[超大量收藏相, 慎入] 非老變機械人產品綜合討論區 (3) 第三方同老翻野之外咩都傾得 歡迎互毒

我曾經有過模型版, 試下答:
頭兩張圖個個係水口, 應該隻隻都有;
腰側應該真係奶左野;
最後兩張, 其實見到有痕, 即係可能抺線時, 重手抹走左...

其實最礙眼都係腰側,不過好彩正面睇唔多覺,其他我都算九數.

CHing都幾嚴謹

其實我本身都唔係験屍官,只不過係睇價錢將要求調整,如果話件玩具四、五百貨仔,我中少少sad無乜問題,但而家啲玩具大隻少少嘅都開你千幾二千,中咗sad真係會有啲灰.

咁你又確實真係中左SAD, 好彩唔嚴重。

唯有睇開啲, 我以前真係驗屍官, 天元山口一箱揀兩隻我都做得出, 但搞得幾搞都覺得無謂,
好多時啲未開嘅玩具, 係盒內自然分解, 或者唔小心自己整爛, 被逼睇化左

我都自我崔眠
花左當戰損
家陣無論玩MB 定合金魂 都睇化左
人手既野好難完美QC

我做到依家咁睇咁化, 都用左六七年...

I know that feel bro...
就算平定貴都好，買左番去一打開發現中sad真係想喊
不過玩得多都睇化，除非中d左左手右右腳冇得搞之外都試下自己執執

好似呢隻zz咁，全新買番黎都會斷呢樣果樣，唯有自己用手鑽、模型膠水、潤滑油搞番掂

其實 就算幾千蚊既野都好難追求完美
睇化小小安心D
最近迷上玩老千野 就貪佢有半年保養
高質到hot toys 個D最近我買動漫節限定3隻 中足3隻sad
都好在有14日保養
Bandie 個D真係唯有接受
小小sad 上色問題 有花 都算數了
真係好難完美

可能我人品差,買十隻都會中八隻sad.
最衰就係我買咗唔係立即開,通常會擺番ㄧ、兩個月先開盒(因為唔想被老婆知我又買玩具)所以開盒見到中咗大sad都無得攞番去換,小sad我都係當睇唔到.

其實唔係話要大家咩都接受, 但好多時真係人算不如天算,
如巴打們講, 幾千蚊都可能可以中好SAD, 例如EX合金新買就開盒爆, 話就話AS TOYS都會換到俾你, 但設計問題真係換極都係爆...

我放埋一邊唔捨得開, 一開就爆嘅玩具真係太多了, 合金到ROBOT魂都有...

有時放櫃太耐, 都係會爆, 一般小修理都係自己搞, 近期最大手術應該係SR合金反螺旋隻黑紅蓮螺巖, 成條腰鎖死一個方向嘅可動, 換取佢企得直身...

最後我想提提各位同好巴打, 就算諗住儲都好, 請一買返嚟就開盒檢查下, 老千, AS TOYS都有保養, 有機會換到, 不過太耐的話都係無得搞。

同埋, 我自己睇法, 可以的話都係盡快玩, 依家啲玩具真係唔同以前, 合金多就無咩可動, 但真係可以當傳家寶咁收藏落去, 依家個啲...我諗大家都明, 真係消耗品。

同意，收埋係盒真係無用都係會自爆，點都開左出嚟玩左先

成左家嘅巴打真係會有難度, 但都無辦法, 買返屋企盡快開啦。

各位巴打準備好比人打劫未

都唔知訂唔訂到,訂唔到就大獲,班仆街實炒

報料辛苦晒！

我鐘意原作多啲，太機械化唔係我杯茶。

老老實實 依隻會鳩衝

所以隻隻都要扭返夠本 到時過左賞味限期
真係慾哭無淚..

唔係限 會有大貨瓜...
隻飛西人地都話炒
但係咁見大貨

如果開訂時極速截訂應該都炒硬

黎喇
0,1,2,3,13,量產機
tv版新劇場場版出幾多我全收
最想要係舊版白色量產機

想要依隻仲多過隻SF..

有應該會訂哂成套

Gainax 嘅拉神唔知會唔會有問題, 但呢隻唔係本傳嘅初號機, 真係唔知點計。

各位到時留意下孤仔FACEBOOK同AMIAMI啦