【搖滾準備】《我們的某校勁BAND》【重開】

130 - 啲咁嘅嘢

完咗我哋嘅表演之後，我哋留低咗聽今日最後一隊Band，係「芸利會中學」嘅「Easy Sexy Baby」，佢哋嘅三個成員，係主音兼結他嘅呀雞、Bass手惇仔，同Keyboard手Mason，佢哋係今日唯一冇鼓手嘅樂隊，取而代之嘅係一部鼓機嘅Pedal，我見係由Keyboard手負責踩。

佢哋嘅歌我會形容係最特別，好Funky，會好容易跟住佢哋郁動，可能係到咗黃昏嘅關係，成個Feel都好Chill，明明拎住嘅係一包維他奶，但係就好似拎住杯酒咁。我好慶幸我哋喺佢哋之前表演，因為完成咗表演，冇咗緊張感，所以就更加可以享受呢個Moment，佢哋三個人有種好悠閑嘅Vibe，主音呀雞把聲，有種好似黑人聲帶嗰種低沉又從容嘅質感，偶然一兩個假音，就更加有嗰種神髓。

「Easy Sexy Baby」完成咗表演之後，Monica同Yoyo就宣布今屆嘅JSBA就順利完結，「蒲英」嘅人冇急住趕人走，反而由得大家喺學校逗留，鍾意就打卡影相，或者認識吓新朋友，感覺上呢度差一杯酒就完滿晒，雖然我驟眼睇呢度8成人都未成年。

我同我嘅隊友分開咗，大家都喺「蒲英」周圍行，突然之間有人拍我嘅膊頭。

「喂。」
「你咪係上次比賽嗰個。」
「係呀，我係年浩。」
「你好。」

原來上次禁毒歌比賽嘅冠軍－年浩都有嚟聽，佢話想識多啲有潛力嘅音樂人，仲介紹咗佢隔離嘅人比我識。

「我叫秦偉杰，係一個社工，加半個音樂人啦，佢哋叫我偉杰嘅。」
「你好。」

偉杰應該30幾歲，佢著住一件曼聯球衣，後面好似係印碧咸。

「偉杰介紹咗好多青年活動畀我唱，今次我哋嚟都係為咗搵一啲青少年Band做活動嘅。」年浩講。
「我哋睇咗成日，你哋『黑色西炒飯』嘅曲風同我哋嘅理念最似，想睇吓你哋想唔想Join我哋活動，不過冇咁快嘅。」偉杰講。
「好呀。我哋有Show就會玩。」我講。

「上次比賽都冇時間交流，我覺得你哋又進步咗。」年浩講。
「多謝，你首《退一步》都係我覺得最好聽嘅參賽歌。」我講。

原來偉杰間中心喺下一季會搞幾場青少年活動，都係宣傳吓啲正能量嘢，所以就想搵我哋表演，其實對我嚟講，個Show係做咩都唔重要，只要有Show畀我玩就可以。

我哋幾個偈多咗一陣，我就去咗搵我嘅隊友，諗住同佢哋講呢個消息。

但係我淨係搵到太一，Sky同樂少就唔知去咗邊。

「原來有咁多打鼓勁嘅人，世界真係大。」太一講。
「咁緊係啦，呢個世界幾十億人，總會有勁過自己嘅人存在。」我講。

我同太一行到去兩樓樓梯，聽到Sky把聲，佢好似同另一個人傾緊偈，面呢個人把聲⋯⋯好似係Nic。

＝＝＝＝＝＝

喺「蒲英」周圍行嘅Sky，遇到「EYE BLUE」同獨立樂隊「Timber」嘅鼓手Nic，Nic主動上前同Sky搭訕。

「你彈得好好喎。」Nic友善咁講。
「多謝。」Sky微微笑回應。
「不過⋯⋯『黑色西炒飯』似乎浪費咗你，你手結他淨係想玩啲咁嘅嘢咋咩？」Nic嘅語氣聽起上嚟十分輕佻。
「咩叫『啲咁嘅嘢』呀？」Sky聽到Nic咁講有啲不悅。

Nic先係冷冷一笑，「除咗嗰段Double Lead，你根本冇表演機會，仲要分一半畀個Vocal，你甘心咩。」Nic眼神不停挑釁Sky。
「我彈得好開心喎。」Sky笑笑口講。

Sky準備落樓梯，但係Nic又再講嘢，「過嚟『EYE BLUE』啦，唔係⋯⋯應該係『Timber』先啱。」Nic認真咁講，「我要組成最強嘅樂隊，『EYE BLUE』班人冇個跟得上我，但係你唔同，繼續留喺『黑色西炒飯』你一世都唔會進步。」

「我冇興趣喎。」Sky冇打算理Nic。

「只要你應承我，我保證3年內我哋一定會成為主流樂隊，而且姜銀鋒已經睇中咗你。」Nic追上去講。

Sky冇出聲，唔打算回應Nic。

「你覺得『黑色西炒飯』有未來咩？一個唔入流嘅鼓手、得過且過嘅Bass、仲有嗰個冇靈魂嘅主音，可以帶到你去邊呀？我就唔同，學界第一嘅你同我，一定會夾到最強嘅樂隊。」Nic講。

聽到Nic咁樣講佢嘅隊友，Sky唔可以再忍受。

「我唔會同你夾，而且『黑色西炒飯』有你一世都唔會有嘅嘢。」Sky講。
「佢哋有啲咩特別呀？」Nic睇唔起「黑色西炒飯」咁講。
「溫度。」Sky笑笑口講，「『啲咁嘅嘢』你緊係冇啦。」

拒絕咗Nic之後，Sky落到2樓就見到佢嘅隊友。

＝＝＝＝＝＝

「係阿錘同太一你哋呀。」Sky講。
「Nic諗住挖角你？」我問Sky。
「好似就係喇。」Sky笑笑口講。
「咁你點答呀？」太一問。

「我同佢講要1000萬簽約費，佢因為畀唔起，所以走咗喇。」Sky開咗一個玩笑。
「唔係呀嘛，1000萬？」太一講。

我都有擔心過呢個問題，如果有一日有人挖角我哋嘅隊員，或者挖角我，我會唔會走人呢？不過Sky嘅眼神話咗畀我聽，佢唔會掉低我哋。

「喂，快啲睇吓，係樂少同Kristine呀。」太一見到樂少係地下。

於是我哋就落咗去下面。

＝＝＝＝＝＝

完咗Show之後，「HawaiiMiles」因為演出不如預期，Kristine有少少唔開心，而樂少就陪喺佢隔離。

「其實你唔使陪住我喎。」Kristine講。
「唔緊要啦，我班Friend都自己去咗玩啫。」樂少講。
「辛辛苦苦搞個表演，點知最後一次竟然彈得咁差。」Kristine好婉惜咁講。
「都唔係好差啫，起碼我都聽唔出咩問題。」樂少講。

「但係我自己覺得有問題吖嘛。」Kristine依然處於唔好嘅心情。
「去夏威夷係要耐啲時間㗎啦。」樂少講。
「吓？」
「你哋唔係『HawaiiMiles』咩？去咁遠就慢慢嚟啦，總有一日到㗎喎。」

樂少拎出電話查香港同夏威夷嘅距離。

「搞咩呀。」
「5568Miles。香港距離夏威夷5568英里，既然差咁遠，慢慢嚟啦，你隻腳咁長，應該行得快過人嘅。」樂少講。
「傻仔。」Kristine終於笑返。
「笑返咪好囉。」

「做咩係咁氹人笑喎。」
「因為你笑嘅時候，係最好睇嘅。」

「唔笑就唔好睇咩。」
「都好睇⋯⋯不過⋯⋯都係笑好啲囉。」

Kristine畀樂少嘅說話搞到笑唔停口。

「點解你對我咁好呀？」Krisitne問。
「因為⋯⋯我鍾意你。」樂少輕輕咁講。

而呢個時候，「黑色西炒飯」咁啱就落到嚟地下，見證住樂少表白嘅場面，但又令佢哋兩個人顯得有啲尷尬。

（Tbc.）

131 - 維他奶與麥精之間

其實樂少表白呢個畫面係幾浪漫嘅，不過咁樣畀我哋睇到唔知會唔會令佢哋好尷尬。我見Kristine同樂少兩個都唔出聲，但係我哋就咁走好似仲奇怪。

「我⋯⋯走先喇。」Kristine講。

咁係咪即係樂少畀Kristine拒絕咗？定係因為我哋喺度，所以佢唔知點答好？

「等陣呀。」我又唔知做咩衝口而出叫停Kristine，「樂少你應該仲有嘢想講㗎係咪？」我同樂少講。

呢個咁老尷嘅情況，畀在我係女仔都走人先啦，而且樂少個表白其實都未完晒。成日聽啲打上電台表白嘅節目，主持人都會幫手引導表白者，如果Kristine即刻接「我都鍾意你」就冇問題啫，但係當個女仔咩都冇講，男仔就緊係要再講多少少嘢，講清楚自己嘅心意啦。

「我⋯⋯」樂少顯得非常緊張，「你⋯⋯可唔可以⋯⋯做我女朋友呀？」

樂少終於都講咗出口，我哋都望住Kristine嘅反應。

「我⋯⋯遲啲答你吖。」Kristine嘴角有好微小嘅抖動。

呢種表情係真正開心嘅樣，同遇到好笑嘢哈哈大笑嗰種唔同，微微抖動嘅嘴角係介乎想隱藏開心同狂喜之間。

「即係幾時呀？」
「考完DSE啦。」

Kristine之後就離開，樂少就有少少失落咁企咗喺度。

「做咩你哋會呢個時間出現㗎？」
「鬼知你而家表白咩。」
「唉。」
「唔使咁灰喎，Kristine又冇拒絕你，考完DSE再算囉，可能人哋都想同你一齊呢。」我嘗試開解樂少。

「我等咗呢個機會好耐㗎。」樂少慨嘆。
「我諗Kristine唔想依家分心啫，冇嘢喎。」太一講。

事件已經發生咗，都冇得改變，樂少唯有又靜靜咁等考完DSE再算。

離遠我離到「No Need Sugar」嘅Coman行緊過嚟，佢望實我哋，好似係有事想搵我哋咁。

「Hi⋯⋯」佢好似有啲難以開口嘅嘢。
「Hi，Coman。」樂少打招呼。
「我想問你哋學校咪有個女仔，靚靚女女，眼大大嘅。」
「Monica？」
「唔係呀，係好鄰家女孩嗰種，著住件學生會T恤。」

結合我知道嘅消息，佢應該好大機會係講緊毛子蘭。

「小蘭？」樂少拎出一張有小蘭嘅相畀Coman確定。
「就係佢喇！你可唔可以畀佢電話號碼我呀？」Coman雀躍咁講。
「吓？」我好大反應咁講。
「佢有冇男朋友呀？不過佢咁靚肯定好多人追啦。好想同佢一齊呀。」Coman講。

樂少喺我隔離好努力咁忍緊笑。

「估唔到你哋連鍾意嘅女仔都一樣。」樂少忍住笑同我講。
「咩呀。」

「小蘭嘅電話呢⋯⋯」Sky好似想畀毛子蘭電話Coman。
「Sky，唔好呀。」我叫停Sky。
「做咩事呀？」Coman問。

我只係直覺上想阻止呢件事，但係應該用咩原因呢⋯⋯「可能佢唔想呢，邊可以隨便將人哋電話號碼畀出去喎。」我用最老土嘅保安理由阻止Sky。

「好囉。」Sky奸笑咗一吓。

「係呢，你哋同小蘭係咩關係呀？」Coman問我哋。

佢都唔識人，做咩直接就叫人哋做「小蘭」呀。

「我哋就係小蘭嘅師兄，而阿錘佢呢，就係小蘭嘅朋友。」Sky笑笑口講。
「咁阿錘你知唔知小蘭鍾意邊類男仔呀？」Coman問我。

我⋯⋯又點知喎，我同毛子蘭又冇傾過呢啲問題。

「我⋯⋯唔知喎。」
「咁唔緊要啦，我一於勇敢啲追佢返嚟。」Coman好有朝氣咁講。
「唔得呀。」我講。

場面突然之間有啲尷尬，大家都靜咗。

「我嘅意思係⋯⋯毛子蘭應該想專心讀書，唔係拍拖。」
「我又唔係依家就想同佢拍拖，只係想話佢知我嘅心意。」
「你哋識咗一日咋喎。」
「係呀⋯⋯我諗我對佢⋯⋯係一見鍾情。」Coman發姣咁笑。

「總之唔得啦！因為毛子蘭鍾意嘅唔係麥精，佢只係鍾意維他奶！」我講。
「吓？」

Coman之後就走咗，佢煩住要我哋畀毛子蘭Contact佢，於是我哋就留咗學校內聯絡嘅Email佢，反正都冇人會用。

「估唔到Coman會想追小蘭。」太一講。
「小蘭佢，最近好似又真係靚咗。」Sky講。
「可能因為有我哋錘哥滋潤呢。」樂少講。
「咩呀。」我Feel到我應該黑緊面。

掛住樂少同Coman件事，差啲唔記得同佢哋講偉杰單嘢，雖然話考DSE之前，我哋會休團一排，但係考完試之後，都係要繼續夾Band。本身諗住做完呢場Show會好唏噓，但係就發生咗樂少同Coman嘅事，令到氣氛好似又唔係好唏噓，而且過多幾個月又有Show玩，所有嘢加埋，好似沖淡咗休團呢個問題。

到咗走嘅時候，突然之間，傳嚟暴龍機嘅聲，即係我有Message。

「邊有講過我淨係鍾意維他奶喎」Send Message畀我嘅係毛子蘭。
「你點知㗎」
「Coman同我講嘅，佢send Email畀我」
「我哋畀內聯絡咋喎」
「我有Check呀」
「咁你鍾意麥精咩」

之後毛子蘭就冇覆我，不過佢就出現咗喺我面前。

「我都會飲麥精，未必飲維他奶㗎。」毛子蘭講。
「緊係維他奶好飲啲啦，同埋⋯⋯我想你揀維他奶囉。」

毛子蘭嘅嘴角微微咁抖動，係真正開心嘅表情。

就係咁，我哋嘅JSBA之旅就完結，亦都會真真正正進入「黑色西炒飯」嘅休團期，而且我哋嘅Last Day，都只係得返唔夠一個月。

（Tbc.）

132 - 告別校園時

話咁快就考完Mock，距離我哋畢業嘅日子仲有一個禮拜，突然之間有啲捨得，明明成日都鬧學校，又覺得校規好唔合理，老師好麻煩，但係當真正要告別嘅時候，好似又唔想咁快嚟到。

今年嘅農曆新年假喺2月中，所以學校索性早啲畀我哋Last Day。有好有唔好啦，一來可以早啲離開學校，但一諗到得返幾日著校服嘅日子，連我都覺得好唏噓。

呢排上堂，老師都冇咩書要教，因為要教嘅已經教晒，考Mock嘅成績又出咗，而家要做嘅就係將未識嘅嘢學返，但係呢啲老師都幫唔到，要靠自己造化。

中文堂係我好唔捨得嘅科，因為Miss Lui真係好畀心機教，唔只係中文科嘅內容，好多社會經驗之談同佢嘅價值觀都有分享，上中文堂唔再悶，所以我都好想考好啲中文科，起碼唔好拖低Miss Lui個Grade吖。

但係要數最唔想上嘅堂，當然就係英文科啦，撇除係副校教呢個原因，香港嘅英文堂根本學唔到嘢，我覺得我平時聽嘅英文歌同睇嘅電影， 學到嘅更加多，甚至打機都有用過上堂。

呢幾日我都留到好夜先走，當然唔只係我啦，好多中六嘅同學都留到好夜，可能大家都唔捨得呢度掛。「人生有幾多個六年吖」，我哋喺度嘅六年，已經佔咗我人生嘅三分一，就算去到我六十歲，都仲有十分之一，我係唔會忘記呢度嘅事㗎。

要數我喺呢度做過咩？一定係夾Band啦，我哋學校從來未有人認真咁夾Band，對上一個認真想做音樂嘅已經係Silas，我哋都算係開創咗一啲嘢，亦都留低咗啲嘢。

＝＝＝＝＝＝

今日上最後一堂PE堂，6年都教我哋嘅洪sir，雖然大大隻，眉粗眼大，個樣十足古時嘅將軍，但係鐵漢總係會有柔情嘅一面，今日我哋打咗一場籃球賽，勝負一啲都唔重要，每個人都享受緊呢場比賽，我甚至都冇換衫，直接著校服打，本來規矩上就唔容許嘅，不過都最後一堂，冇所謂啦。

望住呢個大大隻嘅洪sir眼泛淚光，反差真係好大。

退修堂嘅時候，我哋冇留喺課室，大家都靜靜咁喺學校行，我嚟到咗我留得最多時間嘅音樂室。講起上嚟，如果唔係鄧校長改裝咗音樂室，我應該唔會上嚟咁多。呢度都係我哋練習最多嘅地方，以後就冇得嚟喇，真係好唔捨得。

「劉星隨。」
「校長？」

有時我真係覺得校長係有超能力嘅，邊有可能一諗起佢，就即刻出現㗎。

「點呀，唔捨得音樂室呢。」
「係呀。我哋喺度夾Band嘅時間，可能多過我溫書嘅時間。」我講。

校長拎咗枝結他畀我，「我都好耐冇夾Band，Jam吓囉。」校長面帶笑容咁講。
「好呀。」

 今次係校長唱歌，佢唱咗一首好應景嘅歌——《告別校園時》。

唔知點解校長唱嘅時候，佢就好輕鬆，但係我好似好Sad咁，可能因為即將要告別校園嘅人係我。

「彈得幾好喎。」
「多謝校長。」

「我細個都有個夢想，想做Beatles呀，許冠傑呀咁。不過邊有咁易吖，我見到你哋夾Band咁有Heart，就好想見到你哋成功。」校長講。

校長其實真係幫過我哋好多次，甚至連我都覺得佢係偏心我哋。

「其實我從來都冇想做咩明星，我只係想夾Band，同我班隊友一齊。」
「你有呢個諗法就得喇，記住無論點都好，要保持初心。校長我教唔到你咩知識，但係都想睇住你哋成長。」
「多謝你呀校長，包括呢度嘅樂器，同埋畀第一次嘅表演機會我哋。」

「嚟，簽個名。」校長拎枝結他畀我。
「簽喺枝結他？」我冇諗過喺結他上面簽名。
「簽你哋『黑色西炒飯』啦，呢枝嘢話晒都貴嘢嚟，當留一個祝福畀啲師弟師妹啦。」
「好⋯⋯」

其實我哋又何德何能吖，不過校長咁講，可能會變成一個傳統嘅。

＝＝＝＝＝＝

2015年2月13日

今日係我哋嘅Last Day，終於終於，嚟到最後一日著校服嘅日子，本來覺得畢業離自己好遠，但係原來一日一日咁過，轉眼間就到咗畢業嘅日子。

一早我就預咗今日件校服會畀人畫花晒，應該搵我影相嘅人都會好多，我唔係話自己受歡迎，只係陸運會都咁多人走埋嚟，我諗今日都會有好多人啫。

我一入到門口，就見到毛子蘭，今日係佢親自當值。點知，我都未入到學校，何副校就成個人企喺我面前，我有種好不祥嘅預感。

「劉星隨，你啲頭髮好長喎。」副校講。
「係咩⋯⋯我就剪㗎喇。」我想急急腳走入學校。
「企喺度。你咁樣好影響校譽，剪完頭髮先好返嚟。」
「吓？副校今日Last Day喎⋯⋯」

「就係Last Day先更加要守校規，即刻去剪。」
我肯定副校係特登玩嘢，係要揀今日先迫我剪頭髮，就係想我連Last Day都冇。

「唔係喎，副校，我⋯⋯」
「走！」

我繼續企喺原地，心諗唔會真係咁絕掛，Last Day都要趕絕我。

「即刻走！」校長行去毛子蘭度，「毛子蘭你趕佢走。」副校再大聲啲。

呢個時候，我望住毛子蘭，佢都好愕然，我真係唔知點算，真係要去剪頭髮？為咗唔想毛子蘭難做，我行出咗學校門口，唔通⋯⋯我嘅Last Day竟然返唔到學？

（Tbc.）

133 - Last Day

喺無計可施之下，我都係決定剪頭髮，我只不過係蔭長咗少少，髮尾掂到衫領，又唔係真係好長啫，係副校長玩嘢先搞到我要剪髮。

因為唔想搞太多嘢，我搵咗學校對面後巷嘅一間上海理髮店剪，最重要係唔貴。諗住剪完就快啲返學校過我嘅Last Day，不過呢種被人迫住剪頭髮嘅感覺真係好差，剪頭髮嘅叔叔每剪一下，我都覺得啲頭髮喊緊。

話咁快，洗剪吹都搞掂，老師傅即係老師傅，快靚正，好彩剪完頭髮都唔係好差，一於就即刻衝返學校先。

當我離開後巷之後，好唔好彩條馬路轉咗做紅燈，咁我唯有安靜咁等啦。

但係我隔離等緊過馬路嘅婆婆，突然之間暈低咗，佢買嘅餸跌到一地都係。

「婆婆？婆婆？聽唔聽到呀。」我即刻睇吓婆婆有冇事，點知呢個婆婆叫極都冇反應。

明明都只係8點過啲，條街竟然冇人嚟幫手，我唯有即刻打電打報警。雖然學校就喺前面，但係人命在前，我唔可以就咁走咗去。

救護車好快就到咗，而救護員就叫我跟埋上車，其實我又唔識呢個婆婆，不過我又唔放心，所以都係跟咗上車。呢啲情況睇戲就話見得多啫，估唔到現實會遇到。

我發現婆婆有個袋仔，我嘗試喺個袋搵婆婆嘅個人資料。見到佢張身份證，佢叫楊笑，我仲搵到一張有啲舊嘅相，而入面係佢同一個女仔嘅合照，我估係孫女掛。

件校服我認得係「郭彩鑫」嘅校服，而我唯一識嘅「郭彩鑫」學生，就係Coman。

我即刻打畀樂少，想問佢Coman嘅電話。

「喂，阿錘，你去咗邊呀？等你影相呀。」
「解釋唔切呀，你畀Coman電話我吖。」
「吓？搞咩呀？」
「唔好問啦，趕時間呀。」

我即刻打畀Coman，其實我都知佢有可能上緊堂，但係我都要試吓。

「喂？」
「喂Coman？我係劉星隨呀。」

原來佢哋都係今日Last Day，所以聽到我電話。我好快咁交待情況，亦都send咗張相畀佢睇。

「呢個女仔係我哋級㗎，我幫你通知佢吖。」Coman send Message畀我。

好彩都搵到人，而救護車亦都到咗醫院。我見心跳應該都正常，不過楊婆婆仲未醒，我都唔知點好。
----------------------------------------------

樂少收到劉星隨嘅Message，知道原來佢遇到一個暈低嘅婆婆，所以落咗校務處幫佢交待，費時佢臨畢業都畀人記大過。

搞掂之後，樂少遇到Emma。

「Hi。」
「Hi。」

兩個人有啲尷尬，自從遇到Kristine之後，樂少已經慢慢放低咗對Emma嘅感覺，只係見到嘅時候，就會有啲尷尬。

「你件校服已經簽晒名喇喎。」Emma講。
「係呀，你要唔要簽呀？」樂少講。
「好呀。」Emma笑笑口講。

Emma喺樂少右手簽咗個名，而樂少都喺Emma嘅右手簽名。

「影張相吖。」樂少講。

自從上次Magic And⋯嘅演唱會之後，兩個人嘅關係就有咗大變化，不過樂少心底裡面，都仲係對Emma有種特別嘅感覺。

「好呀。」

今次係樂少揸機。

「聽講⋯⋯你追緊個女仔喎。」
「嗯⋯⋯係呀。係咪Sky講㗎。」
「嗯。」
「Sky真係口疏呀。」

樂少再用Emma部電話影多張相。

「我呢⋯⋯已經放低⋯⋯晒喇。」樂少講。
「咁就好喇。」Emma講。
「Emma，我有樣嘢想講呀。」
「咩呀？」

「我以前⋯⋯真係有一段時間好鍾意你。甚至為咗想追你，我走去夾Band，諗返轉頭冇你可能都冇『黑色西炒飯』⋯⋯不過我依家真係冇再對你有咩諗法，希望唔會令你尷尬啦。」樂少緊張咁講。
Emma放鬆一笑，「我知㗎喇。追到個女仔未呀？我會祝福你。」Emma笑笑口講。

睇嚟兩個人終於都完全放低咗以前嘅心結，成為咗朋友。

＝＝＝＝＝＝

Last Day嘅氣氛好複雜，充滿分開嘅傷感，但係又有對未來嘅期待。

今日太一收起咗自己熱血嘅一面，寫咗一封信，諗住畀甜豉油。只係緣份可能真係未到，太一成日都好唔得閑，一早就畀「激情對話」班人捉住影相，由男廁影到女廁，因為「激情對話」一早就對女廁好好奇，所以確定咗冇人之後，就一齊入咗女廁，影咗一張又一張搞鬼嘅相。

以為走得嘅太一，轉眼又畀唔同嘅校隊捉住咗，因為太一發起嘅革命，校隊先有得繼續練習，每隊人都好感激太一，於是又變成打卡嘅人物。之後就到康社嘅同學，太一作為啦啦隊領袖，班低Form同幹事都唔捨得佢，明明平時太一又唔多朋友，不過呢啲時間，就變到好受歡迎，佢甚至未有機會同「黑色西炒飯」影相添。

搞咗一大輪，去到小息，太一終於喺SU房搵到甜豉油。

「嘩你件衫花到。」甜豉油驚訝。
「係呀。班低Form囉，喺上面畫畫。」太一講。
「你搵我簽名呀？」
「係呀。同埋有啲嘢想畀你。」

「畀你嘅。」太一拎出咗一封手寫信。

甜豉油接咗封信之後，諗住拆開。

「唔好拆住呀。封信你覺得節奏啱嘅時候先拆啦。」太一講。
「你啲鼓手就咁鍾意跟節奏咩。」甜豉油有啲懷疑，不過都係收好咗封信。
「鼓手一定要搵啱節奏，隊Band先夾到㗎。」太一講。
「嗯。簽邊好呢。」

甜豉油辛辛苦苦搵到個空位簽名。

「你都幫我簽吖。」
「吓？你件校服仲要著喎。」

甜豉油褶高長袖恤衫嘅衫袖，畀咗衫袖底面畀太一簽。

「你用原子筆簽啦，唔過底㗎。」甜豉油講。

太一好輕力咁喺佢衫袖底面。

「真係好咩？」
「嗯。反正下年我Last Day你又唔會喺度。」
「咁又係。」

甜豉油再一次確認信有冇收好，然後放返衫袖，好好扣好粒鈕。

兩個人就咁樣，一齊喺SU房留多咗一陣。

（Tbc.）

134 - 只要望住佢笑

雖然話係Last Day，但係都係要上堂。最後嘅VA堂，潘sir就準備咗每人一份禮物派畀同學。禮物係佢自己畫嘅一幅畫仔，同一張八達通差唔多，上面畫嘅係佢對同學畫作嘅評價。喺潘sir眼中，藝術係冇標準答案嘅試卷，所以最後嘅一堂，都唔想同學記住啲硬知識，反而係要學習自己思考，學習欣賞藝術。

Sky收到嘅畫係一張好清新嘅藍天，潘sir冇話畀佢知點解佢會咁畫，但Sky就意會到係潘sir對佢嘅祝福。

「多謝你，潘sir。」Sky講。
「我哋控制唔到幾時天陰天晴，但係我哋可以控制自己心情，心入面好天定唔好天。而你呢，做返自己，做司徒天。」潘sir講。

Sky點點頭，露出感激嘅笑容。

而Emma收到嘅最特別，同其他同學唔同，唔係一幅畫，係一塊碎咗嘅陶瓷片。

「點解Emma你，係收陶瓷片？」Sky問。
「呢塊係我第一次整陶瓷跌爛㗎，估唔到潘sir留低咗。」Emma講。
「係咪真係你㗎？會唔會係其他人㗎。」Sky笑笑口講。
「我認得呀。」Emma笑笑口講。

Emma將塊碎片，擺喺枱面。

「你咪講過陶瓷會跌爛，但畫唔會嘅？」
「係呀。」
「其實爛咗都冇咩啫，就咁擺喺度都幾靚呀。」

Sky仔細望住塊碎片，「又係幾靚嘅。」Sky微笑。

「呢個就係我嘅夢想，我要做出就算唔完美都有意義嘅藝術品。」Emma講。

「Emma你，仲記得喎。」Sky笑笑口講。
「嗯。因為我係『藍色水彩同學』吖嘛。」

「你一定會做到㗎⋯⋯『唔完美都有意義嘅藝術品』。」Sky講。
「你都要呀⋯⋯望住Miss Lui笑。」Emma講。
「嗯⋯⋯只要望住佢笑，就得喇。」Sky講。

＝＝＝＝＝＝

VA堂之後，Sky就返到6D班嘅課室，上佢哋最後嘅中文堂。

「各位同學，今日係最後嘅中文堂，我已經冇咩要教你哋喇，想同大家分享下我呢兩年嘅感受。做你哋嘅中文老師，一啲都唔容易，有啲人上堂就瞓覺，有啲就成日唔交功課，不過呢⋯⋯Miss Lui我都知道大家有畀心機溫書嘅，中文科係一個好有趣嘅科目，你唔記得晒點寫應用文、議論文、點樣修辭都冇問題，但係我想你哋記住蘇軾點樣喺逆境鼓勵自己、李白點樣不畏權貴，莊子點樣逍遙自在。考試嘅事，順其自然，全力去做就得㗎喇。」Miss Lui語重心長咁講，「我好開心有你哋呢班學生。」

課室入面傳嚟咗一陣掌聲，呢啲掌聲代表住Miss Lui呢兩年所付出嘅努力，亦都係同學嘅感激。

「劉星隨呢？」Miss Lui發現劉星隨唔見咗。
「阿錘話一早就畀副校長趕出去剪頭髮，點知又遇到個婆婆暈咗，依家喺醫院喎。」樂少講。
「喺醫院咁大件事？」
「冇事嘅，佢話個婆婆嘅家屬到就會返嚟。」
「哦。」

知道劉星隨冇事，Miss Lui就繼續同班同學影相，因為連隔離班嘅同學都入咗6D班搵Miss Lui，所以一時之間場面都幾混亂，當人開始少嘅時候，Miss Lui就發現Sky唔見咗人。

Miss Lui有種直覺，Sky好大機會喺5樓樓梯。於是落堂之後，佢就行咗上去。

「司徒天。」
「Miss Lui。」

果然Sky就喺5樓樓梯轉角位。

「我仲差你一份功課呀。」Sky講。
「咩呀，我最近都冇畀功課。」Miss Lui唔明Sky指咩。
「交畀Miss Lui你嘅，係《我不哭的理由》。」

Miss Lui拎起Sky篇文。

「我已經唔使再忍住眼淚，或者逃避啲咩喇，《我不哭的理由》係因為我冇嘢要喊。有Miss Lui你、『黑色西炒飯』、仲有好多同學喺我身邊。而且，我嘅夢想係睇住我愛嘅人笑，見到佢笑，仲有咩好喊喎。」Sky講，以前Sky唔喊係因為唔想人哋擔心，但係而家嘅Sky已經釋懷咗，冇需要喊嘅理由。

Miss Lui露出一個淺淺嘅微笑。

「如果⋯⋯我掛住Miss Lui你，可以點呀。」Sky講。
「打畀我囉，你又唔係冇我電話。」Miss Lui講。
「嗯。」Sky笑笑口點頭。

＝＝＝＝＝＝

時間已經到咗下晝，我都估唔到我嘅Last Day會係咁過，真係完全冇諗過呀。

楊婆婆仲未醒返，我send咗Message問Coman，佢話嗰個女仔已經嚟緊，我喺楊婆婆啲嘢到淨係搵到佢同個女仔張相，會唔會已經冇其他屋企人呢。

我電話突然響起，係一個唔識嘅Number。

「喂？」
「你係咪Coman朋友呀，我到咗醫院喇。」
「係呀，你上5樓吖。」

我收線之後，一個著住件校服簽晒名嘅女仔好急咁行過嚟。

「楊笑係我嫲嫲，佢點呀。」
「醫生話可能係心律不正。佢冇生命危險，但係要啲時間先會醒返。」
「唔該晒。」
「你使唔使搵埋其他屋企人呀？」

「我爸爸去咗大陸做嘢。媽媽就移咗民，得我同嫲嫲住。」
「原來係咁。」
「咁你嚟咗，我就走先喇。」我慢慢離開。

雖然係咁講⋯⋯但係我而家由得佢一個喺度好似又唔係幾好，於是我又返去病房。

「好彩你嫲嫲有同你張合照咋。」
「嗯。真係唔該晒你。」佢係咁同我鞠躬。
「其實我都係咁啱遇到你嫲嫲，我本身都係今日Last Day，點知就畀個副校長捉住，要我剪完頭髮先可以入學校。不過好彩係咁先遇到暈低嘅楊婆婆，醫生話如果救護員遲啲到，楊婆婆就會危險好多。」
「吓。咁真係唔該晒你呀。」佢又係咁同我鞠躬。

「唔好鞠躬啦，遇到有需要嘅人就要幫，遇到有危險嘅人就要救，唔係理所當然咩。」我講。
「嗯。吖，我叫林如意，如意吉祥個如意。」
「吖，我叫劉星隨。」

果然林如意聽到我個名都笑咗一笑，平時我可能會介意嘅，不過佢而家肯定好緊張，笑吓都好嘅。

「你同Coman點識㗎？」
「我哋喺上次JSBA嗰度識嘅。」
「原來係佢，我仲以為你哋係表兄弟添，因為個Feel好似。」

我尷尬笑一笑。

「所以你都夾Band㗎？」林如意問。
「係呀，我隊Band叫『黑色西炒飯』，我係主音同結他。」
「我都鍾意音樂㗎，我係音樂學會主席，不過我咩樂器都唔識嘅。」
「咁搞笑嘅。」

我哋偈多咗陣，楊婆婆就醒返。

一開口，佢哋就用潮州話溝遇，我完全聽唔明，不過佢哋兩嫲孫就好似偈得好開心。

「嫲嫲話多謝你呀。」
「唔使多謝喎。」

楊婆婆醒返之後，我就即刻衝返學校，希望返到去仲有人會搵我啦。

（Tbc.）

135 - 我最唔捨得嘅人⋯⋯

我返到學校，其實已經到咗放學時間，不過可能係Last Day嘅關係，都仲有好多人留喺度。

一返到去就見到「激情對話」班人企晒喺停車場。

「阿錘，你去咗邊度呀，成日都唔蒲頭。」Mango問我。
「成件事一匹布咁長呀。搞緊咩呀？」我問。
「冇呀，朱傑話要喺門口祝福走嘅同學唔好返轉頭，好似放監咁喎，所以企晒喺度。」
「吓？」

果然成件事係好「激情對話」會做嘅嘢，不過我當然唔諗住加入啦，我幻想中嘅Last Day應該係慢慢喺學校度遊走，然後同我讀咗六年嘅呢間學校講再見，最衰都係嗰個忍樣副校長，因為已經放咗學，所以我都費事理佢。

我上到去課室，今日除咗係告別嘅日子，仲要清走Locker同櫃桶嘅嘢，所以我就即刻執嘢。

「阿錘你，終於都返嚟喇。」Sky同我講。
「係呀。激死，臨入學校先畀副校捉，之後遇到個婆婆暈咗⋯⋯」我同Sky講今日件事。

我望住Sky件校服，都簽咗好多名，反而我件校服就好乾淨⋯⋯

可能因為咁多年都見住啲畢業生簽到件校服花晒，我一直都想有一件個個Friend都簽晒名嘅校服，不過冇理由而家先叫人簽㗎，過晒Feel。

「有冇見過我袋PE衫呀？」我問坐我隔離嘅Sky。
「冇喎，阿錘你，琴日都冇換衫，我以為你一早拎走咗。」Sky講。
「吓？」

連PE衫都唔見埋，算數啦，冇咩所謂啦，可以返嚟睇吓大家最後一面，都算係咁啦。

「阿錘！你終於返嚟喇。」樂少好大聲叫我。
「係呀，我陪婆婆個孫女等到佢一醒返就衝返嚟。」我講。
「要影班相呀！文sir等緊你。」
「好呀。」

好彩⋯⋯大家都有等埋我先影相⋯⋯有啲感動添。

之後，我哋已經冇理校規，直接Call落去叫停車場嘅人上嚟。

Carol拎咗部「即影即有」出嚟，Set好機之後就埋位，好難得大家都齊晒人。就係咁，我哋6D班嘅最後合照就完成咗。

望住張「即影即有」，覺得回憶有時真係無價，雖然講就講話回憶留喺心入面就夠，但係有張相喺手，好似更加溫暖，而且今日楊婆婆件事都啟發咗我，一張相可能會救返一啲嘢。

影完班相，我就捉咗樂少一齊搵班同學影相，之後再去埋搵啲老師影相。呢個時候我先發現，原來好多老師對我嘅印象，已經變咗「夾Band嘅劉星隨」，簡單啲講就係我呢啲上堂又Hea，考試又唔高分嘅學生，最大嘅記憶點最係夾Band。

當然我自己對呢個人設好滿意啦，夾Band又係我覺得最型、最想做嘅事，估唔到教音樂嘅Miss Fong竟然叫我要堅持夾Band，呢樣係我覺得好窩心嘅事。

然後，當然唔少得要搵我大佬李sir，見佢最後一面啦。

「李sir。」
「隨兄，成日唔見人，去邊呀。」

我又將成件事講多次，我心諗不如去開咪解釋一次就算喇。

「咁救到人好好吖，救人一命勝造七級浮屠。」
「都係嘅。」
「你喺度等陣。」
「哦。」唔知咩事呢，李sir返咗去教員室。

李sir畀咗份嘢我。

「呢份係？」我問。
「你哋中一嘅功課，一封畀10年後自己嘅信。」李sir講。
「嘩，我完全唔記得喎，咁點解會喺你度嘅？」我問。
「上年Miss Chow退休交低畀我嘅，不過10年後叫你哋都唔返嚟拎啦，所以依家畀你哋。」

我都冇咩印象我寫過啲咩，應該都係求其寫啲嘢交掛。

「如果想保持神秘嘅，過多幾年再睇囉。」李sir講。

再等幾年？我冇呢個耐性喎，於是我好快就拆開咗封信。

封信嘅內容係咁嘅，我問自己十年後，有冇成功夾到Band，有冇堅持彈結他。其實一睇到自己原來寫過呢啲嘢就好感動，我記得寫嗰陣應該係睇完Silas之後，原來嗰陣⋯⋯我已經有呢個夢想，我仲有彈結他，而且都有咗「黑色西炒飯」，我努力緊，努力變成自己理想中嘅自己。

「夾Band嘅歲月好開心，我諗返起都會慶幸自己夾過Band。」李sir講，「走咗就生性喇。」李sir留低一個唏噓中帶有祝福嘅眼神。

因為搞吓呢樣嗰樣，已經去到5點幾，我同「黑色西炒飯」都未影相。而且⋯⋯仲有個人我都未搵到。

我落到去Canteen，好想見嘅嗰個人竟然唔喺度，連Prefect房都冇。都Last Day啦，唔係咁都唔等我呀嘛，平時佢都冇咁早走。

呢個時候，我見到我哋寧社嘅前社長呀龍，佢衝埋嚟搵我影相，其實我同呀龍真係唔多熟，不過都叫跑過一次接力，算係隊友嘅。

「阿錘，你今朝病咗呀？」呀龍問我。
「唔係呀⋯⋯總之件事一匹布咁長啦，有機會再講。」
「咁好啦。」呀龍手拎住一個公文袋，佢喺入面拎咗啲嘢出嚟，「呢幾張你嘅。」

原來係今年陸運會嘅相，佢將陸運會嘅相晒出嚟派返畀人。

「呢張係？」
「應該Cam Man影掛，都幾靚吖。」

裡面有一張相，係我同毛子蘭嘅合照⋯⋯係我教佢接棒嗰時影嘅。

「小蘭對你真係好呀。」
「吓？」
「你自己搵人啦。」
「咩呀？」

呀龍之後又走咗，我就拎住張相喺Canteen。

「喂。」有人喺後面叫我。

我一轉身，一團白色嘢衝向我面前。

「嘩。」有個人拋嘢去我個頭。

原來係一件PE衫，係寧社嘅PE衫，好似仲係我件衫嚟，不過上面好似⋯⋯

「呢件？」
「樂少話你去咗醫院吖嘛。」
「都算係嘅。」

件PE衫⋯⋯竟然簽晒名，唔只我班Friend，連老師同唔熟嘅人都有簽名。

「你幫我搵人簽㗎？」
「嗯。」

樂少、太一、Sky佢哋當然有啦，連Simmy同甜豉油，仲有「鐵甲觀音」同Keeley都有簽名。點解⋯⋯佢要咁做呢⋯⋯望住呢件PE衫，我突然覺得好感動⋯⋯

「差一個喎。」
「咩呀。」
「你唔簽？」

我問毛子蘭。

「搵我簽名好貴喎。」
「幾貴呀？兩包維他奶？」
「10包啦起碼。」
「5包得唔得？」
「8包。」
「好啦，殺你。」

於是毛子蘭就喺我件PE衫簽名。

唔覺唔覺，毛子蘭⋯⋯已經喺我心入面有個好重要嘅位置。

「你應該會⋯⋯唔捨得你。」我講。
「唔信。」
「點解唔信喎？」我問毛子蘭。
「因為你連相都唔搵我影。」毛子蘭講。

我拎出佢同張合照：「明明就有。」
「點解嘅。」
「用甜豉油嘅講法就係宇宙已經安排咗。」

毛子蘭微微一笑，「你呀⋯⋯唔好掛住彈結他呀，考完試先彈呀。」佢輕輕咁講。

「嗯。」

「終於唔使成日捉啲遲到學生。」毛子蘭講。
「咩呀。」我講。
「快啲去影相啦。」毛子蘭同我講。
「我講真㗎，呢間學校入面我最唔捨得嘅人係⋯⋯」

「快啲行啦，佢哋喺度喇。」毛子蘭打斷我。

原來樂少佢哋都落咗嚟，毛子蘭同我哋揮揮手就走咗。

呢一刻⋯⋯我好唔想佢離開⋯⋯因為我終於認清咗我對毛子蘭嘅感覺。

Last Day嘅一晚，我哋同「激情對話」班人離開學校之後玩到好夜，行晒附近嘅每條街，回憶緊我哋喺度嘅歲月。

（Tbc.）

136 - DSE

Last Day之後就係新年假，變相我哋嘅Study Leave提早咗。一開始嘅時候，真係覺得好爽，瞓到幾晏都得，書又可以唔溫，仲可以係咁彈結他，可惜嘅係唔可以夾Band啦。其實Sky都應該唔會溫書，但係樂少同太一就會做最後嘅掙扎，想努力溫返晒啲書。

我最近都有嘗試溫書，不過真係唔入腦都冇辦法，我個腦除咗夾Band⋯⋯都係毛子蘭⋯⋯連飲維他奶都會諗起佢⋯⋯

呢段時間，世界好似好平安，學校嗰邊又冇大事發生。甚至Silas都做咗一次演出，好似係去一個嘉年華唱歌，仲要成功唱晒一首《銀竹》，可惜我就冇機會睇到。

可能係習慣嘅使然，我依然係好早起身，明明可以瞓晏啲，我甚至有時換衫，係會換咗校服⋯⋯原來我嘅中學生涯真係完咗，可能人真係一種冇咗先識珍惜嘅生物啦。

又過咗兩個禮拜左右，我都已經調整好自己嘅心態，每日都抽少少時間做吓Mock卷，或者背吓書，當然都用咗好多時間彈結他啦。唔覺唔覺，我嘅手指已經積咗好厚嘅皮，而家彈已經唔會起繭咁濟。同時，為咗準備偉杰個活動，我都作緊一首新歌，等考完DSE之後就可以夾返Band。

我間中都有同毛子蘭WhatsApp，傾吓學校，或者我哋大家嘅事。毛子蘭話今年嘅聯校運動會派咗Keeley去表演，佢好似已經變咗我哋學校嘅一個小明星咁，但係「鐵甲觀音」好似已經解散咗，結他手鬆餅同鼓手歐超唔夾，勇仔同Barry都冇心機。

我send咗個Message問勇仔，但就冇覆我。呢個時候，一方面為佢哋可惜，一方面慶幸我嘅隊友冇咁簡單就放棄。

----------------------------------------------

DSE唔覺唔覺已經開始咗，我幾科必修科都派咗去「伽藍中學」考，我到佢哋學校嘅印象，停留咗喺「十九餅」佢哋身上，記得佢哋係唱勵志歌，但係風格就有啲老土。

「伽藍中學」有40年歷史，但應該早幾年大裝修過，感覺都幾新。

同我一齊喺「伽藍」考試嘅仲有霞姨同沙維，我哋三個形成咗一個小隊，每朝考之前都會互Call確保唔會遲到。論成績，我同沙維差唔多，都係合格邊緣，霞姨就好啲，中上成績。

講起上嚟，我同霞姨佢哋都冇咩交集，次次搵霞姨都係借功課抄。同女子組嘅接觸都好少，係班會活動會一齊做吓嘢，但係連佢哋嘅興趣都唔清楚，會唔會過幾年，我連佢哋咩樣都唔認得呢。

至於沙維就同我講，去咗隊港丙球隊試腳，不過未知結果。自從之前入咗足球隊，我同沙維都多咗偈傾，我好欣賞佢明知自己天份唔好，但都會努力搵機會嘅性格，希望佢有日真係會踢到職業啦。

＝＝＝＝＝＝

今日我要考文學，今次嘅考試我真正有溫嘅都係文學同地理，李sir誓神劈願話肯定會考《涉江》，所以我就重鎚落去溫《涉江》，希望會出啦。

至於作文方面，我揀嘅題目係《被盜走的儲物箱》，盜走呢樣嘢相信係關鍵，一定要有賊先會有被盜。我將賊人嘅身份隱藏，講佢偷走咗我好多嘢，包括我嘅回憶、我嘅快樂。而最後就揭曉，賊人嘅名就係「時間」。呢個點好似都幾識合用嚟做新歌嘅Idea，等我記低佢先。

去到卷二，果然係考《涉江》！點晒，我勁有信心，希望可以有個4啦，唔係都至少有個Level 3掛。

捱過咗文學同數學之後，我就差地理未考。自從嗰次補考之後，我發奮圖強溫書，對地理嘅興趣都多咗，特別關於火山同板塊移動嘅知識都深咗，溫書嘅時候都有咗好多動力。

今日嘅考試同樂少一齊考，呢科係我哋嘅最後一科，所以心情就超輕鬆。而且Sky同太一都已經考晒，即係話夾Band嘅日子終於可以回歸喇！

唔知係咪命運嘅巧合，同嗰次補考一樣，我帶着想夾Band嘅心情去考，我就辛辛苦苦⋯⋯終於考完。

「點呀？有冇信心？」我問樂少。
「還好啦，MC有信心啲。」
「我都係，唔識就揀最長，應該合格嘅。」
「差科Oral。我會去『文道』考，你去邊考呀？」

「我去『郭彩鑫』。」
「係喎，有冇搵定工呀？」
「有呀，『流星記』算唔算吖。」
「你個孤寒太子爺吖。」

呢個時間，大家都差唔多係時候搵工，放榜之前都會搵份暑期工，跟住就用賺到嘅錢去Grad Trip，返嚟再等放榜。

我就已經喺「流星記」留咗個位，反正做生不如做熟啦，我都好耐冇落去幫手。

「不過⋯⋯都係時候夾Band喇！」
「好呀，係咪話有Show呀，嗰個社工。」
「係呀，偉杰，同埋年浩都會玩，唔知仲有冇其他人呢。」
「你肯定作咗好多新歌啦。」

樂少竟然知道我作定咗啲歌，果然係識咗6年嘅Friend。

＝＝＝＝＝＝

終於都到咗英文Oral嘅呢日，考完就正式完結喇。我一直都有少少擔心，一來係自己英文差，二來係驚會遇到啲名校生，講一大堆我唔識嘅Vocab。

「郭彩鑫」呢度應該同我哋學校差唔多大，間隔都幾似添，唔知會唔會見到Coman或者楊婆婆個孫呢？

一入到去，都有唔少人等緊，不過有個人好吸引我嘅眼球，佢孭住一枝結他嚟，但係Size比較細，似係古典結他，而且佢睇緊一份樂譜，睇嚟係個玩古典結他嘅人。

我同佢竟然係同一組考試，呢一次嘅題目，係要扮學生會成員，幫學校搞個活動，我哋不約而同揀咗搞音樂活動，佢如數家珍咁講咗好多古典樂嘅音樂家同歌名，而我亦都講咗好多Band同Rock Song出嚟，我哋兩個都佔咗好多討論嘅時間，其他同學就跟住我哋嘅Idea去講，討論氣氛都幾融合，又好彩地冇咩炫耀英文嘅人，我諗大家分數都唔差嘅。

我哋執好自己嘅隨身物品就離開考場。

「你呢枝係古典結他？」落樓梯嘅時候，我問嗰個男仔。
「係呀。我淨係彈古典。」佢有禮貌咁講，「你肯定係夾Band啦，講咁多Rock嘢，又留咁長頭髮。」
「係呀。我都係彈結他，不過就彈電結他。」
「你個Feel幾似我哋班一個人。」

佢唔會係講Coman呀嘛？

「你唔會講Coman呀嘛？」
「你識佢？咪住，我好似認得你。」

我哋之後喺學校大堂傾咗一陣，原來佢係呢度學生，同Coman係同班同學，而且有嚟JSBA個Show，仲話我哋啲歌幾好聽。之後佢話要搵老師所以走咗。

我都唔記得問佢個名添，不過遲啲可能仲有機會見嘅。

（Tbc.）

137 - 難以置信

DSE正式考完晒，中學生涯淨返嘅就係Grad Din同放榜，終於都完晒喇⋯⋯

雖然真係有諗過唔繼續讀書，但係我諗都係睇埋最後考幾多分先，因為我發現自己好似未準備好出去社會，仲係想用「學生」呢個身份睇多陣呢個社會。

我嘅隊友喺暑假期間都搵咗唔同嘅暑期工，太一去咗一間報社做Office Boy，Sky就喺書店搵咗份工，而樂少就去咗間雜貨店做，我就當然係喺「流星記」打工啦。

我老闆，即係我父母真係使人唔使本，今日送咗6間唐樓嘅外賣⋯⋯全部都係行樓梯，仲多過以前返學。除咗送外賣，我仲有入廚房，我炒飯真係幾有天份，雖然其他餸都未學識煮，但係炒飯真係愈嚟愈好，拋鑊我都學識咗，幾有成功感添。

打工真係覺得好攰，做咗成日都係得幾百蚊，而家先明白點解啲大人成日叫班細路要好好讀書，搵錢真係好辛苦。

我哋而家每星期都仲可以夾到兩日Band，冇咗學校嘅音樂室，練習嘅時間反而少咗，有時為咗就大家嘅返工時間，甚至要好夜先夾到。

今日就排到夜晚10點先夾到Band，太一仲要遲到。

「搞咩呀？又話9點收工嘅？」我問太一。
「突然多嘢做呀。」太一講。
「報社真係多突發嘢。」
「今日唔係返報社呀，我今日做珍珠奶茶鋪。」

「你返兩份工？」樂少問。
「係三份，我仲有做便利店。」太一講。
「你好等錢使咩？」我問。
「其實係咁嘅⋯⋯我想去日本搵我阿媽。」

太一約佢嘅尋親計劃講咗畀我哋聽。

「不如⋯⋯我哋都一齊去日本啦。」Sky笑笑口講。
「都好喎，我都想去日本呀。」我講。
「一於就咁決定啦，我哋幫你手尋親。」
「咁⋯⋯都好嘅，我諗住放榜之後就出發。」

如是者，我哋就決定要去日本Grad Trip，同埋幫太一手尋親。

「係呀，我又收到偉杰嘅電話，我哋要做3場Show呀，日期應該係6月嘅星期六，好似會有酬勞㗎。」我講。
「我都有Show呀，Grad Show想我哋夾幾首歌呀。」
「好喎。」

估唔到，一係冇Show玩，一係就有咁多場，要努力練好啲歌呀。

雖然夾嘅時間係唔多，但係大家對舊歌都冇生疏，全部都依然玩得好好，不過偉杰個Show係想我哋玩啲正能量歌，所以新歌要努力啲。

＝＝＝＝＝＝

5月尾嘅時候，學校有一日假，我約咗毛子蘭出嚟。唔知係咪太耐冇見，我有啲緊張。雖然Keep住有同佢Message，但係冇見面，好似硬係怪怪哋。

我今日約咗佢去上次間Cafe，因為我已經識路，所以就入咗去等佢。我竟然早到等佢，睇嚟我真係有啲問題。

「仲諗住你會遲到添。」

我哋約1點，佢12點45分就到咗，果然係Head Prefect。

「諗住你難得見到我就唔遲囉。」我講。
「吓？明明你約我先嘅。」毛子蘭講
「是旦啦，學校最近點呀？」
「都幾好吖，我哋『占卜星相靈異與魔法學會』都搵到人接班喇。」

「咁係邊個呀？」
「Keeley囉。」
「吓？唔係掛。」
「小悠話佢好有通靈體質，可以感受到宇宙信息。」

原來Keeley會入「占卜星相靈異與魔法學會」，不過上次佢無啦啦去打坐，我都覺得佢應該同正常人有啲分別。

「你點呀？」
「你點呀？」

我哋同一時間問對方。

「我喺我屋企間茶餐廳打工，有冇講過畀你知呀？」
「冇喎。」
「而家我炒飯幾好㗎。」
「咁等我去試吓先。」

「好呀，冇折㗎。」
「係喎！維他奶呢？8包呀。」毛子蘭講。

「我嗌咗杯維他奶咖啡畀你呀，當一杯啦。」
「唔計呀。」

好懷念呢種感覺，好自在、好真實，原來以前日日喺Canteen見到佢，係咁好彩嘅一件事⋯⋯

食完嘢之後，我哋去咗一間遊戲機中心，呢間就係上年暑假炎爺帶我嚟嗰間。

「做咩嚟拋彩虹呀？」毛子蘭問。
「唔知呀，直覺囉。突然想拋彩虹。」我講。
「奇奇怪怪。」

把口就話我奇奇怪怪，但係佢自己已經兌咗Coins。

「中！」

難以置信，毛子蘭拋彩虹好勁，中咗幾個獎。

「咁勁嘅你⋯⋯」
「呢啲天份嚟㗎。」

不過我哋就始終都中唔到大獎，毛子蘭好開心咁拎走咗隻大公仔，佢仲送咗其中一份細獎畀我，係一枝少女漫畫嘅原子筆⋯⋯

「點解係少女漫畫呀？」
「唔要拎返嚟囉。」
「咁又唔好。」

毛子蘭要去廁所，所以我就幫佢拎住咗隻大公仔。

「你好似過得幾開心喎。」有個職員突然過嚟同我講。

我認得佢，就係上次畀Silas隻碟我嗰個職員。

「係你？」
「又有Band夾，又有女朋友。」
「唔係呀，佢唔係我女朋友呀。」
「記住唔好單飛呀，會被詛咒㗎。」
「吓？」

佢拎出咗一張相畀我睇。

「呢張相？」

我難以置信，呢張相係「五鬼魔神」嘅合照，唔通我眼前呢個人就係「五鬼魔神」嘅主音－KY？

「你就係KY？」
「我叫做沈勁恩，佢哋叫我KY。」

「佢哋係咁搵你，但係搵極都搵唔到。」
「係我冇面見佢哋⋯⋯」

原來KY單年，有機會單飛，後來阿秋嘅綠帽事件，佢就趁機會走人，所以就掉低咗李sir佢哋。點知原來所有嘢都係一個局嚟，佢畀人呃咗好多錢，而且要問炎爺借錢，後來因為冇學歷又冇能力，一直都喺呢間遊戲機中心做，從此就唔敢再搵李sir佢哋⋯⋯

「記住唔好單飛呀。」
「我一定唔會，冇『黑色西炒飯』，我都唔會做主音啦。」
「唔好同佢哋講呀。」

毛子蘭之後就出咗嚟，而KY就走咗。

「你朋友？」
「佢問我要唔要個袋啫。」

但係估唔到我今日最難以置信嘅竟然係⋯⋯我見到樂少同Kristine一齊，佢哋仲拖住手。

（Tbc.）

138 - 填詞人

今日我哋又嚟咗The Echo夾Band，不過今日嘅重點唔係夾Band，而係要審樂少。

「喂樂少，你係咪有啲嘢呃我哋？」我問樂少。
「Er⋯⋯冇⋯⋯呀⋯⋯」樂少答得非常吞吐。
「你個死仔唔係要跳槽去『EYE BLUE』呀嘛？」太一講。
「咩料呀，『EYE BLUE』點會搵我呀。」樂少講。

「我嗰日喺Game Center見到你同Kristine喎。」我試探咁講。
「吓？咁都畀你見到？」樂少講。
「你哋仲⋯⋯」
「當街Kiss？」太一突然插入嚟。

「邊有呀！」樂少激動講，「係嘅，我哋一齊咗喇。」
「woooo～」我哋都為樂少開心嘅。

「咁樂少你，要請食飯喎。」Sky講。
「點解呀？」
「出Pool飯呀，傳統嚟㗎。」太一講。

雖然我未聽過，不過呢個勢就一定要屈佢一筆勁嘅。

「是旦囉，依家返工都有啲錢。」樂少講。

明明只係過咗一個月啫，樂少好似長大咗，有錢又有女朋友。

「係喇，我有首新歌呀，你哋聽吓。」我畀咗首新歌佢哋聽。

之前同年浩仲有偉杰傾過，我知佢哋想要一首比較「熱血」嘅歌，所以我就諗咗一個比較上口同聽起上嚟有能量啲嘅Melody。

「都幾好喎，好似動畫OP咁。」樂少講。
「係呢。」
「歌詞呢？」Sky問。
「未寫呀。」

「阿錘寫詞不嬲都慢㗎啦，應該搞得掂嘅。」樂少講。
「但係我今次真係冇靈感喎，要夾個主題好難寫㗎。」我講。

雖然話呢排唔使返學，但係喺「流星記」打工都幾攰，仲攰過返學，而且每日做同樣嘅嘢都冇新Input，所以詞真係冇咩信心。

「咁要唔要試吓搵人寫呀？」太一問。
「搵人寫呀⋯⋯」
「因為我打工嗰度識咗個填詞人，佢想試吓試歌詞。」
「咁呀⋯⋯」

考慮到時間唔多，而且我仲要編曲同練歌，要唔要賭吓呢？

「可唔可以見吓佢先呀？」我問。
「好呀。聽日囉，我同佢6點收工。」太一講。

始終都要知道對方係咩人，先可以放心交份詞畀人，話晒我嘅歌都用咗好多心機作。如果對方有幾句寫得唔好，我又會唔好意思叫人改，人哋畀時間寫咗，我又唔想嘥咗佢⋯⋯

「係喇，我哋要唔要開個IG呀。」樂少講。
「都好喎。」我講。
「我見Kristine佢哋都有開，Follower都就嚟過1000，我哋要趁依家暑假儲多啲Fans呀。」樂少講。
「咁交畀你喇。」我講。

因為我哋入面得樂少識玩IG，我好少用，甚至好多Function都唔識。

「咁我搞啦。」樂少講。

樂少即場就開咗個Account，而Icon就係我哋之前為咗JSBA影嘅相，我哋分別成為咗頭4個Follower，Sky仲畀我哋迫住開個Account。

＝＝＝＝＝＝

第二日，我就去咗見太一所講嘅填詞人。

我哋約咗喺一間M記見面，因為我又唔小心遲到，所以佢兩個就等咗我一陣。

「Hi。」

佢哋搵咗張四人枱坐，分別坐對面，我就同太一坐同一邊。

「我係呀京。」

呢個叫呀京嘅人，個樣係斯斯文文，戴一副黑色眼鏡。

「我叫劉星隨。」

我畀咗啲我以前嘅歌詞佢睇，佢都畀咗啲自己改詞嘅作品我睇。原來佢未填過原創歌，一直都係寫改編歌詞。

「你好犀利呀，曲同詞都識作。」
「Er⋯⋯多謝。」

我覺得呢個人嘅中文水平應該都唔錯，詞彙量足夠，基本嘅啱音同押韻都有。

「你寫咗好多份詞喎。」我講。
「係呀，中一就開始寫。」

呀京同我哋係同年嘅，所以都係啱啱考完DSE。

「雖然寫得未夠好，不過我真係好鍾意填詞㗎，我覺得用廣東話寫歌詞係最浪漫嘅事。」呀京講。

睇一個人做一件事有冇熱誠，睇佢嘅作品就知，呀京呢到幾十份歌詞，每一份都有心機、有故事，我覺得可以畀佢試吓。

「咁⋯⋯你下星期之前寫唔寫到？」
「我3日就可以喇！」

我有少少畀佢嘛親，估唔到佢雙眼會咁有火，簡直可以用「炯炯有神」嚟形容。

「好⋯⋯」

我對佢嘅印象幾好，唔知佢會交份咩歌詞出嚟呢。

到走嘅時候我先發現，原來呀京⋯⋯都幾矮，應該冇米七，不過比例就幾好，遠睇唔會覺得好矮。

＝＝＝＝＝＝

過咗三日，我今日又喺廚房炒飯，呢排我學識咗整西多，原來要整好嘅西多都幾難，唔可以用切好咗嘅方包，一定要用原條方包自己切，咁先夠厚。另外就係要用半煎半炸，唔係就冇口感。

喺我準備煎多士嘅時候，我就收到咗呀京嘅歌詞，估唔到真係三日就起到貨。

份歌詞叫做《狂》，講為咗夢想幾狂都可以，只要夠鍾意一樣嘢，就算「發狂」咁都要去追求。本來「狂」呢件事都多數係形容一啲瘋癲嘅人，不過其實追夢嘅人又何嘗唔狂吖，好多嘢都係睇你有咩角度睇㗎啫，份詞⋯⋯我覺得都OK嘅，加上佢對我嘅旋律好認真，咁樣嘅填詞人，令人好放心。

「星隨！西多得未呀？」我爸爸催我。
「即刻嚟！」

自從打暑期工之後就更加體會到，夢想係幾咁遙遠，現實係幾咁唔可以確定，喺呢個咁「狂」嘅世界，我哋要實現願望，就一定要好好「發狂」。

（Tbc.）

139 - 《狂》

好快我哋就夾好咗《狂》呢首歌，因為編曲冇用到咩花巧嘢，所以都好順利，我亦都將首Demo Send咗畀偉杰聽，佢好似都幾鍾意首歌，好啱佢哋嘅正能量活動。因為有3場Show，所以我哋決定3場都玩唔同歌，而第一場Show就決定係《狂》、《選擇⋯⋯多一次》、《懶》。

＝＝＝＝＝＝

第一場Show嘅地點喺荃灣嘅商場入面，我哋都係第一次喺商場表演。

我哋到咗之後，就見到好多人，呢度嘅人流多到同旺角E出口差唔多，可能係星期六嘅關係啦。而且商場嘅音響好似好犀利，應該高層嘅途人都會聽到我哋夾Band嘅聲音，令到我都有啲緊張。

不過我知道，我真正緊張嘅原因，唔係因為有好多人，而係因為毛子蘭唔喺度⋯⋯我有同佢講我哋會搞Show，不過因為佢要考試，所以我就冇叫佢嚟。

諗返轉頭，我每一次我唱歌毛子蘭都真係會出現，就算好耐之前喺英語閣唱歌嗰次都係。我都要試吓冇咗毛子蘭嘅話，我要點做⋯⋯因為未來冇佢睇嘅Show一定會多過有佢睇嘅Show。

另一邊，Kristine就有嚟睇樂少，兩個人好似都幾Sweet，做兄弟嘅都戥佢開心，Kristine又靚，性格又好，應該好女仔嚟嘅。

「阿錘，準備喇。」偉杰叫我哋Standby。
「好。」我輕輕呼一口氣。

「記住就算觀眾反應差啲都好，要保持自信，好似曼聯咁。」偉杰講。
「似曼聯就輸波啦。」樂少講。

因為偉杰係真曼聯Fans，所以同真利迷嘅樂少，一見面就互相串一串對方。

「大家好，我哋係『黑色西炒飯』，今日會唱三首歌畀大家聽，希望你哋鍾意啦。」對住咁多陌生人，少少緊張都正常掛。

「～變幻愛惹善忘 眼淚會被抹乾～」
「～態度似碎石塵 手一放 便喪～」

呀京寫嘅詞同我真係好唔同，感覺上係用字嘅節奏完全唔一樣，例如「手一放 便喪」，我就可能未必咁寫，而且一啲韻母上面嘅選擇都有啲唔同，好多人以為填詞人填份詞啱音就得，但係其實填詞人揀用咩韻母都會對首歌有好大影響，如果冇好好考慮到唱歌嘅部分，就唔算係一個好嘅填詞人。

我自己寫嘅歌詞，會自己唱一次先，然後遇到好難發音嘅位置就會試吓填其他韻，好處係可以跟據自己嘅發聲習慣，調整份詞去到最啱自己唱嘅位置，但係其他人填嘅詞就做唔到，所以要再學習過佢嘅發聲習慣。

「～到大個便驚失去太多～」
「～到大個便燒光了軀殼～」
「～鏡內看對倒 快樂變折磨～」

不過呀京份詞都寫得幾有故事性，好似已經諗到啲MV畫面咁。

呢首歌要有好強嘅能量先駕馭到，唔係就會變咗一啲廣告歌，要提高能量，所以我喺Show之前都準備咗一陣，留返能量喺呢一刻到爆。

「～愛就靠意志闖一趟～」
「～總會被笑傻 需每日去忙～」

因為份歌詞好熱血，所以我哋嘅鼓手太一就好鍾意，我聽後面嘅鼓聲都Feel到佢嘅熱血。

咁大嘅商場入面，有人會停低睇我哋嘅表演，亦都有人會走咗去，眼尾都唔望一下，我都明白嘅，但係為咗有花時間睇我哋嘅人，一定要唱好首歌。

之後，我哋就唱埋《選擇⋯⋯多一次》同《懶》，反應未好到好似以前學校嘅Show咁，但係都唔算冇反應嘅。

「多謝大家！」

後台嘅年浩同偉杰都算滿意我哋嘅表演，仲話通常呢啲Show都係咁，觀眾唔會好投入。既然係咁都冇辦法啦，唯有做好自己先啦。

＝＝＝＝＝＝

早幾日，我收到炎爺嘅電話，佢話Silas會去間Bar度表演，叫埋我去。因為終於都夠秤，所以我都想落Bar體驗下。

呢幾日我都諗咗好多嘢，主要係點做先可以夾Band夾到畀人見到。過咗三場Show之後，我哋Follower只係升咗30人都唔夠，原來網絡世界嘅數字真係會好打擊到人嘅自信，我見有啲Busker都有幾千Follower，唔通夾Band真係咁冇市場？

「嚟咗喇。」炎爺講。
「係呀。」

呢度嘅感覺同我想象中唔同，以為係好多人又跳舞又盛，燈會又光又掁眼，但係呢間酒吧就冇好勁嘅燈光，反而有啲黑，除咗舞台之外冇咩光，靠枱面嘅蠟燭取光。

「Silas最近可以唱返Rock喇。」
「咁就好喇。」
「都係多得你咋，返完『寧華』之後，佢就愈嚟愈好。」

我記得Silas講過佢唱完Christmas Ball之後，有搵返啲嘢，好似係「隨心」？咩意思我就唔明喇，不過見佢有好轉就好喇。

Silas出到嚟嘅時候，成個人嘅氣場返晒嚟，呢個係孫凝雨，唔係「夏天雪人」。

Silas一口氣唱咗幾首Rock Song，最後甚至完整唱晒成首《銀竹》，我心裡面係好感動。估唔到，可以再見返呢個唱Rock嘅Silas。

完咗之後，Silas走過嚟，「點呀，我唱成點？」佢問我。
「好好呀！我見返嗰個Silas。」
「因為我有睇醫生呀。」

原來Silas話佢之前嘅驚恐症係腦分泌出現咗問題，最近有食藥，所以就控制到。

「不過都係好彩有你。」
「我？」
「唔只係你搵我返『寧華』，仲有你嘅表演，呢啲都令我想上返台。」

畀Silas咁講一講，我有啲想喊⋯⋯我哋嘅表演打動到人，甚至可以幫佢返到去舞台。呢一切，比IG Follower更重要，音樂填滿嘅唔應該係社交平台嘅數字，應該要填滿嘅係人嘅心靈。

（Tbc.）

140 - Grad Din

完咗三場Show之後，仲有一場Grad Din嘅表演，今次應該就係真真正正，最後一次用中學生身份表演嘅Show。我已經揀好咗唱咩歌，而且一定會做到全場大合唱。

講起Grad Din，最緊要當然係服裝啦，我作為慳錢達人，一早已經決定咗又係用著完後退錢呢招。

我哋嘅Grad Din算搞得好遲，人哋六月就已經搞，但係我哋就喺放榜前三日搞。

Grad Din即係謝師宴，要答謝一班努力教我哋嘅老師。回顧我呢六年，有冇遇到好嘅老師？緊係有啦，我諗好老師同壞老師嘅比例，大概一半半啦，因為更多嘅係冇咩好與壞，佢教書，我聽書，河水不犯井水嗰種。喺我眼中，好似Miss Lui呢啲熱心嘅老師一定係最好，之後李sir呢種同我哋保持適當距離，但係有需要嘅時候就出手幫助嘅老師都係好老師。壞老師係點？緊係何副校啦，Last Day件事我到而家都仲記住，所以我到今日都冇剪頭髮，而家個頭已經長到好似飛輪海咁。

＝＝＝＝＝＝

7月12日 Grad Din

我哋今日去到咗跑馬地嘅一間酒店，好似話係5星級酒店，所以我驚自己去會撞板，就約咗樂少一齊去。太一就話唔順路自己去，而Sky就話自己揸車嚟。冇錯，因為年頭出世嘅Sky已經考咗電單車牌。

呢度比我想像中豪華好多，我有種「大鄉里出城」嘅感覺，所以每步都慢慢嚟，費時失禮人。

好多人都有種煥然一新嘅感覺，個個都好似大個咗，明明只係幾個月冇見⋯⋯特別係班女仔，化妝之後差啲唔認得，連霞姨同鍾文佢哋都變到好順眼，靚女又真係未到嘅，但係都絕對係平均線以上。

「激情對話」嘅成員都著到好誇張，著件金色西裝行入嚟嘅係朱傑，聽講朱傑最近炒股贏咗唔少，見佢穿金戴銀，應該真係執唔少。Mango就係大紅大紫，慌死人睇唔到咁，至於魔人就簡直當自己係Hip-hop明星咁，搞個Dreadlocks頭再戴副黑超。

見返佢哋，我都好開心，呢排生活好悶，除咗返工同夾Band都冇其他嘢做，雖然「激情對話」成日諗啲屎橋，但無可否認佢哋嘅屎橋係豐富咗我嘅校園生活。

呢個時候，門口傳嚟一陣尖叫聲⋯⋯係我哋嘅Sky終於出場，揸電單車嘅佢，型到好似拍電影咁，仲要孭住枝結他，好難唔變成大家嘅焦點。

冇幾耐之後，又有個充滿仙氣嘅女仔登場，呢個係Emma，佢著一件白裙，顯得高貴又大方，嗰種富家千金嘅氣質表露無遺。

現場係好歡樂嘅，一切都好似返返學校咁。可惜，而家已經冇得再返去上堂喇。

「太一咁耐嘅？」樂少同我講。
「係囉，差唔多開始喎。」我講。
「係咪唔識路呀，不如我去接佢啦。」Sky講。
「Call吓佢先啦。」我之後就打電話。

太一原來又遲咗收工，而家趕緊過嚟。

「應該講得切嘅，可能Miss咗頭盤囉。」樂少講。

我哋嘅Show都冇咁早，所以仲可以等一陣。

講起上嚟，副校今日完全冇出現，唔知係咪有咩事，我即刻就問李sir知唔知咩事。

「李sir，副校長唔嚟嘅？」我問。
「副校？未Firm嘅，不過有機會副校會走人。」李sir講。
「咁開心？」
「升職呀，好似話史校董推薦佢去第二間學校做校長。」

頂！咁都有得升職，世界係幾咁諷刺⋯⋯一個咁小氣嘅人做到校長，間學校肯定出事。

其實我仲有件事，想同李sir講，不過唔知講唔講好，係關於我搵到KY件單嘢。

「李sir，當年KY係點走㗎？」我問。
「KY⋯⋯佢係突然之間消失。後來我哋收到風，原來佢係想單飛，但係又畀人呃，之後就冇出現過。」
「原來係咁。」
「雖然KY係想單飛，但係都唔使唔見我哋吖，都冇人嬲佢。」

「佢背叛你哋喎。」我講。
「算數啦，佢有機會單飛，對佢仲好啦。喺成年人嘅世界，掉低同伴⋯⋯係無可奈何嘅事。」李sir講。

單飛⋯⋯如果係我⋯⋯應該唔會。我想同隊Band一齊。

「我之前見到佢⋯⋯喺一間Game Center度。」
「真係？」李sir雙眼放大。

由李sir眼神，我知佢係仲想見返KY嘅。

我講咗我知嘅情報界李sir知，搵唔搵KY就交畀佢哋決定啦。

呢個時候，樂少同Emma兩個單獨相處緊，明明有女朋友，仲同啲靚女咁Close，所以我又走埋去。

「阿錘。」Emma叫我。
「好耐冇見。」我講。
「原來Emma會走呀。」樂少講。
「嗯。台灣嘅大學畀咗Conditional Offer我，只要夠分就可以。」

「咁就好喇，台灣嗰邊讀Art應該會開心啲。」我講。

喺我哋傾緊偈嘅時候，太一終於嚟到。

「咁遲㗎，要開Show喇。」
「Sorry呀，好多嘢做呀。不過我Ready喇。」
「咁嚟啦！」

我哋好快就準備好，最後一次用中學生嘅身份表演。

「試咪試咪⋯⋯」

「Hello，大家好。好耐冇見，我哋係『黑色西炒飯』。一排冇見，大家好似都大個咗少少，好似成熟咗。不過以後嘅人生咁長，唔使咁快大個啦，除非係『遇怪魔』啦！1、2、3、4！！」

「～遇怪魔我即刻變大個～」

我講完之後就即刻入《自動勝利》，呢首係我哋第一首夾嘅歌，本身我對佢嘅印象就只有《數碼暴龍》，但係而家就有屬於我嘅回憶，同埋我哋「黑色西炒飯」嘅回憶！

「～最好的你從來不會掉低我 我想說謝謝你～」

然後，我揀咗《Special Thanks》，雖然啟發我作嗰個人唔喺度，不過呢度嘅人⋯⋯都佔咗我人生嘅一部分，我哋嘅相遇造就咗而家嘅我，所以都好想多謝佢哋。

可能因為《Special Thanks》都唱咗幾次，台下面都有人一齊跟住唱。

最後我揀咗⋯⋯呢首歌。

「跟住呢首歌，識唱嘅一定要一齊唱，不過我肯定冇人會唔識唱，呢次可能係我哋人生最後一次唱呢首歌，嚟啦！」

「～寧華，寧華，教育我們，做個勇敢的人～」

冇錯，我哋最後一首歌係校歌，之前幫Miss Lui彈嘅時候，我都好想試吓咁樣唱一次，如果要唱，有咩場合係啱過今日吖！

果然，全場一齊場，每個同學都開唱，連班老師都有一齊，Miss Lui係唱得最High嘅一個⋯⋯呢次肯定係大家都最投入唱嘅校歌。

「多謝大家！」

隨住大家嘅掌聲，中學生身份嘅「黑色西炒飯」就真真正正畢業喇。

＝＝＝＝＝＝

唱完之後，Miss Lui嚟咗搵我哋。

「估唔到你哋會唱校歌喎。」Miss Lui講。
「都係致敬『雷老師』你啫。」我講。
「你個劉星隨吖，啲頭髮就嚟長過我喇。」

近睇先發覺，Miss Lui頭髮都長咗，而家好似仲瘦咗，唔知係咪學校太多嘢做呢。

「過兩日放榜，啲嘢準備好未呀？」Miss Lui講。
「我哋聽你講，報定咗啲大專啦，都預唔夠分。」樂少講。
「一日未派卷，都可能有奇蹟呢。」Miss Lui笑笑口講。

呢個時候，Miss Lui電話響。

「喂？」

Miss Lui嘅面色，突然變到好凝重⋯⋯

「我即刻嚟⋯⋯」

「咩事呀？」Sky問。
「我爸爸媽媽⋯⋯撞車⋯⋯依家喺醫院。」

（Tbc.）

141 - 「我已經唔係中學生喇！」

「邊間醫院呀？」Sky問。
「瑪麗醫院。」Miss Lui講。
「我啱啱嚟嗰陣好塞車，黃泥涌道塞緊。」太一講。
「我車你吖。」Sky講。

「塞車緊係坐電單車啦，Miss Lui快啲去啦。」我講。

於是Sky就同Miss Lui就離開咗，一齊去醫院。

＝＝＝＝＝＝

雖然馬路上塞緊，但Sky架電單車就一路前進，令焦急嘅Miss Lui稍為放心。

Sky揸到好似風咁快，唔使好耐就已經到咗瑪麗醫院。

Miss Lui馬上衝入急症室了解情況，Sky喺泊好車之後，就入醫院搵Miss Lui。

「醫生我爸爸媽媽點呀？」Miss Lui好緊張問。
「你媽媽受咗輕傷，我哋仲觀察緊。但係你爸爸就要做手術。」

Miss Lui一聽到爸爸要做手術，就非常擔心，成個人好似呆咗咁。

「一定會冇事㗎，你爸爸一定冇事㗎。」Sky同Miss Lui講。

兩個人就坐咗喺急症室等待手術嘅結果。

「太似喇⋯⋯」
「吓？」
「好似哥哥走嗰日咁⋯⋯又係呢間醫院。」

Sky冇出聲，因為當年佢家姐遇到車禍嘅時候，都係咁樣。嗰種不安嘅心情，佢一世都唔會忘記。

「點解⋯⋯點解要撞佢哋呀⋯⋯」Miss Lui嘅淚腺已經失守，忍唔住喊咗出嚟。

Sky喺隔離，做唔到任何嘢，幫唔到任何手⋯⋯只可以睇住Miss Lui係咁喊。

「我真係飲咗兩杯酒咋，點知會咁大件事啫。」呢個時候，落緊口供嘅司機講，佢嘅語氣好似仲未酒醒咁。

聽到嗰個司機話自己飲完酒揸車，Sky嘅心裡面有一陣怒火湧現，佢諗起自己嘅家姐，就係畀一個不負責任嘅酒駕司機奪走寶貴嘅性命。

Sky行過去嗰個男人隔離，一手捉住佢嘅衫領，然後一拳打落佢塊面。嗰個司機即刻跌低，但Sky似乎未想停手，但係在場嘅警察就即刻制止咗Sky。

「你邊個呀？痴線㗎？」司機大聲鬧。
「就係你呢啲不負責任嘅人呀，知唔知會影響幾多人呀！」Sky非常嬲，想再衝上去打多拳。

Miss Lui見到呢個畫面，就過去分開Sky同醉駕司機。

「你做咩呀。」Miss Lui問。
「係嗰個男人撞到你父母㗎。」Sky好激動咁講。
「依家我唔想理呢啲呀，我只係想爸爸冇事咋。」Miss Lui講。

Sky聽到Miss Lui咁講似乎冷靜返，靜靜咁陪喺Miss Lui身邊。

「你返去先啦，Grad Din仲未完㗎。」Miss Lui講。
「唔使啦，我可以留喺度。」Sky講。
「你聽話啦。」
「我已經唔係中學生喇！」Sky激動講，「你畀我自己揀啦。」

Miss Lui冇講咩，安靜咁坐喺度等，Sky亦都一樣。

「個天好似同我開玩笑咁⋯⋯」Miss Lui細細聲講，「當年粒聲唔出帶走咗我哥哥，依家又想帶走我爸爸。」

Sky唔知可以講咩安慰Miss Lui。

「不如去睇吓你媽媽先？應該檢查完喇。」
「嗯。」

於是Miss Lui就自己去咗睇佢媽媽。

瞓咗喺普通病房嘅Miss Lui媽媽冇咩大礙，只係擦傷少少同埋扭親腳，因為車禍嘅時候，Miss Lui爸爸推開咗佢，但亦都因為咁，所以Miss Lui爸爸就受到好大嘅撞擊。

留喺手術室門口嘅Sky，不斷諗返起佢家姐出事嗰日，畫面雖然好零碎，但印象就仍然好深刻。當時嘅Sky好㥬惶，好想有人會陪伴佢，就算咩都唔講，只係喺隔離都好。所以佢就好想留喺Miss Lui身邊。

Miss Lui返到嚟手術室門口。

「點呀？」
「媽媽冇事，皮外傷啫。」Miss Lui似乎諗起咗啲嘢，突然露出一剎那嘅笑容。

「果然係同樣嘅DNA，爸爸同哥哥一樣，都係咁做。」Miss Lui稍為放輕鬆講，「我哥哥嗰陣都係咁樣救我。」
「Miss Lui你爸爸，係一個點嘅人呀？」
「佢呀？有時又黑口黑面，從來都唔會講自己感受嘅人，不過當個女改簿改到唔小心瞓著，又會偷偷哋幫個女搕被⋯⋯」Miss Lui眼紅紅咁講。
「咁佢一定未捨得放低Miss Lui你啦，因為你依家都仲會改簿改到瞓著覺。我就見過兩次喇。」Sky輕輕微笑咁講。

「你個司徒天吖。」

「嗰陣我同上天許願，只要家姐冇事，我就以後都唔彈結他，我仲以為等價交換就可以啦⋯⋯點知失敗咗喎。」呢個時候，Sky偷偷哋喊咗出嚟，「我知係我家姐拒絕咗我，一定係佢唔想我放棄彈結他⋯⋯但係如果要我揀，我都會揀家姐⋯⋯揀一千次都係⋯⋯」

「傻仔嚟嘅，邊有人許呢啲願㗎。」Miss Lui摸吓Sky個頭，「你家姐⋯⋯一定係好錫你。」

Sky抹走自己嘅眼淚，「你爸爸一定會出嚟幫你搕被。」笑笑口講。

佢哋兩個又坐低安靜咁等。

「你真係唔返去？你枝結他呢。」
「唔返啦，枝結他我叫咗太一幫我拎。我想陪Miss Lui你。」
「嗯。」

Sky知道呢種感覺係點，佢知道嗰種孤單同可怕，所以只要佢仲可以等，就會陪住Miss Lui。

過咗三個鐘之後，醫生終於出嚟。

「點呀醫生？」Miss Lui擔心咁問。
「手術好成功。不過麻醉藥未過，病人仲未醒。」

聽到手術成功之後，Miss Lui如釋重負，緊緊咁攬住咗Sky。

「多謝你陪我等。」Miss Lui講。
「佢哋冇事就得啦。」Sky笑笑口講。
「好喇，好夜喇，你走先啦。」
「哦⋯⋯有需要就搵我啦。」

呢個時候，Sky收到「黑色西炒飯」嘅Message。於是，Sky揸住電單車去搵佢哋。

開車之前，Sky發現衫袋多咗隻月亮耳環，可能係頭先Miss Lui攬住佢嘅時候唔小心跌咗。

（Tbc.）

142 - 果然我嘅隊友都好奇怪。

完咗Grad Din之後，好多同學都有準備「下場」，即係去Party Room、唱K、酒吧之類，但係我哋隊Band就冇任何打算，於是我哋返到嚟學校附近，去咗可以望到學校嘅嗰個公園，亦都即係我同樂少作《選擇⋯⋯多一次》嗰陣去嘅嗰個公園。揀呢度嘅原因，係因為可以望到我哋學校，又唔算太多人，仲要好近Sky屋企，如果想靜靜哋傾吓偈，呢度係最好Feel嘅。

知道Miss Lui父母冇事之後，Sky send咗個短訊畀我哋，我哋就叫咁Sky過嚟。

揸電單車果然好快，唔使好耐Sky就嚟到咗。

「點呀？Miss Lui同佢爸爸媽媽OK嘛？」我問。
「Miss Lui爸爸做完手術，麻醉藥未過，媽媽就只係輕傷。而Miss Lui佢，就留咗喺醫院。」Sky講。

我見Sky都好似好攰，唔知佢會唔會諗返起啲唔開心嘅事呢，始終交通意外對佢都幾大影響⋯⋯

「人冇事就得啦。」樂少講。
「嗯。」Sky微微笑，「不過你哋做咩返嚟嘅？你哋又唔順路。」
「阿錘囉，無啦啦話想睇吓間學校。」太一講。
「我見大家都冇『下場』啫。」

「唔係呀，我有㗎，可以同Kristine傾電話。」樂少一提起Kristine就發晒姣。
「妖～」樂少呢個死仔包，自從拍拖之後就一直係呢個狀態。

我哋今日變咗街童咁，明明個個都著晒西裝，點知就一齊坐喺滑梯上面，我哋一人坐一個角，太一已經玩咗幾次，我就真係費事搞。

望住眼前嘅學校，有種好遙遠嘅感覺，明明早幾個月都係自出自入，而且仲有兩三格階磚係屬於我嘅位，但係而家好似已經變到唔屬於自己嘅咁。

「你啲文人就係咁鬼麻煩嘅。」樂少講。
「又咩呀。」
「十足以前啲古人呀，貶官又要寫詩，落個雨又講到人生百態咁。」
「我邊有喎。」

呢間學校發生嘅所有事，都已經好深刻咁印咗喺我腦海，無論係遲到搞到畀人記缺點，定係臨急臨忙抄功課，或者係偷偷哋上堂瞓覺，都好難忘記。而且，喺度夾Band⋯⋯好開心，我同隔離呢三個人做咗好好嘅朋友，玩咗一場又一場嘅表演，由冇人識，到個個同學都知我哋隊Band叫「黑色西炒飯」。

「冇得用音樂室真係麻煩呀。」Sky講。
「你肯定係怕出去夾Band遠啦。」我講。
「你揸電單車咪得啦。」太一講。
「泊車好麻煩㗎。」Sky講。

空氣突然之間安靜起上嚟，我望住個天，除咗一片黑之外就咩都睇唔到。

「如果唔係你哋，我可能唔會彈返結他。」Sky瞓低講。
「我都係⋯⋯唔係你哋，我都唔會打鼓。」太一講。
「我都唔會彈Bass啦。」

「你明明就係因為Emma。」我哋三個好齊咁講。

「而我⋯⋯就唔會唱歌。」我講。

呢個時候，我感覺到有幾滴雨跌落嚟。

「講真，呢兩年我好開心。」太一講，「以前個個都覺得我好奇怪，但係你哋又冇咁睇我。」
「除咗我，你哋有邊個唔奇怪㗎。」樂少講。
「係咩？我覺得你最怪。」我講。

樂少行去滑梯瀡咗落去，「不過唔係因為你哋咁奇怪，我都唔會識到Kristine。」樂少上返嚟講。

「講起上嚟，我哋隊Band都係因為你想溝女先有。」我講。
「不過Emma佢，會去台灣。」Sky講。
「原來Sky你都知㗎。」
「我同Emma係VA堂嘅同伴呀。」Sky舉起Peace Sign講。

諗返起嗰陣，樂少真係好迷Emma，仲差啲因為咁搞到我哋隊Band散添。

雨好似愈嚟愈多，我諗唔使好耐就會落大雨。

「夾Band之後我覺得大家都成長咗。」樂少講。
「嗯。」Sky講。
「冇錯呀。」太一講。
「除咗阿錘。」樂少講。

「吓？」乜我冇成長咩？

「因為阿錘依然係嗰個好鍾意夾Band嘅白痴呀。」樂少講。
「又好似係喎。」太一講。
「講得啱呀。」Sky笑笑口講，「同天上嘅星星一樣，每一日都會喺度，就算天好黑，只要用心望就會見到。」
「不過咁就啱㗎喇，阿錘你千祈唔好變呀。」樂少講。

佢哋三個又真係改變咗唔少，Sky變得開朗咗，太一唔係再亂咁衝，樂少就終於有女朋友。我又有冇咩改變呢？我覺得我係有唔同咗，起碼冇咁擔心自己表演會失誤，不過我而家同以前一樣，都仲係好鍾意夾Band，好想做到「最平凡嘅表演者」。至於未來會唔會變⋯⋯我就唔知喇。

我只係知一樣嘢，再唔避雨，我哋就肯定會變落湯雞。

「好大雨喎，仲留喺度？」我問。
「由佢啦，邊有咁易病喎。」太一講。
「我三分鐘就可以返到屋企沖涼喇。」Sky講。
「只要我個頭唔濕就得。」樂少將個頭放入滑梯裡面避雨。

果然我嘅隊友都好奇怪。

當雨一滴一滴打落嚟，其實又冇咩嘢啫，除咗件衫濕晒，都係嗰句「其實落雨又有咩好怕」。雨即係「銀竹」啦，喺滂沱大雨入面，調整好自己嘅心情，先係最好嘅避雨方法。

本身仲諗住退返件西裝，但係咁樣淋法，應該都冇得退，唯有當自己畀咗錢買啦。

我拉返樂少出嚟，「你都要濕呀。」我講。

「同你哋夾Band我好開心。」我講。
「我都係喎。」樂少講。
「嗯。」Sky講。
「～感激你在我身邊～」太一唱《Special Thanks》句Hook Line。

「當我上台驚嘅時候，每次都有你哋喺後面撐住我⋯⋯」我講。
「搞咩呀，唔好搞到大結局咁啦，仲有好多嘢做㗎。」樂少講。
「仲要十八區巡迴、出碟、拍戲！」太一講。
「咪就係囉。」Sky講。

「感性吓啫，我呢啲文人。」我講。

呢一晚，我哋一路喺公園淋雨，直到停雨。

（Tbc.）

143 - 放榜

2015年7月15日

「乞嗤！」

都話唔好淋雨㗎啦，放榜先嚟病。好彩冇發燒，係有啲鼻水，同埋少少咳。

今日到咗DSE嘅放榜日，準備迎接我哋嘅成績表。我人生中好少會為咗派成績表而覺得緊張，但係話晒都係DSE，唔多唔少都有啲緊張。我一早就落咗「流星記」食早餐，不過胃口就麻麻哋。

今日我同平時一樣，都係行嗰條路返學，唔同嘅係，我已經冇著校服。我著住平時嘅打扮，一件Band Tee加牛仔褲行入學校。

嚟到禮堂，全級嘅同學都喺晒度，我哋分班坐，一到時間班主任就會派成績畀我哋。

所有老師都返晒嚟，Miss Lui都喺度，我哋有問佢父母點，好好彩兩個都平安無事，不過Miss Lui爸爸就仲喺醫院觀察緊，順利嘅話過兩日都可以出院。

唔知點解中五嘅同學有啲都返咗嚟，例如毛子蘭同甜豉油都喺度。

陸續已經開始派成績表，我隔離嘅樂少好似好緊張。

「點算呀阿錘⋯⋯會唔會要Retake㗎。」樂少講。
「最多咪讀Found Dip，可以唔Retake嘅。」我講。

其實我內心都有啲驚，始終自己又唔係溫書多。

「關志樂。」文sir嗌樂少。

樂少震吓震吓咁行出去，我離遠都Feel到佢好緊張。

樂少返嚟嘅時侯⋯⋯冇咩表情，好平靜。

「點呀？」
「32333。英文差少少咋。」

可惜，樂少最後都差少少⋯⋯

「睇嚟都係要做太空人。」
「咁仲有其他學校嘅。」

「劉星隨。」文sir叫我。
「到我喇。」

文sir望住我，稍稍皺眉，擘大眼，嘆一口氣。

「點呀？考得好差呀？」
「又唔係嘅。」

我一望張成績表⋯⋯竟然係⋯⋯全部3？ 

「你呢個分呢，要入八大就難啲，可以試吓報啲私立院校嘅。」文sir講。
「哦。」

全部3⋯⋯呢個分，我都冇咩好講⋯⋯誤打誤撞，考到入大學嘅最低資格，但係應該就唔夠分入U囉。

「全部3呀。」
「吓⋯⋯你就好啦。」
「咪又係唔夠分入U。」

我同樂少嘅處境其實差唔多。

「考成點呀？」Miss Lui問我哋。
「我全3呀。」
「我就衰咗英文。」
「快啲Check Email啦。」Miss Lui講。

我打開電話，發現原來一早就有副學士嘅Offer，仲要全2就讀得。

「原來都有Offer喎。」樂少講。
「係喎。」

因為Miss Lui有提我哋報定啲大專課程，所以我都報咗幾科就Back Up，我只係唔知原來係會Email通知我哋。

「咁我哋可以做太空人喇。」我同樂少講。
「冇所謂啦，讀邊間我都係全力夾Band㗎啦。」我講。
「咁又係。」

「司徒天。」呢個時候文sir叫到Sky喇。

Sky返嚟嘅樣，好似未瞓醒咁。

「點呀Sky？」

Sky舉起5隻手指：「55555。」

嘩，Best 5全部5，咁應該夠入好多科喇，果然係我哋嘅讀書擔當，不過Sky好似有啲唔開心。

「以為中文可以拎5**添。」Sky講。
「有5好叻仔啦，諗好報咩科未呀？」Miss Lui講。
「我淨係想報最近學校嗰間U咋，因為我住唔慣Hall㗎。」Sky講。

呢啲就係成績嘅分野，Sky係諗報邊間學校，我哋係疊埋心水做太空人⋯⋯

禮堂入面有人開心有人喊，霞姨就好開心，應該考得好好啦，但鍾文就喊晒，Carol佢哋不停安慰緊佢⋯⋯

「激情對話」班人就⋯⋯已經講緊買邊隻股票，夜晚買咩波，呢班人好似都冇咩關心成績，不過分數好似都係同我差唔多。

另一邊⋯⋯太一就呆咗咁，所以我就衝埋去睇吓佢咩事。

「做咩呀太一？」
「我科Maths呀⋯⋯」

我睇佢張成績表⋯⋯Maths竟然1咗⋯⋯

咁就慘喇，即係連Asso都冇得讀，真係要讀Found Dip。

「咁你爸爸⋯⋯」
「我唔理佢呀。我決定咗喇，我點都會留喺度，唔去外國⋯⋯我阿爸趕我都唔會走。」

太一呆完之後，又好似有返能量，雖然炒咗科Maths，但太一都應該冇咩事嘅，我只係擔心佢爸爸會夾硬送走太一啫。

我見Emma同Sky傾緊偈，Emma好似都考得唔錯，應該夠晒分去台灣讀Art。

「考成點呀？」毛子蘭過嚟問我。
「Er⋯⋯同我估嘅差唔多囉。」

佢攞起我張成績表，「全部3喎，英文細分得3322都有3咁好彩嘅。」

「係咩？」我都冇留意啲細分，「我仲以為我Oral講得好好添，竟然得2？反而Reading有3真係冇諗過。」

「好過要讀Found Dip嘅。」毛子蘭講。
「我本身預自己全2咋，而家多咗5分算好好喇。」我講。

攞到成績表之後，好多同學都已經離開咗，有啲係急急腳去搵學校，有啲係返去同屋企人慶祝，有啲係已經唔會再升學，攞完成績就去返工。

「係喎，你特登返嚟睇我拎成績㗎？」我問毛子蘭。
「唔係呀⋯⋯我諗住預早一年返嚟感受吓氣氛啫。」
「哦。」

我嘅視線冇目的咁周圍望，望住呢個我哋第一次上台表演嘅禮堂，我始終都係有啲唔捨得，諗返起呢度嘅一切，唔記得歌詞啦⋯⋯大聲叫大家一齊唱⋯⋯仲有對住我班隊友彈結他，都有好多回憶。

我而家企呢個位，就係當日毛子蘭望住我嘅位置，原來個視角係咁嘅，好似好遠，但係原來係好清楚望到上面嘅人。

「做咩望住個台呀？」毛子蘭問我。
「望住呢個台⋯⋯有啲唔捨得啫。」我講。
「因為第一次夾Band係呢度？」毛子蘭講。
「嗯。本身Last Day嗰日我諗住好好喺學校呢度行吓，同佢講再見，點知又發生咗好多事喎。」

「咁不如依家行啦。」
「而家？」我望住周圍嘅同學同老師，個個都好似各有各忙，「都好喎。」

於是我同毛子蘭就出咗去慢慢由頭行一次我哋嘅學校，正式同我間學校講再見。

（Tbc.）

144 - 感激你在我身邊

我同毛子蘭由禮堂門口開始慢慢遊走，我哋經過咗教員室，因為所有老師都喺晒禮堂，所以我哋就偷偷哋潛咗入去。

「你真係要入嚟？校規唔畀㗎喎。」我問毛子蘭。
「校規冇咁寫㗎，唔畀入教員室只係唔想學生阻住老師做嘢咋。」毛子蘭講。

係咁㗎咩？咁我咪畀本手冊呃咗6年？不過算啦，都畢咗業。

我哋路過咗曹sir個位，見到佢擺咗個「1980年葵青區兒童歌唱冠軍」獎杯喺度。

「你睇吓。」我大笑住叫毛子蘭睇，「估唔到佢講真，佢真係歌唱冠軍。」
「佢個人就係咁，擺個獎喺度懶係威。」
「佢個名都話咗畀你聽啦，曹耀威吖嘛。嘈住要攞威。」我大笑講。

毛子蘭唔知係咪未聽過呢個笑話，笑到傻咗。

「你冇聽過咩？」見佢笑到咁，所以我都仲笑緊。
「冇呀。」

就喺呢個時候，毛子蘭隻手又唔小心撞到個獎，個獎準備要跌⋯⋯

好彩我身手敏捷，最後時刻救返個獎。

「好彩咋，唔係我又要幫你頂多次。」
「嗯。好彩有你。」

吓？我冇諗過係呢個答案⋯⋯佢平時唔係會話「我點會又跌爛個獎喎。」或者「咁多謝囉。」，「好彩有你」唔似佢會講喎。

之後，我哋就去咗幾間課室。

「喂，過嚟吖。」毛子蘭帶咗我去103室。

呢個課室係1C班嘅課室，我中一就係用呢個課室。

「睇吓先⋯⋯應該係呢張。」佢好似搵緊張枱。

「呢張係咪你以前坐㗎？」毛子蘭指住一張櫈。
「邊會有人認得呀。」我望吓張櫈嘅四周。

呢張櫈後面有人用Marker寫咗啲嘢，我一望⋯⋯係劉★÷，中間個星字係用Marker油黑咗嘅星星，同埋除號⋯⋯

我記得⋯⋯中一坐我後面嘅好似係樂少。

「肯定係樂少啦！」我講。

「我中一都係坐呢張櫈，我仲以為係後面同學畫，然後我同老師投訴。」毛子蘭面帶笑容回憶緊，「跟住老師同我講話中二有個人叫劉星隨，可能係佢坐過。我聽到呢個名就覺得好好笑，一路都好想知呢個人究極係咩人。」

原來毛子蘭中一已經知我嘅存在。

「然後，我中四嗰年開學第二日，你就遲到喎，副校長一鬧你，我就終於知邊個係劉星隨喇。」佢笑笑口講。
「就係一開學就畀你搞到記咗個缺點嘅壞學生囉。」我講。

我哋去坐好多間唔同嘅房，包括科學室、VA室、地理室、電腦室，同埋音樂室。

「有冇唔捨得音樂室呀？」入到音樂室之後毛子蘭問。
「有呀。呢間房嘅設備仲好過好多Band房，而且仲要免費。」
「你記唔記得我喺度教你唱歌呀？」
「你邊有教我唱歌喎。」

「明明就話咗畀你舊芝士蛋糕知要點唱先釋放到內心嘅熱血。」
「好啦好啦，你鍾意啦。」

咁我都多謝佢講咗芝士蛋糕嘅比喻嘅，的確之後我有唱得好咗嘅。

「仲有邊度想去呀？」
「Canteen囉。」

我哋落咗去Canteen，呢個地方應該係我同毛子蘭見得最多嘅地方。

「我記得我人生第一次畀人偷錢就係呢度。」
「吓？咁大鑊呀。」毛子蘭擺晒嘢咁講。
「邊有人無啦啦用人哋銀包啲錢買維他奶，仲叫人唔使找㗎。」
「係囉。邊有人差我8包維他奶，然後用杯咖啡嚟還㗎。」
「咁咖啡裡面有維他奶，咪即係維他奶囉。」
「超～」
「等陣啦。」

我去咗買兩包維他奶。

「嗱。」
「減一包啦。」

我哋坐咗喺Canteen飲維他奶。

已經數唔到呢包係第幾包維他奶，好似同佢一齊飲過好多包。

好想時間過得慢啲，好想呢一刻唔會完⋯⋯

「多謝你呀⋯⋯毛子蘭。」
「無啦啦多咩謝喎。」

「～感激你在我身邊 竭力的給我打氣～」
「～所有記憶 能留低到下世紀～」
「～最好的你從來不會掉低我 我想說謝謝你～」

好似好多嘢想講，但係我又講唔出，所以我就決定唱歌。

但係毛子蘭突然間喊起上嚟。

「做咩喊喎？」
「冇嘢呀。」毛子蘭抹乾自己嘅眼激。

「由初初教我望住熟悉嘅嘢唱歌⋯⋯幫我練好英文咬字⋯⋯喺運動會鼓勵我嘅人⋯⋯仲有好多次⋯⋯數唔到喇⋯⋯總之全部都係你⋯⋯」我講。

毛子蘭咩都冇講，只係握實拳頭，一拳打落我手臂。

「好痛呀！」我大嗌，「做咩打我喎。」

「鬼叫你整喊我呀。」毛子蘭仲喊緊⋯⋯「你遲啲肯定日日掛住夾Band，一定好快就唔記得我。」毛子蘭努力唔喊。

「我先唔會呀！」我講，「咪講咗最唔捨得嘅人係你囉！你估我又好開心咩⋯⋯呢幾個月我都好想見你呀⋯⋯不過你成日唔得閒之嘛⋯⋯」

「咁你可以照約我㗎嘛，可能我會得閒呢。」毛子蘭講。
「咁我就日日約你，約到你得閒為止！」我講。

呢個時候，我發現有三個人喺隔離望住我哋，呢三個人當然就係我嗰三個隊友啦。

「如果小蘭你想坐電單車嘅話，都可以約我㗎。」Sky笑笑口講。
「我哋可以夾少幾日畀返阿錘你㗎。」太一講。
「阿錘呢啲可有可無啦，小蘭你鍾意就拎去啦。」樂少講。

「喂！」我講。

毛子蘭慢慢笑返，終於抹乾晒眼淚。

「你夾Band要繼續畀心機呀！同埋唔準唔記得我。」毛子蘭講。
「都話唔會唔記得你咯，我又冇腦退化。」我講。
「咁我信你啦。」
「我應承咗你就一定會做到。」

未來嘅日子會係點呢？我哋「黑色西炒飯」會遇到啲咩事？我同毛子蘭嘅未來又會有咩困難呢？

我帶住呢啲疑問離開學校，但係我嘅樂隊之路唔會就咁完結，我同我隊「某校勁Band」嘅故事，一定會繼續落去。

（第一季結局.）