【搖滾準備】《我們的某校勁BAND》【重開】

呢個年代，仲有人聽Band咩？

「某校勁Band」，顧名思義係某間唔知咩學校嘅一隊Band，但係咩叫「勁」呢？通常都係串嗰啲實力一般，甚至係差嘅Band。

呢啲「某校勁Band」會畀人放上網，喺網絡世界成為咗被恥笑嘅傳說。

不過就算畀人笑，畀人鬧，都仍然有無數人嘗試挑戰成為真正嘅「某校勁Band」，為嘅就係想實現自己心入面嘅樂隊夢⋯

我知冇人想聽，但係我都係想唱喎⋯⋯

每隊Band背後，都有一個故事。

今日我想講一個關於我同我隊「某校勁Band」嘅故事。

時間返到2013年，一個我仍然係中學生嘅時代⋯⋯嗰時嘅我只有一個人生目標－「我要夾Band！我要夾足一世Band。」

2013年 9月開學日

「劉星隨⋯⋯劉星隨⋯⋯劉星隨！你再瞓就同我出去罰企！」呢個叫我去罰企嘅女人係我學校嘅副校長，亦都係我哋班嘅英文科老師。

「Errrr⋯⋯哦⋯⋯」我點點頭，「對唔住，副校⋯⋯」如夢初醒嘅我，打開英文書，繼續望向窗邊發白日夢⋯⋯

你問我嗰名？我叫劉星隨。係呀，我父母都唔知受咩刺激，幫我改咗個咁「順口」嘅名，結果由細畀人笑到大，個個都問我「流星錘點用㗎？」、「你屋企開武館㗎？」，到咗依家中五呀，都仲有人笑緊我。雖然嗰名係會畀人笑，不過都有好處嘅，起碼人哋會記得我囉⋯⋯特別係訓導組啲老師，「劉星隨，你又唔剪頭髮，係咪想記缺點呀！」，係呀，我頭髮係有啲長，加埋天生攣毛，成日都畀老師懷疑我電髮。

我間學校？康慕會寧華中學，區內一間Band 2中學，由一間大企業康慕集團企下嘅慈善團體－ 康慕會創立。校風OK嘅，不過升大學比率就唔算好高。

至於我係個咩學生？雖然交齊功課，科科合格，但係就冇科高分，做嘢得過且過，唔會參加課外活動，唔會惹事生非，不過就好懶，喺學校好平凡嘅嗰種平凡學生囉。

如果要講我嘅夢想？我想夾Band！好想夾Band！好想好似嗰個人咁⋯⋯

----------------------------------------------

今年嘅開學日有啲特別，因為我哋學校嚟咗個新校長，40幾歲，仲後生過唔少老師，佢個名叫鄧利多，不過同鄧不利多應該冇關係嘅。至於教我哋班英文嘅何副校就慘啲喇，做咗20年都升唔到做校長。開學日仲會介紹埋新加入嘅老師，其中有一位新嚟嘅中文科Miss都幾靚女，好似仲會教我哋班添，因為上年教我哋中文嘅Miss Chow啱啱退咗休。

新校長同上任校長最大分別係佢好似好關心學生會選舉咁，特登安排咗個時段畀候選內閣介紹自己，可能今年會多返啲校園生活掛。早幾年除咗必定有嘅秋季旅行，校園生活可以話係零，真係悶到爆，希望今年學校會有啲改變啦。

「好喇，各位同學，聽日記得準時返學校上堂。Goodbye Class。」講緊嘢嘅係我哋5D班嘅班主任文sir。其實我同文sir係冇咩接觸，雖然佢係班主任，但係因為佢教BAFS，所以只有幾堂嘅班主任堂我係跟佢上。

「喂，阿錘！放學去邊呀？」

「唔知呀，尖沙咀掛⋯⋯」

「又去通利呀？」

「係掛⋯⋯」

問緊我嘅係我老友樂少，候選學生會嘅總務。佢係我少數嘅朋友，我平時唔多出聲，佢就嘈到拆天，可能就係咁由中一到依家，我哋都仲好friend。

「儲夠錢買結他喇咩？」樂少問。

「未呀，但係想彈吓囉⋯⋯」

「咁不如唔好去住吖。幫我貼Poster先啦，星期五投票呀。」

「喇，要爭取選民嘅支持呢。如其靠海報，不如靠賄賂。Yeah，押韻Get ！要我貼海報，請我食燒賣囉。」

「跟據競選守則，我係唔能夠咁做㗎。嚟，貼海報啦！」

「頂你吖！」

我同樂少由5樓開始貼海報，逐層逐層貼落去，終於貼到一樓。但係一樓呢個地方對我呢啲頭髮過長嘅學生，係一個唔可以足及嘅禁地。因為一樓，正正係教員室嘅所在地。

「喂，樂少不如唔好貼一樓啦⋯⋯我未剪頭髮呀。」

「驚咩吖，啲老師一早收哂工啦。」

「何副校未吖嘛！」

「快手快腳唔驚啦！」

「死仔吖！」

就喺我哋準備走嘅時候，何副校離遠已經望到我，我打算即刻衝落樓梯，但樂少竟然撞邪咁，郁都唔郁⋯⋯

「喂搞咩呀樂少？走啦！」

樂少終於有反應，佢問「嗰個女仔邊個嚟㗎？」我伸嗰頭望一望「好似轉校生嚟，A班㗎。我Physic堂見過佢。」

「我終於知道咩叫一見鍾情喇⋯⋯」樂少發住姣咁講。

「咩呀，一般啫，咪同鍾文、霞姨、Carol佢哋差唔多⋯⋯」

「劉星隨，我對你好失望呀⋯⋯你見唔到佢頭上有個光環咩？嗰對水汪汪嘅眼，再加個楚楚可憐嘅笑容⋯⋯係女神呀！」

我心諗楚楚可憐點會有笑容呀⋯⋯呢條友真係未見過女人咁。

「我去老尖呀，聽日見⋯⋯」

「喂，你聽日有冇Physics堂呀？幫我抄牌吖。」

「冇興趣喎，Bye。」

我揮揮手，瀟灑咁離開。

----------------------------------------------

尖沙咀通利琴行，係我放學冇嘢做就會想去嘅地方。我呢，其實彈咗幾年木結他㗎喇，不過一直都只係自學，而且只係彈緊一枝300蚊嘅平價貨，但係要夾Band一定要買返枝電結他先啦，所以我努力儲緊㗎喇⋯⋯

「咦，同學仔又係你呀，買枝返去玩啦。」有個店員哥哥同我講。

「遲啲吖，我就快儲夠錢喇。」

「想買Fender呀？」

「係呀！」

「講真吖，買Squier啦，雖然係副廠，但係聲其實唔差好遠㗎，技術先係重點，睇嘢啦！」

呢個店員哥哥用咗枝Fender同Squier示範咗畀我睇，其實我又真係唔係好聽得出分別，佢彈完之後畀咗個耳機我。

「嗱，你想繼續試都得嘅，不過唔該你戴Headphone喇。」

「點解呀？」

「同學仔，你開個Distortion彈《愛我別走》會被人笑㗎。」

「咁我彈開木結他吖嘛！」

「戴住佢啦，下次你買結他搵我啦，我叫達仔呀。」

「唔該。」

通常彈到七點左右，我就會返屋企。因為學校都冇咩人識樂器，想夾Band嘅就更加少。

我成日都喺度諗，究竟我幾時可以夾Band呢⋯⋯又幾時可以好型咁上台表演呢⋯⋯不過依家手結他咁廢，都係再練下先啦⋯⋯

你問我點解想夾Band？咁係因為我中一嗰年睇嗰場Show⋯⋯

（Tbc.）

想講呢個Post其實開過一次
不過因我改咗Username
所以決定重開

Penana已經斷斷續續出到30幾集
會盡快放上嚟
https://www.penana.com/story/151946/%E6%88%91%E5%80%91%E7%9A%84%E6%9F%90%E6%A0%A1%E5%8B%81band
如果想賞面可以去Penana睇住先

02 - 記缺點

2013年9月5日

我同樂少有時會約埋食早餐再返學，今日我哋約咗食燒賣。

「阿錘，快啲啦，閂閘喇。」
「咪跑緊囉，唔係你係都要等燒賣出爐，我使咩跑到成隻狗咁呀。」
「嘩唔得，我行先喇。」
「喂！關志樂，等埋吖。」

樂少個死仔一枝箭咁跑咗去，死全唔理兄弟死活。結果佢就啱啱趕到，而我就⋯⋯差一步，結果被門口嘅Prefect攔住咗。

「喂，Prefect畀次機會吖，遲咗30秒啫。」
「唔得，學校話明8點就唔可以遲到。」
「搞錯呀，你Form幾呀？尊重吓師兄好喎。」
「我係4B班毛子蘭，今年嘅副領袖生，你唔滿意可以同訓導組投訴。」

我心諗，我咁嘅樣點同訓導投訴呀，佢唔叫我剪髮都偷笑啦。呢個時候，何副校行緊過嚟⋯⋯

「副校長早晨⋯⋯」
「劉星隨，你又遲到呀？」
「我今年第一次咋喎⋯⋯」
「開學第一個禮拜你就遲到，我諗月尾都可以記你缺點喇。」
「Er⋯⋯吓？」
「同埋你啲頭髮好似⋯⋯」
「我就快剪㗎喇，琴日溫書唔得閒剪住。」

樂少個死仔喺後面一路睇一路笑，仲要想大笑但忍住唔笑，真係好想打鑊佢！
結果，我就罰企罰到早會完咗先上課室。

結果我上到課室又見到4B班嘅毛子蘭。

「點解你又喺度㗎？」我好驚訝咁問。
「今年我負責你哋5D班。」毛子蘭有啲嚴厲咁答我。

我哋學校每班都有嗰Prefect跟住，喺老師上嚟之前負責「管理秩序」。而中五，基本上得最大嘅兩個Head Prefect仲會繼續做Prefect，所以跟高Form嘅Prefect就會係中四嘅Prefect負責。因為已經係高Form，通常啲後輩Prefect都唔會做啲咩，因為唔想得罪師兄師姐。不過呢個毛子蘭，肯定係個麻煩人。

「霞姨，借Maths份功課畀我吖。」樂少問緊霞姨借功課抄。霞姨Maths好高分，算係成績頭幾位嘅乖學生。

「樂少，畀我抄先啦，我啱啱罰企罰到冇時間抄呀。」
「唉，見係你畀你先喇，我問呀輝借啦。」
「啱呀，呀輝話哂都係班長，你問佢借啱啦。」

正當我準備抄功課之際，毛子蘭又走出嚟。
「劉星隨，你喺度做咩呀？」
「抄功課囉睇唔到呀？」
「你抄功課仲好意思講？請你即刻停手。」

我心諗呢個人第一日返學㗎？同學之間互相抄功課好正常啫，正所謂「功課一係就抄，一係唔交。」

「呀⋯毛同學，未見過人抄功課咩？」
「我睇到就唔可以由得你抄。」
「咁你想點呢？」
「你再抄，我就話畀訓導知。」
「個個都抄喎，你淨係鬧我？」
「吓，係咩？」佢行去黑板前面，叫其他同學唔去抄功課。
「你哋唔好抄功課啦，咁唔啱㗎。」呢個時候，佢好似有啲控制唔到場面，個樣有少少驚。

搞咩呀，呢條女清朝穿越過嚟㗎？我都係第一次見一個咁唔識做人嘅Prefect喎。
結果當然冇人理佢啦，於是我哋嘅訓導組大佬何副校又出場喇，我又畀副校長叫咗出課室。

「劉星隨，你又抄功課？」
「吓副校⋯⋯個個都⋯⋯」
樂少行出門口打哂眼色，向我發放緊求救訊號。
「唔係，我有條唔識做啫，想借人哋份功課睇吓啫。」
「我第幾年識你呀？籍口唔作個好啲嘅，你小息嚟搵我記缺點！」
「吓⋯⋯？！」

就係咁，我第一個禮拜就記咗個缺點喇。
食晏嘅時候，我同樂少一齊食嘢。

「總之今日就黑到爆，一日都係嗰個毛子蘭。」
「好彩你冇出賣我咋，唔係學生會都冇得選呀。」
「你選之嘛，又唔係我選，依家我食哂，你話點算。再記多個缺點，見家長好煩㗎！」
「冇事嘅，聽日唔遲到咪得囉。」

我同樂少繼續一路傾一路食。

「不過點解副校好似對你特別惡嘅。」
「點知啫，樣衰掛⋯⋯」
「唔係吖，樣嚟講，我就一定係靚仔啦，但係你都中上吖。」
「收皮啦，樂哥，你擺明中下樣喎。」
「吖⋯⋯可能係中一嗰陣呀⋯⋯」我突然醒起中一嘅一件事。

「中一聖誕嗰陣呢，咪有個舊生嚟咗學校表演嘅，佢嗰陣啱啱出道做歌手，所以會做好多校園Show。」
「我記得呀，彈結他，帶成隊Band嚟嗰個吖嘛。」
「嗯⋯⋯其實我就係睇完嗰場Show先叫媽媽買枝結他畀我㗎。」
「重點呢？咁同副校長有咩關係？」
「佢咪舊生嚟嘅，佢完咗表演之後話有次佢上副校堂，副校放咗個屁，然後全校聽到佢咁講就靜哂，冇人敢笑，唯獨有一個人笑得好大聲。」

「我記得喇，你真係笑得好誇張。」樂少好誇張咁笑。
「嗰次之後，副校長就好針對我喇。」
「哦⋯⋯聽講你一陣Physics堂喎。」
「咁又點呀？」
「幫我抄牌吖。」
「個轉校生？」
「係呀。」
「唔制，要抄你自己抄啦，最多幫你留意下佢咩料。」

如是者，我開始去上下晝嘅Physics堂。 去到中五，我Physics堂已經分咗做兩類人，一種係等下學期drop科，一種係繼續上堂嘅類型。我就緊係準備drop Physics啦，都唔知一開始揀嚟做咩。而樂少嘅女神，好似好認真聽緊書咁。

佢嗰名叫Emma，陳爾欣，一個好有富家女感覺嘅名。

（Tbc.)

03 - 學生會選舉日

2013年9月6日 學生會選舉日

「請大家支持2號候選內閣News，我哋承諾會為學校帶嚟新嘅校園生活⋯⋯」候選會長Anson講緊佢嘅競選理念。順帶一提，「News」就係樂少個閣；另一個候選內閣叫做「CLAY」；好似仲有一個係以一人名義參選嘅內閣叫「清泉」。
如果真係要認真投票嘅，可能我會投「CLAY」嘅，個會長叫Martin，成績操行都好，又受老師歡迎，感覺係會幫到學生多啲嘅內閣嚟。而「News」呢，其實就係柴嘩嘩去參選，Anson講到明係為咗封校長推薦信先參加嘅，但係如果「News」當選嘅話，佢哋就話會爭取男學生留長髮，咁我冇理由唔撐啦，仲要有樂少喺度。仲有個奇怪嘅3號候選人，成個內閣得自己一個人，但係校長又會肯畀佢參選先好嘢。

「阿錘！」樂少離遠叫住我。
「咩料呀。」
「幫我介紹下吖，嗰個女仔呀。」
「你女神？佢叫Emma呀。」
「靚女係叫呢啲名㗎，Emma Watson，Emma Stone，佢係Emma⋯⋯？」
「Emma Chan，陳爾欣。」
「OK，我要去拉票喇。」樂少摷一摷自己個頭，面上帶住滿滿嘅自信行過去。

「Hello 同學，你係咪Emma呀，我係2號候選內閣News嘅關志樂⋯⋯（下刪100字嘅自我介紹）」結果Emma嘅回覆係⋯⋯
「Umm⋯⋯我想問你哋政綱有講話會提供每科嘅聯校模擬試，係咪VA都會㗎？」
「Errrr⋯⋯我諗我問吓學術先，我係總務，呢個範疇唔係我負責，不如你畀你電話我，我覆返你吖。」
「但係⋯⋯今日投票喇喎⋯⋯」Emma望住啞口無言嘅樂少離開咗。

我喺隔離睇，笑到跪低咗。邊有人咁樣抄人牌⋯⋯

雖然樂少拉票好失敗，但係「News」都係贏咗。其實學生會投票，從來都係睇邊個Friend多，邊有人會認真睇政綱同福利吖。喺朋友多方面，「News」基本上都係贏嘅，所以結果都好合理。

「喂，樂少，恭喜哂喎。」我哋班嘅朱傑、Mango、魔人即刻捉住咗樂少。
「多謝大家投票啫。」樂少講。
「咁謙呀。」朱傑搭住樂少嘅膊頭。
「咁依家我哋『激情對話』係咪可以借學生會室打邊爐呀！」Mango興奮講。
「緊係啦，有你！有我！」樂少拍哂心口應承。

佢哋幾個即刻喺度傾打邊爐食咩。BTW「激情對話」係我哋級嘅一個大Group，基本上冇咁乖嘅男仔都喺哂個Group入面，咁當然我都被加入咗啦，我諗依家差唔多有25人左右。

----------------------------------------------

2013年9月11日

學生會選舉之後，又過咗幾日。

我坐喺我個位，如常咁發緊白日夢。如果呢一刻要我揀全校最舒服嘅位置，我會話係我個位。因為喺窗邊，又可以挨住窗台，又可以望風景，一望落下面仲有個球場添，加埋少少風，少少陽光，我可以瞓足一日。

「喂阿錘，買嘢打邊爐呀。」朱傑佢哋叫我一齊買嘢。
「轉頭吖。今日我值日呀。」
我哋學校植日生要負責埋黑板同掃地先走得，但係我哋通常抹完黑板就會走，冇咩人會掃地。

我抹完黑板之後就執嘢走，行到轉角位突然間聽到音樂室竟然傳嚟一陣琴聲，而彈緊嘅係當紅外國樂隊Magic And...嘅歌。

音樂室係全校最高同最角落頭嘅地方，平時係冇人會用。

我行到去門口望住入面彈琴嘅人，竟然係Emma。

我望住彈琴嘅佢，加埋鋼琴聲，突然感覺到一種好衰傷嘅感覺，明明首歌係一首好有力量嘅歌曲，但係我聽到嘅感覺就好似一個人好想有人畀力量佢咁。唔覺唔覺，我就聽到佢彈完首歌。佢好似發現到我，我有啲尷尬咁點一點頭，而佢就開口同我講嘢。

「你係咪⋯⋯劉星隨呀？我係陳爾欣，Emma。」
「我知呀，我哋Physics堂同班，係呢，你好鍾意呢首歌㗎？」
「唔只呀，我好鍾意佢哋隊Band㗎！每次我好唔開心就會聽佢哋啲歌。」
「我都覺得佢哋好正，估唔到你都鍾意聽Band Sound，我以為你會好似其他女仔咁都係聽K-pop。」
「嗯⋯⋯K-pop我都有聽，但係最鍾意都係Magic And...！」

我突然之間諗，佢會唔會有興趣夾Band呢，所以我就膽粗粗咁問：「你會唔會想夾Band呀？」
「吓⋯⋯夾Band⋯⋯我淨係識彈琴咋。」
「哦。」
「乜你夾Band㗎咩？」
「冇呀⋯⋯不過好想夾！」
「有夢想真係好呀⋯⋯加油呀！」
「加咩油吖，Band都冇⋯⋯」
「你係彈結他嘅？」
「係呀，你有估到嘅。」
「估吓㗎咋，咁啱估中。」
「不過依家都冇人同我夾。」
「搵吓人囉，一定搵到嘅。」
「嗯，我走先喇，Bye Bye。」我點點頭，禮貌咁轉身離開。

呢次係我同Emma第一次嘅對話，雖然我冇覺得佢好靚，但客觀講佢都係中上樣嘅。加上女仔識彈琴又會加少少分，聽Band又會再加幾分，樂少果然係有啲眼光。

不過諗返轉頭，我都唔係好明點解我會突然咁問佢夾唔夾Band，明明知道自己未夠Level夾Band，係咪我嘅內心都知道我已經冇時間嘥，所以冇經過大腦就推郁咗我把口呢？

可惜吖，冇辦法搵到Band友⋯⋯但係知道身邊有個咁有品味嘅人都有啲開心。

（Tbc.）

大家可以當Emma彈嘅歌係類似This Song Saved My Life咁

04 - 喂阿錘同我夾Band吖。

我同朱傑佢哋買完嘢之後，已經返到學生會室。見到執緊文件嘅樂少，我就諗住放啲風畀佢。

「喂樂少，我啱啱同Emma傾咗幾句。」
「你個死仔吖，勾義嫂！」
「再誇啲吖你，連人哋電話號碼都未拎到呀。」
「咁你哋傾咗啲咩呀？」
「佢原來係Magic And…嘅Fans。」
「咩嚟㗎？」佢個樣一面迷惘
「Magic And…喎，咁都唔識？外國Band嚟嘅，玩Pop Rock多，歌詞就寫年青人問題，勵志歌比較多。」
「都話我眼光好啦，你睇吓人哋幾有品味吖。」
「哈⋯⋯」我諗條友真係傻咗，明明自己都唔識Magic And…。
「由今日起，我就係Magic And… 嘅Fans」樂少認真咁講。
「well…」我已經完全唔想理佢。
「唔係喎，如其一齊做Fans，不如做偶像追Fans啦。」
「講返中文吖師兄，好冇呀。」我唔明佢講咩。
「我嘅意思係，我與其做Magic And…Fans，不如做Magic And…！喂阿錘同我夾Band吖！」
「吓？我叫咗你學樂器5年，你都無動於衷，而家為咗個女人，你要同我夾Band？」
「小朋友，愛情係好偉大㗎！」
「你係咪認真㗎？你知夾Band係我人生目標嚟㗎啦。仲有呀，搖滾樂唔係講玩㗎！」
「係！難得可以成全我兄弟嘅夢想同我嘅愛情故事，睇嚟命運已經選中咗我要成為一個音樂人！」樂少自High咁講。

就係咁，我第一個Band友竟然而我老友樂少⋯⋯究竟係咪好事呢？佢又係咪認真㗎呢？

其實我差啲都冇發現到，呢一刻可能就係我行向夢想嘅第一步。如果唔係樂少突然為咗追女仔話要夾Band，我要等到幾時先有第一個Band友呢？可能我內心都等待緊一個契機，一個迫我出發嘅契機。我一路打邊爐一路諗緊，或者我都係時候試吓先，就算明知技術未夠都要試。

但係另一方面，究竟樂少又可以負責咩樂器呢？

「喂樂少，你諗住負責咩樂器呀？聽講你連牧童笛都未吹到七粒音喎。」我好正經咁問樂少。
「冇所謂啦，依家得我同你，夾Band起碼都搵多兩個人，睇吓你差咩位，我就學咩啦。」
「咁都合理嘅，依家得我一枝結他，起碼都要多個鼓手同Bass手，最好就有多個Keyboard或者多一枝結他。」
「其實點解要有兩枝結他？想大聲啲呀？」
「要大聲可以用喇叭㗎嘛！想大聲啲使咩兩枝結他吖。通常一枝係Lead，一枝係Rhythm。Lead即係主音結他，Solo就係佢負責，而Rhythm就係節奏結他，負責彈Chord，即係和弦呀。」
「咁你想彈Lead定Rhythm多啲？」
「咁一定想彈Lead啦，可以彈solo型好多，但係我依家手結他太差，彈Lead有啲吃力。如果有Keyboard手，彈性就可以大啲，到時先再諗結他做Rhythm定Lead都得。」
「不如試吓搵Emma彈Keyboard吖。」
「我問咗啦，佢話冇興⋯⋯唔係喎，佢係答我『我淨係識彈琴』，冇話冇興趣喎。」
「咁咪得囉！」樂少由心而發笑住講。

呢個時候魔人突然間走埋嚟。
「傾緊咩呀？」魔人問。
「佢邀請我夾Band。」我指住樂少答。
「冇聽錯呀嘛，小星星都唔識吹嘅人叫你夾Band。」魔人講。
「我只係唔識吹牧童笛啫，唔等於我唔識音樂，我識哂周杰倫每首歌㗎。」樂少講。
「你要夾Band喎，你話你識哂五月天都有用啲吖。嗱阿錘，咪話唔畀機會你，我就出名感情豐富嘅，主音交畀我啦。」魔人講。

呢個時候，愈嚟愈多人走埋嚟，個個都話要做主音⋯⋯但係我需要嘅係樂手呀！！！！
結果「激情對話」佢哋為咗爭做主音，開始咗學生會室唱K之夜。
你問佢哋唱成點？用生命唱歌囉，好聽啲咪叫全是感情，Mean啲講就係冇技巧。

喺我心目中，一個好嘅主音唔單只要有技巧、有感情，仲要同隊Band連結到，可以唱出旋律所描繪嘅景象，同時又可以牽動到觀眾嘅Emotion⋯⋯就好似當年中一嗰場Show嘅嗰個人咁⋯⋯

2013年 9月12日

「喂樂少，放學陪我去通利吖，我想買結他呀。」
「吓，儲夠錢喇？8000幾蚊喎！」
「唔係呀，我決定買副廠，上次個Sales哥哥試完畀我睇之後，我發現好似都唔係太大分別。同埋如果要夾Band就愈快開始愈好，我哋要快啲搵齊人。」

去通利之前，我畀樂少捉咗入去機鋪。其實著校服入機鋪又唔係幾啱嘅，不過⋯⋯冇咩所謂啦可。

「冇啦啦打咩機呀，我哋著緊校服喎。」
「阿錘哥，呢度尖沙咀嚟㗎，邊有我哋啲老師嚟巡呀。唔喺自己教嗰區，老師唔會入機鋪㗎，呢啲行規嚟㗎啦。」
「有咁嘅行規㗎咩？」
「今日哥哥帶你打機啦。」
「你應該知我淨係識玩NDS⋯⋯」
「識撳掣就識打機啦，整鋪Street Fighter先啦！」

其實我真係唔識打機，結果連輸幾鋪畀樂少。
「唉，又輸，放過我啦不如。」
「走囉。」

正當我哋準備離開之際，我見到太鼓達人部機後面有十幾人圍住睇，於是我哋行埋去。我見到一個著背心嘅人打緊太鼓，呢個正正係嗰個一個人去選學生會嘅奇怪人－5C班嘅張太一。

（Tbc.）

05 - 就決定係你啦！

我雖然唔係好識玩太鼓達人，但係我都知道要打到百幾個Combo係好難，不過眼前呢個張太一， 竟然打到800個Combo！仲要笑住打，好似享受緊每一個節拍， 真係好犀利！我同樂少都睇到呆咗，究竟呢個張太一係何方神聖呢？

我印象中嘅張太一係個好雷嘅人，一方面係真係有義氣嘅雷，另一方面就係估計唔到嘅雷。因為冇同過班，所以我哋基本上係無接觸。不過我聽講過，佢有次為咗幫個Friend出頭，走去隔離學校打交，結果搞到要搵警察。但係另一方面又聽講過，有次佢去Print嘢，因為撳錯掣唔識搞，玩爛咗學校部Printer。

但係呢個時候，我心裡面有一個諗法，佢識打太鼓，會唔會都識打鼓呢？我係咪可以搵佢打鼓⋯⋯於是我叫住佢。

「張太一！你識唔識打Drum Kit呀？」

「劉星隨、關志樂？你哋又會喺度嘅？仲要唔除校服，咁夠薑嘅。」

「乜要除校服㗎咩，同埋原來你識我㗎⋯」我呢刻先發覺，原來我冇自我介紹，樂少呢個學生會幹事就話個個都識啫，估唔到佢原來都記得我嗰名。

「你個名咁好記，流星錘吖嘛，十大武器喎。」佢做住揮流星錘嘅動作講。

「係呢⋯⋯點解你打鼓咁勁嘅，你夾開Band㗎？」

「唔係呀，隨便打㗎咋，一開始都有幾個miss嘅，不過打多幾次之後就冇miss過喇。」張太一露出得戚嘅笑容。

「有冇興趣夾Band呀？」

「好喎，我都想夾Band好耐喇，不過我未打過Drum Kit。」我依家先發覺原來呢個張太一講嘢嘅時候都幾多表情。

「你拍子感咁好，要學唔難嘅。」雖然我係咁講，但係打Drum kit同太鼓係兩件事嚟，淨係要加埋腳落去都唔係咁容易，不過我對佢有信心，直覺話我知我嘅鼓手就係呢個人！

我哋三個一齊離開機鋪，準備去通利。

「話說你哋做咩唔除校服嘅，畀老師捉到好麻煩喎。」張太一一路著返校服一路講。

「樂少話老師唔會跨區執法喎。」

「係呀，老師都係抖份糧啫，放學仲山長水遠嚟尖沙咀咩。咁你又做咩山長水遠嚟尖沙咀呢？」

「我住佐敦㗎嘛。」

「哦，原來係咁。」樂少應酬式嘅點頭。

通利第一層轉右就係買電結他嘅位置，即係我成日練嘢嘅地方。雖然話就話決定咗買Squier，但係買咩款我一直都揸唔定主意。買Strat就平均啲，咩Style都carry到，但係同時又冇咩特出；Tele就Raw啲，音色比較「頑皮」，但係太特出反而有啲難控制。唉⋯⋯好難揀呀！

「諗唔掂買咩呀？與其諗太多，不如試吓跟住自己嘅直覺，買結他同揀囡一樣眼緣最重要呀！」上次試結他嘅Sales哥哥達仔突然間走出嚟同我講。

「直覺⋯⋯」我隨心行咗幾步，我望住一枝紅色body，黑色pickguard嘅Strat，我覺得就係佢喇。

「呢枝？試吓佢囉。」達仔叫我試吓。

我隨手掃咗幾個chord，今次我彈咗少少Rock嘢，諗住唔好再畀達仔笑我彈《愛我別走》，結果一彈就feel到度力，呢枝結他好有feel。

「除咗聲，最重要係條頸啱唔啱隻手。如果撳得唔舒服，幾靚聲你都彈唔好。」達仔露出一副前輩嘅神情。

「我覺得⋯好好feel呀。」

「你好彩喇，我做埋今日唔做喇，幫你拎少少折頭啦。」達仔趕完就走咗去。

我拎住枝結他，講咗句「Stratocaster！就決定係你啦！」

買完結他之後，我哋去咗老麥食嘢，順便認識下大家。我同樂少坐隔離，而太一就坐喺樂少對面，我枝結他同我哋啲書包就放喺我對面。

「吓！原來你係日本仔呀！」樂少驚訝大叫。

「係混血，我阿爸係香港人嚟嘅。」太一講緊自己屋企。

「所以你打太鼓咁勁呀？」我問。

「應該唔關事嘅，寫Game嗰個都唔識打鼓啦。」太一答。

「又係喎。」其實我真係好唔識同唔熟嘅人傾偈，每次想延續話題都唔係好順利⋯⋯

「咁唔怪得你叫太一啦，我一直以為係『泰國』個泰，心諗邊有人會有個㗎仔名，原來真係㗎仔。」樂少講。

「太一係我阿媽改嘅，不過佢喺我好細個就返咗日本，所以我對佢都冇咩印象。」

原來太一屋企係單親家庭，真係完全估唔到，睇佢表情多多，仲以為係屋企好開心嗰種人添。

「你做咩會一個人選學生會嘅？」我問太一。

「因為我想『清廚』囉。」

「『清廚』？」

「Change呀，日文就係『清～廚～』。」太一做哂動作咁。

「哦！所以你個內閣叫清泉。」我終於知佢做咩改個咁奇怪嘅名。

「我以為係人都知添，原來你哋唔知㗎，唔怪得我輸啦！」太一好似恍然大悟咁講出嚟。

因為達仔嘅關係我再加咗幾百蚊就買埋個Amp仔同其他配件，返到屋企我急不及待開始練結他。

「喂劉星隨，細聲啲啦好嘈呀！」叫我細聲啲嘅係我家姐劉星晴。

「你戴耳機啦！」呢個係我個妹劉星兒。

「得啦得啦。」

冇錯，我係有個家姐同細妹嘅，家姐讀緊Asso，阿妹就啱啱中一。家姐係一個追星族，每年都去幾次韓國睇演唱會，阿妹就係一個宅女，鍾意睇動漫同打機。

至於我父母就係開茶餐廳嘅，所以通常都好夜收工。不過雖然係咁，我哋一家嘅關係都好好。我聽過一個講法，父母之間嘅愛有幾深，對仔女嘅愛就有幾厚，以我喺呢個家感受到嘅愛嚟講，我諗我父母佢哋應該好愛對方。

（Tbc.）

06 - 班會

2013年9月13日 

「阿錘，跑呀！」樂少一路跑一路叫。

我已經冇力講嘢，只可以繼續跑。因為琴日買咗新結他太開心，所以唔覺唔覺就彈到3點幾先瞓，點知就瞓過龍。喺就快閂閘嘅一刻，我用咗招「惡魔蝙蝠騰衝」，雖然趕到， 但係我就瞓咗喺地。

「達陣！！」樂少用講波佬嘅激情大嗌。
「好彩⋯趕到⋯」基本上我已經冇力講嘢，不停咁喘氣。
「早啲起身咪唔使咁趕囉，劉星隨。」同我講嘢嘅係毛子蘭。
「關你鬼事⋯咩⋯總之今日我冇遲到⋯⋯」
「請你快啲返課室，唔好瞓喺地下阻住其他同學。」毛子蘭好平淡咁講。
「依家咪行囉⋯費事畀人見到我抄功課呀！」我即刻衝上課室，因為我又未做Maths功課。

話說學校多咗一個負責統籌管理低年級Prefect嘅Post，毛子蘭就畀人調咗過去，所以我喺班主任時間之前就唔使見到佢喇。

我學校每日都有15分鐘嘅班主任時間，通常係畀班主任講吓校務、班務，同埋畀大家盡最後努力抄埋功課交。今日文sir就講緊少少班務。

「各位同學，今年嘅班會有冇同學有新諗法，冇就照上年咁排喇。」文sir都係一貫唔想煩嘅語氣。

呢個時候，坐中間嘅朱傑突然間舉起咗隻手。

「文sir，我想競選今年嘅班會主席！」朱傑佢微微咁托一托自己副眼鏡。

我哋班嘅班會，上年係由Carol做班會主席。Carol係女子組嘅大家姐，人仔細細但係就聲大大嗰種，搞活動都幾好嘅，不過就成日Ban哂「激情對話」嘅屎橋活動，可能就係咁朱傑想搞「政變」？

「咁除咗朱文傑之外，仲有冇人想選？余詠鑫你要唔要競選連任呀？」文sir問Carol。

班女仔即刻推Carol去選，Carol都唯有被迫參選。

「咁呀，放學之後大家留喺課室聽吓兩位候選人嘅政綱同投票喇。」文sir講完就返咗去教員室。就係咁，突然之間班房嘅氣氛就變得緊張喇，其實計票型朱傑應該輸緊，我哋班39人，男女比例就係21：18，因為有班男仔唔妥「激情對話」，所以一定係投畀Carol ，點計都係Carol連任，究竟朱傑搞咩呢？

「喂朱傑，搞咩呀你。」樂少問朱傑。

「上年班女係咁Ban我哋啲橋，我就唔妥好耐喇，我今年點都要爭個主爭返嚟做！」朱傑好有氣勢咁答。

「但係你邊夠票呀？」

「本身就唔夠嘅，我哋激情對話加埋friend啲嗰幾個得13票。Carol個邊加埋希希、魚仔幾個friend啲嘅男仔最少有16票，再加埋反我哋嘅Alan、肥陳、張家聲就19票。如果Monica都仲投Carol就一定過20票，但係我知道Monica同Carol反咗面，所以如果我拎哂嗰7張游離票，就有機會贏，但係我一票都唔少得，兄弟們幫幫手，今日遊說佢哋投我神聖嘅一票。」朱傑超認真分析。

「Carol同Monica炒咗？點解嘅？」樂少問。
「你知唔知鍾文同希希散咗吖？佢哋覺得係Monica flirt希希，所以搞散佢哋㗎。」朱傑一副做足資料搜集嘅樣。

Monica係全班最靚嗰個，好似已經成日做Model影相，本身同女子組Friend嘅，但係因為太綠茶所以畀佢哋孤立咗。鍾文就係Carol好朋友，細細粒又細細聲，望少眼就唔見咗嗰種，希希就係扮基追女仔嗰種八婆型男人，平時成個女人咁，邊有男人叫自己希希㗎⋯⋯

「咁Monica同佢兩個Friend Zoey同小英就3票啦，仲差邊4個呀？」魔人問。
「沙維、Amy、呀喵、同Sky。」Mango答。
「沙維好易搞啫，足球隊都要人嘅，魔人、Mango交畀你哋。Amy同呀喵，唯有我犧牲色相啦。至於Sky，阿錘交畀你喇。」朱傑講。
「吓，點解呀？」我同Sky唔熟，所以唔係好明點解叫我搵Sky。
「因為我哋都唔熟吖嘛。」佢哋個個都唔想去遊說Sky，所以就推咗我去。

沙維係足球隊隊長，但係我哋學校冇咩人踢波，每次比賽佢都要求人幫手先夠數組閃電十一人比賽，所以呢票朱傑好有信心。至於Amy同呀喵，兩個BL狂熱份子，成日覺得「激情對話」係有BL成分，我諗朱傑應該有方法拎到呢兩票。

而Sky呢⋯⋯佢好似叫司徒天囉，雖然上年已經同班，但係就冇咩傾過偈，所以每次同佢講嘢都覺得唔知點咁。點樣形容Sky呢？好靜⋯⋯好少主動講嘢，應該話佢好似唔想同人講嘢咁。個樣懶洋洋，上堂成日瞓，但係成績就好好，穩定地每年都係考全級第11。你話咁靜分組點算？一早畀班女仔爭住要啦，因為如果論顏值，Sky應該係全班、甚至係全校最靚仔嗰個。靚仔成點？有啲似山下智久嗰種囉。咁聽冇咩嘢啫，點解個個都好似驚同佢溝通？因為⋯⋯

「喂樂少陪我搵Sky吖。」
「唔得呀，SU開會呀。」
「頂！」連樂少都扮要開SU會唔陪我，其實SU有咩做吖⋯⋯

「喂，Sky，你一陣會投邊個呀？」我行埋去Sky前面個位同佢講。Sky坐喺最遠嘅角落頭，一個可以睇哂全班嘅位置。

我終於搵咗佢，其實比起「激情對話」班人，我應該算同Sky講得最多嘢，因為我哋都係成日畀人叫剪頭髮嘅人，但係唔知點解啲老師淨係鬧我，而同Sky講嘢就好溫柔，連何副校都係咁。

「係阿錘呀⋯⋯做咩事呀？」Sky原來瞓咗成日，啱啱先起身，仲打緊喊路。
「班會要投票，朱傑同Carol要爭做主席。」
「班會⋯⋯咩嚟㗎？」Sky呆呆哋咁問我。

呢個就係點解好怕同Sky講嘢嘅原因，佢好似長期瞓緊教咁。有好多事都係狀況外。只係我估唔到佢連班會係咩都唔知，究竟呢個人有冇返學校㗎。

「班會咪即係班會幹事組成嘅會議囉。」
「班會⋯⋯哦⋯⋯所以有收班會費！」Sky笑笑口咁講。

班會費又反而知係咩喎⋯⋯我簡單將情況解釋畀Sky知。

「總之，就希望你會投朱傑啦。」
「但係咁喎阿錘，點解你要投畀朱傑呀？」
「因為Friend掛⋯⋯」
「投票⋯⋯會因為Friend㗎咩？」佢又係笑笑口咁講。
「嗯⋯⋯我比較認同佢嘅理念。」我隨便答個答案，點解同佢講嘢好似變咗答問題咁㗎⋯⋯
「哦⋯⋯哈哈⋯⋯咁我投朱傑啦。」

好彩啫，佢都肯投朱傑一票。

「因為阿錘係我嘅好朋友。」佢又係笑笑口咁講。
「我哋係⋯⋯好朋友？」
「因為阿錘你，中三嗰陣幫過我⋯⋯」佢又係笑笑口咁講，但係唔知點解佢咁講，我完全冇印象。
「吓⋯⋯」
「吖呀⋯⋯好眼瞓呀，瞓多陣先。」佢伸咗個懶腰又瞓低咗。


「喂阿錘，你有好努力練結他喎。」Sky突然望住我講。

（Tbc.）

07 - 係友情嘅象徵呀

我明明冇同Sky講過我有彈結他，但係佢竟然知道我有練緊結他⋯⋯係咪其他人話佢知呢⋯⋯應該唔會掛⋯⋯

「你左手手指起晒繭，係努力嘅證明。」Sky豎起著手指公，畀咗個Like我，但係就冇望我，淨係繼續瞓喺枱面。

「左手起晒繭？」我望住左手嘅手指，我自己都冇發覺，原來我左手起晒繭。

不過，估唔到Sky觀察力咁強。但係⋯⋯我中三有幫過Sky咩？我完全冇印象喎。我一路帶住呢個疑問去到放學後嘅投票時間。

Carol同朱傑先後發表完自己嘅政綱，其實佢哋嘅政綱都係聖誕搞Party，班際比賽打吓氣咁樣囉，冇咩特別。終於到咗唱票嘅時候⋯⋯

我哋以不記名嘅方式投票，到開最後一票之前，票數係19比19，即係話呢一票就係決定性嘅一票。

文sir公佈最後一票：「最後一票係⋯⋯朱文傑，我宣布今年度班會主席由朱文傑同學擔任，余詠鑫同學就擔任副主席啦。Goodbye Class。」

「朱文傑，麻煩你整理好班會幹事名單然後交畀我。」文sir吩咐。

朱傑嗰樣就得戚啦，相反Carol佢哋就慘喇，冇咗班會控制權。我突然間有啲後悔，究竟朱傑掂唔掂㗎，係咪真係可以正正常常搞個活動㗎？不過冇所謂啦，反正條路係自己揀。

主席同副主席兩個傾緊班會幹事嘅人選。

「好喇，副主席：Carol、康樂：魔人、Mango、文書：鍾文、財政：霞姨、總務：阿錘。咁好冇呀？」朱傑問Carol。

「你鍾意啦主席，不過班會仲要有學術，我諗你要將Mango或者魔人調一個去做學術。」Carol有啲不爽嘅語氣。

「魔人同Mango兩個都冇腦喎，點做學術呀？」

「你係主席你自己諗。」Carol講完就走咗。

估唔到朱傑馬上做咗個令我驚訝嘅決定。

「我做學術？」我問朱傑搞咩。

「唔通叫魔人同Mango做學術咩，兩個都冇腦，全個『激情對話』你係最有智慧嗰個嚟㗎！」

「是旦囉，學術都冇咩要做啫。」佢都厚臉皮到話我係「最有智慧嗰個」，冇理由托手踭啦。

「係囉，填個名啫。」

朱傑想我幫手做「學術」，其實我都唔知要做咩，不過挨義氣做吓囉，反正一定少嘢做過班長、科長之類。

----------------------------------------------

自從邀請咗太一之後，我哋三個就做咗飯腳，開始傾夾Band嘅嘢，我同佢哋講咗Sky睇出我練結他嘅事。

「Sky隻眼咁利？」樂少驚訝。

「係呀，我都嚇一跳！」

「又係喎，我都有揸鼓棍揸到起水泡，不過唔係手指頭，唔係同道人應該冇咁易發現，可能佢都彈結他喎。」太一講。

「係喎，咁不如試吓搵佢啦。」我提出。

「但係你唔覺得好難捉摸咩，Sky個人咁跳喎」樂少問。

「一係問咗佢係咪識彈結他先囉。」太一講。

「都好。」樂少答。

「如果Sky識彈結他，你就可以學Bass喇」我同樂少講。

「都好吖，反正都係彈根音啫。」樂少講。

「Wow！根音你都知？！」我拍一拍樂少塊面，「你畀外星人捉咗呀？」

「頂你啦，我做咗好多Research㗎。比起學結他，應該學Bass會快啲上手，Bass手只要識3粒音就可以出Show，所以我應該都OK。」

我完全冇諗過樂少會做Research，我以為佢對音樂嘅認識就只有周杰倫同陳奕迅。睇嚟佢今次真係好認真。

結果，放咗學我就去咗搵Sky，點知Sky已經走咗。走得真係快⋯⋯突然之間Sky又揹住個袋行返入嚟。

「真係大頭蝦⋯⋯唔記得拎返本書添。」Sky返嚟之後拎住一本小說講。

「喂Sky，你識彈結他？」我問Sky。

「彈結他？嗯。」Sky點吓頭。

「有冇興趣夾Band呀？」我即刻就問Sky。

「唔好意思呀，我⋯⋯唔想⋯⋯彈結他。」Sky帶住一種淡淡嘅悲傷，好簡單就拒絕咗我。

Sky喺褲袋拎出咗一啲嘢，拋咗比我。

「淨係用指甲彈電結他，啲聲會唔平均㗎。」佢又係微微咁笑住講。

「結他Pick？」佢拋過嚟嘅係一塊Gibson嘅結他Pick。

「係友情嘅象徵呀。」

「多謝。」其實我完全唔知我同Sky幾時做咗朋友。

Sky就係咁離開咗課室，不過我知道咗一樣嘢，起碼佢係識彈結他。

點解呢個人好似咁神秘⋯⋯究竟佢手結他去到咩程度，而又究竟點解咁會答得咁Sad呢⋯⋯

呢個時候，有個5B班嘅人輕輕咁拍一拍我背脊，我另轉身望住佢，我有啲奇怪，因為我完成唔識佢，但佢好似有嘢想同我講。

眼前呢個女仔，佢好似叫Rachel，我印象中係個典型嘅乖乖女學生，見親佢都係問老師嘢。

「你同Sky好熟㗎？」Rachel開口問我。

「Err⋯⋯唔係呀。」

「你好似中一二三都同Sky同班喎。」我問。

「係呀。我有啲嘢想同你講，你出一出嚟吖。」

我哋學校高中分班係睇有冇選修M1M2，A班係選M1即係Emma嗰班，B班即係Rachel嗰班係選M2。至於我哋D班同太一嘅C班就係唔選M1M2，然後隨機分。

我跟咗Rachel出去走廊。

「吓？！香港冠軍？！」我咁大反應係因為Rachel話咗畀我聽，Sky 2年前原來係香港中學生結他大賽嘅冠軍。

「初中組啫。同埋又唔算好多人參加嘅。」Rachel補充，可能佢見我太震驚。

「雖然Sky個人好靜，但係唔係唔鍾意講嘢，只係佢覺得開口講嘢好麻煩。佢怕煩怕到唔想諗搭咩車，所以揀咗屋企對面嘅呢間學校，甚至英文名叫做Sky都係因為得3個字母好易串，同埋咁啱同佢個名嘅天字一樣意思。」Rachel繼續話我知Sky係個咩人。

「我同佢係小學同學，加上初中都同班，所以我都可以睇住佢。但係上年開始我哋冇同班，所以就少咗見。」佢哋兩個原來係青梅竹馬，由細玩到大，不過硬係覺得Rachel有種家姐照顧細佬嘅感覺。

「佢以前好鍾意彈結他㗎，不過⋯⋯自從嗰件事發生咗之後，我就冇見過佢彈結他⋯⋯」

Rachel將嗰件事話咗畀我聽⋯⋯我終於都知道點點解Sky成日都有種憂鬱嘅感覺，同埋點解所有老師都由得佢上堂瞓教，唔剪頭髮又唔鬧⋯⋯仲有點解佢唔肯同我夾Band⋯⋯

（Tbc.）

08 - 跟我嚟

Sky打開門口，入到屋企，喺玄關位置除好鞋，再將對鞋放入鞋櫃。

「媽咪，我返嚟喇。」Sky入屋第一件事就係同佢媽媽講佢返咗屋企。
「返嚟喇，上堂有冇瞓教呀？」Sky媽媽睇緊下晝時段重播嘅電視劇。
「冇呀⋯⋯哈哈。」Sky露出笑容向住佢媽媽。

Sky返到入自己房，書枱上面好簡潔，一部手提電腦、一個筆筒，裡面有幾枝鉛筆，再加一枝四色筆、 同幾塊結他Pick、枱上面仲有一個相架，裡面係一張Sky細個同一個女仔嘅合照，個女仔應該大過Sky幾年。

Sky拎起相架，勉強咁擠出笑容。

----------------------------------------------

「Sky嘅家姐，就咁就走咗⋯⋯」Rachel繼續講嗰件事。
「飲咗酒真係唔好揸車⋯⋯」我用咗呢句答Rachel，其實我真係唔知可以講咩。


原來Sky有一個家姐－司徒嘉怡，2年前喺一場醉駕車禍入面死亡⋯⋯

當時係8月嘅暑假，車禍前幾日，Sky拎咗枝結他去琴行set up。而事發當日Sky因為唔想出街嘅關係，叫啱啱返完Part time嘅家姐幫手拎，點知佢家姐拎完之後，就遇到呢件意外。最離奇嘅係Sky枝結他咩事都冇，但係司徒嘉怡就重傷，送院後不治。

「我哋細個嘅時候，嘉怡姐姐會帶住我哋玩。有次我同Sky畀個肥仔恰，嘉怡姐姐就幫我哋出頭，仲特登返學校搵老師鬧個肥仔⋯⋯」Rachel未講完已經眼紅紅，只係強忍住眼淚。

「Sky可能覺得係自己累死咗嘉怡姐姐，所以一直都好自責。不過我竟然冇見過佢喊，反而佢爸爸媽媽就喊到停唔到⋯⋯」

「自始之後，Sky對住佢哋都係微微咁笑住⋯⋯但係就唔肯再彈結他⋯⋯」Rachel慢慢調整呼吸，將呢件事講哂出嚟。

「但係⋯⋯點解你要話我知⋯⋯」我問Rachel。

「因為你可能會幫到佢⋯⋯掛⋯⋯」佢講嘅感覺就好似想搵好嘢食，但係搵咗成條街都搵唔到，希望最後一間會搵到咁。

「我⋯⋯同Sky其實唔係好熟。」

「但係佢好留意你㗎。早幾日佢同我講見到你上堂嗰陣拎住枝筆練緊『爬格仔』，上堂寫Note嘅時候係畫緊Chord Chart。」佢今次係笑笑口咁講。

「咁上堂悶吖嘛。」

「佢以前都會咁㗎⋯⋯」佢又突然變返有少少傷感。

「係喎，佢話我中三嘅時候幫過佢，你知唔知係咩事？」

「咁我又唔知喎。」Rachel抖咗啖氣：「幫吓我吖劉星隨⋯⋯捉返Sky去彈結他⋯⋯」

「嗯，我試吓⋯⋯」我點點頭，其實我呢一刻都唔知有咩方法，只不過我相信我隊Band嘅結他手一定係司徒天！

第二日小息，我去咗搵Sky，通常佢都係喺自己個位瞓，今日都唔例外，所以我就坐咗佢前面嗰位。

「喂Sky，同我夾Band吖，我知你彈結他好勁，唔好嘥咗自己嘅天份啦。」

佢冇出聲，繼續趴喺枱上面，好似仲瞓緊教。

「Rachel講咗畀我知，你以前都會好似我咁上堂練『爬格仔』同畫Chord chart，你仲一睇就知我冇用開Pick，所以送塊Pick畀我，你知道你仲係好鍾彈結他㗎！」

Sky慢慢起身，佢話「以前囉，依家唔係⋯⋯」

「你家姐嘅死唔關你事㗎！唔彈結他你家姐都唔會返生㗎啦，而且你根本就好鍾意彈！」

「唔係呀！你收聲！！」Sky係第一次咁大聲講嘢，全個班房突然之間靜哂⋯⋯

小息時間完結，喺一遍寂靜之後鐘聲響起，教中文嘅Miss Lui即刻行入嚟。

「各位同學，返埋自己個位，準備上堂喇。」Miss Lui咁講，好似係特別同我講咁，因為得我唔係喺自己個位。

我諗Rachel估得冇錯，Sky真係覺得係自己叫家姐幫自己拎結他而累死佢，所以決定放棄彈結他。

其實佢⋯⋯一直都逃避緊⋯⋯

中文堂嘅時候，Sky又繼續瞓教。不過Miss Lui同其他老師唔同，每次Sky瞓教，佢都會叫返醒佢，有時甚至會行去佢個位拍醒佢。

講吓Miss Lui先啦，佢就係之前開學日講過嗰位靚女Miss。Miss Lui，雷皓月，中文系畢業，第一份工就係我哋學校嘅中文老師。皮膚白白，眼大大，加上一個男女通殺嘅可愛短髮，無論男同學定女同學都好鍾意佢，自從佢開始教中文之後，魔人同Mango嗰班鹹濕仔日日上堂都不知幾留心望住Miss。

「司徒天，唔好瞓喇。」Miss Lui開咪講。

「唔好意思呀老師，我有啲唔舒服，我想休息下。」Sky冇咩心機咁答Miss。

「你可以依家瞓，但係你放學要留低搵我。」 

Sky都係繼續瞓，冇理過Miss Lui。

落堂之前，Miss Lui特登叫Sky放學留低，Sky個樣依然係漫不經心，托住頭嘅狀態。

諗返頭先小息，我會唔會真係太衝動呢？係咪唔應該提起Sky家姐嘅事⋯⋯

落堂之後，樂少走嚟問我發生咩事，點解平時唔理人嘅Sky會突然咁大反應，我因為唔想周圍將Sky嘅事周圍講，所以都係隨便作個理由耍走樂少。

----------------------------------------------

放學之後，Sky冇諗住搵Miss Lui，直接走向學校門口，反而係Miss Lui早就喺學校門口等緊Sky。

「想走呀？我咪叫你搵我先囉。」Miss Lui有啲惡咁講。

「我真係唔舒服呀。」Sky冇特別扮病或者唔舒服，只係好平淡咁講。

「跟我嚟。」Miss Lu講完之後就行咗，而Sky亦都唯有跟住Miss Lui。

Miss Lui帶咗Sky去Canteen，叫Sky坐低等佢。我哋學校Canteen唔算細，雖然坐唔哂全校，但係都應該坐到百幾人。Sky無奈地坐喺Canteen，望住出面嘅校隊練波，呆呆地咁等Miss Lui。

Miss Lui拎住今堂份Note落嚟，佢問Sky知唔知道今堂佢教咗啲咩。

「審題，你話考寫作，最重要唔係文筆同創意，只要啱內容，就算文字之間有少少沙石，要合格唔難。」Sky幾乎將Miss Lui講嘅重點講哂出嚟。

「你明明有聽書，點解上親堂都要扮瞓教？你知唔知老師見到個個學生上堂瞓教會好唔開心㗎。」

「對唔住，我下次唔會。咁我走得未。」Sky又出返個微笑嘅樣。

「要行出學校門口好容易，你隻腳行就得。但係如果你個心唔想行，你去到邊，你都走唔到。」Miss Lui講完之後就返去教員室。

Sky喺Canteen坐咗一陣先走。

（Tbc.）

挑戰日更中

Penana暫時每日上載新一集
連登會每日貼返兩集，直到追到進度為止

09 - 唔使找

「咁點呀？Sky唔肯夾，我哋再搵個結他手？」太一問。

「畀多少少時間我啦，今次直覺話畀我知件事唔會就咁完。」我答太一。

我哋三個又喺Lunch Time傾緊夾Band嘅嘢。

「我約咗買Bass喇！」樂少突然講。

「約咗？」我唔明約咗係咩意思，邊個琴行要預約咁勁。

「約咗狗明呀。每年Econ都考第一嗰個呀，佢話佢呀哥有枝Fender可以平啲放畀我，1500蚊咋。」

「咁平？」我問。

「2手嘢吖嘛。」

「哦。」我有啲敷衍咁答。

Fender嘅Bass喺我印象中，平極都5000幾，我有啲懷疑會唔會係假嘢。但係二手可能又真係會平啲，所以我都唔敢講咩。

「我開始練緊鼓喇，原來同打太鼓真係好唔同，淨係腳都有排練⋯⋯」太一講緊自己嘅練鼓之路。

睇嚟只要有埋Sky嘅結他，我哋就可以成團喇⋯⋯只係點樣先可以叫得郁Sky呢。

自從嗰日之後，Sky喺中文堂竟然冇瞓過教，仲好專心聽書。

而我因為驚會hurt到Sky，所以都未再搵佢。

放學之後，樂少同狗明買咗枝Fender。佢就好開心話「終於可以夾Band喇！」睇嚟佢嘅熱情真係好大，可能我真係低估咗單戀嘅威力。雖然未齊哂人，不過3個人都可以夾住先㗎啫，於是我就同佢哋兩個講：「不如，我哋試吓夾住先。」

「好呀。」佢哋同一時間講。

「咁星期日下晝？你哋OK，我就book Band房。」我諗住打鐵趁熱，所以就即刻問佢哋。

「好呀。」

結果我哋就約咗星期日夾Band喇，而我Book咗間叫做The Echo嘅Band房，正正就係達仔頂嚟做嘅一間Band房。達仔即係之前通利個sales哥哥，上次買結他嗰日就係佢Last Day，佢仲偷偷哋同我講，話租Band房搵佢有折，之後就夾硬塞咗個電話畀我。

----------------------------------------------

第二日，我又再一次瞓過龍，跑到喘哂氣，終於喺打鐘之前趕到。

打鐘前一刻，我見到Sky氣定神閑咁行入嚟，結果佢踏入學校之後就即刻打鐘。

「阿錘你搞乜喘哂氣呀？」Sky問我。

「驚遲吖嘛，再遲就又記缺點喇。」我繼續喘住氣答佢。

「原來阿錘你成日遲到㗎？我就從來都未試過遲到。因為我就住喺對面，3分鐘內就可以由屋企去到學校。」Sky好似平時咁用佢個微笑樣同我講嘢。

「唉，真係羨慕啲屋企喺隔離嘅人呀。」

我同Sky一路傾緊啲無聊嘅話題，一路行入課室。

「真係唔再彈結他喇？」入課室之前，我問Sky。

「唔彈啦⋯⋯」 Sky突然臉色一沉，「入去啦。」然後又笑住講。

睇嚟Sky真係唔想再彈結他，不過又係嘅，連Rachel呢個青梅竹馬都叫唔到Sky，我又點會成功吖。

又到咗中文堂，今日Miss Lui出咗條題目叫我哋作文，而題目係《我不哭的理由》。
見到呢個題，我唔覺意諗起Sky。Rachel話嘉怡姐姐死咗之後，竟然冇見過Sky喊，會唔會Miss Lui係有啲目的呢⋯⋯

我作文嘅分數一向都唔錯，因為中文科嘅作文根本唔算係創作，只要做最保險嘅嘢，加少少修辭技巧，基本上唔難高分，所以我都隨便寫咗啲嘢交。我一路寫，一路有偷偷地觀察Sky，點知佢竟然寫都冇寫過。

「寫好嘅同學交出嚟，未寫好嘅放學前交畀司徒天。司徒天你收齊畀我。」Miss Lui落堂前咁講。

「係。」Sky嘅語氣好似有啲嫌麻煩。

話說我都差啲唔記得咗Sky係中文科科長，因為之前做開中文科科長嘅朱傑繼任咗班會主席，所以文Sir就搵咗冇公職嘅Sky頂上。

Lunch Time嘅時候，我同樂少太一去咗遠啲嘅麵檔食麵。

「點呀枝Bass好唔好彈？」我問樂少。

「好彈呀，Fender係好嘢嚟。」樂少好開心咁講。

「估唔到你會咁認真，單戀嘅威力真係好強大。」我同樂少講。

「小朋友，你大個就明㗎喇」樂少搭住我膊頭講。

「頂你呀。」我笑笑口。

「喂喂喂⋯⋯係單戀邊個呀？」太一問。

我口快快就爆哂樂少啲嘢出嚟。

「A班嘅Emma⋯⋯冇咩印象喎。」太一講。

「我都淨係上Physics堂先見到佢。」我答。

「佢仲有修咩科呢？」太一問。

「Econ 同 VA。」樂少答。

「嘩原來你起哂人底嗱。」我插斷樂少。

「我做Research都幾叻嘅。」

「弊，遲到！」我突然之間發現，我哋就嚟遲到。

我哋連錢都找唔切，同老闆講留返下次再抄咁就跑走咗。我哋三個由麵檔一路跑返學校，簡直就係小早川瀨那咁，我途中做咗幾次單腳轉身。

就到學校門口，突然有個人企起我面前，因為收唔切掣，我唯有再嚟多次單腳轉身避開佢，但係今次又少少意外，我跌低咗，而阻住我嗰個又係毛子蘭。

「又係你？」

「我今日當值呀。」

「咁你唔好衝出嚟吖嘛。」

「我都唔想㗎，係你突然間衝過嚟。」佢扶返起我。

「點解次次見到你都冇好嘢㗎。」

「我點知喎。」

因為打鐘，所以我都要衝上去上堂。

話咁快又到咗放學嘅時間，大家都將作文交畀Sky，唯獨係Sky自己好似完全冇寫過。

Sky將作文交畀Miss Lui，Miss Lui接咗啲文之後即刻開始數齊唔齊。

「點解差一份嘅？」

「我⋯⋯冇寫。」

「咁你依家落Canteen寫，寫完先準走。」

Miss Lui又要Sky留低，但係今次Sky好似冇咁嫌棄。

今日樂少約咗我一齊走，但係佢就要開埋SU會先得，所以我落咗Canteen買飲品。

「唔該，一包維他奶。」

「6蚊吖。」Canteen姨姨畀包維他奶我。

我拍一拍褲袋，發現我竟然唔見咗銀包⋯⋯

「唔好意思呀，我好似冇帶錢⋯⋯」

突然之間有個女仔遞咗張20蚊紙出嚟「要多包吖唔該，20蚊唔使找。」

呢個人又係毛子蘭。

（Tbc.）

10 - 我不哭的理由

「又係你？！」我同毛子蘭講。

「請你飲啦。」

「多謝。你仲唔走嘅，Prefect開會？」

「補課呀，曹Sir話驚教唔切。」毛子蘭搖搖頭。

「你讀Econ？」我問毛子蘭。

「係呀。」毛子蘭好似咬緊枝飲管，「你又做咩未走嘅？」

「約咗個friend，依家等緊佢。」

「哦⋯⋯畀返你吖。」毛子蘭遞咗個銀包過嚟。

「我個銀包？！點解喺你度嘅？」

「你Lunch嗰陣跌咗，所以你個銀包都跌咗⋯⋯」

「唔該。」我即刻收返好個銀包。

「下次小心啲啦⋯⋯今次當買個教訓。」

「咩教訓呀？」毛子蘭拎住包維他奶走人。

我突然之間如夢初醒，我打開我個銀包，結果真係少咗20蚊⋯⋯

「喂你唔係Prefect嚟㗎咩？拎人銀包啲錢用唔啱㗎！」因為毛子蘭行到好遠，所以我大嗌⋯⋯果然見親毛子蘭都冇好事。

呢個時候，我見到Sky同Miss Lui喺Canteen，佢哋分別對住坐。

「做咩唔寫文呀？」

「我⋯⋯唔知點寫好⋯⋯」

「好難咩？你最近有聽書㗎。」

「總之寫唔出啦。」

「你今日可以唔寫，但係如果呢個係你DSE嘅題目咁點算。」

「DSE有幾題揀，我可以揀其他。」

「冇其他，得呢條。」

Sky有啲不知所措嘅。Miss Lui望一望錶，「依家4點半，我同你一齊作，90分鐘後你交畀我。」Miss Lui好認真咁講。

Miss Lui已經動筆，而Sky就仲有啲猶豫。

我望住咗佢哋10分鐘，Miss Lui好認真咁寫，Sky亦都好唔情願咁寫咗幾個字。而我因為冇咩耐性，已經返咗上課室。

----------------------------------------------

過咗一段時間，Miss Lui已經寫好咗，Sky亦都寫咗⋯⋯少少。

「畀你篇文我。」

Miss Lui望咗兩眼：「你咁寫一定唔合格啦，我唔需要你話我知眼淚有咩化學成分呀。」

「點解唔喊一定要理由啫，我唔想喊咪唔喊囉。」Sky反駁。

Miss Lui深呼吸一啖氣，傳自己篇文畀咗Sky「你睇吖。」

Sky拎起Miss Lui篇文。Miss Lui篇文係咁嘅：

「我是雷皓月，一位中學中文科老師。我要告訴你一個關於我內心深處的故事，一個讓我決定不哭泣的故事。

在我的心裡，有一道無法磨滅的痛楚。這個痛楚源於我最愛的哥哥雷皓璟在一場交通意外中為了救我而犧牲他的生命。

我和哥哥的感情非常深厚，他是我生命中最重要的人。我們總是一起分享快樂和悲傷，無論發生什麼事情，他總是我的後盾。但是，一個晴朗的日子裡一切都改變了。

那天，我們走在回家的路上，突然一輛失控的車朝我們衝來。我哥哥毫不猶豫地把我推到一邊，自己卻被車撞個正著，當場離開了這個世界。我親眼目睹了他為了保護我而犧牲的情景，這一幕永遠刻在我的腦海中。那個瞬間，我感到無比的悲傷和自責，我問自己，如果我能夠更快反應，或者做出不同的選擇，或許哥哥就不會離開了。

我為了不讓父母擔心，我選擇了堅強地面對這一切。每當我看到父母傷心欲絕的樣子，我會強迫自己壓抑淚水，笑著告訴他們我沒事，我會好好的。我不想讓他們看到我的脆弱，因為我明白，保護他們的心情比起自己的傷痛更重要。

我知道，這樣做並不能解決我的問題，無法減輕我內心的痛楚。但我不想成為父母的負擔，我不想讓他們為我擔心。所以，我選擇了不哭泣，將我的痛楚封印在心的角落。我能夠戴著笑容面對所有人，但我卻無法快樂起來⋯⋯」

「我知道你發生過咩事，我明白有幾痛，因為我都經歷過⋯⋯」Miss Lui身同感受咁講。

Sky冇回應，只係輕輕咁吸咗啖氣。

「篇文未寫完㗎⋯⋯後來有一日我返去我哥哥撞車嗰條馬路，我諗返起嗰日嘅畫面，我喊到收唔到聲⋯⋯我好想被車撞死嗰個係我，如果要揀一個人死我想揀我呀⋯⋯」Miss Lui一路講一路眼濕濕。

「但係我知道，如果畀佢揀多次，佢一樣會揀犧牲自己⋯⋯因為佢⋯⋯好愛我。所以呢，我決定唔再畀痛苦嘅回憶跟住自己，我要好好咁生活，我要代替佢好好咁照顧我自己，做我想做嘅事，開心又好唔開心又好，我要佢知道我有好好咁生活。」Miss Lui 好努力咁忍住眼淚，但係仍然有一啲忍唔住，佢即刻用手抹走自己嘅眼淚。

「呢個就係《我不哭的理由》。」抹走眼淚後嘅Miss Lui咁講。

Sky望住忍住眼淚嘅Miss Lui，Sky嘅雙眼都好似有啲眼濕。

「如果諗起佢嘅時候呢⋯⋯當你好掛住佢嘅時候又可以點呀⋯⋯」Sky輕輕咁問Miss Lui，呢個時候Sky微微咁抬起頭。

「唔使掛住㗎⋯⋯因為佢哋一定喺度。」Miss Lui篤一篤Sky心口。

Sky嘅作文紙上面，多咗一滴又一滴嘅眼淚⋯⋯

Sky終於將2年嚟嘅自責同悲傷釋放咗出嚟⋯⋯

Miss Lui望住喊緊嘅Sky，佢好似想同Sky講啲嘢，但係佢又冇開口，只係輕輕咁用佢自己份《我不哭的理由》拍下Sky個頭，然後就走咗。

----------------------------------------------

「你個死仔吖，又話傾兩句，成6點幾喇。」我同樂少走緊。

「鬼知SU咁多嘢做咩⋯⋯Miss Lui！」我哋落緊樓梯，而又咁啱見到Miss Lui，所以禮貌地打個招呼。

我哋經過Canteen，呢個時候我哋撞到Sky自己一個，不過Sky嘅感覺好似有啲唔同，冇咗嗰種憂鬱嘅感覺。

Sky見到我哋之後同我揮手，「阿錘，我哋夾Band吖！」Sky露出咗一個日劇男主角式嘅笑容。

「吓？點解嘅？」我問Sky點解突然應承我。

「因為我搵到佢喇。」Sky笑笑口咁講，其實我都唔知發生咗咩事。

「搵到咩呀？不過唔緊要啦，你肯同我哋夾Band就得喇！」我有啲激動咁講。

雖然唔知究竟經過咗咩事，不過Sky最後都加入咗我哋，而我嘅樂隊之路亦終於都去到起點。

（Tbc.）

11 - 第一次夾Band

第二日放學，我哋四過喺SU房開夾緊Band嘅會。

「咁我哋夾咩歌呀？」樂少問。

「我諗都係夾住啲cover先啦，遲啲再夾原創歌。」我答。

「咁不如夾Magic And…啲歌啦。」樂少講。

雖然我知道9成係因為Emma，樂少先會提出呢個意見。不過Magic And⋯又真係唔錯嘅意見。

「我冇所謂呀，我應該都打到。」太一講。

「我都可以呀，我得一個問題啫。」Sky呆呆哋咁講。

「咩呀？」我哋三個一齊問。

「我哋搵邊個做主音呀。」Sky答。

係喎，我一直都未諗呢個問題，為咗搵齊幾個樂手連主音都冇諗過。呢個時候，有一個人行咗入嚟SU房，呢個人係魔人。

「做咩咁齊人嘅？夾Band呀？」魔人問。

「傾緊主音搵咩人。」樂少答。

魔人清一清喉嚨：「其實咪有個人喺度囉。」

「點呀，阿錘？『激情對話』入面佢算係唱得OK，起碼係唯一一個冇走音。」樂少講。

「Errrrr⋯⋯」我唔識答。

「我冇所謂呀，主音最緊要係要有激情同自信！」太一咁講。

「果然識貨，要唔要加入我哋『激情對話』呀。」魔人聲衰衰咁講。

「試吓囉⋯⋯反正魔人又突然間喺度。」Sky講。

「係喎，其實你入嚟做咩㗎？」樂少問。

「我係想搵Anson㗎，我諗住搞中五聯誼呀，你知啦我話哂都係『班會康樂』，要做啲嘢嘅。阿錘你都要幫手呀。」魔人講。

「吓，我『學術』嚟咋喎」

「咪搞『學術交流』囉。」魔人講。

就係咁，魔人暫時成為咗我哋嘅主音。

----------------------------------------------

話咁快就到咗第一次夾Band嗰日。我同樂少都成日約出嚟，所以基本上都知佢著衫係咩Style，但係Sky同太一就冇見過，而魔人印象中都係普通T恤短褲。



呢日我同平時一樣，都係牛仔褲加件Band Tee，但係唔知點解孭住枝結他，就覺得自己唔同哂，加埋少少長嘅頭髮，係有少少型。其實點解要留長頭髮？想似返個Band仔囉。以前嘅年代，個個夾Band都長毛㗎嘛，Beyond、太極全部都係咁，就算新啲嘅Band點都有一兩個成員係長髮嘅。

當你孭住結他出街，你就由中學生變成Band仔，我呢一刻嘅身份認同係夾Band嘅Band仔！

我約咗佢哋喺下面等，想齊人先上去，因為The Echo係喺旺角嘅商廈入面，比較迫。

我係最早到嘅，之後就到樂少。樂少著嘅係黑衫黑褲黑鞋，因為佢話黑色有型喎，第一次見佢孭Bass出街，好似都幾襯佢個全黑look。

之後到嘅係樂少同Sky，樂少著件瘀紅色T恤，Sky就係日系look，如果你要我估邊個係日本人，我一定估Sky，因為太一反而有啲似泰仔。

魔人都到咗，佢有啲唔同，著到板仔咁嘅造型，仲帶咗頂cap帽。

我哋上到去，門口有個Reception姐姐，望落去應該大我哋一兩年，個樣有少少MK。

「Err⋯⋯唔該⋯⋯book咗Band房。」

「劉生係咪？」

「係。」唔知點解比佢叫做劉生有啲尷尬。

「右邊間房。」

我哋入咗去，各自去自己嘅位置。兩個結他Amp係擺埋一齊嘅，但係就唔同款，Sky叫我揀先，我就揀咗Fender，而Sky就揀Marshall。Band房入面最令我驚訝嘅係樂少同太一，樂少一插Amp就玩咗少少簡單根音，唔算花，但係好有Groove，而太一都即刻打到個Beat去jam，我完全估唔到呢兩個人會咁夾。

之後Sky一扭開Volume，就「表演」緊。我諗對佢嚟講只係隨便熱下身，但我就好似睇表演咁。我呢一刻就知道，我最多只可以做Rhythm Guitar，Solo係屬於Sky嘅。

魔人就試緊枝咪，當大家都準備好，我就叫大家跟住首歌試一次先。結果⋯⋯

Sky當然係輕鬆Carry，而我亦都彈得中規中矩，係拍子有少少甩。至於太一有時會突然快咗，而樂少就全程四下根音，之不過好似有啲走音。

而魔人呢⋯⋯係就係冇走音，但係拍子差，唔夠氣，最奇怪係佢自己作咗段Rap入去⋯⋯

「魔人呀，你加段Rap落去做咩呀？而且個Flow似數白欖多啲喎。」我問魔人。

「我諗住將Hip hop同搖滾結合，帶領香港新潮流。」魔人好認真咁答。

「搖滾唔係咁樣㗎，唔可以隨便加嘢入去㗎⋯⋯」「同埋你每次副歌都入慢咗嘅⋯⋯」

我用結他試唱咗一次畀佢聽。

呢個時候，達仔入咗嚟。雖然話就話叫達仔啫，但係睇佢個樣都30歲啦，仲叫自己做呀仔，好似有啲奇怪。

「喂，同學仔，點呀啲聲正唔正？」

「幾好⋯⋯吖⋯⋯」其實我都唔知點講。

「第一次夾呀？」

「係呀。」

「我啱啱喺出面聽咗喇，畀啲意見你哋啦，Rhythm guitar做咩一嚟做開distortion呀，首歌要有build up㗎嘛，副歌先轉『拆聲』；鼓手打Snare幾穩，但係踩Kick唔夠力，整體有啲『催拍』；Lead Guitar就幾好喎，Solo有Feel；Bass手就⋯⋯你畀知Bass我睇吓。」

樂少畀咗枝Bass達仔，達仔彈咗兩彈，望咗兩眼，睇吓條頸同背面：「我懷疑呢枝係假嘢。」

「吓？」樂少驚訝。

「你聽下吖，高過第3格嘅音全部都唔準，仲有明明寫住Made in USA，但係你睇後面啲螺絲，分明唔係美國嘅做工，我諗呢個Pick Up可能係大陸貨添呀。」

「唔係掛⋯⋯」

「買咗幾錢呀？」

「1500蚊。」

「咁當買個教訓啦，下次去信得過嘅琴行買，或者搵我。」達仔又sell自己生意。

「你枝Bass好似係狗明賣畀你㗎喎。」我同樂少講。

「B班個狗明？」太一問。

「係呀。」

「佢肯定坤你啦！我哋班都有人畀佢呃過買電話殼，以為係正版，點知係淘寶貨！」太一有少少憤怒。

「搞錯呀！」樂少講。

「聽日返學校，我哋一齊揼佢一鑊！」太一講。

「一於call齊人開拖。」魔人講。

「狗明你個仆街吖！」樂少講。

「好呀，我都未打過交。」Sky又笑笑口咁講。

我見大家有啲情緒高漲，諗住cool down下：「喂喂喂，冷靜啲先，唔一定要用拳頭嘅。」

「點呀，用流星錘呀？」樂少諗住搞個gag。

「如果阿錘都打埋一份就份流星拳喇。」 Sky都搞埋一份，應該係想食我個名「劉星」兩個字。

「Sky你『加碼』入去就會變做『天馬流星拳』。」太一都係爛gag王。

Sky因為呢幾個無聊嘅爛Gag笑到趴咗喺地，我都係第一次見佢咁開心咋，雖然唔知佢做咩突然肯同我哋夾Band，但係依家又識搞Gag又笑到趴地，應該已經解開咗心結？咁嘅話，都幾好吖。

「劉星隨，我哋咁多年兄弟，一句，你打定唔打？」樂少又唔知邊個演員上身。

「關志樂⋯⋯我依家想夾Band呀。」我都配合地做咗少少戲啦。

達仔拎咗枝Bass入嚟畀樂少：「彈住先啦，我私伙嘢嚟。」

如是者，我哋就完結咗第一日嘅夾Band。

雖然中間有好多唔關事嘅話題，但係真係好開心，好鍾意呢種一班人一齊嘅感覺，原來夾Band真係咁好玩。

正喺我哋準備走之際，達仔又出嚟R水吹：「其實你哋讀咩學校㗎？」

「康慕會寧華中學。」我答。

「寧華⋯⋯？我有個Friend喺嗰度畢業喎，之前出過道做歌手㗎，係你哋師兄喎，唔知你哋識唔識呢，佢咩Silas。」 

達仔講出呢個名嘅時候，我個心震咗一吓，因為佢就係中一嚟表演嗰個人，亦都係令我想夾Band嘅嗰個人－Silas。

（Tbc.）

11 - 第一次夾Band

第二日放學，我哋四過個喺SU房開夾緊Band嘅會。

「咁我哋夾咩歌呀？」樂少問。

「我諗都係夾住啲cover先啦，遲啲再夾原創歌。」我答。

「咁不如夾Magic And…啲歌啦。」樂少講。

雖然我知道9成係因為Emma，樂少先會提出呢個意見。不過Magic And⋯又真係唔錯嘅意見。

「我冇所謂呀，我應該都打到。」太一講。

「我都可以呀，我得一個問題啫。」Sky呆呆哋咁講。

「咩呀？」我哋三個一齊問。

「我哋搵邊個做主音呀。」Sky答。

係喎，我一直都未諗呢個問題，為咗搵齊幾個樂手連主音都冇諗過。呢個時候，有一個人行咗入嚟SU房，呢個人係魔人。

「做咩咁齊人嘅？夾Band呀？」魔人問。

「傾緊主音搵咩人。」樂少答。

魔人清一清喉嚨：「其實咪有個人喺度囉。」

「點呀，阿錘？『激情對話』入面佢算係唱得OK，起碼係唯一一個冇走音。」樂少講。

「Errrrr⋯⋯」我唔識答。

「我冇所謂呀，主音最緊要係要有激情同自信！」太一咁講。

「果然識貨，要唔要加入我哋『激情對話』呀。」魔人聲衰衰咁講。

「試吓囉⋯⋯反正魔人又突然間喺度。」Sky講。

「係喎，其實你入嚟做咩㗎？」樂少問。

「我係想搵Anson㗎，我諗住搞中五聯誼呀，你知啦我話哂都係『班會康樂』，要做啲嘢嘅。阿錘你都要幫手呀。」魔人講。

「吓，我『學術』嚟咋喎」

「咪搞『學術交流』囉。」魔人講。

就係咁，魔人暫時成為咗我哋嘅主音。

----------------------------------------------

話咁快就到咗第一次夾Band嗰日。我同樂少都成日約出嚟，所以基本上都知佢著衫係咩Style，但係Sky同太一就冇見過，而魔人印象中都係普通T恤短褲。



呢日我同平時一樣，都係牛仔褲加件Band Tee，但係唔知點解孭住枝結他，就覺得自己唔同哂，加埋少少長嘅頭髮，係有少少型。其實點解要留長頭髮？想似返個Band仔囉。以前嘅年代，個個夾Band都長毛㗎嘛，Beyond、太極全部都係咁，就算新啲嘅Band點都有一兩個成員係長髮嘅。

當你孭住結他出街，你就由中學生變成Band仔，我呢一刻嘅身份認同係夾Band嘅Band仔！

我約咗佢哋喺下面等，想齊人先上去，因為The Echo係喺旺角嘅商廈入面，比較迫。

我係最早到嘅，之後就到樂少。樂少著嘅係黑衫黑褲黑鞋，因為佢話黑色有型喎，第一次見佢孭Bass出街，好似都幾襯佢個全黑look。

之後到嘅係樂少同Sky，樂少著件瘀紅色T恤，Sky就係日系look，如果你要我估邊個係日本人，我一定估Sky，因為太一反而有啲似泰仔。

魔人都到咗，佢有啲唔同，著到板仔咁嘅造型，仲帶咗頂cap帽。

我哋上到去，門口有個Reception姐姐，望落去應該大我哋一兩年，個樣有少少MK。

「Err⋯⋯唔該⋯⋯book咗Band房。」

「劉生係咪？」

「係。」唔知點解比佢叫做劉生有啲尷尬。

「右邊間房。」

我哋入咗去，各自去自己嘅位置。兩個結他Amp係擺埋一齊嘅，但係就唔同款，Sky叫我揀先，我就揀咗Fender，而Sky就揀Marshall。Band房入面最令我驚訝嘅係樂少同太一，樂少一插Amp就玩咗少少簡單根音，唔算花，但係好有Groove，而太一都即刻打到個Beat去jam，我完全估唔到呢兩個人會咁夾。

之後Sky一扭開Volume，就「表演」緊。我諗對佢嚟講只係隨便熱下身，但我就好似睇表演咁。我呢一刻就知道，我最多只可以做Rhythm Guitar，Solo係屬於Sky嘅。

魔人就試緊枝咪，當大家都準備好，我就叫大家跟住首歌試一次先。結果⋯⋯

Sky當然係輕鬆Carry，而我亦都彈得中規中矩，係拍子有少少甩。至於太一有時會突然快咗，而樂少就全程四下根音，之不過好似有啲走音。

而魔人呢⋯⋯係就係冇走音，但係拍子差，唔夠氣，最奇怪係佢自己作咗段Rap入去⋯⋯

「魔人呀，你加段Rap落去做咩呀？而且個Flow似數白欖多啲喎。」我問魔人。

「我諗住將Hip hop同搖滾結合，帶領香港新潮流。」魔人好認真咁答。

「搖滾唔係咁樣㗎，唔可以隨便加嘢入去㗎⋯⋯」「同埋你每次副歌都入慢咗嘅⋯⋯」

我用結他試唱咗一次畀佢聽。

呢個時候，達仔入咗嚟。雖然話就話叫達仔啫，但係睇佢個樣都30歲啦，仲叫自己做呀仔，好似有啲奇怪。

「喂，同學仔，點呀啲聲正唔正？」

「幾好⋯⋯吖⋯⋯」其實我都唔知點講。

「第一次夾呀？」

「係呀。」

「我啱啱喺出面聽咗喇，畀啲意見你哋啦，Rhythm guitar做咩一嚟做開distortion呀，首歌要有build up㗎嘛，副歌先轉『拆聲』；鼓手打Snare幾穩，但係踩Kick唔夠力，整體有啲『催拍』；Lead Guitar就幾好喎，Solo有Feel；Bass手就⋯⋯你畀知Bass我睇吓。」

樂少畀咗枝Bass達仔，達仔彈咗兩彈，望咗兩眼，睇吓條頸同背面：「我懷疑呢枝係假嘢。」

「吓？」樂少驚訝。

「你聽下吖，高過第3格嘅音全部都唔準，仲有明明寫住Made in USA，但係你睇後面啲螺絲，分明唔係美國嘅做工，我諗呢個Pick Up可能係大陸貨添呀。」

「唔係掛⋯⋯」

「買咗幾錢呀？」

「1500蚊。」

「咁當買個教訓啦，下次去信得過嘅琴行買，或者搵我。」達仔又sell自己生意。

「你枝Bass好似係狗明賣畀你㗎喎。」我同樂少講。

「B班個狗明？」太一問。

「係呀。」

「佢肯定坤你啦！我哋班都有人畀佢呃過買電話殼，以為係正版，點知係淘寶貨！」太一有少少憤怒。

「搞錯呀！」樂少講。

「聽日返學校，我哋一齊揼佢一鑊！」太一講。

「一於call齊人開拖。」魔人講。

「狗明你個仆街吖！」樂少講。

「好呀，我都未打過交。」Sky又笑笑口咁講。

我見大家有啲情緒高漲，諗住cool down下：「喂喂喂，冷靜啲先，唔一定要用拳頭嘅。」

「點呀，用流星錘呀？」樂少諗住搞個gag。

「如果阿錘都打埋一份就份流星拳喇。」 Sky都搞埋一份，應該係想食我個名「劉星」兩個字。

「Sky你『加碼』入去就會變做『天馬流星拳』。」太一都係爛gag王。

Sky因為呢幾個無聊嘅爛Gag笑到趴咗喺地，我都係第一次見佢咁開心咋，雖然唔知佢做咩突然肯同我哋夾Band，但係依家又識搞Gag又笑到趴地，應該已經解開咗心結？咁嘅話，都幾好吖。

「劉星隨，我哋咁多年兄弟，一句，你打定唔打？」樂少又唔知邊個演員上身。

「關志樂⋯⋯我依家想夾Band呀。」我都配合地做咗少少戲啦。

達仔拎咗枝Bass入嚟畀樂少：「彈住先啦，我私伙嘢嚟。」

如是者，我哋就完結咗第一日嘅夾Band。

雖然中間有好多唔關事嘅話題，但係真係好開心，好鍾意呢種一班人一齊嘅感覺，原來夾Band真係咁好玩。

正喺我哋準備走之際，達仔又出嚟R水吹：「其實你哋讀咩學校㗎？」

「康慕會寧華中學。」我答。

「寧華⋯⋯？我有個Friend喺嗰度畢業喎，之前出過道做歌手㗎，係你哋師兄喎，唔知你哋識唔識呢，佢咩Silas。」 

達仔講出呢個名嘅時候，我個心震咗一吓，因為佢就係中一嚟表演嗰個人，亦都係令我想夾Band嘅嗰個人－Silas。

（Tbc.）

睇漏個錯字

12 - 我陪你囉。

2009年 康慕會寧華中學聖誕聯歡日

今日全校嘅師生都喺晒禮堂，因為學生會決定喺放假前嘅呢日搞一年一度嘅「天才表演」。中一嘅樂少同我坐喺禮堂前排嘅位置。

「喂阿錘，聖誕有咩玩呀？」中一嘅樂少問我。
「打機掛，得閒咪溫書囉。」
「不如睇戲啦，阿凡達好似好正。」
「3D嗰套？都好吖。」

「天才表演」呢啲嘢通常都係畀啲師兄師姐唱歌、跳舞、演話劇咁，所以都有啲悶，呢個時候主持人就宣布有一位特別嘅表演嘉賓。

「各位同學，畀啲掌聲歡迎我哋嘅表演嘉賓，我哋嘅師兄Silas！」

禮堂響起掌聲，我都跟住拍手。

嗰個人孭住一枝結他行出嚟，帶住佢隊Band出場。佢簡單自我介紹，然後就開始唱歌。

嗰首歌，係佢自己作嘅一首歌⋯⋯我覺得好有生命力，每一粒音符都衝擊緊我嘅心臟。嗰一刻我先發覺歌原來可以咁好聽，咁震撼。我終於知道音樂係有靈魂，而搖滾樂真係可以改變世界。

對一個中學生嚟講，呢一次係音樂上嘅啟蒙，係對於「人生」呢個旅程入面，一個好重要嘅「中轉站」。

----------------------------------------------

畫面又返到嚟The Echo。

「不過呢，我都幾年冇見過佢，個人好似消失咗咁，搵極都搵唔到。」達仔好似覺得有啲可惜。
「佢中一有嚟過我哋學校表演呀。」我講。
「哦，就係嗰個人呀？我最記得係完Show之後佢爆副校上堂放屁，得你敢笑。」樂少講。
「係呀，勁尷。」我答樂少。
「我都記得，的確係唱得幾好，不過我比較留意結他手。」Sky咁講。
「我都記得嗰個人呀。爆副校長放屁都勁好笑，但全部人都忍住唔敢笑。」太一咁講。
「不過講嗰日呢，我最有印象係啲師姐跳少女時代。」魔人回味無窮咁講。

原來佢哋都記得嗰場Show，所以呢，一次好嘅表演真係會喺人心目中留低一世。

----------------------------------------------

之後嘅幾個星期，我哋都有keep住一個禮拜夾一次Band，主要都係Magic And…同埋新啲嘅廣東搖滾歌，例如《黑色狂迷》、《圍城》、《如果我是陳奕迅》呢類。

自從我哋開始夾Band之後，最大改變嘅竟然係Sky。Sky開始講多咗嘢，有時甚至會主動搵啲女仔傾偈，霞姨甚至擺明沉晒船咁嘅樣，不過都唔難理解嘅，始終顏值真係高。另一方面，樂少除咗偷偷哋咁望住Emma，就連傾吓偈都唔敢，反而因為畀狗明呃咗1500蚊買假嘢而日日追住佢。太一同魔人最近好似幾Friend，佢兩個好似成日傾Hip Hop嘢。

今日，升學及就業輔導組組嘅曹sir召開咗個會，所有高中嘅班會代表同埋Prefect都要出席，而我作為班會嘅「學術」就被迫出席。

「各位同學，星期六我哋會同其他幾間學校會搞個升學及就業輔導講座，所有高中同學都要出席。我哋學校作為主辦，需要各位幫手，例如做吓Reception呀，帶吓位呀，派傳單咁。」曹sir咁講。

所謂嘅升學及就業講座，講嚟講去都係三幅被，主要都係畀啲大專學校嚟賣廣告啫。

「冇問題呀曹sir，我哋Prefect會分人去幫手。」講緊嘢嘅係上次偷咗我張20蚊紙去買維他奶嘅毛子蘭。
「咁有我哋學校咁出色嘅Prefect，我諗我呢啲班會代表，不如乖乖哋專心聽講座啦。」我咁樣接，因為唔想煩。
「唔得，邊到夠人呀，你一定要幫手搬嘢添呀劉星隨。」曹sir咁講。

中三嗰年，曹sir有教我Econ，所以佢記得我，但係我對佢印象就唔多好喇。上堂Hea教呢，我就冇咩所謂嘅，但係大細超就衰囉；仲記得當年，我同樂少冇交份功課，佢又要我哋留堂又見班主任，仲差啲要記我哋缺點，但係我哋班嗰靚女Monica唔交就噓寒問暖，問人哋係咪唔舒服，使唔使阿sir幫佢補堂。呢條教畜最叻就恰啲新入職嘅男TA同老師，但係就成日痴住啲後生Miss，最近就搞住Miss Lui，睇到都覺得躁躁地！

「喂劉星隨，曹sir叫你放學幫手拎傳單喎。」毛子蘭同我講。
「吓，唔係應該老師自己搞咩。」我有啲不爽咁講。
「曹sir話講座好多嘢要準備，所以叫你幫手。」
「點解係我呢？唔叫其他人？」
「其他男仔話校隊要練習，或者社有活動，冇個得閒囉。」
「聽講間印刷鋪喺隔離區喎⋯⋯」
「我陪你囉。」
「唔係呀，呢啲根本唔應該係我哋做嘅，點解要畀佢點先。」
「既然你唔想去，咁我自己去啦。」毛子蘭講完就走咗去。

其實我真係唔想幫曹sir，但係又冇理由要毛子蘭自己一個拎晒啲傳單，所以我放學之後就喺門口等咗一陣。

毛子蘭行出門口。「你真係自己去拎？」我問毛子蘭。
「係。」
「幫你啦，不過你要還返20蚊畀我。」
「唔制。明明你自己包維他奶都6蚊。邊有可能還20蚊畀你。」
「咁14蚊囉，仲有呀，你呃咗我句『多謝』，你要還埋畀我。」

毛子蘭冇理我，一路行去印刷鋪。

其實啲傳單唔係好重，同我平時啲書差唔多，不過係唔滿意要幫曹sir做義工。

我哋拎住啲傳單返到學校，其實全部都係我拎，毛子蘭只係陪我行返嚟。返到學校之後，我就去教員室交低咗啲傳單畀曹sir就準備走，點知佢連自己拎去佢張枱都懶，直頭叫我放入去佢張枱。

我哋學校唔畀學生隨便入教員室，我都只係入過幾次，主要都係畀老師叫幫手搬嘢。

曹sir嗰位冇咩特別嘢，喺放咗個1999年嘅傑出教師獎，竟然呢個人都可以攞獎，我有啲難以置信。

離開教員室之後，我就見到毛子蘭，佢掉咗包維他奶畀我，然後講咗句「多謝。」

（Tbc.）

13 - 黑色西炒飯

「仲有8蚊呀。」我同毛子蘭講。

毛子蘭冇理過我就走咗。

呢個人真係好奇怪，不過佢好似又唔係想像中咁難相處。

----------------------------------------------

第2日小息嘅時候，Sky同我講咗啲嘢。

「阿錘你，不如以後做Vocal啦。」Sky好似漫不經心咁講。

「吓？我喎⋯⋯同埋我哋咪有魔人囉。」

「老實講吖，魔人唱功未到水平，你都唱得好過佢。」Sky突然變到好認真。

「但係⋯⋯我哋唔可以就咁踢走佢，起碼都要問吓樂少同太一仲有魔人佢，而且我都唱得麻麻啫。」

「都係嘅，咁交畀你喇。」Sky又笑笑口咁講完就走咗去。

我Lunch Time就問咗樂少，太一因為下晝要補課，要等放學先搵到佢。

「咁魔人又真係麻麻地啱唱歌嘅，Rap好似啱佢多啲。」樂少講。

「我都覺得Rap啱佢多啲，但係點同佢講呀。同埋真係我唱咩唔通。」我同樂少講。

「Rhythm唱埋歌呢個Set Up都唔少見啦，好正常，而且你唱歌係好啲嘅。」樂少講。

「係咩。」我有啲半信半疑。

放學嘅時候，我同樂少諗住去搵太一。點知⋯⋯太一竟然同魔人打緊交⋯⋯

「仆街仔，原來你係啲咁嘅人嚟！」太一激動咁講。

「我都知我唔啱，但係我冇辦法堅持喇！」魔人激動中帶少少傷感咁講。

「食屎啦你！」太一準備衝過去打魔人。

我同樂少即刻衝過去分開佢哋兩個。

「做咩事呀？打咩交呀。」我問太一。

太一望實我：「呢個仆街仔⋯⋯竟然係⋯⋯」

「阿錘、樂少，其實我想講好耐㗎喇，我一直將呢個秘密收埋喺心裡面好耐，但係我唔敢話畀你哋知，就係驚你哋知道之後會接受唔到我⋯⋯由細到大，我都覺得自己同其他人唔同⋯⋯」魔人好似準備將心裡面嘅秘密講出嚟。

樂少突然攬住咗魔人：「唔緊要，我哋明⋯⋯原來你有呢個秘密，唔怪得知佢好似成日都望住我咁啦⋯⋯」

「你講咩呀⋯⋯我幾時有成日望住你呀。我係想同你哋講，其實我鍾意Hip hop，一路扮Band仔我好辛苦，我想做Rapper呀！」魔人即刻推開樂少。

「哦⋯⋯係咁啫吓話。」我有少少驚訝，原來劇情係呢個走向。

「係呀，呢個仆街仔係搖滾叛徒！」太一仲係好激動。

「唔緊要啦，只要大家都鍾意音樂，你係咩『取向』有咩所謂吖。」樂少咁講。

我突然間有啲跟唔到，做咩會變到同性戀出櫃大會咁⋯⋯

總之就係咁，魔人就決定離開我哋，踏上自己嘅Rapper之路。

時間又嚟到另一日，我哋四個又喺SU房開會。

「咁以後就由阿錘做主音啦。」Sky笑笑口咁講。

「贊成！」樂少同太一都咁講。

「吓，係咪真係得㗎。」我有少少擔心。

我一直都覺得自己冇唱歌嘅天份，而且都冇Silas嗰種生命力，所以我想靜靜地做個結他手留喺隊Band入面，突然要我做主音，我真係有啲擔心，不過或者我內心都想認真試一次，當畀次機會自己，唔得咪再搵人囉，我就懷住呢個心態暫時做住主音加Rhythm結他手先。

「比起我做主音，我哋應該要改個名先。」我突然醒起，我哋隊Band係未有名，我哋個Group係叫「約夾band」因為最大佢嘅用途係約夾Band嘅時間。

一講到改名，大家突然好多意見。

太一：「不如改個日文名啦！」
樂少：「我哋香港Band嚟㗎，點可以改日文名㗎！計我話呢，要有人名喺入面嘅，好似Dear Jane、To Nick呀咁。」
我：「人哋係讀『tonicK』呀，唔係To Nick呀！」
樂少：「是旦啦，不如叫Dear Emma或者係 To Emma啦！」
太一：「都係日文名啦，例如『清廚』咁」
Sky：「我好似有一年投過一個學生會內閣叫『清廚』㗎！」
太一有啲感動：「原來嗰票係你投㗎！BTW我個內閣叫『清泉』呀⋯⋯」
Sky：「因為我見得佢用中文所以就投咗佢囉，最後有冇贏到呀？」
樂少：「最後係我個內閣贏呀！如果唔係你哋邊有得用SU房呀！」
太一： 「喂Sky，其實你知唔知我係『清泉』會長呀⋯⋯」
Sky：「乜原來係咁呀，因為通常我都係瞓教，所以冇留意呀。」

我：「咁叫咩好呀？」

樂少：「Dear Emma！」
太一：「清廚！」
樂少：「Dear Emma！」
太一：「清廚！」
樂少：「Dear Emma！」
太一：「清廚！」

樂少同太一有啲小學雞咁拗咗好耐，我開始做緊功課，因為數學科份Exercise今日就要交，而Sky已經碌緊電話。

「阿錘你晏晝食咗咩呀？」Sky突然問我。

「西炒飯。」我答。

「咁太一、樂少，你哋鍾意咩顏色呀？」Sky又問佢哋。

「黑色，我啲衫都係全黑嘅。」樂少答。

「紅色，男人就緊係要激情嘅紅色。」太一答。

「咁呀⋯⋯不如叫『黑色西炒飯』啦。」Sky突然講。

「你係點諗到㗎？」我問。

Sky舉高電話：「呢個Post話如果想改Band名可以用鍾意嘅顏色加啱啱食完嘅嘢，所以就係『黑色西炒飯』喇。」Sky又笑笑口咁講。

「點解唔係紅色呀。」太一問。

「西炒飯本身咪紅色囉。」樂少答。

「咁不如就『黑色西炒飯』啦！」我講。

「咁都幾順口嘅。」太一講。

「OK，決定好喇。」Sky講。

就係咁，「黑色西炒飯」就正式成立！而我哋第一樣要做嘅嘢，係要幫樂少追返1500蚊！

我哋約咗狗明喺課室門口等。太一已經攝高衫袖準備好打交，樂少就拎住枝Bass，而Sky就都係畀人漫不經心嘅感覺。

「狗明！你枝嘢假㗎喎！賠錢呀！」樂少大嗌。

「使唔使咁大班人呀，人多我就怕你咩？」狗明好串咁講。

「你枝Bass係假嘢，你知道先咁平賣畀我嘅，係咪？！」樂少繼續好激動。

「咪話咗枝Bass係我阿哥㗎囉，我都唔識音樂，我中介嚟㗎咋。」狗明仲係好串咁講。

「我哋依家唔係要咩，你畀返1500蚊樂少，你拎返走枝Bass，我哋當冇事。」太一有少少兇咁講。

「喂喂喂，畀錢買嘢前check清楚，應該係買家責任喎，我呢個賣家貨物出門，恕不退換。」

「豈有此理，係咪想打交呀！」太一想兇狗明。

「呢度學校嚟㗎同學，唔係武館呀。」

「咁報警囉！」太一再試圖兇狗明。

「你以為我第一日出嚟賣嘢咩，我只係將件我『以為』係正版嘅Bass用『友情價』賣畀我嘅『好朋友』，我都唔知係假嘢嚟㗎。」狗明繼續講。

狗明真係好串，連我呢個和平主義者都想揼佢一鑊。太一衝埋去掹住狗明嘅衫領，準備打交換之勢，突然有個人喝停我。

「一個二個咩事，想打交呀？」講緊嘢嘅係李sir，係我文學科嘅老師。

「李sir，少少糾紛啫。」我同李sir講。

李sir望一望我哋幾個：「全部人落教員室等我。」

之後我畀李sir捉咗入去問話。

「就係咁喇。」我將成件事講畀李sir知。

「咁就濕滯喇，我都唔知點搞好。」李sir講。

李sir，李盛安。大概30歲，係訓導組老師，對住啲低Form就會兇啲，但係對住高Form就Nice好多，對住我哋文學科同學甚至唔會擺出個老師款，我哋上堂玩電話佢都唔會鬧。因為涉事嘅人得我讀文學，所以李sir就問我先。

「我哋淨係諗住叫狗明畀返錢樂少咋。」我講。

「大佬呀，你哋曬哂馬咁我好難做㗎，啱啱副校見到即刻要我處理。咁我又訓導組，你話點喇。」

「有冇得見狗明家長呀。」

「呀隨兄，你知唔知見家長好麻煩㗎，如非必要我都唔會見學生家長。」冇錯，李sir係鍾意叫我哋咩兄咩姐咁。

「嗱咁啦，Bass吖嘛，我畀我嗰枝樂兄啦。」李sir咁講。

「吓，你竟然有彈Bass？」我有啲驚訝咁講。

「你睇小我呀？阿sir我以前打Band㗎。」李sir咁講。不過我心諗打Band係咩年代講㗎。

「估你唔到喎李sir。」

「不過擺咗10幾年，應該冇咁好聲㗎喇。」

「咁但係冇解決過件事喎。」

「呀隨兄，世界上好多嘢都唔係話解決就解決到，如果咩都解決到，我哋社會就唔會咁多怨氣啦。」李sir語重心長講。

「就咁由得狗明呀？」

「唔係點呀？咁啦，我叫佢道個歉，我聽日畀枝Bass樂兄，由佢啦。」李sir應該想快啲完哂件事。

「咁我出去同佢哋講啦。」

「你叫埋呀明兄入嚟。」

狗明出嚟之後就同咗樂少道歉，當然都唔係好情願啦。但係因為李sir嘅關係，樂少都接受咗。而樂少之後亦都得到咗一枝唔錯嘅Yamaha Bass。

假貨事件算係告一段落。

（Tbc.）

14 - 升學及就業講座日

升學及就業講座日

今日係升學及就業講座日，我因為係「學術」嘅關係，好早就返咗學校幫手。我今日嘅工作⋯⋯應該算係IT狗，即係幫嘉賓set電腦，同開Projector之類，我而家就喺禮堂開緊電腦。突然間有個人就埋嚟搵我。

「阿錘，你搞緊咩呀？」Sky問我。

「你睇唔到咩，set緊電腦呀。你又做咩咁早呢？2點先開始講座喎。」我答Sky。

「哈哈，因為我睇錯咗通告，以為12點開始。」Sky笑笑口咁講。

有時真係唔知點講Sky好，明明好眼利，但係又會好大頭蝦，定係應該話上天係公平呢，靚仔都係有啲白痴。

「Miss Lui，使唔使幫手呀？」曹sir問Miss Lui，一副盡獻殷勤嘅樣。

「唔使啦，啲嘢搞得七七八八。」Miss Lui一路喺禮堂門口做緊Set Up一路答。

「咁呀，我哋食個晏先囉，你返工咁耐都未有時間認識吓。」曹sir講。

「Umm⋯⋯唔使啦，我唔肚餓。」Miss Lui一副推搪嘅樣。

「飲杯嘢囉，反正講座2點先開始，啲嘢畀學生搞埋咪得囉。」曹sir又講。

Miss Lui個樣係非常唔想陪曹sir食嘢，但係作為新老師又好難推太多次，所以Miss Lui都唯有答應。但係呢一切都畀禮堂入面嘅Sky見到，Sky亦都好似察覺到Miss Lui嘅不情願。

「Miss Lui，可唔可以過一過嚟呀。」Sky向門口嘅Miss Lui大叫。

Miss Lui行過去Sky身邊：「有咩事呀司徒天？」

「阿錘佢囉，原來唔識set電腦呀。」Sky咁同Miss Lui講。

「吓，我識喎⋯⋯」

「劉星隨，你咁都唔識呀，好彩你冇讀ICT咋。」Miss Lui馬上附和Sky。

「Errr⋯⋯我⋯⋯」

「冇辦法啦，等Miss嚟搞。」Miss Lui即刻搶走我嘅IT狗之位，再大聲同曹sir講：「曹sir唔好意思呀，我諗我要幫啲學生呀。」

估唔到最後我變咗唔識用電腦嘅人⋯⋯點解好似有啲奇怪？不過算啦，反正我都唔係好想做IT狗。

因為變咗唔識用電腦嘅人，所以我就畀曹sir叫咗去幫班Prefect手，負責「接客」喇。

於是我就落去學校門口，有一班Prefect已經準備緊。

「咦，做咩你又喺度嘅？」毛子蘭問我。

「我畀曹sir叫咗落嚟『接客』呀。」

「你喎？」毛子蘭好奇咁問。

雖然毛子蘭應該冇惡意，但係我聽落就覺得係一種挑釁。

「好出奇咩，我其實係乖學生嚟。」

「又記缺點又抄功課又懶，都好學生呀？！」毛子蘭咁講。

「其實抄功課真係好小事㗎咋，唔好同我講你冇抄過喎。」

「冇呀，功課唔自己做邊學到嘢㗎。」

「吓？」我簡直唔能夠相信呀，竟然到咗今日仲有人會講出一番咁「正經」嘅說話。

「劉星隨，你都係唔好企門口，你頭髮太長，影響校譽。」曹sir突然走過嚟同我講。

對於本來就唔係Prefect嘅我當然冇所謂啦，但係曹sir唔知係咪覺得係我令佢冇咗同Miss Lui食飯嘅機會，成日都好似仇視我咁款。

「劉星隨，你同我去拎啲傳單嚟！」曹sir又兇狠咁叫我做嘢。

「係。」我當然係低調咁冇畀反應佢，然後就去教員室拎嘢。

我上緊去嘅呢個時候，毛子蘭跟咗上嚟。我問佢：「做咩呀你？」

「驚你呢個『乖學生』偷懶呀。」

我望住毛子蘭：「你搞我笑咩？我點會呀。」

我哋入到教員室，因為曹sir個位擺咗幾疊功課簿，所以我要好小心咁拎走啲傳單。唔知毛子蘭係咪諗住幫我，佢伸手移開疊簿，點知就唔小心撞低咗曹sir個「1999年傑出教師獎」，結果個獎就跌落地下，碎開成幾塊嘢。呢個時候，曹sir行咗入嚟。

「搞咩呀，劉星隨，咁慢嘅？」曹sir一路行埋個位一路講。

「Errr⋯⋯」

曹sir發現自己個獎跌落地下爛咗，佢好激動咁望住我哋大叫：「發生咩事？點解我個獎會爛咗？！」

毛子蘭好似有少少嚇親，佢有少少口窒窒咁講：「我⋯⋯諗住⋯⋯拎起啲簿嗰陣⋯⋯唔小心⋯⋯」

「我唔小心撞跌咗。」我好冷靜咁同曹sir講。

我完全唔知我做咩會話係我撞跌佢個獎，我好似冇思考過咁就講咗出嚟⋯⋯

「劉星隨！你唔剪頭髮！又唔交功課，又成日懶懶閒！又唔識用電腦！上堂又唔聽書！都算喇！連個人都咁遴迍，你點賠返個獎畀我呀！」曹sir已經嬲到出哂青根，如果唔係喺學校，我諗佢已經講緊粗口。

「唔係劉星隨撞跌⋯⋯」毛子蘭想解釋。

「係你個位擺得多嘢咋。」我即刻截咗毛子蘭。

「劉星隨！你做錯嘢仲咁嘅語氣！」曹sir繼續兇我。

「Errr⋯⋯對唔住⋯⋯曹sir⋯⋯」我又啲唔情願咁鞠躬講。

「係我撞跌㗎⋯⋯」毛子蘭又想解釋。

「唔關佢事，我貪方便，諗住自己夠力，點知跣手。」我勉強解釋。

「你睇吓人哋吖，想幫你頂呀！」曹sir再鬧多我兩句。

唔知係咪曹sir太大聲咁關係，Miss Lui入咗嚟睇發生咩事。 因為星期六嘅關係，學校冇咩老師，而教員室就只係得我哋四個。

「發生咩事呀？」Miss Lui問。

曹sir大力唞啖氣：「呢個劉星隨呀！做錯嘢不特只呀！仲態度惡劣！」

「你自己擺得唔好咋嘛⋯⋯」我好細聲講。

「劉星隨！」估唔到係Miss Lui喝我，搞到我都驚一驚。

「你仲係咁嘅態度？仲唔同曹sir道歉！」Miss Lui走到我面前，背住咗曹sir，同我單一單眼。

「哦⋯⋯」我慌然大悟，我馬上九十度鞠躬道歉：「對唔住，曹老師。」冇錯，我特登用「老師」兩個字。

「嗱咁啦劉星隨，我諗曹sir咁明事理，唔會嬲你嘅，你依家出去抄校規啦！」Miss Lui搶先講要罰我。

「咁都要抄校規？」我擘大眼有啲唔情願咁講。

「快啲出返去。」Miss Lui講。

「中英文都要抄呀！」曹sir再講。

「英文都要？」我再講。

「快啲出返去！」Miss Lui今次直頭係推走我。

我同毛子蘭出咗教員室。

「唉，真係麻煩呀咁都要抄校規。」我自言自語咁抱怨緊。

「對唔住呀⋯⋯」毛子蘭喊住同我講。

「喂喂喂⋯⋯你喊咩呀，而家我先係畀人罰抄校規嗰個喎。」我同毛子蘭講。

「明明係我打爛㗎⋯⋯」毛子蘭抹緊眼淚，但係都仲流緊眼淚。

「是旦啦。你都係想幫我啫。」我同毛子蘭講。

「不如我幫你抄啦⋯⋯」毛子蘭隻眼紅紅地咁講。

「唔使呀，你而家去聽講座啦，反正我都唔想聽，大把時間抄。」

毛子蘭有啲遲疑。

「快啲去啦。」我推走毛子蘭。

於是我就戇居居咁坐咗喺Canteen慢慢抄校規⋯⋯

（Tbc.）

15 - 雷老師

​​​​​​​空無一人嘅Cantten入面，我好苦悶咁抄緊校規。原來星期六嘅學校一個人都冇，我突然之間覺得呢到好陌生⋯⋯


「劉星隨。」Miss Lui叫我，然後坐喺我對面。


「點呀『雷老師』，仲要罰我抄校規呀？」我有啲刻意咁叫佢「雷老師」。


「你真係抄㗎？」

「吓，唔係你叫㗎咩。」

「我罰你，即係我收啦，即係我話你有交你就有交啦傻仔。」

「頂，我抄緊英文版你先講。」

Miss Lui笑緊我：「你幫人頂㗎？好型喎。」 Miss Lui用friend嘅語氣講。

「你又知？」

「我見個女同學仲驚過你就知啦，如果真係你打爛，你應該係驚青嗰個先啱。」

「咁我都畀人鬧開，冇所謂啦。」

「唔該哂你喎。」

「唔咩該呀？」

「如果唔係司徒天話你唔識用電腦，你都唔會畀曹sir叫去拎傳單啦。」

「Sky個衰仔⋯⋯」

「司徒天都係想幫我啫。不過曹sir個獎就擺明係佢自己放得衰，我早幾日已經見到佢個獎擺到好出。」


曹sir突然行埋嚟「抄完未呀，劉星隨！」


Miss Lui見到曹sir行過嚟，即刻變返「雷老師」。


「我鬧緊佢㗎喇曹sir，真係激氣呀，呢啲學生都唔聽教嘅。曹sir不如你一陣陪我飲杯嘢吖。」Miss Lui講呢句嘅語氣勁嗲，Cute到好似個少女咁。

「好呀好呀。」曹sir個狗公樣即刻出哂嚟，我懷疑流咗幾滴口水添呀。

「我哋依家上返去禮堂。劉星隨！你抄完放喺我簿架呀！」Miss Lui又同我單眼。

「係嘅，『雷老師』！」我扮哂有悔意咁講。


估唔到最後Miss Lui都要同個教畜食飯，唉⋯⋯都唔知最後搞咁多有咩好處，我仲要抄咗份中文校規。


就係我慨嘆緊今日唔知做咩嘅時候，又有個人坐喺我對面，而呢個人竟然係校長。


「抄校規呀？劉星隨。」校長問我。

「係呀，我畀Miss Lui罰抄。」


奇怪，我同校長連偈都冇傾過，佢竟然知道我叫咩名。


「劉星隨，Ash Lau，5D班，修中國文學、物理、地理。每科都啱啱合格，功課大多數交齊，但係今年就因為遲到同抄功課畀副校記咗個缺點。」

「校長，你又知得幾清楚喎。」

「做校長呢，其實好難。你哋成日唔見我喺學校，因為我要開好多會。不過呢，咁又唔代表校長唔關心你哋，我對個個學生都好留意㗎。」


我點點頭，因為我都唔知點答校長，應該讚佢好有心定多謝佢咁留意我哋。


「我睇咗CCTV，點解你要幫毛子蘭頂呢？」

「我⋯⋯唔知⋯⋯」我除咗真係唔知我自己嗰時做緊咩之外，呢吓個心係有啲驚嘅，因為我驚校長會連毛子蘭都罰埋。

「哈哈哈，校長都試過讀中五嘅，明嘅。」校長大笑咁講。

「吓？」

「毛子蘭好女仔嚟嘅。」

「吓？校長我唔係⋯⋯」

校長打斷我：「聽講你最近夾Band喎。」

「你又知。」我又有啲驚訝。



「呢間學校我有咩唔知呀。」

「音樂室遲啲會添置器材，要用同Miss Fong借就可以。」


「哦。」


「人呢，唔好畀自己諗太多，跟住直覺做，先係真正嘅自己。」校長留低咗呢句就走咗去，雖然唔係好明佢講咩。不過我諗佢，或者真係一個好校長。


結果，同校長傾完之後講座都完咗，我都準備低調咁返屋企。


當我行到學校門口嘅時候，我感覺到有人掹住我衫尾，叫停咗我。

「劉星隨。」我認得係毛子蘭把聲。

「做咩呀。」

「多謝。」毛子蘭同我講。

「哦。」


「我走喇。」我見毛子蘭好似冇嘢同我講，就準備轉身走人。

「等陣。」


毛子蘭叫停我之後，畀咗包維他奶畀我，然後就走咗。

----------------------------------------------

「咪就係咁囉，我就罰抄咗成版校規。」我喺課室同黑色西炒飯講緊琴日嘅事。

「好型喎，錘哥。英雄救美！」樂少咁講。

「我都唔知我做乜會咁做。」

「所以最後Miss Lui都要同曹sir食飯呀？」呢句係Sky第一句畀嘅回應。

「我諗係掛，不過Miss Lui咁醒應該有方法避嘅。」我答佢。

「我比較想聽Miss Lui好嗲嗰把聲多啲。」樂少講。

「你哋就好啦，有個靚女Miss。」太一講。

「係咪想聽呀，不如今日留堂聽啦。」突然有把好嗲嘅聲講。

冇錯，真係Miss Lui 行咗入嚟，因為原來已經打咗小息鐘，太一返去自己班，而我哋都坐返去自己位。

「Miss Lui，你有冇同曹sir食飯呀？」Sky突然之間問Miss Lui。

「最後冇。」Miss Lui答。

「哦，咁就好喇。」Sky好似等到佢期待嘅答案咁，又係笑笑口，不過同平時嗰種笑，有啲唔同。


自從我做咗主音之後，我哋就練返之前夾個嘅幾首歌，因為只係轉Vocal，所以大家都適應得好快。只係我仲係覺得自己未唱到一個主音應該有嘅水準，好似Lead唔到隊Band。


放學嘅時候，我哋又入咗去SU房。呢間房嘅使用率，有8成都係來自我哋黑色西炒飯，證明SU嘅工作真係少之又少。


「我哋下首夾咩歌呀？」太一咁問。

「不如試吓啲J Rock嘢啦，我哋都冇夾過。」我答。

「X Japan？」Sky咁問。

「原來你鍾意X Japan㗎。」我都係第一次聽Sky提出想夾咩。

「嗯，HIDE 係我最鍾意嘅結他手。」Sky咁答。

其實我一直都覺得Sky嘅結他有啲似一個人，原來係HIDE。

不過呢，如果我只係個Rhythm結他手，我都可以嘅，但係諗到我要唱歌嘅時候，我就唔敢夾X Japan喇。

「Errr⋯⋯我覺得有啲難⋯⋯」出聲嘅係太一。

咁又係嘅X Japan嘅靈魂一定係Yoshiki嘅鼓，真係唔係咁易打。


我電話突然收到個訊息，而我最近set咗Message鈴聲係暴龍機嘅聲。


「暴龍機？」各哋三個突然同步起嚟。

「係呀，你唔覺得好型咩。嗱，依家數碼世界召喚緊我。」我有啲中二病咁講。

「我係超鍾意《數碼暴龍》㗎！」樂少講。

「我都係呀，我就係太一！」太一講。

「係喎，你真係太一。」我講。

「我鍾意嘉兒⋯⋯」Sky講。


係喎，我記得《數碼暴龍》VCD版嘅配音係將小光翻譯做嘉兒㗎，同Sky家姐個名嘅讀音一樣。


「不如夾01首主題曲啦！」我講。

「好呀！」太一同樂少一齊講。

「沒問題。」Sky用大耳獸Tone講。


冇錯喇，大家都有嘅共同興趣就係《數碼暴龍》，雖然我內心係《Pokemon》Fans多啲，不過就決定係你啦《自動勝利 Let's Fight》。


（Tbc.）

16 - 藍色水彩同學

「～遇怪魔我即刻變大～吖，咁高音㗎咩？鄭伊健點唱㗎。」我喺屋企練緊歌。

「喂，劉星隨唔好嘈啦。」我家姐喺佢間房叫我唔好唱歌。

「夾Band要練呀，你閂門啦。」我講。

睇嚟我真係高估咗自己嘅唱功好多，硬係覺得自己把聲又唔夠Rock又唔夠實咁，點唱好呀，唔遇要降Key？不過廣東話版已經降咗兩度，再降會好低音喎。

我帶住呢個唱唔到嘅心情嚟到第2日，諗住放學之後喺音樂室練習，所以我就準備去搵Miss Fong。

我去到教員室門口，打開門之後叫：「我想見方雪蓮老師。」

因為我哋學校唔畀學生入教員室嘅關係，我哋如果要搵老師一係就用對講機，一係就打開門嗌；不過對講機每個月都壞，所以已經冇人用。

「Miss Fong，我今日放學想借音樂室用呀。」我問。

「音樂室好似畀5A班嘅陳爾欣Book咗呀，你要用同佢傾吓啦。」

「唔該。」

原來畀Emma借咗，講起上嚟，我都好耐冇同Emma傾偈。平時上Physics堂，我唔係做緊其他科嘅功課，就係背緊Chord，都冇時間搵Emma。唔知佢今日，係咪想彈琴呢？好冇問吓佢呢⋯⋯

----------------------------------------------

5A班嘅Emma除咗同劉星隨一樣修Physics之外，仲有修Econ同VA。

上VA堂嘅Emma，總係好留心咁聽老師嘅意見，努力準備畫自己份SBA。而VA堂坐佢隔離嘅Sky就永遠好悠閑咁瞓緊教，不過交出嚟嘅作品就絕對令人滿意。

呢間學校嘅VA室，同其他學校冇咩唔同，就係一間放哂美術用品嘅課室。比較值得講嘅係VA嘅老師潘sir，佢係陶瓷界略有名氣嘅一位陶藝家。

「司徒天，起身喇，畫畫呀，SBA要交㗎。」VA科老師潘sir同Sky講。

「乜係潘sir呀。係咁嘅，我嘅主題係夢境，我想將我真實發夢會見到嘅嘢畫出嚟。」Sky一邊打喊露，一邊畀出一個吹唔脹嘅答案。

潘sir面對呢個答案，露出咗一個意外嘅笑容。如果係其他科嘅老師聽到，應該會覺得Sky係亂噏，唔尊重老師。但由於係VA科，所以潘sir並冇覺得唔尊重，反而幾欣賞呢個學生，因為藝術從來都應該係自由嘅。

欣賞Sky嘅唔只係潘sir，連隔離嘅Emma都對呢個成日上堂悠悠閑咁瞓緊教嘅同學非常欣賞。不過作為同學，Emma從來都冇同Sky傾過偈，而Sky亦都從來唔會主動搵人傾計。直至Sky開始彈返結他之後，Sky就有時會搵Emma傾偈。

Sky同Emma第一次嘅對話係發生喺Sky開始夾Band冇耐之後嘅VA堂⋯⋯

「藍色水彩同學，你叫咩名呀？」Sky望住Emma。

Emma本身唔知Sky同佢講嘢，但係見到Sky望住自己，於是就回覆Sky：「你問我呀？我叫陳爾欣，Emma。」

「係Emma呀。」

「嗯⋯⋯點解我係藍色水彩呀？」

「你唔係好多畫都用藍色水彩畫咩。」

Sky其實一直都有留意身邊同學畫嘅畫，只係冇幾多個人可以喺佢腦入面留低印象。

「因為我鍾意藍色。」

「原來係咁。」Sky打開本畫簿，拎起返枝鉛筆。

「我鍾意白色，我枝結他都係白色㗎。」

「你有彈結他㗎？吖！我讀Physics嗰班，都有個男仔係彈結他㗎。」

「你講阿錘？」

「係呀，劉星隨。」

「我哋依家一齊夾緊Band呀。」

「有夢想真係好呀⋯⋯」

「Emma你冇夢想咩？」

「我⋯⋯我都唔知呀⋯⋯」

「夾Band係阿錘嘅夢想。」

「咁其他人呢？你哋唔係一隊Band咩？」

「其他人嘅話，太一係因為鍾意音樂，而樂少好似係想追女仔，個女仔好似叫⋯⋯」Sky突然醒起樂少喺改名嗰陣不斷提住「Dear Emma」同「To Emma」。

「哈哈，原來係咁。」Sky突然之間傻笑。

「叫咩名呀⋯⋯」Emma問。

「唔記得嚕。」Sky笑笑口咁答。

「咁你呢？」

「我呀⋯⋯望住我愛嘅人笑就係我嘅夢想。」Sky又係笑笑口咁答。

呢一刻嘅Emma就好似畀Sky嘅「夢想」感動到，加上Sky嘅男神樣，青春期少女嘅心，跳得愈嚟愈快⋯⋯

「你要話畀我知呀。」

「吓？」Emma問。

「當你想講你夢想嘅時候，要話我知。」Sky答。

「嗯，應承你。」Emma肯定咁講。

----------------------------------------------

「行快啲啦阿錘。」樂少同我講。

「我啱啱落堂咋，你知李sir幾長氣啦。」

「你又話要練歌，緊係要快啲去音樂室啦！」

因為我話咗畀樂少知Emma今日借咗音樂室，所以樂少一放學就拉住我衝去音樂室搵Emma。

音樂室的確有鋼琴聲，之不過除咗鋼琴，仲有好熟悉嘅結他聲⋯⋯

樂少喺門口望住音樂室，而入面嘅係Emma同Sky⋯⋯

「係阿錘同樂少呀，原來Emma彈琴好犀利㗎。」

「你哋⋯⋯原來識㗎⋯⋯」我問。

「我哋上VA堂嘅時候係坐隔離㗎。」Sky答。

「你哋嚟音樂室係咩事呀？要練習？」Emma問。

「我想練吓唱歌啫。」我答。

「係喎，阿錘你係主音。」Emma講。

「阿錘？」我記得上次Emma仲係叫我做劉星隨。

「樂少，你就係彈Bass嘅。」Emma同樂少講。

「係呀。」樂少好似有啲神不守舍。

「因為Sky同我講咗好多你哋『黑色西炒飯』嘅嘢。估唔到太一原來係太鼓達人高手，仲要係港日混血兒，阿錘上堂唔聽書原來係練緊結他，樂少原來係想追女仔⋯⋯」Emma好興奮咁覆述緊我哋嘅事。

如果係平時，Emma同樂少講嘢，佢應該笑到四萬咁口先啱，但係今日⋯⋯

「不如畀間房你哋吖，我都夠鐘返屋企喇。」Emma講。

「好呀，唔該。」我講。

「Bye-bye。」Sky同Emma講。

Emma之後就走咗，而音樂室就得返我哋三個。

「反正都係，不如叫埋太一上嚟夾啦，反正而家音樂室咩都有。」Sky講。

「喂Sky，你同Emma⋯⋯係咩關係呀？」樂少問。

「VA堂嘅同學。」Sky答。

「你哋會唔會有More Than同學嘅關係呀？」

「冇呀。」

「咁你有冇話畀佢知我想追個女仔係佢呀？」

「冇⋯⋯不過。」Sky望住門口，樂少隨即轉身望向門口。

「Errr⋯⋯我想同你哋講加油咋，我走先。」Emma企喺門口略顯尷尬咁講。

（Tbc.）