【搖滾準備】《我們的某校勁BAND》【重開】

37 - 隊友

我哋落台之後，第一個捉住我哋嘅係隔離學校嘅Yoyo。

「唱得好好呀你哋，可唔可以同你哋做個訪問呀？」
「緊係可以啦！」呢個係樂少。
「各位同儕，多謝多家出席⋯⋯」校長要開始演講。
「我哋一陣再做訪問吖。」Yoyo同我哋講。

之後Yoyo就去咗影校長，同埋準備做老師訪問。

「你哋覺得啱啱點呀？」我問佢哋。
「反應好似麻麻地。」樂少講。
「好似曹sir唱嗰陣仲好反應，係咪首歌冇人識呢？」太一講。
「我諗可能係我哋嘅問題。」Sky講。

「咩意思呀？」我問。
「可能因為觀眾係老師，睇表演有顧慮都合理，但係我哋帶唔起氣氛就係事實。」Sky講。
「都係我MC做得差⋯⋯」我講。
「算啦，班老師都唔會認真聽嘅。」樂少安慰我。

會唔會真係我嘅MC能力太差呢？自問都冇咩主持嘅天份，的確以我而家嘅唱功或者技術，根本冇可能令班觀眾留心我嘅表演⋯⋯

「阿錘你，又唔使自責嘅，始終你都係第二次上台表演啫。」Sky講。

過咗一陣，Yoyo已經訪問完我哋校長，估唔到連我哋學校嘅校園電視台都未訪問我哋，就有其他學校嚟搵我哋。

「你哋今日表演呢首歌係原創歌喎，可唔可以講吓作呢首歌嘅原因係咩呢？」Yoyo問我哋。

「我哋主音阿錘有一日受到我嘅啟發，就作咗呢首歌喇。」樂少咁講。

明明我作嘅時候係⋯⋯因為⋯⋯毛子蘭話我懶。

Yoyo將枝咪指向我：「Err⋯⋯其實主要都係想講⋯⋯我係好懶，懶到只係想夾Band⋯⋯面對嗰啲阻住我嘅人，我會懶理佢哋⋯⋯好似歌詞所講，我只係想夾足一世Band⋯⋯就係咁。」

「咁夾Band嘅過程有冇遇到咩困難同阻礙呢？」Yoyo問我哋。

我哋四個互相望住大家，其實我哋都有啲嘢想講，不過又唔知點講咁。

「我覺得多多少少都有啲困難嘅，例如有時唔知係咪想堅持落去呀。」樂少講。

樂少咁講，應該都係指Emma件事，唔知佢心裡面係咪真係OK呢。

「咁夾Band有咩開心嘅經歷可以分享？」
「夾Band好開心，因為可以搵到平時冇嘅嘢，例如隊友。如果要話開心嘢，應該要問返我哋主音，佢早排先有艷遇。」太一講。

本身都畀太一個答案感動到，但係突然又跣我一鑊，頂！

「喂！唔係呀⋯⋯夾Band最開心係⋯⋯我搵到目標，可以努力向住一個方向衝！」
「多謝你哋接受我哋嘅採訪。」Yoyo講。

然後一片笑聲之中，我哋嘅訪問就完咗。

「你哋好犀利呀，又識夾Band，又識作歌！」Yoyo同我哋講。
「多謝。」樂少講。
「你哋有冇IG或者Facebook呀，我Follow你哋吖。」
「冇呀⋯⋯你可以follow我IG呀。」樂少講。

之後Yoyo就follow晒我哋IG，但係呢個時候我先發現，原來Sky連IG都冇用。

「吓，你冇用IG？」Yoyo問Sky。
「IG係咩嚟㗎？」Sky答。

其實我一直都想搵Sky嘅IG follow，但係我就一直都搵唔到，雖然都覺得Sky唔會打理自己IG，但係竟然連IG係咩都唔知，果然同唔知班會係咩嘅司徒天一樣，Sky都係嗰個懶理世界嘅佢，睇懶嘅人唔只我一個。

之後因為晚宴都進入尾聲，有啲老師已經走緊，我哋就執緊嘢，樂少就同Yoyo傾咗好耐，唔知搞乜。

「喂樂少，Pack嘢呀！」
「嚟啦！」
「有新目標喎。」我望一望Yoyo。
「唔係啦，係佢幾好傾啫。」

因為已經11點嘅關係，我哋唔使搬Amp同鼓返學校，老師會負責，所以我哋執齊嘢就走得。

Miss Lui走之前嚟同我哋講咗兩句。

「辛苦晒喇，好好抖下，準備考試呀。」

係喎，我都差啲唔記得，聖誕假之後就係考試⋯⋯

「司徒天，畀返條鏈你。」Miss Lui畀返條鏈Sky。
「送畀你吖，我覺得Miss Lui你，戴得好好睇。」Sky笑笑口咁講。
「咁多謝喇，不過我改卷唔會鬆手㗎。」
「哈哈，咁我拎全級第一畀你睇啦。」

估唔到Sky竟然會咁講，我都有啲震驚。

當太一拆完套鼓之後，在場嘅人都走晒咁濟，我望咗一望個場，淨返負責執手尾嘅梁sir喺到，連毛子蘭都唔見咗，仲諗住say個Bye先走㗎嘛。

因為啱啱冇食飽嘅關係，而家好肚餓。

「好肚餓呀！」我講。
「食宵夜囉。」樂少講。
「整碗糖水囉，隔離街有間正嘢。」太一講。
「好呀。」Sky講。

「喂。」後面傳嚟一把聲。
「原來你未走㗎？」
「畀你哋㗎。」佢咗幾包飲品我。
「多謝你呀，小蘭。」樂少講。

「檸檬茶係樂少嘅，太一就係烏龍茶，Sky就係朱古力，你就係維他奶。」佢同我講。

「多謝。」

冇錯，呢個人又係毛子蘭。

「小蘭你，點解會買朱古力畀我嘅？」Sky問毛子蘭。
「我都係隨便買㗎，因為佢咁啱得返一包，所以我諗懶得諗嘅你會揀佢。」毛子蘭講。
「冇錯呀，睇嚟小蘭你，了解我仲多過我班隊友呀。」Sky講。
「喂阿錘，你送人返屋企啦。」樂少講。

「吓？」
「係呀，依家夜晚危險呀，人哋一個女仔。」太一講。
「最多糖水鋪等你啦。」Sky講。
「快啲行啦。」樂少又推我走。

「唔使送我啦。」毛子蘭講。
「咁一係送你去搭巴士。」我突然之間講。
「嗯。」毛子蘭微微點頭。

「咁我哋去糖水鋪喇，你一陣打畀我啦。」太一講。

就係咁，我就送毛子蘭去搭巴士喇。一路上，我哋冇咩傾偈，因為唔知講咩好。

「首歌點呀？」我問佢。
「幾好呀，同你一樣，好懶。不過⋯⋯好聽。」

就係咁，空氣又靜咗落嚟，到底應該講咩好呢？

「你其實⋯⋯除咗返學同溫書有咩做㗎？」我求其問啲嘢啦。
「整嘢食囉⋯⋯」
「吓，竟然係咁？」
「我爸爸唔識煮飯，而媽媽就成日飛嚟飛去唔喺香港。」

「你媽媽係空姐？」
「唔係呀，佢做導遊㗎，成日都去唔同國家。」
「所以你要負責煮飯？」
「嗯。」

我哋到咗巴士站，兩個人就好靜咁喺度等車。我哋安靜到，只係聽到我飲維他奶嘅聲。

「而家係負四蚊。」我同毛子蘭講。
「咩呀？」
「你之前請我飲咗兩包維他奶，呢包係第三包，所以倒差你四蚊。」
「差我五蚊呀，呢度一包維他奶賣七蚊。」

「一蚊就唔好計啦。」
「又係你自己計先嘅。」
「超～不過⋯⋯唔該晒，因為我真係好肚餓呀。」
「你可能要唱『我懶到只想飲包維他奶』。」

「都唔啱音。」
「咁你作首啱音㗎囉。」

就喺不知不覺間，巴士已經到咗，突然之間，我唔想架車咁快嚟，我仲想同毛子蘭傾多一兩句⋯⋯

「巴士到喇，我上車。」
「Bye-bye⋯⋯返到屋企話我知喎。」
「嗯。」

（Tbc.）

38 - 太鼓達人

「你哋估小蘭同阿錘會點呢？」太一問。
「我諗阿錘應該真係送到小蘭上車就返嚟，佢個人咁遲鈍。」樂少講。
「阿錘佢，其實應該好開心。」Sky講。

佢哋三個去咗太一推薦嘅糖水鋪食糖水，其間討論咗唔少嘢，由學校到音樂，再到劉星隨同毛子蘭嘅關係。

＝＝＝＝＝＝

我送走咗毛子蘭之後，就去打畀太一，再去糖水鋪搵佢哋。坐低冇耐就收到毛子蘭Message，佢話佢已經返到屋企，其實我係咪應該要覆返啲嘢呢？不過我最後決定係唔覆任何嘢⋯⋯

「傾緊咩呀？」我問佢哋。
「講緊你同小蘭呀。」樂少講。
「我同毛子蘭有咩好講呀？」
「阿錘你，真係咩都feel唔到咩？」Sky講。

「咩呀？」
「算啦，你遲啲就會明。」Sky講。
「我哋考試前仲夾唔夾呀？」太一問。
「我可以呀。」
「我都可以，但係我冇時間練嘢，因為要溫書。」樂少講。

「咪溫啦，你咪又係炒。」太一講。
「我上次炒英文啫，呢排聽咗咁多英文歌，肯定唔會炒呀！」樂少講。
「咁一係考完再夾囉，都係兩個禮拜啫，反正我哋都未有新歌。」
「就咁話啦。」樂少講。

係喎，一放完假就要考試，雖然話就話我唔係努力讀書嘅學生，但係唔合格就要補考，而且好麻煩，所以我都有溫少少書，希望可以Pass啦。

＝＝＝＝＝＝

過咗幾日，已經嚟到新嘅一年，一放完假就係考試日。經過咗十日嘅考試，終於可以抖吓，而且可以夾返Band。

今日係星期四，係我哋最後一日考試，但係中六同中三就仲要考多日，所以聽日我哋都唔使返學，加上而家先係12點半，變相又多半日假。

「終於考完喇！我哋幾時夾Band呀？」樂少問我。
「星期六？呢排學校音樂室又唔開。」
「好呀。」

估唔到樂少而家會主動提夾Band，睇嚟之前擔心佢因為Emma會放棄音樂真係多餘。

「喂！」太一衝過嚟，搭住我同樂少膊頭。
「點呀，有幾多題識呀？」樂少問太一。
「我考ICT啫，輕鬆啦。係喎Sky呢？」太一講。
「佢考VA吖嘛，有排先完呀。」

「不如去尖沙咀打機啦，我好耐冇打太鼓呀。」太一講。
「我一陣要開SU會呀。」樂少講。
「咁我同太一去啦，反正我想包新弦。」
「咁食晏先囉。」樂少講。

＝＝＝＝＝＝

另一邊，考VA嘅Sky同Emma終於考完。

「終於考完，好眼瞓呀。」Sky講。
「你好似好攰喎。」Emma講。
「少少啦，依家揸畫筆好似好攰咁。」
「你慣咗揸Pick吖嘛。」

「可能係掛。」
「樂少，點呀？」
「樂少佢，OK呀，你擔心佢？」Sky笑笑口咁問。
「又唔係擔心嘅，不過⋯⋯唔識講添。」

「藍色水彩同學⋯⋯你好似肥咗。」Sky突然咁講。
「我邊有肥到呀。」
「因為你，裝咗好多嘢喺心入面，所以肥咗。」Sky又笑笑口咁講。

Emma一時之間唔知講咩好⋯⋯

「我返屋企先喇，好眼瞓。」Sky就咁就行返自己屋企。

Emma望住Sky嘅身影愈行愈遠，自己一個留低咗喺學校。

＝＝＝＝＝＝

我同太一話咁快就去到機鋪，今次好似係我哋兩個人第一次獨處，通常我哋都係四個人一齊，所以好似感覺有啲奇怪。

入機鋪前，因為突意諗起毛子蘭講嘅嘢，我除咗件恤衫先入機鋪。

「阿錘你竟然肯除衫？」太一講。
「話晒考試季節，尊重下學校都好嘅。」

我都唔知我做咩會咁做，其實我大可以唔理，因為學樂少咁講，邊有老師會山長水遠去尖沙咀捉我哋吖，但係又硬係好似聽到毛子蘭喺我耳邊講嘢咁。

太一即刻衝去打太鼓，而我就靜靜咁睇住佢打鼓。雖然太一冇講，不過其實我聽得出佢打鼓有啲唔同咗，以前佢只係會打Single，而家好似用多咗Double，喺佢打太鼓就知。

太鼓達人嘅感應器，可以分做四個部分，分別係左右鼓皮同左右鼓邊，以前太一係左右手輪住打，所以螢幕左右兩面會不停變，但係而家好明題睇到佢由RLRL變成RRLL嘅打法。

「Miss咗兩個，頂！」太一講。
「Miss兩個好勁啦，你打鬼喎。」
「咁都係嘅，阿錘你打唔打呀？」
「試吓囉，都好耐冇打，我打『花』算喇。」

「花」係太鼓達人入面最易玩嘅一級，我印象中我應該可以打到「花」嘅全Combo，睇吓咁耐冇玩會點先。

「睇吓先⋯⋯一定係揀《天体観測》！」我最鍾意打嗰首就係BUMP OF CHICKEN嘅《天体観測》。

其實「花」難度真係唔難，連我都輕鬆打到。

「犀利喎，全連。」太一講。
「『花』咋喎，『竹』我都已經打唔到啦。」
「大鑊，有差佬。」
「咁我哋係咪要走呀？」
「不過佢哋好似冇打算查我哋喎⋯⋯」
「可能打太鼓機喺佢哋眼中都係乖仔掛。」

其實我都聽講過就算警察查機鋪都唔會查打太鼓達人嘅人，原來係真。

我同太一著返校服，然後就去通利買結他弦。我枝結他由買之後開始計，大概彈咗三個月都冇換過弦，所以差唔多係時候換弦。既然我係彈Squier，咁就緊係買包Fender弦先啦，因為費事特登出嚟買，我另外買咗兩包弦。

「係呢，樂少使唔使買弦呀？」
「Bass唔使咁快換㗎，半年換一次都冇問題。李sir畀佢之前先換過一次，我諗應該可以再撐多三個月。」
「咁睇嚟彈Bass抵啲喎。」
「邊有得咁計㗎。」
「都係嘅。」

太一帶咗我去佐敦嘅一間小食店，佢高度推介我試佢哋個西多。我試完之後就覺得，其實好食，不過又未去到話頂級水評，我諗同我哋屋企比，應該只係好食少少。

「我覺得一般般啫。」
「係咪你食慣屋企啲嘢，嘴刁咋。」
「唔係掛，我都嘴刁？我屋企啲嘢出名普通㗎喎。」
「咩呀，你屋企啲嘢勁好食喎。」

原來佢係覺得「流星記」啲嘢好食，咁就真係多謝喇。我哋食完準備走嘅時候，有個男人叫住太一。

「太一！」
「阿爸。」

呢個男人係太一阿爸，佢戴一副銀色嘅眼鏡，非常有氣勢。而太一見到佢阿爸之後，有少少唔同，冇咗平時嗰種傻更更嘅感覺，突然之間好嚴肅。

（Tbc.）

39 - 鼓棍與撥片

「你朋友呀？」太一阿爸問太一。
「係呀，佢叫劉星隨。」太一答佢阿爸。
「劉星隨？個名幾得意喎。有冇諗定想入邊間U呀？」太一阿爸同我講。
「Err⋯⋯我諗住睇吓DSE幾多分再算。」我答太一阿爸。

「哦，咁呀。你哋應該今日考完試係咪，間中放鬆下冇壞，不過適可而止。」太一阿爸咁講。
「我哋差唔多走㗎喇。」太一答佢阿爸。

我望住太一，呢個唔係我認識嘅佢，不過我記得佢講過佢阿爸好古肅，原來係呢個意思。

「你係咪佢夾Band嘅朋友？」」太一阿爸問我。
「係呀。」
「你哋夾Band冇問題嘅，不過玩下好喇，嚟緊呢一年好重要，專心啲讀書呀。」太一阿爸同我講。
「我唔係玩㗎，我係認真夾Band㗎。」我同太一阿爸講。

太一阿爸稍稍擘大眼，微笑咁郁下頭：「幾有理想吖，不過太一唔會一直同你夾Band，如果佢DSE考得唔好，我會送佢去外國讀書，你哋要玩玩到畢業前好喇。」

「吓？」我望一望太一，佢好似有啲唔敢望我。

太一阿爸講完之後就離開咗我哋。

「喂，真㗎？你要去外國？」我問太一。
「佢係咁講囉。」太一冇咩心機咁答我。
「咁你自己都想去？」
「我都唔知。」

其實我都冇諗到咁後嘅事，我只係知到我想夾Band，但係我根本冇諗過佢哋，畢業之後我哋會變成點，我都冇同佢哋傾過⋯⋯

「咁你而家返屋企？」我問太一。
「唔返住啦，我想打陣鼓。」
「係喎，你平時喺邊到練鼓㗎？」
「通常拍子喺屋企練，戴耳機然後打Pad或者打枕頭，再搵一兩個鐘去鼓房練手感。」

「其實練鼓都幾麻煩。」
「係呀。」
「最難應該係手感會唔慣，因為結他同Bass都可以隨時跟喺身，但係鼓就唔得，我上台就得呢對鼓棍。」太一喺書包拎對鼓棍出嚟。
「原來你有帶㗎？」我有少少估唔到，原來太一會帶埋鼓棍返學。

「有對鼓棍喺袋好似放心啲。」
「好彩我都有幾塊Pick傍身。」我拎出褲袋嘅Pick。
「不如今日一齊Jam下嘢。」我同太一講。
「咁我Book間房先？」

「Let's Go！」
「使唔使Call埋佢哋呀。」
「樂少開會，Sky可能仲考緊試喎。」

於是我同太一就兩個人去咗間Band房Jam嘢。

＝＝＝＝＝＝

樂少啱啱同SU嘅同學開完會，依家準備返屋企，佢行到學校門口，見到同樣準備走嘅Emma。樂少有少少緊張，因為考試嘅關係，佢哋都冇喺學校見過面，今次係樂少收到好人卡之後，第一次見到Emma。

「Hi，考完VA？」樂少慢慢行近Emma。
「嗯⋯⋯」Emma微微點頭，未敢有眼神接觸。
「考咁耐一定好攰⋯⋯」
「少少啦⋯⋯」

佢哋兩個一齊喺學校離開，空氣突然安靜，就好似放聖誕假前嗰日咁，兩個人喺學校門口條街，冇人冇車冇聲。

Emma喺一陣寂靜之後，Emma終於開口：「你有冇唔開心呀，其實我⋯⋯」

「冇啦。」樂少搶先打斷咗Emma嘅說話。

樂少表現出一乎「笑看風雲過」嘅樣，面上冇一絲嘅悲傷。

「我⋯⋯冇唔開心啦⋯⋯已經，其實你唔使諗咁多㗎，你繼續做自己就得。」樂少望住Emma咁講。
「好⋯⋯呀。」Emma靜靜咁答樂少。

原本樂少只係想將佢對Emma嘅呢份心意放喺心入面，只係唔少心畀Emma知道咗，雖然一開始樂少真係好唔開心，但係當聽咗好多歌之後，樂少心裡面慢慢明白到，呢次並唔係一件壞事。而且見到Emma咁在意佢有冇唔開心，證明Emma真係一個好好嘅女仔，所以樂少就算知道自己無可能同Emma一齊都冇咁傷心。

「其實我哋之前根本連朋友都唔係，只係我自己單方面，無端端鍾意你啫。本身我諗住收埋先㗎，不過唔小心畀你知道咗⋯⋯哈哈。」
「嗯⋯⋯」
「我嗰晚聽咗首歌叫《有人》，我知你要拒絕我，應該都唔係咁容易開口？所以⋯⋯你已經做得好好喇⋯⋯我哋做朋友吖。」

樂少向Emma伸出手，Emma亦都握咗落去，兩個人暫時將過去嘅事拋開，變成朋友嘅關係。

《有人》係麥浚龍喺2005年出嘅一首歌，講述難以拒絕示愛者而忐忑嘅心情。

＝＝＝＝＝＝

話咁快就到咗派卷嘅日子，第一份派嘅係我份Physics，我炒到好大鑊，只係得28分，不過因為一早諗住drop，所以我都冇一絲嘅傷心。

而家係中文堂，Miss Lui派卷嘅時候，特別表揚Sky，因為佢竟然喺中文拎到第一，以前嘅Sky大概只係徘徊喺十名左右，估唔到Miss Lui會令Sky嘅分數升咁多。我就都係差唔多，都係合格高少少，樂少就炒咗寫作，不過拉平均數應該合格。

至於其他科，就同以前冇咩分別，英文Writing仲要高分咗，唔知係咪聽多咗英文歌嘅關係，Vocab識多咗，連何副校都唔太相信。

放學之後，我哋又去咗SU房，我諗而家其他人應該會以為我哋係學生會。

「喂太一，考成點呀？」樂少問太一。
「OK 啦，炒Maths囉。」太一少少慘咁答。
「垃圾，Maths都炒。」
「今年B Part好難呀，連Sky都低分咗啦。」

「我係特登拎低分啲㗎。」Sky笑笑口咁講。
「因為你要Keep住考第11，所以要拉返低平均分？」我問Sky。
「係呀，估唔到阿錘你，都幾醒目喎。」

都知Sky懶得考頭十名，只係估唔到為咗中文拎高分啲，竟然會將Maths考差啲，真係諗唔明啲成績好嘅人⋯⋯

「我哋嚟緊有咩做呀？」太一講。
「冇Show玩喇，又就嚟放新年假，要唔要去個Camping呀。」樂少講。
「都好喎，反正我屋企都唔拜年嘅。」Sky講。
「我應該初一至初三之外都得呀。」我講。
「咁假期完之前嚟個小Trip啦。」樂少講。

（Tbc.）

40 - 神書

「係呢，你哋有冇營呀？」樂少問。
「冇呀。」我哋一齊答。
「咁點露營呀！」樂少講。

最後因為大家都冇露營工具，我哋決定去長洲宿營就算。

2014年1月17日

而家呢段時間返學係一件幾爽嘅事，因為啱啱又考晒試，而且過多一個禮拜又再放假，所以無論係老師定學生都好似懶洋洋咁，一齊等待新年假嘅來臨。

由於我Drop咗Physics，所以而家呢一堂就變成空堂，學校為咗安置我哋呢啲冇堂上嘅學生，安排咗幾個課室畀我哋，由一啲空堂嘅老師嚟代課，但係我哋主要都係自修。

我因為要做閱讀報告，所以落咗圖書館。

我哋學校圖書館唔大，得幾個大書架，平時我都係喺最多人借嘅青春小說同科幻小說揀，但係今日我唔知點解想睇吓英文書嗰邊。

明明係做中文科功課，但係有種感覺我要喺度搵啲嘢咁。英文書呢邊除咁英文書之外咩都冇，當我行到最尾嘅時候，有一本書好似召喚緊我咁，我望住呢本書，就好想拎起佢⋯⋯

呢本係一本講Music Theory嘅書，我睇返借閱紀錄，上次嘅借用日期竟然已經係2003年，即係十年冇人借過，而且我係第二個借呢本書嘅人，究竟呢本書發生咩事，會喺學校十年都冇人借呢。懷住極大嘅好奇之下，我開始睇呢本書，雖然呢本書係英文書，但係因為我成日上網睇教音樂嘅片，所以大多數都睇得明，但最神奇嘅係上次借呢本書嘅人將一啲深嘅英文字翻譯咗，再寫中文解釋喺上面，我諗呢個人應該同我一樣係個英文差嘅人，所以就做晒翻譯。

本書教嘅係一啲基本嘅理論，再加上一啲作者嘅見解，但係除咗呢啲作者寫嘅嘢之外，每一部分都有人寫低咗一段文字，包括喺佢眼中，應該點樣用呢啲技巧，甚至係點樣喺唔同嘅風格應用呢啲技巧。我覺得比起直接睇呢本書，睇佢寫嘅嘢更加有用，例如點樣用3 Chord Major喺一首歌裡面，適當咁用Minor 6可以令到旋律有更多彈性。佢仲喺其他空白嘅位上面寫咗佢自己嘅一啲事，同埋佢嘅心境。於是我連喺上文學堂，甚至下晝都繼續睇呢本書，我覺得呢本簡直係一本神書。甚至喺放學之後，我竟然自己坐咗喺Canteen睇書，我點會估到我都有呢一日吖。

「劉星隨，你睇緊咩呀？」毛子蘭問我，果然Canteen係一定撞到毛子蘭嘅地方。
「神書呀，呢本嘢簡直就好似《九陽神功》咁！」
「你當自己張無忌咩？」毛子蘭笑我。
「唔係呀，呢本嘢成十年冇人借過，點知又會無啦啦畀我喺圖書館搵到。佢仲寫咗好多Note喺上面，你睇吓。」我畀本書佢睇。

「咁樣唔啱㗎，就算想寫Note都唔應該喺學校啲書到寫字㗎嘛。」
「算啦，佢寫嘅嘢畀作者寫嘅更加有用呀。」
「我冇見過你咁認真睇書，你啲書全部都勁新，好似冇揭過咁。」
「我只係上堂留心啫，所以係可以唔使睇書嘅。」

「你考試考成點呀？」毛子蘭問我。
「科科都差唔多囉。你一定考得好好啦，中四啲嘢都唔係好難啫。」
「嗯⋯⋯都算唔錯啦。」
「做咩考得唔錯都咁嘅樣嘅？」

「我都唔知⋯⋯好似唔開心咁。」
「咁咪即係你唔鍾意囉。」
「吓？」
「你好鍾意讀書咩？」

「又唔係嘅，不過考高分啲未來會多啲選擇啫。」
「我覺得呢，畀太多選擇自己，反而未必係好事，做自己想做嘅選擇，唔係就已經夠喇咩？」
「嗯。」

毛子蘭之後就返咗去做嘢，而我就繼續睇緊本神書。

＝＝＝＝＝＝

呢本神書竟然連佢自己嘅校園生活都有寫低，甚至有講到佢畀女同學當做男神嘅事，仲精彩過本身嘅Music Theory。

我甚至帶住本書出街睇，今日去夾Band嘅途中我都有睇本書。

而家嘅星期六，我哋都間中會去The Echo夾Band，但係我每次都係打畀達仔，因為完全唔夠膽打畀Tina。上次佢就咁啱冇返工，所以冇見到佢，但係今日Tina就有返工，而且仲著條短裙。

今日佢哋個個都遲到，而我因為廢事蝕鐘，所以自己上咗去先。

「做咩咁耐唔嚟呀？」我一入到去Tina就問我。
「因為嚟嗰陣，你咁啱唔喺度吖嘛⋯⋯」
「留咗間大房畀你，反正冇人Book。」Tina笑笑口咁講。
「多謝。」

「你啲朋友呢？」
「遲到囉，都冇人準時嘅。」
「咁我陪你一陣吖。」

Tina跟咗我入房，然後就望住我Set嘢，真係勁緊張，未試過咁樣同一個唔熟嘅女仔獨處，因為太緊張，我成枝結他跌咗。

「你做咩好似好驚咁嘅？」Tina笑住咁講。
「冇呀⋯⋯」我連把聲都有少少震。
「我哋唱歌吖。」Tina突然咁講。
「唱⋯⋯歌？」

「唱《目黑》好冇呀？」
「好⋯⋯」

「～黑色眼睛沿途與你有過一幀風景～」

原來佢唱歌都幾好聽，而且把聲好甜，佢甚至可以做埋和音，同佢合唱好有畫面，有種好似真係喺目黑區嘅感覺。

「你唱歌好好聽喎。」我同Tina講。
「普通啫，你唱得好啲。」
「唔好講笑，我真係覺得你唱得好好喎。」
「咁多謝你啦。」

Tina突然間哄到好埋，搞到我心跳得好快⋯⋯

「喂劉星隨，你夾Band係咪為咗溝女㗎？」
「緊係唔係啦，我係因為想夾Band而夾Band。」
「咁就好喇。」
「咩呀？」

原來Tina上一個男朋友都係一個Band仔嚟，Tina畀佢嘅才華吸引，所以成日幫佢，但係最後個男仔就出軌，所以佢唔想再見到啲為咗溝女而扮Band仔嘅人。

「我對音樂係認真㗎！我哋雖然而家仲係一隊冇人識嘅Band，不過我會繼努力⋯⋯」
「過多幾年，可能我會鍾意你都唔定。」Tina甜笑住咁講。
「吓？！」
「你啲朋友到喇，下次再一齊唱歌啦。」

Tina就係咁出咗去，究竟佢咁講係咩意思呢，佢唔係鍾意我呀嘛？我喎⋯⋯雖然TIna喺MK妹之中，真係算靚嗰批，但係我對佢完全冇感覺，而且同佢一齊會好緊張，就連啱啱一齊唱歌都有啲唔自在。

同埋，而家嘅我只係想夾Band，愛情嘅嘢隨緣啦⋯⋯

我記得神書入面都有講過，佢因為冇膽同心儀嘅女仔表白，所以選擇咗寫歌畀佢，之但係當寫完嘅時候，個女仔已經同咗其他人一齊，所以愛情嘅嘢，都係隨緣啦⋯⋯

（Tbc.）

41 - 新年假

話咁快就到咗新年假，呢個喜氣洋洋嘅節日，最啱就係留喺屋企，因為茶餐廳年三十晚先收爐，所以啲咩貼揮春同準備全盒都係我同家姐負責。

我自己都幾鍾意過新年，當然唔係因為有利是呢啲啦，係因為得新年我哋先可以一家人齊齊整整咁過，我哋爸爸媽媽佢哋兩個平時大部分時間都留喺「流星記」，放假都好少一齊放，所以新年可以一齊過，就要好好咁珍惜喇。

今年嘅年初一，我一如以往，一起身就同爸爸媽媽逗利是。

「細佬，祝你學業進步、快高長大。」爸爸媽媽派緊利是畀我。
「唔好嘥晒啲錢買結他呀。」媽媽同我講。
「唔買住啦，啱啱先換咗弦。」
「爸爸媽媽，身體健康、龍馬精神。」

我喺廳睇緊電視播嘅新年節目，有班藝人唱緊《財神到》，以前都冇留意，原來《財神到》首歌都幾Rock，唔係講我哋而家定義用晒Distortion嘅Rock，係好似Beatles年代嗰種真正嘅「Rock and Roll」。雖然搖滾樂喺現代音樂入面，已經有愈嚟愈多嘅種類，但係喺香港，Rock好似就等於Distortion同電結他，反而真正嘅「Rock and Roll」喺好多人眼中，根本就唔搖滾。

其實我自己一開始都係咁諗，覺得Rock就係Distortion同電結他，但係隨住接觸多咗唔同嘅音樂，我會話「搖滾」呢個詞語已經唔係解做「Rock and Roll」，佢反而變成咗一種精神，一種反抗嘅精神。

而我亦都一直喺度搵緊我想做到嘅音樂風格，究竟「黑色西炒飯」嘅歌應該係點呢⋯⋯

因為下晝先會出街食飯同拜年，所以冇嘢做嘅我又拎起結他嚟練習。神書度有講到佢會將結他轉Eb Tuning，即係將所有弦都調低半度。因為佢鍾意嗰種聲，覺得比Standard Tuning更加Rock。我試咗用Eb Tuning，但係就唔覺得有好大分別，只係彈B Key嘅歌會方便好多，可能我枝結他比較乖，音色冇咁惡，所以分別唔大。

最新我練緊速彈，因為無論點彈，我都玩唔到《自動勝利》個Solo，明明見Sky彈得好輕鬆，我都唔明點解我彈唔到，不過唔知係咪天份問題，真係練極都彈唔到⋯⋯睇嚟都係疊埋心水做個Rhythm結他同主音算喇。

今日我家姐部電話不停咁響，應該係佢啲Friend係咁Send Message畀佢，而我就只係得「黑色西炒飯」個Group會響。

「喂家姐呀，你電話係咁響呀，你開靜音啦。」
「你夠彈結他嘈住我啦。」
「點同呀，我要練習吖嘛！」
「你戴耳機啦！」

「你兩個留返初三先好嗌交呀。」媽媽走嚟叫我哋靜啲。

太一喺「黑色西炒飯」個Group同大家講恭喜發財，估唔到佢呢個日本仔反而最重視呢啲傳統。Sky之後就開始Send長輩圖出嚟，樂少就Send咗啲搞笑改圖出嚟。

我將我哋個Group名改咗做「黑色西炒飯－搖滾天下！」。

既然要「搖滾天下」，第一步就係要作多啲歌，神書入面有寫佢作曲嘅方法係用音符表達心境，就好似貝多芬喺《給愛麗斯》入面就表達緊貝多芬因為唔敢表白而不斷徘徊嘅心理。

＝＝＝＝＝＝

夜晚嘅時候，我哋一家出咗去同班親戚食飯，因為每年只係見幾次，其實唔算好熟，所以我同佢哋都冇咩偈傾⋯⋯

不過我見我表哥著咗件Nirvana T恤，唔通佢都鍾意聽Nirvana？我抱住呢個疑問開口問佢。

「表哥，你鍾意Nirvana？」
「咩呀，你講件衫？我唔知喎我見個個都著先買咋，潮牌嚟？」
「唔係呀Nirvana係一隊Band嚟，可以話係Grunge嘅先驅。」
「哦⋯⋯我諗住型先著咋。」

其實好多人都好似表哥咁，著Band T只係因為型同埋潮，有好多人甚至唔知隊Band點讀，或者唔知係一隊Band。Nirvana就係其中嘅佼佼者，因為佢哋本身喺西方世界好出名，亦都有唔少潮人著，於是香港就好多年輕人會模仿佢哋而著NirvanaT恤⋯⋯

「哦，原來讀Nirvana呀，我一直都唔知點讀。」我家姐加入咗我哋嘅對話。
「係呢，英文書都冇教過呢個字。」表哥答佢。
「我鍾意嗰個韓星都著過呀，我仲諗緊係咩名牌。」家姐講。

結果佢哋就變咗喺度傾邊個明星有著呢件T恤，估唔到嚟到香港，Nirvana只係一個喺普通人眼中嘅潮T⋯⋯

無論係Rock and Roll定Nirvana，根本都冇人care背後象徵係咩，所以話吖「香港係冇樂壇」。

因為同嗰邊傾唔到，所以我就同返呀妹傾偈，不過佢就突然問咗我一個問題。

「哥哥，你識唔識彈Bass呀？」
「唔係好識呀，做咩咁問？」
「我睇緊套漫畫，講個男主角彈Bass，有啲想學啫。」
「咩漫畫呀？」

「《她愛上了我的謊》。」
「搵個Bass手做主角咁得意？」
「係呀，好好睇㗎！」
「咁你想學？我可以叫我個Frined教你嘅，不過佢都應該未可以教人。」

「咁算啦，遲啲再算。」

《她愛上了我的謊》係一套日本漫畫，大概係講男主角本來係可以出道嘅樂隊Bass手兼作曲人，後來因為唔滿意唱片公司要佢哋假唱之後退團，又突然對一個自己嘅Fans，即係女主角一見鍾情嘅少女漫畫。

估唔到原來Bass手都可以咁型，因為呀妹講完我就開始咗睇漫畫，估唔到又幾好睇。而且男主角彈Bass嘅原因都幾有趣，係佢爸爸喺樂器鋪買錯咗，原本係想買結他畀佢⋯⋯

就係咁，我新一年嘅頭幾日就係練結他同睇漫畫咁度過喇。

（Tbc.）

43 - 長洲之旅（2）

甜豉油同Simmy喺廚房洗緊菜，Simmy同時問緊甜豉油嘅戀愛意見。

「會長，你覺得我同Sky哥哥有冇可能呀？」Simmy問緊甜豉油。
「應該冇。」甜豉油答。
「吓，點解呀？」
「你嘅True Love應該仲要等3年。」

「但係Sky哥哥真係好靚仔呀，彈結他又型，平時懶懶閒，但係讀書又勁喎，不如我試吓追佢啦。」
「我諗你都係唔好嘥時間啦。」

Simmy繼續喺廚房偷偷地望住Sky。

＝＝＝＝＝＝

雖然話就話打邊爐同BBQ，但係主要都係我同樂少喺出面燒嘢食，話要BBQ嘅太一就走咗入去打邊爐。

「喂阿錘，不如我哋都收爐啦，反正都冇人燒嘢食嘅。」
「唔好啦，我哋透得好辛苦喎。」
「咁呀，你加油啦，我入去打邊爐。」樂少講完就走咗入去。
「喂！」

 結果得我一個寂寞咁燒嘢食，於是我叉起咗隻雞翼，一路喺度唱：「～燒雞翼我鍾意食～」。

「燒多隻畀我吖。」毛子蘭講。
「你出嚟做咩呀？」
「佢哋叫我陪你喎。」
「唔使喎，我可以自己燒㗎。」

「咁我返入去㗎喇。」
「咁又唔好嘅。」

我幫毛子蘭燒佢隻雞翼。

「返入去打邊爐唔好咩？」
「但係透咗好耐爐喎，依家收爐咪好嘥囉，仲要買咗包炭。」
「唔好計呢啲啦。」
「咁起碼都燒埋啲雞翼同牛排啦。」

「咁我幫你手啦。」
「原來你都係靈異學會。」
「係『占卜星相靈異與魔法學會』呀！」
「睇你唔出，原來你都鍾意占卜。」

「其實我唔信㗎，不過我覺得小悠同Simmy好認真，所以就加入囉。」
「竟然係咁呀，佢哋有冇幫你占卜呀？」
「有⋯⋯不過我都唔信。」
「我記得甜豉油講過我哋係『黑色之火』，我而家都仲未明，佢又話你係咩呀？」

「好似係⋯⋯流星雨。」
「F4呀？！～陪你去看流星雨落在這地球上～」我笑住唱。
「你唱得咁難聽點做主音呀。」
「超～」

呢個時候，樂少又出咗嚟。

「喂兩位，咁浪漫呀？要唔要返入去一齊打邊爐？」樂少講。
「燒埋雞翼牛扒就返入去啦，快啲幫手。」

於是我哋三個燒晒啲嘢就返入去。

「吖！我唔記得燒棉花糖呀。」
「就咁食咪算囉。」太一講。
「燒棉花糖真係好好食㗎。」

喺一片歡笑聲之中，我哋嘅打邊爐之夜就結束咗。

之後因為我哋都眼瞓，所以我哋就行返去東堤，其實夜晚嘅話東堤真係好恐怖，連風吹過都覺得好驚。

「你哋有人拍我膊頭？」行到半路太一突然間問。
「冇呀。」我哋個個都話冇。
「唔係喎，好似係有人拍我喎。」太一繼續講，佢把聲已經震晒。
「吖！」太一大叫。

「係我呀。」甜豉油出嚟講。
「嘩，你嚇鬼咩！」太一講。
「你漏咗部電話呀。」
「唔該。」

「喂太一呀，你送返人返去啦，好危險㗎。」樂少講。
「係呀，冇錯喇咁夜。」我講。
「要我之後自己一個返嚟？」太一好驚咁講。
「唔驚啦，畀啲信心自己。」樂少講。

之後太一就陪甜豉油行返去，不過佢就好似驚驚青青咁。而我哋就急急腳咁返房，因為東堤真係太恐怖。

「戀愛真係好呀！」樂少講。
「咩呀？」我問。
「你睇唔出咩？其實太一對甜豉油一定有啲嘢。」樂少好肯定咁講。
「吓？唔係真事呀嘛。」

「阿錘你，會唔會太遲鈍呀。」Sky講。
「連Sky都知？」
「根本佢對甜豉油就有Feel。」樂少講。
「我完全唔知喎。」我講。

我完全唔覺得佢兩個有啲咩，定係我真係太唔敏感呢？不過太一好似一開始就幫田善悠改咗個花名，等陣先⋯⋯係喎，佢就係因為同甜豉油一齊先開始叫毛子蘭做小蘭，原來係咁！我終於明喇。

「阿錘你咁樣點寫情歌呀？」樂少講。
「吓？」
「創作係要戀愛㗎！」

我記得神書入面都有提過，「戀愛」帶咗好多靈感畀佢，佢甚至試過為咗拎靈感，隨便搵咗個人拍拖，不過我就做唔出喇，點可以同個自己唔鍾意嘅人拍拖㗎。

「不如咁啦，下首歌我哋就作首情歌啦。」樂少講。
「都好喎。」Sky講。
「情歌？」
「通常做情歌先會紅㗎，香港人就係咁現實㗎喇。」樂少講。

「好啦，最多交畀我寫詞啦，我諗阿錘你應該寫唔到情歌。」樂少好有自信咁講。

我電話突然收到個Message係毛子蘭嘅。

「你哋返到去未。」佢問我哋。
「返到。」

原來上次教職員晚宴之後，我哋都冇Send過Message。

＝＝＝＝＝＝

第二日，走之前我哋再喺長洲留咗一陣，周圍行吓，Sky就話想去沙灘，太一就話想去張保仔洞，而樂少就話想去買蝦醬，所以我哋就分開行程，我就諗住搵間鋪食吓野。

之後我就send咗個Message問毛子蘭有咩做，佢哋話去咗影相，於是我就自己喺附近遊蕩。我路過一間Cafe，聽到有啲結他聲，好似有人唱歌，所以就入咗去，Cafe入面唔係好多人，計埋我有六個食客，不過得一對男女有認真聽歌，其他人都係食緊嘢。Cafe最入嘅地方就係唱歌嘅位置。

我再望向歌者，竟然見到個好耐冇見嘅人⋯⋯呢個人係Silas。

我個心震咗一震，因為真係估唔到⋯⋯

究竟佢呢幾年發生過咩事，點解會突然之間失咗蹤，又點解會無端端喺長洲呢度出現，我懷住呢種心情欣賞佢嘅表演。

我聽住佢唱歌，感覺同五年前有啲唔同，唔係因為冇咗Full Band，得一枝木結他，而係曲風唔同晒，再冇嗰種用生命歇斯底里唱歌嘅感覺，取而代之嘅係⋯⋯有啲Indie？我唔識形容，有啲似AMK嘅唱腔。

佢一路唱，我一路諗起五年前佢比我嘅衝擊，令我拎起結他嘅嗰個人，而家就喺我面前，但係好似變咗另一個人咁⋯⋯

（Tbc.）

44 - 夏天雪人

「多謝大家，我係『夏天雪人』，下次再唱過！」Silas咁講。

咩「夏天雪人」呀？佢改咗名咩？定係我認錯人？唔係，我冇可能認錯！佢把聲根本就一樣。

Silas唱完之後就走咗，於是我決定追出去搵佢。

「喂⋯⋯」其實咁叫佢好似有啲冇禮貌，但係我想叫停佢先。
「咩事呀？你想我Encore？我見你頭先聽得好入神。」Silas講。
「你係咪Silas呀？」我問佢。

Silas先係擘一擘大眼，然後笑一笑：「嘩，竟然有人知我以前個名，你係？」


「我⋯⋯我叫⋯⋯劉星隨，我以前喺學校聽過你唱歌，之後我就去咗學彈結他，而家就夾緊Band，我隊Band叫『黑色西炒飯』。」
「你係寧華仔？」
「係。」
「多謝你記得我喎。」Silas講完之後又開始行走。

我叫住佢：「你呢幾年你去咗邊呀？」

「我？喺長洲囉，我依家喺度住㗎。」佢轉身答我。
「點解你唔繼續做音樂呀？」
「我有做呀，不過係用『夏天雪人』個名之嘛。」
「吓？」

「我有YouTube Channel㗎，記得Subscribe呀。」Silas笑笑口咁講，然後就走咗。

我即刻上網Search「夏天雪人」，點知又真係搵到個YouTube Channel，佢Uplaod咗109條片，但係竟然得221個人訂閱，我即刻撳入去聽佢啲歌⋯⋯

其實⋯⋯都唔差嘅⋯⋯只係比較另類，我聽咗幾首，風格似係Indie Folk同Dream Pop，旋律一啲唔易上口，不過就有種迷喺入面，同我識佢首歌嘅Rock曲風已經唔同晒。

點解會由Silas變咗做「夏天雪人」，佢嘅音樂點解會變晒。

＝＝＝＝＝＝

無幾耐之後，我就會合咗佢哋，估唔到「占卜星相靈異與魔法學會」嘅三個人都喺度，唔通又係咁啱撞到？於是我哋就一齊搭船出中環。

「喂，我啱啱見到Silas呀，仲聽咗佢唱一首歌⋯⋯」我同佢哋講。
「嗰個Silas？你偶像喎。」樂少講。
「嗯⋯⋯但係佢好似變咗另一個人咁。」
「即係點呀？」

「好似唔係On Show嗰個人咁，佢由一個好Rock嘅Band仔變咗做好似AMK咁。」
「咩係AMK呀？」
「AMK係香港Indie Pop始祖，當年喺Indie界好出名，其實我都係早幾日先識，因為本神書有寫。」
「哦～」樂少咁嘅反應，就代表佢其實聽到一頭霧水。

「總之就係無論佢嘅音樂定散發出嚟嘅氣質都好似變咗囉。」
「邊有人會五年都一樣㗎，你都變咗啦。」

雖然Silas仲有做音樂，但係已經唔係我當初鍾意嘅嗰種Rock and Roll，其實佢做咩歌又關我咩事，只係我曾經憧憬嘅人，已經唔同咗⋯⋯

話說回程嘅時候，太一同甜豉油兩個自己坐咗喺後面，而其他人就瞓晒覺，有冇咁眼瞓呀⋯⋯咁樣諗之後冇耐，我就瞓著咗。

「起身呀，劉星隨！」叫我嘅係毛子蘭。
「到喇，咁快嘅？」
「快啲啦，佢哋落晒船喇。」
「吓？竟然唔等我？」

「你快啲起身呀！」

就係咁，我哋一行人就平安返到中環喇。

「死仔包！個個都唔等我！」
「你瞓到死咗咁呀，我哋諗住等你再搭多次去長洲。」樂少講。
「頂你咩！」
「阿錘你，自己唔早啲瞓啫，我一上船就瞓咗啦。」Sky講。

「咁我上船未眼瞓吖嘛，話說太一去咗邊呀？」
「同會長走咗喇。」Simmy講。
「吓？佢哋一齊咗喇。」
「唔係，佢哋都住佐敦呀。」

「哦～」
「太一個死仔吖！肯定同甜豉油有啲嘢。」樂少激動咁講。
「由佢啦，又係你話創作要戀愛嘅。」

之後我哋就各自返屋企，我即刻就攤咗落床，準備瞓覺。

不過我又突然間心血來潮，打開「夏天雪人」嘅歌嚟聽，而家佢嘅歌、主要寫一啲好文青嘅嘢，好似咩《夏天會浴掉的雪人》、《搭扶手電梯要記住左行右企》、《如果你要拖手請不要在深水埗》、《記得覆人Message》呢啲。

講起Message，我係咪要問吓毛子蘭佢哋返到去未呢⋯⋯於是我拎起電話，喺WhatsApp「輸入中⋯⋯」。

「返到去未？」咁問好似唔係咁好⋯⋯
「你返到去未？」其實又差唔多⋯⋯
「返咗屋企未？」咪一樣⋯⋯
「返到」呢個時候我竟然撳錯掣⋯⋯

大鑊，我未打完喎⋯⋯

點知呢個時候毛子蘭就已經覆咗我：「我都返到」

明明諗住問吓佢㗎嘛，點解好似變咗我同佢報到咁㗎⋯⋯

＝＝＝＝＝＝

2014年2月10日

放假嘅時間總係過得特別快，話咁快又到咗返學嘅日子。今日係同之前等放假嗰排好唔同，老師為咗追教學進度，上堂都好Chur，甚至有時要我哋補課添。

「我哋呢個禮拜放學係咪夾唔到時間夾Band呀？」
「我星期二、四補中史。」太一講。
「我同阿錘就星期三補地理。」樂少講。
「我星期五放學要畫SBA呀。」Sky講。

「咁即係得返今日？」
「其實我一陣都要去開會呀。」樂少講。
「我都要學日文呀。」太一講。
「咁即係星期六日夾？」

「星期六好冇呀？我星期日想休息下。」Sky講。
「咁星期六，The Echo？」
「好呀。」

其實我都上去The Echo搵達仔，因為想問一啲關於Silas嘅事，喺我識嘅人入面，得達仔係識佢。

臨走之前， 我經過教員室，點知就見到副校長：「劉星隨！」 

「咩事呀副校？我剪咗頭髮喎。」我驚驚青青咁答副校長。
「我唔係見親你都鬧人嘅。」副校笑笑口咁講。
「咁係咩事呢？」
「嚟緊課外活動日，英文科有個活動，你得唔得閒唱首英文歌畀啲師弟師妹聽呀？」

「吓，我喎。」
「我見你上兩次唱歌都OK呀，你冇信心？」
「你想我哋隊Band一齊唱？」
「又唔一定要成隊Band嘅，我淨係要人唱歌咋，你自彈自唱啦。」

「哦⋯⋯」

副校長講完就返咗教員室。等陣⋯⋯我做咩應承佢呀，我自己點唱呀？我會怯㗎喎⋯⋯仲要唱英文？

（Tbc.）

45 - 《Good Riddance》

「就係咁囉，你哋話我點唱好喇，不如你哋都一齊去英語日啦。」我喺SU房同佢哋講。
「阿錘你掂嘅，英文歌有幾難吖。而且我ECA DAY要喺學校搞校園Running Man呀，幫你唔到。」樂少講。
「我就要去歷史轉物館做Case Study呀。」太一講。
「我就要去Miss Lui搞嘅網絡作家分享會呀。」Sky講。

「吓，咁即係我要單飛？」
「主音單飛好正常啫，練習吓啦！」樂少講。

ECA Day即係課外活動日，每年大約有4次左右，每一堂嘅時間會縮短，Lunch TIme以後嘅時間就會進行「課外活動」。今年SU其中一個重頭戲係就校園版Running Man，樂少作為成員之一，一定要參加啦。太一就得到難得嘅外出參觀機會，Sky就去作家分享會，咁我點算好呢。

淨係諗唱咩都已經唔係咁易，我聽親嘅英文歌一係就係啲Rock Band歌，得我一枝結他唱咩好呢⋯⋯

經過一輪篩選之後，我揀咗Green Day嘅《Good Riddance (Time of Your Life) 》同Coldplay嘅《Yellow》，仲有Justin Bieber嘅《Baby》。

揀《Baby》就係參考Miss Lui用搞笑取勝，而《Yellow》就係我好鍾意嘅歌，不過個Range對我嚟講有少少高，而《Good Riddance (Time of Your Life) 》就係聽Green Day嘅時候無意中發現嘅一首歌。如果認真揀應該唔會係唱《Baby》，所以都係《Yeallow》同《Good Riddance》之間揀。

第二日，我去咗音樂室練習，呢個時候樂少入咗嚟。

「揀好唱咩歌未呀？」
「《Baby》、《Yeallow》、《Good Riddance》三揀一。 」
「Riddance係咩意思呀？」
「類似擺脫包袱之類啦。」

「唱嚟聽吓先啦。」

「～Another turning point, a fork stuck in the road～」

我唱緊嘅係 《Good Riddance》，其實我都對首歌幾有感覺，大概就係有種「船到橋頭自然直」嘅感覺，歌者希望每個人都會有一段美好嘅時光。

「幾好聽喎，中間段結他都好啱你彈，掃Chord最啱你啦。」

作為一個Rhyhtm結他手，掃Chord就係我嘅生存之道， 《Good Riddance（Time of your life）》入面，有一段弦樂嘅Solo，但係我就改咗做一段純粹掃Chord嘅Music Break，其實都幾好聽吖。

「咁就一於揀《Good Riddance》啦！」

因為星期五就要唱，得返聽日同後日練，時間都幾急。

＝＝＝＝＝＝

學校嘅另一邊Sky同Emma一齊做緊VA科嘅資料搜集，因為VA除咗藝術技巧，都好講對藝術史同埋唔同風格嘅認識，佢哋兩個今日就整理緊「藝術研究」。

Sky其中一份作品，主題係《思念的感覺》，Sky想用抽象派嘅風格呈現佢眼中思念係咩感覺。

Emma好奇問：「其實《思念的感覺》係咩意思呀？」
「我都唔知呀，每個人嘅答案都唔同。」Sky笑笑口咁講。
「咁你嘅答案係咩呀？」
「望住⋯⋯月亮嘅感覺。」Sky輕輕咁講出嚟，但係就冇再解釋。

Emma點點頭，好似已經明白，所以都冇再問落去。

「點解你呢排好似彈少咗結他嘅？」
「因為冇表演呀，阿錘又要單飛。」
「吓？阿錘單飛？」
「講笑咋，佢邊捨得離開隊Band吖，阿錘畀何副校捉咗去唱歌呀。」

「聽日嘅英語日活動？阿錘會做表演呀？」
「係呀，Emma你呢？你參加咩呀？」
「我去做義工呀，幫啲流浪狗沖涼。」Emma好似好興奮咁。
「你有冇養過狗呀，我就因為覺得要每日帶佢哋散步好麻煩，所以就冇養過。」

「冇呀，不過啲小動物好得意㗎。係呢，咁Sky你呢？」
「好似係咩網絡作家分享會呀？」
「Miss Lui朋友嗰個？」
「係呀。」

Emma繼續做佢嘅「藝術研究」，再偷偷望住認真嘅Sky。

＝＝＝＝＝＝

2014年2月13日

「阿錘你，練成點呀？」樂少問我。
「OK啦，但係啲英文好似仲係好Hong Kong Style咁。」
「口音又真係好難改嘅。」

雖然話就話我哋香港人由細開始學英文，但係口音方面就好奇怪，同啲外國人硬係唔同咁，如果要學好英文可能真係要去外國讀返幾年書先⋯⋯講起外國讀書，我又諗起太一件事，太一畢業之後，係咪真係會走呢⋯⋯

「係喎阿錘，你要練咬字，不如搵小蘭啦，我記得佢啲口音幾好聽㗎。」
「又好似係喎，佢有時會負責喺英文早會嗌咪。」

然後，我就係食晏嘅時候搵毛子蘭，呢個鐘數佢通常都會喺Prefect室，所以我就落去搵佢。

「毛子蘭，你放學得唔得閒呀？」我問毛子蘭。
「咩事呀？」
「想搵你幫手呀。」
「幫咩呀。」

「想你教我英文咬字⋯⋯」
「你喎，做咩無啦啦練咬字呀？」毛子蘭笑住咁講。
「我聽日要唱英文歌，但係我嘅發音太過港式，所以唱得好難聽⋯⋯」
「聽日唱依家先學，你都得㗎喇。要畀人工我㗎，音樂室等我啦。」毛子蘭講完之後就出咗去當值。

「喂，幾多錢呀？」我問佢，但毛子蘭好似冇諗住理我咁。

放學之後，我就上咗音樂室練歌，呢個時候毛子蘭行咗入嚟。

「你要唱咩歌呀？」
「呢首。」我播咗原唱畀佢聽。
「咁你唱一次先啦。」

我又唱咗一次《Good Riddance》。

「你唱Another嘅時候，發音太用力喇，你聽多次原唱吖，佢唔會『AN．吖．打』咁㗎，係『An．other』只要『吖』輕力啲就會冇咁港式喇。」
「～Another Turning Point～」
「係喎，果然有啲料喎。」

然後毛子蘭就好細心咁逐個字教我發音，於是我就慢慢開始唱得似一個外國人喇。

「你聽日揀咗咩活動呀？」我問毛子蘭。
「整蛋糕。」毛子蘭好似好開心咁。
「係呀～咁你就聽唔到我嘅精彩演出喇。」
「可能你聽日會唱到走晒音呢。」

「超～其實都冇所謂啦，未必有人認真聽。」
「一定有㗎。」

我都希望有人肯聽我唱歌，不過⋯⋯我都唔知呀。

「聽日整蛋糕玩得開心啲呀！」
「緊係啦，你都要畀心機呀。」

（Tbc.）

46 - 2月14

2014年2月14日

2月14號，除咗係康慕會寧華中學嘅課外活動日，仲係一年一度嘅情人節，一班青春期嘅少年少年，又會點樣度過呢個日子呢⋯⋯

4B班嘅班房，有一個對於占卜、星相、靈異、魔法都有極大興趣嘅女仔－田善悠aka甜豉油，佢成立咗一個名為「占卜星相靈異與魔法學會」嘅組織，全個學會只有三個人，就係佢兩個好朋友－Simmy周海琦同毛子蘭。

今日田善悠同佢兩個朋友喺課室占卜緊。

「Simmy，你都係唔好送朱古力啦，Sky唔會鍾意你㗎。」田善悠同Simmy講。
「但係⋯⋯戀愛就一定要跟住占卜咩？點解我唔可以自己試吓呀。」Simmy講。
「我睇到嘅未來，你同Sky唔會有結果。」
「唔通我就唔可以試下爭取咩？我唔理係，我要送！」

「你唔信就算啦⋯⋯」
「唔好咁啦，小悠，你支持下Simmy啦，未試過未必唔得呢。」毛子蘭同田善悠講。
「小蘭⋯⋯你都唔信我？」
「唔係呀，不過畀Simmy試下都冇壞啫。」

「你哋自己決定啦。」田善悠安靜咁離開。
「都係小蘭你好啲，計我話會長一定係妒忌我同Sky哥哥。」Simmy講。
「唔會啦，小悠唔係呢種人。」毛子蘭講。
「咁又係。不過明明佢自己都有太一啦，都唔明點解係要信晒佢嘅占卜呀。」

「太一？係咩？」
「你咁都Feel唔到咩，我肯定會長同太一都對對方有好感。」
「我又真係睇唔出喎。」
「小蘭你就係咁唔敏感㗎喇，不如你都送朱古力啦。」

「你講咩呀。」

＝＝＝＝＝＝

5D班班房，有一班「激情對話」嘅成員，今日個個都Gel好晒頭，而且校服都燙得前所未有咁直。

「Mango、朱傑，你估我今日會收到幾多盒朱古力？」魔人問。
「肯定少過我啦。」朱傑講。
「你哋兩個都唔會有㗎喇，因為有我喺度呀。」Mango講。

呢個時候，樂少行入課室。

「嘩，做咩呀，個個Gel晒頭咁，去飲呀？」樂少講。
「今日咩日子呀？」魔人問。
「2月14號⋯⋯哦，情人節。唔怪得啦，不過你哋年年都咁㗎啦，咪又係一粒都未收過。」樂少恥笑佢哋。
「今年唔同㗎喇，我話晒都係Rapper Magic Man。」魔人講。

「係喎，聽講你識咗班Hip Hop友喎。」
「係呀，我哋依家係Bro嚟。」
「咩Bro呀？」
「Brother呀。係喎你Brother呢，又遲到呀？」

「阿錘話佢好似感冒，下晝先返喎。」
「唔驚啦，佢都應該唔會收到朱古力。」


呢個時候，有兩個低年級女同學入咗嚟，佢哋急急腳咁問人Sky坐邊，然後就放咗盒朱古力喺佢櫃桶。

「果然係Sky呀，原來真係會有人收到朱古力。」樂少講。
「睇住嚟啦，我嗰啲遲少少就會嚟。」
「睇吓點囉。」

Sky啱啱入到課室，然後就好自然咁趴低咗喺枱，完坐冇理過櫃桶入面有啲咩。

＝＝＝＝＝＝

小息嘅時候，Simmy鼓起勇氣去到5D班嘅課室，諗住送朱古力畀Sky。

「Sky可唔可以出一出嚟呀？」Simmy問。

「見係Simmy你，就算啦，平時我小息要瞓覺㗎。」Sky又出現日劇男主角嘅笑容，然後就跟咗Simmy出去走廊。

「Sky，送畀你㗎。」
「做咩送畀我呀？」Sky笑笑口咁問。
「Err⋯⋯希望你接受我嘅心意。」
「其實我唔鍾意食太甜嘅朱古力㗎。」Sky笑笑口咁拒絕咗Simmy。

「咁⋯⋯都係畀你啦。」Simmy堅持送畀Sky。
「做咩今日咁多人畀朱古力我㗎，我生日明明過咗㗎喎⋯⋯」

Sky拎出褲袋嘅朱古力，Simmy即刻呆咗，佢估唔到原來自己有咁多對手。

「Simmy你，可唔可以話我知點解咁多人送朱古力畀我呀。」
「因為⋯⋯鍾意⋯⋯你⋯⋯」

Sky望一望Simmy：「Simmy你，唔好鍾意我啦，我對你冇鍾意嘅感覺。」

Simmy即刻有一種心碎嘅感覺，估唔到Sky連朱古力都唔肯收。

「點解，點解要咁快拒絕我呀？」Simmy好傷心咁問Sky。
「因為我⋯⋯心裡面已經有個人喇⋯⋯」Sky咁答。

Simmy自己一個強忍住眼淚，拎住自己盒朱古力離開Sky，而Sky喺Simmy走之後，輕輕咁唞一啖氣，之後就望住下面嘅操場。

「好少見喎，小息竟然唔喺課室瞓覺。」Emma喺走廊行近Sky。
「係Emma呀，你唔會都係嚟送朱古力畀我掛。」Sky笑笑口咁問。
「你講咩呀？送畀潘sir都唔送畀你呀。」Emma開玩笑咁講。
「潘sir好似結咗婚喎，Emma你，唔可以咁做㗎。」

「我知呀，頭先個女仔同你表白？」
「係呀，原來依家表白會送朱古力。」Sky又笑笑口咁講。
「唔係呀，因為今日情人節，所以通常會送朱古力畀鍾意嘅人。」
「原來係咁呀。」

「Sky你真係咩都唔知喎。」

小息嘅鐘聲終斷咗Sky同Emma嘅對話，佢哋亦都各自返去自己嘅課室。

＝＝＝＝＝＝

田善悠參加嘅課外活動係歷史科Miss Au所帶隊嘅歷史博物館之旅，因為唔同年級嘅學生都會參加，所以太一呢個歷史科嘅學生都有出席。

田善悠自己一個喺博物館入面睇展望，呢個時候太一見到自己一個嘅田善悠，主動行過去搵佢。

「甜豉油，今日做咩咁靜嘅。」
「冇嘢呀。」
「通常女仔話冇嘢，一定係有嘢啦。」
「都話冇嘢咯。」

田善悠自己繼續行，太一就跟住喺佢後面。

「都話我冇事咯，你唔好跟住我啦。」
「冇呀，我睇展品之嘛。」

太一就係咁繼續跟住田善悠。

「我同Simmy嗌咗交呀。」田善悠話畀太一知。
「點解呀。」

田善悠將件事講畀太一知。

「咁點解你係都要相信占卜、星相、靈異同魔法呢？」太一問。
「因為我每次睇到嘅都一定會發生，我唔想佢會唔開心。」
「甜豉油，你太睇少Simmy喇。我知你想保護Simmy，但係有時受傷唔一定係壞事嚟。而且我都唔相信宿命論，我覺得只要夠努力，一定可以人定勝天，話唔定Simmy會成功呢，可能唔係依家，但係唔排除有一日Sky會鍾意佢㗎。」
「但係我睇到嘅畫面，從來冇錯過。」

「唔係錯定啱嘅問題呀，係明知失敗都起碼要試過。」

（Tbc.）

47 - 感覺

「各位同學，將可可粉倒入去攪勻，然後再放入托盤就可以喇。」蛋糕班老師教緊整朱古力Brownie。



毛子蘭好留心咁聽緊老師嘅講解，佢似乎對整甜品有好大嘅興趣，雖然一直有嘗試喺屋企自己整甜品，但係除咗佢爸爸之外就唔敢畀其他人食，連佢嘅好朋友都冇試過，因為一直擔心自己嘅技術唔夠好，所以今日就特別留心。



「老師，我想問應該要雲喱拿先定落雞蛋先？」毛子蘭問。

「冇所謂㗎，不過加雞蛋先會易攪啲。」老師講。

「唔該。」



毛子蘭好快咁整完咗佢嘅Brownie已經可以拎去焗。



「嘩小蘭，你整得咁快嘅。」5C班嘅咩咩講。咩咩同毛子蘭都係寧社嘅社幹事，咩咩亦都有同劉星隨一齊跑社際接力。

「我都唔係好快啫。」毛子蘭講。

「有冇諗住整畀邊個食呀？有六個喎。」

毛子蘭諗咗一諗：「冇呀，可能畀一個Simmy，佢今日好唔開心。兩個就留畀爸爸同媽媽，我自己食一個，仲有要畀一個要留畀小悠，淨返嗰個就⋯⋯未諗到。」

「咁不如畀呀龍啦，佢應該會好開心。」

「社長？唔好啦，我同佢其實唔係咁熟。」

「係咩，我覺得呀龍對你特別好㗎，你冇發現咩。」

「唔覺喎。」

「咁又係嘅，如果今日無啦啦送嘢食畀啲男仔，一定會以為係鍾意佢，男仔就係咁膚淺。」

「哈哈，又真係嘅。」



毛子蘭將蛋糕放入焗爐之後，要等大概三十分鐘，呢個時候，毛子蘭心諗面有一個諗法。



「咩咩，你可唔可以幫我睇住個爐呀，我想出一出去呀。」

「去邊呀？」

「英語閣，因為好似有人表演唱歌⋯⋯」毛子蘭有啲怕羞咁講。

「你唔會講劉星隨呀嘛？佢今日病咗冇返。」

「吓，唔會掛。」

「今日上退修課嗰陣都唔見佢，5D班啲人話佢感冒喎。」



毛子蘭好似有啲失落，聽到劉星隨病咗，佢竟然有啲唔開心。



「佢練咗好耐㗎⋯⋯」

「你都可以落去睇吓嘅，可能佢下晝有返呢。」



毛子蘭最後都係離開咗家政室，準備行去學校嘅英語閣。

＝＝＝＝＝＝

呢個時候嘅另一邊，Sky參加咗Miss Lui舉辦嘅網絡作家分享會。



「司徒天，估唔到你都會嚟喎。」Miss Lui講。

「我一直都有睇小說㗎，而且我都冇其他活動想去。」

「咁你要留心啲喇，今日呢位作家係我大學師兄，好勁㗎。」

「好呀。」Sky笑笑口講。



呢位網絡作家筆名叫馬卡雲尼，因為寫嘅網絡小說最近公布會拍成電影，所以成為咗紅極一時嘅網絡作家。



「好多謝Miss Lui請我嚟同大家分享⋯⋯小說嘅時代同人物都可以係假，但係情感就一定要真實。」馬卡雲尼一路分享佢做作家嘅心路歷情。



Sky坐喺課室嘅後排，佢一直有聽作家嘅分享，但係視線一直都係望住Miss Lui，作家好似留意到Sky一直望住Miss Lui，於是佢就同Sky講：「後排頭髮有啲長嘅同學，對你嚟講小說係一樣咩存在呀？」



「我覺得⋯⋯係感覺⋯⋯」Sky咁答。

「我鍾意你嘅答案，小說講到尾都係講故事，而故事最重要嘅就係畀到讀者可以共鳴嘅感覺。」



Miss Lui聽住Sky嘅答案，似乎有啲出乎佢嘅預料，估唔到Sky會講出一個咁獨特嘅答案。



分享會完咗之後，馬卡雲尼同Miss Lui傾咗一陣，而Sky就喺遠處偷偷哋咁望住佢哋。



冇幾耐之後，Miss Lui就送馬卡雲尼離開，Sky喺馬卡雲尼就咗之後就去搵Miss Lui。



「Miss Lui你，同佢拍過拖？」Sky問Miss Lui。

「你講咩呀，緊係冇啦，佢其實就快結婚喇⋯⋯」Miss Lui有啲吞吐咁講。

「原來係咁呀。」



「感覺呀嘛？」Miss Lui微微笑咁望住Sky。

「其實我，都唔知答咩好，所以隨便諗啲嘢答囉。」Sky又係笑笑口咁講。

「都冇講錯嘅，好多創作都係講感覺，你哋玩音樂都係啦。」

「嗯，冇錯呀，我彈結他嘅時候，都係靠感覺。」

「好喇，放學快啲走喇，Miss都要做嘢喇。」

「我一陣仲要畫SBA呀。」

「咁你加油喇。」Miss Lui準備返去教員室。

「吖，Miss Lui⋯⋯你⋯⋯食唔食呀？」Sky拎出佢背囊嘅朱古力。

＝＝＝＝＝＝

今日嘅課外活動仲有一班同學，去咗動物義工中心幫流浪狗沖涼。5A班嘅陳爾欣Emma就係其中一位參加者。



Emma好開心咁幫一隻唐狗沖涼，但係因為一直都未養過狗，所以Emma有啲束手無策。



「唔好直接用花灑呀，佢可能唔鍾意咁大水㗎，你咁樣用條毛巾包住花灑，佢哋就冇咁驚喇。」Rachel同Emma講。



「係喎，唔該晒。我係5A班嘅Emma呀。」

「我係5B嘅Rachel呀。」

「你有養狗㗎？」

「以前囉，佢走咗好多年喇。」

「Sorry呀。」

「唔使Sorry喎，咁多年。」



Rachel同Emma喺幫狗仔沖涼嘅過程傾咗好多嘢，包中亦都包括Sky嘅事，包括Sky家姐嘅事。



「原來係咁呀，Sky佢一直都冇同我講過呀。」Emma講。

「咁又冇咩必要提起嘅，每個人都有啲嘢唔想講畀人知㗎嘛。」Rachel講。

「所以佢就畫《思念的感覺》。」

「你係講佢嘅SBA？」

「係呀，佢同我講係望住月亮嘅感覺。」

「月亮呀⋯⋯？」



「Sky佢就係咁奇怪㗎，成日講啲冇人明嘅嘢。」Rachel講。

「其實我好似明⋯⋯但係又唔肯定⋯⋯」Emma講。

「即係咩意思？」

「即係⋯⋯Er⋯⋯算啦，我都係估吓啫，可能唔啱㗎。」

「睇嚟你，好似幾了解Sky喎。不過唔好鍾意佢呀，Sky只會令你受傷⋯⋯」Rachel咁講。



Emma顯得有啲緊張，但係又冇特別講啲咩。



同一時間，帶隊老師宣布：「今日嘅活動完結，冇需要返學校嘅同學可以自行離開。」



「我要返學校畫畫呀，我走先喇。」Emma同Rachel講再見，然後就返學校。


（Tbc.）

48 - I had the time of my life

冇理由我會病㗎喎，明明我一直都好健康⋯⋯因為朝早好唔舒服，又攰又頭暈咁，所以我即刻去睇醫生。

如果係平時，我一定會直接唔返學，瞓喺屋企休息，但係今日要表演，一定要去到，我要唱歌！所以我叫醫生唔好開有睡意嘅藥畀我，等我可以撐到下晝唱歌。我喺屋企休息咗半日，已經好返啲，應該勉強可以唱到歌，好彩嘅係喉嚨冇事，只係有少少痰。

但係唔知係咪食咗藥，我好似有啲手震⋯⋯我呢一刻只係希望唔好彈錯，因為今日得我自己一錯就收皮⋯⋯

可惡！點解今日先嚟病！

我Lunch Time嘅時候，戴住口罩返到學校，今日我第一個搵嘅係何副校。

「劉星隨，你病咗仲返嚟？」
「因為要表演吖嘛。」
「如果你冇咩事，我都可以畀你唱嘅，有冇發燒呀？」
「冇呀。」我好平淡咁講。

其實我Feel到自己係有少少燒，可能唔係好高，我諗係99度左右，我諗我可以撐到兩個半鐘嘅⋯⋯

雖然好似冇晒力咁，但係我都係靠意志力將個AMP搬咗去英語閣，為嘅只係唱好《Good Riddance（Time of your life）》呢首歌。

今日嘅呢個活動係英文科安排畀低年級同學嘅活動，主要會有人做吓畫劇同用英文傾偈，本來我好似都要用英文講吓嘢，但係副校就話我病嘅話可以唔使，只要唱歌就可以。咁就太好喇，我本來都唔係幾想用英文分享，所以淨係唱歌，我反而輕鬆咗唔少。

我喺表演緊畫劇嘅時候，去咗後樓梯練結他，手感好似慢慢返緊嚟，冇再手震，而且聲音嘅狀態都已經冇問題。好彩啫⋯⋯下個就到我表演。

「Next performance, Let's welcome Ash Lau from Class 5D, He is going to sing《Good Riddance(Time of your life)》By Green Day.」MC幫緊我做Opening。

「Good afternoon everyone，I am Ash from 5D, I will sing 《Good Riddance(Time of your life)》，hope you will enjoy。」我做咗個簡單嘅自介，其實同MC講嘅嘢都差唔多。

喺我準備唱之前，我竟然見到毛子蘭，估唔到佢會嚟，乜佢唔係整緊蛋糕咩？點定係我有幻覺呢？

「～Another turning point, a fork stuck in the road～」

隨住我掃結他Chord，我開始唱。

「～So make the best of this test, and don't ask why～」

因為毛子蘭琴日嘅幫手，我嘅改字好咗好多，起碼唔係咁Hong Kong Style自啦。

「～It's not a question, but a lesson learned in time～」

呢個時候，我竟然開始諗起啲歌詞，我都估唔到自己今日會咁想唱，明明我一直都只係想夾Band，甚至我唔覺得我係鍾意唱歌，但係唔知咩原因，我就係想唱好佢。

「～It's something unpredictable But in the end, it's right～」

冇咗樂少佢哋喺度，其實我都有啲唔慣，始終我都未試過自己一個唱歌。不過我諗今次唱歌一定幫到我，喺未來一定會有用。

「～I hope you had the time of your life～」

「Time of your life」講得冇錯，享受過程真係會有唔同嘅感覺，夾Band之後，我終於搵到自己最鐘意嘅嘢，我唔再係嗰個追趕住Silas嘅人，我想做音樂，我想夾Band，我想同『黑色西炒飯』一齊表演。

去到結他嘅Music Break，我冇好認真咁數拍子，我甚至知道有啲位我彈錯咗，不過唔緊要啦，最緊要係「I have the time of my life」。

雖然唔知觀眾諗緊咩，甚至我諗班低Form唔知歌詞咩意思，但係我由佢哋嘅表情睇到，佢哋係明白我唱緊咩。我仲肯定咗一樣嘢，就係毛子蘭佢真係喺度，唔係我有幻覺。

「～I hope you had the time of your life～」

「Thank you very much, hope you have the time of your life！」我講完之後就同副校講想去抖吓。

英語閣同Canteen唔係距離好遠，所以我自己一個去咗Canteen休息，而喺Canteen當然就會見到毛子蘭啦。

「做咩跟住我呀⋯⋯咳咳⋯⋯」我開始有啲咳。
「病就唔好返啦，咁辛苦。」
「因為我想彈結他，同埋想唱歌，你特登落嚟㗎？唔係整蛋糕咩？」我同毛子蘭講。
「焗緊蛋糕呀，差唔多夠鐘。」

「多謝你落嚟聽⋯⋯咳咳⋯⋯你都係行遠啲，我可能會傳染你。」
「咁我返上去先，蛋糕應該就得。」
「好呀，我一陣完咗活動，放好Amp就會走⋯⋯咳咳⋯⋯」
「嗯。」

毛子蘭然後就走咗，我覺得好攰，好攰，可能食咗藥，所以眼皮好重，好重⋯⋯慢慢，我就瞓著咗。

「劉星隨！起身呀，返屋企瞓啦。」毛子蘭同我講。
「你唔係話上去咩，仲喺度嘅？」
「你瞓著咗呀，啱啱樂少同太一幫你擺返好結他同Amp喇。」
「竟然係咁呀，我瞓咗幾耐呀？」

「我諗半個鐘掛⋯⋯」
「原來咁耐呀，咁我返屋企喇。」
「喂！」毛子蘭叫住我。
「咩事呀？」

毛子蘭拎住舊蛋糕問我：「你食唔食呀⋯⋯我⋯⋯整多咗⋯⋯」

「好⋯⋯呀⋯⋯」

我試食毛子蘭個朱古力Brownie，一食落口，我條脷好似畀電電中咁，無論係口感定味道都好完美。

「我人生未食過咁好食嘅嘢㗎！」我之後即刻食晒舊蛋糕。

毛子蘭見到我個樣，笑得好開心。

「畀多舊我食吖，真係好好食呀。」我好真心咁講。
「有冇咁誇張呀。」毛子蘭好似想忍住唔笑，但係好明顯佢忍唔到，有啲似上次有個小學生問我攞簽名咁。
「畀多舊我啦！」
「唔得呀，要留畀小悠同Simmy仲有我父母，畀半舊你啦。」毛子蘭搣咗半舊Brownie畀我。

「真係好好食呀，我講真㗎。」
「多謝。」毛子蘭微微笑住咁講。

如果我冇記錯，今日好似係情人節，毛子蘭請我食朱古力Brownie，係咪即係⋯⋯

（Tbc.）

49 - 白色橢圓形

啱啱返到學校嘅Emma見到Sky同Miss Lui喺走廊，Sky畀咗一粒朱古力Miss Lui。Sky望住Miss Lui嘅眼神同平時有啲唔同，雖然喺其他人眼中應該冇咩分別，不過Emma就好明顯知道Sky對Miss Lui有種特別嘅感覺。

Miss Lui接咗一粒朱古力之後，好似同Sky講咗啲嘢，但係Emma聽唔到。正喺Sky轉身之際，佢見到Emma，然後微微同Emma揮手，兩個人就一齊上VA室，繼續畫畫。

「Emma你，好似唔係幾識幫狗仔沖涼喎。」Sky講。
「少少唔熟手啫。」Emma講。
「但係你褲腳濕晒喎。」
「因為一開始就直接用花灑幫佢哋沖，點知原來唔可以直接用花灑沖㗎。」
「係呀，要搵條毛巾包住花瀟。」
「係咪Rachel教你㗎？」
「琳琳呀⋯⋯嗯，細個嗰陣我都有幫佢隻狗沖過涼㗎。」
「原來係咁呀。」
「做咩抄我呀，『原來係咁呀』明明係我講開嘅。」
「借嚟用吓都得掛。」

Sky同Emma繼續喺VA室畫畫，而佢哋兩個人中間亦都有講起細個嘅事，包括Rachel同埋Sky家姐。

「Sky你係咪仲好掛住你家姐呀？」Emma講。
「係呀，不過我都唔可以一路逃避㗎嘛，所以呢，我就開始彈返結他。」Sky講。
「你好犀利呀。」
「有咩咁勁喎，多得有人幫我，我先可以走返出嚟咋。阿錘、樂少、太一、琳琳，仲有⋯⋯」
「邊個呀？」
「唔話你知。」Sky笑笑口咁開玩笑。
「搞錯呀。」

Emma繼續用藍色水彩喺自己幅畫上面上色，而Sky就繼續佢嘅《思念的感覺》。

「喂，Sky，你係咪收到好多朱古力呀？」
「幾盒囉，你想食呀？」

Emma冇理到Sky，沉默咗一陣。

「係咪Miss Lui呀？」Emma輕輕咁問。
「嗯？」
「你望住Miss Lui嘅眼神好似望住月亮咁⋯⋯所以係Miss Lui？」

Sky冇正面望住Emma，輕輕由嘴裡面講咗兩個字：「係呀。」

＝＝＝＝＝＝

另一邊，田善悠同太一返到學校，太一去咗搵仲搞緊Running Man嘅樂少，而田善悠就去咗課室搵Simmy。

4B班嘅課室入面，毛子蘭將自己整嘅Brownie畀咗Simmy食。

「Sky係咪冇收到你盒朱古力呀？」
「係呀，估唔到真係咩都畀會長算中晒⋯⋯」
「唔緊要啦，呢啲嘢冇得迫㗎。快啲試吓我個Brownie。」

Simmy試食毛子蘭嘅Brownie：「又幾好食喎，有冇諗住送畀咩人食呀？」
「爸爸媽媽囉，同埋小悠，我叫咗佢返嚟㗎。」毛小蘭講。

「點同佢講好呢，今朝仲唔信佢。」
「諗到咩咪講咩囉。」

田善悠入到4B課室， 座低咗喺Simmy同毛子蘭隔離。

田善悠個樣有啲尷尬，然後就同Simmy講：「其實我冇理由阻止你，因為就算明知失敗你都會做，係咪？冇理由一直將感覺放喺心入面，對唔住呀。」
「應該我講對唔住先啱，如果聽你講，我就唔會咁Hurt啦，Sky哥哥連我盒朱古力都唔肯收呀。」
「咁我哋一齊幫你食咗佢吖。」

Simmy拎出盒朱古力，佢哋三個一齊食呢盒朱古力。
「都係小蘭嘅Brownie好食啲，一定係因為有愛喺入面！」Simmy講。
「係呀，我都覺得好好食！」田善悠食住Brownie咁講。
「多謝。」毛子蘭講。

田善悠突然之間合埋雙眼，好似感受緊一啲嘢，然後搖一搖頭⋯⋯

「係白色嘅橢圓形。」田善悠講。

「你要留意白色嘅橢圓形呀，小蘭！」田善悠繼續講。
「係好定壞呀？」Simmy問。
「我都唔肯定呀，可能會係一個對你好重要嘅人。」

毛子蘭有啲半信半疑，佢諗緊究竟「白色嘅橢圓形」係代表咩呢。

「白色橢圓形，係咪藥丸呢？」Simmy講。
「藥丸？」毛子蘭口噏噏。

毛子蘭就拎走盒Brownie離開課室。

＝＝＝＝＝＝

太一走到去SU房搵樂少。

「喂，點呀。順利？」太一問。
「OK啦，班人比我想像中玩得仲癲，有兩個F4受傷添。」樂少講。
「撕名牌吖嘛，係要咁玩㗎。」
「都係嘅，攰死我，都唔知搞活動做咩，自己又冇得玩。」
「但係你唔搞，佢哋就冇得玩到咁開心啦。」
「都係嘅。」
「係喎，阿錘呢？」
「佢病咗呀，不過啱啱都去咗唱歌，好心佢病就唔好返嚟傳播細菌啦。」
「阿錘真係好鍾意音樂，好鍾意彈結他呀。」
「係呀，雖然論技術佢同Sky差好遠，但係鬥熱誠我諗唔會輸畀Sky。」

呢個時候，毛子蘭入咗SU房。

「小蘭，搵我哋？」樂少講。
「係呀，你可唔可以幫手收返英語閣個Amp同結他，因為我唔識收呀。」
「吓，阿錘呢？」
「佢喺Canteen瞓著咗呀，我叫唔醒佢。」
「都叫佢病就留喺屋企啦。」

「咁小蘭你落去叫多佢一次啦，再唔醒就拎把鉸剪喺佢耳邊剪一下，佢一定醒！」樂少講。
「係呢，小蘭，甜豉油有冇搵你哋呀？」太一問毛子蘭。
「有呀，佢同Simmy好返喇。」毛子蘭講。
「咁就好喇。」

樂少同太一講完就去咗英語閣，而毛子蘭就落去Canteen叫返醒劉星隨。

＝＝＝＝＝＝

「原來成件事係咁呀，唔該晒你叫佢哋幫我執嘢呀。」

好彩毛子蘭有幫我搵樂少佢哋，如果唔係副校實走嚟煩住晒。

我望一望鐘，差唔多夠鐘食藥，於是我拎出醫生開畀我嘅藥。

「白色橢圓形？」毛子蘭講。
「感冒藥唔係白色橢圓形就黃色圓形㗎啦。」我講。
「都係嘅。」
「冇帶水添，買包維他奶送藥先。」
「我幫你買吖。」毛子蘭之後就去咗幫我買維他奶。

毛子蘭拎住一枝水過嚟。
「你唔係幫我買維他奶咩？」我講。
「唔可以用維他奶送藥㗎，飲水啦。」毛子蘭。
「我有時都用牛奶食藥啦，維他奶都得啫。」
「唔得呀，忍幾日啦，飲水呀！」毛子蘭好似有啲野蠻。

我唯有用水食藥，之不過望住呢個毛子蘭，我竟然覺得有少少可愛⋯⋯
（Tbc.）

50 - 《蘭》

2014年3月3日

喺ECA Day過咗2個禮拜，我哋嘅生活都照樣係平日就返學，放假就夾Band。至於我就好努力作緊首「情歌」，因為上次係長洲話想要作一首情歌，不過我而家真係完全冇Feel作，雖然話樂少想寫詞，但係冇感情嘅Melody，寫更好嘅詞都冇用啦。

結果我又搞到3點先瞓，於是今日一返學我就已經趴咗喺張枱度。

因為調咗位嘅關係，我坐咗去中間最尾嘅位置，而坐我隔離嘅係班長呀輝。

「阿錘，你搞咩呀，琴晚又掛住寫歌呀？」呀輝咁問我，估唔到第一個嚟問我嘅竟然唔係我啲隊友。
「係呀，想作首情歌Feel嘅歌。」我知係冇咩禮貌，但我決定都係趴喺張枱度。

「真係好呀，有夢想。」呀輝咁講。
「吓？」我即刻有啲好奇咁抬起頭望住佢。

「我呢，已經決定咗要做一個冇夢想嘅人。」呀輝突然好認真咁講。
「輝哥，你17歲咋喎，你咁樣同條鹹魚有咩分別呀。」我講。

「你知我屋企冇咩錢啦，我雖然成績都算可以，但係要讀到搵大錢嘅科就好難。加上父母又年紀大，我淨係想早啲搵錢，早啲結婚咋。」呀輝講。
「同Stephy？你認真㗎？」Stephy係呀輝女朋友，佢哋中一就一齊咗，我完全唔明點解可以一齊咁耐。
「係呀，其實我真係冇咩夢想喎，同佢一齊，簡簡單單，我就好開心喇。」呀輝嘅眼神入面，我完全feel到佢對Stephy嘅愛。

真係冇諗過一個同我一樣大嘅人已經諗緊結婚，雖然我係好支持嘅，不過如果人有80歲命，咁早決定未來嘅共度餘生嘅人真係好咩？

「同佢一齊，簡簡單單，我就好開心喇」呢句嘢喺我腦海入面揮之不去，諗落又好似幾啱做情歌嘅主題。

我平時好鍾意將買完嘢嘅單儲起，因為背面可以用嚟寫嘢，對於天生慳家嘅我，咁做完全唔覺得有問題。就係咁，我將「簡簡單單」呢個主題，寫喺一張買完維他奶嘅單後面，然後開始Brain Storm。

放咗學之後，因為星期一樂少要當值，Sky同太一都要補課，我又未想返屋企住，我就走咗去音樂室，見冇鎖門我就拎起枝木結他，試吓作首新歌。

我隨手掃咗個幾個Chord，唔知點解，我個腦突然有一個畫面，係上次毛子蘭唔畀我用維他奶食藥嘅樣。點解我會覺得嗰一刻嘅佢可愛㗎？明明就墨守成規，完全唔識變通，又鍾意多管閑事⋯⋯但係我突然間又好想見到佢⋯⋯

聽聽吓，又覺得幾好聽，於是我就用數字譜寫低咗啲音，冇錯我而家已經識家數字譜。

見時間去到六點幾，我就決定要走，所以落去SU房睇吓樂少走未。
入到SU房，竟然人影都冇，我心諗唔係走得咁快掛，仲諗住畀佢聽吓首歌添。呢個時候，我就見到毛子蘭。

呢兩個禮拜，我同毛子蘭都冇見過⋯⋯其實都算有嘅，不過佢又同班同學一齊，我又同「激情對話」班人一齊，特登打招呼又好似好尷咁。

「Hi。喺度嘅？」
「因為我想借Printer。」
「哦，樂少佢哋好似走晒，我幫你Print啦，我知密碼。」
「佢哋點可以話密碼畀你知㗎，唔係機密嘢咩。」
「唔緊要啦，你有交學生會費㗎嘛，咪即係公共資源囉。」

因為我成日喺SU房print譜，所以樂少話咗密碼畀我知。毛子蘭畀咗隻USB我，我打開咗個File，原來佢係想Print Econ嘅Past Paper。

「Past Paper叫啲老師印咪得囉，曹sir實OK喎，你咁乖。」
「費事麻煩到老師啦，而且我呢份好舊。」
「印完喇。」我將份Past Papaer畀佢。
「唔該。」

「仲有冇嘢要print呀？」
「冇喇⋯⋯你，病好未呀。」
「過咗兩個禮拜喎，未病好我應該去咗醫院啦。」
「超～關心吓你啫。」

「多謝。要唔要⋯⋯聽吓Demo呀？」我都唔知點解自己會咁問。
「都好呀。」
「冇結他添⋯⋯我清唱啦。」

我拎返銀包張單出嚟，然後輕輕喺枱敲咗4吓，畀返Rhythm自己，因為呢首歌好簡單，甚至簡單到我覺得有啲似教會嘅聖詩，所以有少少怯。

毛子蘭好似好認真聽，有略略跟住我嘅拍子郁。因為只係清唱，我唔敢用好多力，所以我放輕咗把聲，細細力咁哼。

「都幾好聽吖，不過副歌有少少似《愛轉角》。」毛子蘭咁講。
「咁呀，我再諗吓啦。」

竟然似台劇嘅歌，不過都合理，始終情歌都有一個套路，而劇集嘅歌就大多數都係情歌。

「首歌叫咩名呀？」毛子蘭問。

係喎，歌名我都未諗，雖然係Demo啫，都要有個名㗎。

「蘭。」我又衝口而出講咗啲奇怪嘢，邊有可能用佢嗰名做歌名㗎⋯⋯
「難？好難咩？」睇嚟毛子蘭get咗係難度個難，不過都好嘅⋯⋯
「因為改名好難，所以求其叫住難先囉，樂少話會負責填詞呀，等佢改名啦。」我即刻兜返。

「算回禮啦，你上次請我食Brownie。」我講。
「哦。」毛子蘭點一點頭，「冇咩嘢，我走喇，我仲要搵老師呀。」

之後，因為毛子蘭話仲要搵老師，我就自己走咗，諗住返屋企作埋首《蘭》。

（Tbc.）

51 - Guitar Pro

用咗一個禮拜，我終於完成咗《蘭》嘅旋律，跟住就要搵樂少寫歌詞，同埋做編曲。講起編曲呢個問題，我一直都唔係好識點做，上次嘅《懶》因為玩Punk嘅曲風，所以大家都好易上手，但係《蘭》我就真係諗唔到點編好，唯有睇吓Sky有咩方法啦。

我Lunch Time嘅時候，我哋喺SU房，將我嘅手寫譜畀佢哋睇，點知⋯⋯

「阿錘，你啲字寫好啲啦，呢個係1定7呀？」樂少講。
「其實我完全唔識睇呀，我淨係識睇鼓譜咋。」太一講。
「Sky呢，你應該識睇掛。」我講。
「阿錘你唱一次我就記得喇。」Sky講。

樂少好似都係睇開五線譜同TAB譜，數字譜就睇得好慢。而太一除咗鼓譜就唔識睇，所以get唔到首歌。至於Sky，佢嗰腦都唔知咩構造，聽一兩次就記得晒啲嘢，根本都唔需要睇譜。

「我諗我哋要解決寫譜呢個問題先。」

為咗解決呢個問題，我決定要學識寫一份大家都明嘅譜。雖然講就好似好威，但係我自己睇五線譜都好慢，我甚至會寫返數字譜，或者英文字母做標示，會唔會有一種方法，可以隨意切換做唔同嘅譜呢？

「係喇，其實我哋用電腦咪得囉。」太一講。
「我邊度識呀，我平時啲譜都係上網download咋。」我講。

以前夾嘅歌都係上網search歌名就自然搵到譜，但係我真係唔識自己打一份譜喎。

太一即刻就上網search咋幾個Software畀我，「嗱，呢個係最多人用嘅，叫Guitar Pro，雖然名係Guitar，但係打鼓譜或者琴譜都冇問題，仲有MIDI聲可以即時聽返。」太一好熟悉咁講。

「你識用又唔早講，點知你哋咁蠢㗎。」太一好認真咁講。

估唔到我都會畀太一話蠢，雖然我真係電腦白痴嚟，連PowerPoint我都唔識用⋯⋯

「我send咗條破解版嘅Link去Group喇，返屋企用電腦down啦，冇毒㗎。」太一好有自信咁講。
「破解版得唔得㗎？」我問。
「照計阿錘你有免費嘢用應該會好開心喎，發生咩事呀？」太一講。
「我哋要尊重知識產權。」我肯定咁講。

其實我以前聽歌，都係用電腦download落嚟就算，有得唔畀錢都盡量唔畀錢，打NDS都用R4啦，冇計啦我又唔係有錢人。

「總之條Link就send咗，大家返去打自己嗰份啦。」太一喺我哋入面真係算電腦部負責人，因為我同Sky都唔多用電腦，樂少部電腦就淨係打機先用。

返到去之後，我就即刻down咗Guitar Pro，一開Software就有後好好聽嘅結他聲，雖然應該係電腦聲，不過唔緊要啦，Melody好聽就得。

入到去就發現好方便，有得揀好多種聲，琴、結他、Bass，甚至小提琴同長笛都有，真係幾好玩。輸入音符嘅方式都好容易，只要係TAB譜上面用數字鍵打就會自動出埋五線譜嘅音符。揀返啱嘅拍號就OK，我好似已經迷上咗呢個軟件。 

而且因為可以同時播幾份譜，我甚至可以做埋編曲，我將Melody嗰條Track轉做小提琴聲，然後試咗打Bass譜，因為樂少都係根音王，我打條Root就可以，Lead Guitar方面仲易過我自己嗰份，因為Chord要打晒六條線，但係Lead只要一粒音就可以。鼓譜因為唔譜打，我只係用咗最簡單嘅Snare同Bass Drum就算。

當我以為我做得好快嘅時候，我望一望個鐘，已經係夜晚兩點，但係我嘅體感時間，好似只係過咗半個鐘咁。成日聽到有人話時間會被偷走，我諗個兇手一定係音樂。

我將輸出咗嘅MP3檔send咗去Group，不過佢哋當然冇睇啦，因為都已經兩點半。

第二日返到學校，我仲係諗緊首歌嘅編曲。

「係咪玩得好開心呢。」太一同我講。
「係呀，超方便。」
「不過，份譜我覺得參考下就可以，唔使跟到好足，唔係就會好機械。」太一繼續講。

「我係咪要跟阿錘你份譜彈㗎？」Sky問我。
「都唔係嘅，我都係試吓個Feel啫。」我講。
「好彩啫，因為我想試啲新嘢呀。」Sky笑笑口咁講。
「阿錘，你果然係我老友，我跟你份譜彈就得喇。」樂少講。
「吓，我用根音咋喎。」
「我會適當地微調嘅。」

我又忽然喺度諗，我係咪唔應該自己一個編曲呢？我哋係一隊BAND嚟，應該要溝通多啲先啱。Sky一定會諗到一啲我諗唔到嘅嘢，以樂少嘅天份佢應該可以彈得再豐富啲，鼓方面我就只可以期待太一嘅打法，因為我真係唔識打。

「喂樂少，記得填詞呀，有份詞再編曲會好啲㗎。」我同樂少講。
「真係我填呀？我都係想做返個默默支撐大家嘅Bass手。」樂少將右手放喺心講。
「頂。咁再諗啦。」

呢個時候，有人行咗入嚟SU房，竟然⋯⋯係校長！
（Tbc.）

52 - 黃金入球

「同學仔，做緊咩呀？」校長突然出現殺咗我哋一個措手不及。
「Er⋯⋯都係傾吓偈啫。」我同校長講。
「你哋最近夾Band好似幾開心喎。」校長笑笑口咁。
「係呀。」我望一望佢哋。

校長雖然好nice，但係好少同學生傾偈，我應該算係接觸得比較多嗰個。

「我想搵你哋做表演。」
「吓？真係？咩事呀？」
「嚟緊有個聯校運動會，我哋嘅死對頭『蒲英』都會參加，佢哋嘅校長話要隊啦啦隊，我哋點都要搵啲嘢做吓。」

原來係「蒲英」，唔怪之得啦，我哋「寧華」嘅死對頭。因為我哋係同一年成立，而且喺同一個校網，因為我哋兩間學校背後嘅財團都有競爭關係，如果咁啱喺學界比賽有對碰，甚至會見到兩間集團嘅大老闆出現。不過「蒲英」已經係Band 1 嘅中學，無論咩都好過我哋，大學入學率、校外活動成績、甚至間學校都新過我哋。聽講佢哋啦啦隊好勁，係好似《High School Mucical》嗰種，唔使問都知肯定勁過我哋啲得個嗌字嘅啦啦隊啦。所以校長想用我哋「黑色西炒飯」同佢哋鬥？唔係掛。不過有Show玩緊係去咗先啦。

「好呀，我哋會努力嘅。」我好有禮貌咁同校長講。

校長笑笑口咁就離開咗SU房，我就開始好興奮咁諗緊玩咩歌好。

「咁我哋⋯⋯夾咩歌呀？」Sky問。
「夾阿錘首新歌同《懶》？」樂少講。
「《懶》應該唔夾Feel喎，而且新歌都應該係情歌嚟。」我講。
「運動會，係咪夾啲熱血歌好啲呀？」太一講。
「Slam Dunk？」樂少講。
「我都唔識唱日文。」我講。
「唱返《自動勝利》囉，啱意頭。」樂少講。
「都好嘅，揀多首？」我講。
「不如《黃金入球》？」Sky講。
「《踢出我天地》嗰首？都好喎。」我講。
「今次Solo可以交畀阿錘你呀。」Sky笑笑口咁講。

「我solo？真係？」
「嗯。」

Sky竟然叫我solo，明明對佢嚟講要solo應該易如反掌，真係唔明點解會叫我彈段Solo。不過我都冇問原因，因為Sky肯定又畀啲奇怪答案我。

《黃金入球》係一首典型嘅動畫主題曲，熱血又激昂，音域都算啱我唱，係一個幾好嘅選擇。前奏好有記憶點，基本上一播我嘅回憶就返晒嚟，前前後後會玩三次，當然呢段就交畀Sky彈啦。至於Solo嗰段嘅前段，有一段用琴彈嘅獨奏，我諗呢段都係由Sky去彈，而我負責嘅就係Full Power嘅電結他Solo，相比起《自動勝利》亦都唔算難，我應該應付到。

聯校運動會會喺3月19號舉行，除咗我哋「寧華」，仲有「蒲英」、「孝基」，同埋「田金拯」三間學校。Banding嚟計 「孝基」同「蒲英」係高啲，而我哋同「田金拯」就仲係Band2。上次訪問我哋嘅Yoyo，就係「田金拯」嘅學生，感覺上「蒲英」同「孝基」係有少少睇我哋唔起，相比之下，「田金拯」就比較Friendly。

我返到屋企，就開始練《黃金入球》，首歌嘅Chord唔難，我想網搵嘅Chord譜好多都唔同，結果我參考咗「神書」裡面提到嘅3 Chord Seven，結果出奇地好，如果用食物比喻嘅話，係多咗一份「辣味」。

練到有啲攰，我竟然打開咗《踢出我天地》嚟睇，估唔到原來同《足球小將》係同一個作者。「仲有角球呀！」真係夠晒經典，對天龍嗰場真係好好睇。

第二日返到學校，樂少好有精神咁走埋嚟。

「阿錘，放學部我去買弦吖。」樂少嗰樣勁熱血咁講。
「好⋯⋯」我因為有少少意想不到，所以冇表現到好激動。

樂少原來同我一樣，琴日都睇返《踢出我天地》，咁睇嚟佢都已經進入咗狀態，所以就咁有火。原來唔覺唔覺，我哋都夾咗半年Band，樂少啲弦應該都係時候要換喇。

明明只係睇咗套「卡通片」啫，點解會咁大影響力，或者「熱血」呢樣嘢，真係會傳染，無論係夾Band定踢波，嗰種拼盡努力去做嘅意志都會影響到人，即刻就好想認真咁生存，認真咁搏一次。

仲有唔夠兩個禮拜時間，要爭取時間夾熟首歌先得。

＝＝＝＝＝＝

星期六嘅下晝，我哋又嚟到咗The Echo。

「試吓夾一次先啦。」我同佢哋講。

「～賣弄球技 和你寫進日記 我記得 那天成為知己～」

又好似幾好Feel喎，大家都好齊。

「～繼續上 全力上 無懼每個對手招式多誇張～」

Yes，我feel到種Rock味喇。

「～只管再進攻 決心奮力圖強 當聲勢夠響 每一個也拍掌～」

Sky用清聲結他彈咗嗰段鋼琴，跟住就到我嘅Full Power Solo。估唔到彈得超順，正當我以為可以輕鬆到尾嘅時候⋯⋯我bend線竟然撻咗⋯⋯

「阿錘你，唔使咁畀力㗎。」Sky微微笑咁講。
「吓？」
「Be cool。」Sky擺出佢嘅招牌Peace Sign。

其實我都明嘅，只係唔知點解我bend線永遠都差少少，定係唔好bend，直接彈呢？

「幾順喎。」樂少講。
「都好似唔錯嘅。」我講。

就係咁，我哋叫做夾好咗《黃金入球》。只係我bend線嗰度差少少，太一嘅鼓就好似有啲唔穩，樂少就嘗試緊唔做根音王，Sky嘅結他就冇咩挑剔，只係感覺佢今日嘅音色好似有啲重。

好彩仲有一個禮拜，應該可以練好佢嘅。
（Tbc.）

53 - 女主音

2014年3月19日

時間馬上就嚟到聯校運動會，除咗要去比賽嘅運動員，同埋畀人捉去做啦啦隊嘅F.1仔，其他學生只要正常上堂就可以。至於我哋「黑色西炒飯」就會喺Lunch之後去運動場，唔知點解，我感覺幾好，仲有啲優越感添。好似真係做咗個Rock Star咁，可以攞正牌走堂，仲要係出Show而走堂，因為學校已經安排好晒音響，我哋可以專心表演。

Lunch之後，我哋幾個孭住自己嘅樂器，去到運動場。未入到去已經聽到好大聲嘅打氣聲，場面墟撼。

呢個時候，我哋見到同我哋一樣孭住樂器嘅學生。佢哋係「孝基」嘅學生，一共有五個人，有一個女仔，唔知點解，我好似feel到陣殺氣。

「咦，唔通你哋都係嚟表演嘅？」孭住一枝Bass嘅「孝基仔」講，目測佢差唔多米九高。
「係呀。」我同佢講。
「4個人，你係主音？」佢同我講。

「係，我叫劉星隨，我哋係『黑色西炒飯』。」
「流星錘？『黑色西炒飯』？」佢好似覺得好好笑咁，雖然都畀人笑慣，不過佢個樣真係好討厭，「我叫馬勝熙，我哋係『Reason X』。」

「Reason X」我諗意思係唔需要話畀人知係咩原因，盡情做自己咁掛。

我哋互相介紹咗自己，佢哋係一主音、一鼓、一Bass、雙結他嘅組合。分別係女主音Bowie，Bass手馬勝熙，鼓手温漢權，結他手Jacob，同埋結他手兼團長嘅葉睿風－呀風。

「司徒天，我有冇認錯人呀？」呀風同Sky講。
「我係呀，唔好意思呀，你係邊個呀？」Sky微微笑咁講。

「兩年前嘅結他比賽我哋見過，我係亞軍嘅葉睿風。」呀風望住Sky嗰樣似乎有啲怒火。
「唔好意思呀，我真係唔認得呀。」Sky一副人畜無害嘅表情。
「唔緊要吖，我已經唔同晒，等睇我表演。」呀風講完就帶隊走人。

「原來仲有第二隊Band做表演㗎，我突然之間有啲緊張添。」樂少講，「佢哋個Bass手好似好勁喎。」
「鼓手都唔惹少，前臂嘅肌肉好誇張。」太一講，「仲有個女Vocal好靚女。」

「女Vocal⋯⋯」

用女Vocal嘅Band通常會面對一個問題，就係音域唔夠低，一般女仔最低嘅Range係G3，要再唱低啲嘅音就會好難，而且傳統上，男Vocal的聲帶比較粗獷，呢種聲音已經深入民心。要成為樂隊嘅女Vocal面對嘅挑戰大過男Vocal，搞到我都好期待佢嘅演出添。

今日Miss Lui帶咗班F.1 同學嚟做啦啦隊，佢嗌得好落力，好似自己要去比賽咁。冇辦法啦，F.1仔都係比人逼先焗住過嚟打氣，唔督住佢哋又點會落力嗌吖。

「大聲啲！寧華！」Miss Lui好激動帶緊口號。

就喺我哋經過打氣區嘅時候，因為有Miss Lui喺度，Sky就好自然會行過去，唔知點解Sky一過咗去，我就聽到女仔嘅打氣聲勁咗好多。

「你哋冇嘢做咩？過嚟一齊打氣。」Miss Lui奸奸地咁望住上層嘅我哋。

本身好鍾意做啦啦隊嘅太一即刻落咗去幫手，但係我同樂少就緊係搵機會走啦。

「Miss Lui，我要養聲呀，你捉樂少啦。」我緊係即刻走啦。
「劉星隨！你出賣我。」樂少勁唔順氣咁落去。

至於我，當然係搵位Hea啦，於是我就去咗小食部。今日嘅比賽都係派最好成績嗰啲同學出去比，所以成間學校都係出2-30人左右，我就冇心機睇比賽喇，因為我嘅心思已經擺咗喺夾Band到。

呢個時候，我又喺小食部見到毛子蘭，佢身為副Head prefect呢啲大節日緊係要當值啦。

「Hi⋯⋯」
「唔使準備唱歌咩？」
「未咁快住，因為佢哋3個去咗打氣，我就養聲所以周圍行吓。」
「咁⋯⋯唔阻你⋯⋯」
「吓？」

毛子蘭就咁就走咗去，點解會咁嘅，平時唔係會叫我唔好扮嘢偷懶㗎咩⋯⋯

我又無無聊聊咁拎住包維他奶喺運動場入面行嚟行去，我行咗去樓梯位，聽到有人唱緊歌，我就伸個頭落去望吓，於是我就見到「Reason X」嘅Bowie。

Bowie把聲好特別，準確啲講就係好有辨識度，佢將原本就好長嘅頭髮紮成孖辮，本身已經係靚女，加埋條孖辮，唔使唱都已經贏晒⋯⋯

呢個時候，佢好似望到我，同我揮手，因為怕佢其實唔係對住我揮手而尷尬，所以我望一望後面，確定冇人再同佢打咗個招呼，佢就伸手示意叫我落去。

「你叫劉星隨？個名咁得意嘅。」
「係呀，因為我屋企人都好Funny。」
「我中文名叫耿步妍。」Bowie笑笑口講。
「所以就叫Bowie？妍，係美好嘅意思。步妍，即係每步都好美好，呢個名好聽。」我同佢講。我心諗連個名都咁有星味⋯⋯我呢？係一枝流星錘咋。

「你都識啲嘢喎。」
「咁啱有篇文言文教過啫。」

「我本身唔知有第二隊Band㗎。」Bowie講。
「我哋都係呀。係呢？你哋會唱咩歌呀？」
「我哋會唱《夠愛》同Avril Lavigne嘅 《Girlfriend》。」Bowie好似有啲唔好意思講，「你哋呢。」
「我哋係唱《自動勝利》同《黃金入球》。」
「哦，動漫歌。」

佢哋揀兩首完全唔同Feel嘅歌，睇嚟都幾貪心。《夠愛》係《終極一家》嗰首，用嚟突出女Vocal嘅聲音，非常適合，而且我印象中結他手都好多發揮。《Girlfriend》就肯定係用嚟推起氣氛，揀一首比較Dark嘅情歌同可愛風嘅快歌，睇嚟佢哋好似好夠膽。

「Run Down好似係我哋唱先呀，咁我去準備喇。」
「吓？有Run Down咩，點解冇人話我哋知嘅。」
「哈哈，我哋一陣再見啦。」

原來有Run Down，點解我會完全唔知⋯⋯之後我就即刻返去搵返我啲隊友。
（Tbc.）

54 - 繼續上，全力上

「喂樂少，原來有Run Down㗎。」我好急咁同樂少講。
「你緊係唔知啦，Miss Lui一叫你就走咗，Miss 同晒我哋講喇。」樂少講。
「咁⋯⋯我哋去準備啦。」我講。

今日嘅運動會仲有最緊張嘅5場決賽，之前就係表演時間，每間學校都會搵學生出嚟表演。我哋同「孝基」就夾Band，「蒲英」就啦啦隊，「田金拯」就係跳舞。我哋係尾二出場，所以都仲有少少時間。

我哋去到一間細房，我哋同「Reason X」都準備緊，但係我哋發現佢哋全部都換晒衫，個Look成個韓星咁。我心諗，唔係話要著校服㗎咩⋯⋯

佢哋嘅團長呀風用嘅係一枝Fernandes嘅結他，全黑色嘅外型，同Sky枝白色Les Paul 好似注定會有場決鬥咁。

至於佢哋嘅Bass手，用一枝5弦嘅Bass，見佢熱身嘅動作就知佢功力唔簡彈，Slapping好快，同樂少完全係兩個Level⋯⋯

第一個表演嘅係「田金拯」嘅女子跳舞組合⋯⋯我哋睇到呆咗，個尺度究竟係咪可以㗎，基本上佢哋條裙係啱啱遮到唔走光，雖然我知一定打晒底，但係⋯⋯未免太過性感喇掛。我呆咗係因為覺得學校竟然會照受呢個尺度，而樂少同太一就肯定係被班女同學迷到呆咗⋯⋯

話咁快「田金拯」就跳完舞，拍手聲我諗超過一分鐘，連其他學校嘅人都不斷尖叫，如果而家我哋出去實係好大對比。

「Reason X」出場，佢哋第一首歌係《夠愛》，一開聲結他就好搶，音色「夠惡」，完全可以震懾到我，鼓手keep住做build up，但係最勁係Bowie把聲，真係好靚，音準、音色都贏我一條街有多⋯⋯

終於到段結他Solo，佢哋⋯⋯竟然改用Double Lead，兩枝結他一齊Solo⋯⋯頂，點解可以咁型⋯⋯完全唔輸畀啱啱嘅舞團⋯⋯

曲風一轉，變咗好可愛嘅《Girlfriend》，Bowie嘅咬字完全唔似香港人，就好似一個地道美國人。本來以為Bass會低調啲，點知只係喺上首歌收斂咗，呢首同個鼓手嘅Grove好到我冇得挑剔⋯⋯

痴線⋯⋯Bowie嘅控場能力真係好好，好有自信，由肢體到眼神，舉手投足，完全話咗畀觀眾知，佢就係主角⋯⋯

呢個就係有一個專職主音嘅好處，可以隨時隨地喺台上面移動，帶動氣氛方面係我哋做唔到。

我哋⋯⋯有冇「Reason X」呢個水準呢⋯⋯我可唔可以好到好似Bowie咁呢⋯⋯

佢哋最終表演完，之後就到我哋⋯⋯但係兩個咁好嘅表演之後，我哋嘅表演點算好，一定唔夠佢哋好㗎喎⋯⋯突然之間，我覺得我唔想行出去⋯⋯

不過唔知點解⋯⋯我就已經企咗出去。

「Hello⋯⋯大家好⋯⋯我哋係⋯⋯」枝咪好似冇聲喎？

係咪我問題呢？於是我拍吓枝咪⋯⋯Audio大佬好似都feel到枝咪壞咗，即刻幫我檢查。果然枝咪壞咗。

為咗唔浪費時間，「蒲英啦啦隊」代替咗我哋表演先，而Audio嘅工作人員就救緊啲咪⋯⋯呢個時候，我竟然想枝咪真係壞⋯⋯我唔想出去唱歌⋯⋯

我冇睇到「蒲英啦啦隊」表演，自己一個行咗去後面⋯⋯

點解又會突然咁緊張⋯⋯我好擔心出錯會累咗佢哋，我連bend線都驚炒，更加唔好講我嘅唱功，冇人會鍾意一個又唔睇得，又唔唱得嘅人㗎⋯⋯點算好⋯⋯

「劉星隨！到你喇，快啲返去啦。」
「我⋯⋯」
「你又好緊張呀？」
「⋯⋯係呀⋯⋯我都唔知做咩⋯⋯」
「你唔係好鍾意夾Band咩？」
「係⋯⋯不過⋯⋯」
「係邊個寧願剪晒啲頭髮都要上台㗎？又係邊個發燒都要返學校唱㗎？」

的確，我真係好想夾Band⋯⋯我好想喺個台度夾Band⋯⋯

「你又唔係自己一個人。」
「我唔係自己一個人⋯⋯」

我望向後面。

「係你哋呀⋯⋯」

冇錯，我後面永遠都有三個好隊友，而前面⋯⋯每次都有毛子蘭⋯⋯

「段Solo阿錘你就放心彈啦，感受粒音就可以。」
「放手喎，個鼓一定好穩。」
「有咩事我會喺你後面嘅。」

今次弊喇⋯⋯我有少少想喊⋯⋯不過唔理喇！繼續上，全力上！

我哋行出去舞台中央，我拎起我枝Stratocaster，我咩都冇講，連自介都冇，我畀咗個眼神太一，佢馬上就敲4吓Hi-Hat，進入《黃金入球》。

「～賣弄球技和你寫進日記，我記得那天成為知己～」

由唔知幾時開始，我哋都變成咗知己，一齊夾Band，一齊去Camp，連失戀都一齊。

「～試過跌低完場前仍然站得起，誰亦為你我精彩腳法掌聲四起～」

我的確跌低過，但係因為你哋我會企返起身。

「～一起來期待勝利，得你全程來打氣～」

每次都有你幫我打氣，就算唱得唔好，彈得唔好，你都喺到⋯⋯

「～繼續上，全力上，無懼每個對手招式多誇張～」

一定要繼續上，人哋做得幾好幾勁，我唔理，只要我哋全力上就可以！

我哋係得㗎⋯⋯Sky嘅結他、太一嘅鼓、樂少嘅Bass，就算有瑕疵，加埋一齊就係我哋⋯⋯炒埋一碟就係我哋⋯⋯「黑色西炒飯」！！

結他Solo嚟喇，Sky已經幫我鋪好咗條路，傳咗最好嘅波畀我，我只要射入佢就可以！

Bend到⋯⋯粒音bend得好完美，我感受到粒音符喺手指！Solo就係咁正，

「～當聲勢夠響，每一個也拍掌～」

我瞌埋雙眼，感受全場嘅掌聲，當聲勢夠響，每一個也拍掌。

「多謝大家，我哋係『寧華』嘅樂隊－『黑色西炒飯』。我係主音劉星隨，後面有鼓手張太一，Bass手關志樂，同埋結他手司徒天。」

「Er⋯⋯其實頭先上台之前，我係好緊張㗎，不過當諗到有同我一齊嘅人，有特登幫我哋打氣嘅人，我就覺得點都要繼續上，全力上。」

「今日仲有最後嘅幾場比寶，希望大家都可以全力上！送畀大家《自動勝利 Let’s Fight》！」
「～遇怪魔我即刻變大個，遇見高手痛快得多～」
唱到副歌大家都跟住一齊唱，連Bowie佢哋都一齊唱⋯⋯我真係傻，又唔係比賽，點解要同人比，明明只要享受就可以。

「～Oh Let’s Fight～」

呢段嘅Solo係Sky嘅表演時間⋯⋯肯定，好肯定Sky呢一刻仲係勁過呀風！

「～最好的必須再練過，逐個反擊對方一個二個，我但求全擊破～」
「～Oh Let’s Fight～」

吖！唔想完住呀！我真係好鍾意夾Band，好鍾意同你哋一齊夾Band呀！

「多謝大家，我哋係『黑色西炒飯』！」

（Tbc.）

55 - 「咁我走喇。」

當「黑色西炒飯」表演緊嘅時候，睇住佢哋嘅「Reason X」似乎相當享受。

「佢唱歌雖然冇你咁好，技巧、咬字同你冇得比，但係就好有生命力。」葉睿風同Bowie講。
「嗯⋯⋯」Bowie點點頭，繼續望住劉星隨。

「仲有個Bass手，望落去好似好Raw，彈嘅嘢唔花，亦都唔多技巧，但係睇得出裡面仲有啲嘢未出到嚟，音色好厚好實。」馬勝熙講。

「鼓手都係，好自由，但係又偏偏可以control到成隊Band，就算後面有少少唔穩，但係隊友之間都互相就到。」鼓手温漢權咁講。

「之不過呢隊嘢嘅靈魂係嗰個結他手。」結他手Jacob靜靜咁講，「Lead Guitar係Band入面就好似管弦樂團嘅首席小提琴咁，佢用結他就可以控制晒全隊嘅情緒，嗰個主音之所以唱得咁有生命力，係因為結他手帶得好。」

「你哋覺得佢哋好啲，定我哋好啲。」Bowie問佢嘅隊友。

「呢一刻⋯⋯可能係佢哋好啲。」葉睿風講。

＝＝＝＝＝＝

終於我哋嘅表演完成咗，比起上次嘅教職員晚宴，今次好玩好多。完全唔明點解頭先會咁緊張⋯⋯可能係見到畀我哋更強嘅人。或者我未來都未必可以克服到呢種緊張感，不過有佢哋喺度⋯⋯我就要做到。

「咪唱得幾好。」樂少搭住我講。
「你都係啦，Sky段清聲獨奏嘅時候，你啲Bass做得好好。」我同樂少講。 「阿錘好彩你冇甩咋，我後面有少少唔穩。」太一講。
「冇事喎，好少瑕疵啫，最後捉到個Beat咪得囉。」其實我唔覺得太一嘅失誤好明顯，甚至都唔影響我嘅拍子。

「阿錘你，做到喇。」Sky笑住同我講。
「不過始終冇你彈得咁好。」我同Sky講，我終於明佢係想畀我感受結他手嘅快樂。
 「不過阿錘你嘅Solo，好有火。」Sky講。
「表演完之後我就知道，我哋天份嘅差距，我可能一世都追唔到。」我同Sky講，「不過因為咁，我就更加放心交晒啲Solo畀你。」

「阿錘你咁諗就錯喇⋯⋯下次我哋要玩Double Lead。」Sky同我講。

Double Lead係指兩枝結他，彈類似嘅旋律，但係就有幾度嘅差別，等如係幫段Solo做和音，形成一種更豐富，更立體嘅音色。

我跟唔跟到Sky嘅Solo呢？Double Lead喎，我哋真係做到咩？

最後，今日嘅聯校運動會終於完結。算係皆大歡喜，每間學校都有幾個大獎，Super打和啦。

喺地下準備走嘅我哋，見到校長行緊過嚟，隔咁遠都feel到佢好開心。

「好精彩喎，『黑色西炒飯』。」校長講。
「多謝校長，我哋都係盡量享受啫。」
「特別係張太一呀，Fill-in 好清脆，我以前都打鼓㗎。」校長讚太一，咁都係嘅，太一嘅Fill-in的確係清脆利落。

學校準備咗一架旅遊巴，因為要車班中一嘅同學返學校先。同時間，時間同平時放學差唔多，校長都畀我哋自己揀返學校定直接走。我見毛子蘭同一班Prefect都上咗車，我突然之間決定要上車返學校先。畀在平時，我一定係直接走人，但係今日⋯⋯我有啲嘢想同毛子蘭講⋯⋯

「我要返學校呀。」我同佢哋講。
「吓？做咩呀。」樂少問。

「Er⋯⋯李sir話有嘢要搵我喎⋯⋯好似文學科有嘢搞。」
「唔係掛，我仲諗住去『流星記』食嘢。」太一講。
「下次囉。」
「咁我都跟車返學校，因為順路，可以返屋企。」Sky講。
「咁散囉。」樂少講。

其實我都想完Show去慶祝吓，不過⋯⋯

「阿錘你，其實唔係有嘢做，係咪？」Sky突然問我。
「Er⋯⋯都唔係冇嘅。」我講。

Sky冇繼續問落去，瞌埋眼就瞓咗，真係唔知呢個人點解可以瞓極都唔夠咁。

就係咁我哋就返到學校，落車之後，毛子蘭佢哋就急急腳入咗Prefect室，而Sky返屋企之前好似同Miss Lui傾緊嘢。咁我就去咗Canteen等。

等人，係一件好悶嘅事，上次呆喺原地等人都唔知係幾時⋯⋯大概半個鐘之後，班Prefect就出嚟。

我望住行出嚟嘅毛子蘭，佢又望吓我⋯⋯慢慢坐低喺我面前。

「我想講⋯⋯多謝你⋯⋯我以為我唔會好似第一次出Show咁，點知原來都係會緊張到唔知點。」
「你仲有冇其他嘢講呀？」
「吓⋯⋯Er⋯⋯都冇咩嘅⋯⋯」
「咁我走喇。」

「等陣呀⋯⋯你做咩好似咁怪嘅？喺小食部嗰陣，平時唔係會叫我唔好偷懶，然後叫我返去打氣咩？」
「冇咩原因呀，就係唔想阻住你。」

點解毛子蘭會咁講，係咪發生咗啲咩事。

「Bye-Bye。」
「係《蘭》呀⋯⋯上次首Demo，個名唔係難度個難，係毛子蘭個《蘭》。」

毛子蘭聽完之後，好似撞邪咁，一枝箭咁走咗去。我係咪講錯咗啲咩呀⋯⋯

----------------------------------------------

Sky返屋企之前，搵到咗Miss Lui。

「Miss Lui。」
「司徒天，仲唔走嘅。」
「依家返屋企好似太早。」
「有屋企又唔返，下次罰你留堂呀。」
「我又冇唔交功課。」

Miss Lui微微一笑，「留多陣好快啲返屋企溫書喇。」Miss Lui慢慢離開。

「哦。」
「喂司徒天，唔好再亂送朱古力畀人喇。」
「哦。」
「咁我走喇。」

Sky望住Miss Lui慢慢離開。

上次情人節Sky將收到嘅朱古力送畀Miss Lui，但係Miss Lui礙於日期尷尬同埋擔心Sky誤會而冇收到。雖然Miss Lui知道Sky個人就係冇路捉，覺得佢可能都係玩吓，但係作為一個老師，佢都要小心避免呢啲事。後來嘅一個月Miss Lui同Sky都冇單獨相處過，可能喺Miss Lui嘅心入面覺得點都要同Sky講清楚。

（Tbc.）

56 - 鬱悶的三月

三月係一個濕度好唔穩定嘅季節，過多嘅濕度會增加樂器保養嘅難度，濕度過高嘅時候，木頭會膨脹，相反濕度過低嘅時候，木頭就會收縮。

我都發現最近枝結他嘅手感好似有少少唔同咗，所以就專登拎咗枝結他去問達仔。達仔簡單幫我檢查枝結他，摸吓琴頸，度吓有冇唔水平。

「好少事啫，你買幾包防潮嘢，唔彈嗰陣擺袋度就可以喇。」達仔講。
「原來咁簡單。」
「最近夾Band夾成點呀？」
「都係咁啦，練緊彈快啲囉。」
「慢慢練啦。」

其實我嚟The Echo嘅原因，仲想問達仔其他嘢。

「係呢？我上次喺長洲見到Silas。」
「Silas？長洲？」達仔好似好驚訝，「去做咩呀？」
「佢好似住咗喺長洲。」
「真係去咗歸隱。」達仔又好似知道啲咩咁，「條友私底下係個白痴嚟，淨係鍾意音樂，長洲啱佢住啦。」
「佢而家好似叫自己做『夏天雪人』。」

「夏天雪人⋯⋯改埋晒啲怪名。」達仔冷笑咗吓，「錘仔，唔好學Silas呀，最後會冇晒Friend㗎。」

我唔係好明究竟咩事，點解Silas會變咗第二個人咁，達仔又做咩叫我唔好學佢呢⋯⋯

我返到屋企之後，將幾包防潮珠擺入結他袋入面，然後打開咗「夏天雪人」個YouTube，佢出咗首新歌，我就即刻聽喇。

首歌叫《陰天陰天想想你》，我心諗搞咩呀。雖然我都知「夏天雪人」改嘅名都奇奇怪怪，不過呢個歌名真係好唔知想點。不過我都照樣開咗嚟聽，曲風好Indie，有種鬱住鬱住嘅感覺，又有啲80年代嗰陣嘅Feel。

至於歌詞，可以當係有個痴線佬喺陰天嘅時候，好掛住一個人咁⋯⋯雖然首歌，唔係我鍾意嘅曲風，但係唔知點解⋯⋯我都係感覺到啲嘢，甚至我諗起一個人⋯⋯點解佢嗰日會就咁走咗去㗎。
第二日，我同樂少一齊返到學校，今日咁啱係毛子蘭當值，但係我哋入到學校嘅時候，佢完全冇望過我，而我亦都冇開聲同佢講嘢⋯⋯究竟我做咗啲咩令佢突然之間好似好憎我咁呢。

「你同小蘭做咩呀？好似面阻阻咁嘅。」樂少問我。
「我都唔知喎。」我同佢講，其實我都好想有個答案。

我偷偷哋咁望住佢⋯⋯又諗起Silas首《陰天陰天想想你》。有時候，人嘅腦會自動幫眼前嘅畫面配上音樂，今日我個腦就喺呢個陰陰哋嘅天氣下面配咗首《陰天陰天想想你》。

＝＝＝＝＝＝

早會之後，毛子蘭返到課室，佢一如平時，即刻就交齊功課，準備好下堂要用嘅筆記同書本，將文具整理好，仲會試吓枝筆有冇問題，免得寫Note嘅時候有意外。

「小蘭，你唔開心？」毛子蘭嘅好朋友甜豉油問佢。
「唔係呀。」毛子蘭微微笑住答佢。
「唔好呃我喎，一定有啲嘢，我嘅直覺唔會錯㗎。」甜豉油講，佢係「占卜星相靈異與魔法學會」會長，而且有普通人冇嘅超強第六感。
「嗯，冇嘢。」毛子蘭繼續答佢。

今日嘅中文堂，老師用Mind Map嘅方法教佢哋諗題目，於是老師用白色粉筆喺黑板上畫咗一個又一個嘅白色橢圓形。毛子蘭上堂好少會心不在焉，但係當佢望住一個個嘅白色橢圓形，佢竟然諗起咗劉星隨。

＝＝＝＝＝＝

「阿錘，今日放學SU有個活動呀，預咗你嚟幫手。」樂少突然同我講。
「吓？咩活動呀。」
「輕鬆嘢嚟，社工阮姑娘話要幫同學減壓喎，小蘭嗰班都會嚟呀。」
「咁我要做咩㗎。」如果平時我應該睬佢都嘥氣。
「推Panel咋。」
「是旦囉。」

結果玩音樂喺人眼中都係Audio Crew，好似識扭結他Amp就識搞音響Panel咁，而最諷刺嘅係，叫我做呢樣嘢嘅人竟然係樂少。不過佢話毛子蘭嗰班都會去，咁我即係有機會同佢講嘢啦，但係我到時會唔會又唔夠膽開口呢。

「點解你唔搵Sky呢？」
「Sky一早say咗No啦，佢話放學要去畫畫喎。」
「吓？」

估唔到連Sky都要認真畫畫，平時如果唔係補課佢放學都唔會特登去VA室，唔知係咪VA科嘅功課真係好chur呢。

＝＝＝＝＝＝

VA室裡面，一班VA嘅同學好努力喺度畫緊畫。Emma努力完成自己嘅「藍色水彩」，而Sky拎起咗枝畫筆⋯⋯但係完全唔知畫緊咩，可能三月真係一個好鬱悶嘅月份。

「Sky，你畫緊咩呀？」Emma輕輕咁問Sky。
「我都唔知呀。」Sky用自己招牌嘅笑容掩飾自己嘅煩惱。
「夾Band嘢？」Emma又問。
「唔係喎。」Sky喺自己幅畫到加咗幾筆。

Emma用自己嘅畫筆喺Sky幅畫到畫咗少少嘢。

「Emma你，做咩呀？我唔用藍色喎。」
「Sky你係咩星座㗎？」
「水瓶座。」

Sky冇因為Emma喺佢幅畫到亂畫而唔開心，因為由頭到尾Sky都係亂玩，佢只係用畫畫嚟抒發自己鬱悶嘅心情。

「古靈精怪嘅水瓶座。」Emma又再喺Sky幅畫到畫幾筆。
「做咩呀。」
「你個月亮係山羊座㗎。」Emma突然咁講，「佢哋嚴肅又保守，有一套自己嘅規則，不過心裡面其實好叛逆。」
「咁講⋯⋯好似Jazz，係我唔擅長嘅類型喎。」

「耐心啲囉⋯⋯Jazz同山羊座一樣，你首先要明白到佢哋要咩，唔係你就唔會入到佢哋嘅世界。」Emma靜靜咁講。
「Emma你，係咪都係山羊座呀？」Sky笑笑口咁問。
「唔話你知。」
（Tbc.）

57 - 坦率

小息嘅4B班課室入面，「占卜星相靈異與魔法學會」嘅三個成員喺度幫其他同學占卜，因為會長甜豉油，近乎神嘅準確預測，令好多唔同年級嘅同學都嚟咗4B班，班房外面排滿晒人龍，每個人都為咗自己嘅問題而煩惱緊。

「我應唔應該參加個跳舞比賽呀？」中四嘅女仔問甜豉油。
「未必贏，但係試吓對你嘅人生有幫助。」甜豉油講。

「我應唔應該讀Chem呀？」中二嘅女仔問甜豉油。
「睇興趣啦。」甜豉油講。

「我同佢有冇可能呀？」中三嘅男仔問緊甜豉油。
「冇可能，死咗條心啦。」甜豉油決絕咁講。

「我哋今日食麵定食飯好？」問嘅係「激情對話」班人。
「你食咩我點知呀！」甜豉油嬲嬲地咁講。

由甜豉油成立嘅「占卜星相靈異與魔法學會」想幫同學解決問題，但係又好死唔死，點都有啲人會走嚟阻住晒，例如「激情對話」嘅幾個麻煩友。

「會長，我哋仲要咁開壇呀？」Simmy咁講。
「我都好攰，但係啲人排完又排，我都冇辦法呀。」甜豉油將成個頭向櫈後面挨。

「小蘭呀，不如同訓導講啦。」Simmy同毛子蘭講。
「唔得呀，佢哋又冇搞事，而且我哋成立嘅承諾係幫同學解決問題吖嘛。」毛子蘭講。
「一係叫F.5班人唔好落嚟問啲無聊嘢囉。」Simmy講。
「咁我同佢哋講啦。」
「我同你去吖。」

毛子蘭同Simmy就一齊上咗去5D班嘅課室。

＝＝＝＝＝＝

小息嘅時候，我喺電腦度睇緊點用部Panel，因為畀樂少叫咗去做Audio，我隨便Google咗條片睇，基本上Mixer Panel嘅操作都大同小異，只係我需要睇吓有冇咩Setting上嘅問題要注意啫。

「阿錘，要唔要去占卜呀？」魔人問我。
「占卜？你講『占卜星相靈異與魔法學會』？唔使啦。我又冇嘢要問。」其實唔係，我有好多嘢想問，只係毛子蘭都喺度，我又唔好意思問。

呢個時候，毛子蘭行咗入我哋課室，但係佢就好似好迷惘咁，所以我想行去搵佢，我已經起咗身，亦同佢對到眼神，不過點知佢走咗去Sky度。

「係小蘭你呀，咩事呀？」Sky一小息就瞓，所以個樣勁冇精神。
「你可唔可以叫你班同學唔好咩都搵『占卜星相靈異與魔法學會』呀？」毛子蘭講。
「好呀。」Sky舉起佢嘅招牌Peace Sign講，「但係點解你唔叫阿錘呀？」
「冇咩⋯⋯點解⋯⋯唔該你喇⋯⋯」毛子蘭之後就走咗。

Sky望住我，其實我咩都聽到晒，所以佢就繼續瞓教。明明⋯⋯我就喺度咋喎，點解同Sky講都唔同我講呢？

「睇嚟小蘭決定飛咗你喇。」樂少同我講。
「咩呀。飛咩呀，都冇一齊。」我同佢講。
「抵你啦，唔嗲唔吊咁。」樂少串我。

「唔嗲唔吊」？我有咩？我返埋自己個位到，靜靜咁望住嘈到拆天嘅5D班課室。

＝＝＝＝＝＝

毛子蘭同Simmy返到4B班之前，Simmy就叫停咗佢，拉毛子蘭去走廊。

「你同劉星隨搞咩呀？」
「吓？」
「以前你一定會走去搵劉星隨，然後叫佢哋唔好落嚟搞住晒，但係你又竟然唔理佢喎。」
「冇呀，咁Sky近啲吖嘛。」
「佢都準備行過嚟啦。」Simmy望住毛子蘭，「你好似避緊佢咁喎。」

毛子蘭望出走廊下面嘅球場，個樣好似心事重重咁。

「上次ECA Day嗰日，小悠咪叫我留意白色橢圓形嘅，點知嗰日劉星隨就真係食一粒白色橢圓形嘅藥⋯⋯」
「你覺得會長講嘅係劉星隨？」
「我都唔知呀⋯⋯」
「咁都唔使逃避佢㗎。」
「我邊有喎。我只係覺得好煩咋，我書都溫唔到。」
「你明明就有避開人。」Simmy笑笑說，「劉星隨都幾好吖。」
「佢邊度好呀，又懶，又唔溫書，除咗夾Band之外咩都唔理，表演前仲會緊張到冇晒信心。」
「真係咁差咩？」Simmy問。
「咁佢有時都幾肯幫人嘅⋯⋯如果朋友唔開心，佢一定會出現⋯⋯為咗夾Band，同唱歌好聽啲又咩都肯做⋯⋯」
「嗯～仲有呢？」Simmy再問。
「明明成日把口講到毫不在乎，但係當做起嘢上嚟嘅時候，又搏晒命做。」
「小蘭你真係好唔坦率呀。」

Simmy慢慢返去課室，留低咗毛子蘭自己喺走廊。

「我好唔坦率⋯⋯咩？」

＝＝＝＝＝＝

阮姑娘嘅活動準備開始，想幫班同學做心靈上嘅放鬆，於是學校就派咗SU幫手，而SU就搵咗我去做Audio。 因為禮堂畀羽毛球隊用咗嚟練波，所以要喺Canteen搞呢個活動，我哋學校嘅Canteen都有一Set Audio，而且都唔算難用。

「同學仔，我想你哋瞌埋眼，幻想吓自己喺沙灘放鬆緊。」阮姑娘用沉悶嘅聲線講，搞到我都有啲想瞓。

有啲同學好明顯係唔想嘥時間，想快啲走，有啲一睇就知係瞓咗。但係我望向毛子蘭，佢好明顯只係瞌埋眼冇瞓到⋯⋯

係幾時呢？對上一次佢正常同我傾偈係幾時呢？好似⋯⋯諗諗吓已經係上次ECA Day。又係喺呢個Canteen，佢仲請我食咗舊Brownie⋯⋯

「幻想吓，將你心入面最煩惱嘅事，掉落個海度⋯⋯」阮姑娘繼續講。

如果可以，我都想將所有煩惱嘅事掉落海， 我都明白嘅⋯⋯有時人同人之間，就係唔知點解會慢慢走遠⋯⋯但係我唔想佢就咁離開我。

「一齊深呼吸⋯⋯」阮姑娘用好慢嘅語氣講。

阮姑娘都唔知係咪真係識催眠，我竟然係後面瞓著咗⋯⋯

每次係學校瞓都覺得好舒服，唔凍唔熱，雖然老師會講住嘢，不過少少聲都算OK啦⋯⋯就係咁，阮姑娘嘅活動就完咗喇。

「起身呀⋯⋯起身呀⋯⋯起身呀！劉星隨！」
「咩事呀？」我睡眼惺忪咁講叫我起身嘅人。
「又偷懶。」
「我瞓著咗咩？」
「人哋阮姑娘咁認真帶活動，你又瞓教。」
「咁好攰吖嘛⋯⋯」
「我走喇⋯⋯唔好喺度瞓到又病呀。」

完咗活動之後，有個人叫返醒我。

「唔好走住吖⋯⋯」
「有嘢同我講？」
「我係咪激嬲咗你？」
「冇呀。」
「咁點解你好似成日都唔想理我咁。」

我終於都問咗佢。

「依家咪理你囉。」毛子蘭咁講。
「吓？」

即係點？即係佢會理返我？咁究竟佢係咩事唔理我呢？

「你要寫好首歌呀⋯⋯唔係叫《蘭》咩？」
「哦。」
「我走喇⋯⋯你走唔走呀？」
「哦⋯⋯」

到最後我都唔知毛子蘭點解之前會唔理我，不過女人應該就係咁？

「咁即係點解呀？做咩唔理我呀之前？」我一路問，毛子蘭一路走。
「快啲啦，唔等你呀。」毛子蘭好似笑緊？

算數啦，唔深究原因喇，因為佢愈行愈快，我就嚟追佢唔到，早知陸運會嗰陣由佢自己跑啦。
（Tbc.）

58 - 樂少

樂少完咗活動之後返到屋企，首先去咗沖涼，然後喺電話覆咗幾個Message。呢個時候，樂少嘅細佬健仔－關志健都返到屋企。佢細樂少兩年，依家中三，讀Band 1嘅名校－「聖加略中學」，品學兼優，係中三組奧數比賽-「新世紀盃」嘅冠軍。

「呀哥，咁早嘅，6點咋喎。」健仔放低袋。
「係呀，個Event早完呀。」樂少碌住電話講，「你呢，唔使操數咩？」
「下個月先比賽。」健仔攤喺梳化，挨住樂少，「你唔練Bass嘅？」

「呢排冇Show玩，阿錘又未寫完首新歌。」樂少推開健仔，費事畀佢啲汗整污糟返。

「哦⋯⋯阿哥呀，你哋夾Band好冇玩㗎？」
「幾開心吖，做咩呀？你又想夾咩。」

「唔係，我對音樂嘅興趣喺阿媽逼我考完8級琴就冇晒。」
「咁你依家仲鍾唔鍾意彈琴呀？」樂少偷偷哋望住健仔。

「冇咩特別鍾意喎，不過間唔中冧吓女都幾好嘅。」健仔奸奸哋咁笑住講。
「上次講個師姐呢？畀人飛咗喇？」
「唉，原來同個『孝基仔』一齊咗，又係彈Bass嘅。」
「米9高嗰個？」
「係呀，你識咩？」
「上次出Show見過啦，都幾勁嘅。」
「係咪你廢咋。」
「妖～」

樂少同健仔兩兄弟感情好好，由細到大健仔都因為成績好，父母就放好多心機栽培佢，例如要健仔學好鋼琴，同埋請老師幫佢補習。相反對樂少就用放任方法，只要佢唔學壞就可以。

「呀哥，搵次出Show叫埋我同阿爸阿媽一齊睇啦。」
「你哋想睇咩。」
「唔想㗎，去笑吓你都好吖嘛。」健仔開玩笑咁講。
「死仔包吖。」樂少一嘢拍落健仔背脊。

樂少唯一必定好過健仔嘅係打交，因為未發育嘅關係，健仔完全唔夠樂少打。

「其實呀哥你彈Bass，彈得幾好㗎。」
「你識聽咩？」
「我8級琴㗎。你啲拍子感好好，唔係個個都天生識數拍子㗎。」
「又講得幾好聽，不過今晚都係你掉垃圾。」
「妖～早知唔讚你。」

呢個就係關家兩兄弟嘅日常生活，間中會打吓交，不過都係會互相照顧。

樂少喺房入面有時都會溫吓書，同劉星隨唔同，樂少對學業仲有少少著緊，雖然父母冇迫佢，但係自己都想起碼入到大學，有個Degree喺手，叫做對佢哋有個交待。

樂少諗起健仔啱啱提起嘅「孝基仔」馬勝熙，佢嘅Bass畀到樂少一種張狂但同時又不張揚嘅感覺，馬勝熙嘅Slapping比樂少好好多，係手腕力嘅差異，呢啲唔係一時三刻可以彌補到，而且彈奏嘅位置多數用後段，但係力度又非常夠，證明手指都夠力，出嚟嘅顆粒感比較大，而且有好強嘅衝擊力。樂少鍾意用中間位去彈Bass，主要係容易控制，手指唔需要好強嘅力，而且音色偏向溫和加平衡，整體嚟講會冇其他樂器咁突出，不過就正好畀到其他隊友發揮。

平時喺「黑色西炒飯」入面，Sky嘅Solo同劉星隨嘅Vocal係最突出嘅一環，而Bass就相對內斂，樂少亦都唔鍾意喺台上面太突出，只要專心演奏就可以。上到台嘅時候，佢係最feel到劉星隨緊張嘅成員，因為主音要承受嘅壓力比佢哋都多，所以樂少總係會用眼神鼓勵佢。

正當樂少開始練習冇耐嘅時候，佢部電話不停響，今日似乎好多人搵佢，而其中一個Message令樂少笑到「四萬咁口」，好似中咗六合彩咁。

原來樂少咁開心係因為終於買到Magic And⋯嘅演唱會飛，佢哋將會喺4月嚟到香港開Show，係咁多年嘅第一次，但係可惜只開一場，飛一早已經喺賣晒，對普通學生嚟講邊有咁易搶到飛吖。樂少雖然都欣賞Magic And⋯，但係緊係唔係想自己一個睇啦。

樂少係想約Emma去睇，不過樂少嘅內心仲掙扎緊，到底係咪應該放棄，完全唔再同Emma做朋友，然後等到畢業之後，唔再見面，靜靜喺彼此嘅生命入面消失。

之不過，同好多收到好人卡嘅人一樣，樂少呢個純情嘅少年，真係會想繼續做個好人，默默咁守候喺Emma嘅身邊。

樂少知道咗Magic And⋯會嚟之後，就運用佢嘅人脈打聽到Emma原來買唔到飛，於是佢就扑心扑命搵張飛返嚟，雖然係就係要食黃牛價，但係佢又好似冇咩所謂。或者會有人覺得咁做唔值得，但係喺樂少心入面知道，佢已經有一個答案。

諗返起上嚟，唔係Emma嘅話佢唔會無啦啦做咗一個Bass手，不過慢慢佢都鍾意咗彈Bass，呢種低調但係又重要嘅樂器，同佢嘅性格好襯，可以默默咁支撐其他人。
（Tbc.）

59 - 夾Band就係炒飯

同毛子蘭一齊走之後，我冇直接返屋企，而係去咗「流星記」，因為好肚餓，所以想食少少嘢。

「媽媽，有冇嘢食呀？」我一入去就同媽媽講。
「就晚市喇喎，你入去搵吓有冇嘢食。」

我入到廚房，爸爸同班師傅準備緊晚市嘅嘢，所以都唔得閑理我。

我隨便拎咗啲材料，青豆、火腿、蕃茄，呢個組合唯有煮西炒飯啦，我即刻𢳂咗一碗白飯，打咗兩隻雞蛋，將啲材料倒晒入去。

其實我已經好耐冇炒過飯，細個嘅時候，爸爸帶我同家姐試過入廚房玩，就教咗我哋點炒飯，不過炒到未夠一半，媽媽就走入嚟捉走我哋。咁又係嘅，邊有人會畀10歲都未夠嘅小朋友入廚房吖。

我爸爸見到我炒飯，好似冇咩特別，佢由得我炒，當然我feel到佢每一分鐘就會望吓我搞咩，好似驚死我折咗佢個廚房咁。

最近我有個新諗法，「炒飯」同「夾Band」喺某個層面上係好相似，都係將幾樣嘢炒埋一碟。呢碟青豆就係樂少，因為雖然Bass唔起眼，但係冇咗幾粒青豆硬係差啲嘢。而蛋就係太一，炒飯緊係要「金包銀」㗎啦，就好似鼓咁承托住隊Band。呢幾粒火腿就緊係Sky啦，冇 肉嘅炒飯真係好Dry㗎，只要加少少，成碟飯都唔同晒。而我係咩？如果係「西炒飯」，我就係蕃茄喇，話晒都叫主音吖，雖然我知我仲有好多不足，不過我會好似蕃茄咁將所有精華畀晒碟飯。

唔知點解，我炒飯嘅時候，好似好熟手咁，可能睇得多啦。雖然拋鍋就未識，不過我都兜得幾好㗎，每粒米都有好好受熱，差唔多可以就落埋茄汁，咁再兜多次啲飯就可以。去到呢個步驟，有啲似結他Solo，你會feel到炒好嘅飯變輕咗，好似Solo嗰時咁，粒音符會變得好似可以捉住。

OK！食得喇！我將碟炒飯上碟，諗住拎出去食嘅時候，爸爸就行過嚟，𢳂咗一羹飯食。

「炒得幾好喎，粒粒分明，蕃茄味又夠。」 爸爸好似食得幾開心。

我拎兜飯出去嘅時候，媽媽好似問到好香嘅味。
「邊個炒㗎？財哥炒㗎？」媽媽問。
「我炒㗎，佢哋個個都唔得閑。」

媽媽又𢳂咗我一羹食，「炒得幾好喎，粒粒分明，蕃茄味又夠。」媽媽咁講。
「點解你同你老公講嘅說話可以一模一樣，一隻字都冇唔同㗎喎⋯⋯」我真係呆咗，呢兩公婆有冇咁心有靈犀呀。

之後，終於到我自己試吓我碟炒飯。雖然佢兩個話好食，但係自己唔試過又點知好唔好食吖，我即刻大大啖咁食落口。

又⋯⋯炒得幾好喎，粒粒分明，蕃茄味又夠。點解連我都同佢兩個一樣反應㗎⋯⋯

我諗我同「炒飯」都有啲緣份，再一次證明「黑色西炒飯」冇改錯名。

之後，我就返咗屋企，繼續開始作埋《蘭》首歌，就咁叫《蘭》，係咪太容易令人誤會呢。不過我都係繼續改良我嘅旋律，唔想太複雜，而且我都刻意寫得冇咁高音，費事自己唱唔到，我嘅混聲區仲未可以好自如咁切換。

我以前只係會將自己嘅旋律用數字譜記低，或者錄起佢，但係學識咗Guitar Pro之後，我就直接喺Guitar Pro入面打譜，以前自己彈嘅時候，會唔覺意多咗半拍，或者由4拍4，變咗9拍8咁，但係因為電腦將拍子限死咗，迫我要數返正確，變相令我練好咗我嘅拍子感。

打完份譜，我就上咗一陣網，打開Facebook，我無意中睇到Silas貼咗自己會開音樂會嘅消息。我有少少驚訝，估唔到夏天雪人都會開音樂會，我好好奇佢會點，會係我識嗰個Silas定真係唱夏天雪人嘅歌。

我並唔係唔想認同夏天雪人嘅音樂，但明明可以有其他選擇。成日有人講，如果鍾意嘅偶像改變咗，仲會唔會繼續支持，而家嘅我真係答唔到，我喺佢嘅新歌，搵唔到當日喺禮堂聽到嘅感動，甚至我覺得唔係Silas嘅話，我絕對唔會聽呢種曲風嘅歌。

但係我都冇再諗啲咩，因為我夾Band又唔係因為佢，我有我自己要做嘅事。
（Tbc.）

60 - 復活節假前夕

2014年4月14日

時間嚟到放復活節假前嘅一日，今日係星期一，叫我哋返嚟都係派卷，同埋交待吓功課之類。考完試之後，我哋終於可以變返夾Band Mode，於是我就問Miss Fong借咗音樂室嘅鎖匙。

Drop咗Physics之後，我就輕鬆晒，基本上都合格，樂少就同我差唔多，有幾科仲高分過我，SKy就少少失手，但係我唔係指佢成績差咗，而係終於考唔到第11，升咗上第9位⋯⋯佢自己竟然覺得好失望。不過太一⋯⋯就好似真係麻煩啲，英文同Maths都炒咗，佢好似冇咩心機。

「係呢，我哋放假做咩好呀？」我問佢哋，諗住有長假，可以做多啲嘢。
「又去Camp？」樂少講。
「唔得喎，我有兩日要返嚟上堂呀。」太一講。
「咁⋯⋯淨係夾多兩次Band先囉，反正又冇Show玩。」我講。

冇Show玩真係好悶，好似冇咩努力嘅目標咁，就算得一兩個人聽都好吖，我真係好想彈結他同唱歌呀。

「阿錘你，寫完首新歌未呀？」Sky問我。
「其實呢⋯⋯我寫寫吓，好似變咗唔係情歌咁，而且填詞嗰度，我仲未有方向呀。」我講，話說《蘭》好似愈聽就愈唔似一首情歌，點講好呢⋯⋯有啲似「多謝」？要我形容嘅話，而家首歌就好似一張Thank You Card咁。

「咁呀⋯⋯慢慢嚟啦，愈急先愈寫唔到。」Sky笑笑口咁講。

「終於可以放假喇。」Sky伸住懶腰咁講。

Sky個樣真係好輕鬆，點解成日上堂瞓覺又可以考得咁好，彈結他仲要好過我咁多⋯⋯樣就唔好講啦，傷感情⋯⋯

「我哋星期三同星期五晚夾？因為太一星期三同五日頭要返嚟上補考特訓班。」我問佢哋。
「我星期五夜晚唔得呀。」樂少講。
「我都係呀。」Sky講。

「你哋有咩做呀？」我問，話說Silas嘅夏天雪人演唱會好似都係喺星期五晚開。

「我去中文科嘅模擬口試活動。」
「我就去睇Show。」
Sky竟然去模擬試，九成九係因為Miss Lui啦，至於樂少講嘅Show，唔通係Magic And⋯嘅演唱會？

「咁星期三晚先啦。」我講，「樂少你唔通係睇Magic And⋯？」

「係呀。」
「估唔到喎。」
「我一早話咗我係Fans嚟啦。」

然後，我哋就離開咗音樂室，樂少落咗去SU房，Sky即刻返屋企，太一去咗搵班主任，而我就去咗Canteen，因為想食幾粒魚蛋先走。懷住放假嘅美好心情，今日嘅天色都好似靚啲咁，雖然上次放假都只係兩個月前嘅事，不過就好似隔咗好耐咁，I need a break。

＝＝＝＝＝＝

樂少開完SU嘅會之後，留咗喺房入面，因為想等Emma，然後邀請佢一齊去睇Magic And⋯。今日Emma要補Physics，如果冇遲落堂，會喺15分鐘後落到樓梯。樂少琴日已經掙扎咗成晚，不過佢都係下定咗決心。

樂少話咁快，已經嚟到咗樓梯，仲早咗5分鐘，不過就係呢個時候Emma就落到嚟。佢身邊仲有另外兩個朋友，樂少冇預過佢隔離有人，一時間唔知點反應，不過Emma好似察覺到樂少個樣有啲怪。於是就叫咗佢兩個朋友行先，慢慢走近樂少。

「樂少？你搵我呀？」
「係呀。」
「聽講你好似買唔到Magic And⋯演唱會飛⋯⋯」
「係呀⋯⋯黃牛飛又好貴。」
「你會唔會想同我⋯⋯睇呀？我有兩張飛⋯⋯」
「真係？你又會買到嘅。」
「係呀。有個朋友個親戚個同事個⋯⋯總之有個人幫我買到兩張飛啦。」
「好呀。」Emma好爽快應承咗。

「不過幾多錢呀？」
「Er⋯⋯我請你都得喎。」
「唔使喎，我畀返錢你啦。」
「好⋯⋯」

Emma聽到有飛之後，露出咗一個天真無邪嘅笑容，融化咗樂少嘅心。

「咁我哋到時見啦。」樂少有啲難以置信咁容易。
「好呀。」Emma笑笑口咁應承樂少。

一秒之間，樂少嘅世界再次充滿顏色。同時佢又叫自己冷靜啲，因為佢知道Emma呢刻只係當佢係朋友，但係對樂少嚟講，咁都已經好足夠，仲可以同Emma做好朋友就已經足夠。

呢個時候，心情極好嘅樂少見到坐喺Canteen食緊魚蛋嘅劉星隨，佢二話不說就坐喺佢隔離，然後篤走佢一粒魚蛋。

＝＝＝＝＝＝

「你開完會喇咩？」我問樂少，佢無啦啦篤我兜魚蛋。
「開完好耐啦。」佢唔知做咩笑得好奇怪。
「你⋯⋯哦～」我好似諗起啲嘢，頭先Emma行過，「你約咗Emma睇Show？」
「係呀，佢應承咗。」
「吓，竟然。」

我以為樂少一早放棄咗追Emma，估唔到佢原來咁有毅力，仲連一票難求嘅Magic And⋯都買到。但係我作為佢嘅老友，係咪要提醒佢，始終「傻小子妄想找到優美開始」，通常都係「卻跌一跤很諷刺」嘛。Emma同樂少其實完全唔熟，加上之前Emma嘅答覆，我諗就好難幾個月就改變，睇嚟樂少都係唔好抱咁大期望好啲。

「你應該知Emma係因為Magic And⋯先應承你㗎嘛。」我同樂少講。
「我知呀。唉⋯⋯你唔明㗎喇，你呢啲唔愁愛情嘅人。」樂少拎起我枝竹籤，當係一枝煙咁，擺喺嘴到呼吸，「當你鍾意一個人嘅時候，只要有個『最佳位置』就夠。」
「吓？」佢噏咩呀？又情聖上身？
「這趟旅行若算開心，亦是無負這一生。」樂少吟咗首詩，其實我知係《落花流水》嘅歌詞。
「你哋睇演唱會咋喎，唔係去旅行呀。」

呢個時候，樂少已經冇理我，瀟灑離開，仲搶埋我串魚蛋。

（Tbc.）

61 - Rooftop

星期三嘅下晝，我一如平時喺屋企練習。最近研究緊點彈「經撥」，即係經濟撥弦Economy Picking， 因為我一路以嚟都係用「交替」，即係交替撥弦Alternate Picking。兩種Picking嘅方法都幾唔同， 我用開嘅交替Picking，感覺比較直接、節奏感明顯、衝擊性強，但有啲位要彈好快嘅時候就會吃力啲，而「經撥」就顧名思義係經濟實用為主要目的，彈出嚟嘅感覺更滑同快，但係就需要多少少思考，冇得好似交替Picking咁樣一路直衝。所以頭幾日真係辛苦到爆，我要用極慢嘅速度彈「經撥」，逐少逐少將BPM加上去。本來可以唔使咁努力呢結他嘅，但係難得Sky想同我一齊玩Double Lead，我就要努力啲追上佢嘅功力。

呢個時候，我就收到達仔嘅電話。

「錘仔，大鑊，我Band房水浸，你哋今日唔好嚟。」達仔咁講。
「吓？咁我哋今日點呀。」
「Book第二間先啦，我介紹間畀你喇，一定有位呀。」達仔匆忙收線。

睇嚟The Echo嘅水浸情況真係好嚴重，一時三刻我都唔知去邊度搵Band房，唯有睇佢介紹邊間。

冇幾耐之後， 達仔就send咗一個地址畀我哋，佢已經幫我哋book咗。間Band房喺觀塘，我見都冇咩選擇，唯有試吓啦。呢間Band房叫做Rooftop，我哋即刻試吓上網search吓啲資料，點知咩都冇，咁嘅情況一定係超級舊，或者超級少人識，可能得啲叔叔先會去。不過冇所謂啦，當體驗吓都好嘅。

我驚我唔識路，所以約咗佢哋喺觀塘等，可以一齊喺地鐵站去Rooftop，因為少嚟觀塘我覺得有啲陌生，行到一間望落去好舊嘅工廠大廈， 正正就係達仔講嘅地址。呢棟工廠大廈有25層，而Rooftop就係第24層，係咪因為近天台所以先叫做Rooftop呢？ 一出𨋢，我哋就行去最尾間房，果然Rooftop係一間好舊嘅Band房，門面擺滿晒結他、Bass、Amp，成間鋪係相當窄。

佢哋嘅老闆係一個望落去有少少年紀嘅叔叔，雖然頭髮蒼白加上有明顯嘅皺紋， 但係佢嘅頭髮就非常之濃密，如果我到佢嘅年紀都仲有咁多頭髮就好喇。

「你就係劉星隨呀？達仔同我講咗喇，佢Band房漏水，冇地方畀你哋吖嘛，用後面間房啦。」老闆用手指公向後指住一間房，「唔好睇啲嘢好似好殘舊咁呀，全部都係值錢嘢嚟㗎。」

我哋沿住狹窄嘅地方慢慢入到去，裡面間房真係好細， 仲細過The Echo，我哋五個都係啱啱好坐到，呢度最吸引我嘅係兩台Orange嘅Amp，雖然都係橙色，我唔識分咩型號，但係望落去，好似用咗10幾年咁，而咪用嘅Amp，竟然係Yamaha，可能日本出嘅都係好嘢掛。

其實器材都係咁用㗎啦，又唔係出名嘅樂隊，遲啲如果有Show出用嘅Amp都唔同，試多啲唔同種類嘅Amp頭都好嘅。

Sky馬上就開始試結他，佢好似睇得好興奮，Orange嘅音色無論係清聲定拆聲都有種英倫味，好似Oasis、Blur咁。唔知係咪因為Orange音箱嘅關係，Sky玩咗啲將幾Jazz Feel嘅Licks。

馬上我哋就開始夾，可能係同間Band房有關，我覺得無論係聲定Feel，甚至眼前嘅事物都好似返咗去90年代咁，感覺上都幾好玩。而家我哋已經可以將《數碼暴龍》、《懶》、《黃金入球》玩得好熟，都係時候要玩新歌，我一定要快啲作好《蘭》佢。

「係呢，我想試吓夾Magic And⋯嘅《Somehow you just don't belong》，應該唔係好難。」樂少講。
「好呀。」Sky同太一都爽快答OK。
「我都可以嘅，雖然唔係好熟，但係我都聽過呢首歌。」呢首歌係講人生中必定會面對嘅傷痛，都算幾紅㗎。

「我淨係LA住先，大家試咗個Feel先。」因為我唔熟首佢，旋律都係隱約記得，「咁嚟啦。」

《Somehow you just don't belong》嘅前奏好簡單，就算冇練過，我都應該彈到八成，所以Sky可以好輕鬆彈到。而同時太一又真係夾到，雖然好明顯用咗個比較簡單嘅Pattern試住先，今次真正carry大家嘅係樂少。無論音色、節奏，全部都好似原曲，就係咁首歌先可以玩得咁Smooth。

去到副歌，我開始有印象，所以我直接唱英文。Magic And⋯嘅歌永遠都係咁，定義係Pop-Rock，但係編曲唔複雜，甚至仲Pop過好多Pop song，不過就係咁先有簡單純粹嘅感受，直白嘅歌詞加埋上口嘅旋律，好易就令人產生共鳴。

「樂少你，彈得好好喎。」Sky讚緊樂少，唔肯定Sky係咪第一次讚樂少，但係我印象中呢個畫面真係好少發生。

今日夾得好爽呀，好似將所有壓力同不安都清走晒。

「你哋夾得幾好喎，我聽得好開心。你係主音呀？」老闆同我講，可能呢度隔音都麻麻地，所以老闆聽得好清楚。

「多謝，我係主音劉星隨。」
「你嘅唱法，我諗起我嘅一個徒弟。」老闆講。
「你嘅徒弟？」

老闆遞咗一張Poster畀我哋，竟然係⋯⋯夏天雪人。

「Silas？佢係你徒弟？」我驚訝咁望住老闆。

「原來你識佢呀。」
「佢係我哋師兄嚟，好多年前嚟過我哋學校表演。嗰陣佢好Rock㗎，點解而家⋯⋯會變咗夏天雪人？」我好想知答案。

「以前好Rock？你覺得佢依家唔Rock咩？」老闆反問我。
「感覺唔同咗囉。」

「你去聽佢演唱會啦，佢叫我幫佢寄賣，反正都賣唔出，畀張飛你啦。」老闆畀咗幾張飛我哋。

我接咗啲飛，唔通命運之神都叫我要去睇Silas嘅演唱會⋯⋯

「老闆，你叫咩名呀？」我問老闆，我希望查到更加多嘅事。
「宋炎序。」

原來係佢，宋炎序，因為個名好特別，我知道呢個人係邊個⋯⋯
（Tbc.）