【搖滾準備】《我們的某校勁BAND》【重開】

17 - 黑色之火

「點算呀⋯⋯佢係咪聽到呀⋯⋯」樂少問。

「其實你講嘢都幾大聲，我諗應該聽到掛。」我答。

「咁唔好咩？」Sky問。

「吓⋯⋯你唔覺得好奇怪咩，我只係見咗佢一眼就鍾意咗佢，我嗰陣甚至連佢姓乜名乜都唔知。」樂少答。

「唔怪呀，因為你真係發自內心鍾意Emma吖嘛。而且戀愛從來都係莫名奇妙就發生㗎啦。」Sky講。

「Wow，完全估唔到你會咁講。」我講。

「我唔似呢啲角色咩？」Sky又笑笑口咁講。



「吖⋯⋯不如練嘢？」我為咗轉換氣氛，同埋我真係想練歌，所以咁講。

「咁我搵太一。」Sky講。

樂少唔小心講咗自己鍾意Emma嘅事出嚟，仲應該畀Emma聽到。究竟樂少會點樣面對Emma呢⋯⋯喺呢個充滿尷尬同混亂嘅情況吓，我哋就開始夾《自動勝利 Let's Fight》。

果然日文歌同廣東歌唔同，旋律嘅Phrasing同節拍都有差別，我固然係未唱到嗰種熱血啦，但係連Sky都未駕馭到段Solo，唔在狀態嘅樂少就更加唔使講，之不過流住日本血嘅太一好似就幾適合打呢首歌。總括而言，今日嘅練習成效真係不大。

「喂，今日做咩呀，上堂好攰？個個都冇激情嘅，夾Band要熱血同激情！畀啲火呀！」講緊嘢嘅係太一。

雖然太一個人有時係幾衝動，不過樂隊正正就係要呢種衝動，Band仔係應該要有火嘅！

----------------------------------------------

因為校長嘅關係，康慕會寧華中學今年多咗好多個學會，其中有一個新成立嘅學會－「占卜星相靈異與魔法學會」，係唯一一個要經過會長審查先可以加入嘅學會，所以全個學會都只係得三個人。佢哋每逢星期三放學都會喺學校擺檔幫人占卜，由於占卜受到大量低年級女學生歡迎，所以累積咗唔少忠實粉絲。

某一個星期三放學，太一就心血來潮走咗去占卜，佢問咗「黑色西炒飯」嘅未來。

「好黑好黑，我睇到嘅係充滿火焰嘅黑色。」講緊嘢嘅係占卜星相靈異與魔法學會會長4B班嘅田善悠。

「即係點呀？」太一問。

「火焰代表希望同時亦都係危機，不過黑色代表絕望同未知。黑色之火，我諗唔係好兆頭。」田善悠答。

「吓？！你識唔識㗎，因為我哋『黑色西炒飯』熱血咁燃燒緊，所以係黑色之火！」太一咁講。

「我只係依據我見到嘅嘢話畀你知，你信就信。」田善悠講。

「計我話，你根本就咩都睇唔到係亂噏嘅。」太一講。

「你點可以咁講會長㗎，全靠會長我先同到我男朋友復合咋。」一個中二嘅女同學咁講。

「會長話我上個禮拜有個小劫，我就真係唔見咗銀包呀。」一個中一嘅女同學咁講。

圍喺檔口嘅女同學一人一句鬧緊太一。太一反駁：「各位師妹呀，占卜呢啲偽科學唔可以盡信㗎，世上邊有人可以預測到未來嘅結果㗎！」

「我可以。」田善悠企起身。

「只要上天願意畀我睇，我就睇到。」田善悠繼續講。

太一皺一皺眉，然後指住樓梯問田善悠：「下一個落嚟嘅係咩人？」

田善悠合埋雙眼。

「男人，三個男人。」田善悠好肯定咁講。

太一即刻望向樓梯，結果落嚟嘅的確係三個男人，仲要係「黑色西炒飯」嘅三個團員。

----------------------------------------------

「喂太一，勁喎，咁多囡圍住。」樂少同太一講。

「估啱咗喎。」太一有啲驚訝咁同田善悠講。

「你哋就係『黑色西炒飯』？」田善悠同我哋講。

「係呀。」樂少答田善悠。

太一喺人圍中逃走，過嚟同我哋解釋緊點解咁多女同學圍住佢，而另一方面田善悠企咗起身好似通緊靈咁。

「喂佢搞咩呀？」太一問其中一個「占卜星相靈異與魔法學會」會員 - 周海琦Simmy。

「會長同宇宙連緊線。」

田善悠合埋雙眼，好似感受緊一啲嘢咁，突然之間佢擘大眼，有少少失平衡。

「我睇到喇。」田善悠有啲驚訝咁講。

「你睇到咩呀？」Simmy問田善悠。

「我嘅戀愛。『黑色西炒飯』入面有我嘅戀愛。」田善悠咁講。

「咁係邊個呀？」Simmy問。

「我唔知。」

「搞咩呀，呢擗『甜豉油』神神化化咁嘅。」太一咁講。

「甜豉油？」我問太一。

「佢叫『田善悠』吖嘛⋯⋯田善悠田善悠⋯咪『甜豉油』囉。」太一解釋。

「你哋一定要繼續一齊呀。」田善悠咁講。

「嗱，都話啦，依家轉軚喇。頭先我問你我哋嘅未來，你又話咩『黑色之火』。依家信我哋一定會夾Band夾到出人頭地啦！係咪想攞定簽名先呀？」太一問田善悠。

「唔係，但係你哋四個一定要一齊，我先會搵到我嘅戀愛。」田善悠講。

「噏咩呀？你嘅戀愛關我哋咩事呀？」太一問。

田善悠擺出咗個通靈嘅手勢：「宇宙嘅一切，都有佢命中註定嘅答案。」

田善悠講完就帶住占卜星相靈異與魔法學會嘅會員同Fans走咗。

「似係你命中註定喎。」樂少同太一講。

「痴線，呢啲偽科學邊到準㗎。」

「但係你幫人改哂花名咁喎。」

「嗰個都叫花名？」

「『甜．豉．油』喎。」樂少有啲調皮嘅語調。

「Sky都成日改人花名啦。」太一講。

「我係因為成日唔記得人哋個名先改㗎。到我記得就會叫返佢個名。」Sky講。

究竟甜豉油所見到嘅「黑色之火」係咩意思呢⋯⋯係希望定絕望，定係我哋嘅「黑色西炒飯」真係燃燒緊呢⋯⋯

（Tbc.）

18 - 陸運會Day 1

又嚟到一年一度嘅陸運會，對於平時唔係好鍾意運動嘅我嚟講，簡直就係地獄。又熱又濕嘅天氣，加上只係坐喺看台，真係好鬼悶。最慘係陸運會要分兩日，Day 1主要係初賽，得一兩場決賽，其他重點決賽都喺Day 2先鬥，所以Day 1最悶。

不過對於社嘅幹事嚟講呢，陸運會就係一年最重要嘅日子，因為陸運會拎嘅分數，大概會決定嗰年嘅校長盃係邊個社贏。

講少少陸運會嘅規則先啦，每個學生都要報最少一樣比賽。參賽就會有1分社分，相反唔參賽就會扣社1分，冠軍10分，亞軍9分，如此類推。

唔記得講，我哋學校分四社：康、慕、寧、華，分別係紅、藍、黃、綠，四色。我就係黃色嘅寧社、樂少係藍色嘅慕社，而且係副社長、太一就當然係熱血嘅紅色康社啦、Sky就係綠色嘅華社。

我嘅寧社，基本上每年都係包尾，最勁嘅係康社，啦啦隊已經贏咗幾年，加上有幾個全場總冠軍，所以每年都贏硬咁濟，而慕社同華社實力就差唔多。

我哋學校陸運會可以畀學生揀著PE衫定校服，只要比賽換返衫就冇問題。我呢個唔做運動嘅人就緊係著整齊嘅校服啦。

至於陸運會入面，我每年唯一會去嘅地方就係小食部。呢個地方係龍蛇混雜之地，所有唔去比賽又唔肯打氣嘅人都會走落嚟呢度，所以Prefect每年都會不停趕人走。但係今年我終於可以做小食部嘅揸fit人！你問點解？因為小食部係李sir睇，而我就可以話係李sir頭馬，再加上Prefect唔係身兼幾職就係要參賽，咁我就順理成章，做咗小食部嘅陳浩南，即係「小食部糾察隊隊長」，而「激情對話」就係我嘅「洪興社」。

果然今日都唔例外，一早已經排哂長龍買嘢食。
「大佬，隊尾有班Form 2想打尖。」Mango同我講。
「叫朱傑同魔人兇吓佢，Form 2 就想恰啲Form 1，要好好教吓先得！」我同Mango講。
「大佬，有Prefect辣更呀。」朱傑同我講。
「搞咩呀，班Prefect咁串？！小食部都敢搞？！」我有啲中二病咁講。

我帶住朱傑、Mango佢哋行去個Prefect面前。

「喂，你知唔知個場我睇㗎！」我扮哂陳浩南咁兇個Prefect。
「錘哥呀嘛，李sir交帶咗，識做嘅，我嚟買枝嘢飲啫。」個Prefect講。
「嗱，有前途呀𡃁仔。」我又扮哂大佬咁講。

估唔到呢個Prefect又幾識做，同毛子蘭完全唔同，如果係佢應該會話「咁唔啱㗎，你唔可以恰啲低Form㗎！」。

「我出去睇吓咩環境先。」
「係嘅大佬！」激情對話佢哋咁講。

「我哋係！『咚咚』 」
「康社！」
「我哋係！ 『咚咚』」
「康社！」
「大聲啲！ 『咚咚咚』」
「康社！！」
「再大聲啲！！！」
「康社！！！『咚咚咚咚」

Lead住康社啦啦隊嘅係太一，今日佢發揮鼓手嘅實力一路打鼓一路叫口號。

「慕社勁唔勁呀？勁呀勁呀勁呀！
慕社醒唔醒呀？醒呀醒呀醒呀！
慕社威唔威呀？威呀威呀威呀！
慕社！慕社！慕社！」

帶緊慕社嘅係我哋班班長呀輝，佢亦都係慕社嘅社長。

「Go Go Go Ahead！
Be Be be the Best！
Go Ahead！
be the Best！
Green House Green House is the Best！」

華社嘅啦啦隊今年多數用英文口號，唔知係咪想搏加分呢。


「寧社寧社，零舍唔同！稱霸全場！零舍強！
寧社寧社，零舍醒神！打氣最齊！零舍威！
寧社寧社，零舍齊心！上下一心！寧社一條心！」

毛子蘭帶住寧社嘅啦啦隊，好落力叫緊口號。原來毛子蘭都係社幹事，我都係依家先知。

我見到手忙腳亂嘅樂少，於是走埋去搵佢。

「喂樂少，去飲杯嘢吖，個場依家我哋睇呀。」
「唔得呀，我要捉人比賽呀！你個寧社嘅間諜快啲走。」
「豈有此理吖！枉我當你兄弟！」
「你唔使講喇，我哋做兄弟到此為止！」樂少扮緊《古惑仔》入面嘅山雞講。
「仆街啦！」我扮緊陳浩南，其實我哋年年陸運會都咁玩。

樂少作為副社長，其中一個職責係call齊人比賽，同搵定人跑Day 2嘅社際接力賽。
我就真係唔明，呢啲攞苦嚟辛嘅嘢做嚟做乜。

----------------------------------------------

Emma係華社嘅社員，亦都著咗華社件PE衫，今年都有幫手設計華社嘅吉祥物。對於第一年轉校過嚟嘅Emma，陸運會好新鮮，因為對佢嚟講所有同學都係新認識嘅朋友，而陸運會就正正可以睇到佢哋唔同嘅一面。

Emma見到喺看台瞓緊教嘅Sky，於是坐咗埋去Sky隔離。

「Sky，你報咗咩參賽呀？」坐喺華社看台嘅Emma問Sky。
「原來Emma你都係華社㗎。」
「係呀。」
「咁就可惜喇，唔係你最鍾意嘅藍色。」Sky笑笑口咁講。
「嗯。」Emma有少少扁嘴。「咁你報咗咩呀？」
Sky笑笑口，好得戚咁講：「跳高。」
「你好勁㗎？」
「唔好睇少我呀，我連續贏咗4年跳高冠軍。」Sky笑笑口豎起四隻手指咁答。
「咁勁？」
「因為每年都得3個人參賽，分別係為咗攞分嘅慕社社長呀輝，同唔想跑步嘅阿錘，但係阿錘年年都唔落場㗎。」Sky講。
「吓，原來阿錘係咁㗎。咁你都係贏呀輝之嘛。」Emma笑住咁講。
「阿錘係驚咗我先唔上場㗎。」Sky突然扮有型咁講。

「咁你呢，報咗咩呀？」Sky問Emma。
「我會跑4x100社際接力。」
「原來係咁呀。」
「我想去睇吓其他社呀。」
「我想坐多陣。」
「嗯。」

Emma之後就去咗其他社。

「天天。」有個女仔叫Sky。
「係琳琳呀？」Sky笑笑口咁講。
「都話叫我Rachel咯。」

兩個人有啲尷尬，安靜咗一陣。

「我彈返結他嗱。」Sky好平淡咁講。
「我知呀，劉星隨同咗我講啦。」
「吓，原來琳琳你同阿錘係朋友呀。」
「唔係吖，傾過兩句啫。同埋唔好叫我琳琳啦。」
「你叫我天天先嘅。」
「超～咁慣咗吖嘛。」
「我都係喎。」
「啱啱個女仔邊個嚟㗎？女朋友呀？」
「VA班嘅Emma。」
「所以係女朋友？」
「唔係呀。」
「佢可能鍾意你。」

Sky停咗一吓：「我覺得唔係。因為Emma佢⋯鍾意藍色。」

5B班嘅許琳，英文名Rachel。同Sky係小學同學，佢哋因為個名同樣係單字，所以做咗朋友，細細個就跟住Sky嘅姐姐一齊玩。後來Sky姐姐嘅死，令Sky放棄結他，佢就用盡唔同方法想幫好朋友走出陰影。

（Tbc.）

19 - 陸運會Day 1(2)

幾個社嘅競爭仲係非常激烈，寧社嘅啦啦隊，喺毛子蘭帶領之下，個個都用盡力嗌，但係始終聲勢都係康社比較大。由太一帶領嘅康社啦啦隊係最齊最有能量，加上太一不停打鼓，令到班中一啦啦隊都好投入。

「我哋人多多，我哋才多多！ 

我哋人多才多攞獎多！

我哋同一心，我哋齊一心！

我哋同心齊心攞第一！」

當太一一邊繼續聲嘶力竭嗌口號，一邊用力咁打緊鼓嘅時候，看台上有個中四嘅女生用望遠鏡望緊太一，呢個人就係「占卜星相靈異與魔法學會」嘅會長田善悠，亦即係太一口中嘅甜豉油。

「占卜星相靈異與魔法學會」嘅Simmy問緊甜豉油：「點呀會長，睇唔睇到呀？」

甜豉油搖搖頭：「睇嚟宇宙唔想話畀我知。」

「其他人又睇唔睇到呀？」

「我望吓先。」

「會唔會係靚仔啲嗰個Sky哥哥呀？」

「冇喎。」甜豉油望去華社。

「咁嗰個劉星隨同關志樂呢？」

「都係冇畫面呀。」

「不過呢個張太一打鼓嘅時候都幾Charm。」Simmy講。

「嗯。」甜豉油一面迷惘。

「但係始終都係Sky哥哥𡃁仔啲，成個明星咁。」Simmy講嘅時候出哂心心眼。

「緣份已經由宇宙安排好，𡃁唔𡃁仔都係睇你哋有冇眼緣。」

「咁會長你同邊個最有眼緣呀？」 

「我諗要等佢哋四個一齊先知。」甜豉油同Simmy講。

陸運會入面，總有啲人鍾意將唔同社嘅吉祥物都掛喺自己身上，你身上掛嘅嘢愈多就證明你愈多朋友。對於轉校過嚟冇耐嘅Emma，除咗自己有幫手設計嘅華社嘅吉祥物 - 綠色青蛙之外就冇其他嘢掛喺身。

呢個時候Emma咁啱遇到喺看台上面走嚟走去嘅樂少。

「Hi。」Emma先開口同樂少講嘢。

自從上次喺音樂室事件之後，樂少就冇見過Emma，所以樂少顯得有啲不知所措。樂少擔心緊究竟Emma聽唔聽到自己暗戀佢嘅事，如果佢知道咗Emma又會點睇佢。

「Hi⋯⋯」

「吖！呢隻貓好得意呀。」Emma注意到樂少掛住嘅慕社吉祥物。

「多謝⋯其實佢係獅子嚟。」

「吓。真係㗎。」Emma笑住講。

樂少除低咗自己隻藍色獅子。「畀你吖，如果你想要。」

「多謝。隻貓⋯⋯我係話隻獅子好得意。」Emma接咗隻獅子。

「冇計啦，我同呀輝嘅手作都好差。本身想整隻好威猛嘅獅子。」樂少好似有啲怕醜咁講。

「不過佢有種好醜但係好可愛嘅感覺，好似老虎狗咁。」

Emma之後就將隻貓掛咗喺自己身上。

「男子甲組1500米最後召集！」運動場廣播。

「吖！弊喇，我要比賽呀！」樂少同Emma講。

「1500米？！」

「係呀，A grade 今日得呢場決賽咋。」

「努力呀！」Emma同樂少講。

樂少點點頭就跑走咗。不過，樂少心裡面大概係覺得好開心，得到咗心上人嘅祝福，樂少又可唔可以贏到呢？

1500米嘅比賽今年改咗做一場過嘅決賽。因為今年「激情對話」發起咗個活動，想20幾人一齊參賽，好似話係要喺最後嗰圈揮住手繞場一周，接受大家嘅「歡呼聲」⋯⋯所以學校廢時嘥時間，決定一場過就算。劉星隨因為唔想跑，所以冇報到，樂少就諗住可以幫社爭多幾分而報咗。

佢哋一行人走到去起跑線準備，朱傑佢哋甚至諗定點樣同觀眾打招呼。至於樂少冇諗過嘅係，呃佢錢買Bass嘅狗明，竟然都有參賽。

「狗明？你又跑1500呀？」

「唔得咩？」

「你明明唔係跑開步喎。」

「攞多啲獎對我申請獎學金有幫助，無論係徵文比賽定跑步都一樣。反正你哋『激情對話』都係玩㗎啦，等我贏個金牌啦。」狗明串串貢咁講。

「吓？！我本身都諗住hea跑嘅，見到你就唔同喇，我要你申請唔到獎學金！」樂少嬲嬲地咁講。

樂少同狗明怒目而視，兩個人喺起跑線上面好有火藥味。

一開跑，狗明同樂少就衝出人群，兩個人都係認真全力跑，而「激情對話」已經同緊觀眾揮手。

啱啱跑完第一圈，樂少有少少減速，狗明大概帶出兩三個身位，一直維持到最後一圈。

觀眾對於分明玩嘢嘅「激情對話」當然係用噓聲回應啦，但係仍然有人係同努力跑嘅樂少狗明打氣。

去到最後200米，狗明終於開始慢咗，但係樂少好似已經冇哂力咁，睇得出想爆都爆唔到。

「加油呀！！」

樂少望一望觀眾席，Emma幫佢打緊氣。樂少嘅內心火熱咁燃燒，佢開始加速，一路狂追，由兩個身位追到一個身位，由一個身位追到半個身位，就喺最後10米，兩個人已經平排，樂少衝線前反超狗明，贏咗1500米冠軍。

「吖！！！」嗌到痴咗線嘅係劉星隨。

衝線之後嘅樂少即刻瞓低咗，佢攤喺地喘哂氣，聽住觀眾嘅歡呼聲。樂少大概冇諗過自己會爆到咁盡跑。

大概過咗10秒，樂少慢慢起返身，慢慢行去場邊接受大家嘅掌聲。

呢一刻，相信係樂少人生十六年最光最閃耀嘅一剎那。

「我贏咗⋯⋯」樂少仲未回哂氣咁同狗明講。

「你係咪痴線㗎，點解仲可以加速㗎。」

「因為有人同我打氣。」

「吖，激死！」

狗明死死地氣咁走返上看台，睇嚟樂少終於都算係幫自己報仇成功。

呢個時候，「激情對話」班人都成功繞場一周，佢哋衝埋樂少度將樂少拋起。

就係咁，喺一遍歡樂嘅氣氛之中，Day 1陸運會就完咗。

（Tbc.）

20 - 《Freaky Friday》

我同樂少又喺返學嘅路途上。


「喂，點呀冠軍，諗住點報答我先？」我同樂少講。

「我攞冠軍又關你咩事呢？」

「冇我成日陪你遲到，你點練到咁嘅爆發力呢。」我拍一拍佢隻腳。

「如果你再唔跑快啲呢，就遲到㗎喇。」

陸運會Day 1之後係星期五，仲要返多日先放假，我同樂少又約埋返學，點知今日我哋又差啲遲到，好好彩喺最後一刻入到學校，而今日又咁啱係毛子蘭當值。

「早晨。」毛子蘭同我講。

「早晨。」

自從講座之後我都冇見過毛子蘭，其實又唔可以咁講嘅，我有見到佢，不過唔知佢有冇見到我啫。

放學之後，我去咗電腦室。因為英文科有一份功課係寫影評，每個同學要寫嘅電影都唔同，樂少抽到嘅係《Iron Man》，Sky抽到嘅係《哈利波特3》，而我被指定嘅係一套叫《Freaky Friday》嘅迪士尼喜劇。如果我抽到《哈利波特》其中一集，我隨便都可以寫到幾百字，根本唔使嘥時間睇，但係呢套《Freaky Friday》我聽都未聽過，咁所以我就唯有借學校借碟睇，但係學校借碟就偏偏唔可以拎走，即係話我係被動地罰留堂。

我哋學校電腦室放學後係開放畀學生用嘅，但係因為咩網都Block哂，基本上得初中班𡃁仔會喺趕住做中文科網上練習嘅時候先會有人用。喺呢個時候，我竟然又撞到毛子蘭。

「你⋯喺度做咩呀？」

「我有啲嘢要print呀，陸運會啲打氣嘢。」

「哦⋯加⋯油。」因為唔知講咩好，我講得有啲吞吐。

「咁你呢？」

「睇戲，要做影評。」

「哦～」

我將隻DVD放入電腦，再駁埋耳機，正式開始睇呢套《Freaky Friday》。雖然我對呢套戲冇咩期望，不過佢封面有枝Fender Telesonic，個配色仲同我枝結他一樣，可能我會鍾意睇嘅。

「吓？」「wow！」「唉！」「唔係呀嘛？！」

我發出咗好多反應聲，因為我係個睇戲會係咁講嘢嘅人。

呢套戲講一對母女，媽媽係心理學家，個女就係鍾意彈結他嘅高中生。媽媽老公死咗好耐，而佢都遇到個成熟穩重嘅新男朋友，終於決定要結婚；個女同隊Band就為咗夾Band嘅夢想努力緊；佢哋兩個都唔理解對方，所以發生咗好多衝突。有一日，佢哋去一間中餐館食飯，之後就因為一塊Fortune Cookie交換咗靈魂。

「唔係掛？！」毛子蘭突然出聲。

我除低耳機，望住毛子蘭，發現原來佢都睇緊我個Mon。

「你睇唔睇？」我遞咗一邊耳機畀佢咁問。

毛子蘭有少少遲疑，跟住就接咗我隻耳機，然後我哋就一齊睇《Freaky Friday》。

「兩母女交換靈魂，好似喺邊度睇過呢個劇情。」我講。

「《我們這一家》。」毛子蘭講。

「係喎，花師奶同花帶柑。哈哈，好睇呀。」

「係呀，花師奶超搞笑。」

我哋繼續睇落去，劇情講到兩母女調轉咗身份之後，終於互相理解對方。不過媽媽要用個女嘅身份出席一場Band嘅試奏會，但係媽媽就完全唔識彈結他，所以變成個女喺後台彈，而媽媽就喺台上面假彈，雖然畫面上係好溫馨而且好睇，但係我就覺得⋯⋯

「嘩，會唔會扮得太假。」我講。

「咩呀？」毛子蘭問。

「你睇吓吖，Solo緊連手指都唔郁，如果係真嘅一早畀人話假彈啦。」

「唔緊要啦。」

「夾Band點可以假彈㗎，夠真先Rock㗎嘛！」我用一個Band仔嘅語氣講。

「哈哈，係喎你隊Band叫『黑色西炒飯』。」

「你又知嘅！？」完全估唔到毛子蘭都知「黑色西炒飯」嘅存在。

「小悠同我講㗎。」毛子蘭答我。

「小悠？哦！甜豉油！係喎，你哋同班喎。」

「甜豉油？」毛子蘭有啲驚訝。

「田善悠田善悠，就係甜豉油。我哋嘅鼓手太一改㗎。」

「哈哈，幾得意吖，甜豉油。」


「毛子蘭毛子蘭毛子蘭毛子蘭毛子蘭⋯⋯冇喎。」

「做咩呀你？」

「睇吓你個名有冇啲好笑嘅諧音囉。」

毛子蘭忍唔住笑咗出嚟：「明明喺我識嘅人入面，你個名就係最好笑。流星錘。」

「係呀係呀，如果有一日你畀人用『流星錘』襲擊，千祈唔好搵我呀。」我有啲自嘲咁講。

「點解你父母會改呢個名嘅？」

「我都唔知喎。好似話順口喎。」

「嗯～我爸爸係做私家偵探㗎。」

「私家偵探？」

「有一日，佢睇咗本漫畫⋯⋯」

「《柯南》？！」我打斷毛子蘭。

「係呀。」

「哦！毛利蘭！毛子蘭！哈哈哈哈哈！」我笑到停唔到。

毛子蘭好大力打我手臂。「痛呀！」

原來毛子蘭冇啦啦提佢爸爸做私家偵探，係想講佢個名嘅原因。

「你爸爸好有趣喎，小蘭。」

「我識空手道㗎。」

「吓，真㗎？」

「講笑。」

「好彩啫。」

好彩毛子蘭唔識空手道，如果唔係就真係小蘭咁。

「點解你哋會夾Band嘅？」

「因為⋯⋯型掛。」

「吓⋯⋯就係咁咋，我仲以為會熱血啲添？」

「喺我中一嗰年我睇咗場表演，我就鍾意咗音樂，鍾意咗搖滾樂。最初我只係想好似嗰個人咁，好型咁喺個台度表演，但係依家呢⋯⋯」

「依家點呀？」

「夾Band嘅時候好開心，而且我覺得我天生⋯⋯做係要做呢樣嘢。」我其實都冇認真諗過呢個問題，我只係將我嘅感覺講出嚟。

「即係點呀？」

「Umm⋯⋯好似係我人生唯一想做嘅嘢咁。我會為咗夾Band聽好多歌，睇好多音樂書，而且用歌將自己嘅感覺表達出嚟，好似都幾啱我⋯⋯」

「不過真係好難答你個問題，如果鍾意一樣嘢，就自然會做落去，會一世都想做，而且可以咩原因都冇，我覺得係咁。」

「都係嘅。」毛子蘭好似認同我咁講。

「吖，呢段好感人呀。」我同毛子蘭講。

「嗯，不過都係《我們這一家》好睇啲。」

「你真係好鍾意《我們這一家》喎。」

「係呀。」

結果我哋就一齊睇完咗《Freaky Friday》，而我亦都知多咗好多毛子蘭嘅事。

（Tbc.）

21 - 陸運會Day 2

陸運會Day 2

嚟到Day 2嘅陸運會，因為係決賽日嘅關係，大家嘅焦點都多咗放喺比賽上。不過作為小食部揸fit人，我就當然喺小食部啦。

「男子甲組跳高最後召集。」運動場廣播。

「大佬，今年又唔去呀？」Mango同我講。

「唔好玩啦。我小學畢業之後都未跳過高喇。」

「咁你又報？」

「學校每年都要我哋報一樣玩吖嘛，我咪求其報囉。」

「阿錘你，去唔去呀？」準備去衞冕冠軍嘅Sky落嚟小食部搵我。

「唔去啦。」

「阿錘你，係咪驚輸畀我呀。」Sky有啲挑釁咁問。

「吓？我點會驚呀。」

「咁鬥過啦。」Sky又笑笑口咁講。

其實我真係5年冇跳過高，所以輸畀Sky真係唔出奇，不過Sky好似好想同我鬥一次，咁我就「一於奉陪」啦。

我雖然唔諗住落場比賽，但係我都係有帶衫嚟。

就係咁，我同Sky就準備去比賽。

「Sky，你做咩好似好想同我鬥咁嘅？」

「吓，阿錘你真係唔記得咗呀。」

「咩呀，我完全冇印象喎⋯⋯」

「中三嗰陣呢⋯⋯」

-----------------------------------

呢件事係發生喺劉星隨同Sky中三嘅時候。

中三陸運會當日嘅Sky，喺更衣室換緊衫，但係呢個時候，佢先發現原來自己唔記得帶鞋。

「唉呀！弊喇，原來我冇帶鞋。」中三嘅Sky咁講。

「你冇帶鞋呀？我借畀你吖。」中三嘅劉星隨咁講。

「你唔使比賽咩？」

「我本身都冇諗住參賽，既然你想比賽，咁就借畀你啦。」

「你好渣㗎？」

「我小學係冠軍嚟緊㗎，不過上兩年都冇參加。如果我參加，你實輸畀我。」

「多謝，你叫咩名呀？」

「我叫劉星隨。」

「係阿錘呀，咁我哋係朋友喇。」

-----------------------------------

「嘩，我完全唔記得咗呀。」

「咁冇記性㗎。」

「我記性係差啲。」

「今日鬥過啦！」

「好吖，放馬過嚟。」唔知點解有啲睇緊少年漫畫嘅感覺。

我哋學校跳高自創校以嚟都冇出過咩勁人，所以最高紀錄都只不過係1.66米，Sky的最高成績係1.6米，而我⋯⋯已經唔記得咗我小學跳咩成績。

負責紀錄跳高成績嘅係Miss Lui，因為得3個人參賽嘅關係，Miss Lui都好似好隨意，隨便問我哋想幾高開始跳。

「1.35米。」呀輝講。

「好呀。」Sky答。

「好⋯⋯」唔知咩情況嘅我唯有話好

呀輝同Sky都輕鬆跳過1.35米，呀輝用嘅係剪式，Sky用嘅係背越式。Sky喺跳完之後就坐咗喺Miss Lui隔離，呀輝就不停去同著慕社PE衫嘅人打氣。

輪到我跳，因為真係唔記得晒點跳，我用咗一個比較怪嘅方式跳，結果試咗咗兩次都失敗。

跳高比賽只要連續3次失敗就會出局，即係話呢次係我最後一次機會。雖然話就話輸咗都有第三，但係我唔想冇紀錄就出局，所以我好想起碼可以跳過第一輪。

參考咗Sky同呀輝嘅跳法，我決定調整我嘅步姿，再試一次。

「阿錘，後兩步起跳啦。」呀輝突然講。

「你助跑太少，好難跳得高。」呀輝補充。

「係喎，你都係好後開始跑。」我答。

呀輝係班長，又係慕社社長。絕對係一個好識做人嘅世界仔，話佢世界仔並冇任何惡意，因為佢真係好識撈，冇人討厭佢，又識得討好每個人，處事好圓滑，而且班長呢啲豬頭骨都肯頂，真係算係咁。

我行後兩步助跑，起跳前兩步加速，將力集中喺小腿，用力向上跳。

「吖！」跳過咗，我跳過咗！！

我完美咁跳起，不過我都係用趴嘅方法碌過去。

我突然發現到一樣嘢，我好似識用力發高音，因為我跳過之後都叫得幾高音。

「喂Sky，我好似諗到點唱《自動勝利》。」我輕奮咁講。

「咁就好喇。」Sky笑笑口咁講。

跟據賽例，之後每次會升高3cm，直到1.5米後就係每次升2cm。Sky同輝都選擇直接跳過1.38米，試跳1.41米。但係我喺1.38米就失敗咗，亦都結束咗我第一次嘅中學跳高之旅。

最後Sky同呀輝竟然可以鬥到追平學校嘅最佳成績，鬥到1.66米，不過第一次跳都失敗咗。

呀輝嘅第二跳都失敗咗，雖然只係差少少，但右腳最後都掂到橫杆。

依家輪到Sky嘅第二跳，Sky起步嘅動作好似大過平時，加速嘅位置比平時遲，起跳之後完全唔高，最後同枝杆一齊瞓低。

跟住就係呀輝嘅第三跳，如果跳唔過，呀輝嘅最終成績就會係1.64米，但係因為之前Sky失手次數多過佢，所以據賽制呀輝就會係冠軍。呀輝最後都跳唔過，可能因為知道自己領先緊，呀輝都冇太大嘅失望。

田徑運動係最純粹嘅體能對決，有一啲牆跳唔過就跳唔過，Sky又可唔可以突破呢個難關呢？

Sky跳之前神色有啲凝重，因為呢一跳只要過到，佢就會成為5連霸，但係相反失敗嘅話，就只可以拎第二。

「司徒天，好緊張呀？冇嘢㗎，全力去做就得㗎喇。」Miss Lui喺Sky跳之前同佢講咗兩句。

Sky聽到之後，好似有啲呆滯。

「嗯，好呀。」Sky呆完之後，又笑返。

「Miss Lui，我想跳1.68米。」Sky講。

「但係你跳到1.66米就可以贏喇喎。」

「我知，不過我都係想試下。」Sky雙眼好似有團火咁。

喺最後一跳之前，Sky竟然嘗試更高嘅1.68米，如果佢成功就會破學校紀錄，但係失敗嘅話就即刻輸畀呀輝。

「加油呀。」Miss Lui最後同Sky講。

Sky慢慢行後，然後深呼吸，輕輕咁跳一跳，再好似平時咁，跳起前兩步加速，用力一跳。

跳過咗，當上半身過咗橫杆嘅時候，Sky用全力幾提起雙腳，巧妙咁跨過咗橫杆。

「嘩！！！！」我同呀輝都嗌到痴咗線。Miss Lui就露出一個喜悅嘅笑容。

Sky個樣都有啲難以置信，而華社嘅啦啦隊畀出咗最大嘅歡呼聲，因為破紀錄係可以再加多一分社分。

「恭喜哂。」呀輝同Sky講。

雖然呀輝輸咗，但係都好戥Sky開心。

就係咁，我哋三個就行咗上頒獎堂，我亦都獲得我中學生涯第一塊獎牌。

（Tbc.）

22 - 黑色西炒飯打吡

陸運會嘅比賽進行到如火如荼，下晝比賽嘅重點係A grade嘅幾場接力賽同教職員接力賽，所有同學都會不分陣營幫啲老師打氣。

呢啲教職員賽對一班老師嚟講，其實係一件苦差，因為年紀問題，好多老師都唔會點做運動，所以一定係推班後生老師出嚟比賽。作為新入職嘅Miss Lui當然係有份參賽啦，不過據我了解Miss Lui本身都做開運動，應該又難唔到佢嘅。反而係曹sir呢個大叔，竟然參加咗今年嘅接力賽，我諗都係同Miss Lui有關啦。

另外有參加嘅係我哋班主任文sir，佢每年都會參加接力賽，可惜就每年都輸。不過就算一直屢戰屢敗，佢都係屢敗屢戰，作為佢學生，我係好欣賞佢嘅。所以我同Sky仲有呀輝就留低咗幫班主任打氣。

「Miss Lui，加油呀，我哋一齊贏！」曹sir同Mis Lui講。
「曹sir你得唔得㗎？你好似好耐冇參賽喎。」
「Miss Lui你有所不知喇，我係2000年教職員接力賽冠軍。」
「哦。」Miss Lui應酬式嘅點頭。

今年一共有8隊參賽，每隊2男2女，大熱門係PE科主任洪sir嗰隊，佢哋有做開瑜珈嘅Miss Au同兩位後生嘅男女TA。次熱門係文sir嗰隊，有佢老死教Physics嘅梁sir，同埋跑開馬拉松嘅外籍老師Miss Green同教音樂嘅Miss Fong。至於Miss Lui嗰隊就有曹sir，女籃教練Miss Yim同我大佬李sir。

一開跑，曹sir就落後其他組至少三個身位，至於洪sir同文sir兩隊就明顯帶出。去到最後一棒，洪sir同文sir基本上係同時開跑，兩個人勢均力敵，最後兩個人幾乎係同時衝線，所以要靠睇Play Back先知道邊個會贏。

結果係⋯⋯

文sir贏咗！

「嘩！！！」我同呀輝又嗌到痴晒線。

跑咗咁多年文sir終於都贏咗，連我呢個同文sir唔熟嘅學生都特登走過去攬下文sir。

不過Sky就唔見咗人，於是我周圍望，但係我唔係搵Sky，我係搵Miss Lui，果然Sky又係痴住Miss Lui。

Miss Lui嗰隊最後第四，雖然曹sir拖慢晒，但係Miss Yim同Miss Lui就追咗唔少，我大佬原來都唔算慢，本身仲以為佢呢啲文學人運動會好差。

差唔多去到尾聲，最後係社際嘅接力賽。

所有嘅社幹事都落晒運動場打氣，咁我都決定留低趁熱鬧。

太一同樂少分別都有代表康社同慕社，而Sky亦都因為掛住塊金牌嘅關係被邀請代表華社參賽。我就心諗，咁又幾好睇喎，簡直係「黑色西炒飯」打吡。

至於我哋寧社，好似有啲小問題。我見到我哋社長，A班嘅呀龍好似扭親腳。呀龍係我哋社最跑得嗰個，亦都係接力隊嘅主力，如果真係傷咗，恐怕都應該可以打定輸數。

呢個時候毛子蘭就望住我，我心知不妙，所以我嘗試迴避佢嘅眼神。

「劉星隨。你可唔可以幫手跑，社長扭親呀。」毛子蘭都係走咗過嚟同我講。
「Err⋯⋯唔好啦，我跑得有啲慢。」
「咁算啦。」毛子蘭好似有啲失落咁走咗去。

我見到毛子蘭周圍搵人，好似仲見好努力搵人參賽咁，不過寧社嘅人好似都唔多願意。呢個時候，我見毛子蘭換咗PE衫走出嚟。

「你搞咩呀？」我問毛子蘭。
「我⋯⋯準備跑步。」
「吓，你仲係B Grade喎，同埋你參加埋咪3個女仔，咁好蝕底喎。」
「都冇辦法啦，冇人參加。如果唔參加就會連一分都冇。」

唔知點解，望住毛子蘭個樣，我有啲過意唔去，於是我又做咗啲冇經過思考就做嘅事。

「我跑啦。」我個樣有啲唔情願。
「真係？你唔係唔想跑咩。」
「我⋯係呀，不過反正有跑就得啦，係咪？」
「係呀。」
「講明先呀，我真係跑得好慢，所以⋯⋯可能包尾㗎⋯⋯」我有啲打定輸數咁講。
「唔緊要呀，你參加就得喇。」毛子蘭咁講。

結果社際接力賽就變咗真正嘅「黑色西炒飯」打吡。

樂少呢個1500米冠軍就毫無懸念咁被安排跑第四棒，太一就係自薦跑第四棒，而Sky就因為表示唔識起跑同唔擅長跑彎路而跑第四跑。我諗而我嘅能力跑第二棒或者第三會好啲嘅，始終我又唔識起跑，而第四棒又唔好似太大壓力。

「阿錘，你跑第四棒。」呀龍咁同我講。
「點解呀？」
「我哋依家得一個方法贏，就係一開頭爆盡，希望頭三棒可以帶出，咁你就可以衝快啲。」
「哦。」其實我個心有啲淆底，不過我都要扮到好鎮定。

我見到呀龍對眼係有火㗎，如果佢可以落場跑，我相信佢會贏到。唔只呀龍，我另外兩個隊友都好想贏咁，呢啲係咪就係運動員嘅精神呢？但係我從來到冇呢種運動員嘅精神，唯有盡力啦。

我慢慢行去接棒區，感覺到自己嘅心跳開始快。

「畀心機。」毛子蘭就跑過嚟同我講，之後就跑走咗。

第四棒嘅接棒區係最近觀眾嘅一棒，估唔到「黑色西炒飯」第一次畀人注視竟然係喺運動場。

「阿錘，你喺度做咩呀？」樂少問我。
「跑接力囉。」
「搞我笑咩，你除咗驚遲到跑返學校之外唔會跑㗎喎。」
「你理得我吖。」

其實我都唔知我喺度做咩，運動場係唔屬於我嘅世界，不過⋯⋯唔理喇！

「阿錘你，今日要輸畀我Twice。」Sky舉起兩隻手指，扮晒須藤京一咁講。
「超～」都冇辦啦，我真係冇跑開。
「係喎太一，你又喺度做咩㗎？」我問太一。
「我做啦啦隊嗰陣，見到跑接力好似好熱血，就想嚟玩吓喇。」太一咁講。

其實都幾似太一嘅性格，佢最鍾意呢啲熱血嘢。

康社有太一同足球隊嘅沙維，女仔就有B班嘅Sophie同跑步好手嘅Joyce：慕社男仔就有100米冠軍良仔同1500米冠軍樂少，女仔係我哋班嘅鍾文同Carol；華社有Sky同A班嘅跨欄冠軍歐陽，女仔就有Emma同我哋班嘅Zoey；寧社男仔就有我同副社嘅拓爺，女仔就係C班嘅咩咩同Harley。

論平均實力應該係慕社最強，華社都唔慢，康社有Joyce同沙維應該都勁，我哋冇咗社長呀龍，真係好難鬥。

慕社同華社由兩個男仔跑先，所以一開始就帶出，但係我哋社喺第二棒竟然追返好多，因為佢哋交棒超級順。

去到第三棒前，暫時係華社帶出，慕社第二，我哋同康社差唔多。

華社第三棒由Emma接棒，但係Emma竟然接失咗，就係咁佢哋慢咗好多，已經畀其他人過咗頭；慕社跑嘅係鍾文，鍾文雖然細粒，但原來都好快；康社就由沙維跑，沙維雖然叫「沙維」，但係原來打翼鋒，所以速度好快，一瞬間就追返好多；我哋就係拓爺負責第三棒，不過拓爺嘅速度係另一個層次，而家應該叫佢拓海先啱，拓爺甚至反超咗其他人，佢係第一個交棒畀我。

我留意到樂少喺第四棒望住嘅係Emma，唔係鍾文，所以佢接棒好似冇準備過咁，非常唔順。另一方邊，Emma交畀Sky都好似有啲唔順，可能畀之前影響咗。太一同沙維都冇咩默契，太一太早起步，但未接到棒就想加速，結果一剎那之間反而慢咗。

我竟然係第四棒第一個接到棒，呢個時候佢哋好似仲卡住喺接棒區，我咩都冇諗，一直衝。

我前面除咗終點之外，咩都冇，我諗我大概帶出咗一個半身位。不過佢哋三個接到棒之後不斷加速，一路狂追住我。

但係我唔想輸，我見到終點等緊我嘅係毛子蘭同寧社嘅同學。最後兩步，我只係領先一個鞋位，佢哋三個嘅時速肯定快過我，所以我率先壓線⋯⋯

最後一步，我成個人魚躍式向前仆。結果我跌低咗⋯⋯

我好似已經過咗終點，我望吓地吓，我的確係過咗線。不過呢一刻，都係冇人知邊個第一，我唯一知嘅係我膝頭損晒。

（Tbc.）

23 - 全場總冠軍

「我宣布啦啦隊冠軍係康社！」校長喺運動場宣布。

太一好開心，同佢班啦啦隊興奮尖叫。相反毛子蘭同我哋寧社嘅啦啦隊就好失望，不過都正常嘅，咁努力都係輸咗。不過人生就係咁㗎啦，好努力做一樣嘢，唔等於就會成功⋯⋯

「多謝咁多位同學呢兩日咁努力比賽，創造咗好多精彩場面，當中嘅熱血同悲傷，將會係你哋未來珍貴嘅回憶⋯⋯」

「我宣布今年陸運會嘅全場總冠軍係⋯⋯」

「寧社！」

「吖！！！」寧社上下都嗌到把聲拆哂。

寧社今年喺C grade贏哂男女子嘅全場總冠軍，可能呢到拉多咗好多分啦。

不過我諗最關鍵嘅賽事，都係靠我犧牲膝頭換返嚟嘅4x100社際接力賽金牌。

----------------------------------------------

「吖，好痛呀！」第一個扶起我嘅係我老友樂少。

「有冇事呀？搏哂命咁喎。」

我起返身：「我當我平時趕返學咁咋。」

「呢個係咪我識嘅阿錘嚟？」太一講。

「阿錘你竟然插水壓線，真係估你唔到。」Sky講。

「其實我都係試吓，點知仆到咁。」

「第一名係寧社，第二名係慕社，第三名係康社。」裁判宣布。

「Yes！」寧社所有人一齊尖叫！

我嘅隊友同社幹事開心咁走咪嚟，唯獨有一個人唔見咗，我周圍望都唔見毛子蘭。

「做得好呀，阿錘！」呀龍好開心咁同我講。
「係拓爺勁啫，應該叫你拓海啦而家。仲有咩咩同Harley，第一二棒交得超順。」我講。
「今年係我哋社歷史上第一次贏A Grade接力咋。」社幹佢哋話。
「吓，原來咁勁呀！」我講。

突然間我隻腳好似畀人貼咗啲嘢。

「吖！！！你做咩呀？」
「貼膠布呀。」

幫我貼膠布嘅係毛子蘭，原來佢唔見咗，係去搵膠布。

「唔該。」
「又話包尾。」毛子蘭有啲調皮咁講。
「我啲隊友勁吖嘛。我一個人嘅話一定做唔到。」
「不過呢，我諗你依家要早啲起身。」毛子蘭咁同我講。

「吓？」
「你咁樣下次點跑返學校呀。」
「不如你考慮吓偷偷哋放我入學校咪得囉。」
「唔得喎。」毛子蘭微微笑住咁講。

----------------------------------------------

看台上面「占卜星相靈異與魔法學會」嘅兩個成員又用望員鏡，望緊「黑色西炒飯」幾個人。

「點呀，會長？」Simmy問。
「係⋯⋯戀愛嘅顏色。」甜豉油講。
「咁究竟係邊個呀？」
「我都冇頭緒，宇宙未肯話我知⋯⋯」


「太一，下次不如你參加足球隊吖。」沙維問太一。
「足球隊呀，都好喎，但係我想守龍喎。」太一答。
「好呀。我哋隊不嬲都冇龍㗎。」

沙維好似想邀請太一加入足球隊，寧華嘅足球隊一直都係得沙維自己一個，所以佢每次比賽都要不停湊人數踢波。

最後包尾嘅華社係成個場最失落嘅一個社，Emma好似有啲自責。

「對唔住，都係我跣手。」Emma咁講。
「唔關你事啦。」歐陽咁講。
「揸棒都揸唔實，唔係你我哋點會慢咗咁多。」Zoey好嬲咁講。
「都唔係淨係Emma問題吖，如果你交好啲就唔會跣。」Sky咁講。
「其實跌棒好多時都發生嘅。大家唔使捉戰犯喎。」歐陽咁講。
「妖。」Zoey走咗。

Emma再向Sky同歐陽道歉。

Sky之後輕輕咁摸吓Emma個頭，掃一掃佢嘅頭髮，然後帶住溫柔嘅笑容同Emma講。

「如果我最尾早過阿錘壓線，可能係我哋贏呢，唔關你事呀。」

Emma好似有啲面紅，雖然只係摸吓頭，但係「剎那間身體的觸碰大件事」，Emma呢一刻嘅心就跳得好快⋯⋯好快⋯⋯

一直偷偷望住Emma嘅樂少見到呢一幕，個心突然好似碎咗咁，係心痛到碎嘅感覺。呢一刻，喺樂少眼中Sky同Emma就好似一對小情侶咁，而佢就係見證呢段愛情嘅電燈膽⋯⋯

----------------------------------------------

「我哋依家請寧社嘅代表上台攞獎。」校長咁講。

寧社嘅一班社幹事，高高興興準備上台攞獎，社長呀龍雖然傷咗，但係都係拎住枝社旗跑上台。

「行啦，劉星隨。」毛子蘭咁講。

「我都可以上去？」

「你幫我哋贏咗兩塊牌喎。」

「又係喎。」

作為討厭陸運會嘅人，我竟然有份上台拎全場總冠軍⋯⋯呢啲都係全靠大家嘅努力咋。

----------------------------------------------

陸運會結束後又開始返沉悶嘅校園生活。諗返今年嘅陸運會對我嚟講除咗兩塊獎牌，最大嘅收穫就係嗌高音嘅方法！但係另一邊，我老友樂少好似就悶悶不樂咁。

「樂少，我依家學識咗唱高音嘅方法喇。」

「哦，係咩。」

「搞咩呀你，咁冇精神嘅？」

「唉⋯⋯依家咩都唔想做⋯⋯」

「講嚟聽吓。」

樂少冇答我，只係輕輕咁嘆氣。我都唔知佢發生咩事，不過青春期嘅男仔，唔係愁女人，我都諗唔到係愁咩。

「Emma呀？」

「咩呀。」

「唉⋯⋯你明明唔明心碎係咩感覺⋯⋯」樂少好似真係好sad咁講。

「搞咩嚟呀？」

「算啦。」樂少欲言又止咁。

樂少就係咁一路悶悶不樂直到去班主任堂。

「劉星隨。Miss Fong叫你小息搵佢。」文sir喺班主任堂咁同我講。

「哦。」

因為完全唔知咩事，所以我即刻就去咗搵Miss Fong。

「劉星隨，學校下個禮拜會搞開放日，校長想搵同學表演，其中一個session想搵學生夾Band，你有冇興趣呀？」Miss Fong講。

「有呀！」我即刻就答應。

「不過，我都要問吓我啲隊友先。」

「咁你放學話畀我知啦。」

「係。」我塊面應該係笑緊，因為我好努力控制自己嘅表情，嘗試維持冷靜。

聽到有得出Show，我真係好開心，雖然都只係開放日嘅小小表演，不過呢次係我哋第一次嘅表演機會。

Lunch嘅時候，我將呢個消息話畀佢哋聽。

「喂，大家我哋有Show出喇！學校想我哋開放日表演呀。」我興奮咁講。

「Yes！我哋今次要紅喇！」太一講。

「我都好期待呀。」Sky講。

「我依家唔想夾Band呀。」樂少繼續悶悶不樂咁講。

「吓？」我講。

「搞咩呀樂少？」太一講。

「我依家真係冇心情呀。」樂少講。

「頂你呀！冇Bass我哋點夾呀。」太一講。

「Bass手呢啲可有可無啦。我依家真係唔想夾Band喇。」樂少講。

樂少自己一個人行開咗，我哋三個互相望住大家，冇人知道應該點做好。

（Tbc.）

ikea用「搖滾準備」俾人質疑開性侵案玩笑
https://lih.kg/3886897
- 分享自 LIHKG 討論區

樓主因住啊

完全唔知原來有段故😂
不過吉野家單案好似唔係講「搖滾準備」
Fact Check唔到

利伸：我絕對係用準備搖滾嘅心態起呢個標題，從來唔想令任何人受傷

24 - 摸頭殺

「咁唔出show呀？」太一問。

「照同Miss Fong講先啦，樂少佢一定會返嚟嘅。」Sky有信心咁講。

雖然唔知Sky做咩咁有信心，但係我諗佢一定有啲諗法嘅。

我放學就同咗Miss Fong講。我哋有一首歌嘅表演時間，會喺開放日最後安排喺禮堂表演，器材方面就可以用學校啲鼓同Amp。不過如果到時冇人彈Bass又可以點呢⋯⋯樂少又會唔會以後都唔夾Band呢⋯⋯

我哋一齊去咗SU房搵樂少，見到佢又悶悶不樂咁坐喺SU房部電腦前面⋯⋯

呢個時候，Sky行咗過去，佢摸吓樂少個頭：「樂少你，因為咩事唔開心呀？」

我有啲詫異，同太一就擘大對眼，樂少個樣更加係難以置信。

「唔好摸我個頭啦。搞咩呀你！」樂少問Sky。

「因為樂少你唔係唔開心咩？安慰人嘅時候好似咁摸吓人哋個頭，對方就會開心返㗎喇。」Sky笑笑口解釋。

「如果對方係你女朋友就可以嘅，但係失驚無神出『摸頭殺』，咁樣係好曖昧嘅動作嚟㗎！」樂少有啲䒐䒏咁解釋。

「係咁㗎咩？以前我家姐都係咁安慰我。」Sky一副天真無邪嘅樣咁答。

「你家姐？」樂少問。

「吖係呀，咁耐都冇話畀你同太一知添，我家姐兩年前就因為一場車禍死咗。」Sky突然講起呢件事。

「Sorry呀。」因為我冇同樂少提過，所以佢完全唔知。

「冇事喎。」Sky笑笑口咁講。

估唔到Sky已經可以將家姐嘅死講畀人知，明明早排佢仲係唔想聽到我提起⋯⋯我諗，佢真係放低咗呢件事喇。

「咁唔通⋯⋯你嗰日只係想安慰Emma？」樂少問。

「你講陸運會嗰日？係呀。」Sky笑笑口咁答。

「原來係咁呀！咁我明喇。」樂少把聲開始有返精神。

「喂，Sky呀，你記住以後唔好無啦啦摸女仔個頭，特別係Emma呀。」呢把係樂少平時嘅聲。

「真係唔可以呀？因為Emma啲頭髮好滑，所以摸起上嚟幾舒服，真係可惜呀。」Sky嘅語氣有啲調皮。

「你個死仔吖！」樂少好似想打鑊Sky咁。

「講笑咋。」Sky笑笑口咁講。

結果一日之內，樂少就正式歸隊。我哋亦都好即興咁去咗音樂室夾Band，本身Miss Fong就話要早啲收工，所以唔借音樂室畀我哋，但係話哂校長落Order，佢都係借咗鎖匙畀我哋，只要搵個老師擺返條鎖匙喺佢位就冇問題。

「～遇怪魔⋯⋯sorry，我入早咗。成日唔記得咗廣東話版份詞係填少咗粒音。」我入慢咗。

「乜係咩？」樂少問。

「係呀，日文版係『無限大な夢のあとの』個『限』係重拍，廣東話就一入重拍就係『遇』。」

「又好似係喎。」

「雖然入慢咗，但係阿錘你嘅高音好咗。」Sky講。

「係我盡力跳高嘅成果。」我舉起咗個V手勢。

「～遇怪魔我即刻變大個，遇見高手痛快得多～」

「大家覺得點呀？」我問。

「好似幾好吖。」太一講。

「我覺得最後段副歌不如唔好Repeat多次。」樂少講。

「都係嘅，依家有啲累贅。」Sky講。

日文版最後段副歌有repeat多次，但係日文版Repeat嘅歌詞唔同，所以聽起上嚟就冇咁拖。廣東話就本身就冇Repeat，完得比較乾淨。

「但係我想Keep段Repeat，冇咗硬係覺得差啲嘢咁。」我講。

「我都覺得係呀，如果有多段玩最後嗰段就會好正。」太一。

「一係我哋寫過份歌詞？咁最後段Repeat就會唔同哂。」樂少講。

「再加多段詞又唔係咁好，話哂首歌都咁多年。」我講。

「我都唔想加一段我哋作嘅歌詞，一係最尾嗰段轉少少嘢？」Sky講。

「咁轉咩呀？」太一問。

「未諗到。」Sky答。

「嗯，不如練多次前面先啦。」

「～逐個反擊對方一個二個，我但求全擊破 ，Oh Let's Fight～」

「阿錘你唱嘅時候係諗緊咩㗎？」Sky問我。

「冇諗嘢呀，我只係一路數拍子，同埋控制自己把聲咋。」我答。

「原來係咁呀。」

「有咩事呀。」

「我覺得阿錘你今日冇feel，雖然高音冇問題，但係就冇咗嗰種熱血嘅感覺。」

「講開又係喎，你唱得太保守喇，男人就要一股熱血咁唱先得。」太一講。

「熱血呀⋯⋯」

「其實又唔係咩問題嘅，不過如果可以令到人感覺到你嘅諗法就緊加好。」Sky講。

「咁不如試多次。」我想試多次。

「～遇怪魔我即刻變大個，遇見高手痛快得多⋯⋯Oh Let's Fight～」

「點呀？」我覺得我把聲有少少沙。

「我覺得好憤怒，啱啱嘅唱法比較似發泄多啲。」樂少講。

「阿錘你，今日都係抖吓啦，啱啱太用力喇。」Sky講。

「下次再練囉，我差唔多要走。」太一講完就走咗。

「好⋯⋯」

的確，我一開始太驚走音，所以就住唱，但係想畀多啲熱血，又唔小心太用力⋯⋯或者「最好的必需再練過」係真嘅，一於再練過！

我哋走嘅時候，又經過Canteen。我同樂少諗住買啲嘢食，我就買咗包維他奶，樂少就買咗包薯片，而Sky就一路望住喺Canteen改簿嘅Miss Lui。

Miss Lui成日都會落Canteen改簿，可能因為教員室成日會畀曹sir煩住掛。不過Miss Lui個人原來都幾為食，佢見到我哋之後，就走過嚟食我哋包薯片。

「你哋啲青春期嘅男仔唔應該食咁多薯片㗎，會生暗瘡，Miss蝕底啲幫你哋食啦。」

「Miss，你咁食會肥㗎。」樂少咁同Miss講。

「關志樂，你係咪笑老師呀，記你缺點㗎。」Miss Lui開玩笑咁講。

「『雷老師』咁瘦邊驚肥吖。」我又笑佢「雷老師」。

Miss Lui見我又串佢又想拍下我，點知撞到包薯片，仲要成包飛起咗。結果企隔離嘅Sky就唔好彩成頭都係薯片⋯⋯

「唔好意思呀⋯⋯」Miss Lui勁唔好意思咁同Sky講。

Miss Lui好溫柔咁撥走Sky頭上嘅薯片，Sky突然間好似有啲怕醜，仲有少少面紅，Miss Lui將其中一塊喺Sky頭上嘅薯片好自熱咁放入口食咗。

企喺隔離睇嘅我，覺得呢個畫面就好似睇緊日劇咁。

「劉星隨，關志樂，你哋掃返啲薯片呀。」Miss Lui仲食緊啱啱塊薯片。

「吓！」我同樂少咁講。

「咁你哋買㗎嘛，我依家返上去改簿喇。」

「好⋯⋯」其實都冇咩所謂嘅，反正都唔係好多塊薯片。

就係咁，Miss Lui就走咗，而Sky好似好開心。

「喂樂少，我終於明『摸頭殺』係咩感覺喇。」Sky好似好開心咁講。

「呢個都算『摸頭殺』呀？」樂少講。

「我諗算掛。」我答。

（Tbc.）

25 - 芝士蛋糕

「～遇怪魔⋯⋯」我自己一個喺音樂室練習緊唱歌。

呢排我放學之後，都會去音樂室，希望可以儘快搵到點樣唱首歌嘅feel。不過究竟熱血嘅感覺應該係點呢？應該點唱好，總係覺得冇feel⋯⋯所以我就攤咗喺張櫈到，而呢個時候又無啦啦有個人行咗入嚟。

「你搞咩呀？」

「做咩你喺度嘅？」

「Miss Fong叫我搵你，佢問你哋表演要咩器材同唱咩歌。」

「哦，咁我聽日自己同佢講吖。」

呢個人又係毛子蘭，因為佢之前係我哋班嘅Prefect，所以Miss Fong叫佢搵我？應該係呢個原因掛。

「你練緊唱歌呀？」
「係呀。」
「咁你哋會唱咩歌呀？」
「《自動勝利》。」
「咩嚟㗎？」
「～遇怪魔我即刻變大個～呢首喎。」
「哦！數碼暴龍。」
「人哋個歌名係《自動勝利 Let’s Fight》呀。」
「我仲以為叫《數碼暴龍》添。」

「唉，不過我都唔知唱唔唱《自動勝利》好，因為我唱極都冇feel。」
「不如唱嚟聽吓。」
「真係想聽？」
「係呀，快啲啦。」

我拎起枝木結他就準備開始唱。不過突然諗起，除咗夾Band或者唱K嗰陣會唱歌，我冇試過唱歌畀人聽，所以內心有少少緊張。

「咁⋯⋯我唱㗎喇。」
「嗯。」毛柔蘭嗰樣好似好期待咁。
「不過呢，呢次應該同我哋Full Band嘅感覺好唔同，因為我依家得一枝結他。同埋如果唔好聽，一定要話唔好聽呀。」
「冇所謂啦。」

我開始唱，今次因為得一枝木結他，所以我冇咁用力唱，但係就用多咗胸腔唱，而且tempo都慢咗少少。

「～越搏鬥戰意便高企，自信碰跌了又再起，堅決相信為戰友我定必勝利～」

「～Oh Let's Fight～」我唱完第一次副歌就停低咗。

「點呀？」
「幾好聽吖。」毛子蘭拍手。

「你覺得好聽？」
「係呀。」
「不過我覺得我冇嗰種爆發力，好似冇嗰種熱血喺入面咁。」
「熱血又唔係要出哂力咁嗌，我覺得你唔係唔熱血，只係你熱血得好內斂⋯⋯」

「吓？！」我完全唔明咩叫「熱血得好內斂」。
「如果用甜品講就係芝士蛋糕。」
「芝士蛋糕？」
「嗯，芝士蛋糕。因為芝士蛋糕外形好普通，一個白色嘅餅，又冇咩裝飾，之不過食落去嘅味道就好濃。」

毛子蘭呢個比喻，我好似突然明白到一啲嘢。我的確唔係嗰種會畀周圍嘅人覺得係白痴嘅「熱血傻瓜」，簡單啲講即係唔似王道動畫嘅主角。我唔係太一嗰種「進化啦，亞古獸！」嘅人，我講嘅太一當然係講《數碼暴龍》個太一啦，其實我哋個太一都係「熱血傻瓜」。咁相比之下，我嘅熱血或者真係比較內斂⋯⋯

「芝士蛋糕⋯⋯你都講得啱嘅。」其實喺毛子蘭講完之後，我就好似有啲領會咁。

最起碼，我唔係冇熱血喺入面，只係我未可以將佢釋放出嚟。

「你要畀到力量觀眾先得㗎！」毛子蘭用力咁講。

「我好用力唱㗎喇。」

「但係你個樣太冷靜喇，熱血嘅樣呀，應該要咁。」毛子蘭扮咗個「熱血」嘅表情。

不過毛子蘭呢個表情完全唔熱血，反而似係撞到腳趾多啲。

「你咁樣似腳趾撞落枱腳多啲喎。」我大笑咁講。

「超～我走喇。」佢好似有啲嬲。

「我明呀，多謝你。」

「咁你努力啲練啦。Bye-bye。」

「Bye-bye。」

全靠毛子蘭，我好似搵到我想要嘅熱血係咩！我唔係「進化啦，亞古獸！」嗰種，我嘅熱血係「芝士蛋糕」！一種肉斂嘅熱血！

＝＝＝分隔線＝＝＝

第二日放學，因為音樂室要定期維修同更新電腦，我哋今日去咗The Echo夾Band。

「點解無啦啦要維修呀。」樂少講。

「冇辦法啦，音樂室部電腦仲係Windows 7。」我講。

The Echo個Reception姐姐，今日個Look好似成熟咗，不過同時都靚咗。

「唔該Book咗姓⋯⋯」

「姓劉吖嘛。」估唔到佢竟然記得。

「係呀。」

「右面間房有人用緊呀，你哋用左面呢間吖。」佢起咗身指畀我哋睇。「呢間房大啲㗎，不過可以照收你哋細房價。」突然之間，佢把聲變得好cute。

原來佢都幾高，今日仲係著黑絲短添裙。我留意到，太一同樂少係咁望住人哋隻腳⋯⋯

「喂你哋兩個係咪望得太明顯呀？」我入咗房之後同佢哋講。

「阿錘，醒呀，識揀。」樂少講。

「我哋下次都嚟呢度夾啦。」太一講。

「咩呀，人哋著黑絲啫，有咩咁特別呀。」我講。

「扮咩吖，劉星隨，你自己第一個望住人先嘅。」樂少講。

「我唔小心望到啫。」

「喂阿錘，不如你一陣抄埋人牌啦，或唔定下次有折㗎。」太一講。

「吓？」

我哋開始Set緊嘢，我已經Set好結他，不過Mic就未Set。

「Sky幫我開Mic吖。」因為Mixer喺Sky隔離。

「阿錘你覺得出面個女仔靚唔靚呀。」Sky突然之間問我。

「我覺得幾靚呀。」

「咁條腿正唔正呀？」

「我覺得⋯⋯」就係我講緊嘅時候，Sky突然扭大咪嘅Volume。「條腿正呀。」

結果「條腿正呀。」開到好大聲，我諗出面都聽到。

「喂，頂呀！」

Sky已經開始傻笑緊，樂少佢哋都失哂控。估唔到Sky而家變到咁鍾意整蠱人，不過呢三個人係咪小學雞嚟㗎，竟然笑到咁⋯⋯

「練嘢呀！」我為咗停止佢哋對我嘅嘲笑，唯有叫佢哋開始練嘢。

「同埋Repeat個段我想轉少少嘢，大家跟feel試吓。」

「～遇怪魔⋯⋯」

自從毛子蘭講完我似芝士蛋糕之後，我就明白咗，我根本唔需要夾硬加大力度唱，只要諗住將我身體入面嘅熱血釋放出嚟就可以。

「Oh Let’s Fight～」

入Repeat之前，我望住咗太一，希望佢feel到我想要嘅節奏。我將幾粒音唱高少少，低如係「我即『刻』變大個，亦不『必』想再拖」我將佢由Mi唱成so，而節奏嘅改變主要係將樂句尾嘅位儘量變成重拍，結果太一竟然跟到哂！大家跟住鼓手就完全咗首歌。

「幾好喎！咁唱就唔拖喇，而且好爽！」太一好開心咁講。

「而且你今日唱得好有火喎，連個樣都好熱血，係咪因為出面個靚女呀。」樂少講。

「唔關事啦，係芝士蛋糕！」

「咩芝士蛋糕呀？因為你食舊芝士蛋糕所以唱得好咗？」

雖然樂少好似好迷惘，但係我冇諗住解答佢。

「阿錘你，不如試吓寫歌吖。」Sky突然咁講。
（Tbc.）

26 - 開放日

「我寫歌？」我問Sky。

「係呀，因為阿錘你成日都會突然彈到一啲好令我印象深刻嘅Lick，所以我覺得你應該要試吓寫歌。」Sky答。

的確，我覺得我哋都差唔多要開始寫自己嘅歌，因為要成為受歡迎嘅樂隊，做原創歌係必須嘅。

「我想問咩叫Lick呀？」樂少問。

「Lick即係樂句，仲有樣叫Riff㗎，不過兩樣嘢有少少唔同。」Sky解釋。

「好吖，我試吓啦。」我答。

雖然講就咁講啫，但係我除咗音樂堂學過吓之外，根本都未試過作曲，就算有時有啲旋律浮咗出嚟，都合唔到做一首歌。不過如果以我哋隊Band嘅成員嚟講，樂少樂理上仲係初歌，太一除咗打鼓就唔識其他樂器，至於Sky叫得我寫，即係話佢唔想寫啦，咁就唯有我做啦。

「咁完咗開放日之後，我哋就開始寫歌啦。」我咁講。
「係喎，你哋會唔會做和音呀？」我問。
「和音？」
「即係嗰啲Balaba嗰啲。」 
「鼓手和音好似有啲怪，樂少同Sky唱啦。」
「我冇所謂呀。」
「我都OK。」

就係咁我哋首《自動勝利 Let’s Fight》就終於練成咗喇。

通常我哋走之前，我會喺Band房收齊錢先再畀人。佢哋已經出咗去等𨋢，我就去畀Reception姐姐，不過佢除咗收錢之外，仲有同我講咗啲嘢。

「92340989。」Reception姐姐講。
「吓？」我講。
「我電話呀，又話我條腿正。」佢嘅眼神仲要有少少flirty。
「Err⋯⋯吓⋯⋯我⋯⋯」我完全唔知點答。
「我叫天娜，英文都係叫Tina。」
「你好⋯⋯我叫劉星隨。」
「哈哈，真名嚟㗎？流星錘嗰個流星錘？」Tina又笑緊我個名。每次同人介紹自己個名都係呢種情況。

呢個時候見我同Tina傾緊計嘅太一同樂少就行返入嚟。

「我叫Kenneth呀。我電話係⋯⋯」走過嚟自介嘅係樂少，其實我都唔記得佢叫咩英文名。

「我係Ronald。」懶有型咁介紹自己嘅係太一，原來佢叫Ronald，我而家先知，但係佢完全唔似叫Ronald。

「下次Book房打畀我啦，不過冇折。想約我去街都可以。」Tina今次係微微笑咁望住我。

「好呀。」我講完再見，就捉埋嗰兩個人出行。

呢啲姐姐真係呢，我完全唔識招架，不過唔通我行緊桃花運？

樂少突然之間捉住我塊面：「冇理由吖，你咪又係咁嘅樣，冇靚仔到喎。」

「我點知啫。畀個電話你喇。」我同樂少講。
「唔使喇，我已經心有所屬。」樂少指嘅當然係Emma啦。
「咁不如畀我啦。」太一咁講。
「唔得，點可以畀你㗎，想要自己去問人哋拎囉。」樂少咁答太一。

＝＝＝分隔線＝＝＝

開放日

話咁快就到快on show嗰日喇，雖然話就話係表演，但係因為開放日嘅關係，我哋都係要著整齊嘅校服返學校。

今日嘅開放日，分咗幾個部分，基本上每一科嘅老師都會負責諗啲攤位同遊戲畀啲家長感受吓「濃厚嘅學習氣氛」。至於作為表演嘉賓嘅我因為冇嘢做，所以就去搵李sir，睇吓文學科攤位有冇嘢要幫手。

「李sir，咩景況呀？」
「又係咁囉，小學生同家長唔關心文學科㗎。」
「咁又係嘅。」

喺好多家長心目中，都唔會想仔女揀文學讀，因為一來出路唔多，二來又唔實用，所以每年都冇咩人睇呢科㗎。而我當初揀讀文學，最主要係睇到個course會教填詞，所以先讀。

「係喎李sir，又話會教填歌詞嘅？」
「你有興趣咩？」
「有呀！」
「咁下學期教啦。」

其實李sir個人就係free到咁，基本上冇一個學習Schedule畀我哋。

「不過咁喎隨兄，做作詞人嘅技巧呢，大多數都唔係上堂學返嚟嘅。」
「即係天才波呀？」
「文學之所以係文學呢，唔係因為啲文人識得賣弄文字，而係佢哋懂得將情感化為文字。」
「即係⋯⋯其實我唔使學？」
「唔係，係咩都要學，你唔係要學啲文人做咗咩，你係要學佢哋點解要咁樣做。」
「嘩，我讀左年幾你先講畀我知嘅。」
「係咪你上堂瞓咗冇聽咋。」

喺我揀嘅選修科入面，我唯一有心機亦嘅就係文學科，可能Geogra同Physics都太複雜啦，所以我真係冇咩興趣讀。

留咗一陣之後，我就上咗音樂室同「黑色西炒飯」搬嘢落去，因為表演前仲有個講座，所以要喺講座前做咗Sound Check先。除咗Sky之外就齊哂人，不過又唔使擔心Sky嘅，佢一定唔會遲到。

「喂幫手搬鼓吖，好重呀。」太一講。
「不如去借架手推車啦，搬Amp都有啲麻煩，交畀你喇學生會。」我講。
「架車畀副校長拎咗呀，因為佢英文科好多嘢喎。」樂少講。
「頂！又係何副校。」我講。

呢個時候有人拎咗架車上嚟，呢個人又係毛子蘭。

「點解你會有架車嘅？」我問毛子蘭。
「Prefect Room仲有架車㗎嘛。」毛子蘭講。
「小蘭呀，唔該哂喎。」太一講。
「小蘭？」我疑惑太一點解叫佢小蘭。
「因為甜豉油係咁叫小蘭㗎嘛。」太一講完之後就推走咗套鼓同埋兩個AMP。
「喂仲有個AMP呀⋯⋯」
「冇位呀，你自己搬啦。」

太一同甜豉油好似都有啲聯絡，明明之前仲話人哋係偽科學。

「喂，我落去先呀，SU個檔要人，10分鐘後禮堂見啦。」樂少拎咗佢枝Bass就走咗。

「吓，即係呢個要我搬啦。」

我孭起結他，然後準備搬走淨返個AMP，毛子蘭掹住我枝結他。

「做咩呀？」
「我幫你拎啦。」
「咁畀枝結他你啦，不過今次唔好跌喎，抄校規都救唔返㗎。」
「孭住唔會跌啦。」
「哦。」

本身我諗住搭𨋢落去，點知毛子蘭竟然話要推住嘢先可以搭𨋢，咁我同佢就唯有行幾層落去一樓嘅禮堂。

「點解你今日咁得閒嘅？」
「因為我係Prefect負責維持秩序，但係而家學科攤位時間所以我就冇嘢做。」
「哦⋯⋯一陣會唔會嚟睇呀？」
「應該⋯⋯會掛。」
「哦。」

我去到禮堂之後，好快就set up好所有嘢，Sky同樂少都嚟到。

終於可以孭住自己枝結他行咗上台，雖然只不過係Rehersal，但係我都已經好興奮，不過興奮伴隨嘅係好緊張⋯⋯

「～遇怪魔我即刻⋯⋯」
「～最好的～必須～」

今次弊，我喺Rehersal嘅時候不停咁甩beat同走音，依家台下冇人我都咁震，如果一陣坐滿人點算好⋯⋯

（Tbc.）

27 - 遇怪魔

「喂阿錘，搞咩呀你，我唔可以就住你打鼓喎。」太一咁講。
「我都唔知呀，我依家好震呀。」我都唔知做咩，個腦好似突然空白咁。
「有咩好震呀，照你平時咁唱咪得囉。」樂少咁講。
「你哋畀我抖啖氣先。」我準備離開禮堂。
「阿錘，畀你吖。」Sky畀咗塊pick我。
「吓？」
「你塊Pick呀，磨蝕哂，咁樣彈唔到好聽嘅聲㗎。」Sky又係笑笑口咁講。
「哦。」

我照樣落咗去Canteen買包維他奶，我都唔明做咩會咁緊張，我好想自己好似平時咁，但係唔知點解就係心跳得好怪，有時好似好快，有時又好似好慢⋯⋯

「你⋯⋯好緊張呀？」問我嘅係毛子蘭。

「少少⋯⋯掛⋯⋯我都唔知咩事，好似一上台個腦就空哂咁。」
「即係你驚緊囉。」
「我驚？」

「我以前去朗誦⋯⋯」
「你去朗誦？」我打斷咗毛子蘭。

「係呀，你唔好打亂我啦！」毛子蘭繼續講，「我明明背到好熟，但係上到台我都係會好驚。」
「咁你點做呀？」

「我望住我個書包囉⋯⋯」
「書包？」

「望住啲自己熟悉嘅嘢就唔會咁驚㗎喇。」

「唉⋯⋯其實我而家淨係驚累咗佢哋咋。因為夾Band嘅時候呢，主音一出錯就會好明顯，而佢哋就算冇出錯都會畀我影響到，我唔想搞到佢哋畀人笑。太一雖然係個熱血白痴，但係打鼓嘅時候就好落力，佢對音樂係認真㗎，對手仲練到起哂繭。樂少彈Bass就好有天份，雖然佢自己好似唔知，但係我覺得佢有日可以變到好勁㗎。而Sky就係一個天才，明明平時成日懶懶閑，但係到咗音樂方面，佢嘅直覺就好準，我哋夾Band嘅時候佢每次都會講得出我哋有咩問題。」

「不如望住佢哋吖。你哋喺Band房嘅時候，唔係會圍住坐，然後面對面夾㗎咩。」
「又係喎⋯⋯但係邊有人會背住觀眾㗎。」
「嗯⋯⋯你都覺得啱嘅。」

突然間有個人喺我後面喊緊。



「阿錘，點解你唔多啲讚我呀！」喊住講嘢嘅係太一。
「你哋⋯⋯」原來佢哋三個一直喺我後面，聽緊我講嘢⋯⋯
「阻住你哋咁浪漫嘅時刻唔好意思呀，不過我哋依家要捉呢個人走呀。」樂少同毛子蘭講。

「浪咩漫呀！」我同樂少講。
「我哋一陣將佢畀返你吖，小蘭。」連Sky都要抽一抽我水。
「咁我走先。」 我同毛子蘭講。
「嗯，加油呀⋯⋯你哋加油。」毛子蘭好似係想同我講，不講又變咗同我哋講。

「做咩事呀？」
「今次弊喇，何副校話如果你唔剪頭髮冇得上台呀。」樂少講。
「吓？」
「佢話你頭髮過長，影響校譽喎。」
「咁Sky冇事咩？」
「所以我咪梳得好整齊囉。」Sky答。

「仆街吖！去搵佢理論！」
「冇用㗎喇，你搵佢都唔理你啦。」樂少講。
「咁不如我而家剪啦。」我唔情寧咁講。
「你肯咩？」太一問。
「好過冇得上台吖，我哋練咗咁耐。」

呢個時候，何副校行過嚟我哋身邊。

「劉星隨，平時記你缺點都唔肯剪，依家為咗夾Band竟然肯剪頭髮呀。」如果要形容副校個樣，就係迪士尼啲魔鬼後母咁嘅樣。

「係呀。我要夾Band！頭髮過兩日就生返啦，你阻我唔到！」

「樂少畀把鉸剪我。」

就喺我準備去剪頭髮嘅時候，有個人突然出現咗。

「咩事火藥味咁重呀？」開聲嘅人，係我哋嘅校長。
「冇，我叫呢個學生剪頭髮啫。」副校答。

校長望一望我，行去我面前撥一撥我啲頭髮，然後咗枝定形水出嚟。

「嗱，咁樣梳一梳佢，再噴少少定形水咪唔覺長囉。」校長咁講。

「校長？！」副校嬲到塊面紅哂。
「副校呀，我哋學校要學生做個好人，唔係要佢哋做個好睇嘅人。而且夾Band要頭髮長少少先有型吖嘛。」

副校好嬲咁睥住我，然後走人。

「不過咁呀劉星隨，你完show之後好剪頭髮喇。」校長好大聲咁講，背住我哋走嘅副校先係停低聽校長講嘢，再嬲爆爆咁走咗去，連背影都feel到佢嘅憤怒。

「你哋一陣加油呀，校長我好鍾意Rock㗎。」校長好nice咁同我哋講。

「多謝校長。」我哋同校長講。

「阿錘你，啱啱遇到怪魔喇。」Sky咁講。

我哋即刻大笑：「係喎，副校長真係成隻惡魔獸咁。」

我停止笑聲然後深呼吸：「我Ready喇，Let’s Rock and Roll！」 

有時覺得自己都有啲「中二病」，不過我依家真係著哂火，「一激起我就有火」。

＝＝＝分隔線＝＝＝

我哋已經喺後台準備緊，只要等MC叫我哋就會上台，終於呢一刻都嚟喇。

「樂少呀，Emma都嚟咗呀。」Sky同樂少講。
「真係㗎？」
「係呀，VA科潘sir叫佢幫手。」
「吖！好緊張呀！」樂少講。
「唔使驚啦，反正你一定彈錯。」太一咁講。
「阿錘話我好有天份㗎！」

「係喎，阿錘你諗定啲開場白。」Sky同我講。
「開場白呀⋯⋯」
「突然之間開始唱會好怪㗎，所以開場白交畀你喇。」
「好吖。」我都唔記得咗要講開場白添。

「多謝各位今日蒞臨出席本校嘅開放日，現在請欣賞由我哋學校中五級組成嘅樂隊表演《自動勝利 Let's Fight》。」開放日MC介紹我哋出場。

「行啦！」我講。
「等等先，做啲儀式嘢，擺隻手上嚟。」太一伸出隻手。

第一個搭隻手上去嘅係Sky，第2個係我，第3個係樂少。

「乜咁老土呀。」樂少講。
「再老土啲都得呀。嚟嗌啲嘢先！」太一講。
「嗌『黑色西炒飯』吖！」Sky講。

我哋好齊咁搭起手，望下大家，然後一齊嗌：「黑色西炒飯！」

望住佢哋三個，我好似安心咗，我覺得我已經唔再震喇，呢一刻我好有信心。

企起台到望住下面嘅來賓，感覺好複雜，當中雖然有唔鍾意我嘅何副校同曹sir，不過我大佬李sir同幫我嘅鄧校長，班主任同Miss Lui都喺度，我哋班都有唔少同學，魔人、朱傑、沙維、霞姨、Carol，佢哋都返咗嚟，仲有寧社嘅呀龍同拓爺，甜豉油同佢個會員Simmy，而且Emma同Rachel都喺度，不過我見唔到毛子蘭⋯⋯

「大家好，我係主音5D班嘅劉星隨，彈結他嘅係司徒天，Bass手關志樂，仲有我哋嘅鼓手張太一，我哋係『黑色西炒飯』。喺唱之前我想多謝校長畀呢個機會我哋，學校一直都好支持同學搵自己嘅夢想。之後我想多謝我班隊友，到啱啱為止，我都係好緊張㗎⋯⋯不過全靠佢哋，而家我會努力唱好佢。另外我想⋯⋯」我想搵毛子蘭，但係都係見唔到佢。

「送畀大家，數碼暴龍嘅主題曲《自動勝利 Let’s Fight》。」

「～越搏鬥戰意便高企，自信碰跌了又再起，堅決相信為戰友我定必勝利～」

今次我終於冇再怯場，同平時一樣，而且因為用咗塊新Pick，覺得連手感都順咗，自不過係我唔係好敢望人，我望得最多嘅係學校嘅校徽。

「～Oh Let’s Fight～」

完咗第一次Chorus之後，我嘗試再搵毛子蘭，但係我都係搵唔到，唔知係咪太唔集中， 我入慢咗⋯⋯

（Tbc.）

28 - 我哋係「黑色西炒飯」。

「～戰意越高企，自信碰跌了又再起，堅決相信為戰友我定必勝利～」

當留意到我入唔切之後，Sky就幫我唱咗呢段，不過反而令全場嘅同學都勁興奮，因為冇人見過Sky呢個樣。呢次亦都係我第一次聽Sky唱歌，果然佢唱歌係差啲嘅，不過好彩佢接到咋，如果唔係就慘。

「～越探索世界越優美，讓我奮鬥到廿六世紀，堅決相信為了愛我定必勝利～」

之後，我終於順利入返，成功搵返節奏，好似冇人發現我入遲咗添。而我亦都愈唱愈有feel，我覺得我成功將我嘅熱血釋放咗出嚟，可能加上畀副校長激一激，「遇怪魔」我緊係「即刻變大個」啦。

「～Oh Let’s Fight～」

跟住到Sky嘅solo時間，我另轉身，望向我嘅對友，佢哋⋯⋯個個都發緊光！

Sky行近我，我哋當正自己係Rock star咁，互相對望住好High咁彈結他，呢個係我冇見過嘅Sky，話唔定呢個先係真正嘅司徒天。

不過我知道Solo嘅呢個Moment係屬於佢㗎。

我再另轉身，對住個咪嗌：「Guitar solo！」

果然台下嘅觀眾睇到嘩嘩聲。

Sky嘅solo喺少少燈光之下，加埋嗰種自信嘅笑容，真係好型！呢個時候我見到Rachel係睇得最感動嘅，而Emma都好似睇得好入神咁。


喺solo就嚟完嘅時候，我終於見到毛子蘭喺後門行入嚟。

「～遇怪魔我即刻變大個，遇見高手痛快得多～」

之後我就望住佢唱，因為望住佢，突然間就好似望住啲好熟悉嘅嘢咁。

「～我但求全擊破～」

突然之間，我好想做一樣嘢。

「識唱嘅一齊唱！」我對住個Mic嗌。

「～遇怪魔我即刻變大個，遇見高手痛快得多～」

結果成班都同學都有跟住一齊唱！

「～最好的必須再練過，逐個反擊對方一個二個，我但求全擊破～」

「～Oh Let’s Fight～」

去到最尾嘅Outro，我轉身望住我嘅隊友彈，我想望住佢哋享受呢一刻⋯⋯



喺我哋身後係源源不絕嘅掌聲同歡呼聲⋯⋯



「Thank you！多謝大家！我哋係『黑色西炒飯』！」



我哋完咗Show就返入後台。



「好彩Sky救咗我咋。」我好慶幸咁講。

「Yeah。」Sky舉起Rock嘅手勢。

「好正呀頭先！」樂少激動咁講。

「真係好開心呀！感動過打到1000個Combo！」太一好感動咁講。

「有夾Band真係好呀！」樂少咁講。



聽到樂少咁講，我好開心，因為佢本身同Rock嘅世界完全唔相同，我諗佢而家已經成功入咗Rock嘅世界。

「好犀利喎！」突然嚟同我哋講嘢嘅係Miss Lui。

「使咩講，我哋係人稱『寧華五月天』嘅『黑色西炒飯』喎。」樂少突然爆咗個「寧華五月天」出嚟。

「咩『寧華五月天』呀？我哋得4個人咋喎。」太一講。

「咁『寧華Beyond』囉。」完全冇人想理樂少。

「係喇，我哋下個月21號搞聯校教職員晚宴，你哋做唔做學生代表表演呀？」Miss Lui問。

「聯校教職員晚宴？」

「係呀，原來每年都搞㗎，今年到我哋學校主辦。」

「好呀。」Sky係第一個答嘅。

「咁我諗都Ok嘅。」

「好呀⋯⋯不過呢，有個小問題，曹sir話想唱歌。」

「吓？曹sir唱歌？！」我哋四個一切驚訝咁講。

「係呀，佢一見到你哋夾Band就話要表演師生聯校音樂表演。」

「Err⋯⋯」

「你哋諗下先啦。」

「哦。」

「司徒天，彈得好好呀。」Miss Lui走之前同Sky講。

「多謝。」Sky笑得好開心。

「咁我哋去唔去聯校教職員晚宴呀？」樂少問。

「我覺得可以去吓呀。」太一答。

「你哋OK，我都OK呀。」我答。

就係咁，我哋就完成咗第一個Show嘅演出喇。仲要馬上就決定咗下一場嘅表演，果然Show係一個一個咁接返嚟嘅，希望快啲可以有啲街show出啦。

＝＝＝分隔線＝＝＝

台下面嘅「占卜星相靈異與魔法學會」兩個人，睇完表演之後又喺度討論緊甜豉油見到嘅戀愛。

「點呀會長？今次係點呀？」Simmy問緊甜豉油。

「同上幾次一樣，佢哋一齊我先見到我嘅戀愛，但係就唔知係邊個人。」甜豉油仲搵緊佢嘅「命中註定」。

「會長，你自己有冇覺得邊個有feel呀？」

「唔係我嘅feel決定㗎，應該要等宇宙安排。」

「但係反正都睇唔到係邊個，不如揀最靚仔個Sky哥哥試吓啦，你睇吓佢彈結他真係好Charm呀！同埋嗰個劉星隨唱歌都幾型吖。」

「我⋯⋯唔得，我哋要跟住宇宙嘅指引行。」甜豉油好堅定咁講。

完咗Show之後，「黑色西炒飯」將Amp同鼓放返去音樂室，而樂少就自己落去學生會攤位執嘢先。

樂少落去嘅途中，就撞到要上VA室嘅Emma。

「Hi⋯⋯Emma。」樂少同Emma打招呼。

「Hi，你哋好犀利呀！又話啱啱學，但係你彈Bass咁勁嘅。」

「吓，係咩⋯⋯我彈咗冇耐咋。」樂少因為畀Emma讚，所以顯得有啲怕醜。

「嗯，Bass手好重要㗎，雖然冇好似主音或者結他手咁搶眼，又冇鼓手咁最要，但係就係唔可以缺少，同埋默默咁支撐隊Band。我最鍾意嗰隊Band嘅Bass手呢，就係呢種人喇，永遠都係好低調，但係就好可靠喎。」

「真係㗎？你真係覺得Bass手好重要呀？」

「係呀，雖然阿錘同Sky好犀利，不過你都彈得好好呀，加油。」

「係！我會成為一個可靠嘅Bass手！」樂少好似又畀Emma嘅說話刺激到，想再努力啲彈Bass。

另一方面，Sky自己喺完Show之後去咗走廊吹風，呢個時候Rachel慢慢行過去Sky身邊⋯⋯

「係琳琳呀。」

「終於見返我識嗰個天天喇。」

「我呢⋯⋯今日好開心。」

「我見到呀，估唔到你仲唱埋歌添，我諗嘉怡姐姐都應該好開心。」

「佢睇到㗎，佢就喺呢度。」Sky指一指自己嘅心藏。

＝＝＝分隔線＝＝＝

「喂，阿錘呀，我哋架車係咪要畀返Prefect呀。」太一講。

「係喎，咁我畀返毛子蘭先。」

「咁架車交畀你喇，我哋一陣去唔去慶功呀？」太一問。

「慶功呀，都好喎，話哂第一次出Show。」

「咁我叫埋樂少同Sky先。」

「好呀。」



我之後就推住架車搵毛子蘭，不過原來想搵佢都唔係咁易，明明唔想搵佢嘅時候，就偏偏成日出現⋯⋯

不如打畀佢啦，但係我突然醒起，我係冇佢電話㗎⋯⋯



就喺呢個時候，終於見到毛子蘭，不過佢身邊就有個小妹妹。

「我搵你好耐喇，畀返架車你。呢個係你妹妹？」

「唔係呀，佢好似係你Fans。」

「劉星隨，你可唔可以幫我簽名呀。」小妹妹畀咗張白紙我咁講。

「簽名？」其實我心裡面暗爽得好緊要。

「我決定下年要讀呢間學校！」小妹妹講。

「真係？咁你要加油呀，雖然呢間學校唔難考。你叫咩名呀？」我一路喺張紙簽名一路問個小妹妹。

「我叫劉卓瑜。」

「你都係姓劉喎。」

「係呀，我哋下年見啦師兄！」劉卓瑜講完就走咗去搵佢媽媽。



「依家紅咗喇喎。」毛子蘭有啲串我咁講。

「我都估唔到竟然會有Fans。」我一面暗爽嘅樣。「係喎，做咩你去到一半先入場嘅？」

「我頭先畀副校叫咗去送啲嘉賓走，之後我就跑上嚟，好彩都未完。」

「又係何副校，真係把幾火！佢今日叫我剪咗頭髮先可以上台喎，好彩校長幫我解圍咋。」

「不過你都唱得幾好吖，我見啲同學都睇得好開心。」

「係呀，其實我之前有個位入慢咗，好彩Sky幫我補返咋。」

「係咪你太緊張呀？」

「唔係呀⋯⋯係因為掛住搵⋯⋯」我好想講我掛住搵佢，但係又唔想講出口。

「搵咩呀？」

「搵Miss Lui囉。」

「原來你都係Miss Lui Fans club嘅。」

「Miss Lui有Fans Club㗎？」

「低Form開㗎，不過未有官方承認。」

「哦⋯⋯Umm⋯⋯多謝你。」

「多謝我咩呀？」

「Err⋯⋯總之多謝你啦。」



我講唔出當我望住佢唱就覺得好熟悉，所以我就望住咗佢唱，雖然呢個係事實⋯⋯



「咁又係嘅，全靠我你先有第一個Fans咋。」

「吓？好明顯佢係畀我嘅熱血感動到啦！」

呢一刻嘅毛子蘭同我開學認識嘅佢，已經唔同咗，應該話係我眼中嘅毛子蘭唔同咗，我覺得同佢一齊好舒服。

「喂，阿錘行喇！」太一叫我。

「係喎，我同佢哋去慶功呀，ByeBye。」

「Bye-Bye。」

「咁我哋食咩呀？」太一問。

「去我屋企間茶餐廳？不過講明先，冇折嘅。」我講。

「係喎，咁耐都未食過，一於試吓啦。」太一興奮咁講。

（Tbc.）

29 - 流星記茶餐廳

我帶咗佢哋幾個去我屋企間茶餐廳「流星記茶餐廳」，其實我哋屋企間餐廳都真係冇咩特別，係一間好普通嘅茶餐廳，如果坐滿人應該可以有40人嘅。雖然同學校係同區，但係就一頭一尾，所以冇咩同學知道我屋企間餐廳喺邊。至於出名嘅嘢食，除咗杯奶茶同乾炒牛河就冇，都係多得班街坊支持，我哋先做得住。



「媽媽，我帶咗幾個同學嚟食嘢呀，唔使畀折佢哋㗎，收正價就得㗎喇。」

「佢哋係你夾Band啲同學呀？唔好咁衰啦，想食咩姨姨請你哋食。」我媽媽講。

「多謝姨姨。」呢個係樂少，次次嚟親都唔畀錢嘅，不過準確啲講係呀媽唔肯收佢錢。

「媽呀，唉算啦，你哋嗌AB餐好喇。」我同佢哋講，因為AB餐係最平嘅。



我媽媽黃佩嫻，對個個人都好Nice，無論係客人、街訪、伙記都好好，如果係我哋三姊弟妹啲同學，就一定係成日請人食飯，或者畀折頭人哋，所以我好少帶同學嚟食嘢，但係家姐就成日帶Friend嚟食嘢，好彩爸爸會撳住佢，媽媽最多都係畀八折人。



平時樓面同收銀就係媽媽負責，爸爸就負責文武吧。



爸爸個人好Fun，唔係都唔會叫個仔做「流星錘」啦，佢係一個好隨意嘅大叔，基本上個餐牌冇嘅嘢，但係有材料都會整到。



佢哋班人真係好鬼狼死，一嚟就嗌個羊腩煲，仲想嗌特飲添。



「喂，唔畀嗌特飲呀！」

「唔好咁孤寒啦，細佬。」媽媽講。冇錯媽媽有時都會叫我「細佬」，因為我家姐大我三年，所以媽媽叫慣咗我做「細佬」。

「係囉，『細佬』，大方啲啦。」呢個係太一。豈有此理，下次都係唔帶佢哋嚟。

「咁我想要杯咸檸七。」Sky都嗌特飲。

「都話唔好嗌特飲咯！」

「是旦啦，一杯飲品啫。」媽媽講。

「下次加你哋料先得。」我講。加料即係加口水，雖然我唔會咁做嘅。

「聽講你連茶都唔識沖喎太子爺。」樂少講。

「妖！」其實我只係細個入過廚房，最多係放暑假幫手落吓單。



「媽媽，我想要西炒飯呀！」

「阿錘你真係好鍾意西炒飯喎。」Sky講。

「又唔係嘅，只係諗唔到食咩就會想食西炒飯。」



講起上嚟決定叫「黑色西炒飯」嗰日，如果我係食其他嘢，可能就冇咁順口，例如食椒鹽豬排飯就會變咗「黑色椒鹽豬排飯」，好似有啲怪。可能「黑色西炒飯」呢個名，係整定嘅。



「係呢，星隨喺學校有冇拍拖呀？」媽媽問佢哋。

「媽呀！」呢個都係我好少帶人嚟食嘢嘅原因，好怕媽媽問長問短。

「最近，有個師妹成日搵阿錘㗎。」樂少講。

「喂！」

「係呀，我哋上次去夾Band阿錘仲抄咗個靚女姐姐牌添呀。」呢個係太一。

「喂！！係佢畀電話我咋！」

「又係你話人哋條腿正先嘅。」輪到Sky爆我啲嘢出嚟。

「喂！！！」

「我仲諗住我個仔懶到咁冇女仔要添。」連媽媽都串緊我。



「嘩，我個仔咁有女人緣咩？」呢個係我爸爸，劉家範。

「啱啱仲有個小學生Fans添呀！」樂少連啱啱發生嘅嘢都講埋。

「喂喂喂！」我開始後悔叫佢哋嚟食嘢。

「咁中學生拍拖好平常姐，我同你媽媽中學就開始拍拖啦。」爸爸好Funny咁講。

「爸呀！」

「唉，我返去廚房喇，呢餐食得開心啲呀。」

「多謝叔叔。」



「阿錘你爸爸媽媽好funny喎，點解你個人咁悶嘅？」太一咁講。

「我點知喎，不過通常家長同仔女啲性格都有啲相反啦。」

「咁又係，我阿爸都係好鬼古肅嗰種人。」太一講。

「你覺得你好Fun咩？你係白痴咋喎。」樂少講，結果佢同太一又好似小學雞咁嗌交。



講起上嚟，我又真係唔知太一屋企嘅事，除咗佢而家同阿爸住，仲有阿媽係日本人，其他就唔清楚。而我都淨係知Sky嘅家姐就不幸過身，其他都唔知。樂少屋企算係小康，有個細佬，而家讀緊中三，係個Band 1仔嚟。



食完呢餐慶功之後，我哋就各自返屋企，我屋企就喺隔離街，所以好快返到屋企。



「家姐呢？」我問我妹妹。

「去咗街呀。」

「媽媽仲叫我拎飯畀你哋食添。」

「擺雪櫃囉。」



因為屋企做餐廳，所以平時都係落去食飯多，以前細個媽媽都會留多啲喺屋企，不過而家個個仔女都識行識走就多啲落鋪頭幫手。



「今日做咩嚟呀？」我問我妹妹。

「睇緊漫畫，放假唔想出街吖嘛。」

「哦。」



我個妹好鍾意睇漫畫，成個書櫃都係漫畫，最鍾意好似係《只想告訴你》。



「今日出Show點呀？」 

「超正，我唱得超好。」

「哦，係咩，你肯定佢哋冇人係聾嘅？」

「吖豈有此理，唔好以為大個咗我就唔打你呀。」冇錯我哋由細打到大，但係每次我都係畀人鬧嗰個；同埋而家唔夠佢打，因為佢學咗幾年跆拳道。

「隻揪吖。」

「我去沖涼呀！Rocker係講Love&Peace㗎嘛。」我做出Rock手勢。



我而家瞓之前都會研究吓點樣作曲作詞，因為想快啲夾原創歌。我睇到有人話應該諗咗Chord先，再彈住啲Chord嚟諗旋律，但係又有人話唔好畀啲Chord限制咗旋律，總之作曲就係又容易但係又複雜啦。特別係我呢種只係識彈結他嘅音樂人，基本上唔會玩到好複雜嘅Chord，所以要作到一首似樣又特別嘅歌，真係唔易。



＝＝＝分隔線＝＝＝
呢個時候，太一啱啱返到屋企。太一屋企大概500呎，裝修得有啲似一間酒店，統一嘅色系，簡約嘅玻璃飯枱，小小綠色植物點綴，係一個好美觀實用嘅環境。

「太一，返嚟喇。點解著校服呀？今日係星期六喎。」太一爸爸坐係梳化上面望住電話嘅Message講。

「我今日喺學校表演呀，所以著校服囉。」

「表演？」太一爸爸另向太一，簡單望咗太一一眼。

「吖⋯Err⋯Band Show。」

「你記住玩還玩呀，留返時間讀書，特別係英文。你成績咁差，如果你DSE考得唔好，我唯有送你去美國讀㗎咋。」

「哦⋯⋯」太一講完就返入自己房。



太一阿爸係金融公司高層，平時冇咩時間理太一，對佢嘅要求就算係唔好留班，因為喺太一阿爸眼中，只要用錢就可以換到大學學位。佢哋平時嘅相處，與其話係父子，不如話似上司同下屬，太一只要完成阿爸嘅「任務」，就可以有「獎勵」。



（Tbc.）

30 - 現代愛情故事

幾日之後，Miss Lui捉住我哋講咗件好震驚嘅事畀我哋聽⋯⋯曹sir竟然要同佢合唱《現代愛情故事》。

「哈哈哈哈哈哈！！」我哋爆笑。

「仲笑！因為你哋上次個表演搞到曹sir話要唱歌畀班老師睇呀。」Miss Lui講。

「淨係呢件事本身都好笑啦。」我笑住講。

「喂呀，你哋正經啲吖，如果曹sir話叫你哋彈，一定要話唔識呀！」Miss Lui好緊張咁講。

「唔係呀Miss，佢唔叫你唱《好好戀愛》咪算好囉。」樂少講。

「關志樂，你認真啲啦。」

「點解Miss Lui你，唔直接話唔想唱歌呀。」Sky問Miss Lui。

「邊有得避啫，我呢啲小薯仔⋯⋯」Miss Lui個樣勁愁。



「但係咁就可以耍走曹sir咩？佢一樣可以叫我哋彈《相思風雨中》或者《刻不容緩》呀咁，唔通首首都話唔識咩。」突然間好理性嘅係太一。

「唉⋯⋯我都唔知呀，班同事個個都好興奮咁，我都唔知點推。」我從來未見過Miss Lui呢個樣，平時都係又有型又有活力。

「我有橋喎。」Sky突然之間講。

「係點呀？」我哋同Miss Lui一齊問。

「男女合唱歌首先要搵個啱嘅Key，但係呢樣已經好難。只要你哋夾唔到個啱嘅Key，就咩都唱唔到。之後你再話不如一人唱一首啦，咁就OK喇。」Sky咁講。



好似又真係work喎，一來又唔使Miss Lui同曹sir合唱，二來有滿足到班花生友。

「醒喎，司徒天。一陣請你食嘢。」Miss Lui好興奮咁講。

「好！⋯⋯好呀。」Sky每次答Miss Lui都好似好精神咁。

「吓，我哋呢？」樂少問。

「是旦啦，請埋你哋啦。」

「Yeah！」我哋一齊講。



隔咗幾日，我哋上網搵咗啲Chord，諗住簡簡單單彈首《現代愛情故事》。放學之後，曹sir同Miss Lui就上咗去音樂室。曹sir今日就扮到同我哋好friend咁，笑哂咁對住我哋。



「喂你哋吓，原來玩音樂咁叻嘅。」曹sir個樣真係好鬼假。

「Err⋯⋯大家畀面啫。」我答曹sir。

「嗱，一陣彈好啲呀。」呢個時候嘅曹sir都仲係笑容滿面，佢攞出一包喉糖，問Miss Lui：「Miss Lui，要唔要食粒呀，開聲喎。」

「唔使喇，唔該。」Miss Lui搖搖頭擰擰手咁講。



因為曹sir應該係唔識音樂，所以我哋揀咗個啱Miss Lui嘅Key。



「～別離沒有對錯，要走也解釋不多，現代說永遠已經很傻，隨著那一宵去火花已稍逝，不可能付出一生那麼多～」



估唔到Miss Lui唱歌都幾好聽喎，未至於聲線甜美，但係就好穩。曹sir仲要聽到好陶醉咁。



「～情盡時就要放過，我怎會想穿心窩～」



但係一到曹sir呢，就完全唔啱音，但係偏偏佢仲以為自己唱得好好聽咁⋯⋯



佢突然之間停低：「喂你哋係咪唔識彈呀，好似跟唔到我咁嘅。」



「唔係呀曹sir，係你個Key入唔啱呀。」Miss Lui同曹sir講。

「吓，佢試多次。」

「～情盡時就要放過，我怎會～」

「個Key咁怪嘅，我平時都唱到㗎。」曹sir講。

「可能班學生就我，因為我唔係好識唱歌。」Miss Lui同曹sir講。

「咁唔緊要啦，Miss Lui我就你啦，我係1980年葵青區兒童歌唱冠軍嚟。」曹sir好有自信咁講。

我聽到呢度，好唔爭氣咁笑咗出嚟。

「劉星隨，你笑咩呀？」曹sir即刻黑面。

「冇，我覺得曹sir真係多才多藝，係我哋學習嘅對象。」我好假咁講，見到Miss Lui都有偷笑。

然後試咗幾次，曹sir都入唔啱Key，因為對佢嚟講Miss Lui個Key太高。

「我諗不如我哋唔好唱呢首啦。」Miss Lui講。我哋嘅計劃亦都成功咗一半喇。

「咁不如試吓唱其他啦，《好好戀愛》啦不如。」曹sir咁講，結果我哋都偷笑，因為中哂樂少估計。

「Err…」Miss Lui唔知點講好。

「不如咁啦曹sir，你哋一人唱一首啦。」Sky同曹sir講。

「一人唱一首？」曹sir講。

「係囉，夾硬合唱又唔好聽。」Miss Lui咁講。

「咁呀。」

「係囉，曹sir你話哂係葵青區兒童歌唱冠軍，點都應該自己solo一首啦。」我扮哂嘢咁奉承曹sir。

「係囉，唔使你夾硬就我嘛。」Miss Lui扮哂唔好意思咁同曹sir講。

「咁呀，你哋講到咁，好啦。等我唱首《喜歡你》啦。」曹sir講。



《喜歡你》係Beyond嘅名曲之一，其實我都想試吓夾好耐，不過曹sir唱，我又冇咩興趣囉。唔知Miss Lui又會係咩反應呢。



「好呀！咁我就等聽曹sir你唱歌啦，我走先喇。」Miss Lui睇嚟諗住掉低我哋走先。

「咁Miss Lui你唱邊首呀？」曹sir問。

「Umm⋯⋯我諗我都係做觀眾好啲，專心聽曹sir你唱歌啦。」Miss Lui原來終極目標係想連歌都唔唱。

「唔得，啲同事都期待你唱㗎，唱一首啦。」曹sir係咁叫Miss Lui唱歌。

「咁我返去諗下唱咩先，遲啲我會叫佢哋練。」Miss Lui都係逃走咗。



我哋之後就陪曹sir練多咗陣，對耳真係辛苦到呢⋯⋯

「好啦，今日練住咁多先，你哋快啲快屋企呀，夜喇危險呀。」曹sir竟然叫我哋早啲返屋企，睇嚟音樂真係可以改變一個人。

「仲有你哋自己都要表演呀，諗好唱咩未呀？定唱返上次Open Day嗰首？」曹sir問。

「我哋仲諗緊。」我同曹sir講，然後曹sir就離開咗。

「係喎，咁我哋夾咩歌呀？」太一問。

「Umm⋯⋯我作咗首歌，不過未填詞㗎，你哋聽吓。」我講。

之後我拎起咗枝木結他，唱咗我作嗰首歌。

呢首歌我只係用咗最簡單嘅4536Chord，而我作嘅時候係諗住上次On Show嘅畫面，如果寫歌詞，可能會寫一啲我哋嘅友情故事掛。



「阿錘你係咪抄咗人哋啲歌呀？」樂少問。

「緊係冇啦！不過可能因為Chord都係嗰啲掛。我都知唔掂㗎喇。」我答。

「好好聽喎，有種好熱血嘅感覺呀。」太一講。

「我就係覺得好聽先問你有冇抄人咋。」樂少講。

「我即刻有好多畫面，同埋結他我都諗好點彈啦。」Sky講。



估唔到佢哋三個都覺得首歌OK，搞到我好開心添。



「不過我哋應該點彈好呀？」樂少問。

「我嘅Rhythm應該同我啱啱彈差唔多，之後就等太一編咗個鼓先，你再跟鼓去加Bass Line，Sky就要諗Intro同Solo點彈。」我講。

「不過都係等填咗份詞先啦，唔係編咗曲都冇用。」我補充。

「咁填詞就交畀阿錘啦，因為你讀文學㗎嘛。」樂少咁講。

「冇錯呀，阿錘你可以一路詞填一路改旋律同Phrashing。」Sky咁講。

「其實寫字我都識嘅，不過我淨係讀中西史，所以創作就交畀你喇。」太一咁講。

雖然我都估到情況會係咁，不過既然我有讀文學，應該挑戰下寫歌詞嘅。

「好啦，咁⋯⋯我試吓先。如果填得切我哋就唱新歌。」

（Tbc.）

31 - 《懶》

由我話要填好份詞嗰日計起，已經過咗5日，但係我仲係一粒字都寫唔到，填詞真係好需要靈感，反而作曲就冇咁困難，我發現與其夾硬諗旋律，不如諗住一啲畫面同感受，咁自自然然就哼到一啲旋律出嚟。不過點算好呢，仲有十日就到聯校教師晚宴，唔通要再唱多次《自動勝利》？



第二日，我帶住呢個填唔到詞嘅狀態返學。



「點算呀，我完全填唔到詞呀。」我同「黑色西炒飯」佢哋講。

「咁都冇辦法啦，玩返《自動勝利》先？」樂少講。

「唯有係咁啦。最容易而且又唔使練嘅方法就係玩返《自動勝利》。」我答。

「不過咁喎，又係『遇怪魔』有啲Hea喎。」太一講。

「都係我太高估自己啦⋯⋯」我講。

「留返遲啲啦，首歌阿錘你一定會填到，呢個係我嘅直覺。」Sky講。



Sky嘅直覺有時係好準嘅，我諗我應該都會用一日寫到掛。不過算啦反正呢首歌我都諗住係寫我哋四個嘅友情，慢慢寫都唔遲吖。



「咁使唔使練下先呀？」樂少問。

「要呀，不過仲要幫曹sir同Miss Lui練喎，我哋都唔知練唔練得切⋯⋯」我講。

「Miss Lui諗咗唱咩歌未呀？」Sky問。

「唔知呀，一陣上堂問吓佢囉。」我講。



「死喇，一陣中文堂，我未做閱讀報告呀！」樂少講。

「你睇序同名人推薦得㗎喇。Miss Lui唔會鬧你嘅。」我講。

「係咪真㗎？」

「我篇篇都係咁寫嘅，全部都A㗎！」



「阿錘你，都幾懶喎。」Sky講。

「其實Sky你都唔好我好多咋喎。」我望一望Sky。

「不過我成績好過你好多喎。」

「超～」

「我可以考高分啲㗎，只係如果考頭10名嘅話每年年尾都要上台攞獎，真係太煩喇。」

「所以你就Keep住每年都考第11呀？」估唔到Sky考第11嘅原因竟然係唔想上台攞獎⋯⋯

「Yeah。」Sky又出個Peace Sign。



「但係我又唔係咁睇喎，由我識你哋嗰日開始，你哋就好勤力，特別係阿錘呀，你真係有畀心機練唱歌同結他㗎，Sky都係呀，所以你哋唔懶。」太一突然講出呢番說話，果然熱血白痴都有細心嘅一面。



「懶呀⋯⋯」



咁講都啱嘅，我平時又真係成日畀人話我懶，但係講到夾Band我真係唔覺得自己懶，相反仲幾勤力添。



完咗中文堂之後，我哋就問Miss Lui諗住唱咩歌，而Miss Lui就話唔想唱情歌，所以就諗住不如唱啲大家會笑嘅歌就算，佢包括提出有《皆大歡喜》、《財神到》、《少理阿爸》同埋我哋首校歌⋯⋯



「你係咪認真㗎Miss？」我問Miss Lui。

「反正都唔知唱咩，唱校歌觀眾就實有反應，而且都年尾唱定《財神到》分分鐘有利事逗添，個晚宴仲要喺間酒樓搞。」Miss Lui好似真係咁諗。

「好似都有啲道理，咁不如就唱校歌啦。又唔使點練，加上校歌好易彈。」我講。

「咁就唱校歌啦。」Miss Lui講。

「Rock版校歌好似幾有趣喎。」樂少講。

「OK喎！」我真係覺得呢個題議好好。

「咁我哋今日夾啦！Miss Rock is ready！」Miss Lui好有朝氣咁講。

「唔好意思呀各位，我同樂少要留堂呀，我哋Georga份功課冇做。」我同佢哋講。

「同埋太一今日要去上日文班。」樂少講。

「咁不如我同Miss Lui練住先啦，聽日再一齊夾。」Sky笑笑口咁講。

「都好喎。」Miss Lui講。



於是，我同樂少就去留堂室做Georga份功課。



「你有冇發覺Sky好似好鍾意痴住Miss Lui呀？」我一路做功課一路問樂少。

「係咩？不過講起Sky上中文堂又真係專心啲喎。」樂少答。



「OK，搞掂！」我已經做完份功課。

「咁快？」樂少問我。

「你將啲字寫大啲，Keyword擺前面，解釋就寫短啲，因為老師改簿嘅時候都係機械人，所以見到差唔多字就會畀分你。仲有啲4-5分題，唔好諗住做哂，隨便答就OK，重點係呢啲2-3分要拎哂，咁改正就做少題添。」我分析畀樂少聽。



地理功課我平時都唔會遲交，因為我會借呀輝份功課嚟參考下，然後再寫落去；注意係「參考」唔係「抄」，因為地理科嘅答案基本上Google下都會識答，對於呢啲唔需要創意嘅問題，只要明白個過程就OK。只係今日掛住諗份歌詞，所以做慢咗。



「你連改正做少題都計埋，真係絕喎。」

「使咩講。」

「不過如果你唔係咁懶，你Georga應該會幾高分。」

「算啦，我又唔係要做地理學家。」



「我落去買嘢飲呀，你要唔要？」我輕鬆咁講。

「檸檬茶啦。」



所謂嘅留堂室其實好自由，通常都會畀有教育文憑，但係未有位做老師嘅TA去睇，所以佢哋都唔會管太嚴。上年留堂室多數係一個靚女TA睇，所以樂少留堂都不知幾開心，今年就係一個斯斯文文嘅男TA睇。但係話哂都要「留堂」冇5點半都唔畀走，不過去籃球場跟隊打兩鋪，或者去廁所1個鐘，只要冇人發現都係冇問題。



我轉個身就落到去Canteen，買咗包維他奶同檸檬茶。反正有排先5點半，我諗住飲包嘢就上去音樂室諗Sky同Miss Lui，不過呢個時候有個人就過嚟我身邊。



「喂，劉星隨，補課呀？」

「罰留堂呀。」

「罰留堂仲出嚟飲維他奶，你快啲返去呀。」

「飲埋先啦，同埋我已經做完份功課喇。」

「成日都偷懶，你除咗夾Band就係咁懶㗎？」

「係掛⋯⋯『除咗夾Band就係咁懶』？」我突然對呢句說話好有Feel。



冇錯，呢個成日出現嘅人又係毛子蘭，雖然而家同佢一齊冇咩唔自在，但係成日要人跟規矩就麻煩啲囉。之不過，佢點醒咗我一啲嘢⋯⋯



係，我係懶，仲要懶到只係想夾Band！我個腦突然轉得好快，我好似有首歌衝緊出嚟咁！我要寫低佢！



「有冇紙同筆呀？」我問毛子蘭。

「我得枝筆咋。」毛子蘭畀咗枝Muji嘅啫喱筆我。



我喺銀包拎咗張買嘢嘅單出嚟，寫低咗呢兩句：「我懶到只想夾足一世Band，我懶到只想唱歌畀你聽。」



「咩嚟㗎？」毛子蘭問。

「新歌詞。」



呢次同上一首歌唔同，今次係即刻就有方向要用咩詞語。



「我懶到只想寫出一首歌，叫你⋯⋯感動。」我一路寫一路唱。

「我懶到只想⋯⋯這結他，我懶到⋯⋯不怕錯⋯⋯」寫寫下又冇咩靈感。



「你『只想唱歌畀』邊個聽呀？」毛子蘭問。



「唱畀⋯⋯我都唔知呀。」我同毛子蘭講。

「我返去留堂室喇，畀返枝筆你。」



我打算返去靜靜哋寫埋首歌先上去搵Sky佢哋，而且我有信心會趕得切教職員晚宴。

（Tbc.）

32 - 校歌

「～寧華，寧華，教育我們，做個勇敢的人～」Miss Lui唱緊校歌。


Sky同Miss Lui兩個喺音樂室，Sky拎住枝木結他幫Miss Lui試Key，然後喺手冊嘅校歌上面寫低咗幾個和弦，再用音符寫低咗鼓嘅節奏。



「你寫咩呀？」Miss Lui問。

「寫譜。畀佢哋睇㗎。好似咁樣，有Chord呢阿錘就可以返去練，有Beat太一就會睇得明，咁樂少就自然會跟到。」Sky笑笑口咁答。

「咁你呢？」

「我彈兩次就記得。」

「咁犀利？」Miss Lui有啲半信半疑咁問Sky。

「我背書都唔差啦，你知㗎。」

「不過你最近上堂又真係專心咗嘅，其他堂有冇都專心上呀？」Miss Lui問Sky。

「冇呀。」Sky諗咗一陣，然後好果斷咁答。

「你個司徒天吖！上堂要認真啲呀。」

「係。」Sky用平時上堂Hea答嘅Tone講。

「好啦，我要落去改簿呀。」



Miss Lui準備離開，但係Sky突然叫住Miss Lui。



「Miss Lui你，你唱歌係咪好易喊㗎？」

「吓，你點知㗎。」Miss Lui有啲驚訝。

「我估㗎咋，因為上次你同曹sir唱歌，我就feel到你忍住咗。」

「有時有啲歌詞會諗起啲嘢就會想喊。」

「咁係好事嚟㗎，證明你有投入首歌，如果唔投入首歌，技巧再多都冇用。」

「講到好專業喎。」

「Yeah。」Sky又出動Peace sign。



「我家姐以前都會唱唱吓歌就喊，成個傻瓜咁。」Sky有少少哀傷咁講。

「咁你家姐一定係個好人。」

「佢呀⋯⋯係呀。」Sky又笑笑口咁講。



「我有時覺得你哋好似，特別係笑嘅時候，而且講嘢都好似。上次陸陸運會你同我講『全力去做就得㗎喇』，佢以前喺我去結他比賽嘅時候都同我講過。」



「司徒天⋯⋯」Miss Lui未講得切之際，有有兩個人打開咗音樂室嘅房門。

＝＝＝分隨隔線＝＝＝

我入返去留堂室，好認真咁同樂少講：「今次掂喇，我諗到首新歌！」



「新歌？咁之前嗰首呢？」樂少問。

「遲啲再填過啦，今次呢首係《懶》！」我好有精神咁講。

「《懶》？咩懶呀？」

「我懶到只想夾足一世Band！」



我於繼續喺張單上面用簡譜寫低旋律，我基本上已經寫好咗副歌嘅旋律，只係差幾句歌詞。



「你覺得唔押韻O唔OK呀？」我問樂少。

「我諗冇咩所謂掛，《海闊天空》、《光輝歲月》都冇押韻。」

「好似又係喎。」



我聽完樂少咁講，就緊加冇理到押韻，我全力咁寫緊我嘅歌詞，將懶理世界，只係想夾Band嘅心寫落去，冇幾耐我就寫好咗Verse嘅旋律。



唔經唔覺時間就嚟到5點半，留堂室時間已經結束，所以我就同樂少帶住我首新歌上去音樂室搵Sky同Miss Lui。



我打開音樂室度門，見到Miss Lui同Sky好似傾緊偈。



「你哋練成點呀？」我問。

「幾好呀，我哋定咗個Key喇。」Sky答。

「係呀，都係決定唱校歌。」Miss Lui咁講。



「我諗啲老師一定笑死。」樂少講。

「係呀，就係想咁之嘛。」Miss Lui講。



「係喇Sky，我作咗首新歌呀。」我將份簡譜畀咗Sky睇。

「好似幾好喎，首歌係Pop Punk？」Sky睇完份譜就好似已經有諗法咁。

「係呀，估唔到你睇份簡譜就估到。」

「我唔係估㗎，係Feel到㗎，因為阿錘你啲字寫到好似雞冠頭咁。」Sky笑笑口咁講。



「兩次Verse，三次Chorus？」Sky問。

「係呀。」我答。



「果然阿錘你真係好懶呀。」

「係呀，我認我係懶。」



「喂阿錘你不如唱一次畀我聽先啦，我淨係睇份譜都唔明。」樂少講。

「好呀。」



我今次用咗電結他，將我呢首《懶》唱出嚟，雖然Verse未有詞，不過我都大概有畫面要寫啲咩，樂少同Miss Lui都好似聽得幾有feel。



「阿錘，我覺得Verse同Chorus都好聽，但係兩段嘢好似串唔埋，不如加多段喺中間啦。」樂少咁講。

「好提議喎，阿錘你加段Pre-Chorus啦。」



係喎，點解我會諗唔到加段Pre-Chorus呢。



「醒喎樂少！」

「因為我好有天份。」

「妖～」



「首歌係你作㗎？」Miss Lui問我。

「係呀。」

「好叻仔喎，如果你讀書有一半咁努力就好喇。」

「我好努力㗎喇『雷老師』。」

「又串我呀嘛劉星隨。好啦，我走先喇。」



Miss Lui就咁就走咗，然後Sky畀咗佢本手冊我哋睇。



「吓，Sky你竟然會寫譜？」我同Sky講。

「乜好出奇咩？」Sky講。

「少少啦，平時我哋夾Band你都唔帶譜嘅。」我講。

「因為要畀你哋睇吖嘛。」Sky又係笑笑口咁講。



因為校歌得1分鐘，所以Sky喺最後加咗Repeat Sign。不過Sky寫嘅譜大概feel到佢已經諗好哂點玩首歌，究竟Sky真正嘅實力去到邊，我都唔清楚⋯⋯只係呢一刻，我同佢仲有段距離。

＝＝＝分隨隔線＝＝＝

第2日放學，我哋同Miss Lui，仲有曹sir就喺音樂室練習，佢哋演唱嘅《喜歡你》同《寧華之歌》。



「～喜歡妳 那雙眼動人～」

曹sir望住Miss Lui唱，Miss Lui塊面除咗尷尬之外，都唔知有咩可以形容，但係曹sir就一副自我陶醉嘅樣。



「～像昨天 妳共我～」

辛辛苦苦終於捱完曹sir嘅「活潑動人歌聲演唱會」，其實我覺得我哋夾得幾好㗎，只係Vocal差咗啲。



到Miss Lui嘅《寧華之歌》，我哋學校嘅校歌同大部分學校都差唔多，都係唔啱音。因為Sky已經諗好哂編曲，所以大家都pick up得好快，太一馬上就掌握到節奏，樂少都跟得好快。至於我呢，因為Sky開始之前同我講只要彈Power Chord就可以，所以對我嚟講係食生菜咁食。


「～寧華，寧華，教育我們，做個勇敢的人～」

Miss Lui唱得真係幾好，聲線有力而且好夠氣，唔知係咪做老師練出嚟，加上Miss個Look，我諗如果化濃少少妝，加少少搖滾味嘅打扮，話佢係我哋嘅主音都冇人會懷疑。



「辛苦哂。」Miss Lui講。

「唔辛苦啦，有Band夾我哋都開心。」我講，其實同Miss Lui夾我係enjoy嘅，不過同曹sir夾就最好唔好有下次。

「Miss 你唱得好好呀。」Sky同Miss Lui講。

「你班馬騮吖，估唔到彈得似模似樣吓。」曹sir同我哋講。



平心而論，如果唔係之前嘅恩恩怨怨，曹sir呢幾日算係一個Nice嘅老師嚟嘅，只係唱歌有啲難聽⋯⋯



兩個老師走咗之後，我哋就繼續首《懶》。

（Tbc.）

33 - 係呀，我認我係懶

我琴日用咗成晚嚟諗Verse同埋份詞，結果拖到三四點先瞓，不過終於叫做完成咗首歌，雖然好攰，不過呢啲，係咪就係追夢必須付出嘅代價呢⋯⋯

「我加咗段Pre-Chorus，然後歌詞我都寫好咗，我想喺Chorus-2 同 Chorus-3之間，加段solo，你哋覺得點呀？」我問。

「我覺得唔好。」Sky講。
「比起激情嘅Solo，中間呢個位應該要靜落嚟。」太一講。
「可以唔使去到咁爆，因為《懶》同《自動勝利》唔同，唔係嗰種一齊打怪嘅感覺。」樂少講。
「咁呀⋯⋯」
「不如加段橋啦。」Sky講。
「加段Bridge？」

橋，即係Bridge，係一段新嘅段落，通常旋律會同Verse或者Chorus唔一樣，連編曲都會有少少分別。

「咁我再諗下啦。」我有少少唔開心，估唔到捱咗成晚夜，佢哋都唔滿意我首歌。

Sky拎起我份歌詞。
「阿錘，你寫詞嘅時候有冇諗住邊個呀？」
「冇呀。」
「因為我睇唔明究竟個『你』係邊個。」
「即係點呀？」
「我都唔識講添⋯⋯」

樂少都拎起份詞睇。
「好似一開始係鬧緊人，但係之後又『只想唱個畀你聽』，咁你究竟係咪鬧緊人，定係你想唱畀人聽。」

呢一刻，我開始覺得自己嘅作詞能力真係好差，竟然連寫歌嘅對象都冇好好咁諗清楚，連樂少同Sky都發現到嘅問題，我竟然會完全諗過，枉我讀咗成年文學科，真係好唔甘心⋯⋯

然後太一拎咗份詞睇，佢認真咁思考咗一陣。

「我明喎。有時候我哋都可以懶理一個人，但係佢都可以係一個你好在乎嘅人，你好想證明畀佢睇，但係佢就一直覺得你玩玩吓，覺得你好懶，所以更加想話畀佢聽『我懶到只想夾足一世Band』。」

「好似又合理喎」樂少講。

「我諗⋯⋯係掛。」因為我真係冇認真諗過歌詞裡面嘅邏輯通唔通，我只係想寫低一啲感覺，反而太一竟然解得通係令我驚訝嘅，不過佢講到好身同感受咁，太一會唔會都有啲面對緊嘅問題呢⋯⋯

「其實我真係唔知自己寫咗啲咩，我只係想話畀覺得我懶嘅人聽，冇錯我認我係懶，但係我想夾Band，我想努力咁夾Band！」我補充。

「不過呢，其實啲歌詞都幾好笑吖，有種小學寫週記唔夠字數，然後喺篇文入面話『今天要做功課，但字數不夠，還差三十多個字⋯⋯』呢種。」樂少講。
「吓？！」
「冇錯，就係呢種感覺，阿錘你真係好懶呀。」
雖然畀樂少話似小學雞功課有啲不爽，但係我好似明白究竟我寫咗啲咩出嚟，我突然之間好似畀佢哋刺激到，已經有方法寫段Bridge！我喺份譜上面寫低咗一段歌詞，之後畀佢哋睇。

「好喎，呢個做法應該幾好笑㗎。」太一講
「如果呢段靜晒，然後我哋一齊拍手打Beat好冇呀？」Sky講。
「好似《We will rock you》咁？正喎！」我講。

「不如試吓夾一次先！」我興奮咁講。

「～人懶至會更有大志，至會懶得計較～」

「～我懶到呢刻唱歌lalala～」

唱到Bridge嘅時候，我哋就停晒手上嘅樂器，只係拍手，加上簡單嘅Bass Drum。

「～懶人也有自我的修養，訓教亦會去冚被。係呀，我認我係懶，下句嘅內容？唱唱下就副歌啦～」

結果又真係幾好Feel。果然靜一靜落嚟，比較適合我嘅懶人之道。

「～我懶到只想夾足一世Band～」

「阿錘，入Pre-Chorus嗰度使唔使畀多一拍你呀？好似有啲急喎。」太一問我。
「即係變5拍4？可以咩？」
「我諗冇所謂嘅，拍子係死㗎嘛。」
「既然你作為鼓手都咁講，我都想有一拍抖一抖可以換氣。」
「副歌完之後，好冇加多幾個Bar唱啦啦啦呀？」樂少問。
「我贊成呀。」太一同Sky都贊成。
「因為太Chur係咪？」我問佢哋。
「係呀。」

果然Full Band試一次之後先知問題，因為玩Pop Punk嘅關係，我喺寫歌嘅時候揀咗一個好快嘅Tempo，而且樂句之間好緊湊，首歌就變到好急同好Chur，的確要一啲時間去令首歌「慢落嚟」。

「好呀。」我答返佢哋。

＝＝＝分隔線＝＝＝

2013年12月20日

經過咗幾日嘅練習，《懶》已經準備好，而聽日就係聯校教師晚宴，要幫老師練嘅又搞掂咗，我哋自己首歌亦都好完美，真係非常順利，不過咁順利係咪好事呢，我有種不祥嘅預感。

因為今日係放聖誕假前嘅一日，我哋嘅班會主席朱傑就話想開個聖誕Party，所以成班就好即興咁Lunch Time出去買嘢食同飲品，我同樂少就被安排咗放學去拎Pizza，Sky就好似跟咗班女仔去整Decoration⋯⋯係因為佢讀VA定純粹係靚仔嘅關係呢？

「喂間Pizza鋪喺邊㗎？」我問樂少。
「前面之嘛。」樂少答。

我哋去到Pizza鋪，竟然見到Emma拎住盒外賣。

「Emma？你又喺度嘅？」我問Emma。
「係你哋呀，我哋班搞聖誕Party呀，所以我就嚟拎外賣囉。」Emma答我。
「得你自己咋？搞錯呀，點可以叫你一個女仔拎Pizza㗎。」樂少好緊張咁講。
「唔緊要啦，唔係Pizza嚟㗎，係外賣仔送漏咗啲雞翼咋，同埋佢哋好多人都要補課呀。」Emma微微笑咁答。
「我幫你拎吖。」樂少搶咗Emma盒雞翼。

Emma有啲推搪，但係都係畀樂少拎咗盒外賣。

「阿錘，我哋返去先嗱，你拎完Pizza自己返嚟啦。」樂少同我講。
「我哋5盒Pizza喎！」我講。
「我相信你得嘅。」樂少打晒眼色，用求緊我嘅眼神同我講。
「好⋯⋯」我死魚眼咁講，係人都知樂少想同Emma獨處，咁做兄弟嘅，捱下義氣囉。

於是我就自己喺到等拎Pizza。

＝＝＝分隔線＝＝＝

Emma同樂少兩個一齊行返學校。

「阿錘得唔得㗎？不如你返去幫佢啦。」
「唔使啦，阿錘好大力㗎。」

兩個人好似冇咩話題，路上伴隨佢哋嘅係尷尬同安靜嘅空氣。

「係呢⋯⋯」佢哋兩個同時開口。

「你講先吖⋯⋯」樂少講。
「你係咪為咗我先去夾Band㗎？」Emma問樂少。

（Tbc.）

34 - 跟蹤樂少？

樂少聽到Emma咁問，心裡面突然震咗一震，有種秘密被揭發嘅感覺⋯⋯

「Err⋯⋯」樂少唔知點答，「係呀⋯⋯不過我依家好似鍾意咗夾Band。」

「咁就好喇。」

「其實嗰日我聽到㗎⋯⋯」Emma講緊嘅時候，唔係好敢望樂少。

「吓⋯⋯」

「嗰日喺音樂室，我聽到你話想追嗰個女仔係我⋯⋯」

「吖⋯⋯係呀⋯⋯」樂少終於正式喺Emma面前透露咗自己暗戀佢嘅心意。

「你哋繼續努力夾Band啦⋯⋯我諗我哋可以做朋友嘅，好純粹嘅朋友。」

樂少個心突然灰咗，同每個收好人卡嘅人一樣，點都冇辦法開心。對於一個青春期少年嚟講，天下間最慘嘅一件事，係暗戀人畀人知道，而且對方拒絕你。因為當收到好人卡嘅嗰一刻起，就代表你要將暗戀人嘅心意隱藏，即係話連暗戀人嘅資格都冇埋。

佢哋行到學校門口，Emma拎走樂少手中嘅外賣雞翼，就好似拎走佢嘅心一樣。

「唔該哂你。」Emma好溫柔咁同樂少講。
「⋯⋯」樂少咩都講唔出，只係勉強咁笑一笑。

呢個時候樂少完全唔知可以做咩，佢個心痛到好似畀人挖空咗咁，連心跳嘅聲音都聽唔到⋯⋯

Emma望住呆咗嘅樂少，內心有啲內疚，佢拎住盒雞翼急急腳咁離開。

但就係佢準備上課室跑時候，Emma拎住盒雞翼，見到喺Canteen嘅Sky。

「係Emma你呀，買咗雞翼呀？好香喎。」Sky因為整裝飾好麻煩，落咗Canteen休息。

「係呀。Sky，我好似hurt到樂少呀。」

「咩事呀？」

Emma將啱啱嘅事講咗畀Sky知。

「哦，原來係咁呀。Emma你⋯⋯」

「點呀？我係咪唔應該咁樣講呀。」

就連一向我行我素嘅Sky都唔知應該點做，Sky伸出手想摸吓Emma個頭安慰佢，但係又諗起樂少叫佢唔好「摸頭殺」，所以又收返隻手。

「Emma你，係咪唔鍾意樂少呀？」

「我⋯⋯覺得樂少好搞笑⋯⋯但係我只係當佢係朋友囉⋯⋯」 

「如果真係唔鍾意樂少，咁做就啱㗎喇，樂少佢⋯⋯應該會冇事掛。」

「嗯⋯⋯」

＝＝＝分隔線＝＝＝

「喂樂少，企喺度做咩呀？Emma呢？」我見到樂少撞邪咁企響門口。

樂少只係嘆咗啖氣，然後同我行上課室。

「我好似衰咗？」

「咩呀？」

「Emma話我哋可以做朋友，可以做純粹嘅朋友。」

我望住樂少個樣，如果話上次佢見到Sky摸Emma頭係死老竇咁樣，咁佢今次係死咗全家。睇嚟應該係啱啱Emma同佢發生咗啲事，我冇問任何嘢。我拍下佢膊頭，其實我都唔知可以講咩安慰佢，所以我選擇唔出聲。

「我想走先，你幫我拎個袋落嚟得唔得。」

「好。」

估唔到，佢竟然連Party都唔想去，我諗今次真係好大鑊。

我上到課室幫樂少拎咗個袋，其實我自己都拎咗個袋。

「喂，打機吖。」我同樂少講。

「唔使啦，你上返去玩啦。」

「妖，上面都冇嘢好玩。」

「真係唔使喎，我想靜下。」

「咁你自己靜下啦，記住聽日要出Show呀。」

「嗯⋯⋯」

樂少就咁就走咗，但係其實我係有啲唔放心，因為識咗佢5年，從來都冇見過佢呢個樣⋯⋯

我一來擔心樂少，同時又擔心聽日出Show有冇問題，真係唔知應該點做好⋯⋯

呢個時候，我喺門口見到毛子蘭，冇錯又係毛子蘭。

「你走喇？」佢問我。

「係掛⋯⋯我都唔知呀⋯⋯」我都唔知返去定走好。

我略略咁同毛子蘭講咗而家咩情況，但係只係話畀佢知樂少唔開心，冇將佢同Emma嘅事講出嚟。

「咁所以你擔心佢？」

「係呀。」

「咁不如偷偷哋跟蹤佢啦。」

「吓？跟蹤樂少？」

「係呀，行啦，要快呀。」

毛子蘭就帶住我去跟蹤樂少，佢好似好專業咁，唔知同佢爸爸做私家偵探有冇關。

「你好似真係識咁喎。」

「我成日聽爸爸講點跟蹤人㗎。」

我估唔到毛子蘭會咁做，因為佢個人咁正經，我諗住佢會叫我唔好打擾樂少。

我哋一路離遠咁跟住樂少，佢個背影不斷散發緊一種衰愁嘅感覺。過咗冇耐，我哋見到樂少自己一個入咗網吧。

「點可以入網吧㗎，佢著住校服喎。」毛子蘭講。

「由佢啦今次，畀啲空間佢吖。唔該你吖。」我同毛子蘭講。

「咁你要唔要入去呀？」

「吓？你竟然叫我入網吧？！」

「咁你要跟蹤人吖嘛，不過你要除校服呀！」

「好啦。」咁都要我除衫，真係麻鬼煩。

毛子蘭好似都feel到樂少嗰種Sad，所以都冇阻止我。

「咁你入唔入呀？」

「我唔去喇，校規話唔可以去網吧或者機鋪㗎。」

「哦。」

其實呢間網吧，我都入過幾次，都不知幾安全，我見過有個叔叔喺入面上網捉圍棋添，不過佢一個女仔入網吧可能係危險少少嘅。

我喺門口望一望樂少喺邊，再叫門口個哥仔畀個角落頭位我。於是我就靜靜咁觀察樂少，呢個時候，我電話突然響起。

我即刻接咗，因為我鈴聲一定會畀樂少認得，好彩網吧咁嘈，佢應該聽唔到。

「喂？」

「劉星隨入面點呀？」

「毛子蘭？你幾時有我電話㗎？」

「Miss Lui畀我㗎，我係聽日聯校晚宴嘅學生統籌，佢叫你聽日返學校搬完Amp之後同我聯絡，所以就畀咗你電話我，叫我通知你。」

「係喎，聽日要搬Amp。」

「入面咩情況呀？」

「樂少打緊機囉，應該係CS掛，好似係咁開槍。」

「咁你呢？」

「吓⋯⋯」

「你都要投入啲㗎，唔係好易畀人發現你跟蹤緊人㗎，開個Game玩啦。」

完全估唔到呢句說話會出自毛子蘭把口，雖然佢應該只係想我好好咁跟蹤樂少。

打咗半個鐘左右，樂少連機都未打完就走咗，我諗佢根本冇放過心機喺鋪機度。於是我即刻打畀毛子蘭叫佢跟樂少。

「喂，毛子蘭，樂少出緊嚟呀。」

「咁你都快啲出嚟呀，我自己跟住佢先。」

呢個時候我望住樂少行出去，而佢好似已經發現到毛子蘭，所以我就停一停低先。

樂少望住毛子蘭。

「Hi，小蘭。」樂少同毛子蘭講。

「Hi，你做咩喺網吧打機呀？」

「你要同學校講呀？」

「咁又唔係，但係咁樣唔啱㗎。」

「你返去搵阿錘啦，今日我想靜吓。」

樂少就咁就行咗，我就即刻落去會合毛子蘭。

（Tbc.）

Penana已經寫到64集

追開可以望吓先
https://www.penana.com/story/151946/我們的某校勁band

最新消息會喺IG同Threads通知大家

IG：https://www.instagram.com/eastfiredrice/

Threads：https://www.threads.net/@eastfiredrice

35 - 我會發著呆

「又話成日聽爸爸講嘅？咁都畀人發現。」

「都係你太遲通知我咋。」

「繼續跟啦。」

我哋繼續跟住樂少行，佢自己一個去咗公園，喺路過嘅自動販賣機買咗包檸檬茶。如果唔認真望清楚樂少揸住嗰包係檸檬茶，應該每個人都會覺得佢係飲緊酒。

「樂少好似好唔開心喎，你不如去安慰下佢啦。」毛子蘭同我講。

其實我都唔知可以做咩，我又唔係識氹人嘅嗰種人，同埋係咪畀空間佢先係最好呢⋯⋯

「我諗畀啲空間佢啦⋯⋯」

毛子蘭冇出聲，就咁喺我隔離睇住樂少。

樂少拎咗部電話出嚟，聽緊一首歌，因為有啲遠我聽唔清楚佢播緊咩。

「你可以走先喎。」我同毛子蘭講。

「唔得。」

「點解呀？」

「我驚你哋又偷偷地去網吧或者入機鋪。」

「唔會啦，差唔多7點，你返屋企啦。」

就喺我哋冇留意嘅時候，樂少就已經行咗嚟我哋身邊。

「阿錘、小蘭，搞咩呀你哋，玩跟蹤？我一早發現咗你哋啦。」樂少同我哋講。

「唔係掛。」

「喺網吧我已經見到你啦。我冇事喎，你哋走啦。」

估唔到我哋跟蹤咁失敗，喺網吧已經畀人發現咗。

「其實好少事啫， 同埋有你咁做我已經好感動喇，你快啲送人返屋企啦。」

「唔使啦，我屋企好近咋。」毛子蘭講。

「一個女仔危險呀。」樂少係咁推我送毛子蘭走。

「聽日我就冇事啦，『我會發著呆，然後忘記「佢」』。」樂少用《軌跡》嘅歌詞，叫我哋走。

「咁你有咩事搵我啦。」我講完就走咗。

於是今次我就跟住毛子蘭走。

「樂少失戀呀？」毛子蘭問。

「其實都冇戀過。」我答。

「你又估到嘅？」

「《軌跡》吖嘛。」

毛子蘭都應該估到嘅，我哋呢啲垃圾學生，唔係煩愛情唔通煩學業咩。

「你同樂少點解咁Friend嘅？」毛子蘭問我。

「因為我小學其實係Band 1仔嚟，後來升中學因為成績差先入咗呢間學校，所以一開學嘅時候，我一個人都唔識，而第一個同我傾偈嘅就係樂少。」

「樂少係一個點嘅人呀？」

「樂少⋯⋯係一個好快樂嘅人，可能同佢個名一樣掛。佢好少會唔開心，好似做咩都係嘻嘻哈哈咁。」

「所以你就咁擔心佢？」

「係呀。」

「如果佢聽日出Show嘅時候唔出現呢？你會唔會嬲佢呀？」

「雖然有擔心佢會因為Emma而放棄夾Band，但係其實隊Band可以話係樂少搞㗎，佢因為想追女仔所以先開始夾Band，而我就係咁畀佢捉咗去夾Band，所以冇樂少就冇『黑色西炒飯』。如果佢真係想唔夾Band，我都唔會嬲佢。」

「原來係Emma，的確係靚女嚟嘅。」

「頂！唔小心爆咗添！」竟然一時大意⋯⋯

「你哋啲男仔真係呢。」

「咩呀。」

「有時仲少女心過啲女仔。」

「我到喇。」

佢屋企唔係好遠，只係10分鐘路。毛子蘭住嗰棟大廈係一間樓齡有啲大，舊舊哋嘅私人樓。

「雖然跟蹤失敗咗，不過今日唔該晒你。」

「唔使唔該啦，記住聽日要準時呀。」

「哦。」

如果唔計順路一齊行嗰啲，其實我好似係第一次陪一個女仔行返屋企，估唔到呢個人會係一開學就搞到我畀何副校記缺點嘅毛子蘭。

＝＝＝分隔線＝＝＝

聯校教職員晚宴當日

因為夜晚8點先開始晚宴，我就喺WhatsApp Group約咗下晝4點返去學校夾多一次，然後就一齊搬Amp去酒樓。結果今次Sky同太一都準時到，反而未見到樂少。

「我哋開始夾一次先啦，要試吓如果冇Bass會點。」Sky講。

「都啱嘅，但係⋯⋯」

「樂少會唔會唔嚟㗎？」太一講。

「佢全日都冇聽我電話呀。」

「佢當初係因為Emma先夾Band，依家會唔會真係唔想夾Band㗎。」太一講。

「我都唔知⋯⋯我打多次畀佢先。」

樂少電話都係冇人聽，佢平時唔會遲好多，但係今日過咗半個鐘都未出現。

「冇人聽呀，夾一次先啦。」

「～人懶至會更有大志，至會懶得計較～」

「停。」Sky一開始就嗌停，佢從來冇試過咁。

「阿錘你，咁樣上唔到台。」Sky同我講。

「我⋯⋯」我實在唔知點好，始終都係有啲在意樂少⋯⋯

「去咗酒樓先啦，差唔多要Set嘢。」太一講。

「哦⋯⋯」

我哋之後Call咗Van仔準備將Amp搬去酒樓，呢個時候樂少終於出現⋯⋯

「Sorry呀！搭車嗰陣唔少心瞓過龍，唔小心去咗尾站。」樂少好似平時咁有精神咁講。

「咁又唔聽電話嘅？」

「電話？你哋有打畀我咩？」樂少睇一睇電話：「原來冇電呀。」

「快手啲啦，我哋要搬Amp呀！」我用返平時嘅Tone同樂少講嘢。

「即刻搬！」樂少都好似變返平時嘅樂少。

「你真係冇事？」

「冇事喇，我依家想夾Band！」

我哋夾手夾腳搬嘢上車，然後我就打咗畀毛子蘭，佢叫我哋到咗就搵佢。

去酒樓嘅車程大概20分鐘，但係因為大家都驚會Hurt到樂少，所以冇問啲咩。

「喂，做咩咁靜呀？」樂少問。

「你⋯⋯點呀？」我問樂少。

「我聽咗成晚歌，就冇事喇⋯⋯唉，總之就依家狀態OK啦。」樂少答。

「樂少你，要唔要我摸下你個頭安慰你呀？」Sky問樂少。

「你搞我笑咩，如果你係女仔就可以考慮吓嘅。」

「唔緊要嘅，女死女還在，入到U大把女啦。」太一講。

「入到U就係嘅，不過你就好大機會入唔到U喇。」樂少又變返平時串太一嘅嗰個樣。

「頂你吖，鼓勵你都串我！」

「我講事實啫！」

睇住佢兩個咁樣，即係話樂少應該正常返，睇嚟今晚應該OK喇掛。

到咗之後，我就打畀毛子蘭。然後毛子蘭就搵咗幾個同學幫手，同我哋一齊搬Amp上去酒樓。因為呢個聯校教職員晚宴冇要求我哋著校服，所以我哋都係著返自己衫，不過毛子蘭佢哋啲Prefect就好似有被要求著校服。

「6點前就要set好，可唔可以呀？」毛子蘭問我。

「OK呀。」

我哋其實都只係搬咗幾個Amp，所以都係駁插蘇同電線，就已經Set好，但係鼓就麻煩少少，因為要再砌返，我哋都唔係好識幫手。太一自己一個好努力咁砌緊，而我哋就分別check緊結他聲同咪聲。

（Tbc.）

36 - 聯校教職員晚宴

「～我懶到只想夾足一世Band～」

我哋已經完成咗Sound Check，而家要做嘅係等時間到，我哋嘅表演會喺晚宴嘅後段時間，即係校長演講之前，所以可以食幾碟餸先上台。

今次呢個晚宴因為全校老師都出席，加上其他學校老師，同埋一啲學生，大概有200人。

學校安排咗幾圍畀我哋同其他學校嘅同學一齊座，順便交流一下。

我哋坐嗰張枱有12個人，有我哋「黑色西炒飯」同毛子蘭加兩個Prefect，一個男仔一個女仔，個男仔就係上次陸運會我話好識做嗰個「𡃁仔」，佢原來叫Louis。我哋嘅座法係同校嘅就貼住座，而毛子蘭就坐我左面，Sky就坐我右面。另外就有幾個其他學校嘅學生，佢哋個個都掛住咗個Prefect章，應該都係Prefect嚟，除咗一個女仔冇帶Prefect章，我見佢好似不斷望住我哋四個冇著校服嘅人咁。

「你哋點解唔著校服嘅？」嗰個冇Prefect章嘅女仔問我。

「我哋今日嚟表演，所以學校冇叫我哋著校服。」

「表演咩呀？」

「夾Band。咁你呢，你係Prefect？」

「我係校園電視台主持，我叫邱繕瑤，你可以叫我Yoyo。」

「我係劉星隨，隊Band嘅主音，我隔離呢個係結他手Sky。」

Sky微笑示好，但係就冇同Yoyo講嘢。

喺我同Yoyo自介緊嘅時候，太一同樂少已經開始同其他人傾緊偈，樂少繼續發揮自己社交達人嘅技巧，好似已經問咗好多嘢，太一就不停同人講我哋嘅事，毛子蘭就好安靜咁食緊嘢。

「樂少今日好似正常返？」毛子蘭偷偷哋問我。

「係呀，你見佢咁social就即係回復正常。」

「你做咩好似食咁少咁嘅？」

「因為一陣要唱歌吖嘛，所以唔可以食太飽。」

「點解嘅？」

「因為每次食太飽就會唱唔到啲高音。」

「而且阿錘佢，唔可以食太辣或者飲汽水，因為有機會沙聲同埋唱唱下打噎。」Sky咁講。

「係呀，平時夾Band我都盡量唔食辣嘢同飲汽水。」我講。

「估你唔到喎，原來唱歌都要戒口。」毛子蘭少少驚訝咁講。

「我好認真唱歌㗎。」我講。

時間去到一半左右，上多一道餸，我哋就要去standby。照Run Down排，首先係曹sir嘅《喜歡你》，之後就到Miss Lui嘅《校歌》，最後就係我哋嘅《懶》。

曹sir好似已經準備就緒，今日佢著咗套黑色西裝，仲打埋條呔，可能諗住深情咁演繹呢首Beyond名曲啦。毛子蘭作為統籌，佢通知我哋準備拎樂器，同埋去咗通知Miss Lui同曹sir。

我哋所有表演單位走咗後台隔離嘅一間細房準備，曹sir好似興致勃勃，但係Miss Lui就好似有少少緊張。曹sir嘗試同Miss Lui打氣，但係Miss Lui根本就聽唔入耳，Sky呢個時候行過去Miss Lui隔離。

Sky喺袋拎咗一條頸鏈出嚟掛咗喺Miss Lui條頸，條繩係一條有少少紋嘅黑色繩，吊住一塊結他Pick，Miss Lui有啲奇怪。

「你畀我做咩呀？」Miss Lui問Sky。

「平安符嚟，上次阿錘都係靠佢㗎。」Sky咁答。

睇嚟Sky真係好鍾意送Pick畀人，上次出Show之前都送咗塊畀我。

「嗯，好襯你。」Sky笑笑口咁講。

「真係？」Miss Lui問。

Sky點點頭。


「有請經濟科主任曹耀威老師上台演唱《喜歡你》。」MC叫曹sir上台，所以我哋都要一齊出場。

「校長、各位老師，大家好！今日晚宴咁高興，不如我送首歌畀大家好唔好呀？送畀你⋯⋯哋—《喜歡你》。」曹sir講「送畀你」嘅時候，係望住Miss Lui講嘅。

「～喜歡妳 那雙眼動人～」

曹sir經過咗好多日嘅練習，已經唱得唔算難聽，雖然個樣同啲歌詞係完全唔Match⋯⋯

「～像昨天 妳共我～」

「多謝大家，亦都要唔該晒我哋學校嘅同學幫我伴奏，大家畀啲掌聲佢哋。」

台下嘅老師畀咗大力嘅掌聲曹sir，的確就唱得一般，但係氣氛嚟講就算係咁嘅，起碼我見台下面啲老師都笑得幾開心。

跟住就到Miss Lui嘅表演，聽講佢冇同任何人講過佢會唱咩歌，所以全場都好期待Miss Lui嘅表演。

今日Miss Lui著咗件長袖白色冷衫，加條黑色嘅直筒裙，同埋一對黑色Boot，其實真係可以話係有型得嚟又高貴，加埋Sky畀Miss Lui條鏈，仲有幾分Rock味。

Miss Lui上到台上面首先係同啲老師揮手，然後就拎起咪。

「各位老師，今日我會為大家唱一首歌，希望識唱嘅可以一齊唱！」Miss Lui講完之後自己就笑咗出嚟。

校歌一響起，校長就顯得好興奮，可能佢都估唔到我哋會唱校歌，不過睇嚟Miss Lui喺老師之間真係好受歡迎，個個老師都拎晒電話出嚟拍片，而且真係大家都有跟住唱！我見Miss Lui唱唱下有捉住塊Pick，可能佢都仲有少少緊張啦，不過整體都非常好氣氛！

「多謝大家，唔該晒『黑色西炒飯』，你哋好叻仔，之後就交畀佢哋為大家表演。」Miss Lui好好咁幫我哋做埋介紹。

Miss Lui落台之後我就將枝Mic放咗上咪Stand，唔知係咪因為台下面全部都係老師，我好似又有少少怯⋯⋯

「各位老師早晨⋯⋯唔係⋯⋯晚安⋯⋯我哋係『黑色西炒飯』，我係5D班嘅劉星隨，左面嘅係結他手司徒天，右面係Bass手關志樂，仲有我哋嘅鼓手張太一。今日我哋準備咗一首原創歌，歌名叫做《懶》。」

「～人懶至會更有大志，至會懶得計較～」

唔知係咪因為大多數觀眾都係老師嘅關係，我發現《懶》好似唔係好啱場合，有種政治不正確嘅感覺⋯⋯

不過都冇得諗咁多，而家唯有繼續唱！

「～天空海闊廢事理，一於一切懶得理～」

冇錯，應該要懶理其他人先啱，做好自己最重要！

「～我懶到只想夾足一世Band～」

大概都望到有啲其他學校嘅老師繼續食嘢、撳電話，亦都有啲已經冇聽緊歌。不過我已經再冇在意過任何觀眾，我只係投入喺自己嘅世界入面，唱我想唱嘅歌，夾我想夾嘅Band！

「～係呀，我認我係懶，下句嘅內容？唱唱下就副歌啦～」

我用眼嘅餘光望向佢哋，Sky彈得好開心，個樣一直都係笑住，佢話緊畀人聽佢係享受緊，而樂少亦都好投入，睇得出佢好專注，雖然冇辦法睇到太一，但係喺佢嘅鼓聲入面，我就feel到佢嗰團火。

果然最主要都係睇自己，其實冇人聽有咩所謂，我哋自己唱得開心就得啦。

「～我懶到只想這刻啦罅喇～」

「多謝大家，我哋係『黑色西炒飯』！」

台下面嘅老師都有鼓掌，雖然整體冇上次咁好反應，不過又唔算好差嘅，連副校都有象徵式拍下手，我見到毛子蘭好似都畀咗個欣賞嘅笑容我哋。

（Tbc.）