而接觸到代理時，就會被遊說去買長年期的儲蓄計劃，美其名係長遠儲蓄，實際出係鎖錢及蠶食回報。
用宏Ｘ，赤Ｘ豬，做個例子：
月供$3,000港元，0歲男，積存生息，供15年
睇圖會見到幾行字，通常話術就出現喺呢啲位置。
第一行：保單年度終結，呢個應該唔難明白。
第二行：繳付保費總額，呢個應該都唔難明白。
第三行：保證現金價值，退保時可拎取的保證數字（保證）
第四行：累計保證現金儲備，由於呢份赤Ｘ豬單，到某一年開始，每年派錢。好多人以為好正，但一陣睇吓就知有幾正。（保證）
第五行：累積紅利及利息，第四行唔拎走，積存生息後，加上紅利的數字（非保證）
第六行：總額，第三四五行加埋佢。
第七行：該年保證現金儲備，即係果一年派幾多錢俾番個客戶
第八行：該年非保證每年紅利，拆開番第五行啲紅利出嚟睇。
大致睇吓張圖：
保證回本（即係計第三四行）要超過30年。做客供咗15年，無間斷，都要等多15年先保證回本。
預期回本（即係計第三四五行）要16年。做客供咗15年，無間斷，都要等多1年先預期回本。
換句話講，無論個客係保證回本定預期回本，16-30年內退保，都係蝕本金。
點解會咁樣？因為頭1-2年，頗大部份的供款都變成了佣金／收費，即係開個計劃預咗先無咗1-2兩年供款先。
如果學術啲去睇，硬供15年，到25年，假設派齊紅利同利息，大約IRR回報2.7%。或者用坊間睇法，呢$540,000，擺咗成25年定期，先得果2點幾（非保證，非保證，非保證）回報。
其實巿場都有其他短期保險計劃，回報高過3%（仲要係保證），仲要係短期已可以拎番出嚟再做其他嘢。不過好多時代理為佣金，就偏向賣長年期計劃。
所以話術要多留意，例如：宏Ｘ過去的紅利實現率有100%，安全有信心。
其實咁低回報率（仲要係非保證），仲唔派100%，真係點對啲客戶交待。
真心做呢行咁耐，未聽過宏Ｘ代理自己有買赤Ｘ豬，每次見到新宏Ｘ同行都會問吓，一般都係會答無，有啲更抵死到話呢隻係賣俾客，唔係賣俾代理。有啲話情願去買盈富好過，有啲醒目啲就話買番自己公司啲股票。
以上例子，只供參考，儲蓄保險喺咪應該買，個人建議長年期的計劃，要慎重考慮，多數諗諗下就可以逃過一個劫。
