［多圖][長途遊記] 八個月中南美

又唔會話難去既，不過可能人大左心態唔同，就會想去啲舒服啲既旅行，始終南美無台灣日本泰國果啲咁安全舒服。個人就覺得中美反而方便舒服又安全

Hostel包早餐，每朝上天台嬸嬸就會準備早餐比我地，簡單但係好地道同好味

有時有豆蓉搽麵包配芝士同蕃茄salsa

有時有tamale，好似稯咁，但係用粟米蓉同雞肉包成


大叔夫婦對我地幾好，我地打算煮返餐水餃請佢地食

超級市場無咩岩既菜，揀左芹菜

嬸嬸食完好開心，話過幾日想教我地煮墨西哥菜，我地緊係lur飯應啦。大叔話原來佢老婆好鍾意煮野食，夢想係開餐廳，覺得啲遊客成日要俾好貴出街上cooking class 好傻，不如俾佢老婆教仲好。

就係咁，嬸嬸就帶左我地去附近間超級市場買餸。

佢問我地有無啲咩餸想整，我地話都無咩特別，不過天口咁慶想食啲濕濕地既野，問佢墨西哥有無湯，佢就話教我地煮Pozole啦！
Pozole 其實同我地煲湯有啲似，都係掟啲豬肉雞肉落去煲兩個鐘，不過仲會加啲攪成漿既紅蔥頭、洋蔥、辣椒落去，而重點就係一啲發漲哂既粟米，食落有啲似超大粒既薏米。

食既時候會掟啲青瓜生菜洋蔥落去一齊食，幾好味架


早幾日傾計既時候嬸嬸知道我地鍾意食Guacamole，仲順手教埋我地整。將啲牛油果、芫茜、辣椒、蒜頭、洋蔥掟哂落攪拌機攪就得，配埋tostada脆脆食，簡單又好味。呢邊啲牛油果真係又平又好好食，好食到切開有汁架，好離譜。


之後嬸嬸成日邀請我上天台煮餸，對於我地煮既野好好奇，例如有一次煲蘋果湯

佢對於將甜既蘋果煲湯好驚訝，但最後好鐘意仲叫埋大叔上黎飲

有時煮洋蔥雞柳

有次諗著整漢堡扒食


點知整出黎塊肉隻味好騷好怪，第二日問大叔原來佢地呢種混合肉碎係將豬牛羊馬所有奇怪肉攪碎做成...
每晚睇住咁靚風景食飯都好開心既


同場加映仙人掌果

啲黑色甩甩咬唔爛，果肉好似好臭草青味既火龍果，唔係好識欣賞


之後就準備出發入一個月義工營了

仙人掌果我喺摩洛哥試過，啲核係要lur嫁，所以佢地係當香口膠咁，擺入口趙兩趙lur，食一次以後唔食

樓主煮野食好似好勁 連豬骨湯都煲到

樓主一路上用咩話溝通？南美啲人唔係個個識英文

人生已贏
我老母只會同我講『係呀 而家後生係開心既，不過將來老左咪會好慘囉，唔好好計劃將來』

舊野咁難食直頭應該成舊lur
食過一次唔想再放佢入口

掟哂啲野落水煲，唔使技巧架

我地原本唔識西班牙文，出發前諗住去人地地方都應該要學下當地語言，就淨係玩個叫Duolingo 既apps學左啲單字，果時連1至10既西文都未識背
但一路去旅行遇到既人每人教幾句，每日迫住要聽要講，得閒睇下lonely planet 本phrase book，而家簡單對答都ok既

咁佢都係用自己覺得好既方式錫你姐
不過我成日都咁諗，如果人生有八十年命，細個時你可能為左附合父母期望努力，結婚後就為左頭家奮鬥，咁中間拎一年黎做自己想做既事，其實都唔過份姐？

Campamento Tortugero Mayto
海龜義工營

之前有開post講過，而家再講下先，之前個post應該無咩人睇，唔嫌麻煩可以再睇多次

我地都唔係咩環保定保育既人，當初想黎純粹因為我地覺得一直去旅行都會有覺得攰既時候，想搵啲野做下，男朋友又好鍾意潛水同海龜，咁岩果時佢生日，所以就黎左呢度！其實黎呢度係一個星期起跳，但我地覺得一兩個禮拜太少，反正都黎到就留夠一個月啦。之後發現呢個選擇真係太好，呢度唔係啲消費動物既偽保育機構，而係真心鍾意大自然既人成立既小組織。係度同啲後生仔柴娃娃玩一個月，覺得個人好似後生左十年咁呀！

呢個義工營位於太平洋海岸既Mayto 海灘，每人每星期比15USD就包三餐。(開頭我地唔知，中介收我地每人30USD仲覺得好抵，但之後其他妹妹話我地知，直接同個camp報名只係一半價錢，幫襯出面啲中介正傻仔 ）

黎到既第一個印象係：點解會有咁靚既海灘

當然之後既旅程都去過好多好靚既海灘，但呢度既靚唔單止係風景，更加重要係係度遇見既大家都好善良，大家都係攞個心出黎對我地呢兩個奇怪亞洲人，係我地最回味既地方之一。

呢度有個有得遮頭既棚，再自己帶啲營去紮營訓咁樣。我地係香港揹唔到咁多野黎，剩係帶左兩張吹氣地𥱊 加兩個簿睡袋，個營係Puerto Vallarta 租既，呢個就係我地訓左一個月既屋企啦。


飲食方面就包三餐既，大家每日輪流走去廚房幫手，負責人既媽媽會係度教大家煮餸。食既野都好簡單，都係豆蓉豆蓉同埋千變萬化既豆蓉，間中有兩條肉絲已經感動到痛哭流涕，黎左一個月男朋友個肚腩已經消失了。
黎到既第一餐有雞肉mole，呢個時候唔識珍惜，之後先發現係呢個無電無雪櫃既地方有肉食係幾咁珍貴。

講開mole，呢樣野都幾好食，感覺就好似墨西哥既咖哩咁，佢地會整成磚或者醬用黎煮肉，而且有紅黃綠好多種顏色，係之後會去既城市Oaxaca 最出名，而呢種啡色既係最常見，通常係加左朱古力既。

講返正題，呢個camp主要係做海龜保育工作，同附近城市既University of Guadalajara 有合作研究，有biologist跓場，同啲讀bio既大學生响度做暑期工，所以有咩問題佢地都答到你。聽落好學術，但其實個個都係通山跑既生番黎，每日都係海邊過住自由奔放既生活。

第一日黎到，有啲講座教下你海龜既基本知識咁。



有個時間表比你每日跟住做野，但其實唔太會跟，都係果日佢地睇天氣想做咩就叫我地做

晚飯

海龜工作主要係夜晚-凌晨進行，因為呢個時間最多龜上岸生蛋。朝早佢地都唔會比你好得閒，會瘋狂勞役你，最常見就係的我地去附近一個勞改營

食個早餐先

每日早餐都唔同，不過都係大同小異，我地黎睇下其他日子既早餐。


食完就去做野啦

呢度放左所有佢地收集返黎既垃圾，通常食完早餐10點至1點最熱35度既時候就會黎做分類同回收。計我話應該send哂香港啲得把口既走塑撚黎勞改，比佢地真·身體力行一下。

膠樽分類，樽蓋招紙都要分開，有時啲仆街食完薯片個袋塞左入樽要挖返出黎，啲汽水好甜滴左落腳就會有好多蟻黎咬你
搞掂哂就人肉踩扁啲樽佢。


有時會剪開啲裝奶既樽黎洗，啲樽執返黎唔知係大熱天時之下發酵左幾耐，一切開陣陣嘔吐物味真係好難忘

兜洗樽水連續用幾日既，對手可以每日浸淫係千年奶入面 呢幾日洗既膠之後車左去賣，賣到320peso，即係差不多130港紙，好野。

唔小心跌落我地啲膠度既青蛙仔


勞動完一輪就可以返去等食晏，不過墨西哥人既食飯時間係9點(早餐)，3點(晏晝)，9點(晚飯)，所以一開頭好唔慣，出完一身汗餓到就黎死都未有晏晝食。

唯有去沖個涼，反正好熱同埋成身垃圾味。
沖涼既地方露天既，朝早見到藍天白雲，夜晚見到星星，水由隔離個湖引過黎，雖然無熱水，好多蚊，但我地都好享受係度沖涼。

天氣好熱，日日都沖兩三次涼，沖左一個月凍水涼覺得身體好左好多！

食飯啦，晏晝通常係最豐富既


天氣好既時候就會發散人手出去海邊呀，村呀執垃圾，拎返勞改營第日再處理


啲辣殺膠袋會曬乾重用重用再重用

有時又會掃下樹葉，拎開山刀劈下樹枝，唔怕會悶親

lm

高質

墨西哥野真係好好食

viva mexico

lm 高汁....北美好易去，中南美少見

…淨係北美啲國家公園都有排去

好正

留名
樓主搵到個肯同你一齊去遊歷世界既男朋友真係好幸運

每日夜晚大家會輪流去巡沙灘搵龜蛋，全世界有7種海龜，其中有4種會黎我地個灘生蛋。我地會出去搵啲蛋返黎孵，因為附近有人會偷龜蛋去賣，或者有狗呀雀仔會挖啲蛋出黎食。

巡邏分兩更：11pm-2am 同埋4am-7am，個海灘好長，好似有12km，每次我地都係兩個人一組坐係ATV車尾由啲staff帶住出發。夜媽媽滿天星星之下坐住ATV飛車真係好正，好多時仲有好多瑩火蟲圍住，全個咁大既灘就係得我地3條友，感覺好寧靜好舒服。

好彩既時候我地會見到龜媽媽爬緊上黎生蛋，一見到佢既時候我地會搵紅燈照一照佢地，確定真係龜黎就會熄燈坐係附近慢慢等佢挖窿生蛋。因為佢地好細膽，比人嚇親就會唔生走返落海。

挖好窿開始生蛋佢就會開始進入無人之境，附近發生咩事都唔理，我地就可以開燈

佢一生啲蛋落黎就可以執，因為佢埋返好個窿之後就會好難挖返出黎，佢地好叻架可以將啲沙拍到勁實。
執蛋

佢地每次會生80～120隻蛋左右，每次運氣就必2～4粒蛋出黎，聽住佢不斷喘氣似乎好辛苦，媽媽真係好偉大。

一路petrol可能會見到有龜由海邊爬緊上黎、生緊蛋、或者生完爬緊返落海。如果呢幾樣都見唔到，我地會根據地下既痕跡黎搵。海龜同我地一樣，係沙灘經過都會留下一段腳印，不過佢地既腳印係一劃劃既，因為用對手撥撥下咁行，去到盡頭生完蛋兜返落海就會形成個好似迴旋處咁既半圓形，係果度挖落去通常就會搵到蛋。如果搵唔到，就係我地黎到之前已經俾人偷左，或者隻龜諗諗下都係唔想生走左。

有時可能咩收獲都無，我地就會係海灘既盡頭係地下訓兩個鐘先返歸，佢地話啲賊仔見到我地都會避忌唔會偷蛋。不過有一次橫風橫雨成個天行雷閃電佢地都堅持訓覺，仲拎電話出黎影閃電 嚇撚死me

返到黎已經天光，好眼訓，呢部就係我地坐出去既ATV


龜竇係一個大約45cm深既壼狀窿(右上角)

返到龜欄我地會挖返龜竇比每一巢蛋，一巢一個，再放返佢地入去埋好，45日之後就會有龜仔出世架啦！

呢個就係我地既龜欄啦，見到有一兩隻龜仔由沙下面捐左出黎就可以成竇挖出黎。



挖出黎既都唔一定全部都咁生猛，可能有啲死龜、變壞既蛋。有時甚至成巢蛋都受感染孵唔出龜仔，變哂極腥臭既爛蛋。

有啲龜出黎既時候仲連住臍帶，但唔理佢就ok，過一陣就會自己甩。


健康既龜仔會放埋一齊等放生


日落既時候大家就一齊將龜仔放返大海



放龜既時候我地會係沙畫一條界，當龜仔爬過左條界就算發生咩事都唔可以插手。有時會有雀仔想黎食佢地，有時會有身體比較弱既龜俾浪冚返上岸幾次就無力再爬，但呢個就係大自然。我地可以做既已經做左，孵化之後既成長就要佢地自己努力了。



差不多每日都有龜仔出世可以放龜，而我地每一次都會放，因為呢個畫面真係好靚。係日落時份睇住啲龜仔好努力咁返落大海，啲浪冚返佢地上黎都繼續努力爬，覺得生命其實可以好簡單，好堅強。

我地平時會去同村啲細路一齊玩，佢地都有時都會黎海邊玩水同放龜

係 有好多唔同種類，食極都唔厭(啲豆除外 )