飽就訓覺


坐到屎忽開花，朝早十點終於到Palenque 。住既地方係一家三口開既小hostel，媽媽同一對仔女住樓下，樓上有幾間房比客人住。佢地好友善，仲養左十幾隻貓咪！

間房好光鮮，有冷氣，正呀

一路係墨西哥都好少見到貓，呢度係第一次見到咁多貓！呀仔同我地講，原來墨西哥人好討厭貓，覺得佢地會為屋企帶黎疾病同衰運，好多墨西哥遊客知道佢地養貓直頭唔會住呢度，但佢地唔會唔要啲貓，因為佢地一家實在太鍾意貓

休息左一陣，出去食晏，中南美啲炸雞好正好多汁，膽拖配1kg tortilla

Palenque 市中心好細，日頭個個去哂玩無乜遊客，好清靜


發現一間好好食既Taco，之後成為我地每日食堂，唔食過唔安樂

紅色係燒豬肉，啡色係燒牛肉，芫茜洋蔥蕃茄salsa 等等配料任落，配杯冰凍既agua de jamaica 洛神花水，正呀

第二日我地去左睇一個瑪雅遺跡Palenque ruins，佢係100BC左右建立，係瑪雅時期入面其中一個強大既國家，以建築同精巧既雕刻聞名。
我地朝早行去市中心搭colectivo 去，每人20peso，大約8蚊港紙，幾個字就去到啦。

呢個遺跡好大，保存得好好之餘，又仲有好多未開發完既區域不斷研究中


有一個金字塔可以開放比人入去參觀，入口唔係地下，係塔既腰部，入面有啲通道、石棺、密室同突然通向掘頭路既樓梯，感覺好神秘

呢個金字塔埋葬既，就係之前係Mexico city 見過戴住翡翠面罩既紅色皇后，發現佢個石棺既時候係同一間密室有兩個陪伴佢至死既僕人骸骨。雖然佢身份未被確定，但大部分人都相信佢就係Palenque 最偉大既一個國皇既老婆，因為安葬國皇既大金字塔就係旁邊。

我地望望下大金字塔，發現圍住太陽有一圈環形彩虹！好興奮呀，我地都係第一次見到！

唔知係因為心情放鬆定係天氣關係，之後係中南美都成日見到彩虹！雙彩虹、環形彩虹都見過幾次，好幸運呢

正午12點望彩虹望左好耐，望到暈暈地，係樹蔭底休息左陣就繼續行


遺跡中央有一座好大型既建築，係類似皇宮咁既物體，都係可以行上去，但佢地啲梯級每級都好高，行上去都有啲攰

走廊有三角形屋頂


望出去見到其他神廟


呢度每隔一段路就有指示牌教你一啲關於呢個地方既歷史，每舊石每個雕塑有咩特別，真係做得非常唔錯。天氣實在太熱既關係，我地睇左兩個鐘左右就離開神廟區，去附近個平民區。

平民區之中有好清既溪流穿插，佢地仲起左啲桑拿房焗熱石桑拿，焗完引啲溪水過去沖涼。二千年前啲人真係有生活態度

叢林之中既民居遺跡明顯石頭切割得比較粗糙，啲房又細又窄，但起碼都係石屋黎。皇族死後葬係金字塔，而平民就會將祖先埋葬係屋企地底，百無禁忌同先人一齊住。

行完遺跡，就去到一間博物館。入面可以見到更加多佢地厲害既雕刻，例如佢地啲文字

佢地啲字每粒都代表一句短句，唔是一個詞語咁簡單，好複雜

佢地鍾意粟米已經鍾意到認為人係由粟米造成既地步，呢個就係佢地既粟米之神，地位好高架


行左一日，好攰了，返去嘆住冷氣訓返個晏覺，就行去後面街買啲quesadillas做晚飯，有好多餡料揀

係喇，quesadilla 係呢邊好常見既食物，由芝士(queso)同粟米餅(tortilla)組合而成，可以理解成大型對摺既taco。首先烘熱塊餅皮，舖好多芝士上去熱溶，加啲肉呀蛋呀之類既餡料，再將塊野對摺，啲溶左既芝士就會係中間痴實餅野變成半圓形，加埋芫茜洋蔥辣汁邊食邊拉絲，超級好食，諗起都好肚餓好懷念。

平時啲quesadilla 就好似紙碟摺埋咁架姐，呢間唔知點解成隻pizza咁大叫左我最愛的仙人掌絲炒雞肉做餡，好正

多謝你 係人生中好珍貴既經歷呢

係Palenque第三日，我地去左AguaAzul (藍色的水)，上網睇係一個好似老撾關西瀑布咁靚既地邊方。
資料圖片from google ：


但因為我地去既時候係夏天，每日傍晚都落一落狗屎，所以啲水都比較濁，黃黃綠綠咁，而且水流好急。

沿住瀑布慢慢向上行

行到上游可以睇到啲水集合成大瀑布


愈向上游行，就有愈多比較平靜既大水潭，佢地都劃左幾個地點係可以游水既，旁邊仲有救生員。妹妹們都揮手叫我地一齊落去玩

但好快就落雷雨，我地就跑左去避雨無落去玩水lu

返到去繼續食美味的達哥，隔壁個四層高既就係醬料自助吧喇，有青檸、蕃茄salsa、好辣既綠色salsa之類

我果兩舊達哥大塊啲，因為係麵粉造既，價錢貴啲，橙色既燒豬肉上面放左啲菠蘿，又幾好味。男朋友果啲就係正常size 既粟米餅底達哥。

係Palenque 第四日，呢日係老女人我既28歲生日為左慶祝我地決定終日無所事事，訓到自然醒就外賣兩個達哥返房嘆住冷氣食，人生真好啊！

旁邊果個係經過麵包店買既生日蛋糕包住紅紙好喜慶

因為熱烈慶祝生日既關係，我終於唔使手洗衫，可以儲埋一大包衫拎去街尾laundry，好開心呀！搞掂啲家頭細務，再睇下之後既行程，原來已經天黑啦，出去食餐豐富既

叫左海鮮湯同炸魚，個海鮮湯超級足料，甜到不得了，有好多魚蝦八爪魚，啲餸仲多過湯，叫海鮮汁就差唔多

食完飯散下步，係廣場睇下人表演，係街邊小販伯伯度買左支花，就滿足地返去了。
返到去時發現屋主姨姨同佢個女坐左係門口梳化，原來佢地買左隻蛋糕仔等我返黎今朝出門口時同佢地講過我地去食飯慶祝生日，估唔到佢地買左蛋糕仔特登等我地門。雖然係雜貨舖既貨仔，但真係覺得好溫暖，配埋支爆炸性既蠟燭，好有氣氛

睇真啲，係男朋友生日時啲妹妹仔買比佢果款蛋糕黎，唔知佢地係咪好鍾意用呢款包裝蛋糕慶祝生日架呢

簡單又溫暖既生日，好滿足，返房食呢舊甜到漏既蛋糕啦

留名支持

繼續留名支持
呢度金字塔可以行上去咁好，因為無咩人去...？
之後就去Merida 同 Cancun？

之後一日夜晚，我地搭夜巴去Tulum，墨西哥之旅都差不多去到尾升了！因為巴士夜晚9點幾先開，所以我地係Palenque hea左一日，hostel哥哥仔一家人好好，比我地係廳坐到夠鐘去車站，拎風扇比我地吹，姨姨又沖左啲野比我地飲。天氣真係好熱，坐到成身汗，佢地仲叫我地沖個涼先走添。

hea既期間哥哥仔一直同我地傾計，講佢地經營呢間hostel既辛酸。呢度開業9年，起初生意麻麻，爭落人好多錢，佢地每日都好大壓力。慢慢終於愈做愈好，亦係唔同國家既客人身上學到做人唔應該太執著，錢唔需要多，可以同屋企人一齊簡單快樂就好了。

拜拜左友善既一家人之後，我地就搭11個鐘巴士黎到Tulum。係呢度住既apartment ，完全係䉀渣既價錢，燒鵝既味道。
首先有個有smart tv 既廳，出面有個小花園

開放式廚房

有冷氣既房

每晚都係250蚊港紙，好離譜，雖然一如既往都係無熱水沖涼既，不過都唔緊要。
我地估咁平可能係因為呢度其實未正式開張，有一半房仲裝修緊，而家算仲係試業緊，執到平野真係太好啦

呢度仲好近supermarket ，行十分鐘左右就到，天氣咁熱真係行多一分鐘都會中暑。


實在太熱啦，夜晚買左隻雞整涼拌手撕雞+雞蓉白粥

撈埋佢

第二日我地搭巴士去左Yucatan半島既重點，Chichen Itza 一日遊！由Tulum去Chichen Itza要搭差不多三個鐘巴士，而且每日得一班車，去到已經晏晝12點啦。

Chichen Itza，有人譯做奇琴伊察（普通話），興盛於600-1200AD，係一個好重要既瑪雅城市，亦係世界新七大奇蹟之一，入場費都係咁多個遺跡之中最貴，而啲金字塔都圍著唔比爬上去。

遺跡入面好大，我地唔想走馬看花睇完都唔知自己睇左啲乜，所以忍痛係門口重金禮聘左一個導遊，900peso(360港紙)一個半鐘，唔平呀，但係令我地更加清楚個遺跡發生咩事，連之前去過既遺跡都關連起黎，一理通百理明，所以有時有啲錢真係要比人賺架。

一入去就會見到一個超大金字塔地標

呢個原來係佢地既日曆，每面代表一個季節，每個梯級代表一日，加埋哂就係365。

每個梯級邊唔係直角，而係彎彎地，每年有兩日陽光照射之下個影會好似條蛇咁。而最神奇既係當你企係對正樓梯既前方拍手，金字塔會傳黎一種雀仔叫聲既回音！呢種雀仔叫quetzal，係一種好靚好特別既雀仔，佢係古時瑪雅人既神，亦係而家危地馬拉既國鳥。當好多人衆集係廣場拍手，就會有好多quetzal一齊叫緊既感覺，因為蛇同quetzal都係佢地尊敬既神既化身，所以呢個金字塔有融合兩種動物既呢個設計。

Chichen Itza 其實分左兩個部分，一邊係純瑪雅，一邊係後期加埋Tolteca 文化，佢地既文化一個有智慧一個好戰，代表動物一個係豹一個係鷹，建築分別係圓同方。呢度糅合左兩個特質，所以發展得咁興旺。


一幅刻滿人頭既牆，佢地會將俘虜既頭臚放哂係度嚇敵人

由Yucatan半島開始，就成日都見到Iguana啦！係咪叫鬣蜥？ 佢地一地都係，成日都見到係草地曬太陽


响另一邊有一個球場

佢地既龍門係場中央一個好高既圈

佢地要用棒將波打入個圈，贏左果隊既隊長就可以得到成為祭品既機會，可以將個頭奉獻比神

足球場旁邊都有畫記載，左邊果個有頭既係輸左既隊伍，右邊無左個頭有蛇係條頸噴緊出黎既就係贏左既隊長


呢間廟既頂部就係活人祭祀既地方，佢地會將挖出黎既心臟放係上面。因應唔同原因會有唔同既活人祭祀方式，例如關於雨水既，就會要祭品跳入個水潭入面。活人祭祀既祭品原來通常係自願既，因為都係天災或者戰亂，好需要求神庇佑先會有呢個儀式，佢地相信為左保護家園而死係至高無上既榮耀。

最後我地行到黎天文台

同現代既天文台真係好似樣！係佢地夜觀天象同計算曆法既地方。
呢個時間導遊就收工，我地就坐係樹蔭底食今朝整定既三文治。


Tulum 或者話Yucatan地區都係好多遊客既地方，因為鄰近加勒比海岸，又可以黎睇遺跡，所以消費都唔平。好彩住既地方有廚房，一日三餐都可以自己煮，晏晝出街就整啲三文治或者飯團，慳返唔少又食得開心。

頭先跟住導遊行得太急，食完野再慢慢行下


玩到4點左右就要搭每日一班既巴士返Tulum啦，今晚煮牛油果蘑菇雞扒意粉，天氣太熱搬左張枱入房，邊嘆冷氣邊食

然後我地就黎到期待已久既行程，出海搵鯨鯊游水啦睇鯨鯊季節9月中就完，我地去既時候係9月頭，岩岩趕得切尾水。

我地一早就起身，因為5點半就要出發去Cancun，Cancun係一個超級貴既渡假區，我地實在住唔起，不過唔緊要，由Tulum出發2個鐘就去到啦，即日來回都無問題！

我地join既係一個浮潛tour，到左之後導遊就同我地講各種規則，例如每次只准兩個人落水，唔可以摸鯨鯊，要保持兩米距離等等。

講解完之後，我地就係女人島Isla Mujeres 既碼頭出發啦。我地搭大約40分鐘既船出海，比起平時既大飛仲鄧好多，去到某一個地方就突然停了，望出海就見到第一條鯨鯊啦！然後發現周圍仲有好多突出水面既魚鰭，淨係魚鰭都起碼有幾十塊，船長就話應該有150條左右
唔講咁多，落水先

咁大條魚，但隻眼好似波子咁細，好趣緻

開頭我追極都追唔到啲鯨鯊，人又點會游得夠佢地快之後導遊大叔拉住我帶我去條鯨鯊隻眼仔前面，比佢望我，然後鯨鯊就慢落黎同我一齊慢慢游，仲愈游愈近掂到我呢個方法萬試萬靈，佢地真係好有靈性好好奇既可愛生物呀！啲鯨鯊正面相就係佢地追住我男朋友玩果時佢影既


第一次落去游水掛住睇鯨鯊無為意，第二次再落水先發現鯨鯊附近仲有好多魔鬼魚！呢啲魔鬼魚超大型，好似兩度木門咁大

佢地好鍾意游埋黎打關斗，隻翼仲發到我隻腳，滑嘟嘟好得意

近到連啲鰓都睇得好清楚

比咁多大魚圍住一齊游，真係好震撼！男朋友雖然成日去潛水，但佢都係一樣咁興奮呀！

相入面粉紅色細細粒果啲就係鯨鯊同魔鬼魚鍾意食既蝦毛，因為今日天氣好，有好多蝦毛，所以吸引左咁多魚既開餐，真係幸運呢！上網睇原來菲律賓都可以同鯨鯊游水，但當地人會放啲野食引佢地黎，破壞佢地跟住野食遷徙既生態，所以有好多人抵制。

玩完之後我地就去左cancun對開食晏，因為我地唔係海邊酒店既住客唔可以上沙灘，導遊嬸嬸就拆左架船啲咕𠱸比我地做枱

但呢個方法真係好反智，我又唔夠高要係咁踩水，啲浪又大係咁推走個咕𠱸，然後又要游去執返佢，結果愈食愈餓，唔知做乜

曬左成日，返去煲返啖湯飲，炒個飯食。資源緊拙，無青木瓜，用熟木瓜煲湯都好滿足啦

Hello 機械人巴
啲唔太出名既遺跡通常都可以行上去呀，不過好斜好大級，要手腳並用爬上去。
我地無去Cancun呀，太貴了去埋Tulum同Bacalar就入Belize 啦！

絲打你地yucatan半島有冇去沉洞cenote 游水參觀？超靚

人一世物一世，貴都去一日嘛

其實Tulum都有自己既遺跡，係我地住既地方踩單車過去都係15-20分鐘，租單車80peso(32港紙)一日，唔使搭車又可以做下運動，沿路都係舖得好好既單車徑，好多人都係踩單車過去。

門口有好多屎忽趷趷既野


Tulum ruins最大既特色，就係佢係唯一一個係海邊既瑪雅遺跡，天氣好既時候可以見到好靚既加勒比海，仲可以落去沙灘游水，不過我地去既時候咁岩有好多海草爆發，好大陣腥臭味，海水都好混濁

呢度直至比西班牙人攻打既時候仲有人住緊，啲建築都仲保留得好好


遺跡範圍好細，唔游水既話個零鐘就行完啦，食啲便當就返歸


夜晚煮南瓜炆排骨，超級市場買啲豬肉好優質


下一站：Bacalar

Bacalar 係之前Palenque hostel個哥哥仔向我地推介既地方，佢係一個湖邊小鎮，個湖有The lake of seven colours 七色湖之稱，遊客好少，主要都係黎玩兩日既當地人，感覺好寧靜舒服。

Bacalar係Tulum南面，搭3個鐘巴士就去到，放低野之後都就快日落，我地就行去湖邊散步。個鎮仔好細，得幾條街，十分鐘唔使就行到湖邊，所以其實都唔使住湖邊好貴果啲住宿

湖邊有啲公眾碼頭可以游水，目測好淺水，都係1～2米深，啲水暖暖地，好舒服，今日踢下水先留返聽日再游水

返到房，兩張床中間有張hammock，好正

Bacalar 係一條長形既湖，湖邊有幾個水底既溶洞Cenote，地下水就係由呢啲洞湧入湖度，啲洞深不見底，游過既時候覺得湧出黎既水好凍。呢度有一種叫stromatolites既東西，係類似珊瑚礁既野，要幾百萬年由細菌形成，似乎係好珍貴唔可以破壞的。

第二日我地join左個tour出去湖玩，呢日天氣好好呀，太陽光照得個湖好靚
湖邊望落去

我地主要去中間發光果個淺水區玩

急不及待落去玩水，水深唔及腰，池底啲石灰軟綿綿

呢度啲水咁靚，因為湖底全部都係白雪雪既石灰黎，啲水亦有好多礦物質，成個湖都無魚生存。雖然好靚，不過啲水好重硫黃味，返黎沖左3次涼都仲覺得臭，但感覺好似皮膚有滑嘟嘟左



係Bacalar只係留左短短兩晚，黎緊就要離開墨西哥，進入百利茲啦！

Cenote 我地無去呀，明明好想去但搞呢搞撈唔知點解最後無去，留返以後返墨西哥再去啦

去同鯨鯊游水果日有係cancun 個海游左陣水，我當自己去架喇

[Caye Caulker, Belize]

終於要離開墨西哥，去一個新既國家伯利茲啦！係墨西哥留左兩個月，所有野我地都好鍾意，真係好唔捨得呢個地方，希望唔使太耐之後可以有機會再黎啦！

由墨西哥入Belize通常都係經Chetumal經陸路既關口過，但因為我地主要都係想去小島Caye Caulker，所以就直接由Chetumal 搭船入Belize，既方便又快捷。

由Bacalar搭colectivo 去邊境Chetumal，唔使一個鐘就去到，今次部colectivo係的士形態，同另外兩個當地姨姨一齊夾份坐。


Chetumal碼頭

兩個人加埋2400peso，成960蚊港紙，都唔平

係碼頭做埋出境手續，未見過咁靚既關口架

等上船既時候要放哂啲行李出去比狗聞

呢架就係我地搭3個鐘過境既大飛啦


我地係碼頭遇到一個廣州大哥，雖然佢係廣州人，但佢工作係响紐約同北京做電影後制。佢好健談，佢話今個旅程會用兩個幾月遊中美，對於有人可以同佢暢談廣東話佢都覺得好感動，我地仲約左過兩日一齊係島上面食飯添。

搭左兩個零鐘就要落一落船，係San Pedro做入境手續

再搭多大半個鐘就到啦


一到埗，食隻Belize最出名既龍蝦先

大大隻，配椰漿飯，啲肉頂到上頭頂觸鬚都係38BZ，大概140蚊港紙。我地以為好抵，之後先發現仲有更平既食肆！我地之後係Caye Caulker 過住既 係餐餐食龍蝦既生活呀！