未來10年係BNO生死存亡既關鍵 ── 90後年青人對BNO既觀點與自述
大家好，好感謝你睇呢篇文章，我係一個1996年出世於英屬香港既香港居民，今年21歲。係呢度，我希望同大家分享一下作為最後一代英國國民(海外) 對BNO 既睇法。我既文筆唔好，希望大家見諒。首先容許我講少少歷史：
1990年，時任香港總督衛奕信爵士公佈居英權計劃，提供最高50,000人和他們的家眷名額依照《1990年英國國籍法令(香港)》成為英國公民。根據一九九〇年英國國籍（香港）法，總督可向國務大臣推薦為數達50,000之香港戶主登記為英國公民。我中學個時識得幾個同學，佢地父母有啲係專業人士，有啲係教書既，佢地都透過呢個計劃拎左BC。遺憾既係，香港有好多中下層既父母(包括我既父母)根本無資格又或者無興趣去申請英國公民身份。不幸中既大幸係我父母有幫我整BNO，都叫做有野係手，仲叫做同英國有少少聯繫。
踏入90年代，最後一代英屬香港人，即係我地講既90後相繼出世。呢一個世代既人同前幾代相比有啲特別。呢一班人當時仲係好細個，佢地未必會察覺到身邊發生緊咩大事，而政權亦正在無聲之中交替。80後出世既人可能都識得睇下電視關心社會，識得表達自己意見，但1996年出世既我當時仲係一臉無知，根本唔知外面做緊乜。
我想講返去1980年代，我希望用我既角度回顧呢段歷史，講下點解我地會走到黎呢一度。我冇親身經歷過呢段時期，亦冇讀詳細讀過香港歷史，我所知既都係由上網閱讀而黎，如果有任何錯處，歡迎各位賜教。
1980年伊始，早於80年代初英國曾經修改國籍法，設立左三種國籍：英國公民、英國屬土公民以及英國海外公民。而香港社會亦開始討論前途問題，其中以香港大學生尤為熱衷於此議題。1983年，港大學生會通過了「致函中國政府，爭取香港民主化」的議案，當中學生會表達左「中國擁有香港主權」的愛國基本立場。我已經忘記左當年學生會既口號，但我記得個時既香港大學學生好愛國；呢一年，距離我出世仲有14年，距離我入讀香港大學仲有32年。其實我應該慶幸我冇參與其中，不然我都會變成今時今日的愛國藍絲。隨住英國係香港前途談判上節節敗退，加上社會對「回歸」中華人民共和國既憧憬，英國最終係1984年簽署《中英聯合聲明》；而我要再過12年先黎到呢個世界。
同期，英國政府開始簽發英國國民(海外) 護照，即BNO。1985年，英國政府決定BNO不含繼承權：我會形容呢個舉動係表達左英國要同最後一代英屬香港人劃清界線既諗法 -- 你可以擁有英國國藉，咁只係代表左你出生於英國國土而屬於英國，但你絕對唔可以用呢個身份長居英國本土。
講完80年代，當然要講90年代。正如上文提及，英國政府係1990年代推出居英權計劃，主要係提供移民機會畀曾經從事敏感職位的香港華人政府公務員又或者係各行各業精英，包括最有能力及動機申請移民的人士。當然，好似我屋企呢類中低層根本唔會有機會申請到。1996年，終於到我出世，同Wiki睇香港名人既出生地一樣，我出生係英屬香港，我擁有British National Overseas 國藉。1997年7月1日，英國正式將香港交畀中華人民共和國，個時既我1歲，亦冇話事權。而根據《中華人民共和國國藉法》，所有中國血統既香港人都自動被賦與中華人民共和國國藉，一夜之間我由英國國民(海外) 變成 擁有英國國民(海外)同埋中華人民共和國國藉既香港人。當然中國血統指咩已經無得拗，即使而家有幾唔情願，我地不得不承認我地而家擁有中華人民共和國國藉。
