[多圖多字] 獨遊日本七日山陽之旅

可唔可以包養下小弟

我諗新年前應該可以出曬所有資料！！！
大家耐心等多我兩三日啦

我由返工開始就要一年去2,3次日本

每月俾哂人工基本需要,(老母股票grantloan保險)
儲2000
4個月8000又可以去個短線行

等你

遲下廣島遊可能有野要問你

9/1 寧靜的倉敷 vs 繁華的福岡
(備中松山城展望台 – 倉敷美觀地區 – 抵達福岡 – 福岡小金ちゃん屋台Dinner)

《備中松山城展望台》

一月九號係我成個旅程最早出發嘅一日
原因我要出發去備中松山城展望台

點解我要標明係展望台，原因係個展望台同座城其實係有一段距離
而我去嘅就確實只係展望台

簡單比少少背景資料大家
位於岡山高粱市嘅備中松山城係日本百大名城，亦都係最高嘅山城
位於海拔430公尺山頂，並獲得天空之城嘅美譽

不過要數其最出名嘅原因
莫過於每逢晚秋至初春清晨都有機會出現城堡置身雲海
而備中松山城展望台就係最好嘅地方可以欣賞到雲海

不過，雲海呢架野其實係可遇不可求
出現雲海嘅機會其實唔高，好多時其實都係得30%左右
一切都要睇運氣



要去備中松山城展望台得兩個方法
1. 自駕
2. 搭共乘的士

我無車牌當然係共乘的士啦
不過都好麻煩，因爲要打電話去高梁市観光案内所Book, 1500円

http://www.city.takahashi.okayama.jp/site/bichu-matsuyama/matsuyamajou-noriai-unkaitaxi.html

每日係JR備中高梁駅得兩班車，07:30同08:00
我就建議大家搭07:30，始終越早上到就越容易見到雲海

不過又唔識日文又無電話點算啊？？？
你可以叫酒店幫手book
或者好似我咁透過白金秘書幫手book，不過就預早幾日send request比白金秘書好d
___________________________________________________________________
係呢度可能有d人都未用過白金秘書，甚至都唔知道係咩
所以我就簡單介紹下
白金秘書其實係一個提供比任何持有Visa白金卡人士嘅代booking system
只要你幾日前透過電話或者Online send你個request,就可以代你預訂任何國家住宿、行程、餐廳同交通等等
而且好似DBS Compass visa同恆生enjoy card呢d超低門檻信用卡都已經係白金卡

(利申：絕無廣告成分)
__________________________________________________________________________

我就3號send request比白金秘書，7號夜晚就已經收到預訂確認

天都未光已經出發


我就一早搭JR去到JR備中高梁駅
係西口出閘，隔離的士站就會有車等你


今日呢一班得我一個人咋！所以我比1500円包車
司機係一個8X歲嘅伯伯
途中不斷撩我講野，但可惜大家都係鷄同鴨講


沿途上山個陣其實都開始天光，而且周圍都無霧
我基本上已經知道今日唔會有雲海出現
因爲雲海係需要濕度高加上和暖海洋氣流形成大量雲霧
只可以話呢一日個天太靚

就快到終點個陣，司機都有同我講今日無雲海
不過既然都上到黎就當係上山睇風景

司機擺低我係公厠隔離落車


然後對面樓梯一上就已經係展望台


呢座就係展望台，好似平時公園玩個d小城堡
(呢幅係我臨走個陣影，我一準備走就有人黎)


一望出去
果然，係無雲海


呢座城就係備中松山城啦


每年紅葉季節大家都一樣可以上黎呢度
望住好多紅葉包圍備中松山城

但老實講，其實我真係非常非常非常非常非常非常非常非常非常失望
我個陣係笑都笑唔出，呆住望住眼前景象



加上係山頂其實好大風，凍到我手指都僵曬、耳朵凍到痛
再加埋心痛同心碎，有一刻爭少少想喊
不過人生不如意事十常八九，最後我忍住左

望多陣備中松山城
然後就搭返的士落山

再搭返JR返岡山
再去酒店Check-out加寄存行李
然後就出發去倉敷

係岡山官網度偷左一幅雲海圖，當望梅止渴

無問題啊！！
我呢d閑人最中意答問題

唔引用啦

冇所謂啦睇唔到

上次去明石天氣話落雨都唔想去點知去到勁好天

福岡小金ちゃん我都有食

反而好少聽講天氣預報會錯

巴打 請教你天氣預報係咪都睇yahoo?

佢應該係朝早落雨

但去到黃昏已經好天

我通常會check曬yahoo, accu同日本氣象局

《倉敷美觀地區》

提起倉敷，最著名景點就一定係倉敷美觀地區
我當然都要慕名而去

由岡山出發去倉敷都係十幾分鐘


記得留意返指示牌，第一幅係去美觀地區，另一幅係去Outlet



其實全程都會見到指示牌教大家點行
我就比幾幅圖片大家指引下啦


落完樓梯就向右手邊馬路一直向前行



行大概5分鐘就會見到一堆大江戶風格建築
個度你就可以行入去，正式踏入倉敷美觀地區


以前睇日劇佈景板出現嘅景象而家出現係我眼前
今日人少，所以環境好寧靜


呢度有間咖啡室好出名
而且外牆被蔓藤包圍，好有特色、
如果春夏個陣，蔓藤更加會長滿綠葉


另外隔離都有間大原美術館
同樣石頭外牆都係被蔓藤包圍，增添藝術氣息


倉敷美觀地區總共有三條橋
如果按我個路綫，第一條橋就會係今橋
對面就會係大原家住宅同有隣荘



一路向前行就會係第二座橋—中橋
呢一日有個伯伯係中橋隔離販賣手工製精品




而係中橋呢度，大家可以一嘗坐人力車
等日本壯男拉住你周圍兜風
聽聞車夫大部分本身係田徑/運動選手，賺錢之餘兼訓練體力


車夫哥哥好L Man啊
我都爭d想同佢hehe



係中橋呢度都可以飽覽兩旁景色



而最後一條橋—高砂橋
係我認爲最不能錯過嘅地方
係呢條橋上面可以清楚影到倉敷美觀地區最靚嘅角度


你可以幻想到春夏個陣野芳發而幽香、佳木秀而繁陰
雖然秋冬天柳樹凋零，但卻有一種古樸而又滄桑之感
我只能講四時之景不同，而樂亦無窮也
(引用至醉翁亭記)



不過只係一橋之隔，觀景卻截然不同
隔住左高砂橋，另一邊反而突然變返一個正常市區


所以能夠係一個城市中有一塊舊時代建築景觀
完全係一件賞心悅目嘅事

周圍行下乃是常識吧
見到有藍色食物，藍色雪糕、藍色漢堡包同藍色蒸包
我就絕對見到都無胃口啦


仲有一個星野仙一紀念館


但可惜，而我不知星野仙一是誰
後來我search返先知係前日本棒球監督

係倉敷美觀地區呢個如此休閑、古樸嘅地方
相信大家都有諗過唔知有無得坐船仔飽覽兩旁白牆建築呢？
其實係有嘅，不過12月至2月就只有星期六日同公衆假期開放
而3月至11月就除左第二個禮拜一休息外，其他時候每日都設有遊船活動
每個人300円，每次20分鐘

而我呢一日係星期二
所以sorry，我唯有望下泊係岸邊嘅艇仔啦


無得搭船，就唯有用我對小短腿慢慢行
再用雙眼將周遭木材白牆建築記低

手信店推介：

くらしき桃子
一開始就已經見到呢間甜品店くらしき桃子
同時亦都係非常著名手信鋪


大家可以去食下岡山最無敵嘅白桃甜品
同埋買羊羹(類似啫喱)做手信派街坊


羊羹有各種口味，好似有白桃、提子等
台灣d blogger又係讚到天上有地下無
不過都唔平，一舊都百幾円
好在有禮盒裝，平好多


不過經過我同朋友親身試驗，覺得都幾難食，無論咩朋友都覺得麻麻
白桃太重奶味，提子就好似藥水味
而且個口感係我所有收到呢個手信朋友都投訴
但包裝幾靚，加上又唔係我食haha

另外都有呢d一條條唧唧啫喱
味道ok，呢個可以一試



瀬戸内庵


呢間其實係賣調味料鋪頭
入面有各式各樣鹽、醬料同高湯包
仲可以隨便試食試飲，好正




我誠意推介高湯包
無論你返香港煮蔬菜、湯飯定就咁飲都好正
你地不妨去試下味先

廣榮堂
廣榮堂其實都係非常著名手信鋪
裏面有唔少甜點
而且都係可以先比你試食完再決定



不過呢度重點當然都係成個倉敷美觀地區啦

今日全力加速！！
夜晚會出多少少

倉敷 好似睇日劇d 古代場景咁

係呀 真係好特別

《ぶっかけ亭》

離開倉敷美觀地區，下一個目的當然係食野啦
小弟我唔餓得

本身倉敷美觀地區都有幾間餐廳我有興趣
但我真係真係真係好掛住日本烏冬啊！！
上次高松食過之後，返到香港真係無辦法再食d急凍烏冬，白鴿口是也

而我係之前Aeon Mall篇介紹過一間叫ぶっかけ亭嘅著名烏冬店
其實倉敷就係ぶっかけ亭嘅本店
所以大家都知我要去邊啦

ぶっかけ亭係倉敷商店街頭，近倉敷站個邊

同好多二三綫城市一樣，商店街甚爲冷清



行啊行啊就會見到，就係呢個！


入門口就會有人指示你坐邊
然後就比個menu你睇


價錢真心算好平，而且分量好足
加100円就可以變大盛

我就叫左碗大盛熱湯牛肉烏冬 670円


超級大碗，大過我隻肥仔手掌
同譚仔過橋米綫套餐有得fight！


但味道係唔差，絕對可以話性價比頗高
湯底係昆布湯，清而不膩，味香而不濃
另外加上少少牛肉汁，令到湯底有少少咸味，對年輕人更容易入口
烏冬本身都唔差，有咬口，無過淋
但同個陣我係高松食到嘅彈牙感比，就真係無得比啦

倉敷係幾靚
但隔條馬路就變左現代市區
感覺好奇怪

都唔係奇怪
即情係有少少假

好羡慕可以自駕啊！！

《倉敷三井Outlet》

倉敷三井Outlet係少數日本outlet臨近JR站
所以都非常方便好似我呢d去完美觀地區嘅旅客再去Shopping

我自己平時係香港比較少shopping，一般都留到去日本旅行順便去outlet掃平貨
加上我經常都係1月去，係日本減價季節

要去倉敷三井Outlet，就要去返JR站穿另一個出口過去

你會先經過一個叫Ario嘅商場，規模都好大
有超市、藥妝同美食廣場等等



然後大家要揾8號出口
一出就會見到有條天橋


直行天橋就會係Outlet


倉敷三井Outlet規模唔算大
店鋪比較集中，唔會分得好開



雖然規模唔大，但一般大路牌子都有
我就舉少少例啦
運動牌子：Columbia、Nike、Adidas、New Balance、Puma......
時尚服裝：Gap、Vans、Wego
流行配飾：Gregory、Samsonite、 Seiko
名牌服飾：Michael Kors、Tommy Hilfiger

不過要係三井outlet大開殺戒之前
大家記得要去information centre攞返本coupon book先好開始shopping


某d店鋪折扣非常可怕
我舉Gregory作爲例子

上圖呢個袋係福岡大商場做緊原價20000円
但係呢度買，半價！！！！！另外用coupon book仲有95折



另外仲有好多款背囊同袋都係半價
連真係for行山個d背囊都係

不過提多句，當然呢度賣個d都唔係比較流行嘅款式
好似最受港人歡迎嘅綠花、藍花都唔會有
但至少呢度d款我係市區商場都依然仲加到係架上面
豐儉由人啦

係呢個時候......
居然落雪啊，我想喊出黎


https://vimeo.com/253127206
https://vimeo.com/253127148
(毛毛雪片段)

我係一個同雪無緣分嘅人
上年1月連去北京、東京同首爾都無見到雪
雖然呢次係毛毛雪，但我已經好high啦

之後嘅事其實都係shopping
所以就無謂比大家望我買野啦

好正啊頂

幾日冇追post已經推左幾版
原來巴打都係21歲
21就已經自己去過咁多地方
我嚟緊5月先至第一次自己去