【搖滾準備】《我們的某校勁BAND》【重開】

83 - 十八區

《地獄結他訓練所》聽到個名都嚇一嚇，於是我即刻上網search，果然全部都係推薦人練呢本野，我搵咗幾條片睇，真係痴線，我絕對冇可能彈到，除非由今日開始不分晝夜咁練，唔係冇可能⋯⋯

連Sky都彈唔到嘅嘢，我又有咩可能彈到呀，不過如果唔試吓，我就點都唔會進步，所以先要死一次。

＝＝＝＝＝＝

星期五嘅11號就係今年嘅結業禮，跟住落嚟呢4日就算係畀大家抖吓嘅日子啦，返學都係冇嘢做，鍾意就可以報吓興趣班或者課外活動。今日我哋班就會去禮堂聽一個講座，不過我已經預咗一入到去就瞓教。我坐喺最後排，樂少同Sky坐我隔離，前面就係魔人佢哋。

可能時間仲早，都係瞓唔著，不過我已經冇留心個講者講咩，好似係咩未來電腦科技嘢⋯⋯我已經遊緊雲。突然望住嗰台，我喺度諗，本來琴日我哋應該喺度表演，而唔係喺籃球場，不過又錯有錯著，玩咗個我好滿意，氣氛又好好嘅Live。或者命運有時就係咁，當你好想做一樣嘢，但係又點都會有人阻住晒，迫你行另一條路，但係又好彩⋯⋯嗰條路原來更加好玩刺激，可能要冒險啦，不過就會有更好玩嘅回憶留低。

「阿錘，放學陪我去個地方吖。」樂少膝頭撞一撞我。
「去邊呀？」
「冇，想買條Bass帶啫。」
「哦，咁去通利囉。」

「唔係呀，我想去馬鞍山呀。」
「吓，咁遠？」
「我見到個Facebook Post，我想買個款得嗰間有咋。」
「咁是旦啦。」

估唔到樂少會想去到馬鞍山咁遠，買條帶啫，使唔使咁麻煩呀？近近哋去尖沙咀咪算囉。

「Sky，去唔去馬鞍山呀？」樂少問Sky。
「馬鞍山呀？都好喎。」
「你咁遠都去？唔似你喎。」我講。
「因為今日心情好好，想周圍行吓。」

肯定係琴日場Show太好玩，所以連Sky都將開心延續到今日，不過又真係，我都覺得今日個人勁有精神，可能係Show之後嘅能量提升咗。

之後，我哋就捉埋太一去馬鞍山，由學校計起，就算搭地鐵都起碼要45分鐘先到。

「我咁大個人都冇去過馬鞍山。」太一講。
「雖然香港好細，不過始終有啲地方係冇去過。」我講。
「講開又係，香港都未去勻，仲成日想去外國，香港人真係麻煩。」樂少講。
「不如，我哋去晒十八區巡迴啦。」Sky講。

十八區巡迴演唱會？雖然聽落真係好無聊，不過諗諗吓又好似幾好玩。

「好啦，就咁決定啦，我哋要去晒十八區巡迴。」我講。
「邊有咁易呀。」樂少講。
「咁緊係唔係而家啦，不過總會有一日，我哋會喺晒十八區開Show。」我講。
「好啦，就咁決定，我哋要做香港第一隊Band開晒十八區巡迴演唱會！」太一好熱血咁講，搞到全車人都望住我哋。

「如果係咁第一站就去『流星記』開啦，由小人場開到大，最後就紅館啦！」樂少講。
「紅磡體育館定紅磡殯儀館呀？」Sky笑笑口講。
「撞鬼咩，點會喺殯儀館開演唱會呀！」樂少即刻反駁Sky。

不知不覺間，我哋嘅嘈吵聲已經傳開晒，好似好多人望住我哋添。雖然唔知佢哋有幾認真，不過呢種感覺真係好好⋯⋯大家一齊發夢，就算最後唔知會點，都係好正，我真係好想而家就開始，好想盡一切努力完成呢個目標。

終於都到咗馬鞍山，樂少想買嘢間鋪喺一個商場入面，我哋跟住指示牌，好快就搵到咗個商場。

入到商場之後，樂少就負責帶路，之後我哋就喺二樓搵到嗰間鋪。

呢間樂器鋪係一間細鋪仔，應該係畀街坊學樂器多，我見有嚟上堂嘅都係小學生，不過個個嘅樣都唔多高興。咁又係嘅，而家香港嘅教育制度，好推崇小學生學樂器，因為識多樣樂器，對於升中學會有分加⋯⋯我自己就對呢種做法好反感，我細個都唔鍾意被人迫我學呢樣學嗰樣，就好似我細個學過舞龍，到而家都仲係咁討厭，因為強迫而學習嘅，好多時只會有反效果。

雖然話鋪頭細細，但係結他帶同Bass帶又幾多款，搞到我都想買返條。樂少好快就搵到佢想買嗰條，一分鐘內就畀好晒錢，真係快。

「吖。」Sky好似發現到啲咩，「就係呢本喇。」Sky手上拎住嘅就係《地獄結他訓練所》。
「原來呢度都有得賣呀。」我拎起本書之後，慣性望吓後面有冇價錢牌。

「咦？50蚊？又會咁平嘅？」我睇真啲，原來呢本係簡體字Version，所以賣得平啲。

「呢本都係正版授權㗎，不過因為簡體字所以先平過繁體字版。」個店員姨姨見到我咁疑惑就同我講。

原來係咁⋯⋯其實都係咁練啫，裡面啲譜我畀Sky睇過，佢都話一樣，所以我就決定用50蚊買咗呢本簡體字版嘅《地獄結他訓練所》。

就係咁，我哋前後唔夠10分鐘就買完嘢。

「咁我哋而家就走？搭咗成個鐘車喎，嚟馬鞍山10分鐘？」我講。
「咁一係踩單車囉，依家先兩點。」樂少講。
「都好喎。」太一好興奮咁講。

於是，我哋就去咗踩單車，我哋嘅目標係踩去大埔，然後再喺大埔走。諗起上嚟我都兩年冇踩過，今日有少少風，都幾舒服嘅。租咗車之後，最快嘅係Sky，佢好似突然差足電咁，然後就係太一追上去鬥快。樂少就一直跟喺我後面，用我破風，佢話咁慳力啲喎。

成日好羨慕日本啲漫畫，學生可以踩單車返學，原來著校服踩單車都唔係咁好玩，都幾難踩。我哋一路踩，直到開始黃昏，我哋都到咗大埔。望住慢慢下降嘅黃昏，突然有少少想唱「夕陽無限好」⋯⋯

呢幾日都過得好充實，而且好自由，好多嘢都好似亂嚟咁，不過同呢3個人一齊，就好似咩問題都冇，幾亂嚟都好，最後都會平安無事。都係因為佢哋，我嘅中學生涯先至唔使空白一片，可以夾我最鍾意嘅Band，如果日子可以一直咁就好。

就係咁，我哋「黑色西炒飯」嘅第一次馬鞍山之旅就咁樣結束咗。

（Tbc.）

84 - 中五結業禮

一返到屋企，我就打開咗《地獄結他訓練所》，諗住認真練，點知即刻就發現唔係人咁品，第一個Chapter就係BPM 160嘅16分音符，而且4個小節4個Bar連續彈，右手嘅續航力同左手控制力都要提升，結果我練到右手開始痛，就停低休息咗一陣。果然，要成功提升功力就要先落地獄一次。

抖咗一陣之後，我又再練過，不過愈彈就愈灰，我由100BPM開始練，慢嘅時候都彈到，但係一快少少就開始捉唔到拍子，有時快又有時慢，而且Down Pick同Up Pick嘅聲都唔平均，愈練就見到愈多問題。

＝＝＝＝＝＝

時間話咁快，就已經到咗結業禮當日，經過咗一整年個學年，最後要做嘅事最係拎埋今年嘅成績表，同埋結業禮。但係仲喺馬路行緊，未入到學校之前，我就覺得有啲奇怪⋯⋯

「喂，樂少，你覺唔覺得今日好多人望住我哋呀？」我問我隔離嘅樂少。
「係呀。鬼叫你呢期咁出位咩。」樂少講。
「吓？」
「啲低Form拍咗我哋Band Show，你同Sky勁多大頭，依家你人氣王嚟㗎。」樂少講。

唔係呀嘛？我都會人氣急升？雖然都唔係反面嘅事，但係成日有人望住，我就有啲唔自在⋯⋯

上到課室之後，文sir都冇講咩廢話，升中六嘅暑假唔會好似低年級咁，過一個假就唔同晒，因為我哋班暑假都成日要返嚟補課，所以唔使講咩道別之類嘅說話。

到咗派成績表，我因為地理炒咗，所以成績唔多好。我哋學校除咗頭20名都唔會顯示名次，當然樂少都冇排名啦，我哋「黑色西炒飯」唯一有排名嘅係Sky，今次佢又成功考到第11位⋯⋯真係吹脹⋯⋯

我哋之後就落去禮堂聽校長最後嘅結尾致辭。

「又一個學年圓滿結束。喺呢度，我要感謝每一位喺呢段旅程中付出努力嘅人，因為你哋嘅努力同奉獻，令呢間學校成為一個充滿活力同希望嘅地方。作為校長，我好榮幸可以見證每一位同學嘅成長，無論係學業、體育、定藝術各方面嘅努力，呢一切都令我覺得好自豪。呢個唔單止係一份成績，更係一種勇氣同堅毅嘅體現。我希望你哋喺間學校唔單止學到知識，仲學到點樣面對挑戰、克服困難同保持勇敢⋯⋯祝大家有個愉快嘅暑假。」鄧校長講。

今年鄧校長嚟咗真係好，除咗幫音樂室加咗好多器材，都幫我解咗好多次圍。一開始畀副校捉頭髮長，冇得玩Show又係校長幫我，上次畀副校記大過，又係校長出奇招記我哋大功而冇事。可惜佢冇喺現場聽我哋首《Special Thanks》，其實佢都算係其中一個我要多謝嘅人。

講起上嚟，大過同大功兩件事都冇人執行過，副校講完要記我哋大過之後就冇咗件事，訓導組都冇老師搵我哋。校長就啱啱先喺英國返嚟，所以我哋個大功都未有著落，不過算啦，我哋都唔想搞咁多嘢，只係想好好做個夾Band嘅乖學生咋。

係喎，每年嘅年尾都會頒校長盃。即係所有社活動入面最高分嗰個社，我諗今年我哋寧社應該會威返次掛，咁多年都未贏過。今屆校長盃，我都貢獻咗唔少㗎，除咗我辛辛苦苦贏返嚟嘅跳高銅牌，仲有接力賽仆損晒嘅膝頭。

「最後，照慣例，我要宣報今年校長盃嘅結果。」

「得獎嘅係——寧社！」校長終於喺台上宣布賽果。

因為賽果一直都保密，所以冇人知道最後結果，當校長宣布結果嘅一刻，反應最激動嘅係寧社嘅幹事，A班嘅呀龍、拓爺佢哋兩個即刻衝咗上台攞獎，慢慢其他社幹事都行埋上去，當中就包括毛子蘭。

呀龍作為代表講咗幾句得獎感受，個Feel有啲似睇電視台頒獎典禮，見到啲人拎最佳男主角咁，佢個樣非常感動，首先多謝一班社員、社幹。毛子蘭企喺後排⋯⋯佢好似望住我，咁所以我又望住佢，毛子蘭之後就偷偷哋笑咗一吓，然後又再望返住佢前面嘅呀龍。

今日嘅結業禮就係咁順利完結，我哋各自返課室攞埋袋就走得。

「終於完喇。」Sky返到課室之後伸咗個懶腰。
「係呀，今年咁就完咗。」我講。
「你哋就好啦，學生會仲要落去埋數呀，成年財政都唔知點算好。」樂少講。
「咩呀？你哋唔係有財政咩？」
「係就係有，但係佢本身數學都炒嘅，頂住個雞頭咋。我要落去幫手呀。」樂少好唔情願咁走咗。

「我都落去搵Miss Lui呀。」Sky講。

自從Band Show嗰日之後，Sky又好似以前咁成日痴住Miss Lui。本身仲諗住同樂少佢哋Hea多陣添，唯有睇吓「激情對話」有咩玩啦。

「Yo，放學有咩玩呀？」我問「激情對話」佢哋。
「冇呀，打機囉，你啱咩。」朱傑講。
「其實就唔啱嘅。」

咁冇辦法啦，我唯有自己走啦。

落到地下就見到寧社班人好開心影緊相慶祝，呀龍見到我之後就好熱情拉咗我過去。

「阿錘你都有貢獻㗎，要唔要捧吓個盃。」
「都⋯⋯好吖。」

估唔到個盃又幾重，我試吓舉高佢，點知竟然跣手。

我飛身捉住隻盃，因為唔可以畀佢爛，於是我就跌咗喺地下。呢個時候，毛子蘭走嚟我面前影低我。

「唔好影啦。」
「搞掂。」毛子蘭笑到執到寶咁。
「Del咗佢啦，好樣衰呀。」
「唔制。」毛子蘭仲笑緊。

唔知點解呢個場面好似有啲熟口面⋯⋯吖，啱啱開學嘅時候就試過，之後我跌咗銀包。我即刻睇吓銀包有冇跌到，好彩仲喺度。

毛子蘭慢慢行開咗，我將個獎盃畀返呀龍之後就追上去。

「你差我5蚊呀？」毛子蘭講。
「吓？」
「維他奶數。」
「係喎。」之前聯校教職員嗰晚，佢請我飲咗維他奶，而家諗返好似過咗好耐咁。

「請我飲先啦，我考慮吓。」

我喺Canteen買咗維他奶畀佢。

「你好似變咗。」我同毛子蘭講。
「有咩？」
「除咗成日用我啲錢飲維他奶。」
「明明我都有請你飲。」

「以前我覺得你個人好古板，連抄功課都舉報我。」
「咁你係唔啱呀。」
「係⋯⋯我都認嘅。不過你最近好似愈嚟愈⋯⋯唔守規矩。」
「咩呀。」

「快啲Del返張相啦。」
「我話考慮吓咋，都冇話Del。」毛子蘭返咗去同班社幹事玩。
「算啦，畀你Keep啦。」我大聲同走緊嘅毛子蘭講。

其實毛子蘭又冇咩變嘅，特別係喺整蠱我方面，由偷我張20蚊紙開始，已經好鍾意整蠱我。

「阿錘，我哋一於參加比賽啦！」呢個時候Sky突然喺我後面講。
「咩比賽呀？」

（Tbc.）

85 - 要參加比賽？

「Miss Lui推薦我哋參加一個比賽，喺8月嘅一個禁毒原創歌比賽。」Sky講。
「好喎。但係又要原創歌呀？」雖然時間好似有啲急，但係好似都幾吸引。
「我send咗條Link出嚟。」Sky拎出電話，「交畀阿錘你報名喇。」
「哦。」報名呢啲嘢Sky又點會負責吖，「但係都要問吓太一同樂少。」

「嗯。咁都交埋畀阿錘你喇。」Sky又笑笑口咁走咗。
「好啦。」我之後就喺我哋個Group同佢哋講，同時我都填緊份報名表。

禁毒比賽，仲要係原創歌，好似都幾有意思，但係毒品呢樣嘢，我就完全冇接觸過，我諗我哋都冇啦，感覺上好難捉摸到。

截止日期係8月15號，要有完整歌詞同Demo或者一條收音清晰嘅完整影片，截止3日之後就會公佈最後8強，到時會再有一場Live表演嘅決賽。即係仲有一個月，錄歌就有啲麻煩，我哋要買好多器材，或者係出去租Studio，咁我諗都係拍一條片就算。

夜晚嘅時候，佢哋都覆返我，兩個人都冇問題，咁所以我就約咗星期日夾Band同埋一齊作首歌。

禁毒歌，一個有啲老土嘅主題，我上望search吓其實有啲咩出名歌嘅主題係禁毒，唔講唔知，陳百強嘅《摘星》原來係一首禁毒嘅歌，因為年代久遠，我只係好細個嘅時候喺啲叔叔嘅屋企聽過。我一直都冇深究主題，以為「我要踏上路途，我要為我自豪」係一句簡單嘅勵志歌詞，但係今日睇返就有完全唔同嘅感覺。

《摘星》嘅填詞人將毒品比喻做一間叫「後悔」嘅鋪頭，主角就畀入面嘅人捉住，但係佢就決定要行自己嘅路，「我要摘星，不做俘虜」。讀文學之後就對呢啲文學作品，多咗一份賞析，以前嘅年代用字比較豪邁，比喻會直接啲。呢種寫法喺現代流行歌好似好少，近代嘅流行歌，比喻會冇咁明顯，而且都好少寫到咁豪情萬丈，如果我而家寫「我要踏上路途，我要為我自豪」可能就唔會咁經典。

＝＝＝＝＝＝

到咗星期日，我哋又嚟到咗The Echo，喺度傾緊點作首比賽歌。

「我想熱血啲，一於話吸毒係大Boss，然後我哋就係英雄去討伐佢。」講呢番說話嘅當然係最熱血嘅太一啦。
「一係聖詩咁囉。神聖Feel啲應該可以掛。」樂少講。
「我就覺得用簡單直接嘅嗰種Feel就Ok。呢啲比賽通常應該都係睇歌詞，咩Genre反而唔重要。」Sky講。
「都係嘅。」

「咁不如叫《選擇》？」樂少講。
「好似有啲Feel喎。」我講。
「係呢。好多時所有嘢都係一種選擇，吸毒定唔吸毒，就取決於自己。」
「嘩，講到你好似吸過咁⋯⋯」

「咁我又冇⋯⋯不過呢，我有個小學同學因為吸毒出咗事⋯⋯」樂少語氣好婉惜。

原來樂少有個好朋友，自從升唔同學校之後就疏遠咗，佢漸漸學壞，加入咗黑社會，喺學校蝦蝦霸霸，夜晚又唔返屋企。最後中二嗰陣，就畀佢學校踢出校，而且已經入咗男童院，呢啲係另外一個朋友同樂少講嘅。

「咁大鑊呀⋯⋯」太一忍唔住講。
「到依家我都會諗，如果佢都升到寧華，有我陪住佢可能就唔會搞成咁⋯⋯」
「好啦，樂少今次就同阿錘一齊寫詞啦。」太一講。
「你哋唔參與咩？」我講。

「你知我中文差啲肥啦。」太一講。
「我對寫歌詞都冇咩信心呀。最多幫手作曲啦。」Sky笑笑口講。
「好呀。」我對Sky嘅作曲好期待，因為Sky平時編曲上都已經有好多好好嘅Idea，不過就冇作過曲。

就係咁，我哋嘅下個目標就係贏呢個比賽。

「係喎，贏咗有咩獎品呀？」樂少講。
「睇吓先。」我打返開官網，「冠軍2000蚊，亞軍1500蚊，季軍1000蚊，殿軍就得嘉許證書。」
「咁我哋就一於贏2000蚊啦！」樂少講。
「邊有咁易呀，有1000蚊都好好啦。」我講。

「阿錘你畀啲信心啦，一係就唔贏，一係就要冠軍。」Sky笑笑口咁講。
「係喎，點解Miss Lui會叫我哋參加嘅？」我問。
「好似話Miss Lui佢有個朋友喺主辦單位度做，所以問佢有冇學生參加。」Sky講。

原來又係Miss Lui嘅魔力，不過算啦，得Miss Lui先可以令Sky由冇精神變到Full Power狀態。

一個月嘅時間，唔知夠唔夠呢？上次嘅《忍樣》係好快手，但係都係多得何副校「幫手」咋，畀佢激一激我先有靈感。《Special Thanks》就由新年假開始諗，去到上個月先完成。而且今次呢個題材同我嘅生活又冇關係，好難搵到刺激，唔通叫我去吸毒咩？

上次喺圖書館睇神書話「LOYALTY」係寫嘅填詞最重要嘅嘢，忠於自己嘅心，寫真實嘅感受。我要點樣忠於自己嘅心，寫出一份關於「選擇」嘅歌詞呢？如果有一包毒品放喺我面前，我會點做呢？大概我會畀我咁多年灌輸嘅「毒品禍害」嚇親而唔敢掂，但係如果我身邊嘅人都係咁食，我或者都會想試⋯⋯比起喺電視、報紙睇到嘅嘢，人應該會相信身邊嘅人多啲，例如朋友、父母。就好似樂少朋友咁，都係畀身邊人影響。我都幾肯定樂少唔會畀自己朋友行差踏錯，除咗佢份人本身乖之外，有時仲淆底過我，有次同「激情對話」喺網吧遇到個古惑仔，佢都即刻拉走我哋。

我遇到樂少係一種緣份，唔係一係選擇，咁到底係咪「命運能選擇」呢？「如果命運能選擇」呢個題目真係好深⋯⋯如果係Silas又會點作呢？

呢個時候，我又諗返起嗰本神書嘅作者，唔係本書真正嘅作者，係喺上面寫Notes嘅作者。如果計返時間，Silas真係好有可能係寫感受喺上面嘅嗰個人，不過我都考證唔到，除非當面拎住問佢，但係而家學校又唔畀我借，冇理由偷咗本書㗎嘛。

（Tbc.）

86 - 七月的隨想

2014年7月17日

因為學校要放老師假，而且同學都要抖，所以暑假嘅補課期仲未開始，我當然就係留喺屋企啦。我同Sky有Keep住傾我哋首比賽歌，但係Sky個人永遠都係自帶一種懶懶閑嘅氣質，所以佢send過嚟嘅Voice Message就笑笑口咁講：「阿錘你等多陣啦，我靈感未到呀。」，雖然時間都仲有，但係歌詞要用多啲時間寫，因為呢個比賽肯定係睇重歌詞多過Melody。我心裡面係有啲驚趕唔切，不過隊Band入面應該得我擔心緊，冇辦法啦，鬼叫我三個隊友都唔鍾意作歌咩。

講起作歌，我發現我係天生鍾意創作㗎，例如明明同樣用3個鐘，我練結他會練到攰同埋怨自己廢，雖然慢慢彈到我都會開心。但係作歌嘅時候，就有種入咗另一個空間嘅感覺，會覺得我好似游緊水嘅魚咁，當然都會有卡住諗唔到嘢嘅痛苦，之不過又好快就會諗到其他新嘅靈感，重點係作歌嘅時間過得快好多，3個鐘會覺得好似只係過咗30分鐘咁。

好多時比起打開《地獄結他》嚟練，我更加鍾意打開我本筆記簿，或者搵返啲買完嘢嘅單嚟寫嘢，將一樣嘢由冇變成有真係好開心。諗返今年作嘅3首歌，都覺得好滿足⋯⋯吖，其實係4首，仲有我人生第一首作嘅歌，因為卡咗喺歌詞，之後就冇咗件事，然後因為毛子蘭話我「懶」，我就變咗寫《懶》。

我打開返嗰陣嘅電話錄音，其實首歌都幾好聽⋯⋯好想呢首歌會變成一首流行嘅歌，想唱嘅時候有人同我一齊唱⋯⋯

「細佬，有冇見過我部電話呀？」我家姐入咗我間房問我。
「緊係冇啦，我都冇出過去。」
「咁你打畀我啦。」

我打畀我家姐，佢部電話即刻就響。佢嘅電話鈴聲係一首韓文歌嚟，不過就唔係跳舞嗰種，都似我哋嘅廣東歌，不過聽得出人哋嘅細緻度多好多。

有時真係唔可以怪香港人唔聽廣東歌，走晒去捧韓星、歐美歌手，人哋對流行歌嘅仔細程度，同香港樂壇係兩個Level。不過我都理解嘅，始終資源同受眾都差好遠，喺外國用100萬做一首歌都會回到本，但係香港可能要用10萬蚊去做一張專輯，邊有得比吖。不過歌詞同旋律就唔同，我相信音樂人創作用嘅心係一樣，差別只係錄音嘅質素同後期混音嘅細緻度唔同，如果畀我哋「黑色西炒飯」做一首歌，又會點呢？我哋可唔可以用心機代替錢，做出令人動容嘅音樂呢？

「搵到喇。」家姐搵到部電話之後就走咗。

因為冇進展，我都決定練結他先。我打開《地獄結他》，入面嘅第一個挑戰，我到而家都未彈到，只可以將速度減慢少少，如果BPM135我都仲可以應付到，BPM140就好勉強，BPM150就完全唔得⋯⋯好彩我哋有Sky，所以以我而家嘅實力做Rhythm結他，我就滿足喇。

練咗兩個鐘多啲，時間已經差唔多七點，因為夏天嘅關係天都仲未黑。講開又講，原來「炎序」呢個字係解做夏天，我都係最近唔覺意睇到，即係宋炎序個名嘅意思係夏天，呢個名真係好有型，成個武俠小說人物咁。上次講開我想練唱歌，樂少就叫我搵宋炎序學，我都唔知係咪好提議，因為我心裡面擔心嘅係另一樣嘢。宋炎序講過我同Silas有同樣嘅眼神，我擔心我會有一日變咗「夏天雪人」⋯⋯

「夏天雪人」？

「炎序」係「夏天」⋯⋯

神書上面寫嘅「你是女神，而我是雪人，拿掉靈魂，留下水份也是永恒。」，個作者係「雪人」⋯⋯

師傅個名加自己嘅名，咪就係「夏天雪人」囉⋯⋯

所以Silas係雪人，即係神書真係Silas寫嘅？

諗到呢到，我個心真係寒咗一吓⋯⋯原來令我想夾Band嘅師兄，就係嗰本神書嘅作者⋯⋯

突然之間，我收到Sky嘅Message，係一個Voice Message，我即刻就打開咗嚟聽⋯⋯竟然唔係Sky講嘢，係一段結他彈嘅旋律。

感覺⋯⋯好寧靜，好似自己一個人喺夜晚嘅沙灘上面咁，合埋閉嘅話，我就好似感覺到自己瞓喺沙上面，遠處有海風吹過嚟，天上面就有月亮。好似隨手都感受到海風，摸到沙灘嘅細沙。正當我聽到入神嘅時候，「我淨係作咗咁多咋，阿錘你諗埋佢啦。」Sky笑笑口講嘢嘅聲由電話到傳出。

去到最關鍵嘅副歌竟然未有⋯⋯可惡，我仲期待會有個優美嘅副歌添。不過都算好喇，Sky叫做交咗功課，我都老懷安慰喇。好啦，就等我作埋佢，唔可以嘥咗佢呢段嘅有Feel嘅旋律。

樂少畀咗「選擇」呢個咁有意義嘅題材，同Sky呢段旋律，可以做到啲咩火花呢？我首先要完成咗首歌先，Sky用咗一個2 Chord Major喺入面，香港流行歌嚟講又唔算常見，不過外國就比較多，可能就因為呢個小舉動，令到首歌有種迷迷哋嘅感覺。Verse用咗C Chord開始，咁我嘅副歌就一於用F Chord或者Am 開始啦，同樣用C Chord嘅話可能會有種太長氣嘅感覺。

我拎起結他嘗試唱Sky嗰段旋律，唔知點解我唱好似好怪，捉唔到旋律入面嘅味道，於是我轉咗幾種唱法⋯⋯最後我搵到一個方法唱，但係點形容好呢⋯⋯算係要虛啲咁唱？

（Tbc.）

87 - 最早嘅早晨全餐

旋律呢樣嘢，本身冇講故事或者傳達意念嘅能力，佢只可以表達到作曲人嘅情緒，同埋抒發心裡面嘅感受。反而重點係聽嘅人，到底懷住一種咩心情，所謂「傷心的人別聽慢歌」，當人傷心嘅時候，仲打開悲慘嘅樂曲，自不然就會更加痛。但係我相信，好嘅旋律都係可以撩動人嘅心靈，嘗試去修補破損心靈嘅心情，呢一種溫柔嘅信念，一定傳遞到畀聽眾。

要繼續完成呢首歌，我首先要走入Sky嘅世界先。

我放低結他同所有嘅筆記，幻想自己喺嗰個海灘裡面，我用耳仔去聽海浪嘅聲，感受月光，抽離喺身體之外。我再重新思考，到底「選擇」係一樣咩嘅事，我哋人生之中冇可能每一次都做到正確嘅「選擇」，如果揀錯咗，有冇得重新嚟過，邊個又會再畀機會我⋯⋯唔係，根本唔使其他人，我可以自己再「選擇」過，揀錯咗嘅時候，我可以揀行返轉頭⋯⋯冇錯，「選擇」從來都喺自己嘅手裡面，只要勇氣，再「選擇」多次就可以。

諗到呢度，我嘅靈感就嚟到咗，我要帶到一種勇氣畀人，係行返轉頭都唔怕嘅信念⋯⋯

經過咗一晚嘅嘗試，我用咗一個連續用3個Minor Chord 嘅旋律，最後先返到去C Chord，感覺就同我想做到嘅一樣，當主角辛辛苦苦行過咗充滿荊棘嘅路，返到去舒適嘅地方。

我將呢段旋律錄低咗，send咗去我哋個Group，等佢哋畀少少意見，大概就可以，而家我可以好好咁瞓教先，作曲雖然係坐喺度，但係都攰㗎，要消耗好多腦細胞。

第2日，我打開電話，佢哋全部都聽晒，樂少同Sky都覺得OK，反而太一就覺得「後段嘅旋律可以寫得再公整啲，咁做除咗會入腦啲，仲可以令到樂器有更多互動。」，睇嚟太一都進步咗好多，佢開始會用鼓手嘅視角去睇歌，好似開始變得可靠喇。

於是，我就約咗樂少出嚟，我帶埋我嘅筆記簿同手提電腦，去咗我哋附近嘅M記一齊作詞。

「睇嚟你今次真係好有心寫好份詞喎。」我同樂少講，因為佢今日好早就到咗。
「係呀，你同Sky首歌寫得咁好，而且我都有想講嘅故事。」樂少好認真，眼神同平時唔同。

我同樂少解釋，我琴日諗出嚟嘅嘢，例如揀錯咗嘅時候，我可以點揀返轉頭。

「呢個Point都幾好，無論選擇係點，自己都有揀多次嘅權力。」樂少講。
「所以比起直接話要揀『遠離毒品』之類，我覺得咁樣嘅歌詞更加會有共嗚。」
「同埋冇咁老土，依家啲人好怕Hard Sell嘅歌詞，成首廣告歌咁。」

我哋由晏晝開始就傾緊點作，期間講返好多我哋嘅回憶。雖然冇親口同樂少講過，我心裡面係好開心，呢5年都有佢做我朋友。如果冇佢陪住我，可能連堆都埋唔到⋯⋯我又唔係好似Sky咁可以我行我素，我需要有朋友陪先得。

慢慢嚟到咗夜晚，雖然進度唔多，但係樂少都仲係好認真，我哋甚至好似寫劇本咁，列出咗個主角嘅背景故事⋯⋯

「10點喇喎，走唔走呀？」我問樂少。
「但係我仲想寫喎，難得有Feel。」樂少講。
「咁一係出去行陣先？我坐到好攰。」我講。
「都好嘅，反正M記開24小時。」樂少講。

我哋喺學校附近兜幾個圈，然後喺一個望到學校嘅公園度坐低坐。不過我心諗，我哋又唔係MK潮童，夜麻麻去咩公園呀⋯⋯

「好彩你鍾意夾Band咋。」
「我由中一已經鍾意啦。」
「一年前，我點都唔會覺得我會夾Band，不過遇到Emma，之後又開始彈Bass，慢慢都鍾意咗夾Band呢件事。」樂少望住我哋學校，「太一打鼓打到手都起晒水泡，Sky就彈得好好，你又識作曲喎，我好似咩都唔識，所以想試吓試詞囉。」
「你彈Bass都好好呀，繼續練落去一定會進步。」

「不過寫歌畀女仔真係幾型，特別係你寫畀小蘭嘅《Special Thanks》。」
「咩呀，《Special Thanks》唔係畀毛子蘭㗎，雖然佢都係其中一個我想多謝嘅人。」

「劉星隨，你真係好鬼死麻煩，好心你就認咗佢啦，明明就鍾意人。」
「唔係呀，我只係想多謝佢一直咁幫我哋啫。」
「係咩。」樂少嘅微笑有啲奸，「小蘭就慘啦。」
「又咩呀？」

「冇嘢，慘在我哋錘哥成個腦都係夾Band，其實咩都唔理啫。」
「而家嘅我想夾好Band先，一於返去再作歌，行啦！」我拉走樂少。

其實我⋯⋯係咪真係鍾意毛子蘭呢？每一次唱歌嘅時候，我都好想佢喺度，好似有佢就自然會好安心，而且同佢一齊嘅時候，就會有一種好自在嘅感覺⋯⋯算數啦，都係唔諗住，寫好份詞先係最緊要。

於是我同樂少又返到去頭先間M記。

「阿錘，你知唔知人每日要做3萬5千個決定。」樂少講。
「吓？咁多個？」諗都冇諗過要做咁多個決定，咪仲多過每日要行嘅路？「係咪真㗎？」
「外國研究，不過就搵唔到來源。」

如果計晒所有嘢，話唔定真係會有嘅，不過既然每日要做咁多個決定，即係話揀錯嘅機會一啲都唔少。

「所以就算揀錯咗都唔可笑，因為每個人都有做錯決定嘅時候，趁住仲有機會，再揀一條啱嘅路。」樂少講。
「係呀，大概就係呢個Feel。」
「選擇⋯⋯多一次？」
「歌名就咁叫啦《選擇⋯⋯多一次》。」

就係咁，我哋已經冇理時間，雖然好眼瞓，不過都係一路做到天光。支撐我哋嘅係想寫完份詞嘅熱血⋯⋯同埋最早嘅早晨全餐。

（Tbc.）

88 - 8月頭的學校

經過一晚嘅通宵，我同樂少已經寫好咗份歌詞，以前無論溫書定打機，都冇試過一齊通頂，不過通頂寫歌詞又冇想像中咁攰。

因為樂少本身對「啱音」呢件事唔在行，我用咗唔少時間教佢，例如點解《主能夠》點解唔可以填「主能夠」係因為音調唔同，再填就會變咗「～住撚究～」咁樣。有一啲歌詞可以接受「拗音」，例如「靈魂」唱做「『令』雲」、「流離」唱做「『漏』離」都可以接受，但係「鵝滿是快烙滴好耳痛」就唔可以。樂少都算學得快，唔使幾耐就明白，好快就冇咗「拗極都唔啱音」嘅問題，一齊傾好點寫之後，佢就填個大概內容，我就負責修飾，同埋改押韻，因為始終係比賽，押韻應該會加分。

第二日，我哋又去到咗The Echo。呢排冇返學，用唔到音樂室嘅情況之下，我哋唯有去The Echo。

太一同Sky對份詞都好滿意，睇嚟樂少嘅努力得到認同喇。

「樂少又寫得幾好喎，開頭嘅幾個反問都好有意思。」太一講。
「係呢。阿錘都有幫吓手嘅。」樂少得戚咁講。

明明呢個用問句開場嘅方式係我諗嘅，不過冇所謂啦，只要首詞好嘅話，呢啲又算咩吖。

「雖然同我本身諗嘅畫面有啲唔同，不過都幾好，咁樣仲貼題咗。」Sky微微笑住咁講，「仲有阿錘你段Chorus都改得幾好，比之前個版本順咗。」

因為之前我作嘅副歌，諗極都諗唔到啱音嘅詞，無奈之下就將曲跟住份詞嚟改，呢個就係自己作曲自己填詞嘅好處，可以隨便改旋律或者歌詞都得，但係Sky作嘅部分我就冇改過，因為一定要尊重作曲人嘅意願，除非有共識，唔係都唔應該改人哋嘅創作。如果其他人隨便改我嘅嘢，我都應該會唔開心，所以我就避免呢件事。

今次首歌嘅編曲上面，太一做多咗好多細位，例如16分音符上面多咗好多編排，以前太一好習慣用3-Piece玩足首歌嘅7-8成，3-Piece即係大Bass Drum，Snare，Hi-Hat。但係今次做用多咗好多Tom，令鼓嘅編排更加立體。Sky就用咗有少少「飛機聲」嘅Flanger Effect彈，本身聽到Demo嘅時候，我腦海都覺得會用Flanger，今次同Sky嘅諗法同步咗。

「咁我哋幾時拍埋條片呀？」太一問。
「仲有時間，夾多幾次，然後返學校音樂室錄囉，反正都差唔多要補課。」我講。

隨住七月嘅完結，我哋都慢慢夾好咗首歌，同時補課嘅惡夢亦都好快要開始。

＝＝＝＝＝＝

「占卜星相靈異與魔法學會」佢哋今日都有返到學校，原來甜豉油決定要參選學生會，佢算到學校下年會有麻煩事，所以佢一定要當選，唔係嘅話所有學生都會過好慘嘅一年。佢哋一早就返咗嚟學校準備，甜豉油會出任會長，而Simmy就會做內務副會長，另外仲有幾個同屆嘅同學參與，不過毛子蘭因為要做Head Prefect，而學校規定唔可以再做其他重要職務，所以就冇辦法做學生會。如果最後成功當選，「占卜星相靈異與魔法學會」就會由Simmy做新會長，毛子蘭做副會長。

「會長，你其實算到咩呀？」Simmy問甜豉油。
「我依家都唔知，不過選唔到就一定會有麻煩。」甜豉油講。
「我都想選學生會呀⋯⋯」毛子蘭講。
「冇辦法啦，小蘭你要做Head Prefect吖嘛。」Simmy講。

「但係我都會幫手㗎。」毛子蘭講，「係喎，知唔知仲有咩人會選學生會呀？」
「好似C班會有個內閣。」Simmy講。
「我信你哋會贏嘅，我哋上年做咗咁多活動。」毛子蘭好有信心講。
「未必⋯⋯今年，所有嘢都唔容易⋯⋯」甜豉油好嚴肅咁講。

＝＝＝＝＝＝

VA室入面嘅同學都為中六嘅SBA趕工，因為要交兩份作品，而且時間好趕，所以要趁暑假做多啲。呢個時候，Sky就喺VA室開始畫漫畫。

「Sky你畫漫畫呀？」Emma問。
「係呀。我一直都想試吓畫漫畫，我問咗潘sir都話冇問題。」
「你諗住畫成本呀？」
「緊係唔係啦，我想畫幾頁咋。」Sky笑笑口咁講。

Sky諗住可以用四格創作一個故事，而故事就用後設嘅方法，吐嘈自己嘅VA堂。

「Emma你啲陶瓷好似好咗好多喎。」Sky講。
「因為我一放假就跟咗個老師學，然後練咗好耐。」Emma講。
「我都想有份SBA做手工嘢呀。」
「你都整陶瓷囉。」

「我唔啱整陶瓷呀，我又冇Emma你咁好耐性。」
「係咩？」
「吖。夠鐘啦，我要同『黑色西炒飯』佢哋拍比賽嘅錄影呀。」Sky之後就行咗去音樂室。

＝＝＝＝＝＝

下晝嘅時候，我哋都嚟到咗音樂室，我同樂少補完地理之後就即刻嚟咗，而家等緊Sky，同補中史嘅太一。自從我開Turbo溫完地理嘅補考之後，我對地理嘅認識好似多咗好多，而家甚至有啲興趣聽書添。

冇幾耐之後，Sky同太一都到咗。為咗今日，樂少特登問人借咗部單反相機拍，會唔會太誇張呀，我本身諗住用電話拍就算。

「我特登借嚟㗎，睇吓點set先⋯⋯」樂少似乎唔係好識用。
「拍成點唔緊要啦，但係錄音先最緊要，相機收音好唔好㗎？」我問。
「應該OK掛，啲人演唱會都收得到。」

對拍攝一竅不通嘅我，唯有信樂少啦。

「好，阿錘企前啲。」樂少仲搵咗枝電筒幫我塊面打燈。
「咁得唔得呀？」
「OK。」

其實拍成點我就冇咩所謂，只係驚影響咗首歌啫，我對首歌都幾有信心㗎嘛。我哋一次過錄咗幾Take，樂少負責檢責畫面，我哋三個就聽邊個Take最好。

「第2個Take最好，我打得好有Feel。」
「但係我有個位甩咗呀。」
「我就鍾意第3 Take，大家都最放鬆。」

然後因為冇共識，我哋又再拍咗幾個Take，終於都揀咗一個大家都滿意嘅版本，應該係第12 Take，我唱到聲都沙晒。

「樂少交畀你剪片，同埋交去報名啦，條Link我send咗畀你。」我講。
「點解唔叫太一剪呀？佢讀ICT喎。」
「ICT又唔係讀電影，唔好有電腦就關ICT事啦。」太一講。

冇辦法啦，因為我又唔識搞呢啲嘢，Sky都應該唔會搞，至於太一我就驚佢會報錯名，所以只可以靠樂少。

就係咁，我哋就成功喺8月15號之前交咗首《選擇⋯⋯多一次》。

（Tbc.）

89 - 維他奶咖啡

時間話咁快就嚟到咗8月18號，亦即係公佈結果嘅日子⋯⋯不過而家我最緊張嘅係今日我去咗同毛子蘭去食晏。

因為想多謝毛子蘭一直以嚟嘅幫忙，我就畀佢叫咗我請食飯，所以我見今日唔使補課就約咗佢食嘢。佢就話會帶我去，我只要負責畀錢就可以。

毛子蘭約咗我去一間Cafe，估唔到佢會約我去Cafe，以為佢會想屈我請一餐貴嘅餐，好彩啫。我早到咗啲啲，但係費事喺原地等，我去咗附近行吓，諗住等佢打嚟我就行過去搵佢。呢間Cafe喺旺角，所以附近唔驚冇嘢行。

時間嚟到12點，果然毛子蘭即刻問我到未。「1分鐘後到。」我send Message畀佢。

「遲到呀你。」今日毛子蘭第一句同我講嘅嘢，係話我遲到。

今日毛子蘭嘅打扮同上次睇Show差唔多，不過就孭斜孭袋，唔係背囊。

「咪同我第一次見你一樣囉，30秒左右啫。」明明都仲係12點正零30幾秒。
「1分鐘都係遲。」
「好好好⋯⋯咁食嘢未呀？」

毛子蘭帶咗我入去，原來係一間樓上Cafe，喺一間商業中心嘅8樓，我哋喺窗邊坐低咗，呢度環境都幾舒服，地板同餐枱都係木質，燈光就微黃，係令人開胃嘅配置。

「你成日嚟㗎？」我問毛子蘭。
「間唔中囉，同小悠、Simmy嚟過幾次。」毛子蘭講。

「有咩推薦呀？」
「呢度嘅卡邦尼意粉係旺角最好食㗎。」
「咁就卡邦尼囉。」

毛子蘭同我都叫咗卡邦尼意粉，佢就叫咗杯咖啡，然後幫我嗌咗杯維他奶咖啡。

「維他奶咖啡？咩嚟㗎。」
「你試吓飲就知啦。」

維他奶咖啡顧名思義就係用維他奶代替牛奶沖嘅咖啡，店員好快就拎咗杯維他奶咖啡畀我，我就懷住半信半疑嘅心態飲呢杯嘢。

「又幾好飲喎。」

估唔到味道都唔錯，雖然冇牛奶咁滑，但係維他奶嘅味同咖啡嘅甘苦味，又意外地形成唔錯嘅配合。

「你特登帶我嚟試㗎？」
「得呢度先有㗎。」

卡邦尼意粉都上到，我即刻就睇吓有冇佢講到咁犀利。

「咦！又幾好食喎，汁又濃，意粉又有咬口。」
「都話好食㗎啦。」

話口未完，我已經食晒成碟意粉同維他奶咖啡，食完好食嘅嘢，心情都好啲。

「好食。」我講。
「抵請啦。」毛子蘭笑笑口講。

「係呢，暑假又咩做呀？準備選學生會？」
「唔係呀，我都冇得選。因為Head Prefect冇得做其他重要職務。」
「原來有條咁嘅規矩。」
「所以暑假都係同班新Prefect訓練，建立默契之類。」

「一諗到下年又係遲一分鐘都唔得就慘喇，喺你管治之下，班Prefect一定係咁捉人啦。」
「你早少少返就得啦，每日早3分鐘出門口，你都唔使成日畀人野企呀。」

毛子蘭無論幾時都係咁安守本分，以前我好討厭啲人只係識跟住規矩做人，我覺得咁好唔Rock，因為規矩就係為咗被打破而存在。不過喺佢身上我見到第二樣嘢，就係努力守住規矩，比起破壞規矩更重要。的確要建立和諧嘅秩序或者管理一大班學生，有規矩好緊要，只要規矩合理都應該要遵守，但係對於唔跟規矩嘅事，就一定要反擊，咁先係「打破規矩」嘅意義。

「你肯定又掛住夾Band啦，有冇溫書呀？」
「都⋯⋯有嘅⋯⋯」
「你下年考DSE喇，有冇諗過之後點呀？」
「睇吓夠唔夠分囉，然後繼續夾Band囉，反正我屋企人只要我有書讀就可以。」

「咁你都要自己諗先得㗎嘛，夾Band可唔可以搵到食，養唔養到自己同屋企人。」
「船到橋頭自然直啦，慢慢再諗都未遲啦，仲有咁多時間。」
「我都係想你諗清楚未來啫。」
「邊到諗到咁多喎，如果聽日世界末日嘅話，我哋都唔存在啦。」

其實我都明毛子蘭講咩，不過既然我揀咗要夾Band，就要全力做，諗太多反而會阻住我。

「我都明你講咩嘅，不過我都有我想過嘅生存方式，所以⋯⋯」我講。
「好啦。我都明嘅。你知你自己想做咩就得㗎喇。」
「嗯。」

呢個時候，我電話響。

「喂？」
「係咪劉星隨？你哋樂隊入圍咗我哋『青年禁毒原創音樂大賽』嘅決賽。」
「哦。唔該晒。」

Yes，終於入到決賽。

「咁開心嘅？咩事呀？」
「我哋報咗個關於禁毒嘅原創歌比賽，入咗決賽。」
「恭喜晒。」
「Yeah！」

我即刻就send咗個Message畀佢哋。

「睇嚟你都有你嘅方向嘅，我唔應該講咁多。」毛子蘭講。
「唔係呀，我覺得你咁做好好呀。起碼你有幫我諗吖。」
「見到你有咁明確嘅目標，就好喇。」毛子蘭個樣好似有啲迷惘咁。
「你呢？有冇諗過想做第時想咩呀？」

毛子蘭冇答我，只係擰擰頭。

「人生咁長，慢慢諗囉，如果怕做唔到就唔好諗咁多，向前行先會有路。」我講。

毛子蘭笑一笑，「你哋幾時決賽呀？」佢問。

「24號，星期日。嚟睇吖。」
「好呀。」

食完晏之後，毛子蘭話夜啲要去補習，所以會留喺旺角多陣，因為聽到佢咁講，我就想陪多佢一陣，於是我同毛子蘭就喺旺角走圍行。

＝＝＝＝＝＝

2014年8月24日

今日就係決賽嘅日子，為咗應付今日嘅決賽，我哋都喺The Echo 加練咗幾次，呢次係我哋第一次比賽，同以前表演唔同，比賽嘅容錯空間細好多，絕對唔可以唱錯歌詞，或者甩Beat，呢個係我今日畀自己嘅要求。

今日嘅場地係一個露天廣場，雖然未開始但係已經有唔少路人企喺度睇。

我掃視參賽者區嘅人，最後8強嘅單位，得我哋係樂隊，大多數都係一個人參賽，仲有一隊係2人組合，佢哋係兩個著晒淺黃色衫嘅女仔，我諗係自彈自唱嘅兩人小清新組合。目測，年紀上我哋係最細個嘅，最老嗰個男人，我估大概30歲，因為比賽年齡限制好似係30歲以下。

比賽前有Rehearsal嘅環節，我哋可能係樂隊嘅原因，被安排喺最後出場，所以我哋就靜靜咁喺度睇人哋嘅綵排。

大家嘅水準都唔錯，無論唱功定係歌曲都好有質素，有人選擇播MMO，有人就自彈自唱，睇嚟每位參賽者都唔可以睇少。

但係有一個叫年浩嘅參賽者，令我留下好深刻嘅印象。佢應該係大學生，身形有少少肥，塊面脹卜卜，自己拎住一枝結他彈，把聲好舒服，係冇咩人會反感嗰種好清好甜嘅聲音，而且佢嘅歌詞都寫得好好⋯⋯我諗佢會係我哋最大嘅對手。

（Tbc.）

90 - 吉祥物

到我哋Rehearsal嘅時間，因為得我哋一隊玩Band Sound，所以比較麻煩，呢個時候我學識多咗樣嘢，原來有一舊嘢叫DI box，係用嚟穩定樂器嘅信號，本身都唔知咁多，以為係Effecter，睇嚟我要學嘅嘢都仲有好多。

我哋首歌4分鐘左右，應該算係長，但係好似之前有個參賽者首歌係5分鐘。今日大家嘅狀態都唔錯，我上網睇到有人講可以試吓唱歌前食粒喉糖開聲，所以嚟之前我就買咗一包喉糖，睇嚟幾Work。

「今日係1點正式開始，我哋而家有咩做呀？」我問。
「等囉，你唱歌之前又唔會食嘢。」樂少講。
「咁又係。」

我見到Sky不時都有望向其他地方，我估好大機會係睇吓Miss Lui有冇嚟啦，我當然希望Miss Lui嚟啦，因為咁樣Sky嘅狀態就會提升到最佳，類似吉祥物嘅作用，就好似當毛子蘭喺度我嘅狀態都會好啲，唱歌都會有信心啲。

「你哋係中學生？」
「係呀。」
「好犀利喎，夾咗好耐？我聽你哋Rehearsal，水準好高。」
「多謝。我叫劉星隨，佢哋都叫我做阿錘。」

「我係Roy Chiu，多多指教。」
「多多指教。」

呢個叫Roy Chiu嘅人，係其中一個參賽者，流住一個好韓式嘅厚重瀏海，望落去應該係一個大學生。我記得啱啱聽佢唱嘅時候都唔差，佢用鋼琴自彈自唱，首歌偏向Pop Song彈法，係經典嘅Canon Progression。

我最在意嘅對手啱啱就食緊M記嘅漢堡包，唔知係咪因為佢塊面脹卜卜，望落好似卡通人物食緊嘢咁，但係睇漫畫都睇得多啦，呢啲個樣冇咩嘢嘅人先係真正嘅狠角色。

「阿錘，你覺得我哋有冇機會贏呀？」樂少問。
「我啱啱睇咗個評分標準，曲詞各佔30分，然後編曲、台風、唱功、造型各佔10分。所以我都唔知會點比分。」
「造型都有10分？咁我哋著到咁Hea點算好呀。」樂少講。
「都冇計啦，我哋著咩都怪㗎啦，又冇Dress Code。」

當我哋拗緊Dress Code同冇睇清楚評分準則嘅時候，有一把熟悉嘅聲音出現咗。

「咪叫咗你哋審題囉。」講嘢嘅係Miss Lui。
「Miss Lui你嚟咗呀。」Sky見到Miss Lui就精神晒。
「台風我就唔擔心你哋呀，因為你哋最多樂器，大家好似平時咁投入就好睇㗎喇。編曲同唱功，你哋有努力練，畀啲信心就可以啦。至於造型⋯⋯」Miss Lui露出咗一個好詭異嘅笑容。

我都估到Miss Lui個不懷好意嘅笑容係有啲嘢，佢捉咗我哋去一間日本連鎖服裝店，好快幫我哋襯咗幾套衫。我哋分別換咗Miss Lui襯嗰套衫⋯⋯我只能夠講，Miss Lui可能係一個畀教書耽誤咗嘅造型師，因為襯完之後，我覺得我哋都幾型，但係就有個小問題。

「Miss Lui，件皮褸成千蚊喎，我邊有錢呀。」我同Miss Lui講。
「你哋唔好剪個招牌，遲啲嚟退就得㗎喇。」Miss Lui靠埋我耳邊靜靜咁講。
「吓？得唔得㗎？」
「我讀U嗰陣已經咁做啦，唔通去次Ball又買件靚衫咩。」Miss Lui笑笑口講。

睇嚟真係睇少咗Miss Lui，定只係呢啲「生活智慧」我唔識呢？Miss Lui借咗錢畀我哋買衫，所以而家佢算係我哋服裝贊助⋯⋯應該係掛。

「你哋小心啲呀，唔好整污糟，完咗Show之後換返衫畀我啦。」Miss Lui講。
「多謝雷老師。」我哋好似平時喺學校咁。

太一著咗條紅色褲加件黑色衫同薄褸，樂少就係有圖案嘅全黑衫褲再加件黑色恤衫，我就係黑色牛仔褲加件白色T恤同一件黑皮褸，我哋三個以黑色為主，但係Miss Lui就幫Sky襯咗一Set偏向淺色嘅造型，淺藍色牛仔褲，白色衫加件卡其色外套。佢話如果4個都用黑色Tone，視覺上會好悶，但係如果坐後面打鼓嘅太一著觀眾就睇唔到，企最前嘅我著就會令其他人好似變咗陪襯咁，而樂少就不嬲鍾意全黑色，相反Sky枝結他係白色，所以就最啱著淺色。

我覺得又好似講得幾合理。換咗衫之後，當堂覺得我哋有浸「星味」，好似仲覺得自己勁咗添，唔怪得好嘅造型師可以搵咁多錢啦，原來「人靠衣裝」呢句說話都有啲道理。

＝＝＝＝＝＝

話咁快比賽就開始，第一個出場嘅係啱啱同我哋打招呼嘅Roy Chiu，佢嘅鋼琴技巧好好，聽得出有好好嘅Classical底子，成個人嘅氣質就好似一個貴族公子哥兒咁。佢首歌叫做《癮》，不過歌詞感覺上就麻麻哋，「拗音」拗得好明顯嘅，而且意思都好奇怪，「～戰勝毒品何況捱兩棍～」完全唔明咩意思，點解係「兩棍」？即係毒品會用棍打個頭？雖然歌詞好怪，但旋律上面嘅複雜性應該高過好多流行歌，而且鋼琴嘅編曲都加咗啲古典樂嘅元素，技巧好高。

之後出場嘅人都有唔錯嘅表演，當中有一隊叫Yellow2嘅女子組合，都係我覺得好犀利嘅參賽者。佢哋風格好清新，雖然兩個都唔靚，又好似扮可愛咁，不過唔會令人覺得做作，佢哋嘅比賽歌叫做《心滋旅情》，應該係鼓勵人用心去滋潤自己，脫離毒品嘅意思，編曲上用咗一枝結他同一枝Ukulele嘅組合，令到首歌好可愛，好適合做兒歌，用嚟同小朋友宣傳毒品嘅禍害。

如果話Roy Chiu係華麗嘅法式西餐，咁Yellow2就係M記嘅開心樂園餐，兩種完全唔同嘅風格，唔知班評判鍾意邊樣多啲。我自己嘅話，考慮到宣傳要易上口，可能會偏向兒歌多啲，但係如果想首歌更有藝術性就一定係Roy Chiu首《癮》。

我睇幾個評判都有唔同反應，有啲畀Roy Chiu嘅技術驚艷到，有啲就對Yellow2嘅可愛風格笑晒口咁。不過跟住落嚟嘅年浩先係我覺得最強嘅對手。

年浩首歌叫《退一步》，用木結他唱出，加上撫慰人心嘅歌聲，叫人收起執念，退後一步。首歌好特別，融合到Pop嘅元素，又有Busker嗰種簡單唔花巧嘅真誠，我認為唔差過我哋首《選擇⋯⋯多一次》，唔係⋯⋯可能好過我哋。

年浩唱完之後，我聽到最大嘅掌聲。由現場嘅掌聲同歡呼聲，都睇得出連現場觀眾都鍾意呢首歌。呢個時候，唔知做咩我好似冇晒頭先嘅氣勢，不過都冇得怯，我哋首歌唔一定輸。

「定啲喎。」太一大大力拍我背脊，「今次首歌係你哋嘅努力嚟，冇問題喎。」
「你都有份㗎，無論邊個作曲填詞，只要係『黑色西炒飯』嘅歌就係『我哋』嘅歌，冇『你哋』。」我講。

雖然太一冇參與曲詞，但係我覺得唔係冇作曲填詞首歌就冇佢份，因為要玩好呢首歌，我哋四個少咗邊個都唔得。

「阿錘你望吓後面。」Sky指向最後排。

而最後排就有我嘅吉祥物—毛子蘭⋯⋯

（Tbc.）

91 - 《選擇⋯⋯多一次》

第一次喺咁多街外人面前表演，之前最多都係隔離學校嘅老師同埋同學，我都有少少緊張，不過係可以控制到嘅緊張。

「大家好，我哋係『黑色西炒飯』，今日嘅參賽歌曲係《選擇⋯⋯多一次》，我哋覺得好多時染上毒癮嘅人，需要嘅係選擇多一次嘅勇氣，夠膽原諒曾經做錯決定嘅自己，先會行到去新嘅道路。」我作為主音，上到台之後，我代隊Band同所有觀眾打招呼。

我哋開始彈，喺咁空曠嘅地方彈呢段前奏，感覺比平時更加「空虛」，結他嘅音色更加明顯，希望Sky嘅結他聲可以畀到嗰種「迷幻」Feel畀觀眾。

「～為何回憶裡美好都漸漸模糊～」
「～為何思憶裡痛苦都獨自背負～」

我哋一開始嘅兩句，係一個問題，作為主角嘅「我」，自己已經唔記得咗點解回憶會模糊，點解成日都要自己背負所有孤獨。同好多吸毒嘅人一樣，上癮嘅原因係心靈上嘅「空虛」，於是我同樂少就決定問呢個問題。

「～如我回眸會有誰去為我歡呼～」
「～廢棄在路旁 也沒人在乎～」

當吸毒者想逃走嘅時候，往往會感覺到好孤單同無助，大概會驚自己冇人在乎，於是就會愈嚟愈唔開心。

「～為何如今我每天只為著逃亡～」
「～為何開始我再不給命運盼望～」

「我」吸毒之後過嘅生活，就係每日逃避現實，唔想再理會呢個世界，唔想對任何嘢有期望。

「～如我回眸會有誰去贈我燭光～」
「～我渴望著誰能給我導航～」

就算返轉頭都冇人畀到溫暖「我」，就算暗地裡我想有人幫我「導航」，都係冇人幫我。

暫時唱到呢到，我都覺得觀眾好投入，的確我哋首歌冇好似年浩咁可以做到商業味同音樂性融合到，但係我哋做到一種今日冇人唱到嘅音色同氣氛。會場嘅人都中咗我哋嘅魔法，一齊入咗Sky嗰個沙灘，只有黑夜、月光、海風嗰個沙灘。

「～但我都不想傷害著你那溫暖～」
「～讓我這一天 重新去挑選 我選『不要自怨』～」

去到副歌，主角嘅「我」醒起原來呢個世界仲有一啲人關心自己，可能係朋友、親人、情人，為咗佢哋一定要再揀過，揀一次啱嘅決定。呢個時候，樂少佢哋有幫我做和音，感覺上就更有氣勢。

「～就算命途未能自選 前面路途亦能逆轉～」

呢句係為咗啱音而特別修改咗旋律，但係我同樂少都幾鍾意呢句，雖然好淺白好直接，但係咁就足夠傳送一啲力量出去。

「～遊蕩樂園未必需要藥丸～」
「～來年跟你再一次 坐木馬迴旋～」

呢句係樂少想加嘅點題之句，我哋寫咗成晚主角嘅人物設定，佢幻想主角係有好大段故事，其中去遊樂場就係佢最鍾意嘅事，希望重新選擇之後，會可以同愛自己嘅人一齊再玩迴旋木馬。

隨住最後Sky嘅一段結他Outro，首歌就完結，幫呢個故事收尾。

「多謝大家。」

唱完首歌之後，我就咁聽掌聲又唔算好多，Miss Lui當然有好努力拍手，毛子蘭同埋有嚟睇嘅「占卜星相靈異與魔法學會」都有拍掌歡呼，算係令氣氛好似高漲啲。

「終於完喇，唔知贏唔贏到呢。」太一講。
「我都唔知，不過我哋玩得好好吖，做到我哋嘅水準。」我講。
「我副歌嗰段甩咗，所以淨係彈咗Root音。」樂少講。
「唔驚喎，Bass甩咗邊個聽得出吖。」太一講。

因為Bass好低音，冇認真留意嘅甚至唔察覺到佢存在，只係一冇咗首歌就會好唔平衡。不過樂少醒目起碼用Root音撐住先，好過冇咗個Bass。

「我就覺得起碼有頭4位。」Sky笑笑口講。
「但係第4冇獎金喎。」我講。
「冇辦法啦，因為唔知班評判鍾意咩。」Sky講。
「如果佢哋唔鍾意Band Sound就弊喇。」我講。

喺頒獎之前，仲有一個環節係嘉賓表演同埋戒毒人士分享，因為比緊賽，我哋唯有留低睇，費事比人扣印象分。

今日嘅表演嘉賓係一個新出道嘅女歌手，出名唔識唱歌，但係就憑住一對超吸睛嘅大長腿，俘虜咗好多Fans，戒毒人士嘅分享就話對今日嘅歌都好有共鳴，亦都特別指出鍾意年浩嘅《退一步》，睇嚟呢首歌真係好中禁毒嘅主題。

「好喇好喇，到咗最緊張嘅環節，我哋要公布今日嘅冠、亞、季軍。」台上嘅主持人準備宣佈賽果。

「恭喜兩位可愛嘅女仔，Yellow2嘅《心滋旅情》得到我哋嘅季軍！我哋請評判之一，作詞人－杜問畀啲意見。」

「首歌嘅旋律同歌詞都好cute，好啱兩位女孩子唱，我應為擺喺中小學推廣會好好。」杜問講，佢係其中一位上近年上位最快嘅作詞人，因為詞好有詩意而受到關注。

「跟住有亞軍，不如我哋請請評判之一嘅製作人姜銀鋒先生公布賽果。」

「恭喜今日平均年紀最細嘅參賽者，樂隊『黑色西炒飯』嘅《選擇⋯⋯多一次》！」姜銀鋒宣布賽果。

亞軍？係咪真㗎⋯⋯雖然我哋一開始嘅目標係冠軍，但係亞軍呢個成績都好好啦。

「係亞軍呀！」我講。
「Yeah，有1500蚊。」Sky舉出Peace Sign手勢。
「Yes！我哋得咗喇！」太一激動講。
「估唔到第一次作詞就有獎呀，我仲唔係未來嘅詞神。」樂少誇張咁講。

其實一開始都知道冠軍好難拎，但係最少都想有啲嘢拎返，有個獎盃我哋就好滿足喇。

「冠軍⋯⋯係年浩嘅《退一步》。」主持人宣布。

輸比佢，我都服嘅，始終喺選材同主題方面，年浩都做得好好，加埋感情真摯嘅演繹，令首歌變成有機會好流行嘅作品，唔知未來，我哋會唔會有機會合作呢。

之後頒發獎盃嘅環節，我哋喺姜銀鋒身上攞咗亞軍嘅銀色獎盃，雖然獎盃細細隻，但係都好好喇，當然最開心嘅係有1500蚊獎金。

而喺頒獎禮完結之後，姜銀鋒走咗過嚟搵我哋。

（Tbc.）

92 - 千五蚊點用好

姜銀鋒喺10幾年前係好出名嘅製作人，但係近幾年就淡出咗音樂界，好少曝光，估唔到呢個比賽竟然搵到佢做評審。

「你哋好有Potential，有冇寄過Demo去唱片公司？」姜銀鋒問我哋。
「冇呀，因為我哋都只係夾咗一年，而且都唔識錄Demo。」我講。
「你哋咁細個寫到咁好嘅歌已經好叻仔。」姜銀鋒微微一笑，「首歌邊個作㗎。」
「係我哋嘅結他手Sky同我作嘅。」

「我喺旋律到畀你哋最高分，中學生竟然寫得出一種咁老練嘅旋律，好聽得嚟又有個性，非常好。」姜銀鋒講，佢眼中帶有強勁嘅氣場。
「咁歌詞呢？」樂少問。
「冇首歌咁好。可能你哋仲細，睇你哋個樣應該冇掂毒品啦，所以你哋份詞我唔係畀好高分。」姜銀鋒講，呢個時候樂少似乎有啲失望。

姜銀鋒拎出咗一張卡片，「如果想爬上去最Top嘅位置就搵我，睇吓有冇機會簽你哋。」姜銀鋒留低一個好有魅力嘅笑容就轉身離開。

「佢係咪話會簽我哋？」太一講。

簽我哋？我哋有機會喺主流樂壇出道？如果係咁⋯⋯就太好喇，而家嘅社會情況就係一大堆有實力嘅Band留喺Indie好多年，都打唔入主流，於是慢慢就會失去人氣，然後就繼續喺社會浮沉，所以有公司簽嘅話，做音樂就會易好多。

「佢話睇吓有冇機會啫，唔一定會簽我哋嘅。」我講，雖然我心裡面都幾想係真。
「咁就正喇，可以連書都唔讀呀。」樂少講。

雖然姜銀鋒的確係一個好好嘅製作人，就算完全冇實力嘅歌手，佢都可以捧成人氣偶像，但係我都唔知佢係咪真係幫到我⋯⋯我又唔係要做明星，我只係想夾Band，想一直夾「黑色西炒飯」。

「係喎，咁呢1500蚊點用好呀？」Sky嘅問題，打斷咗我嘅思考。

「不如食咗佢啦。」樂少講。
「吓？咁嘥？」我講，因為就咁食咗好似好浪費，用嚟買器材或者幫補租Band房嘅錢好似會好啲。
「我都贊成食咗佢，1500蚊又用唔到嚟做好多嘢，每人平均分都係得300幾蚊，痛痛快快食咗佢仲開心啦。」太一講。
「我都係咁話呀。」Sky笑笑口講。

見佢哋咁，我都冇咩意見嘅，話晒呢1500蚊都係大家嘅努力，跟大隊啦。

Miss Lui嚟咗搵我哋，「好嘢喎，有亞軍。」Miss Lui好戥我哋開心咁講。
「好彩Miss你幫我哋襯咗套衫咋。」樂少講，佢好似好鍾意呢Set造型，雖然同樣係黑色，但就明顯比佢平時啲衫好睇。
「使咩講，我啲Fashion Sense不嬲都OK，你哋快啲換返啲衫畀我退錢啦。」Miss Lui講。
「但係我想keep呀，我畀返錢Miss Lui你吖。」Sky笑笑口講。

於是，我就成Set衫畀返Miss Lui，太一同樂少就分別keep咗件T恤同件褸，因為佢哋都幾鍾意見衫，但係我就嫌貴冇買到，雖然我都覺得件皮褸好型，但係成千蚊我又唔捨得買。

然後，我電話就收到毛子蘭嘅Message：「恭喜你哋，我有嘢做要走先。」，真係咁急咩，早知同毛子蘭講兩句先換衫啦。

Miss Lui之後都走咗，我哋就同主辦單位搞埋啲手尾。

Sky著住Miss Lui襯呢Set衫好似仲開心過有獎，不過以Sky嘅性格嚟講又好合理嘅。

我哋4個一齊搭車走，因為鼓手唔使孭樂器，太一就負責拎住個獎盃。

「係我哋嘅第一個獎，算係呢一年嘅總結啦。」太一講。
「雖然係望住個獎嚟比賽，但係我都預咗得『多謝參與』，有獎真係估唔到。」樂少講。
「事實係我哋首歌，真係好吖嘛，反而冠軍嗰首歌我就麻麻哋，睇嚟同班評判嘅品味唔同。」Sky噘噘嘴講。
「冇辦法啦，頭先姜銀鋒都有少少講，我哋嘅歌詞打動唔到佢，但係年浩首歌就有種打動到人嘅力量。」我講。

「係喇阿錘，個獎擺你度啦。」太一講。
「擺我度？好咩？」
「一直以嚟都係阿錘你最落力夾Band，就咁決定啦。」Sky講。
「冇辦法啦，我屋企冇位，你攞去啦。」樂少講。

我拎咗個獎盃，雖然佢真係好細個，但係佢就好似一隻USB咁，記錄咗好多好多嘢，包括今次嘅比賽。

「咁擺我度先啦。」我微微笑咁講。

＝＝＝＝＝＝

喺比賽之後嗰日，我哋就嚟到咗蝴蝶灣燒嘢食，自從上次喺長洲燒嘢食之後都已經過咗半年，當然燒嘢食就緊係要用我哋琴日贏嗰1500蚊啦。

呢度買嘢食好方便，而且放暑假所以有好多人嚟BBQ，我哋因為遲咗少少所以搵唔到位，好彩未買嘢食啫。

「樂少，咁點搞呀，冇位喎。」我講。
「等一陣囉，一係睇吓有冇識嘅人可以一齊燒囉。」樂少講。
「呢度屯門喎，我會識咩人呀。」我講。
「再搵吓囉。」樂少講。

撞正暑假尾真係好麻煩，周圍都好多人，特別係一家大細嚟嘅家庭，不過都冇計啦，一年入面可以享受家庭樂嘅時間又真係唔多。

「不如轉場啦。」太一講。
「睇嚟都要，個個都啱啱開始燒，冇咁快走。」我講。

正當我哋諗住轉場走人嘅時候，有個人喺我後面拍我膊頭。

「錘仔！又會喺度見到你嘅。」
「我同隊Band嚟燒嘢食。」
「我都係喎。冇爐呀？一齊啦，你呀sir都喺度。」
「吓。」

拍我膊頭嘅人係YouTuber呀秋，原來佢同「五鬼魔神」約咗燒嘢食，有車嘅大人真係好，入屯門起碼快我哋啲窮學生一半。

（Tbc.）

93 - 蝴蝶灣

因為冇位嘅關係，我哋就同咗「五鬼魔神」一齊燒嘢食，李sir見到我哋好似有啲意外，估唔到放假都見到學校嘅老師，不過好彩係李sir，如果係見到何副校就麻煩。

「估唔到李sir原來同Autumn夾過Band。」樂少講，佢好似不嬲都有睇呀秋啲片。
「聽講李安枝Bass喺你度喎，睇嚟你就係佢嘅繼承人。」呀秋用佢嘅YouTuber口吻講，「『少年，我嘅夢想就交畀你喇。』，佢心裡面一定喺咁諗。」
「我先冇呀。」李sir講。

「係呢？達仔唔嚟呀？」我問。
「達仔例遲㗎，佢應該一世都改唔到㗎喇，所以我哋慣咗。」Sam sir邊燒牛扒邊講。

之後樂少就將我哋琴日攞到亞軍嘅事講咗畀李sir佢哋知，然後就係太一加入，繪型繪聲咁講我哋點樣有型法，當然我聽起上嚟就覺得除咗「誇張」就唔知點形容。

「唔好意思，遲到。」達仔講，「但係做咩你哋又喺度嘅？」達仔問我哋。
「因為冇爐，咁啱又撞到呀秋，所以我哋就過嚟喇。」我講。
「哦。」達仔一嚟就拎起一碟嘢食，因為Sam sir一早就係咁燒，留咗好多嘢食。

「五鬼魔神」佢哋買咗好多嘢食，所以我哋都係喺隔離街市買咗好少嘢食。睇得出李sir比平時再後生咗，講嘢嘅時候冇咗嗰浸老師味，果然男人只要見返班老朋友，無論咩年紀都會變返成班中學生咁。

「係呢？你哋仲有個成員呢？」Sky問。
「我哋個主音一早失咗蹤啦，連佢係生係死我哋都唔知。」達仔講。
「炎爺都唔知咩？」呀秋講。
「就算炎爺知都唔會講啦，KY根本有心玩失蹤。佢連Silas都搞唔掂，邊會理KY吖。」達仔講。

聽到呢度，大至上可以肯定「炎爺」就係宋炎序，但係KY又究竟有咩事要失蹤呢？炎爺同Silas又發生過咩事⋯⋯

「炎爺係咪即係Rooftop個老闆呀？」我問。
「係呀，上次我Band房漏水，介紹你哋去嗰間嘢個老闆。」達仔一路咬住舊雞翼講。
「咁Silas同炎爺又發生過咩事呀？」
「咁我都唔係知好多，不過炎爺都幫唔到Silas，我諗就冇人幫到佢。」

講起Silas之後，大家都提起咗興趣，不斷引達仔講，原來Silas同達仔都有段故，甚至後來同Silas反咗面。

「嗰陣我冇嘢做，炎爺就介紹我幫Silas彈結他。」達仔好似好可惜咁，「其實佢真係一個好認真嘅音樂人，對音樂吹毛求疵到連班監製都自愧不如。」
「咁點解你同Silas會反面嘅？」我好奇咁問。
「我同Silas冇反面，唔好聽佢哋亂講。我只係唔認同佢嘅價值觀啫。其實件事係咁嘅⋯⋯」達仔想當年咁講，一路路向上升嘅煙就好似幫緊佢Flashback咁。

成件事原來係咁嘅，當年Silas嘅結他手走咗，達仔就頂上，一直都合作得好好，達仔好欣賞Silas嘅執著同堅持，甚至連續三晚唔瞓都幫佢隻新專輯彈結他。直至有一日，Silas嘅爸爸病咗，係可能隨時會過身嗰種，但係Silas完全冇理過，一副冷冰冰嘅樣只係做音樂，達仔覺得冇嘢比親人重要，係咁叫Silas去醫院，可惜Silas都無動於衷，兩個人就係咁意見不合而分開咗，再冇聯絡過⋯⋯

「會唔會因為佢爸爸嘅死，Silas就變咗『夏天雪人』呀？」
「我都唔知呀，你想知嘅問炎爺可能好啲。」達仔講。

唔通就係因為爸爸嘅死，Silas先再玩唔到Rock，所以佢就變做「夏天雪人」呢。不過我阻止咗自己繼續估，因為我再嘥時間估都唔會知結果，有機會我會直接問佢。

「記住呀錘仔，唔好學Silas。」達仔再同我講多次叫我唔好學Silas。
「點解你覺得我會學Silas嘅？」我問。
「因為你嘅眼神同佢好似。」達仔望住我，「第一次喺通利見到你我已經覺得好似，望住結他就發晒光，試結他嗰陣明明彈得一塌糊塗，但係又有種令人想聽落去嘅感覺。」

明明彈得一塌糊塗，但係又有種令人想聽落去嘅感覺⋯⋯係咪好似Sky形容我彈結他聲咁呢？

「望住你哋夾Band就好似見返我哋以前咁呀。」Sam sir講。
「冇錯呀，Sky仔就好似我咁靚仔。」呀秋講，其實呀秋從來都唔係好樣嘅YouTuber，反而係個樣好好笑，係好有親和力嗰種。
「唔好講笑啦，呢條友彈結他仲好過我呀，你邊有得同佢比呀。」達仔講。

達仔彈結他嘅實力已經係職業級結他手，如果連佢都咁講Sky，即係Sky可能已經有職業結他手嘅水平。

「如果KY喺度，佢應該會好開心。係咪呀？」Sam sir同李sir講。
「嗯。」李sir靜靜咁繼續燒嘢食。
「你同佢最Friend，佢消失咗，最傷心嗰個一定係你。」達仔同李sir講。
「邊有咩傷心唔傷心吖，大個咗人人都有自已嘅事要做，我哋已經唔係一Team人喇。」李sir講。

「我又唔係咁諗呀，一日隊友一世隊友。」呀秋坐喺李sir隔離。
「食嘢吖你。」李sir塞咗條芝士腸畀呀秋。

呀秋一啖咬落去，但好似因為爆芝士，佢焫親個嘴，仲跳起上嚟。「五鬼魔神」幾個人因為呀秋嘅反應大笑起上嚟，李sir笑到眼鏡都跌埋。雖然李sir把口話已經唔係一Team人，但我諗佢哋嘅友情係冇變嘅，只係「位置變了，各有隊友」。

就係咁，我哋兩隊Band就一路燒到黃昏，放低老師同學生嘅身份，好似普通朋友咁傾偈。

（Tbc.）

94 - 拋彩虹

時間嚟到咗8月30日，決賽之後已經過咗一個禮拜，我哋「黑色西炒飯」都享受緊最後嘅幾日假，樂少同細佬去玩，Sky就去咗買書，太一就好似話想打太鼓，而我就決定好好喺屋企睇漫畫同聽吓歌。因為嚟到暑假嘅未聲，人好似冇晒動力咁，今日咩都唔想做，淨係想好好哋抖吓。

不過，我冇嘢做嘅時候就收到達仔嘅電話，佢叫我去Rooftop。

「吓，咩呀？Rooftop，我冇Book Band房喎。」我問，達仔咁耐以嚟只係因為上次The Echo漏水先打過畀我。

「炎爺話想見你喎。」
「見我？」本身完全唔想出街，但係炎爺突然想見我？究竟咩事呢？唔通關Silas事？

懷住呢個好奇心，我嚟到咗Rooftop。今日成間Band房都冇人，得炎爺一個喺度。

「嗯⋯⋯你搵我？」我同炎爺講。
「係，聽講你最近贏咗個比賽喎。」炎爺講。
「冇贏嘅，我哋拎亞軍。」
「姜銀鋒係咪搵過你呀？」

炎爺同姜銀鋒唔通係識得嘅？點解佢會提起姜銀鋒呢？

「有呀，佢畀咗張卡片我哋。」我講。
「無論佢開咩條件都好，你都唔好去黐埋去。」炎爺講。
「吓？」一時間，我唔係好知咩事。
「當年Silas就係畀姜銀鋒隻怪物搞到咁。」炎爺好婉惜咁講，而當中又帶有少少憤怒。

吓？Silas嘅事原來係因為姜銀鋒？究竟中間發生過啲咩事⋯⋯

「你有冇諗過咩係完美嘅表演？」炎爺問我。
「完美嘅表演？」我真係冇諗過點樣會完美，到目前為止，我做嘅所有表演都總會有瑕疵，「我真係冇諗過喎。」

炎爺勉強苦笑一下，「所有做表演嘅人都會想做到最好，無論係音準，技巧，表演力，所有嘢都想完美。但係無論點，總會有啲嘢做得唔夠好，最好都係99%，好難真真正正做到100%嘅完美。」炎爺雙眼好有神咁講。

100%嘅完美⋯⋯真係會存在咩？每場Show，每首歌都會有少少嘅美中不足，我真係唔信呢樣嘢會做到。

「你覺得冇可能做到？」炎爺笑一笑。
「坦白講，我認為幾好嘅音樂人，都唔會做到絕對嘅完美⋯⋯反而唔完美嘅地方先係每場表演嘅特別之處。」我講。
炎爺點點頭，「我教嘅每個學生，幫嘅每個音樂人，我都會講只要做到自己最好嘅80%以上就夠，所以你講得冇錯。」
「咁又關姜銀鋒咩事呀？Silas同佢又發生咗啲咩事？」我問。

「嗰陣姜銀鋒簽咗Silas，而個傻仔都因為有佢嘅幫助慢慢成長，變成一個獨當一面嘅音樂人。姜銀鋒呢個人對音樂有超一流嘅認識，眼光又準，可以話係最勁嘅Producer，我本來都以為佢可以帶個傻仔去到搖滾嘅頂峰，不過⋯⋯」炎爺欲言又止。

「成件事係點？點解Silas明明進步咗，但係又會反而唔可以再Rock。」我問。

「姜銀鋒好識得將一個人推向極限，Silas都一樣，不斷不斷催迫自己，直至終於一次，佢完成咗一場完美嘅表演。好到無得挑剔，無論係唱定彈，所有人嘅配合都好完美，嗰場Live係我人生睇過大大小小幾百場Show入面最好嘅一場⋯⋯」炎爺講。

我唔明白，到底一場完美嘅表演係咩感覺，做到之後，唔係應該會更進一步咩⋯⋯

「你有冇試過拋彩虹中大獎呀？」炎爺問我。
「Er⋯⋯冇呀⋯⋯我拋彩虹最多都係試過中最細嗰個獎。」
「跟我去一個地方。」

炎爺帶咗我去一間遊戲機中心，佢兌咗100 Coins嚟拋彩虹。呢一刻，我完全唔知炎爺想講咩，做咩要帶我嚟拋彩虹。

「炎爺，你想講咩呀？」我問。
「我依家掉咗20個Coins，一個獎都冇中，但係每一個都差少少，係咪？」炎爺一路拋一路講。
我望一望彩虹枱：「係呀⋯⋯」
「完美嘅Live就好似中獎咁，不過每次表演都會有少少失誤，點都有機會擲界。最難中嘅大獎就要分毫不差先可以啱啱好停喺彩虹中心。」炎爺繼續拋彩虹。

冇錯，做出完美嘅Live仲難過拋彩虹中大獎，每一粒音，每一個動作，甚至舞台嘅燈光、造型、服裝都要好準確⋯⋯

「如果你中過一次大獎，你就會想中第二次，但係你又掉嘅都唔中，你會點呀？」炎爺又講。
「可能繼續掉掛，又有可能會走人。」
「拋彩虹可能會揀放棄，但係如果你係一個表演者，你就會揀繼續做，做到再中獎為止。」炎爺畀咗個Coins我。

我輕輕一拋，Coins向住彩虹嘅中心慢慢飛，愈嚟愈近中心點⋯⋯可惜，Coins稍稍貼到條線，我最後冇中獎。

「Silas就係嗰個中大獎嘅人，嗰次表演之後，佢一直都冇辦法再去返嗰次嘅水準，佢愈迫自己就愈辛苦，姜銀鋒就一路一路Push佢，個傻仔為咗再去到嗰個境界，連爸爸入院都唔理，淨係做音樂⋯⋯終於去到某一日，佢連歌都唱唔到⋯⋯只要企上嗰台，就會有驚恐症。」

「原來係咁呀⋯⋯」

達仔上次講嘅嗰件事，Silas掛住做音樂冇理爸爸入院，原來都係為咗再次搵到嗰個境界。

「嗰陣佢連個台都上唔到，唔好話要唱Rock⋯⋯不過佢心裡面都仲係好鍾意音樂，所以放低所有嘢由頭嚟過，佢用『夏天雪人』呢個身份，重新再做過佢嘅音樂，由搖滾樂變成獨立歌手，拋開晒呢啲枷鎖，先可以出返嚟唱歌。」

「咁你點解要話畀我知呢件事呀？」

炎爺輕輕一笑，「因為你可能會令佢重新振作。」炎爺將成袋Coins畀咗我，「繼續掉吖，你一定會中㗎。」炎爺之後就走咗。

我將淨低嘅Coins一個一個咁掉，大力拋又試過，細細力又試過，隨便掉又試過，用塊板反射過去又試過⋯⋯最後我中咗一個二獎，但係店員畀我嘅禮物，唔係咩公仔，係一隻CD⋯⋯係Silas嘅CD⋯⋯

「點解係CD呀？」我問店員。
「炎爺講咗，只要你中任何一個獎，都要畀呢隻碟你，佢話你聽完就會明白Silas。」店員同我講。
「你又係咩人呀？」
「我只係炎爺以前嘅學生啫，我姓沈。」

（Tbc.）

95 - 最後的831

8月31日，暑假嘅最後一日。

今日我哋班嘅班會舉辦咗一個暑假活動，都係暑假唯一一個班會活動，就係唱K。因為今年冇咩參加班會活動，所以我就算唔係好想去都畀面出席。樂少同Sky都有一齊嚟，而最神奇嘅係太一唔知點解都會被邀請，雖然對於呢啲事我都見慣不怪，不過有種唔知係班會活動定夾Band嘅心態。

「喂阿錘，聽講你贏咗個比賽喎。」朱傑走嚟搵我。
「唔係呀，我哋得第二咋。」
「都唔錯啦，聽講好多獎金喎。」
「其實好少錢㗎咋。」

因為樂少喺佢Instagram Post咗我哋攞獎張相，所以大家都知道咗我哋有亞軍嘅事，「激情對話」班人都好支持我哋，仲話要加入「黑色西炒飯」Fans Club，不過佢哋真係會搞再算啦，好多時「激情對話」講嘅嘢都唔可以當真。

「獎金就事小啦，已經有唱片公司畀咗卡片我哋，叫我哋寄Demo過去。」樂少期待咁講。
「嘩，咁你哋咪可以出道做明星囉。」朱傑誇張咁講。
「我哋會出碟再開演唱會，可能拍埋電影添呀。」太一興奮咁講。

睇嚟樂少同太一好似已經畀姜銀鋒張卡片沖昏咗頭腦，要搵個機會同佢哋講琴日炎爺話我知嘅事。

望住班同學，我突然之間意識到，原來今日可能已經係我哋最後嘅暑假，聽日開始我哋就中六，考完DSE就畢業，如果唔繼續讀書，我就會變成社畜，即係唔會再有暑假⋯⋯

最近我有個諗法，我唔想繼續讀書，我想可以擺晒啲時間去夾Band。雖然冇同任何人講過，不過如果夾Band就係我想做嘅嘢，點解我仲要嘥時間讀書。只係夾Band同其他嘢唔同，我唔可以自己決定，「黑色西炒飯」佢哋係點諗我真係唔知，我哋亦都冇傾過，如果佢哋覺得要放棄，喺時候讀書做嘢，我都唔可以影響佢哋啲咩。本來姜銀鋒嘅出現，的確令到我以為我哋有機會可以唔升學，然後直接簽公司，再喺主流樂壇出道，不過炎爺將Silas件事講咗畀我聽之後，我諗無論姜銀鋒做咩，我哋都唔會黐埋去佢度。

琴日炎爺講咗Silas件事畀我聽之後，我諗咗好耐，如果係我都唔知會點，我只係知道呢件事一定好痛苦。而且喺聽完佢隻CD之後，我更加相信佢係屬於搖滾㗎，好想佢可以做返以前嘅自己。

我靜靜咁喺人堆入面消失，偷偷哋出咗去街，上面太嘈喇，我思考唔到，無論係未來嘅嘢定Silas嘅事，我都唔知想點。上次毛子蘭講嘅嘢都冇錯，我完全冇諗過未來，讀書定唔讀書，想夾Band又冇諗過點做好啲。

「你搞咩呀？」落嚟搵我嘅係樂少佢哋。
「唔知呀，突然之間想靜吓。」

然後我將琴日炎爺講嘅故事話咗畀佢哋知。

「原來姜銀鋒係咁嘅人呀。」樂少講。
「仲以為可以簽到唱片公司添，我就唔想變到怕咗表演。」太一講。
「我又覺得佢未必係一個壞人，只係佢會將人推向極限，就好似一副超級引擎，如果架車承受唔到就冇辦法。」Sky講。
「如果係我，就未必頂得住喇。」我講。

Silas嘅事，我哋冇繼續傾落去，因為呢一刻，我哋咩都改變唔到。

「係呀，考完DSE之後，你哋諗住點呀？」我問佢哋。
「睇吓考幾分囉，我都想讀U嘅。」樂少好快咁答我，其實我知道佢想繼續讀落去，而且咩科都冇所謂。
「我就睇吓邊間U近啦，我應該夠分嘅。」Sky笑笑口講。

呢個時候，太一有少少猶疑，我諗佢應該係我哋入面最有顧慮嘅一個，佢爸爸又想佢去外國讀書，而且佢哋最近關係又唔好，唔知佢而家又想點揀。

「我⋯⋯阿爸想我去外國讀書，但係我想留喺香港⋯⋯不過畢業之後第一件事，我決定咗要去日本，因為我想搵我媽媽。」太一講。
「你終於都決定要去搵媽媽嗱？」我問。
「嗯，無論點都想去，搵唔到都要去。」太一講。

雖然唔知太一同佢阿爸嘅關係點，不過佢留喺香港就好喇。

「阿錘你呢？突然之間提呢個話題，你有咩諗法呀？」Sky問。
「我最近諗住唔讀上去，反正DSE都應該考得唔高分，不如早啲出嚟做嘢，認認真真繼續夾Band。」我講，「不過一切都未定㗎，可能最後夠分都唔定。」

「咁『黑色西炒飯』呢？我哋畢咗業之後，仲夾唔夾呀？」我問佢哋。
「唔係話要開十八區巡迴咩？緊係繼續啦。」樂少大大力打落我膊頭。
「冇錯喇，仲要出碟，開演唱會，紅到拍電影！」太一拍落我另一面嘅膊頭。
「阿錘你，唔想夾咩？」Sky反問我。

「緊係唔係啦，我只係驚你哋會唔想夾咋。」我講。
「傻咗咩，夾Band咁開心。」Sky笑笑口講。
「而家打太鼓已經滿足唔到我喇，一定要夾Band先得。」太一講。
「你哋冇咗我點得吖，等我繼續carry哋啦。」樂少講。

唔知點解⋯⋯聽完佢哋嘅答案之後，我就輕鬆晒，膊頭覺得鬆晒，雖然畀樂少太一拍到好痛。原來煩惱住我嘅嘢，只係簡單嘅兩三句說話就解決到。冇錯，有呢三個人喺度，我根本唔使諗太多，只要開開心心一步一步行就可以。

「返上去唱K啦，魔人個咪霸連唱咗幾首，我哋要上去搶返枝咪。」樂少講。
「我哋上去合唱啦。」Sky笑笑口講，佢喺後面推我行。

就係咁，我返到去K房，繼續我哋作為中學生嘅最後一個暑假，雖然淨返嘅時間唔多，不過都要繼續玩落去。

（Tbc.）

96 - 一年容易又開學

2014年9月1日 開學日

正所謂「一年容易又開學」，今年嘅開學日仲要喺正星期一，即係成個禮拜都要上堂啦，明明琴日仲好開心過緊我哋嘅最後一個暑假，今日已經跑緊返學⋯⋯

點解又跑返學？因為「激情對話」班友唱完K仲話要直落打機囉，雖然我唔好打機，但因為諗住都最後一次過中學暑假就玩埋佢，點知佢哋玩到12點先捨得走，我咪瞓過龍囉。好彩慣例開學日會有5分鐘左右Buffer位，咁我都輕鬆嘅。

OK，只係8點01分，應該冇事嘅。

「劉星隨！」大聲叫我嘅係何副校。
「副校，早晨。」
「一開學就遲到呀？」
「係咩？我入嚟嗰陣好似未打鐘喎。」

副校長指一指門口一原來今年學校喺門口掛咗個鐘，「今年學校時間會以呢個鐘為準，你遲咗1分鐘，扣1分操行分。」副校長嚴肅咁講。

自從文化祭嗰陣得罪咗副校，我都知我條路唔易行，係估唔到第一日就畀佢捉到啫，1分操行分，當豪畀佢啦。

雖然只係第一日開學，但係已經有學生會搞緊競選宣傳，今年有兩個內閣競選，分別係甜豉油做會長嘅「魔靈閣」同另一個叫「鳳凰會」嘅內閣。「魔靈閣」唔使問都知係出自「占卜星相靈異與魔法學會」裡面嘅「魔」同「靈」啦，都幾有佢哋風格嘅。

唔使睇任何政綱，其實我一定會投「魔靈閣」，佢哋上年都幾幫我哋吖，呢個人情我一定要還啦。

今年我哋課室搬咗去4樓，仲要喺音樂室下面，咁就正好方便我哋去夾Band。

「今年要坐阿錘你隔離呀。」Sky抱怨咁講。

上年Sky每次調位都可能坐返角落頭位，所以瞓得好自在，但係今年唔知點解就編咗坐我隔離。

「你都坐咗成年角落位啦。」我講。

我又何嘗唔係冇咗個「最佳位置」吖，以前我坐窗口位，可以望住下面個球場瞓都不如幾開心，而家喺正中間嘅最後，感覺唔太好。

開學日例排都係嗰啲嘢，因為趕住教書，文sir都快快手講完啲班務就放我哋去上堂，夠鐘就返嚟課室再落禮堂。

我第一堂就上文學堂，都輕鬆啦李sir都喺由得我聽吓書又遊吓雲咁。

到咗開學禮嘅時候，我哋因為係中六嘅關係，終於可以坐喺最後嗰排，週會嘅時候瞓教都冇咁明顯吖嘛。

唱完校歌之後，應該係校長演講嘅環節，但係今年竟然係校董史教授上台⋯⋯唔通校長畀人炒咗？

「同學各位找個位，這是你的開學禮」佢第一句就引用咗《開學禮》嘅歌詞，想搞笑？「各位早晨，我係史岱國教授，會暫代校長一職。」史教授個樣好似好開心。

台下就馬上嘩然，明明校長上年做得好好，點解無端端會畀史教授暫代職務呢？

「你哋唔使驚，史教授喺大廳。」呢個校董搞咩？係咁quote電視對白做咩，「鄧校長會去英國上堂，3個月後就會返嚟。」

原來校長去上堂，不過校長咁「後生」，應該大把機會升，分分鐘遲啲會入埋教育局，或者去大學做都得。相比起其他校長，佢先得40幾歲，算後生啦，所以想重點培養佢都合理嘅。

其實我對呢個史教授係有一份怨恨嘅，因為當年中一，我同樂少畀何副校捉去球場罰企嗰次，讚副校「嚴師出高徒」嘅就係佢，佢同副校擺明係Friend嚟，睇嚟我今年都係咁先，肯定會畀佢哋針對。

開學日仲會請埋今年嘅Head Prefect上台講嘢，今年嘅Head Prefect就係毛子蘭。

「校董、副校長、各位老師、各位職員、各位同學，大家好。我係5B班嘅毛子蘭，係今年嘅總領袖生，希望各位同學可以嚴格咁遵守校規，尊重學校，尊重同學，尊重自己⋯⋯」毛子蘭好認真咁講佢嘅總領袖生演詞，呢個時候嘅毛子蘭又幾似一個政客，咬字又清晰，個樣又認真。

今年同上年一樣，加咗個時段畀候選學生會內閣，「鳳凰會」講先，佢哋嘅會長叫陸楚楓，係5C班嘅學生，之前冇做過任何公職，唯一令人認識佢嘅係負責校園電視台嘅英文部分，唔係好明點解佢會出嚟選學生會，至於政綱，都大同小異啦，又係嗰啲，不過因為把聲好好聽，而且樣貌都算可愛，我隔離班「激情對話」都望到實晒。而「魔靈閣」就因為甜豉油佢哋上年「占卜星相靈異與魔法學會」累積嘅人氣好有叫座力，未開始演講已經好多支持嘅掌聲，但係學校就因為時間關係，強行減咗「魔靈閣」嘅演講時間，大概少咗一半。咁好明顯係打壓同想做馬啦，陸楚楓係英文科嘅人，副校長就係英文科嘅總負責人，真係唔使畫出腸都睇到個公仔。

＝＝＝＝＝＝

雖然已經好眼瞓，但係我自己有個開學日傳統，就係趁早放學，要去一轉尖沙咀通利。不過佢以前唔同，今年我身邊多咗我班隊友「黑色西炒飯」嘅3個人。

「阿錘你，想買新結他呀？」Sky問我。
「唔係呀，睇吓先咋，想買枝好啲嘅又冇錢，買枝貴少少嘅又唔係好好多。」我講。

我同Sky睇緊結他嘅時候，樂少同太一就去咗睇Bass同鼓，原來太一諗住買套電鼓，但係因為間房唔夠位，所以就暫時擱置咗。

「睇緊咩呀？」我問樂少。
「5弦Bass。我最近想試吓5弦Bass。」樂少講。

樂少不知不覺變成一個真真正正嘅Bass手，希望佢會愈嚟愈勁，我覺得佢嘅潛力可能畀我哋都高。

今年一定會好好玩。

（Tbc.）

97 - 又到學生會選舉

開學嘅校園生活都係冇咩嘢做，大家都會將焦點放喺學生會選舉。甜豉油所帶領嘅「魔靈閣」不斷畀學校打壓，連宣傳海報都因為無中生有嘅「設計問題」畀學校禁止張貼，要貼遲對面內閣一日。如果要講打壓「魔靈閣」嘅原因係咩⋯⋯我大概估到係因為我哋「黑色西炒飯」啦，首先係上年海報件事，我哋幫「占卜星相靈異與魔法學會」貼咗張Poster，然後我哋場Band Show，佢哋又幫手宣傳，呢啲都令副校長愈嚟愈睇我哋唔順眼⋯⋯

呢幾日，都見到Simmy同甜豉油好落力派傳單，同搞免費占卜爭取選民支持，太一都好落力咁宣傳，有時甚至會好似個痴線佬咁去挑戰「鳳凰會」嘅政綱，不過毛子蘭就唔知點解好少幫手宣傳。

今日嘅Lunch Time，我哋食完飯之後就返咗嚟，最近太一冇同我哋食飯，話要幫甜豉油佢哋手。我哋見到「魔靈閣」班人好似好攰咁，我哋就想過去打吓氣，話晒我哋都有份搞到佢哋畀副校長針對。

「你哋點呀？」我問。
「好攰呀，我印完啲Poster，史校董又唔批，話咩學校名要大階，我又要由頭整過晒啲嘢。」Simmy講。
「都係我哋啦。」樂少講。
「又唔關你哋事嘅。」甜豉油沙晒聲咁講，「唔係你哋，我哋上年都搞唔到嗰個魔法活動。」

「毛子蘭呢？好少唔幫手㗎。」我問佢哋。
「係我唔畀小蘭嚟㗎。佢係Head Prefect，如果佢幫我哋拉票，一陣又畀副校話佢徇私。」甜豉油講。

又係喎，我都冇諗過呢個問題添。見到呢個情況，我哋就拎咗幾張傳單幫手宣傳，我同樂少就冇咩人理，但係Sky就咁企喺度都有人行埋去問佢嘢，仲要全部都係女仔。

「你咪Sky師兄？原來你都係呢個閣㗎，咁我一定投你啦。」身材有啲肥嘅中一女同學講。
「你係咪會教彈結他㗎？」中二嘅女同學問。
「我係咪日日都可以去SU房搵你呀？」身材瘦削嘅中一嘅女同學又問。
「我只係幫手派傳單咋，唔係內閣成員嚟。」Sky笑笑口咁講。

樂少就去Sky隔離講，擋走一班女仔先，「同學呀，你哋睇清楚份守則啦，我哋中六學生唔會參加學會嘅幹事活動㗎！」然後又開始宣傳，「今年『魔靈閣』嘅活動就多姿多彩，要玩嘅、學嘢嘅、相睇嘅全部都有⋯⋯」果然係上年嘅學生會成員，咩都吹到一餐。

隨住Lunch Time差唔多夠鐘，Canteen裡面嘅同學愈嚟愈多，除咗嗰兩個內閣嘅人係咁宣傳之外，我仲見到另一個人好努力宣傳，呢個係我同班同學沙維，我諗一定又到咗嗰個時候。每年9月頭，我都會見到沙維係咁左求右求搵人參加足球隊，我哋學校冇咩人會參加足球隊，一嚟係我哋身處D3，即係最低組別嘅比賽，二嚟一直都冇勁人，鍾意踢波嘅都自己出去踢就算，唔會玩校隊。

「沙維，又搵人呀。上年B Grade嗰啲呢，升上A Grade又唔踢呀？」我問沙維。
「冇辦法啦，學校又連教練都冇搵，場場畀對手大炒，班師弟都話打排球算。上年唔係『激情對話』班人，我都冇得踢。」沙維好無奈咁講。
「咁搵返佢哋咪得囉。」
「但係今年佢哋就話咪搞呀，因為4場分組賽有兩場係星期六踢，即係冇得走堂。」

都估到「激情對話」班人啦，上年朱傑話要做班會主席，所以應承幫沙維踢波，順便走堂，今年冇得走當然就唔玩啦。其實沙維都幾慘，平時佢都算就得人，又唔係鍾意出位嘅人，真係波牛嚟，我有時都係街場見到佢同班街坊踢波。

「係呢⋯⋯阿錘，不如你哋入嚟足球隊啦。今年係我最後機會，可能以後都冇機會踢正式比賽，幫吓我。」沙維雙手合十咁拜托我。
「吓？但係我唔識踢波喎，而且你知我啦，上PE堂我跑兩跑都喘晒氣。」我都想幫沙維，但係我又真係唔識踢波。
「唔緊要㗎，夠11個人就可以，你企喺場就得㗎喇。」

之前夾《黃金入球》嗰陣我睇晒成套《踢出我天地》，我心裡面都有一排想試吓踢波，反正都中六，不如玩吓啦，當幫吓同學。

「好吖，我加入啦。」
「多謝你呀！」

不過我肯定我一定係就住踢，因為我唔可以隨便整傷手指，我仲要彈結他。

「搞咩呀阿錘，派傳單啦。」樂少走過嚟。
「因為沙維邀請我加入足球隊呀。」我講。
「吓？你喎，踢波你識咩。」
「你有資格話我咩？聽講你踩波車多過踢中波喎。」

「嗰啲係以前嘅事，依家我已經唔同晒。」樂少講。

一番爭論之後，竟然連樂少都話要一齊踢波，仲連太一同Sky都話要一齊踢⋯⋯突然之間，「黑色西炒飯」變咗校隊大戶，究竟發生緊咩事？

＝＝＝＝＝＝

放學之後，我哋想去音樂室夾Band，點知當我落去搵Miss Fong嘅時候，佢竟然同我哋講⋯⋯

「校董話由今日開始，音樂室唔再開放畀同學用，除非有讀音樂。」

「吓？我哋學校冇開音樂㗎喎。」我講。
「有Apply Learning吖嘛。」Miss Fong都好無奈。
「有幾多個人讀呀，我印象中Apply Learning仲要冇人讀音樂喎。」
「我都唔知佢想點，不過今次我唔可以畀條鎖匙你。」Miss Fong講完就返入教員室。

咁好明顯啦，根本係報復，上年我哋擅自用音樂室啲器材，今年就直頭唔畀我哋用音樂室，連入去都唔得，我嬲得滯一拳打落埲牆，結果痛嘅只係我隻手⋯⋯呢個副校真係《忍樣》嚟，我冇寫錯到首歌！

（Tbc.）

98 - 《月亮代表我的心》

冇得用音樂室，我哋當然係嬲到爆啦，明明係上年校長嘅「德政」嚟，搞到而家我哋夾Band都唯有等到放假再去The Echo。另一方面，學校對「魔靈閣」嘅打壓真係冇停過，雖然只係啲雞毛蒜皮嘅事，例如delay海報張貼期，或者cut走佢哋拉票時間，但係喺一啲唔太關注選舉嘅同學眼中，就會覺得「魔靈閣」懶做嘢，或者好大頭蝦。

今日已經係星期三，距離投票日仲有一個禮拜，放學之後我落咗去Canteen，因為想hea多陣先返屋企，咁啱見到毛子蘭自己喺Prefect室，於是我就入咗去。

「好多嘢做？」我問毛子蘭。
「又唔係嘅，基本上都安排好晒，不過要諗吓如果有突發情況點應對。」毛子蘭講。
「會有咩突發情況呀？」我又問。
「例如其中一個當值同學病咗，或者唔知邊度有意外囉。」

乜有咁多意外咩？我讀咗六年都冇遇過咩意外，我淨係見Prefect行吓企吓，甚至毛子蘭係第一個我覺得有認真做Prefect嘅人。

「聽講甜豉油唔畀你幫手宣傳喎。」
「係呀，佢話驚會畀學校話我侚私，你知依家學校點對『魔靈閣』啦。」
「都係我哋啦。」
「係喎，史校董話唔畀人用音樂室，咁你哋點算呀？」
「見步行步啦。」

之前學校冇器材，我哋都係出去夾Band，其實影響又未算好大。但係喺學校夾Band就有種安心，可能係呢種熟悉嘅感覺，而且最重要係免費，每個星期都出去夾Band對我哋嘅銀包都有啲傷害。

「夾Band同Busking係咪好唔同㗎？」毛子蘭問。
「Busking？點講好呢，本質上都係表演，但係玩嘅音樂類型就唔同得多，例如我哋首《忍樣》，Busking就做唔到嗰種又嘈又惡嘅感覺。」我講。
「如果好似上年ECA咁呢？嗰種表演用Canteen嘅喇叭你哋做唔做到呀？」
「咁一定得嘅，我自彈自唱都得啦。」

「你估你哋可唔可以做午間表演呢？」毛子蘭問。
「午間表演？」
「係『魔靈閣』嘅政綱嚟，想畀一啲娛樂同學喺Lunch嘅時候開心吓。」
「如果好似Busking咁，應該可以嘅。」

「聽日得唔得呀？」
「我問吓佢哋先。」

我都差啲唔記得咗，我哋仲有Canteen Set器材可以用，不過夾Band就唔得㗎喇，如果做Busking呢類冇咁嘈嘅表演就應該可以嘅，於是我就喺Group問佢哋。

「吓，你買咗個Cajon？」原來太一之前買咗個Cajon，咁做啱晒Busking。

太一打Cajon，Sky就彈木結他，我就唱歌，咁樂少做咩好呢？Canteen得兩枝咪，一枝畀我，一枝畀結他，算啦聽日再諗啦。

到咗星期四嘅下晝，我哋會開始今日嘅午間表演，但有趣嘅地方係我哋嘅鼓手變咗樂少，因為太一去咗派傳單，佢簡單教咗樂少點打鼓之後就交咗個Cajon畀佢。

我哋喺Canteen表演，都吸到啲人嚟睇，話晒都有上年累積嘅人氣，唔識我哋嘅人都會嚟望吓。

「大家好，我哋係『黑色西炒飯』，今日會唱呢首《自動勝利 Let's Fight》，聽完記得支持『魔靈閣』呀。」

揀《自動勝利》係因為想拎個意頭，同埋始終最多人識。果然呢首歌嘅氣氛好好，就算得枝木結他同Cajon都可以好好咁炒起氣氛，我哋面前已經聚咗一班同學。

「～Oh Let's Fight~」

點知唱完之後，有個老師就衝開人群，行嚟我哋面前講。

「曹sir？」話時話我都好耐冇見過曹sir。
「劉星隨，邊個畀你哋喺度唱歌㗎？」曹sir大怒。
「Er⋯⋯」

「曹sir，呢個係『魔靈閣』嘅競選宣傳時間，而『魔靈閣』請咗劉星隨佢哋嚟幫手宣傳，係冇違反選舉守則。」毛子蘭出咗嚟答曹sir。
「就係咁囉。」我講。

曹sir大大力皺眉，啲皺紋出晒嚟，「總之唔得，太嘈喇，上面啲老師都聽到。」曹sir講，但係明明我哋一啲都唔嘈。
「唔係喎，我哋已經開得好細聲。」我講。

呢個時候，Miss Lui出現咗：「由得佢哋啦曹sir，班同學又有得聽吓歌，幾好吖。」

曹sir一見到Miss Lui成個樣又變晒，浸狗公味又出返嚟。

「不過你哋呀，細聲啲，唱啲靜啲嘅歌啦。就嚟中秋節，唱《月亮代表我的心》啦。」Miss Lui講。

吓？唱我係識唱嘅，但係我啲普通話好差吓喎，我會將「我愛你有幾分」唱咗做「我愛你有脂肪」⋯⋯

「不如我獨奏吖，我識彈呀。」Sky笑笑口講。

獨奏《月亮代表我的心》？好似都幾好喎，我都未聽過Sky嘅木結他獨奏。

Sky一彈奏嗰吓，成間學校都靜咗。每個人都停低聽佢嘅結他，首歌好柔，好軟，果然Sky嘅木結他都好準，動作好標準，同佢彈電結他一樣⋯⋯彈得好好，可以話係駕輕就熟。

在場嘅人都拍爛手掌，連曹sir都好似畀Sky嘅結他聲打動咗，Miss Lui都露出咗一個好愉快嘅笑容。

「原來你彈木結他都咁好㗎。」Miss Lui同Sky講。
「因為以前我家姐好鍾意呢首歌，所以我就突登練咗呢首。」Sky笑笑口講。
「原來係咁。好喇差唔多打鐘，收返好啲嘢啦。」Miss Lui講。

果然，10秒後就打鐘，我哋即刻收返好啲嘢返課室。

＝＝＝＝＝＝

到咗星期五，今日佢哋幾個都話要補課，所以我就單拖嚟唱歌，而家計起應該係第二次，自從ECA Day嗰次之後就冇試過。

既然得我自己就唱啲簡單啲嘅歌啦，我唱咗之前練過嘅《Good Riddance》，反應都唔錯嘅，不過就琴日好少少。
「劉星隨！」突然有個我唔識嘅低Form女仔叫我，「記唔記得我呀？」
「你係⋯⋯」佢好熟面口，但係我又講唔出個名。
「上次我哋都喺呢度見㗎。」佢講。

我突然之間醒起⋯⋯「你係咪上次搵我簽名個妹妹呀？你真係入咗嚟讀喎。」

「係呀，我係Keeley劉卓瑜。」
「我記得你啦。」
「我可唔可以唱歌呀？你幫我彈結他吖。」
「咁你想唱咩歌呀？」

「《Love Story》。」

原來佢想唱Taylor Swift首《Love Story》，我睇咗啲Chord，我應該都識彈嘅。

「咁好啦。」

結果，Keeley一開聲⋯⋯我就覺得好犀利，唔係唱功好好嗰種，係好似入咗佢嘅舞台咁，嗰種從容同自信係天生㗎，呢個中一嘅小妹妹，一啲都唔簡單。

（Tbc.）

99 - 午間音樂

過完中秋假之後，就到咗學生會選舉嘅大日子，今日會有兩個內閣嘅辯論大會，完咗之後就會即刻進入投票環節。雖然學校嘅打壓好唔合理，但係「魔靈閣」班人都係咬實牙關過咗，最後嘅大會辯論都係幾乎碾壓式嘅勝利，甜豉油同Simmy將政綱嘅內容，演繹得非常好，甚至捉到對面內閣只係用聯校學生會都有嘅最普通優惠湊數填滿政綱，對面嘅會長面對質疑就啞口無言，呢個場面之下，全校都起哄。呢一著，基本上已經決定咗勝負。

雖然已經夠晒鐘放學，但係好多同學都好奇今次嘅賽果，最少有100人留低睇點票。一路開票嘅時候，都見到「魔靈閣」帶出唔少，未開到一半，已經領先接近100票。除咗本身「占卜星相靈異與魔法學會」嘅票源之外，有同學係因為睇唔過眼學校嘅打壓，而投佢哋，都唔排除有啲喺因為我哋拉票而投「魔靈閣」嘅。

「好喇，最後點票結果係⋯⋯『魔靈閣』當選！」點票嘅主持人宣布。

「魔靈閣」以200幾票之差贏咗選舉，我印象中學生會選舉嘅差距從來都唔係咁大，通常票數都唔會差多過5%，呢啲就係有認真競選同做馬嘅分別。甜豉油佢哋就好開心，我身邊嘅太一都走埋去慶祝，不過又咁講，太一落力宣傳嘅程度絕對唔少過佢哋嘅內閣成員。總之由聽日開始，「魔靈閣」就會接替「News」成為新嘅學生會。

＝＝＝＝＝＝

為咗兌現競選嘅承諾，「魔靈閣」又邀請咗我哋做午間音樂表演，喺學生會嘅爭取之下，我哋已經成功爭取到「有限度」使用音樂室，每次表演前一日都可以借音樂室用嚟「練習」，有需要都可以借器材。甜豉油佢哋果然做到嘢，呢一票冇投錯佢哋。

今日Lunch TIme我哋一早就嚟到Canteen set up，不過因為音量管制嘅原因，學校唔畀我哋打Drum Set，同埋唔畀我哋開太大聲，所以我哋而家都用緊比較Unplug嘅配置。即係一枝木結他、Cajon，唯一嘅電子樂器係樂少嘅Bass。

Lunch Time嘅表演時間唔多，大概20分鐘左右，都係3-4首歌。講返轉頭，上次Keeley出嚟唱歌先令我發現，原來學校有唔少同學都好鍾意唱歌。好多人都嚟問我哋可唔可以幫佢哋彈結他，多數我哋都會應承，一來可以練吓嘢，二來同多啲唔識嘅人jam都幾好玩，當然如果喺「激情對話」班人嚟嘅時候，我就唔會畀佢哋唱，費事嚇親人啦。不過咁多人入面就好少人有Keeley嗰種驚艷，佢嘅表演氣場係天生嘅，好期待喺大啲嘅舞台見到佢。

完晒所有表演之後，佢哋要趕住去上堂，而我因為係上退修堂，所以留低負責搞埋啲手尾，突然就有幾個低Form同學叫我，不過係我唔識嘅。

「咩事呀？」我望住佢哋，佢哋好似好尷尬咁。
「我哋因為睇咗你哋上年嘅表演，決定要夾Band。」佢哋同我講。
「咁幾好喎。」

原來佢哋因為睇咗我哋「黑色西炒飯」嘅Band Show，好想試吓夾Band，不過就唔知點入手，於是就問我好多意見。我就由第一步，買樂器開始話俾佢哋知，然後就介紹咗The Echo呢間Band房畀佢哋。

突然之間，覺得好神奇，明明都只係夾咗一年Band，好似已經過咗好耐咁，甚至有人因為睇咗我哋嘅表演而夾Band，呢點我真係受寵若驚，但係我心裡面又暗爽得好緊要。當年Silas影響咗我，今次係我哋影響咗班師弟，或者搖滾樂真係可以改變世界都唔定⋯⋯

＝＝＝＝＝＝

話咁快又到咗今日最後一堂，呢堂係數學堂，悶到爆。其實一日上7個鐘堂真係太多喇，我已經冇咩精神聽書，所以我靜靜雞同樂少吹緊水。

「喂樂少，放學去SU房hea陣好冇？」我問。
「冇喇，依家SU又唔係我地頭。」樂少講。

係喎，樂少佢哋已經卸任咗，我哋都冇籍口成日落SU房hea，冇計啦世界上好多嘢都唔係永恆，連一間小小嘅SU房都係。

諗起以前隨時隨地可以自出自入，都有啲唏噓，雖然話我哋同甜豉油Simmy都熟咗，但係都未到可以隨時搵佢哋幫手嗰種。不過我哋行過SU房嘅時候，Simmy就同我哋揮手叫我哋入去。

「搵我哋？」我問。
「你哋有冇聽過JSBA呀？」Simmy問。
「NBA我就知，JSBA係咩嚟？」樂少問。
「Joint School Band Association，即係聯校Band Soc。」Simmy講。

「咩嚟㗎？」
「應該係搞聯校Band嘅活動，佢哋依家招緊人呀，你哋有冇興趣？」Simmy問。
「好喎。」我講，「樂少交畀你喇。」我拍拍樂少膊頭。
「吓？認真咩？」樂少愕然。

「係呀，呢啲學會嘢你最有經驗啦。」我講。
「應該會想搞個聯校嘅Band Show，學生會都會幫手。佢哋任期去到下年1月㗎咋，唔會阻住你哋考DSE。」Simmy講。
「阿錘你唔一齊join呀？」樂少問。
「我邊到識搞呢啲social嘢呀，而且搞活動係你強項吖嘛。」我講。

聯校Band Soc⋯⋯原來有啲咁嘅嘢，咁又係嘅，唔只係我哋學校有咁多人鍾意唱歌同夾Band，我相信仲有好多鍾意玩音樂嘅中學生。就好似上次嘅「Reason X」咁，周圍都仲有好多高手，聯校Band Show應該都幾好玩吖。

（Tbc.）

100 - 足球隊

今年已經開咗學一個月，除咗不斷補課，同埋夾Band之外，學校都冇咩特別事發生。不過因為我哋加入咗足球隊，所以都要畀時間練波。學界A Grade嘅比賽都差唔多開始，為咗迎接我哋嘅第一場比賽，足球隊隊長沙維辛辛苦苦之下，終於約齊人可以今日練波。

而家計埋我哋四個，啱啱好湊夠11個人，仲有個話到明唔練波，只係走堂嘅Mango嚟做後備。太一負責守龍門，Sky就踢中場，樂少就打中堅，我就負責打單箭頭。太一話一直都好想試吓守龍門，佢話覺得做保護球隊嘅男人好有型，而Sky就因為傳波好而被安排打中場，樂少就因為夠膽落腳，同埋夠膽撞人所以打中堅，而我就因為完全唔識防守，同埋球技差，沙維話寧願將我放最前，入唔到波起碼都好過係咁失波。諗諗吓又幾似我哋平時嘅企位，太一就守住最後打鼓，我就喺最前面唱歌，樂少就撐住隊Band嘅基礎，Sky就串連晒成隊人。

「沙維雖然叫做沙維，但係其實係踢翼鋒」呢樣嘢我哋都成日拎嚟開玩笑，唔使問咁多，全隊球技最好嘅一定係沙維，我睇佢練波成個美斯咁。如果唔係我哋學校嘅足球風氣差，佢話唔定可以踢得開心啲，而家練波基本上都要睇其他人面色，明明係人哋全波傳得差，沙維都話係自己跑得慢追唔到⋯⋯

「沙維你唔使咩都就住喎，頭先明明係我交失。」Sky笑笑口講。
「唔係呀，我早少少起步一定追到。」沙維講。

聽講之前有發生過一件事係，沙維鬧走咗一個隊友，搞到唔夠人比賽，直接畀人判輸三比零， 可能沙維心裡面都驚緊呢件事會再發生，所以完全唔敢鬧人，仲對個個都好聲好氣，睇到我都覺得好慘。

我一直都好慶幸我嘅隊友咩都全力去做，如果要我係咁求人同我夾Band，肯定會同人炒大鑊。結果就因為沙維呢種性格，只係練咗30分鐘左右，佢已經冇晒氣。

「不如唞陣啦，我好攰呀。」因為我知道沙維肯定唔會嗌停，而我又真係有少少攰，所以就嗌咗個暫停。
「好，大家休息10分鐘。」沙維大嗌。

我哋坐低咗喺球場旁邊休息，最好精力嘅係太一，因為我哋冇人射過波，佢自己拎住個足球當係排球咁玩。

「點解要咁呀？跑到自己成隻狗咁。」我同沙維講。
「咁大家又唔係踢開波，傳得差好正常啫，我努力啲跑一定接到。」沙維講。
「聽講我哋學校足球隊10年都冇贏過波喎。」樂少講。
「係呀，冇辦法啦，學校又唔畀錢請教練，又冇地方練波，成隊足球隊得我一個人想踢，有咩辦法唔輸吖。」沙維好婉惜咁講。

我都唔明，明明我哋學校籃球隊、排球隊都有請教練，唔知點解就係足球隊咩資源都冇。

「係呢，沙維你捧邊隊波㗎？」Sky問。
「我？我係韋根Fans？」沙維講。
「韋根？唔係成日護級，上兩年仲降埋班添。」我講，因為我唔睇波，都係聽其他人講。
「係呀，但係我就好鍾意佢哋輸緊都落力踢嗰種精神，輸99次唔緊要，贏到1次就夠。」沙維講。

原來我哋每個人捧嘅球隊都唔同，太一因為鍾意紅色，所以係曼聯Fans，樂少就因為屋企原因係捧利物浦，Sky因為鍾意白色，所以係捧皇馬。講起足球，其實同聽歌差唔多，好多人都係鍾意嗰啲大球隊，就好似好多人都鍾意聽Pop song一樣，但係幾小眾嘅歌都各自有自己嘅Fans。

「咁阿錘你捧邊隊呀？」
「我呀？其實我睇波又唔多，要揀一隊嘅話應該係愛華頓。」我講。

「吓？阿錘原來你捧愛華頓？」樂少好似好大反應。
「咩事呀？」

原來愛華頓同利物浦雖然都係喺利物浦市，而且個主場好近，但就係世仇嚟，所以兩隊嘅球迷好多拗撬。不過我又唔係睇開波，呢啲鬼知咩。

我捧愛華頓嘅原因係因為佢哋嘅歌，利物浦呢個城市最多人知嘅除咗足球就係Beatles，不過比起利物浦首會歌《You'll Never Walk Alone》，我反而喺愛華頓嘅打氣歌身上搵到嗰種英倫搖滾嘅味道，所以話知佢踢波踢得差，我就係鍾意佢哋嘅歌。

不過踢波真係唔好搞我喇，攰過夾Band好多，我諗幫沙維踢埋最後呢一界比賽，我就會「掛靴」退役。

＝＝＝＝＝＝

練完波之後，佢哋都有嘢做所以走先，我留咗喺Canteen休息，呢個時候我趴咗喺台休息，隻眼半開半合，好似有個女仔行近過嚟。我心裡面唔知點解覺得係毛子蘭，因為會嚟Canteen搵我嘅，好似就得佢一個。

我抬起頭望一望，「原來係你呀？」行過嚟嘅呢個人唔係毛子蘭，而係Simmy，「搵我有事？」
「其實我係想搵樂少嘅，不過唔見佢，同你講應該都一樣啫。」Simmy講。
「關於JSBA啲嘢？」
「係呀。」

「下個禮拜會開會，而地點會喺『孝基』，想通知佢啫。」Simmy講。
「好呀，我幫你話畀佢知吖。今日佢屋企有嘢做，練完波就走咗。」
「唔該晒。」

Simmy個樣好似仲有啲嘢想講，但係又講唔出。

「你仲有嘢想講？」
「你⋯⋯知唔知小蘭就嚟生日呀？」
「佢⋯⋯就嚟生日咩？我真係唔知喎。」

講起，我又真係唔知毛子蘭幾時生日⋯⋯

「咁係幾時呀？」
「10月17號，你記住送禮物畀小蘭呀。」Simmy講。
「哦⋯⋯」

Simmy講完就走咗。

吓？送禮物？我從來都唔搞呢啲嘢喎，連樂少生日我都冇送過嘢畀佢。Simmy又做咩特登同我講呢？咁我要送咩畀毛子蘭好？

（Tbc.）

101 - 凝雨

「射入佢呀！阿錘！」沙維大嗌，佢辛辛苦苦扭過兩個防守球員，再傳波畀我。

我諗住有機會，即刻衝上左，大大力一腳踢落去個波度，點知個波就一飛沖天，龍都唔中。

唔經唔覺，學界足球比賽就開始咗，上半場未夠一半，我哋已經輸緊3比0，雖然啱啱有次黃金機會，但係我就一腳踢咗出界。

踢波真係好難，完全預測唔到個波會去邊，今日我只係掂過三次波，有兩次係喺中圈開波⋯⋯同埋頭先嗰腳。除咗沙維之外，我哋個個都唔識踢波，太一算叻仔，救到兩球勁射。不過沙維完全冇放棄過，基本上全場都見到佢，只要有個波佢就會追，明明打翼鋒，但退到打閘咁，真係辛苦晒佢。

終於都到咗半場休息，雖然只係踢咗25分鐘，但係我已經攰到唔想郁⋯⋯

「阿錘你點踢㗎，畀我入咗啦。」樂少講。
「Sorry囉。」我冇咩氣咁講。
「頂埋佢呀！雖然我哋落後3球，但係未輸晒㗎，盡力踢！」沙維激動咁講。

沙維咁講真係冇人可以駁到佢，因為無論拼勁定態度，佢都畀到足。每次見到人咁有火咁熱血，我都會跟住一齊著咗，就係咁，我哋繼續頂落去。

50分鐘嘅比賽時間已經夠喇，我哋⋯⋯輸緊5比0。大家都冇晒火，面如死灰，而家喺球場已經冇力再跑，除咗沙維⋯⋯

補時嘅幾秒，對方有一個小失誤，佢傳失咗波，畀到咗喺禁區嘅我⋯⋯我把握機會，但係就喺我諗住起腳射波嘅一剎那⋯⋯對方後衛鏟低咗我，球證畀咗十二碼。

十二碼嘅劊子手，交咗畀我哋嘅隊長沙維射⋯⋯佢一射破網！

呢個係佢6年嚟第一個入波，都係我哋足球隊6年嚟嘅第一個入波⋯⋯

同時間，比賽都完結，沙維即刻喊起上嚟，佢用手抹走眼淚，昂首行出球場。

「多謝晒你哋⋯⋯我哋球隊終於入到第一球。」沙維講。

雖然一早知我幫唔到咩手，但係望住沙維個樣始終有啲唏噓。今日望住喺咁跑嘅沙維，我望到我自己，喺夾Band嘅事上面，我都係咁熱血，一樣會咩都搏盡，只係我比沙維好彩，我有好嘅隊友，又唔使踢呢啲殘酷嘅比賽，而且唔會話畢咗業就冇波踢⋯⋯

「阿錘你個十二碼搏得好好呀。」沙維同我講。
「你入到波就得啦。」其實係對手失誤啫，我咩都冇做過。

「夢想，真係好難實現呀。」Sky突然輕輕咁概嘆。
「係呀⋯⋯特別係運動員，始終時間好短⋯⋯」樂少講。
「我哋都冇咩時間㗎咋，所以要趁而家去到盡。」我講。

開咗學成個月，但係夾Band又冇進展，未有新Show玩，淨係做午間音樂。自從拎完嗰個「禁毒原創歌比賽」亞軍之後，我哋好似鬆懈咗好多，係時候要搵啲嘢做，就算冇Show玩，起碼都要有新歌吖。

「Yo，同學仔，你哋⋯⋯係咪冇踢開波㗎？」對面嘅教練安sir過嚟問我哋。
「我哋係臨時拉夫成軍，得隊長識踢波，所以踢得唔好囉。」我講。
「睇得出啦，估唔到『寧華』咁多年後都係踢得咁差，我以前已經喺咁喇。」安sir講。
「唔通你係我哋師兄？」我問。

「係呀，我哋學校唔知點解，每年足球隊都係咁，不過唔好灰心呀，你肯努力足球就唔會離開你。」安sir同沙維講，應該係注意到沙維嘅拼勁啦。
「係呢？你識唔識一個人叫Silas呀？」我見佢同Silas年紀差唔多，所以就問吓。
「孫凝雨？」
「吓？」

「你講嘅Silas呀，佢叫孫凝雨。我同佢中二就識，佢成日都奇奇怪怪，不過內心好純，或者叫好傻啦，應該每個同學都記得佢好鍾意音樂。而家都唔知去咗邊，希望佢冇放棄佢鍾意嘅音樂啦。」安sir講。

原來Silas嘅真名叫孫凝雨。「凝雨」咪就係雪囉⋯⋯夏天雪人⋯⋯就係孫凝雨⋯⋯

＝＝＝＝＝＝

自從喺上次對面足球隊教練口中得知Silas嘅真名之後，我拜托咗一個做圖書館管理員嘅排球隊師弟幫我查吓，到底「神書」上一個借嘅人係咪Silas。而家啲師弟都幾肯幫手，一出聲就唔會托手肘，但由於時間久遠嘅關係佢都要啲時間，要多幾日時間。
今日放學次後，我啱啱好唔使補課，所以落咗去Canteen，因為想靜靜哋思考吓，我哋隊Band下一步可以做咩。見到沙維為咗「足球」咁努力，我會慚愧自己唔夠盡力，所以我唔想咩進度都冇。

正當我沉思緊嘅時候，有個人坐埋我隔離。

「劉星隨，幫我手吖。」
「做咩呀？」
「下個禮拜陸運會吖嘛。」
「係喎，星期一就Day 1。」

「你幫我手改口號呀。」
「你今年仲係社幹事咩？」
「唔係，但係啦啦隊都係我帶，而且我想贏返次，唔想努力咗咁多年都次次輸。」
「又係嘅，呢幾年得我哋『寧社』冇贏過。」

雖然上年我哋贏咗校長盃，但係呢幾年嘅啦啦隊，都係其他社贏，我哋一次都冇贏過⋯⋯

「做咩搵我改嘅？」
「你寫開歌詞吖嘛。」
「吓？都唔同。」
「咪差唔多。」

於是，我就同佢一齊改口號，目標係要夠易記又順口，做好要押韻。佢係邊個？毛子蘭囉。

「你可以用au韻，好多字都係au韻㗎。『手』、『頭』、『後』、『夠』呢啲咁囉。」
「寧社寧社唔怕跌損手、寧社寧社唔怕傷膝頭？」
「類似呢啲囉⋯⋯你係咪講緊我上年跌損膝頭呀？」
「冇呀。」毛子蘭瞌大眼眼，好明顯係講緊反話，不過算啦。

填詞填多咗之後，對韻母嘅了解都多咗，好快就諗到同韻嘅字。我哋一人一句咁諗咗好多新嘅口號，全部都押韻又夠響，今次我哋社嘅啦啦隊一定要贏呀。

「聽日同佢哋練習，一定要練熟晒啲口號。」
「加油呀！」
「嗯。」

（Tbc.）

102 - 「歷史總係驚人地相似」

話咁快就到咗今年校運會嘅Day 2，經過咗無聊嘅Day 1，今日嘅Day 2比賽嘅就係重頭戲。雖然話Day 1好無聊，但對我哋呢啲中六學生嚟講就好唔同，因為已經係中學嘅最後一年⋯⋯

我哋每個同學都着住自己班設計嘅班Tee，而我哋班就揀咗粉紅色，好似係班會主席朱傑嘅意思，我其實就唔係好carry到，不過反正大家一齊著，尷尬都會變唔尷尬。可能因為大家都想留多啲特別嘅回憶，連我都不停咁畀人搵嚟合照，明明我又唔算好多朋友，但係就算唔熟嘅人都會走嚟搵我影相，好多甚至係我哋人生入邊嘅第一張合照。雖然我講到好似好唔願意，但係我心裡面其實係開心嘅，始終都最後一年啦，笑住對人點都好過冷冰冰咁款，於是我嘅Day 1就喺不停咁同人影相入面渡過。

因為Day 1之後冇假放，所以再返咗一日學之後，就嚟到咗星期三嘅Day 2。今年我一早就嚟到咗跳高區，呢度同上年所有嘢都一模一樣，我、Sky、呀輝，都係A Grade唯三嘅參賽者，而Miss Lui就繼續負責計分同做裁判。我當然係志在參與，但係都想突破上年嘅紀錄，畢竟之前練波嘅時候我要打前鋒，所以都特登練咗跳高啲，諗住可以頂頭槌。講開又講，我本身連招式名都諗埋，叫做「流星槌」⋯⋯唔知係咪因為個名太尷尬，我連頂頭槌嘅機會都冇。

成年冇跳高當然冇咩狀態，而且有啲唔自在添，跳咗兩次都過唔到1.38米，唔通都係破唔到上年紀錄？

「阿錘，咪同你講咗行後兩步起跳囉，又唔記得咗喇？」呀輝同我講，佢今年雖然冇咗做社幹事，不過嗰種捱義氣嘅性格都冇變過，仍然係好落力參加唔同嘅比賽。
「係喎，上年你都係咁同我講。」我講。

於是，我行後兩步用盡全力起跳，過咗！係1.38米，我嘅PB！

我完成咗我嘅目標之後，我就安心睇Sky同呀輝嘅決鬥。記得上年，我就係喺跳高嘅時候搵到點樣唱高音嘅方法，無意中學識咗點樣用丹田運道氣上去，所以話「意外收穫」永遠都係最開心嘅。

Sky同呀輝鬥足六年，呀輝就輸足六年，雖然我都好想Sky拎到六年霸，因為學校歷史冇人做到過。但係又好想呀輝拎一次冠軍，如果有雙冠軍就好。

去到1.66米，上年呀輝就係因為跳過所以輸咗，今年唔知佢點呢⋯⋯佢個樣好似有少少緊張，但平時一樣都係照樣咁跳，結果⋯⋯佢終於都過咗！而呢個時候，Sky做咗令我大開眼界嘅決定。因為去到而家為止同呀輝嘅成績都一樣，Sky揀咗唔再跳，所以就有雙冠軍嘅誕生。我都係今日先知原來跳高係可以有雙冠軍。

呀輝好感動咁攬住Sky，不過Sky唔知係咪嫌呀輝啲汗臭，所以笑笑口咁就推開咁呀輝，咁都算係大團圓結局啦。

「阿錘你，幫我揸機吖。」Sky同我講。
「吓？」原來Sky想同Miss Lui影相。

我影相嘅技術呢⋯⋯好差，基本上冇手震，我已經當自己做得好好，更加唔好講啲咩構圖、燈光，我完全唔識。

「我影咗幾張相，你睇吓得唔得。」因為驚影得差，所以我盡量影多幾張相，「我都想同Miss Lui影張相呀，你幫我揸機吖。」Miss Lui話晒都係我哋學校最靚嘅女老師，而且同我哋又咁Friend，我都想搵佢影張相留念。

但係我都未畀部電話Sky，佢已經回應咗我，「阿錘你快啲去幫小蘭手啦，睇吓佢幾攰。」Sky係一路推走咗我。

明明我哋個位都望唔到個台，佢點睇到毛子蘭覺得好攰呢？不過最後我都係上咗去打氣區，而Sky當然就留喺度黐住Miss Lui啦。

去到咗打氣區，寧社喺新口號嘅加持之下，好似有朝氣好多咁，聲勢仲大過其他社。毛子蘭好努力咁打緊氣，佢嘅眼神注意到我，所以我都落咗去陪佢嗌口號。但係我作為樂隊主音，當然唔可以亂咁用自己嘅聲帶啦，傷咗就唱唔到歌，所以我就一直搵緊點樣唔傷聲又可以嗌得大聲。

我大聲嗌咗一陣，好彩班Form 1都聽話，有畀心機打氣，而且我真係好想贏，我教佢哋用手同腳打拍子，好似Queen嘅《We Will Rock You》咁，又齊又大聲，呢啲就係我想要嘅打氣場面。

「飲啲水啦。」毛子蘭畀咗支水我，「你把聲唔可以傷吖嘛。」
「嗯。」我即刻飲咗啲水，果然感覺好好多。
「我仲有喉糖同潤喉膏，你要就食啦。」毛子蘭拎出一大袋物資入面咩都有。
「果然有準備喎。」
「留畀班中一同學㗎，你唔好食晒。」毛子蘭講。

到咗下晝嘅比賽，淨返嘅係班際同社際嘅接力賽，我本身諗住可以輕輕鬆鬆睇比賽，點知⋯⋯又有意外發生。

「今次弊喇，劉星隨，你要幫手呀。」毛子蘭講。
「咩事呀，呀龍又傷咗？」
「唔係呀龍呀，今次係拓爺傷咗，頭先跑班際佢拉親。」
「咁冇辦法啦。」我唯有頂硬上。

於是，我又換返PE衫，再次行出去運動場，但係呢個時候毛子蘭都換咗PE衫。

「你又要跑咩？」我問毛子蘭。
「Harley唔舒服呀。」

於是今年就由呀龍嘅第一棒，咩咩第二棒，毛子蘭第三棒，而我呢個上屆功臣就負責最後一棒。

「歷史總係驚人地相似」，我哋「黑色西炒飯」四個人竟然都返到嚟第四棒嘅起跑線，連介紹參賽者嘅同學都用「黑色西炒飯打吡戰」嚟形容今次嘅接力賽。今年同上年好唔同，因為我哋而家喺學校都有少少名氣，唔同上年冇人識，所以全場嘅氣氛都變到好高漲。

（Tbc.）

103 - 影相

趁住未正式開始，我同毛子蘭傾緊有冇嘢要特別注意，因為佢第一次跑，雖然我都只係第二次跑接力，不過話晒都叫上屆冠軍，分享吓經驗都要嘅。

「你跑步快唔快㗎？」我同毛子蘭講。
「唔快㗎，不過冇辦法啦，都冇人肯跑。」

唔知點解我哋社啲人好似好抗拒跑接力賽咁，個個都好推搪，上年毛子蘭都差啲要頂上去跑A Grade。

「你識唔識交棒呀？」
「咁樣？」毛子蘭拎起接力棒嘗試交棒畀我。
「你係向下交嘅，咁即係我要反手接。」
「你又識嘅？」

「我上屆係冠軍嚟㗎，呢啲拓爺話我知㗎。」我拎咗枝接力棒，「咩咩都係向下交，你都係咁樣反手準備就得。」
「哦。」

Emma今年都有繼續參加，但係Zoey就冇喇，可能因為上次跌棒同「華社」鬧翻咗。

一開始嘅時候，我哋都有少少帶出，原來呀龍都好快，上年因為傷咗冇得跑真係可惜。不過今年其他社嘅交接順咗好多，可能有專登練習過。

去到毛子蘭嗰棒，我哋輸少少，領先嘅係Emma，佢冇再甩手，順利交棒畀Sky，之後到樂少起步，雖然毛子蘭個樣好盡力，不過佢真係跑得好慢⋯⋯我同太一係同時拎到棒，要追到樂少同Sky應該冇可能，就睇吓可唔可以過到太一！

第一個衝線嘅係上年包尾嘅華社，第二係慕社，而我同太一就幾乎係同時衝線⋯⋯

「最後結果⋯⋯第一位係華社，第二位係慕社，最後係康社同寧社並列第三！」廣播系統公布賽果。

吓⋯⋯並列第3？真係有呢個結果？不過算啦，個個有獎都好吖。

陸運會嘅Day2，終於都完結晒所有比賽，大家都已經好開心自己喺度玩緊，同時等學校畀出今年嘅賽果。

「今年啦啦隊嘅冠軍係⋯⋯寧社！」因為校長仲未返嚟，史校董代咗校長宣布結果。

聽到呢個賽果，寧社嘅生力軍同學好開心，而我哋呢啲老鬼就有種釋懷嘅感覺，我心裡面真係好想贏返次，始終6年都冇贏過⋯⋯而且毛子蘭都用咗咁多努力喺度，我好想佢會贏。

最後今年嘅全場總冠軍係華社，但係拎到啦啦隊冠軍，對我嚟講已經夠喇，我嘅六年陸運會就咁完晒。

所有嘢完結之後，我哋呢啲中六嘅人就留低影相，喺畀人講走之前，留低多啲嘅回憶。雖然話好多唔熟嘅人都有走嚟搵我影相，但係反而最熟嘅朋友就好似冇影相。

我同樂少不嬲都冇咩合照，反而多係互相偷拍嘅相，Sky同太一都好少影相，感覺上每次我哋嘅合照都係「被偷拍」嘅，不如都搵佢哋影相啦。

「樂少，影張相吖。」我講。
「我同你？好啦，見係你。」樂少拎出相機，「我哋要影埋張團照呀。」
「係呀，我都係咁諗。」

但係我完全搵唔到Sky同太一，照計又冇理由走咗，運動場都唔算大，佢兩個去咗邊呀？

＝＝＝＝＝＝

喺運動場嘅樓梯邊，身為學生會會長嘅甜豉油幫手執緊垃圾，因為有同學將場刊同食完嘅小食亂咁掉，佢就好心幫手清潔，而太一亦都默默喺佢身邊幫手執垃圾。

「你唔去同班Friend玩？」
「我喺我班又唔係咩受歡迎人物，都冇人搵我啦。」
「咁『黑色西炒飯』佢哋呢？」
「佢哋自己都有大把嘢玩啦，而且阿錘佢哋好耐冇同『激情對話』班人一齊喇。」

甜豉油突然之間，感覺到宇宙嘅訊息⋯⋯佢成身出晒汗，面青口唇白，身體軟弱無力，坐咗喺地下。

「你點呀？聽唔聽到我講嘢？」太一問甜豉油。
「我⋯⋯冇事，係暈咗一下啫。」甜豉油慢慢有返血色。
「你⋯⋯啱啱通靈嚟？」
「唔係。係宇宙傳送咗啲訊息畀我。」

「咁係咩呀？」
「天機不可洩漏。」
「你平時都會講㗎。」
「今次唔得。同埋你快啲去搵劉星隨佢哋啦，佢哋應該搵緊你。」甜豉油嘅語氣非常強硬。

太一見甜豉油個樣正常返，而且佢嘅語氣好似好決絕，都慢慢行去搵劉星隨，但係途中就多次回頭。

到底今次宇宙傳畀甜豉油嘅係啲咩訊息呢？

＝＝＝＝＝＝

當大家都玩得好開心嘅時候，體力已經用得七七八八嘅Sky就留咗喺看台，而佢嘅青梅竹馬Rachel就行咗過嚟搵佢。

「你終於有返啲校園生活喇喎。」Rachel搵到喺看台上面嘅Sky。
「係琳琳你呀。」Sky喺看台上面靜靜咁望住其他同學，「我今日玩得好開心呀。」
「我睇到呀。」Rachel笑笑口講，「你仲搵Miss Lui影相添，你以前淨係會搵嘉怡姐姐影相，都唔肯同我影呀。」
「依家影囉。」Sky拎出電話，「不過我唔想自拍喎。」

「咁我揸機囉。」Rachel拎走Sky佢電話講。

呢張相係自從Sky家姐過身之後，佢哋兩個嘅第一張合照。

「係喎，劉星隨好似搵緊你呀。」Rachel講。
「阿錘佢搵我？」

＝＝＝＝＝＝

我同樂少仲搵緊Sky同太一，結果佢哋兩個就不約而同咁嚟到咗下層嘅走廊。

「阿錘你搵我？」佢哋兩個同時講。
「其實冇嘢嘅，我想話我哋4個係咪應該都影幅相啫。」
「哦⋯⋯」

我哋隨便搵咗B班叫David嘅同學幫手揸機，唔知點解影出嚟好似怪怪哋，笑又唔係好笑，但就又唔係嬲，總之就怪啦。不過一張相其實係咪真係咁重要呢？我哋又唔會有一日要好似《求婚大作戰》咁用啲相嚟回到過去。

講起上嚟，我同毛子蘭都冇影過相⋯⋯

（Tbc.）