［多圖][長途遊記] 八個月中南美

去南極用咗大概幾錢

睇到了 想問下5800美金嘅團資料出發前book?
有冇相關資料可以分享下？

大家新年快樂
返黎香港一排都掛著陪屋企人未更新，今日開始努力寫返

[Mexico City]

由Aguascalientes 搭7個鐘巴士就黎到首都Mexico City，旅途上我地對於首都通常都可免則免，一來首都通常都人多治安比較差，二來我地麻麻地鍾意大城市既感覺。不過首都始終都係交通中心，短短留三兩日都未嘗不可，順便觀光一下都好，我地係呢度就留左3日。


落車已經差唔多夜晚12點啦，係街邊隨便買個tortas 做晚餐就沖涼訓覺。大城市真係唔同啲，車站都光鮮啲。

第二日起身打算跟lonely planet 教既三個鐘散步路線遊覽下市中心



Mexico City 感覺上無傳說中咁危險，主要既觀光地都幾光鮮，不過周圍都好多人，要時刻保持警覺，夜晚街上面會有好多警車同警察咁樣。

晏晝去左間樓上舖食，睇牆上面啲相好似幾出名同埋有啲歷史

男朋友叫左炆豬腳，好好味，炆到好林，啲汁味道酸酸地有啲草藥味。我就食炆腳手，醬汁唔同味但都好好食


行行下經過左一個遺跡Templo Mayor，入左去睇下。

原來以前墨西哥城係被水包圍

當經歷新既朝代，佢地就會係金字塔外再起一層新既牆，變成好似洋蔥咁一層一層。之後睇既遺跡好多都係完整既金字塔，好似呢個咁可以見到建築既橫切面都好特別！


Templo mayor係阿茲特克文明既遺跡，歷史唔係太長，大概13世紀建成。中美洲古文明有三個：阿茲特克、瑪雅、印加，頭兩個好相似，呢個遺跡仲設有棟4層高既博物館，大部分展品都有西文同英文解釋，好似我地呢啲讀理科既歷史白痴都可以好好學習當地歷史。

如果唔知咩係阿茲特克，見到佢應該就明哂

係鷹勇士呀！！

佢地啲神既造型都比較趣怪，下面呢個係死神，突出黎好似芒果果個係佢舊潤，佢地相信肝係好重要，係用黎盛載住生命既。


我地好好彩遇到有紅皇后既展覽

紅皇后係响Chiapas 地區既城市Palenque 遺跡被發現既，我地之後都會去，係個好靚既地方。佢之所以咁出名因爲佢被發現時面上蓋住翡翠面罩，同埋整個木乃伊既屍身都塗滿紅色防腐顏料，紅色皇后既名都係咁黎。


我地原本都有啲想去太陽 月亮金字塔，話哂係中美最大既金字塔，不過係呢度留得3日唔想咁趕，就返留呢個小小遺憾下次有籍口再黎啦。

係博物館睇左好耐，走既時候已經天黑又開始落雨了，開始肚餓周圍搵野食。
遊遊蕩蕩去左間美術館，但太晏收左皮，無得入去睇


行行下，見到唐人街，有啲掛著中國菜，入左去搵食

行左成條街，一個唐人都見唔到，又無乜中國餐館，係呢間好景樓最似樣

味道好正路，幾好味

下一站：
Taxco

繼續推
因為有D事，我都係留得3日，同絲打去既地方完全唔同
太陽 月亮金字塔 真係得幾個塔俾你睇，無咩細節，反而Chichen Itza 保留得靚好多
另外我去睇個人類學博物館同Guadalupe 大教堂，各用一個下晝

留個名先
想睇南美部分

留名
好睇

[Taxco]

Taxco係一個以銀聞名既城市，離Mexico City 只需要3個鐘車程，沿路都係彎彎曲曲既山路。以前呢度銀礦業好逢勃，但而家已經唔再以銀礦為主，取而代之係銀既後期加工 同旅遊業。

今次住間新開既hostel，好骨緻，每晚3百蚊港紙左右，見有吉房比左呢間靚啲有露台既大房我地。

朝早望出去，見到山谷中既雲霧散開，好靚


放低野之後周圍行下，呢個依山而建既小鎮啲路好鬼死斜

馬路上大部分都係甲蟲車，最常見呢種白色甲蟲車就係的士喇





行行下，黎到市中心呢間教堂Santa Prisca de Taxco，發現掛滿哂花佈置得好靚，走入去八卦下

入到去教堂，坐位上已經坐滿哂人，大家都著得好四正，女既著晚裝，男既著西裝。後面仲有班花生友靠牆企，我地著到爛身爛世都驚唔莊重，但家屬們似乎都好歡迎大家黎祝福，我地就棟係後面睇左陣，呢個時候就見到左右兩排櫈既中間有個後生女坐左係度

神父講左啲野，向女仔灑左啲水，大家一齊唱完聖詩 就起身互相擁抱，成個過程好莊嚴。
問下隔離個人，得知今日係呢個女仔慶祝Quinceañera既日子，同之前我地係海龜營去過既家族party好唔同，呢個真係成個婚禮咁隆重，可以遇見呢一幕真係好幸運，令我地大開眼界呀。

夜晚既Taxco，一街都係軍人

有恆生atm可以㩒錢，門口有鐵閘同幾個軍人看守

我好無聊咁數過，每度門座底都鎖6把鎖


返到房望出去，Taxco既夜景 好靚

好彩 (定唔好彩？)我都係普普通通打份牛工，個人又無乜拼搏心，先瀟洒得黎
去完旅行返黎就要俾心機搵工啦

我地係半年前經間叫Eclipse 既澳洲agent book，係當時搵到最平。我地住雙人房，唔介意住三人房既話可以平幾舊水美金。前幾年好多人鍾意係ushuaia等last minute 平飛，但而家愈黎愈多大陸人去，last minute 已經唔平得去邊，我地係ushuaia 都hea左兩個星期，見到啲agent 門口貼出黎既last minute 飛最平都要6000usd起了

巴打行程好豐富好厲害呀
人類學博物館睇落有好多野睇，有機會都想去參觀下
同意Chichen Itza真係無得輸，拍手有雀仔叫聲回音真係嚇死我佢同危地馬拉既Tikal我地都好鍾意

墨西哥既朋友知道我地係Taxco，介紹左我地去離當地唔遠既一個鐘乳石洞國家公園Parque Nacional Grutas de Cacahuamilpa。由Taxco巴士總站搭巴士，40分鐘左右就去到。由於上唔到網，啲巴士中途又停幾廿個站，又無路牌，通常上車既時候都會再三煩司機記得叫我落車，坐底之後再叫埋附近啲人幫手叫我落車墨西哥人好好，通常見到我地兩個水魚咁既樣都會好熱心幫忙，一路以黎搭車都幸運地好順利。

我地係Grutas站落車，但原來落車既地方唔係公園門口，要行幾公里山路先到，咁岩有兩個同我地一齊落巴士既當地男仔問我地一唔一齊搭的士，我地說同佢地些牙的士啦。

入場劵，每人32蚊港紙，包左西文導賞團

黎呢度既絕大部份都係當地人，一家大細攜老扶幼咁黎行下

入口

個導賞團又幾抵玩，邊行會邊有燈光效果介紹啲石，而啲燈光又唔係啲五顏六色幻彩詠香江，係自然既黃黃白白。

除左睇啲石本身，仲會睇佢既影。呢舊石個影就好似一對擁吻緊既戀人


一直行一直行，先發現呢個洞大到不得了，由洞既入口行到盡頭，大部分係平路，都要行要成兩個鐘，而且開放俾公眾參觀既都只係成個鐘乳石洞既小部分，可想而知有幾大。



我地原本諗著 鐘乳石洞，好多地方都有啦，有咩特別喎，咁諗真係太錯喇 入到洞入面既景色非常壯觀，完全係照片表達唔到架，再次令人驚嘆大自然既神奇。

愈去得多地方，愈覺得自己無知同渺小，世界上有太多我地唔知道 未見過既事，即使係同一樣野，同樣係鐘乳石洞，但每個地方既鐘乳石洞都有自己獨特既美麗。如果以為自己咩都知，咩都見過，唔去睇唔去試，咁就會錯過好多事物了。

呢一日係七夕，去間似樣既餐廳食好啲


下一站： Oaxaca

真係好靚好開心
留名支持

雖然成日都一包餅兩份分就當一餐，但都係開心同難忘既回憶

留名

追完， 人真係唔知幾時死，有野想做好去做

份工冇左未再搵囉

係咁簡單就好lu .

人生就係咁簡單，只係人太多雜念，物質 先唔想放棄

當你得番一年命，你都會去做想做既野啦

你永遠唔知聽日 太陽同死亡邊樣黎先

好睇

Lm

［Oaxaca]

Oaxaca 位於墨西哥東南邊，我地先由Taxco搭3個鐘巴士去Mexico City留一晚，再轉巴士搭多10個鐘車黎呢度。

無錢都可以氹下自己開心，攬個暖水袋，係車站酙杯免費熱飲，搭長途車都可以好舒服

黎到已經差唔多夜晚12點了，係街邊買左兩隻quesadilla 返hostel食，係全日唯一一餐，好好味


我地係Oaxaca留左4日，呢個城市係一個好舒服既旅遊城市，街上既屋色彩繽紛，氣氛一貫地友善，有文化遺跡亦有自然風光，非常唔錯。

Oaxaca出名朱古力，連我地住間hostel都叫Hostel Chocolate


前一晚搭左咁耐車，搞掂訓覺已經好夜。第二朝訓到自然醒，行去市中心閒逛。首先食個晏晝先

60peso(大約24hkd)一個餐有湯、飯、烚菜、主菜、同無限量供應既是日飲品。


感覺呢度既野食同墨西哥其他地方有啲唔同，比較多湯同燉菜，食落喉嚨好舒服。
呢日飲既品係蜜瓜加水打成既Agua de sabor melon，墨西哥人對果汁好認真，只有一滴水都唔加既先可以叫果汁jugo，如果杯野加左糖同水，就只可以叫agua de sabor +生果 (water of the taste + 生果）。

繼續閒逛


講到朱古力咁出名，搵間cafe坐低試下

真係好香好好味日日都要飲一杯

晚飯都係食當地菜，首先黎碗雜菜湯

材料有粟米、合掌瓜、紅蘿蔔、圓形矮瓜、菇、豆 等等，雖然材料雜亂，但好有屋企呀媽煲既湯既感覺呀

Mole都係Oaxaca 名物，之前提過mole好似咖哩咁有好多種顏色，因為Oaxacan菜既多樣性，有個講法係你係呢度係可以食勻哂7種顏色既mole。

我地唔貪心，首先試下Oaxaca 獨有既黃色mole 先，因為令佢形成黃色果種辣椒只有呢個地區先種到，所以比較少見。叫左個雞肉既mole amarillo con pollo，味道好溫和，清清地，就係好似食緊好清新唔辣既咖哩咁，食落好舒服。 男朋友又叫左牛扒，一如以往佢地既‘牛扒’係極薄切嚡口牛肉片，呢次佢終於知錯，係佢最後一次係墨西哥叫牛扒食。

支持! 睇完我都想去做義工呀!

支持

繼續留名支持

第二日我地去左睇遺跡，位於山上面500BC時建成既Monte Alban。無乜人，好靜好舒服。


呢度係Zapote文明歷史中一個好重要既城市，係墨西哥第一個有文字系統既民族，亦都識得計算歷法。開放參觀既部份係類似市中心既地方，中間有一個長方形草地，四周就被平頂金字塔圍住，南北兩面各有一個好高既平台，每一級都好高，行到最頂就可以見到成個遺跡既景色。

佢地好鍾意踢波，不過佢地唔係用腳踢，係用屎忽、手爭同膝頭撞既。其他地方好多踢波都係賭命，但Monte Alban既人既溫和啲，踢贏踢輸都唔使死，佢地仲會用踢波黎解決紛爭添。不過我地參觀既時候足球場維修緊


佢地會捉附近部落既皇族或者統治者黎做俘虜，然後雕成畫周圍擺，阻嚇其他想侵略佢地既敵人

呢啲人樣雕刻叫Dancer，佢地啲姿勢好似跳緊舞咁，共通點係隻目緊閉，個口張開，睇落好痛苦咁。有啲仲好似下面果個咁條丁丁仲比人斬左，下體爆炸性咁流血


臨走時見到班好似選美佳麗既人拍緊外景，估下佢地幾多歲？

原來佢地係Miss Teen Earth Mexico，企我地隔離個八卦仔話佢地平均年齡係15歲咋！完全睇唔出

行完返黎好肚餓啦，係街市熟食檔醫肚。

男朋友食左黑色Mole, 食落苦苦地，有啲藥材味咁，唔係太岩口味。我飲牛骨湯，好味道。所有野食跟餐都配一杯甜甜地既米水。

食完行下街市，呢啲就係mole真身啦，係咪有啲咖喱或者我地啲蝦膏呢，Oaxaca 呢度仲好鍾意將朱古力加埋入去做啡色mole



Oaxaca 既草藥都好出名，甚至有啲行山草藥蒸浴tour，原本我地都好想參加，但咁岩m到好似好麻煩，唯有留返第日有機會再去

周圍都有好多手工山草藥製品賣，買左支蚊膏都幾好用

墨西哥版文記家品，立立雜雜乜都有，好多made in china