我之前都講過,角島大橋附近無乜餐廳
行五分鐘左右會有一間外觀為白色嘅西餐廳
就係下圖右上角個間啦,有無敵大海景睇
GABBIANO
餐廳名叫做GABBIANO,非常洋派
當然外觀都非常洋派啦
餐廳好似成個貨櫃,不過係雪白色
再配合位於海邊嘅先天優勢,無論同咩人食都特別有feel
而且係透過窗可以望住成個海同成條橋
冬天個陣露天位唔開,但食客仍然可以走出去睇景色
講左咁多,當然唔可以忽略食物啦
比大家望下餐牌,得日文,無其他語言
所以好似我呢d唔識日文就只好google translate同亂叫啦
整體價錢都真係唔平,不過有一半價錢都落係個環境同風景度啦
另一半價錢就係呢間餐廳係標榜全部都用有機食材
餐廳有提供Set Lunch,有是日意粉、是日沙律同一杯餐飲,盛為3280円
我對沙律同餐飲就無興趣,所以就散叫左個是日意粉同從翻譯得返黎嘅蒜蓉多士,已經食左我2600円

蒜蓉多士已經唔單單係分量十足嘅多士
我100%相信係經過油炸,令外層酥脆並呈金黃色
咬落去無論表皮定裏面麵包都係非常之脆
而且搽上去嘅唔係平時我地麵包舖見到嘅細細粒蒜蓉,而係完全化成醬嘅蒜蓉醬
頭一兩舊確實令我深感驚艷,脆卜卜
但後來越食越厭......
因爲麵包一唔夠熱就好硬,加上要連續食幾舊好硬嘅真係有少少辛苦

是日意粉按我味覺同視覺判斷應該係三文魚肉蟹子意粉配忌廉汁
醬汁中除左有忌廉汁外,仲有一股好重嘅蒜味
可能係頭先多士已經好濃蒜蓉味,呢個意粉再有蒜蓉反而令我有少少抗拒
另外三文魚真係好嫩滑,烹調個陣係魚肉表層界兩下,更加令魚肉熟得更平均,醬汁更加走到入魚肉入面。
配合埋煮得爽口嘅意粉同卜卜脆嘅蟹子,口感非常豐富
雖然係好貴
但可以望住個海食野,都真係一種奢華
算啦,比多d錢享受下啦
