［多圖][長途遊記] 八個月中南美

另一日我地去左Guadalajara 入面既 Tlaquepaque。

其實原本係想去Tequila 既，固名思義係產龍舌蘭酒既地方，coachsufing有個人話車我地去玩，但臨時放左飛機。所以最後又跟左肥妹去Tlaquepaque行下。

Tlaquepaque係比較多遊客既地方，呢度有彩色既建築，入去餐廳可以睇墨西哥傳統舞蹈同唱歌。不過呢度太遊客，我地麻麻地，所以都係隨便行下


街邊有好多小販檔，我地買左杯叫Teijuino con hielo de limon 既野飲。

Teijuino係粟米發醇而成既漿，hielo de limon就係檸檬冰沙

呢杯啡色既野就係啦，兩樣野撈埋一齊酸酸甜甜好似酸梅汁味思樂冰咁，夏天飲好消暑

打攪左大家幾日，都係時候去下一個地方啦，希望以後有緣再見啦。

下一站：Aguascalientes

LM

加油keep住寫
我地keep住睇同推post

我大學畢業後都想好似你地咁去個長旅行探索世界，奈何出左黎做野冇呢個勇氣辭工去，你地要加油呀

樓主加油 寫得好好睇 有個肯陪你一齊放底香港一切嘅男朋友真係好好 試過自己一個去歐洲 嗰陣都有啲唔好嘅體驗 南美一早已經喺bucket list 但都係搵人一齊安全啲

一口氣睇晒，好正既體驗
想問下錢銀點解決？隨時atm?
同埋帶書包定gip?洗衫點？好多套衫？
我最長都係廿日旅行

Btw,你男友對鞋我都有，一樣色 ，夏天旅行著好爽皮

正，最重要有同樣步伐的伴侶

lm

世界真係好大，好多唔同文化，好多地方我地可能聽過睇過相，但親身親歷其中始終係唔同既感覺

多謝，你地都睇得開心就好了。
我地而家都走左去歐洲，準備過幾日搭飛機返香港。中南美感覺安全過歐洲好多，歐洲又多人啲人又無禮貌

錢銀方面真係一個好問題，諗返起都一殻眼淚。

我地唱左一千蚊美金出發，但係美國既時候唔識留返啲現金，到墨西哥時已經用左一半 係墨西哥既時候好方便，部部atm都用到，但去到Belize開始就仆街了，佢地啲機太舊好多都讀唔到新咭，成日行勻成個鎮都唔知搵唔搵到部㩒到錢既機。

我地就拎住剩低果幾舊水美金慢慢摵，盡量揀啲可以碌卡既住宿，好彩既就撞到部拎到錢既atm, 好在當地物價低，而且好多地方都收美金，靠果幾舊水同間中碌下咭都生存到。

因為太多住宿網上面寫自己收咭，但去到先話只收Cash，去到阿根廷既時候我地全身只係得返80蚊美金，經過士多想買個蘋果都唔敢，佢地碌咭又好唔普及，通常都係去超級市場買夠幾日餸，或者係街不斷問啲餐廳有無得碌卡。阿根廷有九成atm都read唔到我地啲咭，好不容易搵到間HSBC，但就手續費勁貴，頂盡㩒得500蚊港紙 但每次都要收100蚊手續費，不過手頭上無現金真係唔掂，最後我地都忍痛㩒左少少。

總括黎講，atm㩒到錢既地方有：
墨西哥、智利、哥倫比亞、危地馬拉、伯利茲、哥斯達黎加 — 當地錢
玻利維亞、秘魯 — 當地錢+美金

如果要用atm，建議巴打申請張有plus既信用咭，因為銀聯咭係美洲等於垃圾。 假如手頭上所有咭都㩒唔到錢，最後辨法都可以用western union 滙錢比自己，果邊都有western union，但手續費都係貴。

太激動都唔記得答其他問題
我地Backpack既，前一個小背囊後一個大背囊，我個大背囊55+5L，男朋友果個65+5L。前幾日磅過我個大背囊18kg，唔怪之度高發現自己矮左1cm

洗衫好天就自己洗，有啲地方好潮濕晾極唔乾就拎去laundry，laundry中美好抵，南美就貴。男朋友無乜幾多套衫，長衫短衫背心各三件，我就多啲

佢都好鍾意自己對鞋呀，但日日著住，又澗水濕完又噏住，而家好臭

前幾日執到last min 郵輪飛上船玩左8日，所以無上到網

今晚繼續更新

留名支持！
我都28歲，同個朋友計劃緊30歲去歲非州睇動物大遷徙同行山，希望到時真係付諸行動到

[Aguascalientes]

Agua西文意思係水，Caliente就係熱，固明思意係熱水鎮，係個有溫泉既地方。如果去過秘魯馬丘比丘，應該都知道果邊山腳都有個Aguascalientes，同墨西哥呢一個各有特色。

由Guadalajara 搭3個零鐘巴士就到

上車前係車站領取既小食


一去到發現周圍啲馬路封哂，個個路口都有警車攔住，心諗仆街啦，係咪終於要遇到墨西哥槍戰。行多兩步，發現好多人圍係馬路兩邊，中間有一架跟一架慢駛既車龍。啲車上面掛滿白色同淺藍色氣球，當眼位置放左大大個聖母像 或者 人像大頭相，感覺唔多老黎。

睇真啲，條車龍係向住教堂方向駛過去，民個時候我地又諗會唔會係咩大人物出殯


但兩邊既市民都睇得好開心，我地就走左埋去八卦，問隔離個後生仔大家做緊咩，佢答左啲我聽唔明既字，我又問佢呢個係咪節日慶祝，佢話係，我地即刻安心哂，同大家一齊開心湊熱鬧

咩住大背囊唔方便，返上房放低再落去玩，順便whatsapp問下啲墨西哥朋友到底呢個係咩節日。由窗口望落街見到樓下幾熱鬧


原來呢個叫聖母升天節La Asunción de Maria，今日係升天節前夕既慶祝活動。墨西哥人大部分信奉天主教，周圍都有好多教堂，經常都會遇到佢地舉行宗教活動，但咁大型都係第一次見到，我地真係好好彩呀。呢一日家家戶戶都會將自己屋企既聖母像或者畫放上車，用白色同淺藍既氣球或者鮮花裝飾得靚靚，駛出黎教堂巡遊。

放低完袋已經好肚餓，全日剩係食左巴士個包。一落樓下發現教堂前面個廣場搭左好多小食檔，直頭好似我地年宵咁，就去左掃街。

呢個叔叔送左兩隻釀辣椒俾我地食，死都唔肯收我地錢，話節日應該一齊開心下

呢舊粟米粉整成既包，加埋辣到味覺喪失既綠色醬，應該係我食過最伏既墨西哥菜


見啲差人係度遊手好閒自拍，捉住佢地影返張相，揸機個大叔影相技巧仲衰過我。


食飽飽，繼續去趁墟。

電單車、私家車、貨車、巴士 甚至垃圾車、混凝土車都整整齊齊例隊慢駛，感覺全個城市既車都駛哂出黎慶祝，好喜慶。

駛到去教堂前面，神父會向佢地灑聖水祝福。


聖母升天日前夕既重點活動(對我黎講)就係每架巡遊既車都會瘋狂派糖！類似我地新年財神派糖，路邊既大家會不繼大叫’Dulce！’，即係’糖！’，車上面既生番就會一箱箱糖潑落人海度，好好玩

係條片cap出黎，矇查查，將就下

好多細路都拎住個背心膠袋仔用黎裝執到既糖，遇到唔派糖既車大家就會衝出去欄路 或者跳上車度搖部車，唔知仲以為係暴動，好鬼搞笑 係企旁邊個伯伯既幫助下我都搶到兩粒大糖，好野

南美高質post 留名支持

响Aguascalientes 既第二日，節目好豐富。起身食完早餐，就行左去附近既Museo de la Muerte 死亡博物館。

我地好鍾意行博物館，因為只有知道當地既歷史同文化，先可以更全面咁了解一個城市。而且墨西哥啲博物館都做得又平又好，好似呢個仲免費架添 Aguascalientes 係骷髏骨公仔Catrina 既發源地，即係响coco入面見到既呢一種公仔呢

正因為係咁，所以佢地係度起左呢間博物館，介紹墨西哥人係點樣看待死亡。一開頭有間地下室，入面有兩副骸骨，然後去到間展館，展出左好多天災人禍、打仗、處決戰俘，一張張血淋淋既相。再轉個角，開始有好多同宗教有關既骷髏骨頭裝飾


再繼續行，有啲近代啲既骷髏骨展品

小朋友畫既畫


雖然呢個博物館主題有啲奇怪，不過我覺得好值得參觀。有啲道理我地覺得一直知道，但唔會去諗，就好似死亡就係人生中不可避免既一環，佢就擺左係度架喇，但我地可選擇看待佢既態度，中國人選擇忌諱，但墨西哥人選擇慶祝。佢地相信每個人既故事都係精彩既，無論係苦係甜，死後都應該好好慶祝曾經生於世上過，所以啲骷髏骨全部個樣都好開心，一係跳舞，一係開緊party。

黎到熱水鎮，梗係要去浸返個溫泉 呢個時候我地已經一個半月無沖過暖水涼，對熱水既渴求簡直去到極點，上網搵到附近有間澡堂可以浸溫泉，即刻call部uber過去。墨西哥call uber又平又方便，有時懶得搵巴士搭都會搭uber就算。


澡堂位於Aguascalientes 十零分鐘車程既Ojocaliente，西文意思’熱眼’，主觀認為係泉眼咁解
上網搵到佢地個價目表，諗住要間最平果隻Tina試下，反正全部都唔知咩黎

點知去到見到個停車場已經泊滿哂，門口仲有幾個人排緊隊，估唔到呢度咁受歡迎 門口呀姐話個表上面啲房已經full哂，但有間平平地既唔知咩房剩返，190peso(80港紙)一個鐘，有得浸就得啦，理得佢咩房，呢一刻比一個膠桶熱水我都好開心。
呀姐係張紙度畫左兩個大圓圈，叫我地行去自己搵呢個地方。我地睇到好迷茫，唔知呢兩個圓形係按摩池丫、定係好似日本風呂啲木桶咁。

最後撞到個清潔大叔，指左我地去呢間好靚既房。

原來兩個大圓圈係[00]號房咁解，呀姐畫到個零字咁大咁圓托柒咩


呢間就係我地間房啦，樓底好高天花有個窗仔，好靚好有特色，有少少殘舊令成個環境更加有味道 大叔岩岩清潔完省乾淨，開住水龍頭由得啲水慢慢裝滿，房度大鐵門可以鎖埋，係房入面換衫就可以。

個池都唔細，兩個人坐都闊落既。有熱水浸真係好感動


浸完熱水，成個人精神爽利。返到Aguascalientes 周圍既馬路已經封哂，準備今既繼續慶祝聖母升天！

夜晚約左另一個墨西哥朋友Tali ，佢係我地係義工營最好既朋友。因為今日係聖母升天正日，等佢既時候我地去左教堂前面睇人跳舞。


似乎係佢地既傳統舞蹈，男人一手揸弓箭一手揸沙搥，轉圈既時候腰上既竹片會跟住節奏發出聲響，頭上頂毛毛帽同耳環都彈彈下好有動感，好精彩既表演呀。



睇左一陣Tali就帶住男朋友黎到啦，我地發現佢地都好鍾意介紹男朋友比我地識。

Tali好文靜又溫柔，係大學讀緊bio，而且係個鍾意動漫既小宅宅，大部分西文都係佢教我地，可能因為佢父母都係老師，所以教得好易明，短短兩個幾星期就教識我地大部分日常用到既西文，係中南美生存得咁順利都要多謝佢
佢同佢男朋友帶我地周圍行下，經過左個鬥牛場、公園，然帶左我地食呢個特色小食

係門口睇圖以為係雪條，其實係一大片沙葛，用籤篤住再洒啲酸酸甜甜既粉上去。

啲紅粉酸沙葛清甜，又幾好味，食完成個口變左紅色。

食完飯我地再返教堂過節睇表演，今日明顯比前一日莊嚴好多。雖然都好熱鬧，但就無左啲搶糖同搖車啲瘋狂行為，大家都圍住教堂慢慢行，最後聚集係廣場前面，隨著音樂奏起有個大聖母像駛左出黎

然後廣場上開始伴隨聖詩放煙花

我地新年放煙花係播小鳳姐喜氣洋洋，佢地放煙花就播聖詩，感覺好唔同，雖然我地無宗教信仰，但都覺得氣氛好神聖，令人好感動。

諗落都覺得好有趣，出發去呢次旅行之前我同男朋友講，可能好耐都見唔到月亮啦，啲人話中南美好亂，夜晚應該唔可以出街。但黎到之後既夜晚 我地一係訓係沙灘睇星星，一係走出街搵野食，而家仲黎旅行大忌人多擠迫既地方，同大家一齊迫黎迫去搶糖、睇煙花。事實係响中美既日子我地差不多每晚望住月亮，數住月圓月缺。出發前對呢個地方既未知令我地過份憂心，我唔敢一口咬定呢度係完全無危險，畢竟每個地方都有壞人，但至少對我地黎講墨西哥係一個熱情快樂既國家，我地係度既日子過得好開心。

同朋友夾到時間好難得呀！大家出黎做野就好難就到假，希望你地都做到想做既事啦

我記得上個post都見過巴打你
多謝支持！

N年前我又係去中南美玩幾個月，真係一生人一次，中美都或者會再去，南美就好難了
所以見到越來越多人勇闖呢個地球既另一邊，一定支持

樓主寫得好好睇
我都好想快啲去下trip做下義工

除左grad trip, 真係好難之後有時間去長旅行 最慘grad trip 嗰陣因為有緊急事返左香港，只係去左兩星期