差唔多八點半左右,火車服務員黎通知青瓜,十一點就會到達西寧。
青瓜叫醒朋友,食早餐,準備執野轉車。
無論你由邊到出發,到左西寧,都要轉車。
所以可以直接飛西寧坐火車,唔洗轉黎轉去。
不過直接由西寧到拉薩嘅火車飛,好難買。
十點鐘,哥哥仔仲瞓緊。
青瓜有啲擔心佢係咪提早高反暈左。
佢郁都冇郁過。
直到服務員黎換返張乘車證,拍醒佢,青瓜先鬆一口氣。
講起乘車證,介紹下。
其實係成都上車時,要用車飛換一張證,上面寫左你個床位。
唔好唔見,因為你落車時要換返張火車飛,再拎火車飛換西寧至拉薩嘅乘車證。
十一點,準時到西寧。
有大約四個字俾你換車,你可以影下相。
如果你有乜都要影一餐嘅習慣,可以提你:西寧站嘅車站牌係車尾,你可以跑返轉頭影。
但又提你:軟卧車廂係車頭。
十一點二十分,開車。
再過二十四小時後,我地就會到拉薩。