歡迎黎到拉薩,終於唔洗焗係火車,青瓜超開心。
天氣比想像中暖,火車上面見出面落哂雪,但黎到拉薩係好好天。
但可能因為淡季原故,個站係冇人嘅,只有少少工作人員。
出到拉薩站,好想同個站影張合照,留個記念。
但原來要企好遠或者側面影,如果唔係會有人出黎話你。
青瓜原意係想搵架巴士坐去拉薩市中心,不過太攰,都係坐的士。
唔洗擔心搵唔到路,一出右手面就係巴士站。
直行就會有一堆的士佬兜你。
青瓜問價,的士司機話計人頭,三十蚊人仔一個。
青瓜同朋友仲想格價,但司機話唔洗搵喇,公價黎。
但九十蚊一程,好貴。
雖然拉薩站入市中心都有段路,但青瓜覺得實在唔值。
商量左一陣,決定都係搭。
因為大家都想早啲到酒店。
坐左三個字左右,就到拉薩市中心。
終於見到你喇!
布達拉宮。
唔知其他人會唔會,但見到布達拉宮嘅時候,青瓜感動到偷偷咁流左幾滴眼淚。
覺得「人生必做清單」上面可以加多一個剔號喇!