【搖滾準備】《我們的某校勁BAND》【重開】

37 - 隊友

我哋落台之後，第一個捉住我哋嘅係隔離學校嘅Yoyo。

「唱得好好呀你哋，可唔可以同你哋做個訪問呀？」
「緊係可以啦！」呢個係樂少。
「各位同儕，多謝多家出席⋯⋯」校長要開始演講。
「我哋一陣再做訪問吖。」Yoyo同我哋講。

之後Yoyo就去咗影校長，同埋準備做老師訪問。

「你哋覺得啱啱點呀？」我問佢哋。
「反應好似麻麻地。」樂少講。
「好似曹sir唱嗰陣仲好反應，係咪首歌冇人識呢？」太一講。
「我諗可能係我哋嘅問題。」Sky講。

「咩意思呀？」我問。
「可能因為觀眾係老師，睇表演有顧慮都合理，但係我哋帶唔起氣氛就係事實。」Sky講。
「都係我MC做得差⋯⋯」我講。
「算啦，班老師都唔會認真聽嘅。」樂少安慰我。

會唔會真係我嘅MC能力太差呢？自問都冇咩主持嘅天份，的確以我而家嘅唱功或者技術，根本冇可能令班觀眾留心我嘅表演⋯⋯

「阿錘你，又唔使自責嘅，始終你都係第二次上台表演啫。」Sky講。

過咗一陣，Yoyo已經訪問完我哋校長，估唔到連我哋學校嘅校園電視台都未訪問我哋，就有其他學校嚟搵我哋。

「你哋今日表演呢首歌係原創歌喎，可唔可以講吓作呢首歌嘅原因係咩呢？」Yoyo問我哋。

「我哋主音阿錘有一日受到我嘅啟發，就作咗呢首歌喇。」樂少咁講。

明明我作嘅時候係⋯⋯因為⋯⋯毛子蘭話我懶。

Yoyo將枝咪指向我：「Err⋯⋯其實主要都係想講⋯⋯我係好懶，懶到只係想夾Band⋯⋯面對嗰啲阻住我嘅人，我會懶理佢哋⋯⋯好似歌詞所講，我只係想夾足一世Band⋯⋯就係咁。」

「咁夾Band嘅過程有冇遇到咩困難同阻礙呢？」Yoyo問我哋。

我哋四個互相望住大家，其實我哋都有啲嘢想講，不過又唔知點講咁。

「我覺得多多少少都有啲困難嘅，例如有時唔知係咪想堅持落去呀。」樂少講。

樂少咁講，應該都係指Emma件事，唔知佢心裡面係咪真係OK呢。

「咁夾Band有咩開心嘅經歷可以分享？」
「夾Band好開心，因為可以搵到平時冇嘅嘢，例如隊友。如果要話開心嘢，應該要問返我哋主音，佢早排先有艷遇。」太一講。

本身都畀太一個答案感動到，但係突然又跣我一鑊，頂！

「喂！唔係呀⋯⋯夾Band最開心係⋯⋯我搵到目標，可以努力向住一個方向衝！」
「多謝你哋接受我哋嘅採訪。」Yoyo講。

然後一片笑聲之中，我哋嘅訪問就完咗。

「你哋好犀利呀，又識夾Band，又識作歌！」Yoyo同我哋講。
「多謝。」樂少講。
「你哋有冇IG或者Facebook呀，我Follow你哋吖。」
「冇呀⋯⋯你可以follow我IG呀。」樂少講。

之後Yoyo就follow晒我哋IG，但係呢個時候我先發現，原來Sky連IG都冇用。

「吓，你冇用IG？」Yoyo問Sky。
「IG係咩嚟㗎？」Sky答。

其實我一直都想搵Sky嘅IG follow，但係我就一直都搵唔到，雖然都覺得Sky唔會打理自己IG，但係竟然連IG係咩都唔知，果然同唔知班會係咩嘅司徒天一樣，Sky都係嗰個懶理世界嘅佢，睇懶嘅人唔只我一個。

之後因為晚宴都進入尾聲，有啲老師已經走緊，我哋就執緊嘢，樂少就同Yoyo傾咗好耐，唔知搞乜。

「喂樂少，Pack嘢呀！」
「嚟啦！」
「有新目標喎。」我望一望Yoyo。
「唔係啦，係佢幾好傾啫。」

因為已經11點嘅關係，我哋唔使搬Amp同鼓返學校，老師會負責，所以我哋執齊嘢就走得。

Miss Lui走之前嚟同我哋講咗兩句。

「辛苦晒喇，好好抖下，準備考試呀。」

係喎，我都差啲唔記得，聖誕假之後就係考試⋯⋯

「司徒天，畀返條鏈你。」Miss Lui畀返條鏈Sky。
「送畀你吖，我覺得Miss Lui你，戴得好好睇。」Sky笑笑口咁講。
「咁多謝喇，不過我改卷唔會鬆手㗎。」
「哈哈，咁我拎全級第一畀你睇啦。」

估唔到Sky竟然會咁講，我都有啲震驚。

當太一拆完套鼓之後，在場嘅人都走晒咁濟，我望咗一望個場，淨返負責執手尾嘅梁sir喺到，連毛子蘭都唔見咗，仲諗住say個Bye先走㗎嘛。

因為啱啱冇食飽嘅關係，而家好肚餓。

「好肚餓呀！」我講。
「食宵夜囉。」樂少講。
「整碗糖水囉，隔離街有間正嘢。」太一講。
「好呀。」Sky講。

「喂。」後面傳嚟一把聲。
「原來你未走㗎？」
「畀你哋㗎。」佢咗幾包飲品我。
「多謝你呀，小蘭。」樂少講。

「檸檬茶係樂少嘅，太一就係烏龍茶，Sky就係朱古力，你就係維他奶。」佢同我講。

「多謝。」

冇錯，呢個人又係毛子蘭。

「小蘭你，點解會買朱古力畀我嘅？」Sky問毛子蘭。
「我都係隨便買㗎，因為佢咁啱得返一包，所以我諗懶得諗嘅你會揀佢。」毛子蘭講。
「冇錯呀，睇嚟小蘭你，了解我仲多過我班隊友呀。」Sky講。
「喂阿錘，你送人返屋企啦。」樂少講。

「吓？」
「係呀，依家夜晚危險呀，人哋一個女仔。」太一講。
「最多糖水鋪等你啦。」Sky講。
「快啲行啦。」樂少又推我走。

「唔使送我啦。」毛子蘭講。
「咁一係送你去搭巴士。」我突然之間講。
「嗯。」毛子蘭微微點頭。

「咁我哋去糖水鋪喇，你一陣打畀我啦。」太一講。

就係咁，我就送毛子蘭去搭巴士喇。一路上，我哋冇咩傾偈，因為唔知講咩好。

「首歌點呀？」我問佢。
「幾好呀，同你一樣，好懶。不過⋯⋯好聽。」

就係咁，空氣又靜咗落嚟，到底應該講咩好呢？

「你其實⋯⋯除咗返學同溫書有咩做㗎？」我求其問啲嘢啦。
「整嘢食囉⋯⋯」
「吓，竟然係咁？」
「我爸爸唔識煮飯，而媽媽就成日飛嚟飛去唔喺香港。」

「你媽媽係空姐？」
「唔係呀，佢做導遊㗎，成日都去唔同國家。」
「所以你要負責煮飯？」
「嗯。」

我哋到咗巴士站，兩個人就好靜咁喺度等車。我哋安靜到，只係聽到我飲維他奶嘅聲。

「而家係負四蚊。」我同毛子蘭講。
「咩呀？」
「你之前請我飲咗兩包維他奶，呢包係第三包，所以倒差你四蚊。」
「差我五蚊呀，呢度一包維他奶賣七蚊。」

「一蚊就唔好計啦。」
「又係你自己計先嘅。」
「超～不過⋯⋯唔該晒，因為我真係好肚餓呀。」
「你可能要唱『我懶到只想飲包維他奶』。」

「都唔啱音。」
「咁你作首啱音㗎囉。」

就喺不知不覺間，巴士已經到咗，突然之間，我唔想架車咁快嚟，我仲想同毛子蘭傾多一兩句⋯⋯

「巴士到喇，我上車。」
「Bye-bye⋯⋯返到屋企話我知喎。」
「嗯。」

（Tbc.）

38 - 太鼓達人

「你哋估小蘭同阿錘會點呢？」太一問。
「我諗阿錘應該真係送到小蘭上車就返嚟，佢個人咁遲鈍。」樂少講。
「阿錘佢，其實應該好開心。」Sky講。

佢哋三個去咗太一推薦嘅糖水鋪食糖水，其間討論咗唔少嘢，由學校到音樂，再到劉星隨同毛子蘭嘅關係。

＝＝＝＝＝＝

我送走咗毛子蘭之後，就去打畀太一，再去糖水鋪搵佢哋。坐低冇耐就收到毛子蘭Message，佢話佢已經返到屋企，其實我係咪應該要覆返啲嘢呢？不過我最後決定係唔覆任何嘢⋯⋯

「傾緊咩呀？」我問佢哋。
「講緊你同小蘭呀。」樂少講。
「我同毛子蘭有咩好講呀？」
「阿錘你，真係咩都feel唔到咩？」Sky講。

「咩呀？」
「算啦，你遲啲就會明。」Sky講。
「我哋考試前仲夾唔夾呀？」太一問。
「我可以呀。」
「我都可以，但係我冇時間練嘢，因為要溫書。」樂少講。

「咪溫啦，你咪又係炒。」太一講。
「我上次炒英文啫，呢排聽咗咁多英文歌，肯定唔會炒呀！」樂少講。
「咁一係考完再夾囉，都係兩個禮拜啫，反正我哋都未有新歌。」
「就咁話啦。」樂少講。

係喎，一放完假就要考試，雖然話就話我唔係努力讀書嘅學生，但係唔合格就要補考，而且好麻煩，所以我都有溫少少書，希望可以Pass啦。

＝＝＝＝＝＝

過咗幾日，已經嚟到新嘅一年，一放完假就係考試日。經過咗十日嘅考試，終於可以抖吓，而且可以夾返Band。

今日係星期四，係我哋最後一日考試，但係中六同中三就仲要考多日，所以聽日我哋都唔使返學，加上而家先係12點半，變相又多半日假。

「終於考完喇！我哋幾時夾Band呀？」樂少問我。
「星期六？呢排學校音樂室又唔開。」
「好呀。」

估唔到樂少而家會主動提夾Band，睇嚟之前擔心佢因為Emma會放棄音樂真係多餘。

「喂！」太一衝過嚟，搭住我同樂少膊頭。
「點呀，有幾多題識呀？」樂少問太一。
「我考ICT啫，輕鬆啦。係喎Sky呢？」太一講。
「佢考VA吖嘛，有排先完呀。」

「不如去尖沙咀打機啦，我好耐冇打太鼓呀。」太一講。
「我一陣要開SU會呀。」樂少講。
「咁我同太一去啦，反正我想包新弦。」
「咁食晏先囉。」樂少講。

＝＝＝＝＝＝

另一邊，考VA嘅Sky同Emma終於考完。

「終於考完，好眼瞓呀。」Sky講。
「你好似好攰喎。」Emma講。
「少少啦，依家揸畫筆好似好攰咁。」
「你慣咗揸Pick吖嘛。」

「可能係掛。」
「樂少，點呀？」
「樂少佢，OK呀，你擔心佢？」Sky笑笑口咁問。
「又唔係擔心嘅，不過⋯⋯唔識講添。」

「藍色水彩同學⋯⋯你好似肥咗。」Sky突然咁講。
「我邊有肥到呀。」
「因為你，裝咗好多嘢喺心入面，所以肥咗。」Sky又笑笑口咁講。

Emma一時之間唔知講咩好⋯⋯

「我返屋企先喇，好眼瞓。」Sky就咁就行返自己屋企。

Emma望住Sky嘅身影愈行愈遠，自己一個留低咗喺學校。

＝＝＝＝＝＝

我同太一話咁快就去到機鋪，今次好似係我哋兩個人第一次獨處，通常我哋都係四個人一齊，所以好似感覺有啲奇怪。

入機鋪前，因為突意諗起毛子蘭講嘅嘢，我除咗件恤衫先入機鋪。

「阿錘你竟然肯除衫？」太一講。
「話晒考試季節，尊重下學校都好嘅。」

我都唔知我做咩會咁做，其實我大可以唔理，因為學樂少咁講，邊有老師會山長水遠去尖沙咀捉我哋吖，但係又硬係好似聽到毛子蘭喺我耳邊講嘢咁。

太一即刻衝去打太鼓，而我就靜靜咁睇住佢打鼓。雖然太一冇講，不過其實我聽得出佢打鼓有啲唔同咗，以前佢只係會打Single，而家好似用多咗Double，喺佢打太鼓就知。

太鼓達人嘅感應器，可以分做四個部分，分別係左右鼓皮同左右鼓邊，以前太一係左右手輪住打，所以螢幕左右兩面會不停變，但係而家好明題睇到佢由RLRL變成RRLL嘅打法。

「Miss咗兩個，頂！」太一講。
「Miss兩個好勁啦，你打鬼喎。」
「咁都係嘅，阿錘你打唔打呀？」
「試吓囉，都好耐冇打，我打『花』算喇。」

「花」係太鼓達人入面最易玩嘅一級，我印象中我應該可以打到「花」嘅全Combo，睇吓咁耐冇玩會點先。

「睇吓先⋯⋯一定係揀《天体観測》！」我最鍾意打嗰首就係BUMP OF CHICKEN嘅《天体観測》。

其實「花」難度真係唔難，連我都輕鬆打到。

「犀利喎，全連。」太一講。
「『花』咋喎，『竹』我都已經打唔到啦。」
「大鑊，有差佬。」
「咁我哋係咪要走呀？」
「不過佢哋好似冇打算查我哋喎⋯⋯」
「可能打太鼓機喺佢哋眼中都係乖仔掛。」

其實我都聽講過就算警察查機鋪都唔會查打太鼓達人嘅人，原來係真。

我同太一著返校服，然後就去通利買結他弦。我枝結他由買之後開始計，大概彈咗三個月都冇換過弦，所以差唔多係時候換弦。既然我係彈Squier，咁就緊係買包Fender弦先啦，因為費事特登出嚟買，我另外買咗兩包弦。

「係呢，樂少使唔使買弦呀？」
「Bass唔使咁快換㗎，半年換一次都冇問題。李sir畀佢之前先換過一次，我諗應該可以再撐多三個月。」
「咁睇嚟彈Bass抵啲喎。」
「邊有得咁計㗎。」
「都係嘅。」

太一帶咗我去佐敦嘅一間小食店，佢高度推介我試佢哋個西多。我試完之後就覺得，其實好食，不過又未去到話頂級水評，我諗同我哋屋企比，應該只係好食少少。

「我覺得一般般啫。」
「係咪你食慣屋企啲嘢，嘴刁咋。」
「唔係掛，我都嘴刁？我屋企啲嘢出名普通㗎喎。」
「咩呀，你屋企啲嘢勁好食喎。」

原來佢係覺得「流星記」啲嘢好食，咁就真係多謝喇。我哋食完準備走嘅時候，有個男人叫住太一。

「太一！」
「阿爸。」

呢個男人係太一阿爸，佢戴一副銀色嘅眼鏡，非常有氣勢。而太一見到佢阿爸之後，有少少唔同，冇咗平時嗰種傻更更嘅感覺，突然之間好嚴肅。

（Tbc.）

39 - 鼓棍與撥片

「你朋友呀？」太一阿爸問太一。
「係呀，佢叫劉星隨。」太一答佢阿爸。
「劉星隨？個名幾得意喎。有冇諗定想入邊間U呀？」太一阿爸同我講。
「Err⋯⋯我諗住睇吓DSE幾多分再算。」我答太一阿爸。

「哦，咁呀。你哋應該今日考完試係咪，間中放鬆下冇壞，不過適可而止。」太一阿爸咁講。
「我哋差唔多走㗎喇。」太一答佢阿爸。

我望住太一，呢個唔係我認識嘅佢，不過我記得佢講過佢阿爸好古肅，原來係呢個意思。

「你係咪佢夾Band嘅朋友？」」太一阿爸問我。
「係呀。」
「你哋夾Band冇問題嘅，不過玩下好喇，嚟緊呢一年好重要，專心啲讀書呀。」太一阿爸同我講。
「我唔係玩㗎，我係認真夾Band㗎。」我同太一阿爸講。

太一阿爸稍稍擘大眼，微笑咁郁下頭：「幾有理想吖，不過太一唔會一直同你夾Band，如果佢DSE考得唔好，我會送佢去外國讀書，你哋要玩玩到畢業前好喇。」

「吓？」我望一望太一，佢好似有啲唔敢望我。

太一阿爸講完之後就離開咗我哋。

「喂，真㗎？你要去外國？」我問太一。
「佢係咁講囉。」太一冇咩心機咁答我。
「咁你自己都想去？」
「我都唔知。」

其實我都冇諗到咁後嘅事，我只係知到我想夾Band，但係我根本冇諗過佢哋，畢業之後我哋會變成點，我都冇同佢哋傾過⋯⋯

「咁你而家返屋企？」我問太一。
「唔返住啦，我想打陣鼓。」
「係喎，你平時喺邊到練鼓㗎？」
「通常拍子喺屋企練，戴耳機然後打Pad或者打枕頭，再搵一兩個鐘去鼓房練手感。」

「其實練鼓都幾麻煩。」
「係呀。」
「最難應該係手感會唔慣，因為結他同Bass都可以隨時跟喺身，但係鼓就唔得，我上台就得呢對鼓棍。」太一喺書包拎對鼓棍出嚟。
「原來你有帶㗎？」我有少少估唔到，原來太一會帶埋鼓棍返學。

「有對鼓棍喺袋好似放心啲。」
「好彩我都有幾塊Pick傍身。」我拎出褲袋嘅Pick。
「不如今日一齊Jam下嘢。」我同太一講。
「咁我Book間房先？」

「Let's Go！」
「使唔使Call埋佢哋呀。」
「樂少開會，Sky可能仲考緊試喎。」

於是我同太一就兩個人去咗間Band房Jam嘢。

＝＝＝＝＝＝

樂少啱啱同SU嘅同學開完會，依家準備返屋企，佢行到學校門口，見到同樣準備走嘅Emma。樂少有少少緊張，因為考試嘅關係，佢哋都冇喺學校見過面，今次係樂少收到好人卡之後，第一次見到Emma。

「Hi，考完VA？」樂少慢慢行近Emma。
「嗯⋯⋯」Emma微微點頭，未敢有眼神接觸。
「考咁耐一定好攰⋯⋯」
「少少啦⋯⋯」

佢哋兩個一齊喺學校離開，空氣突然安靜，就好似放聖誕假前嗰日咁，兩個人喺學校門口條街，冇人冇車冇聲。

Emma喺一陣寂靜之後，Emma終於開口：「你有冇唔開心呀，其實我⋯⋯」

「冇啦。」樂少搶先打斷咗Emma嘅說話。

樂少表現出一乎「笑看風雲過」嘅樣，面上冇一絲嘅悲傷。

「我⋯⋯冇唔開心啦⋯⋯已經，其實你唔使諗咁多㗎，你繼續做自己就得。」樂少望住Emma咁講。
「好⋯⋯呀。」Emma靜靜咁答樂少。

原本樂少只係想將佢對Emma嘅呢份心意放喺心入面，只係唔少心畀Emma知道咗，雖然一開始樂少真係好唔開心，但係當聽咗好多歌之後，樂少心裡面慢慢明白到，呢次並唔係一件壞事。而且見到Emma咁在意佢有冇唔開心，證明Emma真係一個好好嘅女仔，所以樂少就算知道自己無可能同Emma一齊都冇咁傷心。

「其實我哋之前根本連朋友都唔係，只係我自己單方面，無端端鍾意你啫。本身我諗住收埋先㗎，不過唔小心畀你知道咗⋯⋯哈哈。」
「嗯⋯⋯」
「我嗰晚聽咗首歌叫《有人》，我知你要拒絕我，應該都唔係咁容易開口？所以⋯⋯你已經做得好好喇⋯⋯我哋做朋友吖。」

樂少向Emma伸出手，Emma亦都握咗落去，兩個人暫時將過去嘅事拋開，變成朋友嘅關係。

《有人》係麥浚龍喺2005年出嘅一首歌，講述難以拒絕示愛者而忐忑嘅心情。

＝＝＝＝＝＝

話咁快就到咗派卷嘅日子，第一份派嘅係我份Physics，我炒到好大鑊，只係得28分，不過因為一早諗住drop，所以我都冇一絲嘅傷心。

而家係中文堂，Miss Lui派卷嘅時候，特別表揚Sky，因為佢竟然喺中文拎到第一，以前嘅Sky大概只係徘徊喺十名左右，估唔到Miss Lui會令Sky嘅分數升咁多。我就都係差唔多，都係合格高少少，樂少就炒咗寫作，不過拉平均數應該合格。

至於其他科，就同以前冇咩分別，英文Writing仲要高分咗，唔知係咪聽多咗英文歌嘅關係，Vocab識多咗，連何副校都唔太相信。

放學之後，我哋又去咗SU房，我諗而家其他人應該會以為我哋係學生會。

「喂太一，考成點呀？」樂少問太一。
「OK 啦，炒Maths囉。」太一少少慘咁答。
「垃圾，Maths都炒。」
「今年B Part好難呀，連Sky都低分咗啦。」

「我係特登拎低分啲㗎。」Sky笑笑口咁講。
「因為你要Keep住考第11，所以要拉返低平均分？」我問Sky。
「係呀，估唔到阿錘你，都幾醒目喎。」

都知Sky懶得考頭十名，只係估唔到為咗中文拎高分啲，竟然會將Maths考差啲，真係諗唔明啲成績好嘅人⋯⋯

「我哋嚟緊有咩做呀？」太一講。
「冇Show玩喇，又就嚟放新年假，要唔要去個Camping呀。」樂少講。
「都好喎，反正我屋企都唔拜年嘅。」Sky講。
「我應該初一至初三之外都得呀。」我講。
「咁假期完之前嚟個小Trip啦。」樂少講。

（Tbc.）

40 - 神書

「係呢，你哋有冇營呀？」樂少問。
「冇呀。」我哋一齊答。
「咁點露營呀！」樂少講。

最後因為大家都冇露營工具，我哋決定去長洲宿營就算。

2014年1月17日

而家呢段時間返學係一件幾爽嘅事，因為啱啱又考晒試，而且過多一個禮拜又再放假，所以無論係老師定學生都好似懶洋洋咁，一齊等待新年假嘅來臨。

由於我Drop咗Physics，所以而家呢一堂就變成空堂，學校為咗安置我哋呢啲冇堂上嘅學生，安排咗幾個課室畀我哋，由一啲空堂嘅老師嚟代課，但係我哋主要都係自修。

我因為要做閱讀報告，所以落咗圖書館。

我哋學校圖書館唔大，得幾個大書架，平時我都係喺最多人借嘅青春小說同科幻小說揀，但係今日我唔知點解想睇吓英文書嗰邊。

明明係做中文科功課，但係有種感覺我要喺度搵啲嘢咁。英文書呢邊除咁英文書之外咩都冇，當我行到最尾嘅時候，有一本書好似召喚緊我咁，我望住呢本書，就好想拎起佢⋯⋯

呢本係一本講Music Theory嘅書，我睇返借閱紀錄，上次嘅借用日期竟然已經係2003年，即係十年冇人借過，而且我係第二個借呢本書嘅人，究竟呢本書發生咩事，會喺學校十年都冇人借呢。懷住極大嘅好奇之下，我開始睇呢本書，雖然呢本書係英文書，但係因為我成日上網睇教音樂嘅片，所以大多數都睇得明，但最神奇嘅係上次借呢本書嘅人將一啲深嘅英文字翻譯咗，再寫中文解釋喺上面，我諗呢個人應該同我一樣係個英文差嘅人，所以就做晒翻譯。

本書教嘅係一啲基本嘅理論，再加上一啲作者嘅見解，但係除咗呢啲作者寫嘅嘢之外，每一部分都有人寫低咗一段文字，包括喺佢眼中，應該點樣用呢啲技巧，甚至係點樣喺唔同嘅風格應用呢啲技巧。我覺得比起直接睇呢本書，睇佢寫嘅嘢更加有用，例如點樣用3 Chord Major喺一首歌裡面，適當咁用Minor 6可以令到旋律有更多彈性。佢仲喺其他空白嘅位上面寫咗佢自己嘅一啲事，同埋佢嘅心境。於是我連喺上文學堂，甚至下晝都繼續睇呢本書，我覺得呢本簡直係一本神書。甚至喺放學之後，我竟然自己坐咗喺Canteen睇書，我點會估到我都有呢一日吖。

「劉星隨，你睇緊咩呀？」毛子蘭問我，果然Canteen係一定撞到毛子蘭嘅地方。
「神書呀，呢本嘢簡直就好似《九陽神功》咁！」
「你當自己張無忌咩？」毛子蘭笑我。
「唔係呀，呢本嘢成十年冇人借過，點知又會無啦啦畀我喺圖書館搵到。佢仲寫咗好多Note喺上面，你睇吓。」我畀本書佢睇。

「咁樣唔啱㗎，就算想寫Note都唔應該喺學校啲書到寫字㗎嘛。」
「算啦，佢寫嘅嘢畀作者寫嘅更加有用呀。」
「我冇見過你咁認真睇書，你啲書全部都勁新，好似冇揭過咁。」
「我只係上堂留心啫，所以係可以唔使睇書嘅。」

「你考試考成點呀？」毛子蘭問我。
「科科都差唔多囉。你一定考得好好啦，中四啲嘢都唔係好難啫。」
「嗯⋯⋯都算唔錯啦。」
「做咩考得唔錯都咁嘅樣嘅？」

「我都唔知⋯⋯好似唔開心咁。」
「咁咪即係你唔鍾意囉。」
「吓？」
「你好鍾意讀書咩？」

「又唔係嘅，不過考高分啲未來會多啲選擇啫。」
「我覺得呢，畀太多選擇自己，反而未必係好事，做自己想做嘅選擇，唔係就已經夠喇咩？」
「嗯。」

毛子蘭之後就返咗去做嘢，而我就繼續睇緊本神書。

＝＝＝＝＝＝

呢本神書竟然連佢自己嘅校園生活都有寫低，甚至有講到佢畀女同學當做男神嘅事，仲精彩過本身嘅Music Theory。

我甚至帶住本書出街睇，今日去夾Band嘅途中我都有睇本書。

而家嘅星期六，我哋都間中會去The Echo夾Band，但係我每次都係打畀達仔，因為完全唔夠膽打畀Tina。上次佢就咁啱冇返工，所以冇見到佢，但係今日Tina就有返工，而且仲著條短裙。

今日佢哋個個都遲到，而我因為廢事蝕鐘，所以自己上咗去先。

「做咩咁耐唔嚟呀？」我一入到去Tina就問我。
「因為嚟嗰陣，你咁啱唔喺度吖嘛⋯⋯」
「留咗間大房畀你，反正冇人Book。」Tina笑笑口咁講。
「多謝。」

「你啲朋友呢？」
「遲到囉，都冇人準時嘅。」
「咁我陪你一陣吖。」

Tina跟咗我入房，然後就望住我Set嘢，真係勁緊張，未試過咁樣同一個唔熟嘅女仔獨處，因為太緊張，我成枝結他跌咗。

「你做咩好似好驚咁嘅？」Tina笑住咁講。
「冇呀⋯⋯」我連把聲都有少少震。
「我哋唱歌吖。」Tina突然咁講。
「唱⋯⋯歌？」

「唱《目黑》好冇呀？」
「好⋯⋯」

「～黑色眼睛沿途與你有過一幀風景～」

原來佢唱歌都幾好聽，而且把聲好甜，佢甚至可以做埋和音，同佢合唱好有畫面，有種好似真係喺目黑區嘅感覺。

「你唱歌好好聽喎。」我同Tina講。
「普通啫，你唱得好啲。」
「唔好講笑，我真係覺得你唱得好好喎。」
「咁多謝你啦。」

Tina突然間哄到好埋，搞到我心跳得好快⋯⋯

「喂劉星隨，你夾Band係咪為咗溝女㗎？」
「緊係唔係啦，我係因為想夾Band而夾Band。」
「咁就好喇。」
「咩呀？」

原來Tina上一個男朋友都係一個Band仔嚟，Tina畀佢嘅才華吸引，所以成日幫佢，但係最後個男仔就出軌，所以佢唔想再見到啲為咗溝女而扮Band仔嘅人。

「我對音樂係認真㗎！我哋雖然而家仲係一隊冇人識嘅Band，不過我會繼努力⋯⋯」
「過多幾年，可能我會鍾意你都唔定。」Tina甜笑住咁講。
「吓？！」
「你啲朋友到喇，下次再一齊唱歌啦。」

Tina就係咁出咗去，究竟佢咁講係咩意思呢，佢唔係鍾意我呀嘛？我喎⋯⋯雖然TIna喺MK妹之中，真係算靚嗰批，但係我對佢完全冇感覺，而且同佢一齊會好緊張，就連啱啱一齊唱歌都有啲唔自在。

同埋，而家嘅我只係想夾Band，愛情嘅嘢隨緣啦⋯⋯

我記得神書入面都有講過，佢因為冇膽同心儀嘅女仔表白，所以選擇咗寫歌畀佢，之但係當寫完嘅時候，個女仔已經同咗其他人一齊，所以愛情嘅嘢，都係隨緣啦⋯⋯

（Tbc.）

41 - 新年假

話咁快就到咗新年假，呢個喜氣洋洋嘅節日，最啱就係留喺屋企，因為茶餐廳年三十晚先收爐，所以啲咩貼揮春同準備全盒都係我同家姐負責。

我自己都幾鍾意過新年，當然唔係因為有利是呢啲啦，係因為得新年我哋先可以一家人齊齊整整咁過，我哋爸爸媽媽佢哋兩個平時大部分時間都留喺「流星記」，放假都好少一齊放，所以新年可以一齊過，就要好好咁珍惜喇。

今年嘅年初一，我一如以往，一起身就同爸爸媽媽逗利是。

「細佬，祝你學業進步、快高長大。」爸爸媽媽派緊利是畀我。
「唔好嘥晒啲錢買結他呀。」媽媽同我講。
「唔買住啦，啱啱先換咗弦。」
「爸爸媽媽，身體健康、龍馬精神。」

我喺廳睇緊電視播嘅新年節目，有班藝人唱緊《財神到》，以前都冇留意，原來《財神到》首歌都幾Rock，唔係講我哋而家定義用晒Distortion嘅Rock，係好似Beatles年代嗰種真正嘅「Rock and Roll」。雖然搖滾樂喺現代音樂入面，已經有愈嚟愈多嘅種類，但係喺香港，Rock好似就等於Distortion同電結他，反而真正嘅「Rock and Roll」喺好多人眼中，根本就唔搖滾。

其實我自己一開始都係咁諗，覺得Rock就係Distortion同電結他，但係隨住接觸多咗唔同嘅音樂，我會話「搖滾」呢個詞語已經唔係解做「Rock and Roll」，佢反而變成咗一種精神，一種反抗嘅精神。

而我亦都一直喺度搵緊我想做到嘅音樂風格，究竟「黑色西炒飯」嘅歌應該係點呢⋯⋯

因為下晝先會出街食飯同拜年，所以冇嘢做嘅我又拎起結他嚟練習。神書度有講到佢會將結他轉Eb Tuning，即係將所有弦都調低半度。因為佢鍾意嗰種聲，覺得比Standard Tuning更加Rock。我試咗用Eb Tuning，但係就唔覺得有好大分別，只係彈B Key嘅歌會方便好多，可能我枝結他比較乖，音色冇咁惡，所以分別唔大。

最新我練緊速彈，因為無論點彈，我都玩唔到《自動勝利》個Solo，明明見Sky彈得好輕鬆，我都唔明點解我彈唔到，不過唔知係咪天份問題，真係練極都彈唔到⋯⋯睇嚟都係疊埋心水做個Rhythm結他同主音算喇。

今日我家姐部電話不停咁響，應該係佢啲Friend係咁Send Message畀佢，而我就只係得「黑色西炒飯」個Group會響。

「喂家姐呀，你電話係咁響呀，你開靜音啦。」
「你夠彈結他嘈住我啦。」
「點同呀，我要練習吖嘛！」
「你戴耳機啦！」

「你兩個留返初三先好嗌交呀。」媽媽走嚟叫我哋靜啲。

太一喺「黑色西炒飯」個Group同大家講恭喜發財，估唔到佢呢個日本仔反而最重視呢啲傳統。Sky之後就開始Send長輩圖出嚟，樂少就Send咗啲搞笑改圖出嚟。

我將我哋個Group名改咗做「黑色西炒飯－搖滾天下！」。

既然要「搖滾天下」，第一步就係要作多啲歌，神書入面有寫佢作曲嘅方法係用音符表達心境，就好似貝多芬喺《給愛麗斯》入面就表達緊貝多芬因為唔敢表白而不斷徘徊嘅心理。

＝＝＝＝＝＝

夜晚嘅時候，我哋一家出咗去同班親戚食飯，因為每年只係見幾次，其實唔算好熟，所以我同佢哋都冇咩偈傾⋯⋯

不過我見我表哥著咗件Nirvana T恤，唔通佢都鍾意聽Nirvana？我抱住呢個疑問開口問佢。

「表哥，你鍾意Nirvana？」
「咩呀，你講件衫？我唔知喎我見個個都著先買咋，潮牌嚟？」
「唔係呀Nirvana係一隊Band嚟，可以話係Grunge嘅先驅。」
「哦⋯⋯我諗住型先著咋。」

其實好多人都好似表哥咁，著Band T只係因為型同埋潮，有好多人甚至唔知隊Band點讀，或者唔知係一隊Band。Nirvana就係其中嘅佼佼者，因為佢哋本身喺西方世界好出名，亦都有唔少潮人著，於是香港就好多年輕人會模仿佢哋而著NirvanaT恤⋯⋯

「哦，原來讀Nirvana呀，我一直都唔知點讀。」我家姐加入咗我哋嘅對話。
「係呢，英文書都冇教過呢個字。」表哥答佢。
「我鍾意嗰個韓星都著過呀，我仲諗緊係咩名牌。」家姐講。

結果佢哋就變咗喺度傾邊個明星有著呢件T恤，估唔到嚟到香港，Nirvana只係一個喺普通人眼中嘅潮T⋯⋯

無論係Rock and Roll定Nirvana，根本都冇人care背後象徵係咩，所以話吖「香港係冇樂壇」。

因為同嗰邊傾唔到，所以我就同返呀妹傾偈，不過佢就突然問咗我一個問題。

「哥哥，你識唔識彈Bass呀？」
「唔係好識呀，做咩咁問？」
「我睇緊套漫畫，講個男主角彈Bass，有啲想學啫。」
「咩漫畫呀？」

「《她愛上了我的謊》。」
「搵個Bass手做主角咁得意？」
「係呀，好好睇㗎！」
「咁你想學？我可以叫我個Frined教你嘅，不過佢都應該未可以教人。」

「咁算啦，遲啲再算。」

《她愛上了我的謊》係一套日本漫畫，大概係講男主角本來係可以出道嘅樂隊Bass手兼作曲人，後來因為唔滿意唱片公司要佢哋假唱之後退團，又突然對一個自己嘅Fans，即係女主角一見鍾情嘅少女漫畫。

估唔到原來Bass手都可以咁型，因為呀妹講完我就開始咗睇漫畫，估唔到又幾好睇。而且男主角彈Bass嘅原因都幾有趣，係佢爸爸喺樂器鋪買錯咗，原本係想買結他畀佢⋯⋯

就係咁，我新一年嘅頭幾日就係練結他同睇漫畫咁度過喇。

（Tbc.）

43 - 長洲之旅（2）

甜豉油同Simmy喺廚房洗緊菜，Simmy同時問緊甜豉油嘅戀愛意見。

「會長，你覺得我同Sky哥哥有冇可能呀？」Simmy問緊甜豉油。
「應該冇。」甜豉油答。
「吓，點解呀？」
「你嘅True Love應該仲要等3年。」

「但係Sky哥哥真係好靚仔呀，彈結他又型，平時懶懶閒，但係讀書又勁喎，不如我試吓追佢啦。」
「我諗你都係唔好嘥時間啦。」

Simmy繼續喺廚房偷偷地望住Sky。

＝＝＝＝＝＝

雖然話就話打邊爐同BBQ，但係主要都係我同樂少喺出面燒嘢食，話要BBQ嘅太一就走咗入去打邊爐。

「喂阿錘，不如我哋都收爐啦，反正都冇人燒嘢食嘅。」
「唔好啦，我哋透得好辛苦喎。」
「咁呀，你加油啦，我入去打邊爐。」樂少講完就走咗入去。
「喂！」

 結果得我一個寂寞咁燒嘢食，於是我叉起咗隻雞翼，一路喺度唱：「～燒雞翼我鍾意食～」。

「燒多隻畀我吖。」毛子蘭講。
「你出嚟做咩呀？」
「佢哋叫我陪你喎。」
「唔使喎，我可以自己燒㗎。」

「咁我返入去㗎喇。」
「咁又唔好嘅。」

我幫毛子蘭燒佢隻雞翼。

「返入去打邊爐唔好咩？」
「但係透咗好耐爐喎，依家收爐咪好嘥囉，仲要買咗包炭。」
「唔好計呢啲啦。」
「咁起碼都燒埋啲雞翼同牛排啦。」

「咁我幫你手啦。」
「原來你都係靈異學會。」
「係『占卜星相靈異與魔法學會』呀！」
「睇你唔出，原來你都鍾意占卜。」

「其實我唔信㗎，不過我覺得小悠同Simmy好認真，所以就加入囉。」
「竟然係咁呀，佢哋有冇幫你占卜呀？」
「有⋯⋯不過我都唔信。」
「我記得甜豉油講過我哋係『黑色之火』，我而家都仲未明，佢又話你係咩呀？」

「好似係⋯⋯流星雨。」
「F4呀？！～陪你去看流星雨落在這地球上～」我笑住唱。
「你唱得咁難聽點做主音呀。」
「超～」

呢個時候，樂少又出咗嚟。

「喂兩位，咁浪漫呀？要唔要返入去一齊打邊爐？」樂少講。
「燒埋雞翼牛扒就返入去啦，快啲幫手。」

於是我哋三個燒晒啲嘢就返入去。

「吖！我唔記得燒棉花糖呀。」
「就咁食咪算囉。」太一講。
「燒棉花糖真係好好食㗎。」

喺一片歡笑聲之中，我哋嘅打邊爐之夜就結束咗。

之後因為我哋都眼瞓，所以我哋就行返去東堤，其實夜晚嘅話東堤真係好恐怖，連風吹過都覺得好驚。

「你哋有人拍我膊頭？」行到半路太一突然間問。
「冇呀。」我哋個個都話冇。
「唔係喎，好似係有人拍我喎。」太一繼續講，佢把聲已經震晒。
「吖！」太一大叫。

「係我呀。」甜豉油出嚟講。
「嘩，你嚇鬼咩！」太一講。
「你漏咗部電話呀。」
「唔該。」

「喂太一呀，你送返人返去啦，好危險㗎。」樂少講。
「係呀，冇錯喇咁夜。」我講。
「要我之後自己一個返嚟？」太一好驚咁講。
「唔驚啦，畀啲信心自己。」樂少講。

之後太一就陪甜豉油行返去，不過佢就好似驚驚青青咁。而我哋就急急腳咁返房，因為東堤真係太恐怖。

「戀愛真係好呀！」樂少講。
「咩呀？」我問。
「你睇唔出咩？其實太一對甜豉油一定有啲嘢。」樂少好肯定咁講。
「吓？唔係真事呀嘛。」

「阿錘你，會唔會太遲鈍呀。」Sky講。
「連Sky都知？」
「根本佢對甜豉油就有Feel。」樂少講。
「我完全唔知喎。」我講。

我完全唔覺得佢兩個有啲咩，定係我真係太唔敏感呢？不過太一好似一開始就幫田善悠改咗個花名，等陣先⋯⋯係喎，佢就係因為同甜豉油一齊先開始叫毛子蘭做小蘭，原來係咁！我終於明喇。

「阿錘你咁樣點寫情歌呀？」樂少講。
「吓？」
「創作係要戀愛㗎！」

我記得神書入面都有提過，「戀愛」帶咗好多靈感畀佢，佢甚至試過為咗拎靈感，隨便搵咗個人拍拖，不過我就做唔出喇，點可以同個自己唔鍾意嘅人拍拖㗎。

「不如咁啦，下首歌我哋就作首情歌啦。」樂少講。
「都好喎。」Sky講。
「情歌？」
「通常做情歌先會紅㗎，香港人就係咁現實㗎喇。」樂少講。

「好啦，最多交畀我寫詞啦，我諗阿錘你應該寫唔到情歌。」樂少好有自信咁講。

我電話突然收到個Message係毛子蘭嘅。

「你哋返到去未。」佢問我哋。
「返到。」

原來上次教職員晚宴之後，我哋都冇Send過Message。

＝＝＝＝＝＝

第二日，走之前我哋再喺長洲留咗一陣，周圍行吓，Sky就話想去沙灘，太一就話想去張保仔洞，而樂少就話想去買蝦醬，所以我哋就分開行程，我就諗住搵間鋪食吓野。

之後我就send咗個Message問毛子蘭有咩做，佢哋話去咗影相，於是我就自己喺附近遊蕩。我路過一間Cafe，聽到有啲結他聲，好似有人唱歌，所以就入咗去，Cafe入面唔係好多人，計埋我有六個食客，不過得一對男女有認真聽歌，其他人都係食緊嘢。Cafe最入嘅地方就係唱歌嘅位置。

我再望向歌者，竟然見到個好耐冇見嘅人⋯⋯呢個人係Silas。

我個心震咗一震，因為真係估唔到⋯⋯

究竟佢呢幾年發生過咩事，點解會突然之間失咗蹤，又點解會無端端喺長洲呢度出現，我懷住呢種心情欣賞佢嘅表演。

我聽住佢唱歌，感覺同五年前有啲唔同，唔係因為冇咗Full Band，得一枝木結他，而係曲風唔同晒，再冇嗰種用生命歇斯底里唱歌嘅感覺，取而代之嘅係⋯⋯有啲Indie？我唔識形容，有啲似AMK嘅唱腔。

佢一路唱，我一路諗起五年前佢比我嘅衝擊，令我拎起結他嘅嗰個人，而家就喺我面前，但係好似變咗另一個人咁⋯⋯

（Tbc.）

44 - 夏天雪人

「多謝大家，我係『夏天雪人』，下次再唱過！」Silas咁講。

咩「夏天雪人」呀？佢改咗名咩？定係我認錯人？唔係，我冇可能認錯！佢把聲根本就一樣。

Silas唱完之後就走咗，於是我決定追出去搵佢。

「喂⋯⋯」其實咁叫佢好似有啲冇禮貌，但係我想叫停佢先。
「咩事呀？你想我Encore？我見你頭先聽得好入神。」Silas講。
「你係咪Silas呀？」我問佢。

Silas先係擘一擘大眼，然後笑一笑：「嘩，竟然有人知我以前個名，你係？」


「我⋯⋯我叫⋯⋯劉星隨，我以前喺學校聽過你唱歌，之後我就去咗學彈結他，而家就夾緊Band，我隊Band叫『黑色西炒飯』。」
「你係寧華仔？」
「係。」
「多謝你記得我喎。」Silas講完之後又開始行走。

我叫住佢：「你呢幾年你去咗邊呀？」

「我？喺長洲囉，我依家喺度住㗎。」佢轉身答我。
「點解你唔繼續做音樂呀？」
「我有做呀，不過係用『夏天雪人』個名之嘛。」
「吓？」

「我有YouTube Channel㗎，記得Subscribe呀。」Silas笑笑口咁講，然後就走咗。

我即刻上網Search「夏天雪人」，點知又真係搵到個YouTube Channel，佢Uplaod咗109條片，但係竟然得221個人訂閱，我即刻撳入去聽佢啲歌⋯⋯

其實⋯⋯都唔差嘅⋯⋯只係比較另類，我聽咗幾首，風格似係Indie Folk同Dream Pop，旋律一啲唔易上口，不過就有種迷喺入面，同我識佢首歌嘅Rock曲風已經唔同晒。

點解會由Silas變咗做「夏天雪人」，佢嘅音樂點解會變晒。

＝＝＝＝＝＝

無幾耐之後，我就會合咗佢哋，估唔到「占卜星相靈異與魔法學會」嘅三個人都喺度，唔通又係咁啱撞到？於是我哋就一齊搭船出中環。

「喂，我啱啱見到Silas呀，仲聽咗佢唱一首歌⋯⋯」我同佢哋講。
「嗰個Silas？你偶像喎。」樂少講。
「嗯⋯⋯但係佢好似變咗另一個人咁。」
「即係點呀？」

「好似唔係On Show嗰個人咁，佢由一個好Rock嘅Band仔變咗做好似AMK咁。」
「咩係AMK呀？」
「AMK係香港Indie Pop始祖，當年喺Indie界好出名，其實我都係早幾日先識，因為本神書有寫。」
「哦～」樂少咁嘅反應，就代表佢其實聽到一頭霧水。

「總之就係無論佢嘅音樂定散發出嚟嘅氣質都好似變咗囉。」
「邊有人會五年都一樣㗎，你都變咗啦。」

雖然Silas仲有做音樂，但係已經唔係我當初鍾意嘅嗰種Rock and Roll，其實佢做咩歌又關我咩事，只係我曾經憧憬嘅人，已經唔同咗⋯⋯

話說回程嘅時候，太一同甜豉油兩個自己坐咗喺後面，而其他人就瞓晒覺，有冇咁眼瞓呀⋯⋯咁樣諗之後冇耐，我就瞓著咗。

「起身呀，劉星隨！」叫我嘅係毛子蘭。
「到喇，咁快嘅？」
「快啲啦，佢哋落晒船喇。」
「吓？竟然唔等我？」

「你快啲起身呀！」

就係咁，我哋一行人就平安返到中環喇。

「死仔包！個個都唔等我！」
「你瞓到死咗咁呀，我哋諗住等你再搭多次去長洲。」樂少講。
「頂你咩！」
「阿錘你，自己唔早啲瞓啫，我一上船就瞓咗啦。」Sky講。

「咁我上船未眼瞓吖嘛，話說太一去咗邊呀？」
「同會長走咗喇。」Simmy講。
「吓？佢哋一齊咗喇。」
「唔係，佢哋都住佐敦呀。」

「哦～」
「太一個死仔吖！肯定同甜豉油有啲嘢。」樂少激動咁講。
「由佢啦，又係你話創作要戀愛嘅。」

之後我哋就各自返屋企，我即刻就攤咗落床，準備瞓覺。

不過我又突然間心血來潮，打開「夏天雪人」嘅歌嚟聽，而家佢嘅歌、主要寫一啲好文青嘅嘢，好似咩《夏天會浴掉的雪人》、《搭扶手電梯要記住左行右企》、《如果你要拖手請不要在深水埗》、《記得覆人Message》呢啲。

講起Message，我係咪要問吓毛子蘭佢哋返到去未呢⋯⋯於是我拎起電話，喺WhatsApp「輸入中⋯⋯」。

「返到去未？」咁問好似唔係咁好⋯⋯
「你返到去未？」其實又差唔多⋯⋯
「返咗屋企未？」咪一樣⋯⋯
「返到」呢個時候我竟然撳錯掣⋯⋯

大鑊，我未打完喎⋯⋯

點知呢個時候毛子蘭就已經覆咗我：「我都返到」

明明諗住問吓佢㗎嘛，點解好似變咗我同佢報到咁㗎⋯⋯

＝＝＝＝＝＝

2014年2月10日

放假嘅時間總係過得特別快，話咁快又到咗返學嘅日子。今日係同之前等放假嗰排好唔同，老師為咗追教學進度，上堂都好Chur，甚至有時要我哋補課添。

「我哋呢個禮拜放學係咪夾唔到時間夾Band呀？」
「我星期二、四補中史。」太一講。
「我同阿錘就星期三補地理。」樂少講。
「我星期五放學要畫SBA呀。」Sky講。

「咁即係得返今日？」
「其實我一陣都要去開會呀。」樂少講。
「我都要學日文呀。」太一講。
「咁即係星期六日夾？」

「星期六好冇呀？我星期日想休息下。」Sky講。
「咁星期六，The Echo？」
「好呀。」

其實我都上去The Echo搵達仔，因為想問一啲關於Silas嘅事，喺我識嘅人入面，得達仔係識佢。

臨走之前， 我經過教員室，點知就見到副校長：「劉星隨！」 

「咩事呀副校？我剪咗頭髮喎。」我驚驚青青咁答副校長。
「我唔係見親你都鬧人嘅。」副校笑笑口咁講。
「咁係咩事呢？」
「嚟緊課外活動日，英文科有個活動，你得唔得閒唱首英文歌畀啲師弟師妹聽呀？」

「吓，我喎。」
「我見你上兩次唱歌都OK呀，你冇信心？」
「你想我哋隊Band一齊唱？」
「又唔一定要成隊Band嘅，我淨係要人唱歌咋，你自彈自唱啦。」

「哦⋯⋯」

副校長講完就返咗教員室。等陣⋯⋯我做咩應承佢呀，我自己點唱呀？我會怯㗎喎⋯⋯仲要唱英文？

（Tbc.）

45 - 《Good Riddance》

「就係咁囉，你哋話我點唱好喇，不如你哋都一齊去英語日啦。」我喺SU房同佢哋講。
「阿錘你掂嘅，英文歌有幾難吖。而且我ECA DAY要喺學校搞校園Running Man呀，幫你唔到。」樂少講。
「我就要去歷史轉物館做Case Study呀。」太一講。
「我就要去Miss Lui搞嘅網絡作家分享會呀。」Sky講。

「吓，咁即係我要單飛？」
「主音單飛好正常啫，練習吓啦！」樂少講。

ECA Day即係課外活動日，每年大約有4次左右，每一堂嘅時間會縮短，Lunch TIme以後嘅時間就會進行「課外活動」。今年SU其中一個重頭戲係就校園版Running Man，樂少作為成員之一，一定要參加啦。太一就得到難得嘅外出參觀機會，Sky就去作家分享會，咁我點算好呢。

淨係諗唱咩都已經唔係咁易，我聽親嘅英文歌一係就係啲Rock Band歌，得我一枝結他唱咩好呢⋯⋯

經過一輪篩選之後，我揀咗Green Day嘅《Good Riddance (Time of Your Life) 》同Coldplay嘅《Yellow》，仲有Justin Bieber嘅《Baby》。

揀《Baby》就係參考Miss Lui用搞笑取勝，而《Yellow》就係我好鍾意嘅歌，不過個Range對我嚟講有少少高，而《Good Riddance (Time of Your Life) 》就係聽Green Day嘅時候無意中發現嘅一首歌。如果認真揀應該唔會係唱《Baby》，所以都係《Yeallow》同《Good Riddance》之間揀。

第二日，我去咗音樂室練習，呢個時候樂少入咗嚟。

「揀好唱咩歌未呀？」
「《Baby》、《Yeallow》、《Good Riddance》三揀一。 」
「Riddance係咩意思呀？」
「類似擺脫包袱之類啦。」

「唱嚟聽吓先啦。」

「～Another turning point, a fork stuck in the road～」

我唱緊嘅係 《Good Riddance》，其實我都對首歌幾有感覺，大概就係有種「船到橋頭自然直」嘅感覺，歌者希望每個人都會有一段美好嘅時光。

「幾好聽喎，中間段結他都好啱你彈，掃Chord最啱你啦。」

作為一個Rhyhtm結他手，掃Chord就係我嘅生存之道， 《Good Riddance（Time of your life）》入面，有一段弦樂嘅Solo，但係我就改咗做一段純粹掃Chord嘅Music Break，其實都幾好聽吖。

「咁就一於揀《Good Riddance》啦！」

因為星期五就要唱，得返聽日同後日練，時間都幾急。

＝＝＝＝＝＝

學校嘅另一邊Sky同Emma一齊做緊VA科嘅資料搜集，因為VA除咗藝術技巧，都好講對藝術史同埋唔同風格嘅認識，佢哋兩個今日就整理緊「藝術研究」。

Sky其中一份作品，主題係《思念的感覺》，Sky想用抽象派嘅風格呈現佢眼中思念係咩感覺。

Emma好奇問：「其實《思念的感覺》係咩意思呀？」
「我都唔知呀，每個人嘅答案都唔同。」Sky笑笑口咁講。
「咁你嘅答案係咩呀？」
「望住⋯⋯月亮嘅感覺。」Sky輕輕咁講出嚟，但係就冇再解釋。

Emma點點頭，好似已經明白，所以都冇再問落去。

「點解你呢排好似彈少咗結他嘅？」
「因為冇表演呀，阿錘又要單飛。」
「吓？阿錘單飛？」
「講笑咋，佢邊捨得離開隊Band吖，阿錘畀何副校捉咗去唱歌呀。」

「聽日嘅英語日活動？阿錘會做表演呀？」
「係呀，Emma你呢？你參加咩呀？」
「我去做義工呀，幫啲流浪狗沖涼。」Emma好似好興奮咁。
「你有冇養過狗呀，我就因為覺得要每日帶佢哋散步好麻煩，所以就冇養過。」

「冇呀，不過啲小動物好得意㗎。係呢，咁Sky你呢？」
「好似係咩網絡作家分享會呀？」
「Miss Lui朋友嗰個？」
「係呀。」

Emma繼續做佢嘅「藝術研究」，再偷偷望住認真嘅Sky。

＝＝＝＝＝＝

2014年2月13日

「阿錘你，練成點呀？」樂少問我。
「OK啦，但係啲英文好似仲係好Hong Kong Style咁。」
「口音又真係好難改嘅。」

雖然話就話我哋香港人由細開始學英文，但係口音方面就好奇怪，同啲外國人硬係唔同咁，如果要學好英文可能真係要去外國讀返幾年書先⋯⋯講起外國讀書，我又諗起太一件事，太一畢業之後，係咪真係會走呢⋯⋯

「係喎阿錘，你要練咬字，不如搵小蘭啦，我記得佢啲口音幾好聽㗎。」
「又好似係喎，佢有時會負責喺英文早會嗌咪。」

然後，我就係食晏嘅時候搵毛子蘭，呢個鐘數佢通常都會喺Prefect室，所以我就落去搵佢。

「毛子蘭，你放學得唔得閒呀？」我問毛子蘭。
「咩事呀？」
「想搵你幫手呀。」
「幫咩呀。」

「想你教我英文咬字⋯⋯」
「你喎，做咩無啦啦練咬字呀？」毛子蘭笑住咁講。
「我聽日要唱英文歌，但係我嘅發音太過港式，所以唱得好難聽⋯⋯」
「聽日唱依家先學，你都得㗎喇。要畀人工我㗎，音樂室等我啦。」毛子蘭講完之後就出咗去當值。

「喂，幾多錢呀？」我問佢，但毛子蘭好似冇諗住理我咁。

放學之後，我就上咗音樂室練歌，呢個時候毛子蘭行咗入嚟。

「你要唱咩歌呀？」
「呢首。」我播咗原唱畀佢聽。
「咁你唱一次先啦。」

我又唱咗一次《Good Riddance》。

「你唱Another嘅時候，發音太用力喇，你聽多次原唱吖，佢唔會『AN．吖．打』咁㗎，係『An．other』只要『吖』輕力啲就會冇咁港式喇。」
「～Another Turning Point～」
「係喎，果然有啲料喎。」

然後毛子蘭就好細心咁逐個字教我發音，於是我就慢慢開始唱得似一個外國人喇。

「你聽日揀咗咩活動呀？」我問毛子蘭。
「整蛋糕。」毛子蘭好似好開心咁。
「係呀～咁你就聽唔到我嘅精彩演出喇。」
「可能你聽日會唱到走晒音呢。」

「超～其實都冇所謂啦，未必有人認真聽。」
「一定有㗎。」

我都希望有人肯聽我唱歌，不過⋯⋯我都唔知呀。

「聽日整蛋糕玩得開心啲呀！」
「緊係啦，你都要畀心機呀。」

（Tbc.）

46 - 2月14

2014年2月14日

2月14號，除咗係康慕會寧華中學嘅課外活動日，仲係一年一度嘅情人節，一班青春期嘅少年少年，又會點樣度過呢個日子呢⋯⋯

4B班嘅班房，有一個對於占卜、星相、靈異、魔法都有極大興趣嘅女仔－田善悠aka甜豉油，佢成立咗一個名為「占卜星相靈異與魔法學會」嘅組織，全個學會只有三個人，就係佢兩個好朋友－Simmy周海琦同毛子蘭。

今日田善悠同佢兩個朋友喺課室占卜緊。

「Simmy，你都係唔好送朱古力啦，Sky唔會鍾意你㗎。」田善悠同Simmy講。
「但係⋯⋯戀愛就一定要跟住占卜咩？點解我唔可以自己試吓呀。」Simmy講。
「我睇到嘅未來，你同Sky唔會有結果。」
「唔通我就唔可以試下爭取咩？我唔理係，我要送！」

「你唔信就算啦⋯⋯」
「唔好咁啦，小悠，你支持下Simmy啦，未試過未必唔得呢。」毛子蘭同田善悠講。
「小蘭⋯⋯你都唔信我？」
「唔係呀，不過畀Simmy試下都冇壞啫。」

「你哋自己決定啦。」田善悠安靜咁離開。
「都係小蘭你好啲，計我話會長一定係妒忌我同Sky哥哥。」Simmy講。
「唔會啦，小悠唔係呢種人。」毛子蘭講。
「咁又係。不過明明佢自己都有太一啦，都唔明點解係要信晒佢嘅占卜呀。」

「太一？係咩？」
「你咁都Feel唔到咩，我肯定會長同太一都對對方有好感。」
「我又真係睇唔出喎。」
「小蘭你就係咁唔敏感㗎喇，不如你都送朱古力啦。」

「你講咩呀。」

＝＝＝＝＝＝

5D班班房，有一班「激情對話」嘅成員，今日個個都Gel好晒頭，而且校服都燙得前所未有咁直。

「Mango、朱傑，你估我今日會收到幾多盒朱古力？」魔人問。
「肯定少過我啦。」朱傑講。
「你哋兩個都唔會有㗎喇，因為有我喺度呀。」Mango講。

呢個時候，樂少行入課室。

「嘩，做咩呀，個個Gel晒頭咁，去飲呀？」樂少講。
「今日咩日子呀？」魔人問。
「2月14號⋯⋯哦，情人節。唔怪得啦，不過你哋年年都咁㗎啦，咪又係一粒都未收過。」樂少恥笑佢哋。
「今年唔同㗎喇，我話晒都係Rapper Magic Man。」魔人講。

「係喎，聽講你識咗班Hip Hop友喎。」
「係呀，我哋依家係Bro嚟。」
「咩Bro呀？」
「Brother呀。係喎你Brother呢，又遲到呀？」

「阿錘話佢好似感冒，下晝先返喎。」
「唔驚啦，佢都應該唔會收到朱古力。」


呢個時候，有兩個低年級女同學入咗嚟，佢哋急急腳咁問人Sky坐邊，然後就放咗盒朱古力喺佢櫃桶。

「果然係Sky呀，原來真係會有人收到朱古力。」樂少講。
「睇住嚟啦，我嗰啲遲少少就會嚟。」
「睇吓點囉。」

Sky啱啱入到課室，然後就好自然咁趴低咗喺枱，完坐冇理過櫃桶入面有啲咩。

＝＝＝＝＝＝

小息嘅時候，Simmy鼓起勇氣去到5D班嘅課室，諗住送朱古力畀Sky。

「Sky可唔可以出一出嚟呀？」Simmy問。

「見係Simmy你，就算啦，平時我小息要瞓覺㗎。」Sky又出現日劇男主角嘅笑容，然後就跟咗Simmy出去走廊。

「Sky，送畀你㗎。」
「做咩送畀我呀？」Sky笑笑口咁問。
「Err⋯⋯希望你接受我嘅心意。」
「其實我唔鍾意食太甜嘅朱古力㗎。」Sky笑笑口咁拒絕咗Simmy。

「咁⋯⋯都係畀你啦。」Simmy堅持送畀Sky。
「做咩今日咁多人畀朱古力我㗎，我生日明明過咗㗎喎⋯⋯」

Sky拎出褲袋嘅朱古力，Simmy即刻呆咗，佢估唔到原來自己有咁多對手。

「Simmy你，可唔可以話我知點解咁多人送朱古力畀我呀。」
「因為⋯⋯鍾意⋯⋯你⋯⋯」

Sky望一望Simmy：「Simmy你，唔好鍾意我啦，我對你冇鍾意嘅感覺。」

Simmy即刻有一種心碎嘅感覺，估唔到Sky連朱古力都唔肯收。

「點解，點解要咁快拒絕我呀？」Simmy好傷心咁問Sky。
「因為我⋯⋯心裡面已經有個人喇⋯⋯」Sky咁答。

Simmy自己一個強忍住眼淚，拎住自己盒朱古力離開Sky，而Sky喺Simmy走之後，輕輕咁唞一啖氣，之後就望住下面嘅操場。

「好少見喎，小息竟然唔喺課室瞓覺。」Emma喺走廊行近Sky。
「係Emma呀，你唔會都係嚟送朱古力畀我掛。」Sky笑笑口咁問。
「你講咩呀？送畀潘sir都唔送畀你呀。」Emma開玩笑咁講。
「潘sir好似結咗婚喎，Emma你，唔可以咁做㗎。」

「我知呀，頭先個女仔同你表白？」
「係呀，原來依家表白會送朱古力。」Sky又笑笑口咁講。
「唔係呀，因為今日情人節，所以通常會送朱古力畀鍾意嘅人。」
「原來係咁呀。」

「Sky你真係咩都唔知喎。」

小息嘅鐘聲終斷咗Sky同Emma嘅對話，佢哋亦都各自返去自己嘅課室。

＝＝＝＝＝＝

田善悠參加嘅課外活動係歷史科Miss Au所帶隊嘅歷史博物館之旅，因為唔同年級嘅學生都會參加，所以太一呢個歷史科嘅學生都有出席。

田善悠自己一個喺博物館入面睇展望，呢個時候太一見到自己一個嘅田善悠，主動行過去搵佢。

「甜豉油，今日做咩咁靜嘅。」
「冇嘢呀。」
「通常女仔話冇嘢，一定係有嘢啦。」
「都話冇嘢咯。」

田善悠自己繼續行，太一就跟住喺佢後面。

「都話我冇事咯，你唔好跟住我啦。」
「冇呀，我睇展品之嘛。」

太一就係咁繼續跟住田善悠。

「我同Simmy嗌咗交呀。」田善悠話畀太一知。
「點解呀。」

田善悠將件事講畀太一知。

「咁點解你係都要相信占卜、星相、靈異同魔法呢？」太一問。
「因為我每次睇到嘅都一定會發生，我唔想佢會唔開心。」
「甜豉油，你太睇少Simmy喇。我知你想保護Simmy，但係有時受傷唔一定係壞事嚟。而且我都唔相信宿命論，我覺得只要夠努力，一定可以人定勝天，話唔定Simmy會成功呢，可能唔係依家，但係唔排除有一日Sky會鍾意佢㗎。」
「但係我睇到嘅畫面，從來冇錯過。」

「唔係錯定啱嘅問題呀，係明知失敗都起碼要試過。」

（Tbc.）

47 - 感覺

「各位同學，將可可粉倒入去攪勻，然後再放入托盤就可以喇。」蛋糕班老師教緊整朱古力Brownie。



毛子蘭好留心咁聽緊老師嘅講解，佢似乎對整甜品有好大嘅興趣，雖然一直有嘗試喺屋企自己整甜品，但係除咗佢爸爸之外就唔敢畀其他人食，連佢嘅好朋友都冇試過，因為一直擔心自己嘅技術唔夠好，所以今日就特別留心。



「老師，我想問應該要雲喱拿先定落雞蛋先？」毛子蘭問。

「冇所謂㗎，不過加雞蛋先會易攪啲。」老師講。

「唔該。」



毛子蘭好快咁整完咗佢嘅Brownie已經可以拎去焗。



「嘩小蘭，你整得咁快嘅。」5C班嘅咩咩講。咩咩同毛子蘭都係寧社嘅社幹事，咩咩亦都有同劉星隨一齊跑社際接力。

「我都唔係好快啫。」毛子蘭講。

「有冇諗住整畀邊個食呀？有六個喎。」

毛子蘭諗咗一諗：「冇呀，可能畀一個Simmy，佢今日好唔開心。兩個就留畀爸爸同媽媽，我自己食一個，仲有要畀一個要留畀小悠，淨返嗰個就⋯⋯未諗到。」

「咁不如畀呀龍啦，佢應該會好開心。」

「社長？唔好啦，我同佢其實唔係咁熟。」

「係咩，我覺得呀龍對你特別好㗎，你冇發現咩。」

「唔覺喎。」

「咁又係嘅，如果今日無啦啦送嘢食畀啲男仔，一定會以為係鍾意佢，男仔就係咁膚淺。」

「哈哈，又真係嘅。」



毛子蘭將蛋糕放入焗爐之後，要等大概三十分鐘，呢個時候，毛子蘭心諗面有一個諗法。



「咩咩，你可唔可以幫我睇住個爐呀，我想出一出去呀。」

「去邊呀？」

「英語閣，因為好似有人表演唱歌⋯⋯」毛子蘭有啲怕羞咁講。

「你唔會講劉星隨呀嘛？佢今日病咗冇返。」

「吓，唔會掛。」

「今日上退修課嗰陣都唔見佢，5D班啲人話佢感冒喎。」



毛子蘭好似有啲失落，聽到劉星隨病咗，佢竟然有啲唔開心。



「佢練咗好耐㗎⋯⋯」

「你都可以落去睇吓嘅，可能佢下晝有返呢。」



毛子蘭最後都係離開咗家政室，準備行去學校嘅英語閣。

＝＝＝＝＝＝

呢個時候嘅另一邊，Sky參加咗Miss Lui舉辦嘅網絡作家分享會。



「司徒天，估唔到你都會嚟喎。」Miss Lui講。

「我一直都有睇小說㗎，而且我都冇其他活動想去。」

「咁你要留心啲喇，今日呢位作家係我大學師兄，好勁㗎。」

「好呀。」Sky笑笑口講。



呢位網絡作家筆名叫馬卡雲尼，因為寫嘅網絡小說最近公布會拍成電影，所以成為咗紅極一時嘅網絡作家。



「好多謝Miss Lui請我嚟同大家分享⋯⋯小說嘅時代同人物都可以係假，但係情感就一定要真實。」馬卡雲尼一路分享佢做作家嘅心路歷情。



Sky坐喺課室嘅後排，佢一直有聽作家嘅分享，但係視線一直都係望住Miss Lui，作家好似留意到Sky一直望住Miss Lui，於是佢就同Sky講：「後排頭髮有啲長嘅同學，對你嚟講小說係一樣咩存在呀？」



「我覺得⋯⋯係感覺⋯⋯」Sky咁答。

「我鍾意你嘅答案，小說講到尾都係講故事，而故事最重要嘅就係畀到讀者可以共鳴嘅感覺。」



Miss Lui聽住Sky嘅答案，似乎有啲出乎佢嘅預料，估唔到Sky會講出一個咁獨特嘅答案。



分享會完咗之後，馬卡雲尼同Miss Lui傾咗一陣，而Sky就喺遠處偷偷哋咁望住佢哋。



冇幾耐之後，Miss Lui就送馬卡雲尼離開，Sky喺馬卡雲尼就咗之後就去搵Miss Lui。



「Miss Lui你，同佢拍過拖？」Sky問Miss Lui。

「你講咩呀，緊係冇啦，佢其實就快結婚喇⋯⋯」Miss Lui有啲吞吐咁講。

「原來係咁呀。」



「感覺呀嘛？」Miss Lui微微笑咁望住Sky。

「其實我，都唔知答咩好，所以隨便諗啲嘢答囉。」Sky又係笑笑口咁講。

「都冇講錯嘅，好多創作都係講感覺，你哋玩音樂都係啦。」

「嗯，冇錯呀，我彈結他嘅時候，都係靠感覺。」

「好喇，放學快啲走喇，Miss都要做嘢喇。」

「我一陣仲要畫SBA呀。」

「咁你加油喇。」Miss Lui準備返去教員室。

「吖，Miss Lui⋯⋯你⋯⋯食唔食呀？」Sky拎出佢背囊嘅朱古力。

＝＝＝＝＝＝

今日嘅課外活動仲有一班同學，去咗動物義工中心幫流浪狗沖涼。5A班嘅陳爾欣Emma就係其中一位參加者。



Emma好開心咁幫一隻唐狗沖涼，但係因為一直都未養過狗，所以Emma有啲束手無策。



「唔好直接用花灑呀，佢可能唔鍾意咁大水㗎，你咁樣用條毛巾包住花灑，佢哋就冇咁驚喇。」Rachel同Emma講。



「係喎，唔該晒。我係5A班嘅Emma呀。」

「我係5B嘅Rachel呀。」

「你有養狗㗎？」

「以前囉，佢走咗好多年喇。」

「Sorry呀。」

「唔使Sorry喎，咁多年。」



Rachel同Emma喺幫狗仔沖涼嘅過程傾咗好多嘢，包中亦都包括Sky嘅事，包括Sky家姐嘅事。



「原來係咁呀，Sky佢一直都冇同我講過呀。」Emma講。

「咁又冇咩必要提起嘅，每個人都有啲嘢唔想講畀人知㗎嘛。」Rachel講。

「所以佢就畫《思念的感覺》。」

「你係講佢嘅SBA？」

「係呀，佢同我講係望住月亮嘅感覺。」

「月亮呀⋯⋯？」



「Sky佢就係咁奇怪㗎，成日講啲冇人明嘅嘢。」Rachel講。

「其實我好似明⋯⋯但係又唔肯定⋯⋯」Emma講。

「即係咩意思？」

「即係⋯⋯Er⋯⋯算啦，我都係估吓啫，可能唔啱㗎。」

「睇嚟你，好似幾了解Sky喎。不過唔好鍾意佢呀，Sky只會令你受傷⋯⋯」Rachel咁講。



Emma顯得有啲緊張，但係又冇特別講啲咩。



同一時間，帶隊老師宣布：「今日嘅活動完結，冇需要返學校嘅同學可以自行離開。」



「我要返學校畫畫呀，我走先喇。」Emma同Rachel講再見，然後就返學校。


（Tbc.）

48 - I had the time of my life

冇理由我會病㗎喎，明明我一直都好健康⋯⋯因為朝早好唔舒服，又攰又頭暈咁，所以我即刻去睇醫生。

如果係平時，我一定會直接唔返學，瞓喺屋企休息，但係今日要表演，一定要去到，我要唱歌！所以我叫醫生唔好開有睡意嘅藥畀我，等我可以撐到下晝唱歌。我喺屋企休息咗半日，已經好返啲，應該勉強可以唱到歌，好彩嘅係喉嚨冇事，只係有少少痰。

但係唔知係咪食咗藥，我好似有啲手震⋯⋯我呢一刻只係希望唔好彈錯，因為今日得我自己一錯就收皮⋯⋯

可惡！點解今日先嚟病！

我Lunch Time嘅時候，戴住口罩返到學校，今日我第一個搵嘅係何副校。

「劉星隨，你病咗仲返嚟？」
「因為要表演吖嘛。」
「如果你冇咩事，我都可以畀你唱嘅，有冇發燒呀？」
「冇呀。」我好平淡咁講。

其實我Feel到自己係有少少燒，可能唔係好高，我諗係99度左右，我諗我可以撐到兩個半鐘嘅⋯⋯

雖然好似冇晒力咁，但係我都係靠意志力將個AMP搬咗去英語閣，為嘅只係唱好《Good Riddance（Time of your life）》呢首歌。

今日嘅呢個活動係英文科安排畀低年級同學嘅活動，主要會有人做吓畫劇同用英文傾偈，本來我好似都要用英文講吓嘢，但係副校就話我病嘅話可以唔使，只要唱歌就可以。咁就太好喇，我本來都唔係幾想用英文分享，所以淨係唱歌，我反而輕鬆咗唔少。

我喺表演緊畫劇嘅時候，去咗後樓梯練結他，手感好似慢慢返緊嚟，冇再手震，而且聲音嘅狀態都已經冇問題。好彩啫⋯⋯下個就到我表演。

「Next performance, Let's welcome Ash Lau from Class 5D, He is going to sing《Good Riddance(Time of your life)》By Green Day.」MC幫緊我做Opening。

「Good afternoon everyone，I am Ash from 5D, I will sing 《Good Riddance(Time of your life)》，hope you will enjoy。」我做咗個簡單嘅自介，其實同MC講嘅嘢都差唔多。

喺我準備唱之前，我竟然見到毛子蘭，估唔到佢會嚟，乜佢唔係整緊蛋糕咩？點定係我有幻覺呢？

「～Another turning point, a fork stuck in the road～」

隨住我掃結他Chord，我開始唱。

「～So make the best of this test, and don't ask why～」

因為毛子蘭琴日嘅幫手，我嘅改字好咗好多，起碼唔係咁Hong Kong Style自啦。

「～It's not a question, but a lesson learned in time～」

呢個時候，我竟然開始諗起啲歌詞，我都估唔到自己今日會咁想唱，明明我一直都只係想夾Band，甚至我唔覺得我係鍾意唱歌，但係唔知咩原因，我就係想唱好佢。

「～It's something unpredictable But in the end, it's right～」

冇咗樂少佢哋喺度，其實我都有啲唔慣，始終我都未試過自己一個唱歌。不過我諗今次唱歌一定幫到我，喺未來一定會有用。

「～I hope you had the time of your life～」

「Time of your life」講得冇錯，享受過程真係會有唔同嘅感覺，夾Band之後，我終於搵到自己最鐘意嘅嘢，我唔再係嗰個追趕住Silas嘅人，我想做音樂，我想夾Band，我想同『黑色西炒飯』一齊表演。

去到結他嘅Music Break，我冇好認真咁數拍子，我甚至知道有啲位我彈錯咗，不過唔緊要啦，最緊要係「I have the time of my life」。

雖然唔知觀眾諗緊咩，甚至我諗班低Form唔知歌詞咩意思，但係我由佢哋嘅表情睇到，佢哋係明白我唱緊咩。我仲肯定咗一樣嘢，就係毛子蘭佢真係喺度，唔係我有幻覺。

「～I hope you had the time of your life～」

「Thank you very much, hope you have the time of your life！」我講完之後就同副校講想去抖吓。

英語閣同Canteen唔係距離好遠，所以我自己一個去咗Canteen休息，而喺Canteen當然就會見到毛子蘭啦。

「做咩跟住我呀⋯⋯咳咳⋯⋯」我開始有啲咳。
「病就唔好返啦，咁辛苦。」
「因為我想彈結他，同埋想唱歌，你特登落嚟㗎？唔係整蛋糕咩？」我同毛子蘭講。
「焗緊蛋糕呀，差唔多夠鐘。」

「多謝你落嚟聽⋯⋯咳咳⋯⋯你都係行遠啲，我可能會傳染你。」
「咁我返上去先，蛋糕應該就得。」
「好呀，我一陣完咗活動，放好Amp就會走⋯⋯咳咳⋯⋯」
「嗯。」

毛子蘭然後就走咗，我覺得好攰，好攰，可能食咗藥，所以眼皮好重，好重⋯⋯慢慢，我就瞓著咗。

「劉星隨！起身呀，返屋企瞓啦。」毛子蘭同我講。
「你唔係話上去咩，仲喺度嘅？」
「你瞓著咗呀，啱啱樂少同太一幫你擺返好結他同Amp喇。」
「竟然係咁呀，我瞓咗幾耐呀？」

「我諗半個鐘掛⋯⋯」
「原來咁耐呀，咁我返屋企喇。」
「喂！」毛子蘭叫住我。
「咩事呀？」

毛子蘭拎住舊蛋糕問我：「你食唔食呀⋯⋯我⋯⋯整多咗⋯⋯」

「好⋯⋯呀⋯⋯」

我試食毛子蘭個朱古力Brownie，一食落口，我條脷好似畀電電中咁，無論係口感定味道都好完美。

「我人生未食過咁好食嘅嘢㗎！」我之後即刻食晒舊蛋糕。

毛子蘭見到我個樣，笑得好開心。

「畀多舊我食吖，真係好好食呀。」我好真心咁講。
「有冇咁誇張呀。」毛子蘭好似想忍住唔笑，但係好明顯佢忍唔到，有啲似上次有個小學生問我攞簽名咁。
「畀多舊我啦！」
「唔得呀，要留畀小悠同Simmy仲有我父母，畀半舊你啦。」毛子蘭搣咗半舊Brownie畀我。

「真係好好食呀，我講真㗎。」
「多謝。」毛子蘭微微笑住咁講。

如果我冇記錯，今日好似係情人節，毛子蘭請我食朱古力Brownie，係咪即係⋯⋯

（Tbc.）