【搖滾準備】《我們的某校勁BAND》【重開】

106 - 「湯姆瑞斗的日記」

時間嚟到十一月中，聖誕舞會同JSBA個Show都已經確認咗會舉行，所以我哋幾個都有一直Keep住練習，但係因為嚟DSE愈嚟愈近，有時連星期六都要補課，夾Band嘅時間都慢慢少咗，搞到就連我都開始有啲考試嘅壓力。

呢排樂少上堂都偷偷哋玩電話，間唔中總會露出一個發晒姣嘅笑容，問親佢都話係傾緊JSBA啲嘢，但係點解又會係咁笑㗎呢？

「你搞咩呀？中咗六合彩？呢排上堂都笑笑口嘅。」我同樂少講。
「咪JSBA啲嘢囉。」樂少雙眼微微擘大，眼仔碌碌咁。
「傾Band Show都咁開心？你以前搞學生會一路做一路鬧人喎。」我講。

樂少咩都冇答我，佢選擇咗用一個懷住友善又天真嘅笑容回應我，個樣就好似《忍者亂太郎》個新丁咁。

都唔知佢搞咩，不過見佢好似好開心，個人散發住一種正能量，我諗咁樣應該算係一件好事嚟嘅。

而關於我哋嘅新歌，我一直都覺得真係要寫一首情歌，好多樂隊要紅都會選擇情歌路線，連當年嘅Beyond都唔例外。不過又咁講，究竟寫一首甜蜜嘅情歌，定係苦情歌好呢？我卡住咗喺呢個位。

「我想寫首情歌呀。」我細細聲同樂少講，因為仲上緊堂。
「上次首《Special Thanks》唔係咩。」樂少撳住電話講。
「都話咗《Special Thanks》唔係情歌咯，佢係一首感謝嘅歌呀。」

明明都講咗好多次，樂少都係唔相信《Special Thanks》唔係一首情歌，雖然最開始我係想寫情歌，但係經過咗咁多次修改，首歌已經變晒樣。

「咁啦阿錘，你作一個好溫馨嘅旋律畀我，等我填一首情歌畀你睇啦。」樂少講。
「你上次都係咁講喎，最後咪又係我填。」我講。
「今次點同呢？我作完《選擇⋯⋯多一次》之後就學識咗填詞吖嘛。」
「咁⋯⋯我交畀你喇，聖誕舞會可以試吓唱喎。」

「就咁話啦，應該夠時間嘅！」樂少拍晒心口應承，係真係拍到心口有聲，搞到老師望住我哋。

＝＝＝＝＝＝

到咗Lunch Time嘅時間，我哋難得可以四個一齊食Lunch，最近因為補課嘅關係，連Lunch都好難齊人。

「係喇，JSBA嗰邊有每隊Band有20分鐘，我哋玩3-4首歌啦。」樂少講。
「呢個都算我哋第一個街外Show，要唔要全部玩原創歌？」我問。
「我哋勉強都夠歌喎。」太一講。
「係呀。」我講。

「不過咁喎，我哋4首歌都咁唔同，未必好。」Sky講。
「都係嘅，《懶》係Punk，《忍樣》係Hard Rock，《Special Thanks》就Pop Rock，而《選擇⋯⋯多一次》就偏向Indie啲。」我講。
「我覺得《選擇⋯⋯多一次》就留返先啦，首歌唔係好啱喺Band Show玩。」Sky講。

如果要帶氣氛嘅話，其他三首歌又真係會啱啲。

「咁《選擇⋯⋯多一次》就留返聖誕玩啦，聖誕都係差唔多要3-4首歌。」我講。
「好呀。」Sky笑笑口講。

因為我哋被委任咗做聖誕舞會嘅音樂總監，但其實基本上都係我負責，因為樂少又要搞JSBA，而毛子蘭同Simmy就淨係搵我，冇咩搵太一，Sky就好明顯都係唔會太鍾意搞呢啲嘢。另外，我仲邀請咗之前搵我嘅嗰隊師弟Band，雖然佢哋唔係夾咗好耐，但係畀啲機會班師弟接棒都要啦，我哋又就畢業，難得我哋開創咗「寧華」嘅搖滾之魂，一定要有人傳承落去。另外，仲有我哋嘅小Fans Keeley，佢都會唱一首歌，我就好期待，都想畀佢哋聽吓呢個女仔嘅歌聲。

＝＝＝＝＝＝

今日我亦都收到一個消息，係關於Silas嘅事，我拜托幫手嘅師弟已經查到結果，本來諗住幾日就查到，點知搞咗成個月，冇計啦學校啲機又舊，搵返啲資料本身已經好困難，更何況都過咗咁多年。

「我搵到喇，你講嗰本書真係一個叫孫凝雨嘅人借，佢同你係唯二兩個人借過。」師弟Harry講。

我當刻冇咩感受，因為我好早已經認定咗呢本嘢係Silas寫，估唔到教我最多同令我想夾Band嘅嗰個人都係Silas⋯⋯

「Harry，唔該晒你呀。」
「唔使講呢啲啦，不過點解你咁想搵出係邊個借呢？」

「嗯⋯⋯」我突然之間又好似講唔出原因，其實無論「作者」係邊個，我都唔會變，只係知道嗰個人係Silas，我就更加想令佢返嚟搖滾嘅世界⋯⋯

不過，佢既然一直都承受緊咁多嘢，我又可以做啲咩？

「呢本書會唔會好似『湯姆瑞斗的日記』咁㗎？」Harry問。
「吓？」
「佛地魔呀。佢留咗本書喺霍格華茲，然後好多年後就畀哈利搵到。」
「我知。我都有睇哈利波特嘅。」

撇除魔法元素之外，呢本書都真係有啲似「湯姆瑞斗的日記」，我喺入面搵到Silas嘅日記，睇到一啲佢親筆寫低嘅事，當然佢唔可以真係帶我返去佢嘅時代啦。我一直幻想書入面人會係個咩學生，我覺得佢係一個唔太識得同人相處嘅人，可能甚至有啲自閉症，不過我諗我同佢可以做到朋友，我哋嘅思考模式同價值觀有啲似，只係我唔認同佢為咗寫情歌會隨便搵人拍拖呢件事，無緣無故玩弄人哋嘅感情，喺我眼中係過分嘅事，再講⋯⋯我又憑咩咁做呢，好似Sky咁靚仔都話有啲機會吖⋯⋯雖然Sky都唔會⋯⋯

「又唔係嘅，我好奇咩人同我一樣咁鍾意音樂啫。」我同Harry講。
「咁你識佢嘅？」
「都⋯⋯算係啦，佢係一個獨立歌手。」
「如果你識佢⋯⋯不如請佢返嚟表演啦，聽講Christmas Ball都搵緊嘉賓喎。」

請Silas做表演嘉賓？好似有得諗喎。

（Tbc.）

107 - 下巴

今日我自己一個嚟到咗Rooftop，打算問炎爺可唔可以叫Silas嚟我哋學校做表演嘉賓，當然我有考慮過如果Silas繼續唱夏天雪人嘅歌，會唔會冇同學想聽，不過我心裡面有強烈嘅直覺，我覺得Silas返到嚟，佢一定會搵到啲嘢，我都會搵到一啲嘢。

今日Rooftop一樣係冇人，炎爺喺佢做嘢嘅位度食緊雪茄，成個Feel十足《教父》入面嘅黑道人物咁。

「炎爺⋯⋯我有啲事想搵你幫手。」我講。
「劉星隨。」炎爺嘴邊輕輕一笑，「我都覺得你差唔多喺時候上嚟。」
「係咁嘅，我學校嘅Christmas Ball想搵Silas嚟表演呀。」
炎爺呼出一口煙，「我幫你同佢講啦，不過佢未必想返去學校㗎喎。」炎爺眼定定咁望住我。

因為無論係Silas定夏天雪人都冇咩人識，所以炎爺都冇同我講咩收唔收錢嘅問題。

「聽完隻碟有咩感覺呀？」炎爺問。
「我聽完之後⋯⋯覺得佢根本就係天生嘅Band仔，Rock先係佢要行嘅路。」
「啱吖，我同意。」炎爺再吸一啖煙，「都話你會幫到佢㗎啦。」
「我又冇諗過要幫佢喎，我只係覺得⋯⋯佢應該要返去『寧華』行一轉。」

炎爺整熄咗枝雪茄，「你想去到幾遠呀？」炎爺問我。
「去到幾遠？我都唔知喎，我只係想繼續夾Band咋。」
「或者Silas都冇諗過要行到去邊，只係每行一步，就有架車喺佢面前，會車佢去下一個Location。你鍾意點行就點行啦，唔係有車一定要搭嘅。」炎爺講。

我發覺炎爺真係好鍾意講呢啲好似莫名其妙嘅比喻，上次嘅拋彩虹又係咁，今次嘅「上車論」其實我都唔明，介乎喺Get到同理解唔到之間。

「唱首歌嚟聽吓，唱你最有信心嗰首。」炎爺突然間叫我唱歌。

我最有信心嘅歌？一時之間，我又冇諗過呢個問題，我哋夾嘅幾首歌，我都已經好熟，唱《懶》應該最冇問題，唱《Special Thanks》我都可以，但係要揀最有信心⋯⋯

我拎起咗枝木結他，我唱咗我自己第一首作嘅歌⋯⋯雖然一句歌詞都冇，但係要揀我最有信心嘅歌，可能係呢首都唔定。雖然寫唔出歌詞，但係我有時都會彈返呢首歌，話晒都係第一次嘗試作嘅旋律，亦都係我覺得最啱我把聲嘅旋律。

炎爺合埋咗眼聽，而我亦都冇做咩多餘嘅嘢，只係好純粹，好真誠咁唱。

「幾好吖。好有你嘅風格。」
「我嘅風格？」
「你遲啲就會明㗎喇，流星係為許願嘅人而存在。」

炎爺又講咗啲冇人明嘅說話，成日話我遲啲會明，咁要遲幾耐先得喎。我一路擺返好佢哋鋪頭枝結他，一路睇緊Rooftop收埋嘅寶物，一大堆價值連城嘅結他同Effecter。

「下巴呀，唱歌嘅時候要控制好自己下巴，一定要鬆。」  
「下巴要鬆？」

估唔到炎爺會教我唱歌，但係下巴真係咁緊要咩？遲啲要認真咁試吓先得。

＝＝＝＝＝＝

又過咗幾日，關於樂少叫我作嘅Demo，我仲未有靈感，哼出嚟嘅嘢唔係同其他人啲歌好似就係冇記憶點，完全唔好聽。

「阿錘，首歌有未呀？我想快啲填詞呀。」樂少同我講。
「未有呀，呢擺都唔知點解冇咩Feel，一係你講吓你嘅諗法，睇吓刺唔刺激到我。」我講。
「咁呀⋯⋯好啦。其實JSBA嗰邊有個女仔，我覺得同佢一齊嘅時候好開心，好似傾咩都傾唔完，而且仲要好靚女喎。」樂少講。
「你個死仔吖，去開會都掛住溝女。」我開玩笑一嘢打落樂少個肚。

咁睇嚟，樂少已經完全放低咗Emma，我冇專登問起，不過見到好朋友咁開心，應該都要替佢高興，果然樂少都係嗰個為咗追女仔去夾Band嘅佢。

「咁追到喇？」我問。
「咁又未，了解緊啫，佢彈Keyboard㗎。」樂少講。

樂少幾佢哋相遇嘅過程講畀我聽，當然我聽得出佢加咗好多自己嘅Filter同幻想，我直頭聽到「粉紅色泡泡」，原來個女仔叫Kristine，石珈潁，係「田金拯」嘅學生，同樂少一齊聯絡能量飲品嘅贊助商。

樂少明明同Kristine識咗都未夠一個月，好似已經好熟咁，而且冇好似對住Emma咁怕醜，仲已經約過出街，雖然係去搞JSBA啲嘢。早知就唔問佢啦，一開口就冇停過，一路Keep住講Kristine，我今日成隻耳一秒都冇靜過⋯⋯

於是，我放學之後就自己一個人行街，諗住搵靈感。行行吓，我到咗上年嚟拎宣傳單張嗰頭，嗰次嘅「升學及就業輔導日」要用嘅資料就係我同毛子蘭一齊拎返學校，然後就有咗嗰次幫佢「頂罪」嘅事，毛子蘭打爛咗曹sir個獎杯，而我就無啦啦去咗頂，諗返嗰陣毛子蘭個樣其實都幾好笑。

原來唔經唔覺已經過咗一年，時間真係過得好快⋯⋯

不過靈感呢樣嘢，就唔係咁快就嚟到，唔嚟嘅時候，好似點都搵唔到，我見天都開始黑就返屋企。食咗少少嘢之後，我就攤喺床，唔覺意就瞓著咗。

而我亦都發咗一個夢⋯⋯

我再次打開眼嘅時候，望住個鐘，係12點正，即係我只係瞓咗兩個鐘多啲⋯⋯

不過我記得一個好真實嘅畫面，我好似揸住架太空船去到咗某一個星球，而隔離應該係一個同我一齊流浪嘅女仔，我哋穿梭喺太空，有識飛嘅豬、粉紫色嘅樹、數唔盡嘅星星⋯⋯呢個時候，我腦裡面有一段旋律走緊出嚟⋯⋯就好似係呢段冒險嘅主題曲咁⋯⋯

（Tbc.）

108 - 廢社令

呢個夢真係好真，而且段旋律都好深刻，我馬上就拎出我部電話記低咗段旋律，不過因為太熟悉，我懷疑緊呢首會唔會係人哋嘅歌，或者我有聽過，但係醒唔起，因為唔想造成抄歌嘅誤會，所以一定要確認咗同人哋唔似先得。

第二日返到學校，我畀咗段Melody「黑色西炒飯」佢哋聽，唔知佢哋會有咩反應呢？

「你哋覺得點呀？」我問佢哋。
「又幾好聽喎，似返首情歌。」樂少講。
「我都覺得幾好，有種私奔嘅甜。」太一講。
「私奔？」

太一嘅意思係話，首歌有種好似一對情人，想逃離世界，私奔到無人識嘅地方嗰種浪漫。不過太一呢個形容又幾似我琴日嘅夢境，夢入面嘅畫面就好似係兩個人一齊喺太空私奔嘅感覺。

「其實首歌係我琴晚瞓覺嘅時候，無啦啦走出嚟㗎，而嗰個夢就同太一形容嘅有啲似，不過私奔嘅地方係太空。」我講。
「喺夢入面作嘅？咁咪好似《Yesterday》咁。」Sky笑笑口講。

原來Beatles嘅《Yesterday》背後都有段故，Paul McCartney有一晚喺夢入面夢到咗《Yesterday》嘅旋律，佢起身就覺得好好聽，為咗唔好忘記，即刻就喺鋼琴前面彈出嚟，之後仲周圍問其他音樂人，去到一個月之後，佢相信旋律係自己嘅創作，唔係抄襲人哋，於是就成為咗《Yesterday》。

「咁呢個情況咪同我好似。」我講。
「阿錘你，睇嚟得到咗神嘅眷顧。」Sky笑笑口講。
「既然係咁，我就當首歌係我自己作啦。」我講。

雖然我好多時都會有一啲旋律喺個腦走出嚟，不過每次我都要再修飾，或者自己再慢慢諗過，而呢首歌就有一種好完整嘅感覺，好似成首歌一早已經喺我腦入面咁，完整到令我覺得我係聽過一首咁嘅歌。

「係呢，阿錘你夢入面個女仔，唔通係小蘭？」Sky問。
「咁我又冇留意喎。」喺我夢入面，我只係記得隔離嘅係一個女仔，樣就真係冇印象。

「好啦，我一於就填呢首歌，然後我哋Christmas Ball就唱呢首新歌。」樂少講。
「咁就等你份詞喇。」我講。

就係咁，我哋嘅新歌終於有眉目，希望樂少填得切啦，始終離Christmas Ball都唔係好多時間。

＝＝＝＝＝＝

今日放學前有週會，主題係咩我就唔知喇，主要應該係畀時間史校董講嘢掛。話就話係代理校長，但係好似咩都冇做過，淨係識得打壓學生會選舉，平時又鍾意講埋啲無聊爛Gag，真係希望鄧校長快啲返嚟。

「各位同學，上個月嘅Form Test成績已經出咗，相比起上年同時間，每個同學平均成績係每人低咗兩分，而且係每年下降兩分。所以我決定，由今日開始所有非學術嘅課外活動全部取消。」史校董喺台上面講。

台下反應嘩然，每一個人都好震驚，因為咁多年從來冇校長夠膽宣布取消課外活動。

「所有冇成績嘅校隊會解散，其餘嘅興趣小組同埋學會都會即日解散，學生會所舉辦嘅活動亦都會即時終止，包括聖誕舞會，學校唔會畀資源出嚟。希望各位同學由今日開始努力讀書，考好DSE。」史校董完全無視咗台下同學嘅反應，露出一個奇怪嘅笑容。

呢段說話令到好多同學都不滿起嚟，棋藝學會、搖搖學會、模型學會呢啲都全部要解散，冇成績嘅校隊都要解散，即係足球隊都要解散⋯⋯而且連學生會都被架空，Christmas Ball仲會即時終止⋯⋯咁學校點算好⋯⋯

呢啲情況，我哋「黑色西炒飯」都會受到影響，我哋而家唯一可以表演嘅午間音樂時段都會被取消。我留意到，好多老師嘅表情都難以置信，呢個決定，好大機會只係史校董佢一個人嘅決定，學校嘅其他老師、高層，應該都唔知發生咩事。

「咁Christmas Ball點算好呀？」樂少講。
「Christmas Ball已經算係小事喇，而家所有『非學術學會』都會被逼住解散，包括『占卜星相靈異與魔法學會』都會解散。」我講。
「學生會應該都唔知道有呢條『廢社令』，睇嚟史校董佢，想搞大件事。」Sky講。

因為事件嚟得太突然，根本冇一個人知道史校董諗緊啲咩，亦都冇人知道而家要點樣運作，係咪即係所有校隊、學會都即時會消失呢？週會之後，個個人都走去問甜豉油，今日包圍佢嘅人，比平時搵佢占卜嘅人多幾倍。

「係咪足球隊會冇咗呀？」
「象棋隊有冇得比賽？」
「Drama Soc冇得用活動室？」

一次過有幾十個人圍住甜豉油，成個Hall嘈到仲大聲過我哋平時夾Band。呢一刻，我哋冇得夾Band呢啲都已經係小事，其他同學嘅校園生活，甚至直頭被消滅，點解件事會發展成咁。

甜豉油作為會長，即刻去搵校董發生咩事，點知校董話要開會，已經搭車走咗。最大問題係連班老師都唔知係真定假，照計呢啲決定冇可能唔事先講畀啲同事知，咁突然其實班老師都冇咩做到。

不過啲同學都仲係拉住甜豉油嚟問，當佢畀人圍到冇得走嘅時候，太一衝咗埋去，用右手拖去咗甜豉油嘅手腕，兩個人一齊跑出禮堂。

到底發生咩事，面對呢個「廢社令」我哋又可以做啲咩呢？

（Tbc.）

109 - 「反對」同「唔支持」

因為太一好有型咁拖走咗甜豉油，我哋就嚟到咗熟悉嘅SU房，「魔靈閣」嘅內閣成員，同我哋「黑色西炒飯」就喺房入面。

「咁依家點算呀會長，校董係咪認真架？佢同廢晒所有學會冇分別喎。」Simmy講。
「我諗佢係講真，果然真係有大麻煩。」甜豉油講。
「我哋上去同史校董對質啦，咁做法好多人都會冇咗返學嘅意義，例如足球隊就好慘，我哋仲有一場波踢㗎。」太一好激動咁講。
「唔只校隊呀，仲有動漫研究社、電影學會、魔術學會，同我哋『占卜星相靈異與魔法學會』都要被廢呀。」Simmy呀。

房入面每個人都好不安，一個冇晒學會術會嘅學校，會係咩樣⋯⋯我哋都唔知，因為上年甜豉油佢哋好努力搞活動，所以今年又多咗好多學會，連「珍珠奶茶同好會」都有人搞，一日之內呢啲學會竟然全部要消失，學生會會點打呢場杖呢？

「一於直接對質啦，訴求一定要表達！」太一繼續講。

成件事同文化祭嗰陣一樣，我哋努力咗一年只係想做一場Show都畀副校長ban咗，我唔想見到其他同學都面對我哋嗰陣嘅無助。

「一於上去啦，點忍呀。」我講。
「好呀阿錘，我哋依家就上去！」太一即刻附和我。

正當我同太一諗住上去嘅時候，甜豉油就開聲，「你哋班中六喺度做咩呀，又唔關你哋事，要講都係我自己講就得，你哋幾個咪上去呀。」估唔到甜豉油竟然係趕我哋走。

「咁起碼都畀我哋上去做吓勢吖，多人啲好啲喎。」太一講。
「唔得呀，冇人可以上去。」甜豉油神色凝重、語氣強硬咁講，「學生會全部人唔畀行動同回應，等我諗清楚先。」
「又咩要諗呀，上去stop咗佢條屎橋先啦，邊有可能cut走校隊呀。」太一講。
「總之唔上得去。」甜豉油講。

太一塊面好似嬲嬲哋，佢一粒聲都冇出，自己行咗出去。

「喂太一，去邊呀。」我問，但太一冇答我。
「阿錘你，不如跟住太一先啦。」Sky同我講。

我大概估到呢個時候太一只會想上去教員室，我雖然未知甜豉油諗緊咩，但係既然佢係學生會會長，我都應該尊重佢，如果太一真係去搵史校董，我就應該要制止佢，於是我都跟住咗太一。

太一果然一路直上去教員室，「喂！太一！」我叫住佢。

太一終於肯停低，「甜豉油都唔知做咩，邊有可能仲等呀！咁唔合理，我哋應該要反抗，我哋唔係Band仔咩！」太一嬲爆爆咁講。

的確，我都認為呢件事係值得嬲，而且一定要反擊，作為一個Band仔，一個相信搖滾精神嘅人，一定唔可以容忍。不過如果貿貿然就開火，我唔知會點，今次又唔同上次文化祭，我哋而家根本冇計劃。

「不如都係返落去先啦，而家我哋都冇Point反擊。」我同太一講。

不過咁啱，史校董同何副校兩個就喺教員室出咗嚟，佢哋兩個望實我哋。

「劉星隨、張太一，你哋兩個上嚟做咩呀？」何副校問我哋。
「副校、史校董，點解要廢晒所有學會呀？」太一直接問佢哋。

大鑊，都係撳唔住太一，而家可以點呢？佢哋只要一直賴皮，話我哋成績差咗，我哋就駁唔到。

「咪講咗所有同學嘅成績都差咗囉，低咗兩分。」史校長講，佢仲舉起兩隻手指，懶得意咁講。
「只係兩分啫，使唔使連校隊嘅資助同Christmas Ball都cut呀！」太一講，語氣已經開始想爆佢哋。
「咩話？『只係兩分啫』？好似你哋兩個啱啱合格嘅學生，兩分就夠由合格變唔合格。史教授係想你哋都認真啲喺學業上。」何副校講。
「但係⋯⋯」果然太一都駁唔到。

「你哋快啲走啦，早啲返去溫書呀。」史校董講，佢同副校長兩個大模廝樣咁行過我哋面前，好似我哋只係Game入面嘅NPC咁。

「咁我哋而家點算呀？」我問太一。
「搞大佢啦！」太一講。

呢個時候，我仲未意識到太一到底想搞啲咩。

返屋企之後，我係咁睇學生會Facebook，想知佢哋有咩反擊，我見好多同學喺佢哋啲Post下面問，我諗甜豉油佢哋一定仲未諗到對策。

第二日，我同平時一樣時間起身，我一望電話，太一打咗38個電話畀我，同埋喺「黑色西炒飯」個Group講咗佢想做咩⋯⋯我睇完之後就覺得好大鑊，於是早餐都冇食，直接跑返學校，希望太一唔好搞到好麻煩。

因為我全程都跑嘅關係，我比平時早咗5分鐘返到學校。我即刻衝上一樓，果然最麻煩嘅事，已經發生咗⋯⋯

太一同埋一班受影響嘅同學塞住咗教員室，所有老師都企咗起門口⋯⋯太一嘅計劃係一早就返嚟「佔領教員室」，佢一放學就聯絡咗所有要被廢嘅學會，一行幾十人，約定咗要6點返學校，然後塞住教員室門口要求史校董「撒回」佢嘅決定。為咗唔畀人衝入教員室，佢哋仲手翹手咁築起咗一條人鏈，嗌住「撒回廢社令」嘅口號⋯⋯

「阿錘你咁遲㗎！快啲嚟幫手啦！」太一同我講。

呢個時候，Sky同樂少都已經埋咗位，所以我都加入咗。我哋呢條人鏈都幾堅固，暫時冇老師入到教員室。由於情況已經失去控制，副校長再次用佢嘅「開咪攻擊」，話要記我哋缺點。雖然對我嚟講，呢招已經免疫咗，但係總有啲人會驚，所以都走咗幾個人。

老師對呢件事就大概可以分兩種，就係「反對」同「唔支持」，反對派就當然係好似副校同曹sir呢啲一開口就話要記我哋缺點嘅老師啦，而「唔支持」嘅老師，就係好似李sir同Miss Lui呢類，心裡面我知佢哋撐我哋，但礙於身份，唔可以出聲，李sir都叫我哋自己睇路，而Miss Lui就仲有同我哋講笑。

眼見時間愈嚟愈近上堂，副校又開咪叫其他同學先去上堂，要完全無視我哋。我哋級嘅同學好多都乖乖哋返咗課室，都係嘅，我哋都中六邊有咩課外活動好玩吖，連「激情對話」班人都冇同我哋一齊，佢哋已經返咗上課室抄功課同瞓教。

史校董同副校叫晒所有老師去活動室，由得我哋喺度「罰企」，有啲同學眼見冇成效，已經嗌緊「散水」，但係太一就好堅持咁話要留守。老實講，我連早餐都冇食，又全速跑返嚟已經好攰，我都想走，但係又唔想太一自己喺度同校董佢哋撐，所以我都用意志力頂住。

（Tbc.）

110 - 哪裡怕表態

結果過咗一個上晝，我哋幾十人竟然都冇離開過，而且嚴格嚟講我哋已經曠課咗半日。Lunch之後，情況更加不妙，學校派咗李sir同文sir嚟叫我哋走。我係好唔想麻煩到李sir佢哋，但係一日史校董唔同我哋對話，我哋唔可以就咁走人。

就係咁，我哋佔領咗教員室一日⋯⋯到咗放學，副校搵咗班Prefect嚟睇住我哋，因為我哋唔走，變相罰埋班Prefect企，當然毛子蘭都喺度，上咗成日堂佢好似已經好攰，仲被我哋累到喺度呆企⋯⋯我都有啲內疚。

「喂太一，我哋聽日都要咁做呀？」樂少問太一。
「緊係啦，抗戰就係咁，畀啲鬥志！表態就係要咩都唔怕！」太一企咗成日都仲好有精神。

不過真係不得不服太一，一晚之間就Call到咁多人，而且好有毅力，完全冇退縮過。

「都幾好玩吖，又唔使上堂。」Sky笑笑口講。

我哋有輪班駐守教員室門口，畀同學食嘢同去廁所，仲有休息時間，Sky多數都去咗休息，我諗佢都堅持企咗一堂半嘅，不過係加加埋埋。

去到4點半，我哋今日嘅行動正式完結，太一好有火咁話聽日要繼續6點開始佔領教員室，不過其實我已經冇力聽。

「阿錘，你睇吓份詞。」樂少同我講。
「你今日成日都唔講嘢，就係喺度寫歌詞？」樂少今日好靜，佢自己企到最邊，我都冇留意佢搞咩。

「係呀，反正有你哋守住，我就緊係搵位唞啦。」樂少講。
「不過Christmas Ball而家都唔一定搞得成喎。」我講。
「咁咪留返JSBA個Show囉。」
「係喎，JSBA係校外活動，學校都冇權干涉。」

樂少份詞⋯⋯點講好呢⋯⋯都唔差嘅，不過又未夠好，雖然我自己都冇資格評人哋嘅歌詞，不過用普通聽眾嘅角度睇，就覺得有改善嘅空間。

「都唔錯吖，不過可以再改好少少。」我講。
「咁交畀你喇。」樂少講。
「吓？唔係要寫畀Kristine咩？」
「我哋一隊Band嚟嘛，你寫嘅咪即係我寫嘅。」

雖然幫佢執手尾有啲煩，不過係Band嘅嘢就冇事計啦，而且有佢呢份初稿，我只要修飾吓字眼，同埋改到啱我唱就可以，如果Christmas Ball搞得成，仲趕得切玩呢首嘅。

離開教員室條走廊之後，我哋落咗去SU房，點知甜豉油就唔喺度。

「吓？佢係會長喎，依家嚟玩失蹤？」樂少講。
「係呀，會長話有啲事要自己處理。」Simmy講。
「處理咩呀？我哋成日都冇上堂喎，佢作為會長咁樣走咗去。」樂少講。
「佢應該有啲嘢做緊嘅，只係冇話畀我哋知啫。」太一講。

太一呢個時候都有啲疲態，冇晒力咁放軟晒手腳。

「但係史校董同何副校完全唔理我哋，聽日再佔領都冇用喎。」樂少講。
「都要做㗎，班低Form睇我哋頭，佢哋先係最慘嗰班。」太一講。
「定係我哋都返去上堂呀？反正又唔關我哋事。」樂少講。

「緊係唔得啦，動漫soc、珍珠奶茶soc、甚至羽毛球隊、手球隊班人都爭取緊，你依家想掉低佢哋呀？」太一激動咁講。
「我又唔係呢個意思，只係連朱傑班人都返去上堂，我哋都要諗吓自己啦。」樂少講，「我今日係幫你先喺度企成日咋。」
「咁你咪返去上堂囉，我又冇要你幫！」太一應該真係嬲咗。

樂少同太一成日都鬧交，不過今次，好明顯兩面都有啲火氣⋯⋯我的確好支持太一嗰種熱血，想幫同學爭取嘅堅持，但係樂少都冇錯，我哋又唔算係受害者，而且好快就DSE，想聽書上堂都啱⋯⋯

「你哋一人少句啦，個佔領行動算啦，留畀我哋學生會搞。」Simmy講，佢都feel到太一同樂少關係好緊張。
「學生會肯做嘢，太一唔使6點返嚟啦。不過有啲人唔識對一齊佔領嘅人客氣啲啫。」樂少有啲發晦氣咁講。

太一都好似知自己講錯嘢，眼神有啲恍惚。呢個時候，SU房入面彌漫住一種揮唔走嘅負能量⋯⋯我想儘快離開。

「不如今日就咁先啦，我想返屋企先。」樂少講。

樂少第一個走咗，太一留咗係SU房，Sky出咗學校外嘅球場同排球隊班師弟練波。而我⋯⋯過咗去隔離嘅Prefect房。

「你哋聽日仲要咁做呀？」
「我諗係掛，我都想件事快啲完。」
「唔好話你哋啦。我哋Prefect都攰，無啦啦陪你哋『罰企』，依家Prefect隊都開始唔支持你哋嘅行動。」
「估唔到咁多人都無動於衷，係咪唔關自己事，就可以當冇事發生⋯⋯」

估唔到今日最令我心境平靜嘅係喺Prefect課同毛子蘭傾偈，佢因為同班Prefect講要點對付我哋都搞到好夜。

「你返去未？」毛子蘭問我。

「走喇，你要鎖門？」
「係呀。」
「咁一齊走？」
「好呀。」

今日嘅毛子蘭，好似好攰，所以我哋一路返去嘅時候，都冇咩講嘢。

＝＝＝＝＝＝

到咗第二日，我其實都想早啲返學校，點知又係瞓到唔知醒⋯⋯

今日太一同班師弟都係一早就佔領咗教員室門口，唔同嘅係老師都已經冇強行要返入去，反而係個個去晒會議室。Sky已經喺度，佢好似幾精神，反而樂少就未見人。

我拎出咗本簿出嚟寫歌詞，Sky就笑笑口問我：「阿錘你，搞緊咩呀？」
「樂少琴日填咗首新歌嘅初稿，我幫佢再改好少少。」我講。
「原來係咁。」

已經打咗鐘，仲未見樂少，唔通佢已經放棄咗？

「睇嚟樂少⋯⋯嬲咗我。」太一講，「我琴日語氣係咪太重呀？」
「少少啦，咁樂少講嘢都係幾晦氣嘅。」我講。
「我都係同佢say句Sorry啦。」太一講。

「唔使啦，我點會同你啲小學雞計較吖。」呢個時候，樂少喺樓梯口行咗上嚟。
「你話邊個小學雞呀。」太一講。
「邊個應咪講邊個囉。」樂少講。

佢哋兩個又繼續嗌交，不過咁就啱喇，即係兩個都正常返，而我見佢哋咁，都可以專心寫返歌詞。

雖然唔上堂係幾正嘅，大部分老師都有體諒我哋，不過依舊都係要我哋做功課，所以我同樂少都叫咗魔人佢哋拎功課落嚟畀我哋抄。明明對抗緊學校嘅極權，但係我哋就好似長期放緊小息咁，鍾意就捉吓棋、食吓嘢、最正係小食部姨姨又肯賣嘢食畀我哋。

今日都順利捱過咗，不過好明顯已經少咗啲人，我都有啲驚守唔住教員室⋯⋯有班低Form因為畀老師威逼利誘，已經離開咗我哋，都唔知我哋仲可以撐幾多日。

（Tbc.）

111 -  「司徒天⋯⋯唔好亂講嘢呀。」

自從「黑色西炒飯」佢哋搞「佔領行動」之後，已經過咗三日，學校都係未有人同佢哋對話，不過而家「寧華」嘅最高負責人史校董同何副校就開始擔心事件會愈搞愈大，所以就急住搵人解決事件⋯⋯

何副校搵到咗同「黑色西炒飯」亦師亦友嘅Miss Lui，佢同Miss Lui喺其中一間冇咩人用嘅活動室，寧靜嘅空氣、昏暗嘅燈光，令到呢間活動室，散發着一種危機感。

「Miss Lui，你同劉星隨佢哋好似好熟喎。」何副校輕輕托自己嘅眼鏡。
「佢哋隊Band有三個同學都係我教中文嘅。」Miss Lui講。
「你知佢哋幾個搞到學校而家幾麻煩㗎啦，我想你幫我處理好佢哋。」
「副校你嘅意思係⋯⋯？」

何副校長微微一笑，眼神睇落好友善，但埋藏住一絲嘅狡猾，「只要你幫我搞掂佢哋，份長約一定冇問題。」副校誠懇咁講。

Miss Lui面有難色，似乎唔知點做好。

「佢哋幾個壞學生，連記缺點、見家長都唔怕，唔通要我哋報警咩。搞大件事，校董會一定唔滿意，但係作為佢哋朋友嘅你，可能有方法呢。」副校長講。
「其實點解要cut晒同學嘅活動呢？課外活動對一個學生嘅成長係好重要㗎，透過課外活動佢哋可以搵到自己嘅興趣，甚至可以學識好多我哋都教唔到嘅嘢。」Miss Lui講。
「我哋上年嘅大學入學率跌咗5%，年年係咁跌，我哋好快降到落Band 3。加上出生率低，殺校潮總會有日嚟到，可能冇咁快嘅，5年⋯⋯或者10年啦。到時我就退咗休，但係你哋就有排捱喎，你都想繼續做老師掛。」副校長凝重咁講，「我都知班學生唔慣，但係都冇辦法啦，讀書先係佢哋最重要㗎。」

Miss Lui心裡面仍然唔認同副校同校董，但係作為一個新入職嘅老師，好需要一張長約嚟確保自己嘅未來，佢猶豫緊應唔應該為咗份約，而要「黑色西炒飯」佢哋放棄幫同學爭取權利。

「Miss Lui，我仲有幾年先退休，你份約又好似今年就到期，一個中文科老師嘅位，每年幾多人爭你知唔知唔？」副校長微微笑住咁講。

聽副校長咁講，Miss Lui知道佢其實冇選擇⋯⋯佢只可以乖乖哋去叫劉星隨佢哋撒退。

「咁啦，劉星隨佢哋要夾Band，就由佢哋啦，反正2月Study Leave之後佢哋都唔會返嚟，不過嗰班低Form，特別係你教嗰啲，我就唔想再見到佢哋唔上堂囉。」副校長離開活動室嘅時候，用對平底鞋發出嘅聲音，好似喺度嘲笑緊Miss Lui，話緊畀佢聽，喺學校嘅架構之下，佢係幾咁低層嘅員工。

Miss Lui，雷皓月。作為一個新入行嘅老師，第二年喺「寧華」教書，作為學校嘅低層員工，甚至未有「長約」。一心想教好學生，陪佢哋成長，點知偏偏呢份想做個好老師嘅心，就畀何副校利用，用下學年嘅教師合約威脅佢。

知道根本冇選擇嘅Miss Lui，自己一個人上咗去5樓嘅樓梯轉角位，即係最近音樂室嘅嗰條樓梯位。呢個位置，平時冇人會行近，而且好食風，係一個好好嘅「抖氣位」。Miss Lui上咗嚟，諗住吹吹風，可以冷靜個人⋯⋯點知忍唔住偷偷哋喊起上嚟⋯⋯

＝＝＝＝＝＝

喺教員室門口嘅Sky因為醒起VA有份功課要做，所以喺得閑嘅時候，上咗去5樓嘅VA室，點知Sky就聽到有人喊緊嘅聲，順住聲音嘅來源，佢見到Miss Lui偷偷喊緊。

「Miss Lui？你冇事吖嘛。」Sky問。
「冇事。」Miss Lui即刻抹走自己嘅眼淚，唔想畀學生見到自己脆弱嘅一面。
「做咩喊呀？」
「呢度大風呀。」

Sky察覺到Miss Lui嘅唔自然，佢心裡面估計應該係同「佔領教員室」件事有關。

「學校為難你？」Sky問。

Miss Lui冇出聲，只係繼續張眼淚抹走。

「佢哋要你叫停我哋？」Sky繼續問。

Miss Lui微微點頭，面色非常難為。

「我哋係咪唔可以繼續佔領呀？」Sky講。

原本Miss Lui嘅眼淚已經乾晒，但係Sky一開聲，Miss Lui又想再喊。見到Miss Lui喊嘅樣，Sky冇特別安慰，反而係同平時一樣笑笑口咁樣。

「你笑咩呀，司徒天。」Miss Lui又抹走眼淚。
「冇咩呀。」Sky笑笑口講，「我想問Miss Lui你嘅《我哭的理由》係咩啫。」

「《我哭的理由》係因為有個叫司徒天嘅學生，明明見到老師喊，都笑笑口咁囉。」Miss Lui講，似乎有Sky嘅安慰，Miss Lui情緒又平復返。

Sky見Miss Lui仲有少少眼淚喺眼角，拎出紙巾想幫佢抹走，但係Miss Lui阻止咗。

「我自己抹就得喇。」Miss Lui拎走Sky張紙巾。
「其實校長同你講嘅嘢，我聽到晒。」Sky講。

Sky指嘅係上年鄧校長叫Miss Lui要避忌啲嘅事，Miss Lui都意會到，所以兩個人突然之間都沉默起嚟。

「我本來諗住唔理你就可以⋯⋯點知最後都係做唔到，喺Miss Lui你隔離，我就覺得好開心。」
「司徒天⋯⋯唔好亂講嘢呀。」
「講吓笑啫。」
「你一畢業就知個世界好大，好多更好玩嘅嘢等緊你，知唔知呀？」

「嗯。」

Sky明白Miss Lui嘅意思，佢亦都知道自己而家只係Miss Lui嘅學生，所以選擇咗靜靜咁陪伴喺Miss Lui身邊。

「等我同佢哋講啦。」Sky講，之後就落樓梯，向教員室前進。
「司徒天，等陣呀！」就算Miss Lui叫住Sky，佢都照樣落樓。
「起碼今次畀我嚟幫你。」Sky回到同Miss Lui講。

＝＝＝＝＝＝

今日係我哋「佔領」嘅第三日，大家好似已經習慣咗呢種生活，返嚟就抄功課，Lunch就搵人買外賣，然後輪班食飯。而家仲淨返30幾人，學校都係冇派人同我哋傾，連學生會都冇行動，我真係唔知可以撐幾耐，但係我奇怪嘅係副校竟然冇嘈住話要見家長或者記缺點，反而係直接無視我哋，連班老師都係咁，硬有啲唔好嘅預感。

「阿錘、太一，我哋要完咗呢個行動。」Sky突然由樓梯行過嚟同我哋講。
「吓？點解呀？我哋咩都未爭取到喎。」太一講。
「冇錯呀，點可以話完就完喎。」我講。
「你哋覺得學校會理我哋咩？我哋堅持咗3日，咩回覆都冇。班師弟幾日冇上堂，而且⋯⋯已經有人因為我哋受咗好多不必要嘅壓力。」Sky講。

「我都想完呀！但係你甘心咩都冇爭取到就放棄咩？」太一問Sky。
「我哋再諗方法啦好冇？」Sky講。

我估唔到Sky都有呢一面，突然之間變到好理性，冇咗嗰種懶懶行嘅隨和。

「冇其他方法，總之史校董同副校一日唔同撒回佢哋嘅政策，我都唔退！」太一講。
「咁我走囉。」Sky講，「想走嘅跟我行！」Sky之後轉向同一班師弟講。
「喂⋯⋯等陣先吖。」我大嗌。

因為我哋起晒哄，我feel到班師弟覺得我哋好唔團結，佢哋都好似好徬徨咁，全部人都睇我哋頭，但係我哋自己又內亂，畀在我都唔知繼唔繼續跟好。

呢個時候，「你哋唔好嗌交啦。」Miss Lui都過咗嚟，Miss Lui見我哋咁都走過嚟阻止，咁我就明白，應該係Miss Lui有啲事，Sky先會咁堅持要停止佔領。

Miss Lui冇特別講咩，只係表達咗佢都希望我哋儘快完結呢次嘅行動，我諗學校肯定畀咗好多壓力佢。

（Tbc.）

112 - 「音樂好似同咩都有關，但又同咩都冇關。」

因為知道咗Miss Lui嘅難處，太一嘅態度都軟化咗，而且最細個班師弟，都已經走埋，今次嘅「佔領行動」可以話係徹底失敗⋯⋯再加上幾隊校隊嘅成員都放棄，手球隊冇留守、田徑隊都有幾個人走，我哋再撐都冇用⋯⋯

「我哋都係返去上堂啦。」樂少講。
「都冇辦法啦，唯有係咁。」我講，雖然我心裡面都唔想就咁結束，不過⋯⋯我哋都已經冇辦法。

太一係最唔想就咁完嘅人，明明除咗Christmas Ball，太一完全唔關事，佢大可以輕鬆抽身，由得副校長佢哋搞亂學校，點解佢要堅持到呢個地步⋯⋯我雖然都喺度，不過同太一比就差好遠，我係抱住走堂，同寫想寫歌詞嘅心態，當呢個行動係一個Break咁。當然我內心都係想反呢條廢學會嘅政策，不過我就肯定唔會做搞手，我只會盡力幫太一。

「咁⋯⋯完啦，我哋已經冇嘢可以做⋯⋯」太一輕輕咁講。

我印象中，我冇見過咁頹嘅太一，佢成日都係保持最高能量，每一秒都好精神同熱血⋯⋯

呢個時候，連Sky都冇辦法擺出一個笑笑口、懶懶閑嘅表情⋯⋯

「好喇，快啲去上堂啦，到中文堂喇。」Miss Lui講。

其實Miss Lui都支持我哋，呢點唔使懷疑，我只係估唔到學校真係會做出呢種事，逼Miss Lui轉態，佢心入面應該都唔好受。

＝＝＝＝＝＝

Lunch Time嘅時候，一切已經回復返正常，食飯嘅食飯、補課嘅補課，教員室門口又係一班冇交功課而畀人罰嘅同學，所有老師都返咗去教員室，只係已經冇人再提起啲咩「撒回廢社令」⋯⋯

而且，喺呢間消息流通咁快嘅學校，我知道咗班校隊出人嘅原因⋯⋯原來甜豉油同史校董私底下達成咗談判，幾隊校隊可以重新參加比賽，學校亦都會畀多啲資助。

知到呢件事之後，我同樂少都好嬲，覺得學生會同甜豉油出賣咗班同學。本來冇成績嘅校隊同所有「非學術學會」已經變咗命運共同體，但係甜豉油咁樣做就分化咗兩班人，等於係張「非學術學會」嘅同學踢走。唔通做咗學生會就捨得放棄「占卜星相靈異與魔法學會」咩⋯⋯

我仲未見到太一，不過佢知道嘅話，應該都同我哋諗法差唔多。

我同樂少去咗搵太一，點知已經唔見咗佢，樂少就估佢9成9係去咗SU房搵甜豉油，所以我哋都即刻落去搵佢哋。

「你點解要出賣班同學呀？」

未入到SU房，我哋已經聽到太一大嗌，我同樂少挨咗喺門口準備入去。

「都話唔關你哋事啦，學生會嘅負責人係我！」甜豉油反駁。
「動漫soc、珍珠奶茶soc班人點呀？你淨係幫班校隊，咁算解決問題咩？」
「總之，我已經做咗決定，呢個係我作為學生會會長嘅決定！唔關你事呀！」甜豉油講。
「咁『占卜星相靈異與魔法學會』呢？你捨得就咁廢咗佢呀？」太一講。

「唔係咁做，班校隊點練習呀。佢哋冇幾多時間咋，你哋足球隊都有比賽呀。」甜豉油把聲好似有啲飲泣。
「咁就可以放棄另外一班人呀？」太一嬲爆爆咁講。

憤怒嘅太一打開門，因為我同樂少挨住咗度門，所以一時失咗平衡，差啲跌低。

太一怒氣匆匆咁出咗去，而我就望到SU房入面嘅甜豉油隻眼紅晒，諗住問佢有冇事，佢又話想靜吓，於是叫我哋走人，所以我同樂少就去咗Canteen。

＝＝＝＝＝＝

Canteen同平時一樣，都係好多人Hea緊，等緊打鐘返上課室上堂。

「原來甜豉油係為咗班校隊先『出賣』其他人，咁都唔算壞嘅。」樂少講。
「但係太一唔係咁諗呢。」我講。
「如果係我都未必會咁做，不過理性啲諗，甜豉油咁做係啱嘅。」樂少講。
「其實我哋係咪真係冇嘢可以做呢？」我講。

「你又想講咩呀？」樂少問。
「冇咩嘅，我係覺得我哋作為音樂人，係呢啲時間對社會可以有啲咩貢獻啫。」
「音樂好似同咩都有關，但又同咩都冇關。」
「你呢個講法，又好似錯唔晒。」

雖然樂少嘅講法有啲道理，但係我就唔係好想認同。「音樂係世界嘅語言」，我相信音樂可以將自己嘅感受到想法更好咁傳遞畀人。

我望住Canteen嘅大鐘，距離Lunch Time完結，仲有10分鐘，突然之間，我有一個念頭。

「樂少，幫我手吖。」我同樂少講。

我嘅計劃係，趁住仲有10分鐘，決定再搞「午間音樂」，而我要唱嘅歌，係我哋嘅《忍樣》。雖然以Canteen嘅Set Up好難做到本身嗰種Feel，不過時間唔多，唯有都儘量試吓。

我哋即刻Set好樂器，準備開始唱歌，呢個時候Sky都返到嚟，所以結他就交咗畀佢，樂少就打Cajon。

「大家好，我係6D班嘅劉星隨，大家都知道呢幾日學校發生咩事啦，我想趁呢個機會，唱首歌畀大家聽。」

「～太多忍讓太多太多忍樣～」

呢幾日我發現到嘅係，只要件事同自己冇關，大部分人就唔會出聲反抗，但係咁樣只會令到班「忍樣」愈嚟愈過分，點解考試成績差咗一定同課外活動有關？我上年就係為咗玩Show，要補考合格而喺一個禮拜入面，將兩年嘅地理書內容由頭學過，為嘅就係所謂嘅「課外活動」，即係夾Band！

「我都明白好多人覺得唔關自己事就可以唔理，但係咁樣嗰班被打壓嘅人就會覺得好孤獨，今日可能係cut課外活動，第2日可能係cut食飯時間，或者加書簿費。每多一條規則，我哋就退一步，好快有日我哋會失去自己應有嘅權力！」我講。

我都唔知自己做咩，我講咁多嘢，有冇人會回應呢？而且下一步又應該點做呢？再返去「佔領教員室」？點算好呢⋯⋯

果然⋯⋯成個Canteen靜晒⋯⋯場面變到好尷尬。

突然，一陣拍手聲喺後面傳出嚟⋯⋯

「講得啱呀，劉星隨。」

呢把聲⋯⋯係嗰個男人－鄧校長，佢終於都返嚟。

（Tbc.）

113 - 校長的回歸

我望向後面，係英國返嚟嘅校長，佢著住一件利物浦波衫，拎住個喼入嚟。

「校長，你又會返嚟嘅？」我問校長。
「我喺英國有啲悶，所以就提早返嚟見我班學生囉。」校長講。

如果有睇過《哈利波特》就知，鄧不利多校長有隻鳳凰跟住，咁啱佢件利物浦波衫都有隻好似鳳凰嘅利物鳥，好似有啲太過巧合。

「我大概知道依家咩情況，你哋放心啦。」校長講，「不過你哋『佔領教員室』呢件事真係太過火，記住下次唔好咁做喇。」
「哦⋯⋯」

終於等到校長返嚟，唯一可以撳住副校同校董嘅人就得佢一個。呢個時候，同樣係利物浦球迷嘅樂少就同校長傾緊波經，所以我已經行開咗，慢慢返上去上堂。

諗返轉頭，我哋係咪真係做得過火咗呢？雖然話非常時期要用非常手段，不過⋯⋯算啦，都冇得「選擇⋯⋯多一次」，我哋都已經做出咗嘅嘢，已經係歷史，點改都改唔到。

明明校長咩都未做，但係我內心就好似輕鬆晒，覺得所有嘢都會自動解決，呢啲可能就係一個領袖嘅魅力，只要存在，就可以幫人注入信任同安心嘅力量。校長喺度，我相信所有「廢社令」都會取消，而且音樂室，應該都可以用返。

「阿錘？你終於返嚟上堂嗱？」呀輝問我，因為都幾日冇上堂，所以佢都好好奇。
「係呀，校長返咗嚟，所以我諗我哋唔使再搞抗爭行動。」我好輕鬆咁講。

之後嘅一堂係英文堂，即係何副校嘅堂，我有啲好奇，究竟佢會點對我哋幾個「壞學生」。

到咗上英文堂嘅時候，真係估都估唔到，行入課室嘅唔係副校長，係嚟代課嘅TA⋯⋯我諗副校應該係畀校長捉住，處理呢幾日嘅動亂。雖然校長都算係個明白事理嘅人，但係校董會喺架構上都係校長嘅上司，而史校董喺校董會入面都有啲地位，所以最後我哋會唔會變咗「問題學生」都仲未知。

結果⋯⋯今日好安全咁渡過咗，冇額外嘅廣播，亦都冇學校通告或者Email，睇嚟要等到聽日先知件事點發展。

不過可能係個人嘅心情放鬆咗，我好似進入咗「靈感爆發期」，如有神助咁，寫咗兩日嘅歌詞，突然間通晒，樂少寫嘅嗰份詞，我慢慢就搞掂咗。

＝＝＝＝＝＝

第二日，果然今日校長已經出現咗喺早會，同埋已經換上咗同平時一樣嘅恤衫西褲，佢已經正式回歸。

「各位同學，好耐冇見。之前校長我因為去進修嘅關係，冇陪大家開學，但係我已經返咗嚟，今日開始我會恢復校長嘅身份，繼續同大家一齊學習。」呢個時候，同學都已經拍晒手掌，雖然中一嘅新同學唔識校長，但係見到成間學校嘅師兄師姐都拍手，佢哋都跟住一齊拍。

「之前學校發生咗一啲唔愉快嘅事，同學同老師之間有啲誤會，不過我已經同學生會仲有代理校長佢哋傾過。我宣布所有校隊嘅資源會同上年一樣，同學可以安心練習，唔使擔心。另一方面，所有『非學術學會』要重新申請，今次學校會認真審視各個學會嘅可持續性，同未來發展潛力，今次嘅審批會難過上年，所以大家寫申請書嘅時候就加油喇。」

而家呢個解決方法都算係幾折衷，保障到校隊嘅資源，同時又畀史校董佢哋有個落台階，但係一啲真係For Fun嘅學會睇嚟就凍過水，唔知「占卜星相靈異與魔法學會」佢哋留唔留得低呢？

「另外，我要對幾位帶頭破壞規矩嘅同學作出譴責，無論咩情況都唔應該影響到其他同學學習嘅權力同機會，不過考慮到情況特殊，學校今次唔會追究。」校長繼續講。

校長咁講完之後，硬係覺得個個人都望住我哋咁，不過算啦，反正校長都話唔追究。

「我仲要讚我哋嘅學生會，特別係會長田善悠同學。喺呢啲情況，要勇敢做出決定係一件唔容易嘅事，能夠有勇氣承擔會長嘅責任，同埋保護校隊同學嘅利益，好值得嘉許，大家畀啲掌聲！」校長公開讚甜豉油，差在未講埋句「葛萊分多加十分」。

都啱嘅，甜豉油做呢個決定，差啲就會令佢變成「背叛」同學嘅人，喺必須要選擇嘅時候，如果要犧牲少數人先可以換到大多數嘅利益，又有幾多人有勇氣下呢個決定？起碼我就未必有。

就係咁，學校嘅「佔領事件」終於都告一段落，學校又回復返本來嘅平靜，讀書嘅繼續努力，練波嘅繼續盡力，大部分嘅學會可以運作返，12月嘅Christmas Ball都可以如期舉行。不過我就留意到副校長同史校董今日都冇喺學校，可能因為「政變」失敗，要避一避風頭？

（Tbc.）

114 - 宇宙已經安排好

校長回歸之後，學校回復平常，學生會嘅運作亦都恢復返。今日6C班嘅課室入面，太一好似平時一樣，但係佢就似乎有啲心不在焉，佢仲糾結緊早幾日同甜豉油嘅爭拗，太一覺得自己語氣太重，而且冇好好喺甜豉油嘅角度諗，特別係聽完校長講之後就覺得自己太衝動。

放學之後，太一嚟到咗SU房搵甜豉油。

今日嘅SU房就得甜豉油同另一個內閣成員－Joel喺度，見到太一嚟到，Joel都好識做咁離開SU房，而家SU房入面就只有太一同甜豉油兩個。

太一比平時有啲緊張，好似唔知點開口，而甜豉油都冇出聲講任何嘢，兩個人互相躲避對方嘅視線，太一坐咗喺比較遠嘅櫈，同甜豉油保持一啲距離。

「對唔住呀⋯⋯」太一先開口。
「你有咩好道歉喎。」甜豉油講。
「我冇喺你嘅立場諗，仲覺得你出賣咗我哋班同學。」
「咁我都只係揀咗個最折衷嘅方法啫，唔一定啱晒⋯⋯」

太一慢慢坐近，去到甜豉油隔離。

「咁我語氣都重咗。」太一講。
「唔緊要喎，我知你一定會咁做。」甜豉油終於望住太一。

甜豉油放低手上面嘅筆記，轉向太一：「我一早就知道，呢件事上面，我同你會有唔同嘅睇法，甚至會嗌交。」
「你又算到？」
「估都估到啦，你個人咁幫朋友，一見到其他人受到咁多不公平對待，你又點會忍得到吖。」
「我都係想保護班同學啫。」

「我知你一定會因為觀點唔同，而同我嗌交，所以⋯⋯我都冇嬲你。」
「真係？」太一再靠近啲。
「係呀。」

太一興奮咁跳起，一聽到甜豉油話冇嬲過佢，就好似變返平時超有活力嘅佢咁。

因為學校嘅新政策要所有「非學術學會」重新提交申請表，所以甜豉油都寫緊份計劃書。

「你哋『占卜星相靈異與魔法學會』都要重新申請過？」太一問。
「係呀，因為我哋都係『非學術學會』。不過通過嘅機會率應該都大嘅，我哋上年搞咁多活動，而且批活動嗰個又唔係副校長。」甜豉油拎返起枝筆，再繼續寫申請表。
「不過今年好似少咗活動喎，係咪掛住搞『魔靈閣』呀？」
「冇辦法啦，我同Simmy都掛住搞學生會，邊有時間搞『占卜星相靈異與魔法學會』啲嘢，連小蘭都要做Head Prefect。」

「咁不如我幫你啦。」太一講。
「唔使喎，你又要準備考DSE，仲有夾Band呢。」甜豉油一直都冇放低手上面枝筆。
「最近我哋夾Band都幾順利，DSE我都有努力溫書吖。其實⋯⋯你最近係咪唔想見我？」太一問。

甜豉油停低動作，放低手上嘅筆，好似呆滯咗咁。

「喂？做咩呀？」太一問。
「冇⋯⋯」甜豉油略有吞吐，「冇呀。」

甜豉油講嘅「冇」係想講佢冇唔想見太一，但係佢心裡面知道，自己的確有特登逃避太一。

「我去上日文班呀，走先喇。」太一講。
「哦。」

太一離開之後，甜豉油繼續喺SU房。而佢嘅好朋友Simmy都嚟到咗SU房。

「太一搵你？我啱啱見佢行咗出去。」Simmy講。
「係呀，佢嚟道歉，不過我都冇嬲佢。」
「你冇嬲人咩？明明嗰日你成個下晝都冇出聲，呆呆滯滯咁。」
「我唔記得喎。」甜豉油扭擰咁講。

「咁你避開太一嘅原因係咩呀？」Simmy問。
「我邊有避佢喎。」
「明明就有，自從陸運會之後，你對佢避得就避，只係呢排咁多事，你先同返太一講嘢。」
甜豉油嘆一口氣，「我都冇辦法⋯⋯宇宙要我同佢保持距離⋯⋯」甜豉油講，聲線入面有啲苦惱。

「你又收到宇宙嘅訊息呀？」Simmy擘大雙眼問。
「嗯。」
「雖然我對會長你嘅占卜能力完全唔懷疑，不過我覺得就算命運已經安排好，我哋都可以試吓⋯⋯跟自己嘅諗法去行。」

甜豉油天生就有不可思議嘅第六感，而且可以經常會感覺到霎眼而過嘅畫面，佢可以解讀到呢啲畫面背後嘅意義，佢稱呢啲係嚟自嘅宇宙訊息。由出世開始，佢接收到嘅宇宙訊息就冇錯過，甚至今年情人節嘅時候都預測咗Simmy同Sky完全冇機會，只係Simmy始終都係要試，最後Sky就冷淡咁拒絕咗佢。

「我始終相信宇宙已經幫我哋安排好，耐心等候就可以。」甜豉油講。
「但係會長你開心咩？」

甜豉油沉默咗，的確跟隨住宇宙嘅規矩，令佢行少咗好多冤枉路，但係佢從來都冇問過自己係咪開心，就好似細個嘅時候，佢算到自己跳舞會受傷，於是一直都唔敢學跳舞，到咗而家已經錯過咗學跳舞嘅最好時機。

「其實運動會嗰日，我見到一個畫面，係一個有雪嘅鳥居。」甜豉油講。
「即係⋯⋯咩意思呀？」Simmy講。

「傳說鳥居係連接神域同人類居住嘅通道，應該係話我同佢⋯⋯仲有一段距離⋯⋯」
「邊個佢呀？」Simmy笑笑口問。

甜豉油冇答，「快啲寫申請表啦，今年你先係會長。」甜豉油將份申請表交畀Simmy。

兩個人繼續寫埋淨低嘅申請表。

（Tbc.）

115 - 改歌名的大勢

我哋幾個今日又嚟到咗The Echo夾Band，經過學校嘅動亂之後，雖然我哋已經可以用返音樂室，不過星期六就冇理由返學校啦，所以畀啲錢達仔賺吓。

我哋開始夾緊首新歌，即係由我發夢夢到嘅旋律寫成嘅嗰首歌，自從我同樂少填咗詞之後，首歌就變到好有Feel，真係有啲喺外太空漫遊嘅感覺，我自己就好滿意。

「你哋覺得點呀？」我問。
「好好喎。好似喺太空咁。」太一講。

今次太一嘅鼓唔算編得好滿，只係啲過門位會玩得花啲，不過雖然簡單，但係就好夾嗰種喺外太空無拘無束嘅自由。

「阿錘你首歌有我嘅歌詞加乘之後果然好咗好多。」樂少好有自信咁講。
「明明最後歌詞係我哋一齊作嘅。」我講。
「係呢？阿錘你，呢首歌會唔會彈木結他呀？」Sky問我。
「木結他？點解會咁問嘅？」

我從來都冇向呢一個方向諗過，因為一路作嘅時候，我都係用電結他嚟掃Chord。

「因為⋯⋯可能係直覺掛。」Sky笑笑口咁講。
「咁不如試吓啦，出去問Tina借嚟用吓應該得嘅，話晒你哋以前都『有一腿』。」樂少講。
「咩『有一腿』呀？我淨係話過佢對腳幾正啫。」我即刻用手擋住枝咪，費事又畀Sky無啦啦推大聲畀Tina聽到。

話說呢排都好少見Tina嚟返工，不過今日就啱啱係佢當值，所以我就出咗去借木結他。

「Hi，Tina。我想借枝木結他呀？」我同Tina講。
「好呀，達仔應該冇問題嘅，你想要邊枝呀？」Tina放低玩緊嘅電話遊戲走埋結他架到。
「Er⋯⋯左面嗰枝啦。」

達仔擺喺呢度嘅木結他，好多我都講唔出咩牌子，可能有啲係貴嘢，有啲係平嘢掛，不過佢揀嘅結他通常都唔錯，就算個牌子唔出名都唔等於枝結他唔好聽，所以我揀咗最合眼緣嘅嗰枝。

「你⋯⋯好似大個咗。」Tina一路畀枝結他我一路講。
「係咩？你都係冇見我一兩個月啫，邊有大得咁快喎，又唔係BB。」我講。

Tina揜住塊面笑⋯⋯吓？好好笑咩？我唔覺得我係講笑㗎喎。

我返到入Band房，因為頭先出去嗰陣冇閂實度門，所以佢哋係聽得懂我講乜嘢。

「唉，又溝女，你叫小蘭點算好吖。」樂少講。
「吓？」我簡直係難以置信。
「氹到人哋笑晒，睇嚟要跟阿錘學嘢先得。」太一講。
「吓？」兩條友又屈我。
「快啲開始啦，就夠鐘喇。」我講，雖然我已經慣咗佢哋兩個嘅說話方式，不過夾Band係計錢嘅活動，所以要爭取時間。

我即刻用木結他試吓彈一次我嗰Part，但係就將一啲本身係Power Chord嘅地方改咗做正常嘅Chord。聽落嗰聲又幾順，冇電結他咁高頻，反而多咗一種中頻同埋低頻，令到首歌更加飽和，Pick掃弦嘅聲都好夾，可能因為唔需要顧慮電流嘅問題，彈木結他好似更加自由，而且我用唔同力去掃弦，就好輕易做到一啲音色同情緒上嘅起伏，好似仲浪漫咗添。

「又幾好喎，Sky你係咪就係想要呢種聲呀？」我講。
「係呀，我覺得呢首歌，需要一支結他，平衡整體嘅力度。」Sky講。

可能因為首歌本身就唔係好Heavy，所以我唱嘅時候冇咁用力，而且太一嘅鼓都冇咁用力，可能就係呢個原因，Sky先覺得兩枝電結他借太搶，反而失去咗首歌本身嘅浪漫。

「咁就咁決定啦，呢首歌我用木結他彈。」我講。
「咁我仲有個問題。」Sky笑笑口咁講。
「係咩呀？」我哋三個一齊問。
「首歌叫咩名呀？」Sky問。

關於歌名，我都有諗過。

「《星海》。」
「《唯一只想找到那片星海》。」

《星海》係我嘅諗法，而《唯一只想找到那片星海》就係樂少嘅諗法。

「咁長好咩？」
「依家啲人鍾意㗎，歌名要夠特別，用晒成句副歌係大勢所趨。」樂少講。

「Sky同太一呢？有咩諗法？」我問佢哋。
「我就鍾意《星海》多啲，因為夠短，唔使每次夾Band都講咁多嘢。」Sky講，以我對Sky嘅認識，都諗過佢會有呢種說話。
「我就覺得《唯一只想找到那片星海》好啲，雖然係就係長氣啲，但係考慮到記憶點呢個問題嘅話，一個咁長嘅名，反而會好記啲。而且考慮到喺網絡年代，只係《星海》會好難Search到，反而唯一只要⋯⋯《唯一只想找到那片星海》就易搵到啲。」太一好認真咁分析，不過中間都因為個名太長而有啲食螺絲。

「我都覺得《唯一只想找到那片星海》好啲喎。」Tina入咗嚟，「唔好意思呀，因為聽到你哋傾緊首歌名，而且首歌又好聽喎，所以就想畀啲意見。」
「唔緊要喎，多謝你意見就真。」樂少講。

其實聽完太一分析之後，我都覺得有啲道理，而家連Tina都咁講，我諗長啲就長啲啦，一於就係《唯一只想找到那片星海》啦，不過因為嗰名太長，除咗介紹歌名，我都係叫佢做《星海》算。

「好吖，咁就咁決定啦。」我講。

呢個時候，我收到一個冇來電顯示嘅電話。

「喂？」
「劉星隨。」

呢把聲⋯⋯係Silas。

「Silas？」
「係呀。聽講你想我返『寧華』唱歌喎。」
「係，想你做Christmas Ball嘅表演嘉賓。」
「反正咁耐都冇返母校，返去行吓都好嘅。」

「仲有呀，我想搵你哋一齊唱一首歌。」Silas講。
「同我哋一齊唱一首歌？」我有啲愕然，因為從來都冇諗過，「都可以嘅⋯⋯我諗。」

就係咁，Silas突如其來嘅電話就成為咗我哋嘅嘉賓，而且仲想同我哋一齊唱歌，咁究竟又係邊首歌呢？

（Tbc. ）

116 - 漣漪

唔經唔覺，已經到咗12月，Christmas Ball嘅籌備都進行得如火如荼。學生會大力宣傳之下，飛都賣得七七八八，不過呢啲都唔係我嘅管轄範圍。最困擾我嘅係舞會嗰日嘅音樂安排，因為冇去過Christmas Ball，所以其實我唔知要播咩歌，應該播聖誕歌定純音樂，定係有跳舞專有嘅歌？

放學之後，我又嚟到咗Canteen，如果你問我畢咗業之後最唔捨得嘅係咩，我諗應該係放咗學之後嘅Canteen，環境真係好舒服，可以話係冬暖夏涼，而且望住班同學行嚟行去，有種睇緊《魚樂無窮》嘅感覺，Hea足一日我都覺得冇問題。

不過呢，Canteen都有個不確定性，就係毛子蘭會過嚟搵我，好似而家咁，佢就過緊嚟，我諗9成9都係嚟催我快啲交音樂畀學生會。

「搵我？係咪舞會音樂嘅嘢？」
「係呀，你知就快啲交啦。」
「你估我唔想交咩？但係我又冇去過Christmas Ball，都唔知播咩好，連我自己隊Band唱咩歌我都未諗。」

冇錯， 我哋的確連Christmas Ball唱邊首歌都未決定好，雖然《唯一只想找到那片星海》就肯定會唱，但係都仲要揀多最少兩首，本身諗住唱《選擇⋯⋯多一次》，但係因為嗰Feel好似唔夾，所以又轉咗。

「跳舞都係播純音樂會好啲，入場嘅時候呢⋯⋯」毛子蘭講緊。
「入場都要播歌咩？」我打斷佢。
「你又冇睇個流程㗎？」
「咩『流程』呀？我家姐個網名就叫『劉晴』喇。」

「呢份呀。」佢喺書包拎出咗一份文件。

毛子蘭完全無視咗我呢個Gag，其實都幾好笑吖，「劉晴」同「流程」喎。

「咩嚟㗎？」我問。

「咪send咗畀你囉，我哋開咗個Facebook Group㗎。」
「我幾日冇開Facebook吖嘛。」
「是旦啦，總之基本上得MC講嘢唔使音樂，入場同跳舞都Keep住有歌播就得。」
「哦。」

之後，毛子蘭捉咗我上電腦室，應該係想捉我揀歌掛。

因為電腦室長期都冇人用，所以今日就得毛子蘭同我喺度。

「咁你想揀咩歌呀？」我問毛子蘭。
「我都唔知呀，我都冇跳開舞。」毛子蘭講。
「咁聽吓先囉。」

我上網搵咗啲Christmas Ball嘅Play List，然後插入我嘅耳機，分咗一隻畀毛子蘭。

「呢首得唔得呀？」我揀咗首華爾茲。
「幾好喎。」
「我諗第一隻舞用華爾茲，第二隻舞就用迪士尼啲歌啦。」
「好呀。」

「但係中間啲自由時間，我就唔知播咩好喇，我諗應該會播流行曲。」
「《漣漪》嗰啲？不過你隨心播就得。」
「《漣漪》咩年代呀小姐。」
「你自己揀啦，不過你所有想播嘅歌都要寫個List呀，依家學校要Check一次先。」

唔知係咪因為上次我唱咗《忍樣》之後，學校喺呢方面嚴咗，而家仲要過到審先畀播，咁都冇辦法啦。

之後，我揀咗幾首歌畀毛子蘭聽，呢個一齊喺電腦室用同一個耳機聽歌嘅畫面，就好似上年我哋喺度睇《Freaky Friday》咁。

＝＝＝＝＝＝

另一邊，星期六嘅下晝，太一同甜豉油就去咗買Christmas Ball嘅裝飾。佢哋去到咗一間日資百貨公司，甜豉油手上面拎住佢嘅Schedule Book，跟住裡面嘅Check List逐件逐件搵。

「淨係我哋兩個買夠㗎喇？唔搵多啲人幫手。」太一問。
「大件嘅裝飾，即係聖誕樹嗰啲，我哋一早訂晒喇，係差啲細裝飾。不過SU個個都唔得閒，Simmy本身已經好多宣傳上嘅嘢跟，小蘭都有好多嘢做，所以唯有搵你。」甜豉油講。
「Christmas Ball好似都幾多嘢做。」
「我本身以為係好輕鬆，點知原來每件事都要搞，無論係枱布顏色，邊度擺袋，音響燈光，全部都要諗。好彩學校禮堂本身已經有音響同燈光，我哋租兩枝燈就夠。」

太一同甜豉油搵咗好多唔同嘅小裝飾，有雪花貼紙、氣球、彩帶、聖誕帽之類，每買一樣嘢甜豉油就會喺自己本簿度刪走一樣，所以全日都冇放開過本簿。

「仲有冇嘢要買呀？」太一問。
「七七八八喇，差紫色嘅枱布，同埋掛聖誕樹嘅波波。」甜豉油全日都拎住自己本簿，好似好緊張咁。
「咁可以放鬆啲啦。」
「吓？」

「你全日都揸實晒本簿，好似驚死有嘢做漏咁。」太一講。
「咁大家都第一次搞Christmas Ball，我又係會長，一定要睇實啲啦。」甜豉油講。
「不如唞陣先。」
「都好嘅。」

太一同甜豉油搵咗間Cafe坐低，叫咗兩杯嘢飲。

「我哋Form班人好似好期待呢個Ball，因為咁多年都冇人搞，又唔敢去人哋學校啲Ball。」太一講。
「呢個都係我想搞Ball嘅原因，唔想班同學得個恨字，想佢哋都有屬於自己嘅Christmas Ball。」甜豉油講。
「不過記得唔好咁緊張呀，最近⋯⋯你多咗好多暗瘡。」
甜豉油即刻摸自己塊面，「唔係好多啫吓話。」

「唔係好多，半塊面囉。」太一開玩笑咁講，嚇到甜豉油即刻皺眉。
「帶你去放鬆吓。」
「去邊呀？」

太一帶甜豉油嚟到咗一間機鋪，甜豉油似乎未入過機鋪，對周圍嘅環境有啲唔自在。佢哋去到咗太鼓機面前，「一於打太鼓啦，將你嘅煩惱、憤怒，大大力打落個鼓度。」太一講。

甜豉油拎起鼓想棍，對太鼓嘅操作完全唔識，太一就喺旁邊教佢。

「你打左面就會係下一首歌，兩面一齊打就即係確定喇。難度分做4級，『花』、『竹』、『松』、『鬼』，最易打就係『花』，連阿錘都打到。」

甜豉油揀咗《粉雪》嘅「花」嚟打，雖然有啲遴迍，但係甜豉油都打得唔錯，只係Miss 咗幾個，去到最後要連續紅、藍隔住打，甜豉油做顯得好吃力，不過雖然好難打，不過甜豉油面上就慢慢有返笑容。

「打太鼓係咪好開心呢？」太一問。
「好似又真係輕鬆咗。」甜豉油講。
「我成日自己嚟打㗎，打完就好似會諗明咗啲嘢咁。」

「你有諗嘢㗎咩。」甜豉油偷笑講。
「吓？」太一聽唔對甜豉油講嘢。
「冇嘢呀，打過鋪啦。」因為現場好嘈，所以甜豉油喺太一耳邊講。

兩個人就咁就打咗成個鐘太鼓達人。

「又幾好玩喎。」甜豉油笑笑口講。
「係呢，下次再帶你嚟玩吖。」太一講。

「好呀。」

太一聽到甜豉油呢個答案，唔知點解就泛起咗一陣漣漪。

（Tbc. ）

117 - 5樓的樓梯轉角

琴晚終於辛辛苦苦揀咗一個三個鐘嘅歌單，我send咗畀毛子蘭，然後學生會會將歌單畀學校檢查。我揀成三個鐘嘅原因係因為我想到時再決定播咩歌，究竟要浪漫Feel啲華麗Feel，呢啲都好睇當刻嘅感覺。歌單我都幾滿意，有廣東歌，有英文歌，橫跨嘅年代由80年代去到現代都有。

至於表演嘉賓嗰度，一共有一個鐘嘅表演時間，遠比我想像中多，雖然話有Silas，又有Keeley佢哋，不過我都仲搞緊表演嘅安排，因為「夏天雪人」點計都係外來嘉賓，一定要壓軸出場，但係我又擔心同學會唔鍾意夏天雪人嘅曲風，所以都仲苦惱緊。

不過我哋隔離嘅樂少，好似仲苦惱，睇佢個樣9成9係煩緊關於Kristine嘅事。

「你搞咩呀？」我問樂少。
「你覺得我應唔應該叫Kristine嚟我哋學校嘅Christmas Ball？」樂少個樣好似好迷惘咁。
「你想我畀理性嘅分析定純情感意見吖？」
「理性分析先啦。」

我清一清喉嚨，扮到好認真：「Kristine就係『田金拯』學生，Banding同我哋差唔多，據我所知佢哋學校都冇搞Christmas Ball，咁你請佢我諗機會都大嘅。不過你講到Kristine咁靚女，可能會揀去啲名校都唔出奇，我哋嘅唯一好處就係價錢平過佢哋一半。」

「係喎，JSBA都成班名校生，可能Kristine都會畀人邀請去㗎喎。」樂少講。
「你都係試吓先啦，最壞情況都係佢唔嚟啫，問咗人先啦。」我講。
「但係佢唔嚟，我哋以後會唔會尷尬呢？」樂少講。
「你驚Kristine拒絕你咋掛？」我講。

樂少個樣好愁，可能係Emma嘅陰影仲籠罩住佢。

「你連歌都寫埋畀人喎，驚咩吖，而且首歌又唔差。」我講。
「都係嘅，咁我一於試吓啦。」

其實我都幾想Kristine嚟，因為我都想見下呢個令樂少放低Emma嘅女仔。

＝＝＝＝＝＝

放學後，Sky同Emma喺VA室做緊SBA嘅作品，Emma繼續做緊自己嘅陶藝，佢似乎擺咗好多心機喺陶藝方面，連潘sir都讚Emma嘅陶瓷好又進步。而Sky就畫緊一幅以白色為主色調嘅畫，佢應該係想表達一種用唔同角度睇世界嘅感覺。

「Emma你會唔會去Christmas Ball呀？」Sky問。
「應該唔會喇，Sky你會去？」Emma微微笑回應。
「我哋去做表演嘉賓吖嘛。」Sky笑笑口講。
「咁都可以考慮吓喎，你哋著西裝應該都幾好笑。」Emma講。

「係喎，我都冇諗過著咩衫添。」
「男仔去Ball就緊係要著西裝啦，女仔就會著晚裝。」 Emma講。
「你以前間學校成日搞Ball㗎？」
「係呀，我都有去過，不過我太怕醜都冇咩人搵我嘅。」

Emma繼續幫自己嘅陶瓷上色，營造一種仿青花瓷嘅感覺。

「樂少佢，最近好似鍾意咗一個女仔。」Sky講，暗中觀察Emma嘅反應。
Emma聽到呢個消息之後，停咗一刻，「咁⋯⋯都幾好喎，我一定會祝福佢。」Emma微微笑講。
Sky放低畫筆，「我出去吹吓風先。」Sky笑笑口講。

Emma若有所思咁繼續自己嘅作品，專注畫好一條一條嘅藍色紋。

Sky行咗去啊個長期都冇人去嘅5樓樓梯轉角，呢個位係全間學校最食風嘅位置。

正當Sky感受住微風吹過嘅時候，有個人走上樓梯。

「司徒天？又喺度嘅？」
「畫畫好攰呀，所以咪過嚟吹吓風囉。」Sky笑笑口咁講。
「我都改簿改到好攰呀，所以上嚟吹吓風，呢個位真係成年都咁好風嘅。」
「Miss Lui你，唔會又想上嚟喊呀嘛？」

行上嚟呢個位嘅人，正正就係Miss Lui。

「呢個位大風先喊之嘛，你老師我邊有咁易喊喎。」
「係～～～」Sky拉長尾音。

「下面教員室好亂呀，有啲就撐校長，有啲就撐副校，個個都好緊張，氣都唞唔到。」Miss Lui挨住壆位講。  

因為史校董嘅介入，校董會要老師全力提高學生嘅成績，而另一方面，校長就相信，與其教出一班高分嘅學生，更加想教好一班學生。所以老師之間已經漸漸分咗兩個派別，Miss Lui呢個第二年嘅新人老師，帶住對教學嘅熱誠，努力咁嘗試容入明爭暗鬥嘅教育界。

Sky冇出聲，靜靜咁同Miss Lui呼吸同樣嘅空氣。

「Miss Lui你，不如都嚟Christmas Ball吖。」Sky都挨住壆位，喺Miss Lui隔離講。
「嗰日我放假喎。」Miss Lui講。
「咁不如你返嚟幫我哋補課啦。」Sky笑笑口講。
「吓？」Miss Lui都笑起上嚟。

「阿錘同樂少囉，又話填詞人，點知成日寫錯字，可能你要教吓佢哋兩個。」Sky調皮咁講。
「咁我淨係教佢哋兩個囉。」Miss Lui笑笑口講。
「可能我都想學填詞呢。」Sky講。
「你使咩我幫你補課呀。」Miss Lui塊面終於都多返啲笑容。

Sky心裡面其實唔係好知自己講緊咩，只係想隨便搵啲嘢講吓，想隔離嘅Miss Lui唔好成塊面灰晒。

「我知你想做咩啦，當Miss我係你啲師妹咩。」Miss Lui用手肘輕輕撞Sky講。
「嗯。」
「我精神返喇，你都乖乖哋返去畫畫啦，潘sir好畀心機教你哋㗎。」Miss Lui講。
「係～～～」Sky又拉長尾音。

Sky向VA室方向行，途中幾次回頭望住Miss Lui，而Miss Lui都望住Sky走，仲做口形叫佢快啲返去畫畫。

（Tbc. ）

118 - 五行石

今日星期六，我哋到咗The Echo夾Band，練習緊《唯一只想找到那片星海》，先後夾咗幾次，大家都掌握得唔錯，我感覺到大家嘅功力都提升咗唔少，比起一開始要靠Sky carry住，而家大家已經搵到互補嘅方法。今次呢首歌，同之前嘅歌相比，更加需要和音，所以樂少就唱咗好多和音，唔同《懶》嘅「啦啦啦」，今次嘅和音要用咗低三度嘅方法，雖然只係低三度，但係同主旋律就好唔同，所以樂少就要好似記一首新歌咁，不過咁就可以令到首歌聽落去更加厚實。

「係喇，我計過，我哋要唱四首歌。《星海》、《Special Thanks》，我覺得係最啱Feel嘅，而家學校要審歌，所以《懶》同《忍樣》應該過唔到。」我同佢哋講。
「既然聖誕，不如唱《Last Christmas》？」Sky講。
「都好嘅。」我哋講嘅係Wham!嗰首《Last Christmas》，Tonick嗰首應該就過唔到學校。

「咁都仲有一首喎。」樂少講。
「再諗好冇呀？我趕時間呀。」太一講。
「咁好啦。」我講。

夾完Band之後，太一就急急腳走人，好似話甜豉油約咗佢去買Christmas Ball嘅裝飾，我哋都冇強留佢，之後都各自解散。

而呢個時候，我部電話就收到咗Silas嘅來電。

「喂？」
「劉星隨，得唔得閑呀？」
「而家？都得嘅，我啱啱夾完Band。」
「咁入嚟長洲啦。」
「吓？」
「快啲嚟啦。」

入長洲？雖然我知Silas住長洲，但係我入去長洲有啲麻煩喎。不過今日又冇嘢做，同埋作為Christmas Ball實際做嘢嘅音樂總監，我都應該要見吓我哋嘅表演嘉賓，於是我就由尖沙咀再搭船去中環，再轉去長洲。

以前細個，我好怕搭船，因為會暈船浪，不過大大吓又好似克服咗，而家仲幾享受喺海嘅時間。有時覺得世界又幾橋，我哋首歌講星海，我就真係喺海上面。當初填「星海」呢個詞語，其實冇諗太多，只係嗰個夢入面有好多星，多到好似海咁，其實真正嘅「星海」係咩樣㗎呢？喺呢個睇唔到星嘅城市，我都想感受一次「星海」嘅震撼。

入到長洲之後，Silas再打畀我，叫我去五行石。

五行石係一個喺張保仔洞附近嘅石頭，我喺地理堂聽老師講過，不過就冇親眼睇過。原來行入去都幾遠，由碼頭計起，我行咗半個鐘都未到，好彩今日借The Echo枝木結他冇孭住我枝結他。究竟Silas點解叫我嚟咁遠呢？搞到好似做臥底要搵個神秘地方見面咁。

終於去到五行石，Silas都望到我，佢離遠就同我揮手，而佢⋯⋯竟然係喺度釣緊魚。

「你終於嚟到喇。」
「做咩叫我嚟長洲呀？」
「想搵你釣魚吖嘛。」
「釣魚？我唔識喎。」

Silas借咗枝魚竿畀我，唔通佢歸隱咗長洲之後就變咗退休阿怕？

企起Silas隔離，感覺好似識咗佢好耐咁，但係明明我同佢嘅接觸就只有上次喺長洲撞到佢，同埋嗰次牛頭角場Show。可能因為「神書」嘅關係，我就好似好熟悉眼前呢個叫孫凝雨嘅人咁，又咁啱得咁橋，借咗「神書」之後，我就同「黑色西炒飯」佢哋嚟咗長洲宿營。

「諗緊咩呀？」
「你係咪借過一本講Music Theory嘅書，叫做《The Big Theory Of Music》呀？」

Silas隻眼向左望，好似諗緊嘢咁，應該係回憶緊啲咩。

「係呀，都10幾年前喇。」
「我冇意中借咗嗰本書。」
「你又知係我借嘅？」
「因為呢10幾年嚟得你同我借過，我搵咗圖書管理員幫我查。」

Silas繼續釣魚，「我印象中我後期當佢係日記咁寫，依家睇返應該都幾好笑。」Silas講嘢嘅時候，原來都幾多表情。

「我喺裡面學咗好多樂理嘅嘢，都係靠你啲註解同翻譯。」我講。
「唔使多謝喎，我都係諗住寫低畀人睇，點知原來咁多年得你借嚟睇過。」Silas個樣好似好失望。

「你寫過一句『你是女神，而我是雪人，拿掉靈魂，留下水份也是永恒。』係咩嚟㗎？」我問Silas。
Silas露出一個傻笑嘅表情，「係咁嘅，我叫凝雨，即係雪。嗰彈想寫首歌畀個女仔，就算佢將我嘅靈魂拎走，我留低嘅軀殼，同對佢嘅愛，都會係永恒。」Silas笑住咁講。

Silas嘅笑同Sky嗰種微笑好唔同，佢好似係嗰種充滿力量嘅笑容，好似少年漫畫嘅主角咁。

「原來係歌詞呀。」
「你有冇寫過歌畀女仔呀？」Silas隻眼微微戚起。
「Er⋯⋯」我應該算係寫過歌畀毛子蘭？「都算有嘅。」
「咁追唔追到呀？」Silas個樣好好奇。

「其實我只係想多謝嗰個女仔，所以唔係想追佢。」
「係咪呀。」Silas戚眉又奸笑，「講句多謝使咩作首歌喎，就咁講咪得囉。」

「你成日釣魚㗎？」我費事再兜返去毛子蘭度，所以轉移話題。
「係呀，你冇聽我首《爺釣的是空虛》咩？」
「好似又真係有首咁嘅歌喎。」因為Silas個Channel有好多首歌，我印象中我係聽晒，不過唔係首首都入腦。
「嗰首歌係我釣魚嘅時候作㗎，我悟出咗好多道理。」

我都覺得釣魚係可以悟到好多道理，不過而家嘅我就肯定冇呢個閑情逸致，因為釣咗一陣我都開始覺得悶。

「我聽炎爺講咗好多你嘅事。」Silas講。
「我嘅事？」
「你好似好想我唱返Rock喎。」

呢個問題，我諗咗好耐，我尊重佢嘅諗法，不過如果問我心裡面嘅感受，我會答⋯⋯「係呀。」

Silas笑一笑，今次嘅笑，明顯唔自然，係夾硬逼出嚟嘅笑容。

「我仲未做到⋯⋯不過⋯⋯我會努力試吓。」
「好呀，我會期待你唱返Rock。」

喺佢隔離，我好似更加感受到佢嗰種哀傷嘅感覺，同埋嗰種無力⋯⋯

「係呢，你到時會唱咩歌呀？」
「嗯⋯⋯應該唱返啲聖誕Feel啲嘅歌啦，我有首《聖誕老人的禮物只給好孩子》同埋《白色假期YoYoYo》嘅。」
「哦⋯⋯」

我突然間又Feel到有啲大鑊，啲同學啱唔啱聽㗎⋯⋯

「唔使驚喎，我會唱返啲大路嘅歌。」Silas講，「我知『夏天雪人』啲歌唔啱喺Ball唱嘅。」
「⋯⋯嗯。」
「不過呢，我想同你哋夾首歌，我想唱返嗰陣喺『寧華』唱嗰首歌。」

原來係嗰首歌⋯⋯就係嗰首歌，改變咗我。

（Tbc. ）

119 - 舞會的序幕

時間話咁快就嚟到Christmas Ball當日，因為我哋要負責音樂嘅部份，所以都一早返咗嚟學校。話說今日嘅舞會係有Dress Code，我哋一定要著西裝，以我咁孤寒嘅性格，點會捨得嘥錢買套西裝，仲要淨係著一次，所以我就用咗Miss Lui上次「教」我哋用嘅方法，我去時裝連鎖店，買咗件幾靚嘅西裝，都算係咁啦，不過真係好唔習慣着住件褸，所以我都除低咗。

雖然話就話係音樂總監，但係要做嘅嘢又唔係好多，我將準備好嘅歌單放咗喺禮堂部電腦，到時我再播就OK。

學生會嘅同學用咗好多心機布置，成個禮堂都好有聖誕氣氛，黐滿晒雪球嘅裝飾，閃令令又五顏六色嘅裝飾條，仲有兩棵大聖誕樹，同埋好多閃閃發光嘅LED燈，我諗佢哋上下都擺咗好多心機。太一就好似佢哋嘅成員咁，擒高擒低掛裝飾，又幫手Set場。

名義上音樂總監係「黑色西炒飯」，但係其實全部嘢都係我做，今日3點鐘有個小小嘅Rehearsal，主要係表演單位試聲，Silas就同我講咗，佢唔使Rehearsal都得，所以會自己一個遲啲嚟，而班師弟同Keeley就已經到咗，準備Rehearsal。

Keeley第一個上台Rehearsal嘅，因為佢只係要枝咪就可以，因為時間多咗，我最後分咗兩首歌嘅時間畀佢，佢就揀咗《The Show》同《Price Tag》兩首英文歌，我就真係好期待，呢個我哋嘅小Fans絕對會值得有更多人睇佢表演。

Keeley喺台度，好似就有少少緊張，明明唱得好好，台下面嘅同學聽到佢嘅歌聲之後，都露出難以置信嘅樣。不過就冇好似上次午間音樂咁閃閃發光。

「你好緊張？」我同Keeley。
「少少啦。」Keeley講。
「我第一次出Show之前都係咁，你試吓搵啲熟悉嘅嘢望住吖，有用㗎。」我將嗰次毛子蘭同我講嘅嘢，講咗畀Keeley聽。
「係咪真㗎？」Keeley眼仔碌碌咁望住我。

「起碼對我有用囉。」
「咁我信你啦。」Keeley突然之間跑走咗，仲喺火影跑咁，佢喺禮堂跑嚟跑去，仲一邊哼住《Price Tag》。

原來Keeley都幾古怪，諗佢唔明，明明前一秒好正常，突然就好似去咗太空咁。

之後到幾個師弟，佢哋都係4個人嘅組合，隊Band叫「鐵甲觀音」，我係覺得個名幾好笑嘅，不過就唔知佢哋嘅實力去到邊。佢哋Rehearsal嘅時間到，望住對於器材唔係好熟悉嘅佢哋，我就伸出援手，幫佢哋set好Amp，睇嚟佢哋平時夾Band都係亂咁嚟，冇留意Gain開幾多，Tone點樣扭。

「鐵甲觀音」嘅成員有主音勇仔、Bass手Barry、結他手鬆餅、鼓手歐超，幾個人係因為上年睇完「黑色西炒飯」嘅Show之後就有夾Band嘅念頭。佢哋可能因為年紀仲細，真係唔係好穩，拍子好亂，好似冇人跟鼓手打咁，唱歌嘅勇仔仲要走咗幾次音。

「你哋要齊啲先得㗎，跟住鼓手彈，拍子啱就好聽㗎喇。」樂少呢個時候畀咗好多意見班師弟，好似佢好有經驗咁。呢個時候嘅樂少，同以前比，又有咗好大嘅進步。
「冇錯呀，夾Band要互補先得，各有各玩嘅話就唔係一隊Band啦。」我同佢哋講。
「觀眾會唔會唔鍾意我哋嘅表演？」勇仔問我哋。
「佢哋睇到你哋有落力表演，就唔會唔鍾意你哋，放心啦。」樂少講。

我哋啲觀眾應該都算係幾Nice，就算唔好聽，只要盡咗力，佢哋當中都一定會有人欣賞。

講起上嚟，我哋因為要唱四首歌，除咗《星海》、《Special Thanks》同勉強先夾好咗嘅《Last Christmas》，所以我哋都揀咗一首對我哋好有意義又夾熟咗嘅歌。我見時間就嚟到，冇搞好多嘢，簡簡單單check過啲樂器同咪都有聲就OK，而且呢個場，我哋都好熟啦，話晒呢度都係我哋第一次出Show嘅地方。

時間到咗5點，今日嘅舞會係6點開始入場，時間都唔多，學生會嘅人同MC對緊流程，各有各忙，有啲就負責做Reception，有啲就負責搞Keep袋之類。最忙就係甜豉油，我冇見佢休息過1分鐘，所以太一就一直默默咁跟住佢。

「激情對話」班人都有報名，個個都好期待，因為話有其他學校嘅女仔會嚟，而且會化妝，所以班人就勁興奮，個個都蠟晒頭，Chok定晒樣咁，因為未正式開始，佢哋幾個偷偷哋入咗嚟，不過好快就畀人趕走咗。裝束嚟講，魔人係最誇張嘅，雖然著咗西裝，但係都仲要戴頂Cap帽，可能同佢嘅Hip hop精神有關，唔知佢呢排玩Rap玩成點呢。

喺禮堂入面有個完全冇著晚裝嘅人，佢係Miss Lui。因為學校要佢負責睇住我哋呢班學生，所以就被迫返嚟監督我哋今日嘅活動，而Miss Lui嘅拍檔就係曹sir，據我所知曹sir係自告奮勇嚟監管我哋嘅，原因我諗係想同Miss Lui跳舞掛。當然Miss Lui咁醒目，緊係識得避啦，佢著咗一身T恤、牛仔褲，完全冇諗過融入舞會，只係喺遠處做一個監督老師嘅角色睇住班學生。

「可以開始播少少歌喇。」毛子蘭同我講。
「哦。」

毛子蘭今日都著咗一套晚裝，係一套全黑色，Cutting好簡單嘅晚裝，同一對平底鞋。

「你化咗妝？」我問。
「少少⋯⋯囉。」毛子蘭好似有啲怕醜。
「都幾好吖。」

「好心你啦，起碼梳吓頭啦。」
「反正點梳都唔直，咪由佢囉。」識咗佢咁耐都未睇慣我啲頭髮咩？

我播咗一首用古典結他彈嘅聖誕歌，展開今日舞會嘅序幕。

（Tbc. ）

120 - 1st Dance

搭正6點正，「寧華」第一屆嘅Christmas Ball正式開始，盛裝打扮嘅同學，慢慢行入禮堂。男仔就換上咗成熟嘅西裝，女仔就著住優雅嘅晚裝，加上而家會場播住嘅木結他聖誕歌，喺燈火嘅襯托下，學校禮堂轉眼間變得浪漫起嚟。

樂少企喺門口等Kristine，同喺亞博等Emma唔同，樂少今次完全冇驚過會畀人放飛機，可能係因為Kristine嘅回覆，畀咗一種好確實嘅感覺佢。Kristine由樓梯行上嚟，佢微微笑咁同樂少揮手，一身粉藍色嘅碎花裙，同佢嘅短髮好夾，附近嘅男同學都忍唔住回頭望佢。

「你⋯⋯今日好靚。」樂少忍唔住露出一個好燦爛笑容。
「淨係今日先靚咩？」 Kristine雙眼好精靈咁反問樂少。

呢個時候，樂少唔識回應，只係傻更更咁微笑望住Kristine。

由於Kristine嘅出現，「激情對話」嘅成員都馬上注意到，特別係當佢哋見到樂少同Kristine有講有笑嘅時候，就即刻蜂擁而上，想同Kristine搭訕。

「你好呀，我係魔人，我係一個Rapper，『黑色西炒飯』嘅前主音，為咗追求我嘅Hip hop之路，放棄咗佢哋。」
「我係朱傑，樂少嗰班嘅班會主席，好高興認識你。」
「唔知有冇榮幸同呢位咁可愛嘅小姐跳一支舞？我係Mango。」

面對熱情嘅「激情對話」，Kristine保持住禮貌嘅笑容，好開心咁同佢哋打招呼，樂少好似唔想「激情對話」煩住Kristine，所以就帶Kristine入場。

「袋可以畀呢位Joel，佢係學生會總務。」樂少好有風度照顧Kristine，「如果你條裙冇袋，電話可以畀我幫你袋喎。」
「好呀。」Kristine笑笑口咁畀咗部電話樂少。

兩個人就咁行入禮堂。

＝＝＝＝＝＝

一開始嘅半個鐘都係自由時間，全個禮堂嘅人都傾緊偈，互相認識。不過我見都係Friend就同Friend傾，好少有同校外人一齊嘅場面，除咗我老友樂少。

佢隔離呢個女仔，我諗就係佢日日講起嘅Kristine，的確又幾搶眼。短髮得嚟又好Cute，畀人好清新嘅感覺，同Emma嗰種富家千金唔同，Kristine似係住喺森林入邊嘅樂天女孩咁。如果再望遠少少，就會見到「激情對話」成班人跟喺後面。

因為唔可以畀個場太靜，我就決定開始播流行曲。呢個時間播歌，可以令人傾偈傾得比較自在，只係播純音樂反而會冇咁自在。聖誕節係外國節日，我覺得播英文歌比較啱Feel，呢刻禮堂終於似返個真正嘅舞會。

話得係自由時間，應該大家都好Free吖，但係負責播音樂嘅我，就好似畀人綁住喺電腦前面咁，冇得行開⋯⋯

呢個時候，最多人去搵嘅男仔⋯⋯當然係我哋嘅結他手Sky啦，成班女仔圍住佢，我諗冇十個都有八個。冇計啦，著西裝嘅Sky簡靚仔到去日本出道做牛郎都冇問題。

太一就繼續同甜豉油一齊行動，不過甜豉油就好似冇咩理過太一。

「差唔多⋯⋯可以準備播歌入1st Dance喇。」毛子蘭同我講。
「好呀，咁我等MC講完，我就播華爾茲。」

毛子蘭今日嘅角色好似係我同MC嘅橋梁，佢成日都要走嚟同我講要做啲咩，其實叫MC直接同我講咪得囉，使咩咁煩喎。

MC講完進入1st Dance之後，男女就分開左右兩邊，然後男仔就可以走過去請人跳舞，我都好smooth咁入咗音樂。

因為冇得離開我個位，所以我就暗中觀察我班隊友玩成點喇。

樂少開始冇耐就鼓氣勇氣行咗去Kristine前面，雖然隔太遠我聽唔到佢哋講咩，不過兩個人都笑晒，我諗終於有個女仔發現到樂少嘅好喇。

太一就神色緊張，肯定係想請甜豉油跳舞啦，不過唔知點解甜豉油總係搵到嘢做，幾次太一想請佢跳舞都避得開。

至於Sky⋯⋯就繼續畀隔離學校嘅女仔包圍住。

「呢種音樂叫咩呀？」
「華爾茲。佢通常係3拍，即係『重輕輕』、『Boom Cha Cha』咁，可以好簡單擺動，所以好啱用喺社交舞度。」

嚟問我嘅係Keeley，佢突然之間唔知喺邊彈出嚟，好似好好奇咁。

「落去畀人邀請下跳舞啦，難得你做表演單位唔使畀錢。」我講。冇錯，作為表演單位，我哋都冇畀到錢。
「我唔係好鍾意跳社交舞。」Keeley好直接講。
「我都麻麻哋，主要係我唔識跳。」
「咁你又識華爾茲嘅？」

「音樂堂會教㗎。」
「哦，既然冇嘢做，我去打坐先。」
「吓？」打坐？我有冇聽錯呀？Keeley去打坐？
「係呀，係學生會會長教我㗎。」

仲要係甜豉油親手教佢嘅？唔通甜豉油又算到啲咩？

轉個頭，Keeley已經唔見咗。歌劇院會有Phantom，禮堂會有Keeley，真係好似撞鬼咁，佢突然間消失得無影無蹤。

＝＝＝＝＝＝

樂少慢慢行去Kristine前面，用佢上望學到嘅「Christmas Ball必勝法」，問一句：「May I？」

Kristine畀隻手樂少，兩個人行出去禮堂中間，跳起咗佢哋嘅第一隻舞。

「我唔識跳㗎喎。」Kristine講。
「我都唔識。」樂少講，「你右手拖住我左手。」樂少用佢琴日特登睇片學嘅基本動作教Kristine。

樂少右手放喺Kristine左肩，Kristine左手就放喺樂少右手手臂，擺出一個基本嘅社交舞姿勢。

「又話唔識嘅。」
「我有做功課㗎。」

兩個人雖然跳得有啲生硬，不過就笑容滿面，玩得好開心。

另一邊廂，太一都嘗試請甜豉油跳舞。

「不如跳隻舞吖。」太一伸出手，有禮貌咁邀請。
「我未得閒住呀，Joel好似話有嘢要幫手。」甜豉油講完就走咗去。

太一好想請甜豉油跳舞，不過甜豉油總係搵到推搪嘅藉口，連甜豉油嘅好朋友Simmy都察覺到。

Simmy行去太一面前：「不如我哋跳舞吖？」
「我哋？」太一有啲愕然。

就喺太一未反應得切之際，已經畀Simmy拉咗出去跳舞。

「會長佢個人就係咁扭擰，咩都要等到宇宙嘅指示嚟到先做。」
「我知呀。」
「佢有自己嘅節奏。」Simmy講。
「節奏？」太一念念有詞。

喺Simmy帶領之下，太一慢慢搵到跳舞嘅節奏，跳得愈嚟愈似樣。

「我明喇。既然佢有自己嘅節奏，我唔應該打亂佢，要好似夾Band咁，今次等我去配合佢嘅節奏啦。」太一講。
「我都希望你搵到你哋節奏。」Simmy講。
「多謝你。」

呢個時間1st Dance都完結。

「我要去後台準備夾Band喇。」

太一同Simmy跳完舞之後，就跑去後台準備。

（Tbc. ）

121 - 閃閃發光的寶石

估唔到Simmy竟然會同太一跳舞，我留意到甜豉油眼神好似閃過咗一刻嘅空虛。

「阿錘你，想跳舞咪落去囉，我見好多人去請小蘭，不過全部都畀佢拒絕晒。」Sky講，佢話太多人搵佢，佢覺得好煩就上嚟陪我，明明我哋都係音樂總監。

「好多人搵毛子蘭咩？」我講。
「好多呀。」Sky笑笑口講，「你落去啦，最多我幫你頂住個DJ位先。」Sky笑笑口咁講。
「唔使啦。」

一陣仲要表演，而且仲有班師弟師妹，同埋Silas都就到，我唔可以分心。

「仲有一個鐘Free Time喎，唔使咁擔心喎。」Sky繼續講。
「Silas而家都未嚟呀，一陣表演都唔知順唔順利。」我講。
「難得小蘭化晒妝，都幾靚吖，不如我去搵佢跳舞啦。」Sky語氣裏面有啲挑釁。
「唔好啦。」我諗都冇諗就講咗出口⋯⋯「完咗表演先講呢啲啦。」

「講笑咋，我依家落去應該好多人行埋嚟，所以都係留喺度。」Sky笑笑口講，唔知點解⋯⋯我好似有種如釋重負嘅感覺。

MC又行咗出去，我慢慢推低音樂，佢做咗個簡單嘅Round Up，舞會再次進入自由時間，而家同學可以留喺Hall玩，或者去Canteen食啲嘢都可以，總之就係一個自由嘅時間。

我把握時間Call咗「鐵甲觀音」同Keeley上嚟，同佢哋講吓流程，仲有畀少少作為師兄嘅意見，希望佢哋可以努力做好表演。Free Time過咗一半，但係都係未見Silas，所以我將做DJ嘅任務交畀我嘅隊友，我就打電話畀Silas。

「喂，Silas，你喺邊呀？」
「我？我到咗喇，不過太耐冇返學校，諗住周圍行吓啫，強哥特登畀我去圖書館同音樂室參觀，原來依家音樂室有咁多器材⋯⋯」Silas好似好開心咁，一路喺度講學校嘅變化。
「總之你嚟禮堂啦。」我即刻收線。

呢個時候，樂少繼續擔任我哋嘅外交官，同所有人打成一片，而佢隔離嘅Kristine都已經埋咗我哋堆。

「你就係阿錘？」Kristine問我。
「係呀，我叫劉星隨。」我講。
「個Feel真係幾似Coman喎。」
「Coman？」

「JSBA嗰度有個人同你嘅Feel好似，都係夾Band白痴，不過人哋頭髮就冇你咁亂囉。」樂少講。
「唔係呀，阿錘啲攣毛幾有個性呀。」Kristine講，估唔到Kristine咁識講嘢，好耐冇人讚過我啲攣毛，搞到我都有啲想喊。

「我想見你哋『黑色西炒飯』好耐喇，之前睇片就覺得你哋喺籃球場開Band Show好熱血。」Kristine講。
「多謝，一陣記得聽我哋首新歌。」一時之間，我都唔知講咩好。
「樂少特登寫畀你⋯⋯」太一想講，但係畀樂少撳住咗。
「寫畀你哋呢啲冇聽過我哋嘅人。」樂少尷尬咁講。

可能係擔心會好似上次畀Emma知道自己心意，所以樂少今次決定要隱藏得好啲掛。

呢個時候，Silas最後都嚟到咗禮堂，佢孭住一枝結他，我諗應該都係木結他啦，於是我就問咗佢有冇咩特別嘢會用，佢當然係話冇啦，因為「夏天雪人」就係一枝結他，一個人嘅音樂單位。

「劉星隨，佢哋就係你嘅隊友呀？」
「係呀。」

我幫佢哋介紹咗，感覺好奇妙，令我走上夾Band之路嘅人，今日竟然同我一齊喺當日嘅舞台。

「今日最後嗰首歌麻煩你哋喇。」Silas好有禮貌咁講。

估唔到，原來喺呢啲時候，佢會咁有禮貌，明明之前都係我行我素，果然係曾經喺主流樂壇出過道嘅歌手，係識撈世界嘅。

話說嗰首歌，佢有send到譜畀我，不過我哋就一次都冇夾過，因為Silas話，只要到時跟我哋自己嘅感覺玩就可以。

＝＝＝＝＝＝

Free Time嘅時間完結，第一隊上台嘅係「鐵甲觀音」，佢哋會玩《光輝歲月》同《21 Guns》，本身勇仔畀我嘅感覺係好有自信嘅人，不過今日佢就好似冇咩信心，希望佢唔好怯啦⋯⋯

「有請中二同學組成嘅『鐵甲觀音』，為我哋帶埋《光輝歲月》同《21 Guns》。」MC介紹佢哋出場。

見勇仔個樣騰騰震咁，我都係忍唔住要去鼓勵吓佢。

「勇仔，唔好怯場呀。我都知道做主音好多壓力，又驚會影響到班隊友，因為只要走一粒音，人哋就會記住隊Band好差、歌都唔識唱⋯⋯不過緊加要記住，你後面有班隊友，佢哋一定會撐住你，盡力做好自己就可以喇。」我搭住勇仔膊頭講。
「嗯。」勇仔大大力點頭。

見到佢呢個樣，我都鬆咗一口氣。

「唔知邊個上年第一次出Show驚到要落Canteen買維他奶呢？」樂少講。
「咁第一次出Show做主音吖嘛。」我講。
「不過算啦，你依家應該唔會怯啦。」
「緊係啦。」我好有自信咁講，因為過咗一年，我成長咗唔少，而且⋯⋯我有我嘅隊友，同埋我嘅吉祥物喺度。

「鐵甲觀音」嘅表演力，又真係未得，可能因為太細個，始終未Hold到個台，因為我都覺得自己有呢個問題，所以睇佢哋就更加容易發現到呢樣嘢。結他手喺Solo嘅時候，彈得好浮，Tone都係好奇怪，至於鼓手就成首都冇咩變化，最穩陣嘅Bass手就因為只係彈根音，都冇咩出色嘅地方，勇仔已經好努力⋯⋯

其實咁樣畀佢哋上嚟，係咪太早呢？我會唔會害咗佢哋，令佢哋怕咗舞台呢？呢個時候，我唔小心諗起Silas嘅「驚恐症」⋯⋯

「跟住落嚟為我哋表演嘅有中一嘅劉卓瑜，Keeley。」

到咗Keeley表演，我仲諗住上台之前，同佢講句加油，點知佢已經上咗去。

隨住音樂響起，Keeley好快就進入狀態，應該話音樂都未起，已經Feel到佢準備好。

「～I'm just a little bit caught in the middle～」

一開口，我就見到閃閃發光嘅歌手，Keeley嗰種舞台魅力係天生㗎。唔係話佢唱得有幾好，係我好想睇佢表演，就算音準有啲沙石，都好吸引，無論眼神，姿態都好好，一個少少嘅笑容，都好有力量，睇嚟我冇睇錯人，台下嘅觀眾都好享受。

「嘩，掂喎，呢個女仔！」樂少同我講。
「睇到未，佢係我Fans嚟。」我自豪咁講，雖然佢好似係「黑色西炒飯」，唔係我「劉星隨」嘅Fans。

真係聽得好開心，好似睇緊個明星咁⋯⋯

Keeley唱完第一首歌之後，場上面嘅掌聲已經好清楚講咗，佢唱得有幾咁好。

之後嘅《Price Tag》將全場嘅氣氛推爆，佢仲有自己排咗少少舞，真係好有星味。大家嘅反應證明，已經有人注意到眼前呢粒閃閃發光嘅寶石。

Keeley表演完之後，就到我哋上台。

（Tbc. ）

122 - 《唯一只想找到那片星海》

第二次喺禮堂夾Band，呢次應該就係我哋最後一次喺度表演，畢咗業之後，唔知會唔會有機會返嚟，所以無論如何，我都想呢個Show會完滿咁結束。

同第一次表演嗰陣唔同，我冇再驚表演，一啲緊張都冇，而家我有嘅只係興奮。

「要唔要做嗰樣嘢呀？」Sky笑笑口問。
「咩呀？」

Sky伸出右手。

「又嚟啲咁老土嘅嘢？」樂少講。

太一捉住樂少隻手，「快啲擺上嚟啦，老土。」太一興奮咁講。

「嚟啦！」最後我放埋隻手上去。

「黑色西炒飯！」我哋一齊嗌。

MC介紹完我哋之後，有好大嘅歡呼聲，可能因為上年我哋都儲落一定嘅人氣，一片喝采聲之中，我哋拎起樂器上到台。

「大家好，我哋係『黑色西炒飯』。今日相信大家都玩得好開心，我就肯定今年學校嘅聖誕，好過Last Year，好過《Last Christmas》，既然係咁，This Year我哋就嚟唱《Last Christmas》啦。」好似有啲尷尬，我仲諗咗好耐，以為今次我嘅MC會有趣啲，不過睇嚟都係有待再努力。

馬上，我哋就即刻入歌，用《Last Christmas》打開This Christmas嘅序幕！

「～Last Christmas, I gave you my heart, But the very next day you gave it away～」

今次嘅英文歌，已經冇好似以前咁，有浸港式英文嘅味道。雖然唔係好想咁講，但係都係要多謝何副校長，唔係佢搵我去做ECA Day表演，我都唔會搵毛子蘭練唱英文歌。

「～I'll give it to someone, I'll give it to someone special～」

台下嘅反應都唔錯，大家都好鍾意呢首聖誕必聽嘅「聖誕歌」。唔知點解呢首歌嘅歌詞，明明換做第2個節日都可以，不過就係聖誕節先有嗰種Feel。

「之後呢首歌，我哋上次都喺度玩過，今次識唱嘅一定要一齊唱！」

「～越搏鬥戰意越高企 自信碰跌了又再起 堅決相信為戰友我定必勝利～」

冇錯，我哋決定咗玩數碼暴龍，應該話係《自動勝利 Let's Fight》先啱，第一次Show就係玩佢，今次都想好好咁夾多次，睇吓我哋有冇成長度。

唱嘅時候，我望住毛子蘭，因為上次去到副歌佢先返嚟，所以我想唱返呢段畀佢聽。

「～Oh Let's Fight～」

唔知點解，我心裡面有樣嘢好想做，上次係意外，但係今次我想複製返嗰個效果⋯⋯

於是我對住Sky露出咗一個微笑，佢好似即刻做察覺到我想做啲咩。

「～越搏鬥戰意越高企 自信碰跌了又再起 堅決相信為戰友我定必勝利～」

呢句，當然要留畀佢唱啦，上次班同學都以為我哋係特登，事實上效果又真係唔錯，反而令班同學更加興奮。

到咗Solo嘅時候，呢個Solo位係屬於Sky嘅，佢已經用自己嘅技術征服咗在場嘅所有人。

「Thank You！多謝大家聽得咁投入，除咗呢樣，我都想喺度《Special Thanks》一班努力籌備嘅同學，大家可能睇唔到，不過掛喺牆嘅燈飾，放喺枱面嘅枱布，仲有場地嘅燈光，宣傳單張，全部都係『魔靈閣』嘅成員負責。雖然可能係唔起眼，好小嘅事，但係冇咗任何一樣，我哋都冇呢個舞會，所以我要喺度唱呢首歌畀你哋聽！送畀大家，《Special Thanks》！」

喺呢個歡樂嘅節日，都係要唱返啲比較溫暖嘅歌，所以就揀咗呢首，而且作為就快畢業嘅師兄，見到班師弟師妹咁努力，我都想講句多謝。

「～這一次你讓我想起 我在堅守那真理～」
「～最好的你從來不會掉低我 我想說謝謝你～」

可能係上次唱過嘅關係，最後一次嘅副歌，竟然有觀眾同我一齊唱，呢一吓，我真係好感動！

「多謝大家！」

跟住落嚟，就係我哋嘅新歌《唯一只想找到那片星海》，諗返呢首歌嘅誕生，都幾奇怪⋯⋯先係喺夢入面彈出一段旋律，之後係我同樂少罷課去佔領嘅時候作嘅詞，其實都幾好笑。

「最後喺我哋嘅最後一首歌，歌名叫做《唯一只想找到那片星海》，希望大家都會搵到嗰一片星海。」

唱之前，我特登換咗枝木結他，因為呢首歌要用木結他掃Chord，先會有嗰種浪漫。

「～那天在這街中邂逅你 人海之中只得你 能夠打開我心扉～」
「～那瞬間在身邊的只有你 你令我的天變美 憑微笑洗去傷悲～」

呢幾句，我都係幫樂少執咗韻腳，我覺得個意境都幾好吖。

「～唯一只想 找到那片星海 將幸運記載～」

我聽得出樂少嘅Bass，變得好Warm，佢呢一刻好開心。

「～外太空只得你我 我寫的情歌 唱的內容是你 聽著聽著我唱這首歌～」
「～以後就算星海都裂開 我亦在你身邊守護最愛～」

唔知點解⋯⋯我唱呢句嘅時候，好自然咁望住咗毛子蘭⋯⋯當我意識到嘅時候，我感覺到自己嘅心跳突然之間亂咗，呢種感覺好特別⋯⋯

好彩，之後係Sky嘅Solo，我好快就調整返自己嘅節奏，繼續唱歌。

「～想現在 飛奔那片星海 守護著最愛～」

最後嘅一次副歌，我哋升咗半個Key，想將首歌嘅情緒推到最高。因為我本身係彈C Key，但係冇時間用Capo，所以我直接用C# Power Chord取代咗本身嘅C#。

「～讓我緊緊擁抱你 這一首情歌 唱給未來後世 要讓宇宙也聽這首歌～」
「～快樂密碼星海中散開 宇宙在那一刻 只剩你我～」

我今次冇特登望住任何人，只係專心唱埋首歌。

「多謝大家！我哋係『黑色西炒飯』！」

終於都完喇⋯⋯「黑色西炒飯」最後一次喺學校嘅表演⋯⋯跟住仲會有一首同Silas夾嘅歌，不過唔知佢會想點呢⋯⋯

最後壓軸嘅係Silas，我都好期待佢嘅表演，佢會唱「夏天雪人」嘅歌定Silas自己嘅歌呢？

「到咗今日最後一位表演嘉賓，我哋嘅師兄，有獨立音樂人——『夏天雪人』！！」MC介紹完Silas之後，佢就上台。

Silas將結他孭喺後面行出台，好有台型，成個人嘅氣場都唔同咗。

「我係『夏天雪人』，唔知中六嘅同學記唔記得我呢？上一次係5年前嘅聖誕聯歡日。咁啱又係聖誕喎，睇嚟真係一個『Christmas Miracle』，嗰日我仲爆咗副校長上堂放屁件事，結果竟然冇人理我。」呢個時候，台下面傳嚟咗一陣陣嘅笑聲，「今日見到大家咁開心，我就更加可惜，點解我讀書嘅時候冇Christmas Ball玩。」Silas自介嘅時候，用木結他幫做自己做音樂，令到明明好無聊嘅開場，變得好有趣。

「好喇，今日想唱啲英文歌，Let's Go。」

Silas唱嘅係《Never Gonna Give You Up》、《Just The Way You Are》、《I'm Yours》，估唔到冇唱「夏天雪人」嘅歌，反而係3首耳熟能詳嘅英文歌。Silas本身唱歌就好好聽，加埋一把木結他，成個Feel都好舒服，由台下觀眾嘅表情就知道，Silas帶咗一個輕鬆愉快嘅表演畀我哋⋯⋯或者「夏天雪人」對佢嚟講，都係一條啱嘅路。

到咗最後嘅一首歌，亦都係當日佢喺禮堂呢度唱嘅嗰首歌——《銀竹》。

（Tbc.）

123 - 《銀竹》

「跟住落嚟，想唱一首我自己嘅歌，不過呢首歌，要請埋『黑色西炒飯』嚟幫手！」Silas講。

聽到Silas咁講，我哋都準備再上台。呢首《銀竹》，正正係當年打響咗我內心搖滾之魂嘅歌，所以對我嚟講都好有意義，不過唔知係咪嗰個年代資訊太差，我搵極都搵唔返嚟聽，甚至睇住份譜，我都冇咩印象，到底我哋玩唔玩到呢首歌㗎？

《銀竹》一開頭就係瘋狂嘅拆聲Chord，雖然難度唔高，不過對於右手力道嘅掌控就好高要求，唔可以大大力猛轟落去，要有一種由心而發嘅力。呢部分由我嚟彈，我都唔知我應唔應付到⋯⋯不過比起我，我緊加擔心Silas頂唔頂到，始終佢嘅驚恐症都係一個計時炸彈，唔知會唔會突然爆發。

我開始掃Chord，拍子、音準，我都已經做得好好，但係始終覺得冇當年Silas嗰種震撼，我都唔知差啲咩，唯有簡簡單單，用心去彈。

Silas一開聲，我就見返當日嗰個閃閃發光嘅佢，果然Silas係屬於搖滾樂嘅人。

《銀竹》呢首歌講嘅係落雨嘅時候，要點樣自處嘅一首歌，「銀竹」本身就係雨咁解，古時嘅人見到連綿嘅大雨，就好似一條一條嘅銀色竹咁，所以就有呢個詞語，呢樣係李sir話我知嘅。「其實落雨又有咩好怕」，呢句說話個個都聽過，但係真係咁易咩⋯⋯係滂沱大雨之中，冇遮冇掩，要點樣做，唯有就係頂硬上，將打落嚟嘅雨當成係上天畀嘅磨練，同嗰啲一樣喺雨入面掙扎嘅人一齊繼續前進。

呢首歌，Bass要彈得好快，樂少為咗解決呢個問題，問我借咗塊Pick，我就將一直買咗冇用嘅三角Pick借咗畀佢，本來買係見有型，點知因為太大塊彈唔慣，所以一直都冇用，後來先知原來Bass手多數都會用呢款，樂少好似又學多咗一種新招式。

Silas唱得好好，雖然唔係聲嘶力竭，但係好有力量，有種不羈嘅傲氣，而且好有生命力⋯⋯我感覺到佢嘅生命燃燒緊。佢喺舞台上面嘅自信、從容、壓台感，全部都好犀利，比起上次睇「夏天雪人」嘅Show有過之而無不及。

台下面嘅觀眾好專心咁聽佢唱歌，唔使咩花巧嘅燈光、動畫，只係簡單咁唱歌，已經成功吸引到觀眾嘅耳朵同眼球，呢啲先係Silas，孫凝雨佢嘅真正實力！係我想追趕嘅嗰個人。

正當我以為Silas已經準備好可以全面回歸嘅時候⋯⋯佢嘅眼神閃過一刻嘅恐懼⋯⋯佢嘅呼吸、結他嘅感覺，都突然改變咗。

我意會到佢已經到咗極限，睇嚟佢唔可以再堅持⋯⋯

我畀咗個眼神我嘅隊友，喺Silas唱完半首歌之後，我哋將本來嘅Interlude改成Outro，《銀竹》就係喺只唱咗一半嘅時候完結。

「Thank you，Merry Christmas。」Silas擠出咗一個笑容，急急腳咁望開舞台⋯⋯

我哋都跟住Silas落台，我即刻就去搵佢⋯⋯

「你冇事吖嘛？」
「冇事⋯⋯」Silas呼吸有啲急促，似係冷靜咁平復情緒。

「好彩你哋識執生。」
「一聽到你呼吸嘅節奏唔同咗，我就估到你開始頂唔到。」
「吖！」Silas嗌咗一聲，「明明差唔多就可以唱晒。」佢好似又平靜返。
「唔緊要喎，慢慢嚟啦。」

「多謝你哋呀，我唱《銀竹》嘅時候，好似搵返一啲嘢。」
「係咩呀？」
「咁我又唔識講喎，可能係⋯⋯隨心？」
「即係點呀？」

Silas望住我後面：「睇嚟有人搵你喎。」，我另轉身。

「要播音樂呀。」搵我嘅係毛子蘭。

「對人哋好啲呀，佢望住你嘅眼神⋯⋯好溫暖，好似你唱歌咁。」Silas笑笑口，搭住我膊頭講，然後就孭結他走人。

「吓？」「哦⋯⋯」

我即刻就返去播歌，Silas同我講嘅嘢又係咩意思呀？毛子蘭望我嘅時候⋯⋯好溫暖？好似我唱歌咁。

「你哋最後嗰首歌，係你作詞㗎？」毛子蘭問我。
「我同樂少一齊作嘅，佢好似想送畀一個女仔。」我講。
「哦。」毛子蘭之後就走咗去做其他嘢。

佢個樣⋯⋯好似有啲失望？諗返起我頭先望住佢唱嘅時候，嗰下心跳⋯⋯真係好特別⋯⋯好似從來都冇試過⋯⋯

＝＝＝＝＝＝

完咗表演之後，就係最後嘅Last Dance環節，而家會播一啲容易跳嘅歌，例如係大家都熟嘅K-Pop或者一啲Disco會播嘅歌，因為呢Part會喺好似Disco咁嘅環境，我作為今晚嘅DJ，當然要好好控制音樂啦。

見到今晚嘅活動都算成功，學生會搞到個成功嘅Event，大家知道咗Keeley嘅存在，Silas搵返一啲嘢，我哋喺禮堂嘅Last Show又順利，我都老懷安慰，係唔知「鐵甲觀音」佢哋會唔會驚咗表演。

「劉星隨，我點先可以唱到好似你咁？」呢個時候，勇仔走嚟搵我。
「唱到好似我咁？我都唱得一般咋喎。」我講。
「我覺得你唱得好好。」
「可能係因為同隊Band一齊掛，有佢哋喺度，我先可以放心唱。」

「我哋係咪夾得好差？」
「你哋先中二，大把時間練啦，由基礎練起，大家跟住拍子，同隊Band一齊努力。」
「咁好啦，我會努力㗎，總有日『鐵甲觀音』會打敗你哋。」勇仔講。
「唔使鬥喎，夾Band又唔係比賽。」

勇仔去咗搵佢嘅隊友，雖然呢一刻佢哋好Green，好Raw，不過只要肯努力，一定會進步。

當我喺度做DJ嘅時候⋯⋯我班隊友又唔見咗人。樂少同Kristine玩得好開心，太一就喺甜豉油隔離，而Sky就唔見咗。

去到舞會嘅最後，我要再播一次華爾茲，畀大家跳真真正正嘅「最後之舞」。

（Tbc.）

124 - 最後之舞

喺表演之後，Sky就靜靜雞離開咗禮堂，因為時間去到差唔多10點，Sky已經好眼瞓，冇精神再留喺禮堂。今日對Sky嚟講，係一個新奇有趣嘅體驗，佢一方面覺得啲同學尷尷尬尬去請人跳舞好好笑，另一方面自己心裡面又好想同一個人跳舞，不過佢又唔可以邀請人哋，所以大部分時間都喺睇住劉星隨做嘢，但係見住佢同毛子蘭兩個都咁扭擰，Sky就想迫佢行動，不過見到劉星隨嘅反應，Sky就知道根本唔使自己操心。

Sky離開咗嘈吵嘅禮堂，行落去Canteen，想等舞會完結。佢本來有諗過上去5樓嘅樓梯轉角位，不過今日已經冇晒力嘅佢，選擇行落一層，嚟到咗Canteen。

行咗冇幾步，佢就見到一個著T恤、牛仔褲，同舞會格格不入嘅人，食緊舞會準備嘅到會外賣，仲拎住一碟大薯條。

「Miss Lui你，好肚餓？」Sky問。
「係呀，我要睇住你哋，都冇食嘢。」
「唔係仲有曹sir咩？」
「佢話收到Call，屋企爆水喉，所以即刻返咗去。」

Sky拎起Miss Lui碟入面嘅薯條。

「你哋都冇食嘢？」
「係呀，佢哋話想去阿錘屋企間餐廳食宵夜。」
「劉星隨屋企開餐廳㗎？」
「係呀，『流星記』。好好食㗎。」

「下次要叫佢請我食先得。」
「阿錘佢咁孤寒，肯畀折你都算好喇，不過佢媽媽就唔同，一定有折。」Sky笑笑口咁講。

Miss Lui細細啖咁食薯條，Sky望到呢個樣就覺得好好笑。

「你又笑咩呀？。」
「Miss Lui你，食嘢嗰樣都幾得意。」
「你落嚟做咩㗎，返上去玩啦，你最後一次中學Christmas Ball喎。」
「我想邀請去跳舞嗰個人又唔喺上面。」

「你想請邊個呀？」
「想請著T恤、牛仔褲，食薯條食到嘴邊有啲茄汁都唔知嗰個人。」

Miss Lui即刻抹嘴，「又唔提我，畀學生見到點算呀。」Miss Lui用紙巾仔細抹嘴。
「我咪你學生囉。」Sky笑笑口講。
「你個司徒天吖。」Miss Lui輕輕力拍Sky個頭。

Sky微微微咁摸下自己個頭。

「May I？」Sky向Miss Lui伸出右手。
「呢度跳？」Miss Lui望吓周圍，覺得完全唔適合跳舞。

Sky將Canteen嘅枱同櫈推開，再熄咗Canteen嘅燈，留返本來裝飾用嘅LED燈，令到Canteen瞬間唔同晒。

「咁樣⋯⋯得唔得呀？」Sky再次伸手邀請。

Miss Lui禮貌咁交出自己嘅右手，喺冇任何音樂、燈光嘅Canteen，佢哋兩個跳起咗今日嘅第一隻舞。

「你哋以前冇學過跳舞咩？」Miss Lui見Sky嘅動作奇怪，主動調整佢嘅姿勢。

「你要攬住我。抬高頭。挺直條腰。」

Miss Lui就好似平時上堂咁好認真講解要點跳舞，而SKy就畀任何時候都更用心聽書。雖然Sky嘅運動能力唔差，但係跳舞好似唔係幾得，準確啲講可能係同Miss Lui跳舞唔係幾得，幾次踩親Miss Lui。

「好彩你冇搵其喺女同學跳，唔係肯定畀你踩瘀隻腳。」
「所以我先要搵著波鞋嘅Miss Lui你跳囉。」Sky笑笑口講。

Sky呢一刻嘅心情就好似佢哋首新歌咁，「唯一只想找到那片星海將幸運記載」，同Miss Lui跳嘅呢隻舞，雖然好唔Formal，但係就好特別，佢已經搵到佢嘅嗰片星海，想好好記住佢。

時間差唔多，Miss Lui就話要返上去睇住佢哋將禮堂還完，而Sky就先留喺度自己還完Canteen。

＝＝＝＝＝＝

喺禮堂嘅太一今日前前後後加埋可能有十次想邀請甜豉油跳舞，不過全部都畀佢搵到籍口拒絕。見活動終於都差唔多完，太一想試多一次。

「Er⋯⋯」太一未開口，甜豉油就轉身走人。

雖然太一好失望，但佢都唔想打亂甜豉油嘅節奏，於是佢唯有尷尬一笑。

正當甜豉油行去第二邊嘅時候，Simmy快速行過去，「會長你要出去跳Closing呀。」Simmy同甜豉油講。
「吓？有呢Part咩？」甜豉油好驚訝。
「有㗎有㗎，快啲去啦。」Simmy推咗甜豉油出禮堂中間。

而呢個時候，會場嘅音樂突然轉成華爾茲，甜豉油同太一嘅眼神就對上咗，太一再次禮貌咁上前。

「May I？」太一伸出手邀請。

呢個時候，全場都期待甜豉油跳舞，全場嘅目光都聚焦喺佢哋兩個身上。

冇得再避嘅甜豉油接受太一嘅邀請，同太一喺禮堂中間跳起咗舞會嘅Closing。

「邊有呢Part㗎。」甜豉油講。
「有好多嘢出現之前，都係冇人預計過。」太一講，佢已經拖住咗甜豉油，準備開始跳舞。

甜豉油好似有啲緊張，但係太一就從容不迫，因為佢知道呢一刻佢哋嘅節奏終於對上咗。

「放鬆啲就得。」太一講。
「嗯。」甜豉油望住太一，眼神好相信佢。

因為頭先同Simmy跳過一次，加上作為鼓手嘅節奏感，太一帶得非常好，甜豉油都慢慢跟上咗太一嘅節奏，佢兩個跳得悠然自得，好似一早識跳舞咁。

甜豉油嘅心裡面忘記咗宇宙嘅安排，相信眼前嘅事，享受同太一嘅舞。重輕輕、重輕輕嘅節奏之下，兩個人嘅呼吸同步咗，遊走喺燈光之中，為今年嘅舞會劃上咗句號。

（Tbc.）

126 - 黑面

經過Christmas Ball之後，樂少約咗我哋出嚟，原因係要影團照去做JSBA嘅宣傳，為咗隆重其事今次嘅拍攝，我哋換咗一身嘅全黑衫褲，嚟到咗碼頭，樂少仲特登請咗個「攝影師」嚟。

「好，企直啲。唔好笑。Chok住。」

呢個攝影師係佢細佬健仔，佢仲拎咗部單反嚟。

「喂樂少我哋做咩要全黑呢？」我問。
「我哋係『黑色西炒飯』，唔通著白色咩。」樂少講。
「上次Miss Lui咪講咗全部用一樣色調，視覺上會好悶囉。」我講。
「咁我又唔係Miss Lui，鬼識襯咩，全黑一定冇死。」樂少講。

呢單嘢樂少跟開，所以我哋都冇咩所謂。

「阿錘，你擺個型啲嘅Pose得唔得呀？」健仔講。
「吓？點呀。」我除咗影相差，畀人影都唔多掂，叫我擺Pose其實真係好難。

「你當自己係明星咁啦。」樂少講。

我點當呀？我連Instagram Icon都係求其影枝結他，平時更加唔會自拍，同人影相就一係Peace sign，一係傻笑畀手指公，點當自己係明星呀。

我睇吓佢哋影成點⋯⋯呢三個人又影得幾好，樂少好似Man咗，太一就用自信搭夠，而Sky就一貫花美男嘅樣，係我個樣唔知想點，應該算係「痾屎唔出」？總之就好奇怪啦。

「阿錘你，不如黑起塊面啦。」Sky講。
「黑面？」
「係呀！阿錘你黑面個樣好睇過平時。」樂少講。
「唔係真事呀嘛？」

「都OK嘅，你一黑面唔笑，起碼冇咁似個傻仔。」太一講。

我難以置信，原來我最好睇嘅表情係黑面⋯⋯

於是我全日就黑住塊面，插住袋，眼神鄙視所有人，而結果⋯⋯又好似唔錯，都影得出我哋嘅特色。我嘅憤世嫉俗、樂少嘅鬼馬搞笑、太一嘅自信熱血、Sky嘅慵懶隨性，都收貨啦。

影完相之後，我哋就去咗附近嘅M記。

「係喇，日期訂咗係1月17號喺『蒲英』。」樂少講。
「咁幾好喎，又冇撞我哋Mock，其他人又考完試。」太一講。
「係呀，我哋計過㗎。」
「咁幾點呀？」我問。

「3點開始，大概會去到6-7點啦。8隊Band嘅Show喎。」
「有冇排到次序呀。」
「有呀。我哋係尾二，抽籤決定㗎。」
「尾二都好吖，最慘係第一個，觀眾肯定未Warm Up啦。」太一講。

樂少打開電話，望一望抽籤結果，「第一個出嘅係東道主嘅『EYE BLUE』呀，佢哋鼓手Nic就係『Timber』個中學生鼓手，JSBA都公認佢係學界嘅第一位。」樂少講。
「就係佢呀。」
「Nic係叻仔嚟㗎，今次個Show話佢做咗一半都唔過分。場地、Sponsor、Admin嘢都搞咗好多，名校生即係名校生。」樂少用讚揚嘅語氣講。

「仲有咩勁人呀？」我問。
「仲有⋯⋯『Reason X』你哋都識啦，其他我冇睇過就唔知勁唔勁，『郭彩鑫』嘅Coman，即係好似你嗰個，都話會用全部原創歌。跟住有『文道』嘅『我邊的球』，同『芸利會』嘅『Easy Sexy Baby』都好似好勁。」

聽樂少講，我有少少興奮，一來係可以聽到好多Band，但係又有少少擔心，唔知我哋同其他人嘅實力差幾多，又唔知觀眾會有咩反應。

「係呀，我哋要賣飛呀。」樂少講。
「吓？」我講。
「係咁㗎啦，你估我哋係大明星咩，自己Band緊係要自己賣飛啦。」
「咁我哋要賣幾張呀？」

我都冇諗過賣飛呢個問題，雖然我都有聽過外國Indie Band開Show都要自己賣飛，只係冇諗過呢個問題咁現實啫。

「因為有8間學校，佢哋想有200人，其實每間學校都係賣25張，但係『Reason X』同『EYE BLUE』已經賣咗唔少，我哋賣10幾張就得。」

好彩啫，10幾張飛嘅話，我諗我哋都賣得晒。

＝＝＝＝＝＝

把握假期嘅最後，我哋捉緊時間練多幾次，因為每隊Band得20分鐘時間，所以我哋啱啱好可以唱晒我哋嘅幾首原創歌。

要表演嘅歌都已經玩到好熟，我覺得已經唔使點練，而家最重要係調整好心態。講講吓，其實有啲似考試，只要平時有好好溫書，去到考試前根本唔使點記，反而好好放鬆心情就可以。

假期完結之後，又係新嘅一年。一開學就係中一至中五嘅考試，至於我哋中六嘅學生就要繼續上堂，等到月尾就考Mock。

於是，我哋就喺SU房門口同Canteen貼咗宣傳Poster，呢張Poster好似係「孝基」嗰邊整，又整得幾靚，我哋幾個都有喺張Poster度，有一張相仔，感覺幾神奇。不過因為考完試好多人都直接走，根本冇留意到張Poster。 

呢個時候，我見Prefect室有個熟悉嘅人，所以就行入去。

「溫緊書？」
「係呀。」
「睇唔睇Band Show呀？」
「幾時呀？」

「17號，『蒲英中學』，下晝3點開始。」
「好呀。」

張飛嘅價錢係象徵式嘅10蚊，原因係唔想大家買咗飛但係唔出現。

「你玩埋呢個Show，記住要溫書呀，月尾考Mock。」
「我間中都有溫書㗎。」
「算你啦。」毛子蘭講。

好彩有毛子蘭幫我買張飛，如果唔係⋯⋯可能我就賣唔出飛。而且，有佢喺度，我會唱得放心啲。

後來嘅幾日，我哋啲飛都賣晒，我哋學校夾埋應該都唔只賣咗20張。有返啲自己學校嘅同學去睇都好，起碼唔使驚互動唔到。

＝＝＝＝＝＝

2015年1月17號

時間嚟到咗1月17號，係JSBA嘅日子。下晝12點，我哋已經到咗「蒲英」，呢度嘅面積可能係我哋嘅兩倍，而最令我驚訝嘅係佢哋嘅人數畀我想像中多，成間學校應該有過百人，睇嚟應該係睇佢哋隊「EYE BLUE」。

因為《星海》要用木結他，所以太一幫我孭咗學校枝木結他出嚟，好少見佢孭住結他。

我哋4個好快就搵到咗準備室，睇嚟我哋都算早到，因為呢度得第一隊出場嘅「EYE BLUE」，同第二隊出場嘅「伽藍中學」代表－「十九餅」，我諗佢哋隊名嘅意思係想食諧音粗口？而餅就係Band掛？

（Tbc.）

127 - 軍隊

樂少介紹咗我哋同「EYE BLUE」、「十九餅」認識，兩隊拍埋一齊嘅時候，會明顯覺得Nic係好有氣場，佢個身型好似游開水咁，有好橫嘅膊頭，其他人喺佢隔離好似好弱，唔通呢啲就係學界第一鼓手嘅氣勢？我之前有聽過「Timber」嘅Live，畀佢哋揀中做新鼓手，Nic嘅實力肯定好強，所以我對「EYE BLUE」好有興趣。

「Hello，歡迎你哋，『黑色西炒飯』。」Nic講。
「你好。」
「唔知樂少有冇同你哋講，我揀籃球場開Show就係因為上年睇咗你哋條片。」
「多謝⋯⋯」

我留意到Nic嘅眼神好似特別注視Sky咁。

「一陣可以做咗Sound Test先喎。」Nic講。
「好。」

我哋分別同「EYE BLUE」，仲有「十九餅」佢哋傾咗陣偈。「EYE BLUE」除咗鼓手Nic，仲有主音Zeno、結他手Hubert同Wayne、Bass手Mingo，幾個人都好有台型，明明係同齡人，但係感覺上佢哋就成熟好多，係咪因為讀名校嘅關係呢？另外，「十九餅」就比較輕挑，佢哋主音方濟好似唔係好尊重人，同我哋傾偈期間都掛住玩電話，另外一位彈結他嘅柏翹就有禮貌啲，而且都幾健談，聽佢哋講，佢哋會Cover幾首勵志歌。

呢個時候，我哋落到籃球場，準備試聲。

而我哋竟然見到Rachel，但連Sky都覺得好神奇，因為Sky原來有問過Rachel嚟唔嚟，但Rachel就一路話唔得閑。

「琳琳你，又會喺度嘅。」Sky問。
「係陳積請我嘅，我諗住冇嘢做咪嚟支持吓囉，順便睇你哋。」Rachel講。
「原來係陳積呀。」Sky笑笑口講，露出一個意味深長嘅樣。
「你呢個樣咩意思呀。」Rachel輕輕皺眉講。

「係呢，Miss Lui嚟唔嚟呀？」Rachel問。
「佢要改卷呀。」Sky搖搖頭講。

我哋開始試聲，唔知係咪因為有大樂器行Sponsor，我覺得啲聲好正，夠實又夠厚，係Rock嘅音色。不過我把聲就唔係好入咪，可能同佢枝咪有關，所以我好任性咁換咗我枝SM58試，準確啲講係李sir枝SM58，不過而家係我擁有。駁咗SM58之後，就啱返Feel，睇嚟我把聲同SM58夾啲。

接住我哋試聲嘅係「白雲會郭彩鑫中學」嘅「No Need Sugar」，佢哋最值得留意嘅係主音Coman，根據樂少同Kristine所講，話呢個人嘅氣質同性格都好似我，所以我特別好奇。

佢哋成隊Band 5個人喺我面前行過，但係我一眼就估到邊個係Coman。因為佢除咗頭髮係直之外，打扮真係好似我⋯⋯牛仔褲加Band Tee，而且個樣都好憤世嫉俗。不過佢唱歌嘅技巧，應該喺我之上，音色好有辨識度，唱腔好有個人特色，而作嘅歌都唔錯，雖然就唔係我最鍾意嘅嗰類。

佢哋試完聲之後，樂少介紹咗我同Coman認識。

「你就係阿錘？我聽樂少講，我哋嘅感覺好似，睇完你哋Sound Check之後我就明，你唱歌⋯⋯有火。」
「多謝⋯⋯我覺得你嘅唱功好好，把聲有辨識度，唱腔又有特色。」

Coman個人又幾Nice，我哋傾咗好耐音樂，感覺上我哋Channel係相似嘅。

＝＝＝＝＝＝

就嚟到咗3點，MC出嚟叫人要Follow Sponsor嘅社交平台，而且仲有啲贈品送，唔知係咪名校效應，除咗能量飲品同補習社，仲有啲零食店，書店贊助，真係好犀利。但更令我估唔到嘅係今日嘅MC竟然係上次聯校教職員晚宴訪問我哋嘅Yoyo－邱繕瑤，同埋我哋班嘅Monica。

「樂少，你唔話我哋知係Monica做MC嘅？」我講。
「我冇講咩？可能太忙啦，Monica係Nic提議㗎。Monica依家喺街外好紅，唔只係做Model，仲有拍電視節目，雖然係小角色，但冇家境又出到圈嘅中學生係好犀利㗎。」樂少講。
「嘩，我完全唔知喎。」
「所以咪話你係夾Band白痴囉。不過唔知係咪對太耐，我又唔覺得Monica好靚。」
「你而家眼裡面得Kristine之嘛。」
「又係嘅。」樂少竟然成個白痴咁喺度傻笑。

第一隊出場嘅「EYE BLUE」真係好有氣勢，我聽到嘅係一半人喺度尖叫，淨係個勢都贏晒⋯⋯

「EYE BLUE」選擇咗玩「Timber」嘅歌，本身佢哋嘅風格同「Timber」就好似，一樣係好重型嘅Band。一開始Nic嘅鼓就有種震耳欲聾嘅氣勢，而且結他都好犀利，啲Riff好Catch到耳仔，Bass 好巧妙咁將Nic嘅Bass Drum一拍一拍咁傳到觀眾嘅耳朵。本來我以為佢主音會係好似「Timber」咁用Screaming嘅方法唱，但係佢唔Scream都同樣做到氣勢。

佢哋就好似係城堡前面嘅軍隊咁，有氣勢、豪氣、威嚴，而呢隊軍隊喺烏雲密佈嘅天氣入面，仍然係賣力作戰。

主音輕柔之中，帶有激情嘅唱法，反而襯托出Nic嘅鼓，每一下都好似直接打入人嘅心藏咁，唔係咩特別嘅花式，純粹用力度嘅變化，打出咗好有Dynamic嘅意境，真係好震撼。

佢哋真係同我同齡？我感覺佢哋同出面，甚至外國嘅Band比都唔輸。

理所當然，全場一齊拍掌，連我都忍唔住拍手⋯⋯不過要數佢哋最勁嘅，一定係Nic，佢而家肯定已經係學界第一鼓手，雖然咁講太一會唔開心，但係Nic嘅實力遠遠強過太一。硬要對位比較，我哋只有Sky係好過佢哋，雖然Hubert同Wayne都彈得好好，但兩個都有失誤，而且音準唔夠好，如果係Sky一定唔會出現呢啲問題。

就係咁，JSBA第一個表演就由「EYE BLUE」以壓倒性嘅氣勢完結咗。

（Tbc.）

128 - 葡國雞飯

跟住「EYE BLUE」出場嘅係「伽藍中學」嘅「十九餅」，佢哋隊Band無論造型定台風都好穩陣，穩陣到有啲老土，連使用嘅音色都係，係將結他嘅Chorus Effect打開，令到一聽就有種回到1990嘅感覺。

撇除我對佢哋主音方濟嘅壞印象，其實都算係唔錯，如果早20年出世，應該會更加受歡迎。

喺「Reason X」出場之前，我哋會合咗毛子蘭佢哋，一路聽「十九餅」嘅經典金曲重溫，一路討論頭先「EYE BLUE」嘅Live。今日毛子蘭佢哋都著咗學生會件特別版T恤，唔知係咪夾過呢。

「嗰隊『EYE BLUE』真係好勁，Nic嘅實力深不可測。」樂少講。
「係呀，嗰種Dynamic，同埋控制力，話咗畀人聽，打鼓都係要感情。」太一講。

我聽得出太一語氣裡面，有種羨慕。

「你哋要唔要飲嘢呀？」毛子蘭問。
「好喎，我要檸檬茶。」樂少講。
「我都想飲啲水呀。」Sky講。
「我⋯⋯唔使喇。」太一講。

「咁你呢？」毛子蘭問我，「不過你都係飲維他奶㗎啦。」
「好呀。」
「咁我去買啦。」

我望住去買嘢飲嘅毛子蘭，覺得好似怪怪哋咁⋯⋯

＝＝＝＝＝＝

毛子蘭去到附近嘅便利店，幫佢嘅朋友同「黑色西炒飯」買嘢飲，佢好快就搵到晒佢哋要嘅飲品，但係就冇喺雪櫃拎維他奶出嚟。佢反而特登去買多咗一枝熱嘅維他奶，原因係唔想劉星隨出Show前飲凍嘢，會影響狀態。

就喺佢準備畀錢嘅時候，佢前面畀錢嘅係一個同劉星隨好似嘅男仔－「No Need Sugar」嘅Coman。

「先生，你枝麥精差兩蚊喎。」店員講。
「吓，咁呀⋯⋯八達通吖唔該。」Coman講。
「負錢喎。」
「咁就弊喇，我好似冇錢添⋯⋯」Coman嘗試搵身上嘅錢。

佢喺銀包搵出一個又一個毫紙，但係似都係唔夠錢。

「我借畀你吖。」毛子蘭拎出一個2蚊銀。

呢一刻突然出現拯救咗Coman嘅毛子蘭，就好似上天派落嚟嘅天使咁，令Coman嘅心有種中箭嘅感覺，佢似乎對毛子蘭⋯⋯一見鍾情。

＝＝＝＝＝＝

到咗「Reason X」表演嘅時候，上次見完已經係成年前嘅事，唔知佢哋又成長咗幾多呢。

今次佢哋帶嚟咗一首英文歌《Bring Me To Life》，我記得原本隊Band都係女Vocal，而且好唱得，而且編曲都係偏Goth Metal同New Metal，如果佢哋玩到，實力就肯定係比上年高咗一個級別。

Bowie同上年一樣，都係扎孖辮上台，我覺得佢控場嘅能力又高咗。點講好呢，本身已經生得可愛，觀眾嘅眼球好容易就畀佢捉到，但係而家嘅氣場仲勁咗，完全駕馭到首歌，最令我驚訝嘅係佢哋嘅Bass手馬勝熙，做咗好多Sceam同Rap嘅部分。呀風嘅結他亦都係一如上次咁強，反而係另一個結他手陳積，似乎有大幅度嘅進步。鼓手温漢權嘅水平，雖然同Nic有差距，但係我覺得都係喺太一之上⋯⋯

Bowie上年嘅歌聲已經可以用強力嘅胸聲震懾觀眾，但今日更加開發埋頭腔，令到佢把聲好有穿透力。

如果話「EYE BLUE」係一隊軍隊，咁「Reason X」就係女皇同騎士，兩隊都好犀利，實力強、風格鮮明、最重要係氣氛好好。真係有一種Rockstar嘅氣場，呢樣係我哋暫時做唔到⋯⋯

呢個問題，其實我自己都思考過好多次，我哋做到嘅風格唔係好似「EYE BLUE」或者「Reason X」咁，冇辦法壓住個台，甚至我哋嘅風格係咩⋯⋯我都仲搵緊。

跟住落嚟，就到Kristine嘅「HawaiiMiles」，佢哋嘅風格係Pop Rock，某種意義上，應該係Pop多過Rock，因為Kristine彈嘅琴⋯⋯係好情歌嘅彈法，係Pop Song會聽到嘅琴聲。其他成員嘅表現⋯⋯就一般啦，同「EYE BLUE」或者「Reason X」比嘅話，就好似學界同港超嘅分別，「HawaiiMiles」唯一最可取嘅就係Kristine嘅樣貌，樂少望住Kristine個樣冧到呢。

跟住就到Coman隊Band，我都幾期待佢哋嘅Live。如果要形容佢哋嘅曲風，我會話係葡國雞飯，假設咖哩係好辣又難入口嘅Indie，佢哋就係加咗椰汁落去，令味道中和咗，觀察可以聽得舒服啲。Coman嘅唱功比我更好，而且佢嘅專職嘅主音，可以好好咁帶氣氛，所以我估佢哋嘅Live好好睇。

呢個時候，毛子蘭都返到嚟。

「嗱，水就Sky嘅，檸檬茶就樂少嘅，蘋果汁係小悠嘅⋯⋯」毛子蘭分緊飲品。

頭先毛子蘭急急腳咁去買嘢飲，我諗佢可能有啲少問題。

「Sky，借枝水畀我吖。」我問Sky借咗佢未扭開嘅水。
「嗱，阿錘你，又想飲水咩？」Sky講。
「唔係呀。」

我拎出咗一張乾淨嘅紙巾，摺成成一個小球體，再滲咗少少水，然後畀毛子蘭。

「放喺耳仔啦。係咪頭先音樂太大聲，轟親你？」我問毛子蘭。

毛子蘭將我整嘅土炮耳塞放入耳仔，其實上次同佢睇「夏天雪人」嘅Show我都有留意到，毛子蘭應該好怕太大聲嘅音響。每一次，我哋出Show佢都企到好後，但係頭先就同我哋企得好前，我估佢係頂唔順太大聲。

「勁喎，冧死人啦。」樂少細細聲用手肘撞我。

「係咪得㗎？」毛子蘭問我。
「我以前初初睇Show都係咁㗎。」我講。

毛子蘭畀咗枝熱嘅維他奶我。

「熱維他奶？」我用啲驚訝，佢竟然買熱。
「人哋擔心你飲凍嘢會傷聲呀。」樂少又用手肘撞我。
「唔該⋯⋯」估唔到佢又幾細心。

呢個時候，「No Need Sugar」已經開始緊表演，佢學校啲人都睇得幾投入。

「呢個人頭先排我前面買麥精呀，不過佢唔夠錢，我借咗兩蚊畀佢。」毛子蘭講。

Coman開Show前仲有時間走去買嘢飲，咁Chill㗎咩。不過佢嘅歌都幾好聽，係一碟好嘅葡國雞飯。

（Tbc.）

129 - 最平凡的表演者

第六隊就到「文道中學」嘅「我邊的球」，我對呢個名好好奇，查咗之後發現係嚟自「The ball is in someone's court」呢句Phrase，「我邊的球」意思係決定權喺自己手上。

雖然佢哋呢個名幾有趣，但係偏歐美嘅曲風就表現得一般，只係好努力扮歐美風，但係就忽略咗音質同好多Action位，有形無神。

而之後，終於到我哋喇。不過上去之前，我哋有個成員，今日好似唔在狀態。

「太一，精神啲啦。」我同太一講。

自從睇完Nic嘅表演之後，太一就好靜，連飲品都唔要。

「我覺得我哋做唔到好似『EYE BLUE』同『Reason X』咁。」太一講，「或者應該話⋯⋯我打唔到好似Nic咁，壓唔到台。」
「咁就緊係唔得啦。」甜豉油同太一講。
「連你都聽得出呀。」太一個人Down晒。
「因為你都唔係佢，你就係你自己，呢樣唔使宇宙講我都知道。」甜豉油講。

甜豉油呢句，同時都點醒咗我。

「冇錯。我哋又唔係其他人，雖然連我都概括唔到我哋嘅風格，不過我哋一樣有我哋『黑色西炒飯』嘅風格，壓唔到台就將觀眾帶入去我哋嘅音樂！」我同太一講。

果然，太一係一點就著嘅火藥，佢已經回復返能量。

「嚟啦！」太一又想做嗰樣老土嘢。

不過今次我係第一個伸出手，覺得我都係時候嚟carry返我嘅隊友。

「下一隊表演嘅係，我學校嘅樂隊－『黑色西炒飯』，上年暑假前佢哋為咗開Band Show差啲要畀人踢出校，熱血到咁一齊嚟聽吓佢哋嘅歌啦！」Monica介紹我哋之後，我哋就行上台。

「大家好，我哋係『康慕會寧華中學』嘅『黑色西炒飯』。我係主音劉星隨，左面嘅係結他手司徒天，右面係Bass手關志樂，仲有我哋嘅鼓手張太一。」呢句開場白，我都已經唔知講過幾多次。

「我哋唔嘥時間喇，直接嚟啦！」我講。

 「～我已試過太多次退讓過～」
 「～再退我怕養出最壞惡魔～」

同文化祭Band Show一樣，我諗住用《忍樣》打頭陣，高速嘅BPM，可以畀太一同樂少Show Off，中間嘅Double Lead可以畀其他人睇到Sky嘅結他實力，而且都好啱有火嘅我唱！

「～太多忍讓太多太多忍樣 ～」
「～忍樣叫我呢樣嗰樣嗰樣呢樣～」
「～叫我怎樣虛偽的在忍讓～」

到咗Solo，同我諗嘅一樣Sky應付得非常好，完全唔會輸畀呀風佢哋。喺Sky隔離我覺得自己都彈得好咗，情況就好似Kobe Bryant打籃球，身邊嘅隊友睇上去會勁咗咁。

觀眾對我哋嘅Double Lead都好有反應，因為今日暫時得我哋有做Double Lead，反而呀風同陳積佢哋就冇咁玩。

《忍樣》之後係《Special Thanks》，因為我哋討論過之後，覺得《Special Thanks》係最Ear-catching嘅，希望會吸引到觀眾跟住我唱。

「～感激你在我身邊 竭力的給我打氣～」
「～所有記憶 能留低到下世紀～」

有嚟撐場嘅「寧華」同學都有跟住我唱，我留意到我哋嘅小Fans Keeley都有嚟，仲有一齊唱添。對我自己嚟講，每次唱都 《Special Thanks》都覺有人畀佢力量我咁，特別係當觀眾肯合唱，就更加有Feel。

「第三首歌係我哋嘅新歌《唯一只想找到那片星海》，我覺得可以遇上一班隊友，一班支持我嘅朋友，你哋就係我嘅星海，我想好好記住佢。」《星海》之前，我要講多少少嘢，因為我要用木結他，所以一路講一路換結他。

「～唯一只想 找到那片星海 將幸運記載～」
「～外太空只得你我 我寫的情歌 唱的內容是你 聽著聽著我唱這首歌～」
「～以後就算星海都裂開 我亦在你身邊守護最愛～」

今次我唱呢句嘅時候，我諗返起上之同毛子蘭跳舞嘅畫面，好似⋯⋯佢就係我要搵嘅星海咁。望住企喺前排嘅佢，好似聽得好陶醉，我諗耳塞發揮到隔音嘅效果喇。

「～想現在 飛奔那片星海 守護著最愛～」

唔知係咪因為係情歌嘅關係，感覺上台下面試嘅觀眾睇得好投入，拍手聲係最大嘅一首。

其實《星海》都真係幾好聽，係我哋目前為止，完成度最高嘅一首歌，甚至係情感控制都做得幾好。

「～我懶到只想夾足一世Band～」

最後係《懶》，因為《懶》係我哋第一首原創歌，而且我都好想將「我懶到只想夾足一世Band」呢個諗法，講畀大家聽。

「～我懶到只想這刻啦罅喇～」

去到最後一次副歌，我哋一齊停低樂器，一邊拍手大合唱，首先係我哋學校嘅同學一齊啦，然後慢慢愈嚟愈多同學加入。

本來《懶》係會喺一片合唱吓完結，但係我又突然之間，想Repeat多次副歌。於是
乎我望向我班隊友，然後再對住咪嗌。

「再嚟多次，跟住我！1、2、3！」我再扭開結他嘅Volume，我聽到鼓聲有跟上，於是就放膽去唱。

「～我懶到只想夾足一世Band～」

今次，我用咗最多嘅力唱，想毫無保留咁爆一次。

雖然即刻已經Feel到喉嚨痛，但係睇住下面嘅人咁投入，我就覺得值返，只要下面嘅人夠投入，有同我哋一齊享受首歌，我就覺得足夠。

「多謝大家！我哋係『黑色西炒飯』！！」我把聲已經沙晒。

就係咁，《懶》就結束咗，而我哋亦都完成咗DSE之前最後一場表演⋯⋯唱完4首歌之後，我好似明白咗我哋嘅風格，到底係啲咩。

既然唔可以好似Rockstar咁有壓台感，我哋就要成為最平凡嘅表演者，就好似行入普通餐廳都叫到嘅西炒飯咁，我哋要成為最平凡，但又最感動到人嘅樂隊，唱出我哋所相信嘅嘢，要同我哋嘅觀眾成為好朋友。

（Tbc.）