逃•人
2017-01-12 09:01:45
Chapter 49 - 她們的經歷
Suki 緩緩地站起來，對著我。
「對唔住，我好唔開心…」Suki 説著向我走來，伏在我肩上哭泣。
突如其來的擁抱令我不知所措，Suki 身體那柔軟的觸感，再加上剛才進入更衣室時的情景，令我身體再次作出本能反應…
我刻意把下身移後，以免被她察覺我這尷尬的情況。
我輕撫著她背上的長髮，溫柔地説，「唔緊要，可唔可以話比我知發生咗咩事。」
「嗯... 其實喺同你哋失散之後，我哋都有諗過搵番你哋先，不過我哋見倒你哋走嘅方向好多喪屍，所以唯有繼續向前行。」Suki 開始娓娓道來，「我哋沿住西沙路一直行，Keith 就提議去烏溪沙嗰邊等你哋，因為佢估你哋都會經嗰邊去馬鞍山。」
「咦，咁你哋有冇去過烏溪沙個巴士總站呀？」我示意 Suki 坐下，「我琴晚喺嗰度過咗一晚夜。」
「我哋冇經嗰度。」Suki 答道，「原本都有諗過去銀湖等你哋，打算去烏溪沙巴士站嗰邊。但當我哋行過迎海條行人天橋嗰陣，睇倒好多喪屍喺度，有啲見倒我哋仲跳落嚟捉我哋。好彩好多都跌斷腳走得唔快，不過都有幾隻追住我哋...」
「我哋就沿路跑去利安方向，咁啱有架貨 van 轉出嚟，嗰司機就停低比我哋上，我哋先走得甩...」
「跟住佢就問我哋想去邊，近嘅話就車埋。Keith 就話想番馬中先，咁司機就沿住西沙路行，行到市中心附近就開始多冇人嘅車阻住，再行近啲仲有喪屍發現我哋追過嚟，司機冇辦法唯有番轉頭。」
「去到錦英路口，司機見冇喪屍追嚟，就話佢要番去錦英搵屋企人，然後就試吓出唔出倒市區，問我哋等唔等佢。」
「我哋就話暫時冇打算離開馬鞍山，因為我哋仲有屋企人要搵，於是佢就喺街口放低咗我哋。」
「Keith 落車後提議行前啲睇吓咩情況，可以嘅話就試吓番馬中。我哋就沿住行人路邊一直踎低行，盡量用啲車做掩護...」
「頭先唔係話好多喪屍喺市中心㗎咩，又要行番去？」我對這提議覺得奇怪。
「你都覺得奇怪哩？」Suki 回應道，「Vicky 都有問佢，佢就話架車嘈啫，我哋細聲啲未必發現倒我哋嘅。況且 Keith 話你哋都好大機會番馬中，所以番去喺必要。」
「咁又係... 我都係想番馬中先會嚟咗健康院。」我説道。
「不過行到隧道附近，就發現隧道同十字路口都有好多喪屍，Keith 就提議入去健康院再從長計議。」Suki 續説。「我哋走到入去，諗住上樓上，點知上樓梯度門比嘢封實曬。我哋唯有攞定曬啲武器，走入去門診部睇吓。」
「大堂冇乜動靜，啲房門又閂曬，本來都唔打算去開佢哋，忽然間一間房入面有慘叫聲傳出嚟，我哋即刻高度戒備。」
「突然有個女人喺間房度行出嚟，佢雖然面色蒼白，雙眼無神，但望落唔似係喪屍。跟住阿 Keith 行埋去問吓佢有冇嘢，點知佢一下就推咗阿 Keith 落地下。」
「之後佢就撲向我面前捉住我，然後突然對住我嘔，我都唔知可以點反應，唯有大嗌。個女人聽到之後就好似嚇親走咗出去，但我發覺兩邊手臂已經有幾條好痛又好深嘅血痕。嗱，你睇吓！」Suki 向我展示著已經結疤的傷痕。
「我個身好臭，又怕比佢整傷之後會變喪屍，於是就踎低爆喊。佢哋即刻嚟安慰我，但係我真係好驚。跟住 Keith 話不如我哋上去睇下有冇地方沖身，Vicky 亦都話上樓上好似安全啲。」
「我已經冇曬主意，就好似行屍走肉咁同佢哋搭𨋢上去。上到去好似都冇乜異樣，跟住 Vicky 同我入咗廁所同我換咗啲衫出嚟。好在母嬰健康院有好多布可以用，我先可以抺身，洗傷口同包住自己。」
「抺完身諗住洗埋啲衫，點知個頭開始暈。Vicky 即刻扶我去其中一間房訓低，冇幾耐我已經唔知係瞓咗定暈咗。」
「之後渾渾噩噩咁過咗一段時間，又成日發惡夢，醒番之後原來已經兩日後嘅事。Vicky 同番我講，呢兩日我暈咗又發高燒，好驚我捱唔倒，好彩最終都冇事。」
説到這裡，我忽然想起我都有相同經歷。這是因為感染了喪屍病毒的原故嗎？但我在到老人中心之前都沒有被咬，為什麼會有相同經歷呢？而我們現在是已經痊癒，還是會有一天突然變成喪屍呢？太多太多問題找不到答案，我變得坐立不安，Suki 也好像察覺到我的不妥。
「係咪，有咩事？」Suki 向我問。
我向她説明我遇到的類似經歷，和我的看法。雖然我們暫時找不到答案，但有人和自己同病相連，感覺也算不錯。
我們亦同意在有比較明確的答案之前，我們皆不會説出大家相同的經歷與想法。我忽然想到，與弟弟的女友守著一個連他都不知道的秘密，感覺十分刺激。
「咁，睇落暫時都冇嘢嘅，又有我陪你，咁唔洗唔開心啦！」我天真地説。
「其實呢件都係小事，過咗呢兩日，我都諗通咗。令我最唔開心嘅，係另外一樣嘢。」Suki 淡淡地説道，「呢個亦係我突登同你出嚟嘅原因。」
逃•人
2017-01-13 00:09:44
Chapter 50 - Suki 的疑惑
「吓... 聽落好似好嚴重咁。」我對 Suki 的説話感到不安。
「有冇發覺阿 Keith 冇咁緊張我？」Suki 的問題耐人尋味。
其實我與 Keith 重遇只有短短的數十分鐘，根本沒可能看得出他有什麼異樣。不過經 Suki 這樣説，我亦曾經對 Keith 容許我跟 Suki 同行覺得奇怪。不過，當初我想他是信任我及實在太累所致。
現在 Suki 這樣説，該不會是...
「老實講，我唔覺得佢對妳差咗，可能我只係返咗嚟一陣唔覺啦...」我答道。
「你係佢大佬，實幫住佢㗎啦...」Suki 道，「我昏迷咗兩日醒番，總算執番條命。但就係過咗呢兩日後，我發覺 Keith 對我已經唔同曬。佢好似刻意唔同我咁 close，仲少咗同我講嘢，又冇噤關心我，總之就係感覺唔同曬囉...」
「其實，會唔會佢都有啲驚你會變喪屍，所以唔識點處理咋？始終呢樣嘢大家都驚，可能觀察咗一排，見你冇事之後會好啲呢...」我安慰她説。
「我真係唔覺囉！你知我成套衫污糟咗一陣味，我想佢幫我出去搵過套新嘅，佢就話危險。點知第日 Vicky 話 M 痛就仆倒話出去。佢之前已經有意無意咁想黐埋 Vicky 度，又成日同佢講嘢引佢笑，我講就係咁意敷衍我！」Suki 説著有點怒氣。
「咁... Vicky 佢咩反應？」我比較在意 Vicky 的想法。
「不過 Vicky 就好似冇乜意思，仲成日問住幾時去搵返你哋。今日見返你，我覺得佢真係開心。」Suki 説。
「咁咪好囉！Vicky 佢都冇意思...」我心感快慰。
「你就開心啦！由個心度笑出嚟... 我都唔明，我而家好差咩？點解個個都鐘意佢唔鐘意我？」Suki 突然激動地問道。
老實説，論樣貌，兩人都各有千秋，甚至我覺得 Suki 的樣貌還要標緻一點，與我女友 Janice 相比，至少贏多過一個 level。如果勉強要比的話，好像 Vicky 的身材好一點，而且 Vicky 開朗的性格也好像吸引人多一些。
真的難分高下，但為了不再刺激 Suki，我於是跟她説，「如果妳問我，我就覺得妳靚啲喇！」
「你唔洗氹我喇，比著你，你都揀 Vicky 啦！樣又靚，身材又好，性格又開朗，我係仔都揀佢啦！」Suki 睹氣地説。
「咁你有冇嬲佢？」我好奇問。
「唉... 少少妒忌就一定有，不過我同佢由細玩到大，唔會因呢啲事而嬲嘅。況且 Vicky 都話對 Keith 冇乜感覺，係阿 Keith 有嘢之嘛...」Suki 回應道。
「咁點解妳要陪我出嚟，由得佢哋單獨相處？」我攪不清楚她的動機。
「嘿嘿，唔話你知...」Suki 曚起眼奸笑道，「不過只少證明咗一樣嘢，喺我有危險嘅時候，你都會奮不顧身咁救我，我真係好開心。有時我喺度諗，如果你鐘意嘅係我，幾好。」
她這句話突然令我説不出話來。
「你睇你吖，呆曬喺度。」Suki 説著用手指推了我額頭一下，「我同你講笑咋，唔洗嚇到出唔倒聲喎！不過無論點都好，你都會保護我㗎呵？」
我堅決定點頭，但內心亦突然湧起之前一些違背的承諾，頭不禁又再痛起來。
「你，冇事吖嘛？」Suki 擔心我的狀況，「不如你唞吓先，我換完衫叫你？」
我點頭示好，打算走出更衣室坐下來休息一下。
「阿 Roy，多謝你！」Suki 説罷就是一吻。
我突然感到身上的慾望被牽起。不知為何，自從自己受傷昏迷後，心中的慾火好像很易被刺激燃燒。
但眼前的是弟弟的女朋友，亦是 Vicky 的好友，我的理智強壓著心中的慾望。
我悄然地走出更衣室。
與身體本能反應抗衡的感覺十分難受，我花盡腦力才能將注意力分散，把慾望壓抑下來。
我在這難得的空閒，開始思考一些來龍去脈以及已有的資訊。
Suki 在感染病毒後發了兩天的高燒，與我的情況一樣，但我之前並沒有被喪屍噬咬或抓傷，不知道感染病毒的途徑。難道，在廻旋處上的玻璃碎片染有病毒，因而傳到我身上？
而且小喬在巴士上異變成喪屍，難道是她跟我親熱時把病毒傳染給她？那我豈不是害死她的原兇？
喪屍的噬咬或撕抓也是血液感染的一種，那便可以解釋為什麼 Suki 都有疑似感染的症狀。
不不不... 如果我是感染者的話，為什麼小喬異變了我還是安然活著？而且 Suki 也好像有同一情況...
還有，據 Suki 之前的描述，診所內的女人也好像沒有完全異變，因她好像仍懂得開門，受驚等人類行為。
同一情況亦發生在萬寧內那男人身上，他有意識離開店舖，開閘，關閘...
難道病毒是會潛伏在感染者體內而不病發？哪令感染者異變的誘因又是什麼？
體內哪難以抑壓的慾望又是什麼？難道病毒的本質，就是把人類吃和交配的原始慾望放大，從而達到病毒能廣泛傳播的效果？感染者又會否再互相感染？這又會否令感染者的病毒增強？
又是一堆沒有答案的問題，但也不全是一無是處。至少我好像對病毒加深了認識，及作了一些大膽的假設。
我拿出剛剛拾獲的筆記本打量著，直覺告訴我這裡應該有著一些事情的關鍵，而上面的文字令我再次想起了一個人，素恩。
我下定決心要找回她去讓我解開迷團。
宜家幾點
