【搖滾準備】《我們的某校勁BAND》【重開】

62 - 太一離家出走

宋炎序畀咗張飛我哋，我哋就離開Band房，我望住呢張夏天雪人嘅演唱會飛，我決定咗我一定要去睇呢場演唱會。

「喂阿錘，究竟老闆係咩人嚟㗎？」佢哋問我。

宋炎序呢個人喺普羅大眾嘅眼中，絕對唔係咩名人，但係喺獨立音樂世界就一個傳奇。

「其實佢就係香港第一代重金屬樂隊『金屬者』嘅主音，喺嗰個年代克服咗好多問題。雖然今時今日Metal都仲未浮到上去，但係佢絕對係一個Legend嚟。」

「係咩，我聽都未聽過喎。」樂少講。

「因為我哋冇接觸Metal啫，佢真係好勁㗎。」我講。

「好想聽吓佢唱Live呀。」太一好似顯得好有興趣咁。

其實我都覺得Metal應該要有更多人聽先啱，不過可惜，我冇呢個能力，而家嘅我絕對做唔到Metal Band嘅主音⋯⋯原來Silas嘅師傅係個咁勁嘅人，搞到我更加想知點解Silas會由Band仔變咗做一個民謠歌手。

「係喎，我星期五晚一定去唔到呀，我約咗Emma睇Magic And⋯呀。」樂少講。
「吓？你終於都⋯⋯」太一顯得好驚訝。
「Emma佢，肯定係因為買唔到飛先應承你啦。」Sky笑笑口咁講，雖然我都知原因，不過Sky真係好唔畀面。
「冇所謂啦，總之我就去唔到，阿錘你袋埋張飛啦。」樂少畀咗佢張飛我。
「我都唔知星期五幾時完呀，我睇吓趕唔趕到啦。」Sky講，因為佢要去Miss Lui帶嘅中文科模擬試活動。
「我就應該得嘅。」太一講。
「咁我同太一去啦，Sky你睇情況啦。」

就係咁，喺命運嘅偶然安排之下，我就準備去睇Silas嘅演唱會，到底佢仲係咪我當日崇拜嘅嗰個人呢？

＝＝＝＝＝＝

太一嘅阿爸－張偉昌係金融公司高層，平時放工都仲係做嘢，好少理太一。

星期四嘅夜晚，太一喺上完日文班之後就返到屋企，張偉昌就同平日一樣都係眼定定望住幾部電腦，應該係要睇住外國嘅股市。

「太一，返嚟喇，唔使返啊學咩，唔著校服嘅？」張偉昌問。

「吓？放假吖嘛，復活節假。」太一講，佢都有啲驚訝，估唔到阿爸連佢放復活節假都唔知。

「咁應該過咗Mid Term啦，考成點呀？」張偉昌有啲嚴肅咁問。

「有兩科⋯⋯炒咗⋯⋯」太一細細聲講。

「炒兩科？我喺你呢個年紀次次都考頭三！」張偉昌非常嬲，可能係不滿意自己個仔達唔到自己預期，「似足你呀媽，一樣咁蠢！」

太一聽到呢句，心裡面好不忿，因為佢記憶入面嘅媽媽，只有好嘅一面，永遠都係開開心心對住太一，就算走咗咁多年，佢都冇忘記過自己媽媽嘅笑容。

「你有畀我見過佢咩，我連佢咩樣都就嚟唔記得呀！」太一拎起自己嘅背囊，嬲爆爆行去門口。

「喂，太一！你去邊呀！」張偉昌喝住太一。

「我去打鼓呀！」太一怒氣匆匆走咗出門口。

太一一個人嚟到咗平時練習嘅鼓房，因為呢間鼓房開足24小時，所以太一咩都冇諗，即刻就開始打鼓。

喺打鼓嘅時候，佢咩都唔需要顧忌，拍子、力度，全部都唔緊要，亂嚟就亂嚟，佢只係想將所有憤怒同傷心都發洩晒出嚟。鼓房裡面，鼓聲有將大就代表佢又幾掙扎同不甘，佢甚至唔想去梳理呢啲情緒⋯⋯傷心？憤怒？不甘？掛住媽媽？，佢唔知道，呢啲積埋積埋嘅感受，佢要全部釋放出嚟，就係咁佢一路打一路打，直到天光就趴喺套鼓度瞓着咗⋯⋯

第二日，太一醒返嘅時候，發現已經係下晝，佢發現電話已經冇晒電，而銀包喺畀完鼓房嘅錢之後，淨返十幾蚊，又冇電話，又冇錢嘅佢覺得好肚餓，於是仲有少少理性嘅太一走咗去7仔，諗住買個炒麵王食，如果好彩撞到特價，話唔定仲買到兩個添⋯⋯

點知，人衰行路打倒褪，連最後一個炒麵王都啱啱畀人買咗⋯⋯

「喂，你做咩呀？個頭咁油嘅？幾日冇洗呀？」
「我琴日離家出走呀，唔好講呢啲住，借幾蚊畀我吖，我好肚餓呀。」

太一呢個時候遇到同樣住喺佐敦嘅甜豉油。

甜豉油見太一成個人又冇表情，又冇神氣，帶咗佢去快餐店食嘢。

「你發生咩事呀？點解要離家出走呀」甜豉油問。

「我同我阿爸鬧交⋯⋯都係嗰啲啦，學業問題之類啦。」太一講。

「係咩。」甜豉油有少少藐太一，因為佢一眼就睇穿咗太一根本唔係煩呢樣。

太一都聽得出甜豉油唔信佢嘅語氣⋯⋯只係自己又唔知點講好。

「係喎，幾點呀？」太一醒起要去睇SIlas嘅演唱會。
「7點半喇。」
「弊⋯⋯」
「咩事呀？」

「我約咗阿錘去睇Show，8點開始，喺牛頭角呀。」
「咁打個電話畀佢先啦。」
「我電話冇電呀，借你個電話畀我吖。」太一好趕急咁講，甜豉油將個電話借畀佢，「吖，我唔記得阿錘電話號碼呀⋯⋯」

「咁點算呀？」甜豉油問。
「你有冇阿錘電話呀？」
「緊係冇啦，我同佢又唔熟，係小蘭先熟啫。」
「咁打畀小蘭啦。」

一輪操作之後，太一終於打到畀劉星隨。
太一：「喂阿錘，我應該嚟唔到呀，你自己睇啦。」
劉星隨：「太一？你電話唔係5字頭咩？轉咗電話呀？」
太一：「呢個係甜豉油㗎，我發生咗啲事呀，你自己去睇啦。」
劉星隨：「吓？你又係咁？Sky已經話唔嚟喇喎。」
太一：「係咁啦。」

太一收線之後將個電話畀返甜豉油，「唔該晒。」太一之後就慢慢起身準備走。

「你返屋企呀？」
「點都要返嘅，不過唔係依家囉。」

太一自己行出去快餐店，甜豉油心裡面有啲擔心，佢打咗個電話，等接通嘅時候就已經追緊出去搵太一。

「喂？太一？」
「唔係，係我，田善悠。你⋯⋯如果有多張飛就搵小蘭啦。本身我約咗佢睇戲，不過依家我有啲嘢做⋯⋯」
「吓？」
「快啲搵小蘭啦，佢喺九龍灣㗎喇。」

甜豉油收線之後，就趕上去追太一⋯⋯

（Tbc.）

63 - Magic And⋯演唱會

時間嚟到夜晚嘅七點半，樂少約咗Emma睇Magic And⋯嘅演唱會，佢等咗呢一日已經好耐，懷住滿滿嘅期待，佢嚟到咗亞洲博覽館。

Magic And⋯嘅演唱會今日喺亞洲博覽館舉行，樂少一早就到咗博覽館等Emma，樂少好少睇演唱會，所以竟然有少少緊張。睇Show當然唔少得就係買Souvenir，樂少見到行嚟行去嘅路人都買咗件Band Tee嚟着，作為Magic And⋯嘅Fans，佢都決定買嘅件衫著，始終都唔想望落去顯得唔合群。

於是樂少即刻走咗去排隊買Band Tee，之後就去廁所換咗嚟着，果然一著起件Band Tee就覺得同所有觀眾都係好朋友，比起頭先自在咗好多。距離開場仲有15分鐘，樂少仲未見到Emma，有啲擔心Emma會唔會放佢飛機呢，所以佢就打畀Emma，不過電話竟然唔通，佢又再打多一次，結果都係一樣⋯⋯未能接通。

見其他睇Show嘅人都入場入得七七八八，呢個時候樂少內心就越嚟越焦急，唔通Emma真係唔想同佢睇演唱會⋯⋯ 

樂少冇離開過等候嘅位置，因為對於佢嚟講等到Emma比睇Show更加緊要，就算要聽少幾首歌都冇所謂。

 終於時間嚟到八點正，一個跑到氣喘喘嘅女仔，終於出現咗喺樂少面前。

「唔好意思啊，我遲到。我哋快啲入場啦。」Emma馬上帶住樂少入場。

佢哋買到嘅只係視野非常差嘅後排山頂位，幾乎都望唔到隊Band，大多數時間都只可以望住大螢光幕，不過Emma個樣都好似好開心，睇嚟冇因為位置唔好而失望。隨住一首又一首嘅歌唱出，樂少偷偷哋望向Emma，佢好似忍唔到自己嘅眼淚咁，大概係畀Magic And⋯嘅歌深深打動到。

至於樂少，因為博到女神嘅一笑而覺得非常感動， 就算搵飛搵得幾辛苦都冇所謂。Magic And⋯嘅歌亦都令樂少反思咗好多，佢唔想諗未來住，起碼呢兩個鐘，佢想簡簡單單咁聽歌。會場嘅氣氛愈嚟愈高漲，佢哋都睇得好投入，一齊跟住大合唱，一齊跟住起身跳，呢啲都令樂少覺得同Emma嘅距離愈嚟愈近。

自從開始咗夾Band嘅關係，樂少特別留意Magic And⋯嘅Bass手，雖然佢做嘅嘢望落好似好少，但係喺舞台上面依然好閃耀，穩定咁輔助各個成員，超好嘅節奏同音色控制，令鼓同結他聽落更加飽滿，而且佢仲有幫手唱和音，係一個好出色嘅Bass手。

兩個鐘頭過去，演唱會畫上咗完美嘅句號，Emma嘅面上係欣慰嘅表情，樂少就相反，好唔捨得場Show就咁就完⋯⋯

因為坐得後嘅關係，佢哋等到最尾先走，兩個人慢慢離開，Emma行行吓停咗喺望到舞台嘅位置。

「望過嚟吖。」 Emma拎出電話，想同樂少影相。

唔需要任何解釋，相入面嘅樂少已經說明咗一切，唔係嗰種興高采烈嘅大笑，只係一個簡單又不自覺嘅嘴角向上揚，呢個係屬於樂少嘅小確幸，而呢一張相亦都係佢哋嘅第一張合照。

離開嘅時候，出面有大量嘅人流，樂少想直接搭機場快綫走，但係Emma叫樂少同佢搭巴士出東涌再轉地鐵，因為機場快線冇學生優惠。

兩個人搭上咗去東涌嘅巴士，Emma上咗上層，喺右邊中間嘅位置坐低，樂少就坐喺佢隔離。

「估唔到你咁識慳錢喎。」
「冇辦法啦，依家屋企冇錢嚕。」
「吓？」
「我冇同人講過㗎，上年我爸爸公司清盤，爭人好多錢，所以咩都要慳⋯⋯」

樂少從來冇諗過Emma屋企嘅事，睇Emma平時嘅一舉一動，的確係一個富貴人家嘅千金小姐，估唔到原來佢屋企有咁大件事發生。

「所以你轉咗嚟我哋學校⋯⋯」
「嗯。」
「咁⋯⋯不如我都係畀返錢張飛嘅錢你啦。」
「唔使喎，而且我睇得好開心呀。」
「點解你會話畀我知嘅⋯⋯」

Emma諗咗一諗：「可能睇完magic And⋯，唔想收埋咁多嘢啦。你唔好同人講喎。」

樂少點點頭，答應會同佢保守秘密。

「我真係好多謝你㗎。無論係張飛定其他嘢。」
「嗯。」
「不過我依家除咗溫書，真係冇時間諗其他嘢⋯⋯」

由極喜到極悲，可能只係需要一秒，一句說話，樂少明白Emma嘅意思，佢知道呢一刻佢哋係冇可能。

「哦⋯⋯」

話咁快，佢哋就到咗東涌站，正當樂少以為仲會有多少少時間同Emma一齊嘅時候，「我都係搭巴士返去呀，Bye-bye。」Emma揮揮手向住佢要搭嘅巴士離開。

搭巴士明明冇學生優惠，但係Emma都係揀咗搭巴士，又話要慳錢⋯⋯樂少呢一刻安慰住自己，Emma就好似《那些年》入面嘅女主角咁，會令佢成為一個更好嘅人。樂少夾Band唔再係因為Emma，依家佢係為咗自己而夾Band，係為咗「黑色西炒飯」而努力。

（Tbc.）

65 - Silas與夏天雪人

「阿錘，有啲事呀，我嚟唔到睇Silas個Show喇。」Sky打咗個電話畀我。

而呢個時候，我已經到咗牛頭角。

「喂阿錘，我應該嚟唔到呀，你自己睇啦。」太一用甜豉油部電話打畀我。

樂少一早就話約咗Emma，而家Sky同太一都話唔嚟，即係我要自己睇Show啦，其實我又冇咩所謂嘅，「其實自己一個更開心～」係我而家嘅心情。

「喂？太一？」我又收到甜豉油嘅電話，可能太一有嘢同我講？
「唔係，係我，田善悠。你⋯⋯如果有多張飛就搵小蘭啦。本身我約咗佢睇戲，不過依家我有啲嘢做⋯⋯」
「吓？」我心諗搞咩呀，完全唔明喎，咁佢做咩同太一一齊嘅？
「快啲搵小蘭啦，佢喺九龍灣㗎喇。」

太一同甜豉油一齊，但係甜豉油本身就約咗毛子蘭睇戲⋯⋯咩呀？我唔明喎，咁太一係做咩㗎？不過雖然諗唔明，但係我已經打咗畀毛子蘭。

「喂？」
「喂⋯⋯你係咪喺九龍灣呀？」
「係呀，你又知嘅？」
「甜豉油同我講㗎，佢話叫我而家約你睇Show喎。」
「依家？佢約咗我睇戲喎。」
「我其實都唔明呀，不過佢好似同太一一齊。我而家喺牛頭角，會睇一個叫做『夏天雪人』嘅演唱會，你嚟唔嚟呀？」
「吓？」
「因為我仲有多張飛，免費嘅，所以睇吓你有冇興趣。」
「好呀⋯⋯咁我嚟囉。」
「哦⋯⋯」

搞咩呀？最後變咗我同毛子蘭睇Show？點解同本來個劇本完全唔同㗎，而且呢次好似係我第一次約毛子蘭喎。

「咁快嘅。」過咗大概15分鐘毛子蘭就到咗地鐵站。
「我頭先都已經係九龍灣站吖嘛。」毛子蘭講。
「咁我哋行啦，行10分鐘左右。」

到咗牛頭角地鐵站之後，大概再行10分鐘就會到，今日嘅表演場地係一間可以入200-300人嘅Live House。我以前都嚟過睇Show，不過就係好多隊Band嘅雜錦Show，一個歌手嘅Solo演唱會就冇睇過。

「你同甜豉油本來約咗睇戲？」我開口問毛子蘭。
「係呀，不過冇辦法啦，佢話太一好似離家出走，佢唔放心喎。」
「太一離家出走？我都唔知喎，發生咩事呀？」我完全唔知太一離家出走，唔通同佢阿爸嗌交？
「好似話佢依家電話冇電又冇錢喎。」
「咁好彩甜豉油撞到佢咋。」
「嗯。到未呀？」
「轉埋灣就到。」

到咗之後，果然人唔算好多，我諗150人左右啦。個場冇咩特點裝飾，不過都啱「夏天雪人」嘅，而家嘅佢唱歌都係用簡單嘅樂器，一枝木結他，一部琴，就夠。

「『夏天雪人』係邊個呀？」毛子蘭問我。
「Er⋯⋯佢⋯⋯應該算係個網絡歌手掛。」
「你好鍾意佢㗎？」
「嗯⋯⋯」我都唔知點同佢講好，因為我鍾唔鍾意「夏天雪人」呢樣野就連我自己都唔知。

就係呢個時候，Silas企咗出嚟，因為Live House好細，加上個台又唔係好高，基本上我望得佢好清楚Silas。

Silas喺台上面依然係嗰個「夏天雪人」，曲風好迷，有一種飄咗唔知去太空邊一度嘅感覺，好難想像一支結他已經可以做到呢個效果，呢個唔係技術高低嘅分別，係感情，或者應該講，係境界⋯⋯Silas嘅聲音，仍然有嗰陣生命力。

「夏天雪人」一連唱咗20首歌，全部都喺YouTube post過，《夏天會浴掉的雪人》、《搭扶手電梯要記住左行右企》、《如果你要拖手請不要在深水埗》、《記得覆人Message》呢啲，雖然我唔明白點解佢會完全唔同咗，不過我今日就睇到另一個好出色嘅音樂人，只係佢叫「夏天雪人」，唔係Silas。

我望向後面嘅時候留意到，宋炎序喺最後面睇住Silas。一個傳奇重金屬樂隊主唱嘅Rocker徒弟，點解會變成咗一個玩另類音樂嘅歌手呢，我都唔知點定義佢嘅歌，係Country？Dreamy？定Twee-pop？

不過宋炎序個樣⋯⋯我睇唔透喎，應該話佢根本冇表情先啱⋯⋯只係望住Silas，感受唔到佢係開心定唔開心。相反，我隔離嘅毛子蘭，就好似幾享受。因為唔想打擾佢聽歌，我都係靜靜咁繼續聽。

「多謝大家，跟住落嚟最後一首歌。」話咁快Silas都唱到咗最後一首歌。

唱最後一首歌之前，佢換咗一枝結他，明明係木結他，但係掃落去之後，我感覺到嘅係電⋯⋯係Rock⋯⋯就係呢總感覺，呢個就係當日我識嘅Silas⋯⋯而佢玩呢一首歌，就係當日喺學校禮堂，深深咁令我著迷嘅嗰首歌。

好感動⋯⋯感動到想喊⋯⋯呢個就係我想做到嘅表演，一首可以令人熱血沸騰嘅歌⋯⋯

明明佢係有呢種能力，點解唔繼續⋯⋯點解要放棄搖滾⋯⋯

「多謝大家！」Silas就係咁，唱完咗最後一首歌。

呢個時候，我發現毛子蘭流緊眼淚，「唔知點解好感動呀。」佢抹走少少眼淚。

果然好嘅音樂，真係可以撼動到人嘅心靈，就算係對佢完全唔認識嘅毛子蘭。

「呢啲就係我想做到嘅音樂，即係我追求嘅搖滾之道。」我同毛子蘭講。

Live House嘅好處就係冇咁多規矩，加上都喺Live House開Show嘅都唔係獨立音樂人多啲，所以完Show同歌手或者樂隊影相，傾兩句都唔難。Live House而家就淨返Silas同幾個工作人員未走⋯⋯於是我諗住好好咁問吓Silas，佢變成「夏天雪人」嘅原因。

我慢慢行過去：「點解要變做『夏天雪人』，唔繼續玩Rock？」

「劉星隨⋯⋯最後嗰首歌，你記唔記得呀？」Silas似乎認得我。
「當年你喺學校就係唱呢首歌。」
「因為見到你，我突然之間就想玩返。」Silas嘅眼神好似有種講唔到嘅憂傷，「但係我已經再玩唔到Rock。」

然後Silas就孭住佢枝結他走咗。呢個時候，行埋我身邊嘅係宋炎序。

「聽完有咩感覺呀？」宋炎序問我。
「我覺得⋯⋯『夏天雪人』係個好歌手，但唱Rock嘅Silas先係最感動到人嘅佢⋯⋯」
宋炎序點點頭，露出咗一個意味深長嘅笑容：「就係咁囉，一個有能力感動人嘅歌手，如果無辦法再次感動人，就會失去自己嘅價值。」
「吓？」我唔明佢咁講係咩意思。
「你同當年嘅佢有一樣嘅眼神。」宋炎序講低呢句之後就走咗。

「一樣嘅眼神」係咩意思，如果有一樣嘅眼神，點解我會唔明佢諗咩⋯⋯

「喂，哥哥仔，清場呀。」工作人員同我哋講。
「哦。」

我同毛子蘭就離開咗頭先嘅Live House，「你覺得點呀？」我問佢。

「幾好吖，嗰個人唱得好好，不過估唔到佢全晚都只係用木結他，但係你又鍾意聽。」
「其實⋯⋯佢以前喺我哋學校唱過一次歌，而且係個唱Rock嘅人。嗰陣我中一，我聽咗佢唱歌之後，就決定要夾Band，所以喺某程度上，佢都算係我偶像。」

「你依家唔鍾意佢咩？因為佢唔唱Rock？」毛子蘭問我。
「我都唔知呀⋯⋯」
「點解你好似好想佢唱Rock嘅？」
「Rock係種態度，係反抗唔合理規矩，努力去實現自己嘅價值觀，無論咩情況都要做自己認為啱嘅事。」

「我就覺得唱Rock又好唱民謠又好，只要唱得開心就冇問題。」
「只要唱得開心就冇問題⋯⋯」

唱得開心⋯⋯都係嘅，音樂本來應該就係令人開心，而搖滾樂就係自由嘅象徵，Silas一定有某個理由，所以先至唔再唱Rock，呢個係佢嘅自由⋯⋯由佢啦，起碼我仲想Rock！

（Tbc.）

66 - 廟街

「咁所以你嬲起上嚟就離家出走呀？」
「係呀。」

太一同甜豉油兩個喺佐敦散緊步，佢將自己同阿爸嗌交，然後去鼓房打咗成晚鼓嘅事話咗畀甜豉油知。

「睇嚟你阿爸都幾惡喎。」甜豉油講。
「係呀，我真係唔記得佢上次笑係幾時喇。」太一講。
「咁你諗住幾點返去呀？」
「夜啲囉，可能等佢瞓咗先。」

兩個人行行吓，就到咗廟街。呢度除咗有嘢食，周圍有人唱歌之外，仲有唔少算命嘅攤檔，「要唔要去算命呀？」甜豉油問太一。

「唔使啦，我都唔信風水。我不嬲都係人定⋯⋯」太一未講完，甜豉油已經帶咗佢去一個算命檔口。

馬上兩個人就坐低咗，呢一檔嘅師傅，身材肥胖，帶住一頂紳士帽，手拎住一把扇，氣定神閒咁望住佢哋兩個。

「後生仔，想問咩？」師傅嘅廣東話帶有少少新會口音。
「都話唔使⋯⋯」太一想起身離開，但甜豉油拉住咗佢。
「幫佢算吓屋企吖。」

師傅拎住本巢晒皮嘅風水書，問咗太一出生日期，然後再望住佢個相，屈指一算。

「你父母關係疏離，佢哋分開住，你就係獨仔嚟嘅，係咪呀？」師傅講。
「係呀。」太一有少少懷疑佢係咪同甜豉油夾埋。
「你今世父母緣淺，要把握時間見佢哋。」
「但係⋯⋯我阿爸好健康喎，而我阿媽就⋯⋯」
「搵到嘅。」師傅打開把大扇撥自己。
「吓？」太一心裡面震咗一震，呢個風水師傅竟然估到晒佢嘅問題，「我又知我想搵我阿媽嘅？但係⋯⋯佢好多年前就返咗日本喎。」

師傅收起把扇，輕輕咁用扇拍太一膊頭，「後生仔呀，你搵就有機會，你唔搵你條命同你阿媽幾有緣都見唔到。」

太一心裡面的確有一個念頭，好想再見阿媽一次，不過又擔心佢阿爸唔鍾意，又唔知點搵好，所以一直都只係將呢個諗法收埋喺心裡面。

「你兩個⋯⋯可能幾夾喎。」師傅望住佢哋兩個嘅面相講。
「吓？係咪真架師傅，我哋第一次見就嗌交喇喎。」
「咁依家又一齊喺度。」師傅露出一個狡猾嘅笑容。

兩個人有少少尷尬咁望住對方⋯⋯

之後喺廟街行嚟行去，聽咗幾個歌檔唱歌，有啲人可能會嫌呢度啲歌嘈，不過太一就好Enjoy。廟街嘅歌手都有個共通點就係夠氣，可能未必每個音符都處理得好好，不過夠氣又有氣氛，算係幾好啦。可惜嘅係間間檔都開到好大聲，幾實都幾嘈。

「你哋都可以喺度唱喎。」甜豉油靠近太一耳仔開玩笑咁講。
「我就緊係冇問題啦，阿錘就肯定淆底。」太一都靠近佢耳仔講。
「不如走啦，我想食嘢呀。」
「好呀。」

廟街有唔少好食嘅嘢，但係甜豉油就帶咗太一去食煲仔飯，平時呢間餐廳好多人排隊，不過今晚就唔使等。

「今日有啲涼，食煲仔飯啱feel。不過⋯⋯你知我依家冇錢㗎可？」太一有啲尷尬咁講。
「我借住畀你先啦。」甜豉油講。

煲仔飯嘅飯焦好似有種魔力咁，明明只係燶咗嘅飯，但係又會令人好想食落去。兩個人坐低咗之後亦都好快就有得食，太一打開蓋之後，就落咗好多豉油。

「落咁多？」甜豉油好驚訝。
「係呀，要落咁多時候先夠味。」。太一講。

太一繼續食佢嘅臘腸排骨煲仔飯，仲食得好開心。

「咁所以你想搵返你媽媽？」
「嗯⋯⋯我想搵㗎，但係可能佢又唔想見我。」

甜豉油冇繼續講落去，選擇靜靜咁食飯。

「完全冇諗過你屋企咁多事。」甜豉油又突然講。
「係咩？」
「平時你好似個熱血白痴仔咁，仲自己一個都去選學生會，以為你屋企好開心添。」

太一繼續食自己碗飯，「其實我都知人哋覺得我好奇怪嘅，不過我都係有咩想做就做。」太一好似隨口咁講。

「係咁就去啦。搵你媽媽。」

突然之間，太一意識到明明自己一早決定咗用自己嘅方法生存，但偏偏去到「家人」呢一環嘅時候，自己又將心裡面嘅想法抑壓住。無論係佢阿爸要佢畢業之後去外國，定係去搵阿媽，佢一直都唔敢去面對呢啲嘢。

「你係咪特登引我講呢句㗎。」太一笑笑口咁講。
「唔知喎。」甜豉油輕輕咁講。

「一畢業我就去。」
「嗯。祝福你。」

喺佢哋食完飯之後，兩個人喺街度又行吓，又偈吓，又坐下，又停吓，由劉星隨講到毛子蘭，慢慢行晒成個佐敦。

「甜豉油。」
「吓？」
「本身我唔鍾意你哋咁叫我。」
「對唔住囉。」

「不過我慢慢又覺得冇咩所謂，諗諗吓有個花名都幾好吖。」甜豉油笑笑口講。
「真係咩？」
「你又唔係有惡意，係貪玩啫。」

「差唔多喇，我係時候返屋企喇，送埋你吖。」
「好呀。」

太一平日雖然好似個傻瓜咁，不過其實好在意身邊嘅朋友，只要朋友有難就一定會幫到底，而呢種性格，好似唔經唔覺影響咗佢身邊嘅人⋯⋯

（Tbc.）

67 - 打排球

今日我哋又喺SU房開會，其實都稱唔上開會嘅，又冇咩認真嘢要傾，都係放咗學又未想走住，所以留低咗。唔知點解，過完個假期之後，我嘅三個隊友都好似有啲唔同。至於係咩唔同，我又講唔出，定只係我嘅錯覺嚟呢？

「係呢樂少，你睇Show睇成點？同Emma有冇下文？」太一問。
「Er⋯⋯ 冇啦，不過場Show都算精彩。阿錘你呢？Silas場Show又點呀？搵到你想知嘅答案未？」樂少問我。

我有少少唔識講，Silas話咩「自己已經Rock唔到」，我仲未知咩事，加埋宋炎序又話咩我同Silas有一樣嘅眼神⋯⋯

「都幾好呀，佢唱咗嗰陣喺禮堂唱嗰首歌呀，只係⋯⋯佢好似唔係好享受，仲話自己已經唔可以再Rock。」我同佢哋講。
「吓？ 咁即係點呀？佢點解變咗做夏天雪人呀？」太一問。
「你冇去睇咩？」樂少打斷咗太一。

係喎，我都唔記得問太一咩事，因為唔想咁突然問呢件事，我都係隨便喺Group度問「要唔要一齊食嘢」嚟確認佢安全，估唔到今日返學之後，佢嗰樣同平時一樣，所以我完全唔記得問佢發生咗咩事。

「我聽講你離家出走喎。」
「離家出走？！」樂少好大反應，可能同我一樣完全冇諗過太一會咁做。

太一望一望樂少， 神情輕鬆：「間中反叛吓啫，我哋呢啲Band仔唔做返啲百厭嘢，第時出自傳就冇嘢寫啦。」

「又係喎，太一你有時都幾聰明喎。」，Sky因為太一嘅答案而笑起上嚟。

「 其實冇咩事嘅，我只係出咗去打通宵鼓，同埋同阿爸嘈咗兩句啫。」太一解釋。

我都估到係呢個原因，不過離家出走呢一件事，喺我身上就應該唔會發生，當然係因為我同屋企人嘅關係好好啦。不過喺呢件事睇嚟，太一畀我想像中「反叛」好多，或者應該講「搖滾」好多，咁樣都令佢睇起上嚟更加似一個BAND仔，我諗太一冇事嘅。

「係呢，Sky你個模擬口試點呀？」我問Sky。
「 冇咩特別啦，不過講咗好多嘢，所以好攰。」Sky笑笑口咁講，「係呀，我見到陳積呀。」

「『塵漬』？乜『孝基書院』好污糟㗎咩？」我講。

「上次『Reason X』嘅另外一個結他手Jacob，原來佢中文名叫陳積。」Sky講。
「原來有人個名仲好笑過『流星錘』。」樂少大笑，好似覺得好好笑。

同樣作為中文名好好笑嘅人，我對陳積嘅遭遇深感同情。

「佢話『Reason X』用Double Lead嘅原因，係因為呀風驚陳積會因為冇得彈Solo而唔開心，所以想兩個一齊solo。阿錘你會唔會以為我都係咁樣諗？」Sky問我。

我明白呀風嘅擔心，的確，一對Band入面負責彈Solo嘅嗰支結他，會畀人感覺係技術更好嘅嗰個，而且都型好多，亦都係因為咁先會畀人叫做Lead結他，而所謂嘅Rhythm結他，就會畀人叫做「第二結他」，但係如果問我⋯⋯

「我又唔會咁樣諗， solo嚟講Sky你比我好太多，而且我哋唔係一對Band咩？每次台下面嘅掌聲同歡呼聲，都係屬於我哋四個嘅。就係咁，我唔會因為冇得彈Solo而覺得自卑。」

Sky微微一笑：「果然係阿錘你嘅答案，同我諗嘅一樣。」

「我哋要玩Double Lead先唔會因為咩驚有人自卑，或者冇得solo而唔開心，我哋嘅Double Lead係因為首歌有需要。」我同佢哋講。

呢個時候，有個人打開咗SU房度門。

「 唔好意思，你哋唔得閒出嚟同班低Form同學練波呀？」講緊嘢呢位係新嚟嘅排球隊教練，不過我就唔知佢姓咩。

「好喎！我都好耐冇打排球喇。」太一好興奮咁講。

「 唔該晒你哋， 我係新嚟嘅排球隊教練－郭永森，你哋可以叫我做Sam sir。 我想你哋幫手攔網，你哋咁高，唔使點跳都block到班𡃁仔啦。」

其實對於運動，我又未係好抗拒，但係排球就完全唔想打，因為我都算生得高， 所以都有試過畀人叫去打排球， 只不過每次打完波都會手痛， 而且如果傷咗手指，就連結他都彈唔到。

「我諗我都係⋯⋯」就係我未講完嘅時候，太一同樂少已經拉走咗我。
「嚟啦阿錘， 我想殺波呀。」樂少講， 明明佢自己都係排球新手，邊有咁易殺到波呀⋯⋯

而Sky竟然已經出咗去， 仲開始緊拉筋，睇嚟已經準備好。咁就唯有算啦，我都只可以頂硬上。

排球喺我眼中，係最複雜嘅運動，淨係要企住轉位，就已經好麻煩，而且呢樣運動太過依賴身體。如果對面嘅對手係一班兩米高嘅巨人，咁無論我點跳，根本點努力都唔會打得贏，即係所謂嘅天賦差距⋯⋯

望住對面班低年級學生，我諗佢哋最多都係1米六左右，而我盡力跳嘅話都可以掂到學校嘅籃板，我諗佢哋佢哋係唔會打到個波過網。果然一個波殺埋嚟，我輕鬆就用右手手掌擋走咗，呢啲就係身體嘅差距，唔係努力就可以彌補到嘅嘢。

打咗成十分鐘，佢哋連一球都過唔到，唯一過網嗰球，係大力得滯，打咗出界嘅波，老實講，我望住佢哋都有啲同情⋯⋯不過排球，就係一件咁殘酷嘅活動。

雖然係咁講，但係跳咗十分鐘，我都已經好攰，好似冇得得咁高⋯⋯就喺呢個時候，對面嘅Form 1仔，一個波殺埋嚟⋯⋯我竟然擋唔到⋯⋯佢哋打到過網⋯⋯呢一刻，我一啲唔開心都冇，因為我跟本冇放過心機落去，反而見到班師弟打到過網，我有啲開心添。

「你哋明啦，對面高過你又點呀？你哋唔係冇機會㗎，個波未落地就未輸！幾時係輸嘅時候呀？係當你放棄跳嗰吓。」Sam sir好熱血咁同班師弟講。

企喺對面嘅我，唔知點解好似畀佢打動到咁，冇錯呢啲心靈雞湯，個個都識講，不過親身企喺球場就會明，我見到班Form 1仔出盡力咁跳，我都想佢哋成功。可能佢講得啱，只有當你決定放棄，比賽先會分出輸贏⋯⋯

之後，我哋就同班Form 1仔打咗場友誼波，其實都幾開心吖。突然之間，個波飛到我頭頂，係一個我跳起就打到嘅高度，於是我完美咁跳起，右手已經準備好，瞄準對面嘅死角位一下殺落去！

結果個波！唔知去咗邊⋯⋯

我只係聽到一個男人大叫咗一聲，而呢個人係李sir。

好彩係李sir，畀在第二個老師，我諗我又要記多個缺點。
「李sir，你冇事吖嘛？」
「呀隨兄，打波定打人呀？」李sir不停咁捽自己耳仔，因為我就係一嘢打咗個波落佢耳仔。
「Sorry呀，技術差吖嘛。」其實我真係有啲唔好意思，無啦啦打中咗李sir。

「不過唔理你住。」

李sir唔理我，行咗過去搵Sam sir，一拳打落佢個肚，兩個人好似好friend咁。

「嚟教波又唔話我知。」李sir笑緊，係見到好朋友嗰種笑容。

我望住呢兩個30歲嘅人，感覺佢哋同個中學生冇咩分別。
（Tbc.）

68 - 撕海報的兇手

時間嚟到5月初，我同「黑色西炒飯」佢哋都好努力練習，我覺得我嘅基本功提升咗唔少，彈嘅嘢快咗，而且拍子感都慢慢變得穩陣，至於我嘅唱功⋯⋯我就仍然努力緊，雖然已經做咗主音大半年，但係我有時都係覺得自己把聲好難聽，我甚至會懷疑，觀眾聽嘅時候究竟接唔接受到。

至於《蘭》呢首歌呢，我仲未寫好份詞，我唔係冇努力㗎，我寫咗三個版本，只係冇一份令我自己滿意，所以喺夾嘅時候，我都係用啦啦啦嘅方法唱。

今日我自己嚟咗音樂室，因為想要個靜嘅空間，諗清楚點作份詞，但係呢個時候，發生咗件意外⋯⋯音樂室盞燈突然之間熄咗，我諗應該係跳Fuse啫，因為以前其他課室都試過。不過因為仲有陽光入嚟，所以我就冇點理，只係繼續寫份歌詞，但係呢個時候校工強哥就入咗嚟。

「劉星隨，呢度跳Fuse呀，你要走呀。」強哥同我講。
「咁呀⋯⋯好啦，唔該強哥。」

校工喺學校係好低層嘅員工，有時見到啲老師連望佢哋一眼都好似唔想咁，我就極反感，雖然話論學歷、社會地位都冇得比，但係起碼都要尊重人吖。強哥喺學校係默默做嘢嗰種人，平時唔會主動同人講嘢，但係有咩水電問題，或者有同學要幫手都係即刻做到嘢。我記得中一嗰年，有個同學喺周會嘅時候嘔，仲嘔到成身都係，第一個過去幫手嘅係強哥，所以我內心係好尊重佢嘅。

既然畀強哥趕走咗，我就諗住走啦，點知我見到有個人鬼鬼鼠鼠咁匿喺樓梯後面。

「你搞咩呀？」我細細聲喺佢後面講。
「吖！」佢望向我，「係你呀？」
「你做咩匿埋呀？」
「我哋『占卜星相靈異與魔法學會』張Poster畀人撕咗呀。」

我望一望牆：「咩呀，咪喺度囉。」
「今朝小悠貼返上去㗎，話要等個兇手出現然後捉住佢。」

冇錯，呢個人係毛子蘭，佢又喺度玩偵探遊戲，睇嚟佢都幾受佢爸爸影響。原來佢哋學會下個星期搞100人魔法活動，甜豉油會用白魔法幫同學提升心靈嘅力量。至於白魔法係咩嚟呢，我就唔清楚嘢，不過佢哋學會都係玩開呢啲，所以我都已經見慣不怪。

「係咪風吹咋，學校好少有人會撕走Poster喎。」
「已經係第三日喇，我哋貼咗三日，就畀人撕足三日。」

我冇講啲乜，靜靜地喺佢後面，因為我都好奇發生咩事。學校嘅海報喺我印象中，好少會撕，有啲Poster直頭就由開學貼到年尾，佢哋個學會又會被人撕走咗，呢件事真係好奇怪。

過咗15分鐘左右，我見到有個人行埋去張Poster度，將佢撕落嚟，而呢個人⋯⋯竟然係樂少？

「樂少？你做咩撕走我哋學會張Poster呀？」毛子蘭問樂少。
「因為冇學生會印呀，你睇吓喇。」
「點會冇呀？」毛子蘭拎返張Poster，點知上面真係冇咗個學生會印。

我哋學校要貼非學術類嘅Poster係要同學生會申請，然後扱個印，但係因為冇咩人會無啦啦整海報，所以都慢慢冇人跟呢條規矩。

「咁睇嚟係你哋做錯嘢先喎。」我同毛子蘭講。
「冇理由喎，小悠肯定唔會咁大頭蝦㗎喎。」毛子蘭講。
「依家落去扱返囉。」樂少講。

於是，我哋就一齊落咗去SU房，諗住幫毛子蘭佢哋張Poster扱返印，咁啱太一都喺SU房。

「你哋搞咩咁齊人呀？仲拎住『占卜星相靈異與魔法學會』張Poster？」太一講。
「因為原來我哋冇扱SU印呀。」毛子蘭講。
「吓⋯⋯貼海報都要扱印㗎咩？」太一似乎唔知呢件事，「我今朝仲話幫甜豉油貼添。」
「原來係咁，真兇係太一。」我講。
「因為所有非學術性嘅Poster都要同SU申請㗎。」樂少同太一解釋。

睇嚟件事係太一幫甜豉油貼Poster，但係又唔知要同SU申請，所以就有呢件誤會喇。

「乜SU平時都有咁check㗎咩？」我問。
「平時就冇嘅，不過最近副校長話要注意校園整潔，我今日咪要做嘢囉。」樂少講。
「今日？但係我哋張Poster貼咗三日，三日都畀人撕喎。」毛子蘭講。
「吓？咁我又唔知喎，我今日先開始巡咋。」樂少講。

吓？即係點呀？兇手又唔係樂少又唔係太一，咁點解「占卜星相靈異與魔法學會」嘅Poster會係咁畀人撕走㗎？

因為SU已經扱咗印，我哋就同埋毛子蘭去樓梯貼多次張Poster。

「咁究竟琴日同前日又係邊個撕走我哋張Poster呢？」毛子蘭講。

呢個時候，強哥行咗過嚟我哋呢邊，「你哋又貼過呀？」強哥問。

「咩事呀強哥，呢度唔畀貼Poster咩？」我問。
「副校長話，下個星期有教育局職員嚟，唔係學術海報就唔準貼呀，我都係撕咗兩日。」強哥講。

原來一切嘅兇手又係副校，咁唔怪得強哥啦，佢都係收Order做嘢。咁點算好呢，而家同副校硬碰硬很定衰硬，冇理由仲貼張Poster喺度。

「咁你諗住點呀？」我問毛子蘭。
「我要繼續貼喺度。」
「但係何副校實搞你㗎喎。」

因為頭髮問題同何副校交手咗五年嘅我，心知道嗰個女人真係好麻煩，而且好小氣。

「但係明明我跟足晒規矩，SU印都有，點解就唔可以貼呀。」毛子蘭講。
「咁你又啱嘅。」

我都明毛子蘭講嘅嘢，但係何副校呢個人⋯⋯真係好討厭。

（Tbc.）

多謝幫推

69 - 「無論咩情況都要做自己認為啱嘅事」

何副校可以話係第一個令我認識到世界黑暗嘅人，小學雞嘅我其實好天真，覺得所有老師都係好人，只要乖乖哋就自然可以開開心心讀書，但就係佢令我體驗到咩係教畜。

中一嗰年開學第一個禮拜，我同樂少喺籃球場隔離食緊嘢。有班高Form嘅師兄打緊籃球，打波燥底就好正常啫，咁有個師兄就講咗幾句粗口。點知好衰唔衰畀個嚟睇場嘅校董聽到，校董就覺得好嬲，因為我哋校風出名純樸，「講粗口」呢件事本身就同佢哋有抵觸，於是何副校就親自落操場捉人，班師兄就唔認同埋話要補課走人，但係校董條氣唔順，結果何副校捉咗我同樂少出去操場罰企，仲話一日冇人認，我哋兩個就冇得走。

嗰陣我心諗，我咩都冇做過喎，認咩呀？無啦啦罰我企⋯⋯原來佢想引起人嘅「內疚」，然後班師兄會主動認錯。係咪傻咗呀？你畀我走甩咗都唔返轉頭啦，邊個會出嚟認錯呀。但係好多唔知內情嘅同學，就已經自動入咗我同樂少數，覺得係我哋做錯事先畀人罰。好彩後來，我哋中一個班主任出嚟問咩事，我哋先冇繼續畀佢罰企，諗返都覺得嬲。

最諷刺嘅係一路喺二樓嘅校董原來聽唔到佢講咩，以為我同樂少係講粗口嘅人，仲讚何副校「嚴師出高徒」，佢仲竟然笑笑口接受咗，完全冇諗過解釋返我同樂少係無辜嘅⋯⋯至此之後，我內心都唔鍾意何副校，只係我學識咗點樣避開呢啲教畜。

結果第二日朝早，我見到毛子蘭去咗SU房扱印，然後又再貼張Poster。「不如算啦，佢今日咪一樣叫強哥撕咗佢。」我同毛子蘭講，我心裡面覺得佢同副校作對，不利嘅一定係佢。

「我已經跟足規矩，校規話跟足程序就可以，如果佢一句話唔得就唔做，咁點解要有規矩？佢直接管晒間學校咪得囉。」毛子蘭一連串咁講，雙眼好似有火咁，我從來未見過咁嬲嘅毛子蘭。

「但係你諗吓喎，如果佢下年唔畀你做Head Prefect點算呀。」我同毛子蘭講，因為其實佢今做副Head，下年好大機會都係佢做Head Prefect，而且做Head Prefect仲會有校長推薦信，要入咩科都易好多。

「吓？劉星隨，你係咁諗嘢㗎咩！乜嘢『無論咩情況都要做自己認為啱嘅事』原來係大話嚟。」毛子蘭嬲爆爆咁走咗去。

「無論咩情況都要做自己認為啱嘅事」我記得呢句⋯⋯好似係我上次同佢講㗎，估唔到原來佢記得，而且⋯⋯我竟然冇做到我講出口嘅呢句說話⋯⋯

明明Rock and Roll就應該係唔怕強權，唔怕打壓，要反擊所有睇唔過眼嘅事，點解日日話要搖滾天下嘅我，竟然做唔到⋯⋯

放學嘅時候，副校長親自帶人上去撕走毛子蘭佢哋張Poster，但係毛子蘭同佢幾個成員就擋住咗副校。

「毛子蘭，你做咩呀？」何副校用輕藐嘅語氣講。
「副校長，我哋學會已經跟足晒程序同規矩，我唔明白點解唔可以貼呢張海報。」毛子蘭態度好堅決咁講。
「下個禮拜教育局有人嚟睇堂，我哋唔可以貼呢啲冇學術價值嘅海報。」何副校同樣唔退讓。

兩方繼續對峙，「強，照撕。」副校長要強哥處理佢哋張Poster。

呢個時候，我決定要行動喇，我走過去撕走咗「占卜星相靈異與魔法學會」張Poster。

「劉星隨，你做咩呀？」毛子蘭問我。
「副校都話咗原因畀你知啦，下個禮拜有人嚟睇堂，你咪乖乖地聽副校長講囉。」我同毛子蘭講。

毛子蘭聽到我咁講，即刻嬲到面紅，因為肯定估唔到會係我撕走佢哋張海報。

「劉星隨，你幾時學到咁乖㗎。」副校露出欣喜嘅笑容，咁又係嘅，我好少會做嘢合佢心意。
「我都係講道理啫，呢張又唔係學術海報，貼喺度緊係唔好啦。要貼就貼啲有學術意義嘅嘢。」我望住毛子蘭講，「樂少，唔該。」我之後再叫樂少幫手拎啲嘢出嚟。

我親手貼起咗一張海報，其實同「占卜星相靈異與魔法學會」張Poster係同一張。

「劉星隨，你做咩呀？」副校長難以置信。

「係咁嘅副校，其實我對天文學一直都好有興趣，我只係想同同學分享得到知識嘅喜悅，所以同『占卜星相靈異與魔法學會』一齊搞咗呢個活動。因為係學術活動，貼喺度絕對冇問題，而且我已經問咗校長喇。」我理直氣壯同副校講。其實我由今朝己經開始部署，一早我就搵晒中五嘅班會學術，叫佢哋書面支持我，再叫樂少同SU申請，而最後一步就係請求校長同意，不過呢⋯⋯

「你依家用校長大我呀？」何副校已經畀我激到青筋出晒嚟。
「又唔可以咁講嘅，我都係努力做個乖學生，跟足程序嗰種乖學生。」我好老定咁講，但係其實我內心淆到爆，而且心跳都好快，只係扮到好鎮定。

何副校聽到校長都同意，一句都冇講就走咗，佢明明係著平底鞋，但走嘅腳步聲都聽到佢有幾嬲。

「阿錘，校長今日唔係唔喺學校咩？你點拎到佢同意㗎。」樂少偷偷哋問我。
「所以我啱啱只係話我問咗校長，冇話佢同意囉。」我遮住個口，細細聲同樂少講。

因為我知道，如果畀毛子蘭知道我先斬後奏，肯定會唔同意我咁做，所以我都係靜靜哋等佢哋再發現先算啦。

我輕輕力掃平佢哋張海報，「係就係同你哋本來張Poster有啲唔同，但係起碼貼到先啦。」我同毛子蘭講。
「激死我喇，以為你出賣我哋添。」毛子蘭微微一笑。
「吓？我喎。做啱嘅事，我永遠都唔會怕。」我扮到好型咁講，其實應該都算有型掛。

係毛子蘭令我諗返起，原來我之前一直都冇勇氣做我想做嘅人，而今日我冇怕到大聲夾惡嘅副校長，反擊咗我睇唔過眼嘅事。都係因為毛子蘭喺度，我先記返起⋯⋯就喺呢一個瞬間，我好似諗到要點寫份歌詞。

（Tbc.）

70 - 《思念的感覺》

自從Sam Sir嚟咗之後，班低Form排球隊就好努力練波，而且Sky同太一仲成日去幫手添，我懷疑佢兩個已經愛上咗打排球，至於我當然就係有機會就避啦，我對排球又冇興趣。有關我嘅歌詞，我已經寫好咗，而且我仲幾滿意，不過呢⋯⋯個名就決定唔叫《蘭》，我諗都冇咩所謂嘅，只係希望有機會唱到Live畀佢聽。

＝＝＝＝＝＝

Sky放學之後，認真咁喺VA室畫畫，佢嘅SBA只係完成咗《夢境》幅畫，至於《思念的感覺》就仲未搞掂，但係中五呢年最少要完成兩件作品，所以Sky唯有認真咁畫畫。喺佢旁邊嘅Emma雖然一早就畫好咗兩幅畫，但係佢心裡面一直都有樣嘢想做，所以呢排都一直留喺VA室。

「Emma你，整緊咩呀？」Sky問。
「我想整陶藝。」Emma有啲怕醜咁講。
「Emma你想交陶瓷做作品呀？」
「嗯。不過可能下年嗰份先用陶瓷，依家就繼續練習先。」
「點解係陶瓷呀？」
「因為⋯⋯畫可以被火燒爛，但係陶瓷燒完之後，反而會更靚。」

Sky笑一笑：「但係畫唔會跌爛，但係陶瓷就會喎。」

「你都講得啱嘅，不過我覺得燒過之後嘅藝術品，會更加有意義。」

「Emma你，好似唔同咗。」Sky笑笑口咁講，「我落去打陣波先，最近發覺排球都幾好玩。」然後就落咗去打排球。

喺課室嘅Emma跟住潘sir學整陶瓷，因為潘sir喺陶瓷界算係一個小有名氣嘅人。

Sky嚟到咗球場，班低Form嘅同學練緊波，而Sky就幫佢哋練攔網同埋殺波，雖然Sky一副懶洋洋嘅表情，但係set波就非常之準確。就係呢個時候，Miss Lui就路過球場，好多C Grade排球隊嘅同學都係Miss Lui嗰班，所以佢見到Sky同自己班啲學生打波就覺得好神奇。

「司徒天？你打排球㗎咩？」Miss Lui問。
「最近我成日幫佢哋練波㗎。」Sky微微笑咁講。

「Miss Lui你要唔要一齊打呀？」有個中一嘅同學講。
「Miss Lui你就打幾球啦，最多我set幾球畀你殺啦。」Sky得意洋洋咁講。
「吓，你哋真係唔識死喎，我以前大學隊正選㗎。」Miss Lui得戚咁講。

Miss Lui打起波上嚟好投入，同一班學生打得非常開心，而且佢嘅殺波真係唔講得笑，有力又夠準，同Sky嘅set波好夾，班低Form嘅同學完全招架唔住。

Sky喺球場上笑得好從容，好似夾Band嘅時候一樣咁自在，而且同Miss Lui一齊嘅Sky係特別唔同。

喺五樓嘅Emma出咗去走廊行吓，望向下面嘅時候，Emma不自覺咁將視線放到Sky身上。

「Emma。」呢個時候，Rachel靜靜咁行到Emma身邊。
「Rachel，你又會喺度嘅。」
「今日上咗嚟隔離課室補課呀。」Rachel望住Emma嘅眼神，似乎察覺到啲嘢。

兩個人同時將視線投放咗喺Sky身上，「你望住Sky嘅眼神，同以前嘅我好似。佢就係咁㗎喇，就算咩都唔做都會令人好在意。」Rachel輕輕咁講，「不過依家佢雙眼入面，應該就只係望到Miss Lui。」

Emma點一點頭：「嗯。不過我知道依家我要望住嘅嘢唔係Sky。」

Emma轉身之後，返到去VA室，繼續佢嘅陶藝練習，而Rachel亦都因為放完Break返去繼續補課。

球場嘅Miss Lui繼續同班同學打排球，突然間隔離籃球場嘅籃球高速飛向Sky度，Miss Lui喺千鈞一發之際，Miss Lui將Sky拉跌，然後攬住咗佢，最後籃球慢慢碌到好遠好遠⋯⋯

「好彩咋。」Miss Lui慢慢推返起Sky，「有冇事呀？」
「冇。」件事發生得太突然，Sky好似未意識到。

「好喇，夜喇全部人都要返屋企呀，清場。」Miss Lui馬上清場趕走球場上嘅同學。

「司徒天？仲呆咗做咩呀？返屋企啦。」Miss Lui見Sky仲係呆呆滯滯嘅狀態。
「哦。」Sky冇幾耐之後，都準備上返VA室，繼續佢份SBA。

雖然係一場意外，但Miss Lui攬住Sky嘅一刻，Sky覺得好溫暖，而且好安心⋯⋯就係咁，佢返到VA室之後，Sky好似得到咗超能力咁，一陣就完成咗《思念的感覺》，畫嘅諗法係將思念化成星空，包圍住月亮嘅星星形成山羊，係代表Miss Lui嘅山羊座，水彩加上粉彩嘅做法令畫有種特別質感。

「畫得好好喎。」教VA嘅潘sir見到Sky突然好有幹勁就過嚟睇吓，點知就對Sky幅畫有好大驚喜。
「我都覺得呢幅畫得好好。」Sky笑笑口講。

Emma都行咗過嚟睇Sky幅畫，「呢隻山羊⋯⋯」Emma問。
「嗯。」就算Emma未問完，Sky都知道佢想問咩。

或者係藝術家之間嘅敏銳，唔需要講啲咩，Emma就明白Sky內心嘅喜悅，喺《思念的感覺》入面，Emma睇到嘅係一個好純粹，好簡單嘅Sky，只係Sky望住嘅山羊唔係Emma，係Miss Lui。

完成咗《思念的感覺》嘅Sky覺得好輕鬆，佢收拾好自己嘅畫具，伸個懶腰，就準備返屋企。

路過一樓嘅時候，佢聽到Miss Lui同一個男人講緊嘢，Sky認得把聲係校長。

「Miss Lui，我知你好關心學生，但係同個男同學太親近，會有好多麻煩㗎。」校長語重心長咁講。
「我知㗎喇校長，我會小心避忌啲。」Miss Lui好慎重咁講。
「我知道佢同你有相似嘅經歷，你好想幫佢，但係有啲嘢我哋做老師係幫唔到㗎。」校長講。
「我明嘅，我會注意返。」Miss Lui講。
「呢個年紀嘅男仔呢，好敏感㗎，處理得唔好，你會影響佢一世。」
「嗯。」Miss Lui點點頭。

Sky明白到校長嘅意思，佢知道佢依家嘅身份，只係Miss Lui嘅學生，而Sky亦都唔想令Miss Lui受到傷害。

（Tbc.）

71 -世界真細小

今日我哋又嚟到咗The Echo夾Band，主要都係試吓夾《蘭》啦，因為詞嘅方向唔同咗，編曲就改咗少少，每個人都有畀到意見，特別係Sky，喺成首歌都落咗好多心機，而且因為佢獨特嘅結他，令我哋可以玩多好多嘢。

「Sky，你今日好似好有幹勁喎。」我講。
「乜係咩？」Sky微微笑，「可能因為阿錘你呢份詞，寫得幾好啦。」

份歌詞，我一路都唔知點寫好，一直卡住喺唔知點表達，不過就喺上次貼Poster件事，我先知道我想講嘅究竟係咩。

喺走嘅時候，達仔問咗我哋一個問題。

「你哋識唔識李盛安？教中文嗰個呢。」
「李sir？佢教我中國文學喎。」
「世界又真係幾細，原來喺你哋學校教。」達仔好唔有啲唔相信咁，「佢以前同我夾Band㗎。」
「嘩。」我哋幾個都好嘩然，估唔到李sir同達仔居然識得。
「我見到樂少枝Bass就覺得熟口熟面，不過真係估唔到原來係同一枝，真係緣份嚟。」達仔講。

樂少仲係用緊李sir枝Bass，因為嗰陣畀狗明呃咗買枝假嘢，李sir為咗大事化小就決定將自己枝Bass畀樂少，估唔到呢枝Bass過咗十年又見返佢以前嘅隊友，世事真係好奇妙。

「咁你哋又做咩會冇夾嘅。」我有啲好奇問。
「你哋大個就明㗎喇，呢個拍拖，嗰個讀書，一個打波，一個失踪。咁點夾吖。」達仔個樣唔知做咩好唏噓。

我哋之後就散咗，我就想去「流星記」食啲嘢，屋企開茶餐廳嘅好處就係肚餓都一定有嘢食。

今日我一入到去，有個人拎住部相機影住自己食嘢，佢好似好熟口面，我記得好似叫AutumYouth，係個拍飲食片嘅YouTuber。不過我見鋪頭都冇人理，我諗大家都唔識佢。

「今日要嚟試好多觀眾推介嘅『流星記茶餐廳』，嗰個都話必定要試飲奶茶同乾炒牛河，我哋即刻就嗌喇。」YouTuber用緊平日佢啲片嘅Tone講，雖然我感覺佢同啲片嘅Tone係一樣，但唔知點解睇住佢拍就覺得好奇怪，加上佢嘅動作表情，喺茶記入面好突兀，感得佢好誇張，可能就好似啲人話「做戲要誇張啲」一樣，拍YouTube都要浮誇啲。

「唔該，有冇人呀。」佢叫緊人落單。

不過呢個時候媽媽就收緊錢，樓面又冇人得閑，我見冇嘢做，心諗不如我過去幫佢落單啦。

「食咩呀？」我問佢。
佢呆一呆望住我：「𡃁仔，返Part Time呀？」
「我爸爸係老闆吖嘛。你食咩呀？」
「彈結他喎。」佢好似留意到我仲孭住枝結他。
「係呀，啱啱夾完Band。咁你食咩呀？」我又問多次，係咪YouTuber就特別多嘢講呢，幾次都未答到我要食咩。
「一份乾炒牛河，一杯熱奶茶。」
「OK。」

我拎咗張紙仔寫低咗佢要咩，茶餐廳落單有自己獨特嘅風格，外人唔識睇，不過我話晒都喺度大，乾炒牛河、熱奶茶我都識寫嘅，之後就順便寫咗個炒飯畀我自己。

我又坐返去我嗰位，點知個YouTuber就望住我，揮手叫我過去。

「喂，太子爺，我就YouTuber嚟嘅，我叫呀秋。都有幾萬訂閱嘅，不如呢餐我當幫你哋賣廣告，你哋就free畀我。」佢同我講。
「吓？落廣告我哋唔做㗎喎，免費晚餐就冇㗎喇。」我同佢講。

估唔到啲YouTuber會咁狼死，一嚟就想R著數，我哋就緊係唔會買帳啦。

「咁算囉。係呢，你夾咩歌㗎？」
「Er⋯⋯呢排就玩自己歌多啲。」
「咁細個玩原創歌，勁喎。我以前都打Band㗎。」

打Band？咩年代呀？同李sir講嘢一樣咁老嘅。

「你都彈結他呀？」我問。
「係呀，不過我輔助嚟，喺隔離掃吓Chord扮吓型囉。」

原來我身邊都有好多人夾過Band，睇嚟要出到位，做到人人都識嘅搖滾樂隊，真係好難。

「不過後來我又掛住拍拖，冇理到班人，十年都冇聯絡過，諗返都有啲後悔⋯⋯」呀秋好慨嘆咁講。

做乜個個上咗年紀嘅Band友都咁唏噓嘅，達仔又係咁。

話咁快，呀秋碟乾炒牛河同奶茶就送到咗，佢即刻用相機影咗食物先，之後就將鏡頭對住自己，拍住自己食嘢嘅表情。

「嘩⋯⋯好好食呀，呢碟牛河，色香味俱全，最勁係咩呀？唔油膩，聞起上嚟香到爆，牛肉好嫩滑，河粉又有咬口。」呀秋誇張咁講，雖然平時啲片都係咁上下表情，但現場睇就真係略嫌浮誇。

雖然我都知我哋鋪頭嘅乾炒牛河係好好味，但係都好少見人嗰表情會咁「爽」。不過我見到咁都開心嘅，呢碟小小嘅牛河，始終係爸爸媽媽兩個人嘅心血，算佢識食啦。

「係咪好好食呢。」我問呀秋。
「直頭正啦，依家好少食到咁有鑊氣，咁香口嘅牛河。」佢直頭舉起咗個手指公講，「完全係我細個食嗰隻味，以前夾完Band一人一碟牛河⋯⋯好懷念呀。」呀秋又想當年。
「咁你唔搵返你班Band友嘅？」
「小朋友，有啲嘢你大個就明，唔係咁易㗎。」呀秋又講。

點解硬係覺得佢講嘢咁似喺邊度聽過咁嘅⋯⋯

「3個唔該。」我聽到有個客入咗嚟，但係佢把聲⋯⋯

「李sir？」我有啲震驚，李sir竟然嚟咗「流星記」。

而且連達仔同Sam Sir都喺度⋯⋯

「安、達、Sam！」呀秋大叫，「你哋又喺度嘅。」

我見李sir佢哋都好愕然，就好似撞鬼一樣⋯⋯

「估唔到我哋『五鬼魔神』，會喺度撞返！」呀秋衝埋去攬住咗李sir佢哋。

咁好明顯，李sir、Sam sir、達仔同呀秋，佢哋係Band友啦，「五鬼魔神」就係佢哋隊Band個名⋯⋯

（Tbc.）

72 - 「五鬼魔神」

「流星記」嘅氣氛突然變得好詭異，一方面係呀秋好興奮，但李sir幾個就好似有啲措手不及。

「喂李sir，你哋都識不如坐埋呢張啦，好多人呀而家。」我同李sir講。

「隨兄，你又喺度嘅。」李sir問。
「呢度我屋企開㗎嘛。」我講。

李sir佢哋就坐咗喺呀秋張枱，但係就有種微妙嘅唔協調，於是我就喺隔離偷聽。

「你哋又會咁齊人嘅。」呀秋講。
「我最近去咗『寧華』教波，點知原來李安都喺度教書。」Sam sir講，原來李sir以前個朵係「李安」。
「之後，我就同呀Sam傾返偈，講起達仔，咁我哋就聯絡返。」Sam sir講。
「不過世界真係細，估唔到你兩個都去咗『寧華』教，即係佢間學校。」達仔指住我。

真係估都估唔到，呢4個人以前係同一隊Band。

「我哋有幾多年冇咁樣一齊？」呀秋問。
「10年啦。我畢業之後就冇見過。」李sir講。

「嗰陣我哋都係20𡃁歲，我仲諗緊打鼓定打波嘅時候，你就走咗。」Sam Sir個樣好感慨，「結果我去打波囉，辛辛苦苦打上甲一，最後跌一下斷埋十字韌帶，一直都打唔返上去。」

「嗰陣我女朋友有咗BB，我唯有搵工⋯⋯」呀秋好似講到想喊，「點知原來個仔唔係我嘅⋯⋯我直到佢生咗我先知，原來我一直戴緊綠帽。」佢最後都喊起上嚟。

「又喊⋯⋯你咁多年都係咁嘅，依家咪撈得幾好，我見你上埋電視。」達仔畀咗張紙巾呀秋，「你哋轉晒行咪好囉，我走去做樂手呀，人工咁多年都冇加過，仲要成日冇Job，後尾捱咗幾年，依家先開到間Band房咋。」

「你估我教書又好輕鬆咩，又驚教唔好班學生，又要頂住啲高層壓力，我幾想食返煙呀。」李sir都忍唔住吐苦水，原來以前李sir都有食煙。

四個大男人，一路食飯，一路飲酒，一路講自己發生咗咩事，喊吓又笑吓，慢慢好似變返Friend咁。曾經為咗同一個夢想努力嘅人，應該點都唔會反面掛⋯⋯好多時，我哋以為友情好難維繫，其實可能只係要一個電話、一個Message、一餐飯就已經解決咗好多問題。

「不過我都係搵唔到KY。」Sam sir講。

係喎，佢哋隊Band叫五鬼魔神，即係應該仲有一個人啦，李sir on Bass，Sam sir打鼓，達仔同呀秋彈結他，即係差個Vocal？

「我都冇見過佢，呢個沈勁恩，由細到大都係咁來無影去無蹤。達仔你有冇收到風呀？」李sir講。

「我聽炎爺講過，KY跟過佢撈一排嘅，不過後來又唔見咗。」達仔講。

達仔講嘅「炎爺」會唔會係指宋炎序呢？KY又係主音，又有跟過宋炎序，呢件事會唔會同Silas有關呢？

望住佢哋，我冇辦法唔諗吓「黑色西炒飯」嘅未來就，太一可能要出國讀書，樂少又話同Emma冇可能，Sky就諗都冇用，根本唔會估到佢諗咩⋯⋯我哋畢咗業之後，會唔會都夾唔到落去呢？

我又會點呢？萬一我唔夾Band可以做咩？去返份朝九晚五嘅Office工？去樂器鋪做？教人彈結他？定返嚟繼承「流星記」？我真係唔知⋯⋯我只係想夾Band夾到我見唔到第二日嘅日出為止。

「喂錘仔，借枝結他嚟吖。」醉醺醺嘅呀秋想借我枝結他。
「電結他冇聲喎。」
「是旦啦。」

我都係借咗畀呀秋，佢醉醉哋拎住我枝結他，其實我係好擔心嘅，冇辦法啦，無論平貴，結他對一個結他手嚟講係好似雙手咁珍貴嘅嘢。

呀秋彈呢首歌，好熟⋯⋯係Beyond嘅《灰色軌跡》。

「嗰陣我哋夾呢首夾得好好㗎。」醉到臉紅晒嘅呀秋同我講。

《灰色軌跡》係一首Beyond嘅經典歌，好似係《天若有情》嘅主題曲，旋律方面，一聽就有種好唏噓嘅感覺⋯⋯雖然暫時我短暫嘅人生冇咩值得唏噓，但係通過音樂，我又好似明咗啲嘢。

結果佢哋4個一齊喺度唱《灰色軌跡》，好彩淨返嘅客人唔多，唔係我一定趕佢哋走，就算係李sir都係咁話。

去到最後，呀秋彈呢段Solo。我印象中好似係兩枝結他分別彈嘅，一枝係木結他，一枝係電結他，兩種聲好似互相吐苦水咁，各自有各自嘅情緒⋯⋯達仔就喺佢隔離扮彈結他再用把口發聲扮電結他，睇嚟佢哋真係醉咗。

咦？咁算唔算係另類嘅Double Lead呢？唔係一齊去彈同一段旋律，反而係好似合唱咁，兩把結他彈唔同嘅嘢，但係又有一定嘅連結，就算用唔同音色，都可以畫出別具風格嘅世界，呢個會唔會係我同Sky想做到嘅嘢呢？我哋嘅Double Lead好似都可以咁玩喎。

最後呀秋跪埋喺地吓彈，個樣超有戲，好似真係好投入on Show咁，差咗未fing個頭。我即刻托住我枝結他，順便拎返走，費事整花啦。

最後呀秋同達仔兩個好醉，李sir同Sam sir就飲得少啲，所以都仲算清醒，佢哋就一人托住一個咁走。當然埋單嘅時候，我媽媽又會想畀折頭我老師啦，不過李sir之所以係我最欣賞嘅老師，原因就係佢從來都唔會做呢啲無謂嘢，唔拘泥於形式，唔賣力做嘢但又唔會揸流攤，但係當學生有問題，都係會認真幫，其實都幾似Bass，不張揚，但係又提供穩定嘅力量。

「隨兄，我哋走先，返學見。」
「Bye-bye。」

（Tbc.）

73 - 白魔法

今日係「占卜星相靈異與魔法學會」搞活動嘅日子，不過我就因為英文科份功課做得差而畀老師罰留堂，唔交畀人罰留堂就試得多啫，但係「做得差」罰我留堂係咩玩法呢？冇計啦，鬼叫教我英文嘅係何副校咩⋯⋯而且我上個禮拜先用張Poster落佢面，我都預咗嘅。講返張Poster吖，唔知係咪佢冇同校長傾過，竟然冇懷疑過校長係咪真係批咗，因為我講嘅「問咗校長」，只係寫咗張Memo喺佢枱面，校長係冇同意過嘅。

既然畀副校長留咗喺留堂室，唯有希望佢哋活動順順利利啦，其實我從來都唔討厭「占卜星相靈異與魔法學會」，因為一直都冇一個學會有認真搞過活動，至少我呢5年都冇見過，佢哋嘅毅力，我係佩服嘅。

＝＝＝＝＝＝

「占卜星相靈異與魔法學會」成功吸到到好多低Form嘅同學參加，應該點都夠100人，佢哋堆滿晒人喺活動室。學校嘅活動室又唔算好大，不過100人都勉強可以塞到，但係就要逼少少。

太一都有參加今次嘅活動，雖然唔相信呢啲非科學嘅嘢，但係就冇抗拒甜豉油佢哋呢個活動，而且太一心裡面都好想有一啲力量支持自己。

「小悠，終於入晒人喇。」毛子蘭同甜豉油講，今日佢負責管理人流，好艱難咁處理完大量嘅人。
「好，咁我哋即刻開始儀式。」甜豉油講。

甜豉油想用「白魔法」幫一班同學提升心靈嘅力量，喺西洋魔法入面，有好多唔同嘅範疇，當中以「黑魔法」同「白魔法」最為人熟悉，「黑魔法」故然係攻擊人，令人受傷嘅魔法，而「白魔法」就相反，係對人有正面影響嘅魔法，可以用嚟治療疾病，或者古時就可以求雨求晴天之類，用嚟提升同學嘅信心同學習能力都冇問題嘅。

甜豉油將一塊紫色嘅布放喺枱上面，再將塔羅牌、蠟燭、香薰、同埋一啲草藥平均放喺上面，Simmy點著咗蠟燭同香薰，然後示意所有人合埋眼同誠心許願。

大約過咗十分鐘之後，儀式就結束咗，甜豉油已經出晒汗，好似用咗好多能量，個樣好似好攰，可能作法用咗太多能量。

「各位同學，儀式已經完成，大家可以瞌大眼，然後慢慢離開。」Simmy向同學宣報儀式結束。

活動完咗之後，太一留咗喺房入面，雖然冇話感覺到好大唔同，不過同平時放學嘅狀態相比，今日好似更加精神。

甜豉油走埋去：「點呀？有冇覺得心靈強大咗？」

「好似精神過平時囉。」太一拍一拍自己塊面講。

「你同你爸爸點呀？」甜豉油問。
「我哋冇乜點呀，我仲未同佢講我個日本之旅。」太一有啲吞吐咁講。
「希望魔法可以畀到啲支持你啦。」甜豉油
「我諗⋯⋯都有嘅，我感覺到有人支持我。」太一好有精神咁講。

雖然魔法嘅力量好強大，不過或者畀到人支持嘅並唔係魔法，而係簡單嘅陪伴。

＝＝＝＝＝＝

樂少今日一樣喺SU房當值，呢個時候啱啱同班低Form打完波嘅Sky入咗嚟，因為SU房有冷氣。

「好熱呀，明明都打20分鐘都冇。」Sky趴落張枱。
「你最近好似成日打排球喎。」樂少一路做緊未交嘅數學功課。
「排球好玩呀，特別係同Miss Lui打嘅時候⋯⋯」
「Miss Lui呢排咁忙，班中一仔有人畀老師捉到去網吧打機呀。」
「我諗依家就算Miss Lui佢得閑，都唔會再同我打波。」
「咩意思呀。」

Sky伸一伸懶腰，然後坐返直個人。

「樂少我問你吖，如果你想親近一個人，只係想陪喺佢隔離，但係原來咁已經會傷害佢，你會點呀？」Sky突然間好正經問樂少。
「咁我就會慢慢行開，然後默默支持佢。」樂少答得有啲含蓄。

樂少似乎有啲尷尬，於是又再集中喺自己份數學功課度。

「咁所以，樂少你就慢慢遠離Emma？」
「我只係唔想令佢困擾啫。」樂少講。
「Emma佢，最近好似唔同咗，佢嘅眼神唔同咗。」
「係咩？」

樂少呢幾日都有見過Emma，但係就冇理Emma，每次相遇嘅時候，佢總係搵到某個原因避開Emma。雖然想扮成唔在意Emma，但係內心又始終冇辦法話唔理就唔理。

「原本嘅Emma，眼入面唔會有嗰種空洞，依家Emma佢，就好似一首歌冇咗Bass咁。」Sky講。
「我諗Emma佢一定有佢嘅原因。無論係我定你，都冇辦法改變佢。」樂少講。
「樂少你，真係好關心Emma。」Sky笑笑口講。
「我先唔係呀。」樂少急急腳否認。

呢個時候，Emma入咗嚟SU房。

「係Emma你呀。」Sky同Emma打招呼，「我出去打波喇。」Sky馬上就離開咗SU房。
「哦⋯⋯」

SU房而家就得返Emma同樂少兩個，空氣突然之間變得安靜，令兩個人緊加尷尬。

「係呢⋯⋯Emma，你有事搵SU？」樂少問Emma。
「係呀，我想借Printer。」Emma點點頭講。
「哦。」樂少即刻開電腦，然後set好機畀Emma用，「print VA科啲嘢？」
「嗯。我想印幾張用嚟整陶瓷嘅Reference。」Emma講。
「你開始整陶瓷呀？」
「嗯。我想試吓呀努力做陶藝。」

Set完部機之後，樂少扮成若無其事咁繼續做份數學功課，Emma望住電腦Mon，房入面得返樂少寫字嘅聲，同Emma用滑鼠嘅聲。Printer嘅紙印咗出嚟，Emma拎走佢嘅Reference。

「唔該晒。」
「唔使喎。」

Emma慢慢離開SU房，「係呢⋯⋯我哋仲係朋友呀呵？」Emma走之前輕輕問。
「緊係啦。」樂少笑笑口講，「如果你有需要搵我幫手，我一定幫手嗰種。」

Emma微微一笑就離開SU，淨返樂少喺度⋯⋯

（Tbc.）

74 - 夜晚嘅星星

就算開住冷氣，都係覺得好熱⋯⋯呢個就係六月嘅天氣。六月係一個咩季節？咪考試嘅季節囉，話咁快下個禮拜就係考試嘅時間，所以基本上上堂都唔會輕鬆，肯定係咩都要chur住教晒佢，雖然我對考試成績都唔在意，但係要補考就好麻煩，所以我都係努力少少啦。

頂咗成個下晝，終於都放學，其實Lunch之後我已經冇晒精神，因為我又玩Guitar Pro玩到好夜，想試多啲唔同嘅結他彈法，好彩都頂到最後冇瞓。

「阿錘你，好眼瞓呀？」Sky突然過嚟搵我。
「係呀，你都見我隻黑眼圈好明顯啦。」我講。
「要唔要去音樂室？我想彈結他。」Sky笑笑口咁講。

估唔到Sky會主動搵我去音樂室，我印象中呢個畫面冇發生過，既然係咁，我唯有陪佢啦。

「咁行啦。」我拍吓自己塊面，逼自己堅持多陣。

我哋上到音樂室之後，好熟悉咁插好結他，閂好門。

「做咩咁有興致上嚟彈結他呀？」我問Sky。
「因為我想聽阿錘你彈結他。」Sky講。

吓？聽我彈結他？明明Sky彈得好過我好多喎⋯⋯搞咩呢？

「因為阿錘你嘅結他聲，好有力量。」Sky輕輕咁講。
「我嘅結他聲好有力量？」我唔係好明，係咪即係話我開咗Distortion啲聲好拆呢？

「～我懶到只想夾足一世Band～」Sky突然唱起懶，於是我就彈我本身彈嗰Part。

「我覺得聽一個人嘅結他聲就知道佢嘅性格。」
「真係可以咩？枝枝結他音色都有少少唔同啦，例如你枝Gibson就惡啲，我枝Squier就⋯⋯」
「唔係呢個意思呀。」Sky笑笑口咁打斷咗我。

我印象中，Sky從來都唔會打斷人講嘢，究竟佢想講咩呢。

「如果用心去感受，就會feel到每個人嘅結他聲。阿錘你，試吓掃一個Chord吖。」

我隨手掃咗個Asus2 Chord，因為呢個Chord都算係其中一個我覺得最好聽嘅Chord。

Sky微微一笑：「阿錘你嘅結他聲，除咗有熱血同火之外，仲有一種陪住人嘅感覺，就好似夜晚嘅星星咁。」

「夜晚嘅星星？」

原來Sky係咁睇我嘅結他聲，我諗呢個應該都係一種對我嘅讚美掛。講起上嚟，我又好似明明哋，例如話Sky嘅結他聲，係好自由，就好似一隻雀仔咁，無拘無束咁飛。夏天雪人嘅結他聲就有一種空洞同孤單，好似係城市入面嘅流浪貓，你好似明白佢，但係原來佢又唔會為你而停低。而我⋯⋯係「星星」？因為我個名有個「星」字？

「阿錘你有一種好多人都冇嘅生命力⋯⋯唔係再執著速度同技術，你只要簡簡單單，用心彈就係最好嘅劉星隨。」

Sky永遠都令人摸不著頭腦，一個天才竟然咁樣講我嘅結他⋯⋯

「生命力」⋯⋯

我嘅結他聲入面有呢樣樣嘢？我追求嘅嗰樣嘢，原來就喺我體內⋯⋯

「多謝⋯⋯」我一時間都唔知畀咩回應Sky，所以唯有講多謝。

Sky當場大笑：「果然係阿錘呀。」，Sky呢個傻仔樣，好似比起平時唔出聲嘅佢，更加適合佢。

「係呀，你有冇聽過Beyond首《灰色軌跡》呀？」我醒起想同Sky一齊研究最後段Outro。
「有呀。阿錘你係咪諗緊，想好似段Outro咁玩？」
「係呀，我哋可以一人玩一句，好似合場咁，我覺得比起Double Lead咁樣更加適合我哋。」
「好吖。」Sky笑笑口講。

然後，我哋就一路聽住《灰色軌跡》同其他Beyond嘅歌，發現咗原來Beyond嘅歌有好多技巧可以學，嗰個年代嘅音樂，真係好勁。

「我覺得可以試吓我哋都開Distortion。」Sky同我講。
「咁唔會太似咩？」
「唔會，因為我哋嘅Picking好唔同，觀眾一定分到。」

我哋拎起結他，即刻jam咗一段Solo出嚟，試多幾次之後，慢慢就捉到感覺。果然，就算我哋都用Distortion都唔會撞聲，我同Sky喺Picking同Tone嘅選擇上都唔同，最重要嘅係，我哋內在性格嘅唔同，令我哋彈出嚟嘅嘢都有分別。

「好似好啱做一首憤怒嘅歌。」我同Sky講。
「係呀，好似《我是憤怒》咁。」

Double Lead加《我是憤怒》嘅Feel，諗起都覺得好興奮，好想快啲開始作呀！突然間，我完全唔眼瞓，會唔會係腎上線提升咗呢？

「喂，你哋兩個好返屋企溫書喇。」Miss Lui突然間，打開門同我哋講。

「哦⋯⋯Miss你又知我哋喺度嘅？」我問Miss Lui。
「開到咁大聲，路過就聽到啦。」Miss Lui講。

間房入面有種不協調嘅感覺，Miss Lui喺度喎，Sky竟然冇行埋去，都冇痴住Miss Lui⋯⋯平時唔係咁㗎喎。

「司徒天，幫我手搬疊簿得唔得呀？」Miss Lui問Sky。
「唔好意思呀，我有啲攰想走先，Miss Lui你搵阿錘幫手啦。」Sky同Miss Lui講。

唔係掛⋯⋯呢個真係Sky嚟？平時佢絕對唔會托Miss Lui手踭，點解今日會學我咁借啲意走咗去⋯⋯

「我幫你啦Miss Lui，我都走喇。」見Sky咁樣，我唯有幫Miss Lui啦。

一路拎住疊簿落去，我都冇問Miss Lui，不過Miss Lui就面有難色，仲要係連我都睇得出嗰種，比著其他人一定睇得出啦。

「唔該晒你喎，劉星隨。」
「『雷老師』，你又唔使咁講嘅。」

Miss Lui牽強咁笑咗一笑，好似都冇咩心機。

「快啲返屋企溫書啦。」Miss Lui叫我快啲走。

因為同Sky彈結他，彈到6點，學校都冇咩人留喺度。於是我都準備走人，就喺我行到學校門口嘅時候，我見到毛子蘭。

「Hi。」我同佢打招呼。
「咁夜走嘅，畀老師留堂呀？」
「我先冇留堂呀，頭先係音樂室彈結他啫。同埋我都唔係留好多堂之嘛。」
「我就一次都冇試過喎。」

「超～」

唔知點解，我好自然咁同毛子蘭一齊行，一路上又唔知點解佢可以咩都搵到位串我⋯⋯

（Tbc.）

75 - 地理

終於嚟到咗考試嘅時間，我哋幾個由上個禮拜開始，就停咗夾Band，諗住考埋試再嚟過。我溫書嘅方法係用《最後一分鐘》，但係當然唔係臨尾先睇啦，我覺得只要將呢啲雞精記熟，要合格其實又唔難，而且Drop咗Physics之後，基本上我要溫嘅得返地理，最多就係數學科記一記啲Equation。

同我唔同，樂少係「臨急抱佛腳」嘅代表人物，佢會由頭學過一次要考嘅範圍，所以就要放好多時間去溫書，太一就係「賭仔」型嘅考生，只會溫習自己貼嘅題目，中咗就合格，但係唔中就會炒大大鑊。Sky係「平常心」型嘅考生，唔會特登溫書，保持同平時一樣嘅節奏，令到自己心情輕鬆，咁樣嘅話頭腦就自然會更加清晰。

話咁快，兩個禮拜嘅考試終於結束⋯⋯

首先派卷嘅係中文科，我嘅分數就都算OK，一貫嘅水準，作文嘅成績就好少少。因為Miss Lui好努力教書，同學嘅成績都不知不覺提高咗，連魔人佢哋都由唔合格變成合格，咁已經好好啦，就算最後DSE得2，都唔使嘥多年讀Found Dip。

但係Sky好似有少少失手，落堂之後，Miss Lui捉咗佢出去。

「司徒天，你做咩事呀？你嘅成績應該唔只係咁喎。」Miss Lui用溫柔嘅語氣講。
「我盡咗力喇，不過都係唔得。」Sky無奈咁講。
「咁你再努力啲啦。」Miss Lui講。
「有用咩？又唔係努力就咩都做到。」Sky反問Miss Lui。

Miss Lui面上好似有啲失望：「我都係想你好啲啫，明明可以考高分好多，做咩要咁呀？」
「我都想你好呀。」Sky輕輕講。
「咁你就考好啲⋯⋯唔好擔心埋啲無謂嘢。」Miss Lui講完就走咗。

唔知點解望住Sky同Miss Lui就係覺得有啲唔同咗咁⋯⋯

慢慢各科嘅試卷都派晒，我嘅成績暫時都算OK，全部合格，只要地理都過關，呢個學期就可以安全度過⋯⋯點知喺老師派卷嘅時候⋯⋯竟然係44分⋯⋯雖然份MC合格，但係總平均分，應該都係炒⋯⋯咁即係話⋯⋯我要補考。

補考呢樣嘢，係好痛苦，因為六月尾嘅時候，學校又冇嘢教，個個都係等放暑假，好多時仲唔使返學添⋯⋯但係要補考嘅人，首先要上幾堂「特訓班」，然後再考多一次，變相冇假放⋯⋯頂！差幾分⋯⋯明明MC啱多兩題就冇事，點解會搞成咁㗎。

「炒咗呀？」樂少問我。
「差幾分囉。」我講。
「都叫你學我努力啲啦。」
「我輕鬆合格呀。」樂少得戚咁講。

今次炒地理嘅一共有四個人，除咗我之外，仲有A班嘅Marco同B班嘅大輝、Angel，一諗到要補考我就冇晒心機⋯⋯早知就溫多陣書啦。地理呢科對上一次炒，可能係中四嘅時候，嗰陣我已經知道自問冇興趣讀，可以嘅話我想計地理都Drop埋。

「黑色西炒飯」喺今次考試入面，最好成績當然係Sky啦，樂少今次都全科合格，至於我同太一分別炒咗地理同英文，睇嚟太一麻煩過我，因為英文要補嘅日子多過地理好多⋯⋯

不過既然事件都發生咗，我唯有面對佢，等補考完再算，反正又冇嘢做。

----------------------------------------------

第二日嘅朝早，校長宣布咗個消息，今年七月嘅試後活動，將會舉行好似日本中學文化祭咁嘅活動，同學可以同學校申請搞個攤位，或者做表演都得。我聽到呢個消息，隻眼就發光咁，咁咪即係可以搞Band Show囉⋯⋯仲可以玩幾首歌添。不過同時，校長都附上咗一個條件，就係所有參與嘅學生都必定要補考合格。

「阿錘，咁我哋可以開Show喎。」樂少同我講。
「係就係，但係我同太一要補考合格先得喎。」我講。
「係呀，我英文成日都差幾分，真係激死。」太一講。

激氣，難得有機會喺學校搞Band Show，點知就遇上咗考試肥佬⋯⋯

「咁啦，我照申請，你同太一就努力溫書，唔合格再算啦。」樂少講，因為校長話要填Proposal，呢方面交畀喺SU撈咗成年嘅樂少就冇問題。
「另外，Sky你要教好太一英文呀。」樂少同Sky講。
Sky伸一伸懶腰：「英文好難教㗎喎，睇多啲書就自然會好㗎啦。」

我都唔記得咗，Sky英文堂雖然都係瞓教多，但係因為鍾意睇小說，所以佢嘅英文可能比其他留心聽書嘅人更加好。

「唔該你啦，Sky！」太一懇求Sky教佢英文。
「咁好啦。」Sky答應咗。

不過我都冇時間理太一住，因為我都自身難保，首先我要合格返地理先。返到屋企之後，我將中三開始嘅地理書全部搵返出嚟，由基礎開始學過，我同我自己講，我一定要合格，因為我要搞Band Show。

補考定喺下個星期一，即係6月30號，而文化祭就係7月7號，除咗要溫書仲要留返時間嚟練結他，時間已經無多，我要努力先得。

不過由頭學過地理，真係唔係咁易，原來要背嘅嘢都唔少，因為每次我都係水過鴨背，考完試就算，冇辦法將短期記憶變成長期記憶，就好似彈結他咁，有啲練習日日彈，真係合埋眼都彈到。但係有啲練一兩日就冇再練嘅Licks，就真係第二日都唔記得咗。

呢個時候，樂少喺Group send咗個Message出嚟：「搞掂，校長批咗我哋場Band Show！」

Yes！終於有得搞Band Show，一於將我哋識嘅歌，全部畀晒出嚟！諗到呢到，我又有返動力，繼續用瘋狂狀態溫地理。

（Tbc.）

76 - 我認真起上嚟，連我自己都驚。

「我認真起上嚟，連我自己都驚。」

估唔到我會溫書溫到呢個地步，我將自己由白紙一樣，重新學過所有野，完全唔理時間，好似睇到好睇嘅漫畫咁，一路唔停。我簡直覺得就算而家去考DSE都冇問題，最少都有3，好彩啲話唔定5都有機會。

＝＝＝＝＝＝

補考完咗之後，我望住考完試嘅課室，一啲緊張都冇。因為我都幾肯定呢份卷會好高分，都係戴個頭盔先，應該起碼合格啦。於是，我就即刻約「黑色西炒飯」聽日夾Band。

對而家嘅我嚟講，夾Band先係我正職，返學先係Part-time。上次同Sky研究咗段Double Lead之後，我個腦又有一啲新諗法，所以我又拎起咗部電腦，喺Guitar Pro度整咗個Demo出嚟，今次我想要一個好爆嘅Feel，想燒晒所有嘢嗰種爆炸力。我搵唔到一個可以參考嘅歌畀佢哋聽，所以唯有盡力用電腦還原我腦入面嘅感覺。

整整吓，我就瞓著咗。

第二日，我拎住嗰首得一半完整嘅Demo畀佢哋聽。

「點呀？明唔明個Feel呀？」我問。
「我明係明嘅⋯⋯但係好似⋯⋯好快。」樂少講。
「其實又唔係好快，但係一定要好Full先有Feel。」太一講。

咁睇嚟太一明白我想要嘅效果，我想要要成首歌好密，冇一刻停止嘅感覺。

「好似幾好喎，結他交畀我啦，阿錘你盡量掃個底就可以，Solo嘅時候Double Lead一定好正。」Sky講，唔知點解佢一講就令我好放心。
「不過詞方面，我仲未填。唔知趕唔趕得切呢。」
「夾好先囉，詞你可以再唱落去吖嘛，好似上次首歌咁。」樂少講緊嘅係《蘭》。
「係呀上次首歌，我想叫做《Special Thanks》，你哋覺得點呀？」我問。

《Special Thanks》故名思意，就係特別感激，我想同每一個幫過我，幫過我哋嘅人，好好咁講句多謝。

「OK喎。」太一講。
「幾好吖。」樂少講，「估唔到你會改英文名。」
「嗯，同份詞都幾啱。」Sky講。

就係咁，《蘭》變成咗《Special Thanks》，我將我想講嘅都寫晒喺份詞入面，希望可以唱好佢啦。

第二日返到學校，今日已經係試後活動日，但係因為主力都係搞活動比班低Form，我哋呢啲高年級學生就可以自由活動，基本上每年啲人唔係打波就捉棋，其實都幾悶。可惜我哋呢啲要補考嘅學生就唔同講法，因為老師已經改好補考份咗卷，如果再炒多次，就有機會冇得升班，雖然最後都會用「試升」嘅名義，畀我哋升上去，但係就要再考多次「補補考」，本身個名好似唔係咁叫，但係因為我冇呢方面嘅經驗，所以就唔知喇。

太一都過咗嚟我哋班，因為佢話好緊張，驚英文會又炒。

「驚咩吖，我聽講份卷易過本身嗰份好多。」我同太一講。
「係啫，但係都係會驚㗎嘛，冇得出Show點算喎，我哋咁努力練。」太一講。

太一呢種緊張，唔係出自怕再「補考」或者要留班，係驚我哋冇得玩Band Show⋯⋯呢樣我都有擔心過，如果好似以前咁，我最多都係返嚟考多次試，再唔係就Drop埋地理，因為DSE都係計Best 5啫，但係而家，我唔合格就冇Show出，所以我先搏晒命去溫書，雖然我嘅短期記憶，去到今日已經有一半冇咗，但係我對份補考卷都係好有信心。

「唔使驚喎太一，搖滾之神一定會保佑我哋嘅。」我講。
「咩搖滾之神呀？」太一講。
「比喻嚟啫，全世界嘅信念集合一齊就係神，所以有信念就會合格！」我應該係將唔知邊套漫畫對白套咗落去。
「太一你，唔使驚喎，你本身英文都唔差，你只係成日串錯字，Grammar又唔啱啫，聽完我講用簡單嘅Tense就冇事啦。」Sky舉起Peace Sign講。

「冇錯喇，合格之後，我哋就搞Band Show，然後就出碟，再出Show，再出碟，開埋演唱會 ！」我同佢哋講。
「吓咁快？」樂少講。
「而家緊係唔得啦，未來會得嘅。」我講。
「仲要開世界巡迴演唱會添呀！」太一好熱血咁講，睇嚟已經唔緊張。

「咁如果你哋撞彩合格，我哋玩咩歌呀？」Sky講。

我哋有溫書㗎，點都唔會係撞彩啦。

「玩晒佢囉，應該《自動勝利》同《黃金入球》一定玩，Magic And⋯嗰首《Somehow you just don't belong》。同埋我哋原創嘅《懶》同《Special Thanks》。」我興趣咁講，「5首差唔多啦。」

「仲有我哋首Double Lead呀，阿錘你努力啲寫埋份詞啦，咁我哋就有六首歌玩。」Sky講。

六首歌都唔算短，差唔多係一個Session嘅時間，真係好呀，好想快啲玩。

終於到咗派卷嘅時候，因為補考卷唔會講解題目，最重要係知結果，所以無論考咩科嘅學生都會去禮堂等派卷。

派卷會跟返班級同學號嘅先後派，我係D班，自然就係最後先派。照目前嘅情況睇，每個人嘅樣都好輕鬆，應該大部分人都合格啦。跟住就到太一拎卷，佢好緊張咁行出去，凝重嘅樣隔咗幾尺我都feel到。

太一拎到份卷之後，激動咁跪低咗⋯⋯唔通，佢又炒咗？我即刻行埋去：「又炒咗呀？」

「唔係呀，係終於合格呀。」太一差啲喊出嚟。
「咁你又咁嘅樣，嚇死人咩。」
「感動吖嘛，終於合格。」

話咁快就到我，雖然由考完嗰一秒開始，我就驚都冇驚過，但係到準備拎呢一刻，原來都係會緊張。

老師派份卷畀我之前，輕輕「唉」一聲，吓⋯⋯唔通我炒？

我拎咗份卷，望住右上角嘅分數，雙眼睜大，我完全嚇親⋯⋯

竟然有成75分⋯⋯呢個分數，連我老師都驚。

「你再考好少少有機會拎到5㗎。」教地理嘅吳老師講。

都話「我認真起上嚟，連自己都驚啦」，呢個分數係我考過咁多份地理卷入面最高分嘅一份。

而家我同太一又合格，即係Band Show可以如期舉行啦，一於Rock爆佢！

（Tbc.）

77 - 意識不良

距離Band Show仲有三日嘅時間，回望返呢一年，發生咗好多事。「黑色西炒飯」嘅出現，令我搵到自己嘅想做嘅事，從來唔敢唱歌嘅我，竟然會成為咗隊Band嘅主音，拎起咗枝結他我就唔想放低，其實有Band夾就已經好開心。呢一場Show無論咩事都好，我都要玩好佢。

為咗準備好表演，我哋呢幾日都去咗The Echo加操，首先三首Cover歌就玩到好熟，原創嘅《懶》同《Special Thanks》問題都唔大，但係新作嘅「Double Lead」進度就唔想理想。樂器嘅編排上，太一將自己識嘅嘢都用晒喺首歌度，而且用咗Double Pedal，但因為唔熟，所以拍子未夠穩，樂少都將自己嘅速度提升咗，令到歌嘅底好Full。

Sky幫我彈咗好多結他上嘅嘢，令我幾乎淨係彈Power Chord就OK，可以專心喺唱方面。

「阿錘，份詞搞唔搞得掂呀？」樂少問。
「我諗得嘅，而家都有一半喇。」我講。
「我哋算壓軸表演㗎，嗰日返半晝，我哋嘅表演時間係十一點半嘅禮堂，完咗就放學喇。」樂少講。

原來我哋係壓軸表演，睇嚟就算要通宵我都要寫好份詞先得。

然後經過咗三日嘅練習，所有歌都準備就緒，一切就等聽日嚟到。

＝＝＝＝＝＝

7月7號 文化祭

今日學校冇堂上，同學可以自由喺學校活動，有唔少同學都報咗名想搞攤位，有同學賣曲奇餅，有同學寫書法，有人搞捉圍棋嘅挑戰，原來咁多人都有唔同興趣，咁真係好難得學校畀呢日啲同學玩。

「激情對話」班人都申請咗搞個攤位，係「搞笑大賽」，即係每人講一個笑話，然後佢哋會評分同睇現場表現決定邊個係冠軍。我見都有唔少人排隊參賽，估唔到「搞笑」都咁有市場，真係犀利。

但係人氣最高嘅一定係「占卜星相靈異與魔法學會」，本來都已經成日有人排隊要甜豉油幫手占卜，而今日更加係誇張，人龍可能係平時嘅兩倍，真係唔知甜豉油點算，肯定有排占卜。毛子蘭就唔喺度，應該係做Prefect要當值掛，開始咗冇耐Simmy個樣就好攰，不過我諗太一都會去幫吓手嘅。

今日好多嘢都係學生會負責，所以樂少一早就唔知去咗邊度忙，Sky就同平時一樣搵咗個位瞓，而我⋯⋯就好努力匿埋喺圖書館，因為我份歌詞仲未寫完。點算好呢，過多幾個鐘就表演，但係詞都仲未有，我諗住喺圖書館閉關一陣。但係呢個時候，我突然醒返起本「神書」，自從我續借次數到咗上限，老師就唔畀我再續借，迫於無奈之下，我還咗本書。我有一種直覺，覺得只要搵到「神書」，我就會寫到份詞。

果然，「神書」都仲係冇人借，我即刻就搵到，我揭開寫歌詞嗰版，睇返佢記錄低嘅嘢。佢提到一個重點，係「LOYALTY」，意思係要忠於自己，歌詞要寫自己嘅想法，唔係人哋嘅想法。其實呢啲我都明，但係我而家就算忠於自己都冇用，因為最近好似都冇Input，咁又點Output到自己嘅想法喎。

我再睇多咗陣本「神書」，喺第41頁寫住一句好奇怪嘅嘢－「你是女神，而我是雪人，拿掉靈魂，留下水份也是永恒。」

押晒韻，但係又唔知講咩⋯⋯

「雪人」？

唔會咁啱得咁橋係「夏天雪人」掛⋯⋯不過計返時間⋯⋯2003年Silas應該係喺度讀喎⋯⋯唔通⋯⋯

「阿錘！」有人大叫我。

我回頭一望，原來係樂少走咗嚟圖書館搵我：「原來你喺度。」
「咩事呀？」
「大鑊呀，副校長唔畀我哋搞Band Show呀。」樂少講。
「吓？點解呀！」我當堂嚇一跳。
「佢話我哋聲量過大，同埋驚我哋意識不良會影響同學。」

咩呀？我哋之前都喺禮堂夾過Band啦，都冇人投訴，仲有咩意識不良呀？80年代呀？

「等我去同佢理論啦！」我即刻衝咗出圖書館。
「冇用㗎，你知副校長個人幾專制啦。」
「個老女人係咪想玩我咋？佢肯定係因為上次海報件事，想報仇。」
「都可能係嘅，但係依家校長又去咗英國交流，間學校佢最大。」

弊，而家校長唔喺度，冇人撳到個老女人。但係我哋練咗成年，冇理由喺度畀佢Stop我哋。咪住，突然靈感到，我個腦好似浮緊首歌詞出嚟⋯⋯

「阿錘！」樂少叫我。
「我哋仲有咩方法可以做呀？」我問。
「照爆入去禮堂囉。」樂少冇咩情緒咁講。
「吓？認真咩？」

「入咗禮堂，佢都可以唔畀人入去聽啦。我講笑啫。」

我哋四個會合咗，簡單咁總結情況。

「總之而家，何副校就唔畀我哋去禮堂唱，我哋一係照闖入去，一係就同佢對質。」我講。
「當面對質啦，最多咪開細聲啲囉，仲有咩意識不良啫，我哋夾Band又唔犯法！」太一好嬲，聽到佢嘅語氣就知道。

我哋即刻就衝上去教員室，點知有老師就話副校要開會，唔得閒見我哋。

「豈有此理！咁即係迫我哋爆入禮堂啫。」太一講。
「開咩會呀？我哋而家就去會議室！」我躁躁哋。
「阿錘、太一你哋冷靜啲啦。」Sky冷靜咁講。
「但係冷靜咗又可以點做喎。」我講。

「我哋放棄喺禮堂開Show啦。」Sky講。
「吓？咁即係妥協，然後唔出Show呀？」
「我係話唔喺禮堂夾Band啫。」Sky笑笑口咁講。

喺呢個時候，我仲未知Sky諗咩，但係呢個天真無邪嘅笑容背後，好似隱藏住一個陰謀咁。

（Tbc.）

78 - 革命

因為副校長唔畀我哋開Band Show，而理由係完全唔合邏輯嘅「意識不良」，我哋幾個當然唔會就咁乖乖聽話走人啦。我哋要搞革命，但係要秘密進行，Sky講咗佢個計劃畀我哋聽，聽完之後我就嚇親，心諗「唔係要玩咁大呀嘛」。

要實行呢個計劃，首先要有足夠嘅人手，所以就交咗畀太一負責，我哋要佢去「占卜星相靈異與魔法學會」幫手宣傳，順便叫班同學一齊支持我哋。第二步就係確保器材冇問題，而器材就喺晒音樂室，副校佢呢隻老狐狸，已經叫咗強哥鎖門，我哋要有鎖匙先開到音樂室，呢方面就由Sky解決。仲有就係電嘅問題，我哋決定喺SU房偷電，但係仲要幾個拖板，呢樣嘢就交畀樂少。而我嘅任務竟然係⋯⋯拉攏班Prefect？

＝＝＝＝＝＝

Prefect相等於學校裡面嘅警察，每次想搞事之前都會有人報串，然後計劃失敗。所以必定要先拉攏班Prefect，而我要拖住班Prefect得一個方法啫，就係靠毛子蘭。因為基本上今年嘅Head Prefect已經光榮引退，而家學校入面實權最大嘅學生就係下屆嘅Head Prefect，即係毛子蘭。不過以佢嘅性格，我哋搞咁大單嘢，佢冇可能加入我哋，佢一定會企喺學校嗰邊，所以我唯有盡力說服佢⋯⋯

冇幾耐我就喺5樓見到佢，我慢慢行過去。

「做咩呀你？」毛子蘭問我。
「冇咩嘅，想你幫個忙啫。」

我將我哋嘅計劃講咗畀毛子蘭聽，其實都幾冒險，萬一佢最後選擇企起副校嗰邊，我哋嘅計劃就會失敗⋯⋯

「吓？咁大陣仗。」毛子蘭聽完覺得好誇張。
「冇辦法啦，我哋冇其他選擇喇，所以搞革命。」
「你做咩話畀我知呀？唔驚我報畀副校知咩？」
「因為我信你囉。我信你會做你認為啱嘅事。」

我見毛子蘭好似應承咗，就急急腳準備去幫佢哋手。

「我去搵佢哋呀，佢哋要我幫手。」
「嗯。」

行咗幾步，我停低回頭望住毛子蘭，「如果我哋開得成場Show，你一定要聽呀。」我講完就跑去搵佢哋。

＝＝＝＝＝＝

嚟占卜嘅人流仲喺好長，太一幾經辛苦先入到去占卜壇搵甜豉油。喺甜豉油幫同學占卜完之後，太一就即刻開始拉客。

「Hello，同學，記得一陣留時間聽Band Show呀。」太一好熱情咁同嚟占卜嘅同學講。
「吓？Band Show？今日？」占卜嘅中四同學問。
「係呀，時間地點一陣會公佈嘅。」太一講。

占卜嘅中四同學好似覺得太一太奇怪，連甜豉油嘅分析都未聽完就好快走咗。

「你哋搞咩呀，點解要拉客嘅？」甜豉油問。
「副校話唔畀我哋開Band Show呀。」
「但係學校唔係批咗咩。」
「咪就係咁先嬲囉，我同阿錘好努力補考先合格㗎！」
「我幫你哋占吓開唔開得成啦。」甜豉油拎起塔羅牌。
「唔使！我今次要掌握自己嘅命運！」太一即刻阻止佢，「唔係占卜講我得我先做，係我做咗先有機會得。」

太一之後繼續努力拉客，務求要多啲同學一齊支持「黑色西炒飯」嘅革命，佢把握人排隊嘅時間，即刻喺佢哋隔離推銷。

太一出去之後好快有人嚟占卜，「師姐，我點先可以好運啲呀？」嚟占卜嘅低年級同學問。
「你今日有啲麻煩喎，可能要聽啲好大聲嘅音樂，例如聽吓Band Show咁啦。」甜豉油同嚟占卜嘅同學講。

＝＝＝＝＝＝

樂少喺Su房拆咗幾個2米長嘅拖板，「唔夠長喎。」樂少自言自語講。之後，樂少走勻全學校都未搵到一個夠長嘅拖板，佢垂頭喪氣走到去VA室，樂少輕輕敲門，然後入到VA室。對樂少嚟講，佢已經兩年冇入過VA室，感覺都有少少變化。呢個時候VA室一個人都冇，但係就開住燈，樂少即刻檢查電位，睇吓有冇用到嘅拖板。

VA室入面有個燒陶瓷嘅地方，樂少見有燈就打開門。

「嘩！」
「唔好意思呀。」

喺窯隔離嘅係Emma，佢啱啱準備擺陶瓷入去就畀打開門嘅樂少嚇親。

「唔緊要，你又喺度嘅？」
「一匹布咁長呀，總之我依家要搵一個好長嘅拖板，唔係就冇Show玩。」
「拖板？嗯⋯⋯拖轆得唔得呀？」
「係喎，拖轆咪得囉，我使咩諗咁多呀。」
「拖轆嘅話，我記得出面大櫃有㗎。」

Emma走咗出去，逐個逐個大櫃打開，細心搵拖轆。冇幾耐之後，Emma就搵到一個積晒塵嘅拖轆。

「嗱，搵到喇。」
「唔該晒呀，好彩有你咋。」
「你試吓有冇電先好用喎。」
「嗯。」樂少拎起咗個拖轆。

「你有事我一定幫喎，我哋係朋友吖嘛。」Emma微笑住同樂少講。
「一陣記得嚟睇喎。你會知喺邊開Show㗎。」

----------------------------------------------

計劃嘅發起人Sky，偷偷哋潛入學校教員室，一直鍾意睇小說嘅Sky一早就想試吓呢種間諜任務，所以先主動請纓入嚟教員室。不過今日唔使上堂，所以好多老師都留咗喺教員室，Sky嘅行動就有啲奇怪。

「司徒天，你喺度做咩呀？」Miss Lui啱啱喺茶水間沖完杯咖啡出嚟。
「我有啲事要搵Miss Fong呀。」Sky笑笑口講。
「Miss Fong帶隊出去呀，你搵佢咩事呀？」
「有啲音樂嘢問佢啫，我去留張Memo畀佢得㗎喇。」Sky扮成一個好學嘅學生。
「佢嗰位喺嗰邊呀。」Miss Lui指示Miss Fong嘅座位。

Sky慢慢行過去，然後扮寫低一張Memo紙，雙眼暗地裡不斷掃視音樂室條鎖匙。佢眼角望到鎖匙就放咗係一個架仔度，Sky再望一望左右，靜靜咁拎走咗條鎖匙。

「咦，你咪司徒天，呢度你唔入得嚟喎，咩事呀。」呢個時候曹sir發現咗Sky。
「我⋯⋯」Sky一時口窒。
「佢搵我㗎。」Miss Lui講，「佢中文科成績差咗，我咪諗住幫畀幾份卷佢操囉，你出去等我啦。」

好彩Miss Lui及時嚟解圍，Sky先冇畀曹sir發現。

「拎條鎖匙做咩呀？」Miss Lui喺教員室出嚟問Sky。
「Miss Lui你，扮唔知得唔得呀？」Sky講。
「扮唔知？我係你老師呀。我唔可以畀你做錯嘢㗎。」Miss Lui有少少激動。
「我夠唔想你有麻煩啦！」Sky好大聲咁同MissLui講，情緒顯得好激動，「今次你就當唔知啦。」

Sky轉身走人，只係留返Miss Lui一個喺走廊。

（Tbc.）

79 - SM58

我哋幾個好快就嚟到咗音樂室門口，仲帶咗一班低Form排球隊嘅𡃁仔準備幫手搬嘢走，都係多得我哋平時有同佢哋練排球，而家佢哋都算係幾支持我哋呢幾個師兄。

Sky拎住條鎖匙上到嚟音樂室，瀟灑咁將條鎖匙拋咗畀我。我即刻就打開音樂室嘅房門，然後就好似我哋計劃咁將所有AMP同鼓搬走。

因為費事驚動到老師，我哋決定行樓梯，雖然拎咁多嘢行，真係好重，不過都冇辦法啦。搬走AMP係最輕鬆，因為方形算係易搬，班低Form兩個人一組輕鬆搬走，鼓就難搞啲，始終體積太大，太一同樂少一齊搬Bass Drum，其他人就一人拎一個Crash同Hi-hat。

「弊，今次出事。」我突然間發現咗個大問題。
「咩事呀？」Sky問我。
「冇咪呀。」

因為音樂室嘅Mic用無線電，但係接收器鎖死咗喺櫃入面，我哋就算搬走個AMP都冇用。

「照搬走個咪Amp先啦，咪一陣再搵啦。」Sky講。
「唯有係咁啦。」

我同Sky夾手夾腳拆咗音樂室個咪Amp再搬走，10分鐘內音樂室嘅所有樂器畀我哋搬走晒。

如果係一年前嘅我，又點會諗到我竟然為咗一場Band Show犯晒所有校規。今次呢件事，其實都幾癲，記缺點肯定走唔甩，不過我哋已經預咗，對於幾個Band仔嚟講，做Live就係生命，而且面對副校長嗰啲完全唔合理嘅理由，我哋冇可能接受，所以大家都盡一切努力，要搞好我哋嘅Band Show。

我哋將所有嘢放晒喺SU房，再同班師弟講咗啲器材要點set，等到十一點半，我哋就咩都唔理照唱，而且一切都要夠快。

「聽住，一到十一點半就將所有嘢搬出去籃球場。」我同所有人講。

冇錯，我哋嘅計劃就係喺籃球場開Band Show，我哋會喺SU房駁拖轆拉條電出去，然後各自接通自己嘅Amp，同時利用人海戰術，擋住會議室嘅路，等副校長出唔到嚟叫停我哋，但係要做到呢個人海，就必須喺第一首歌留住大量同學。

「咁我哋第一首歌唱邊首呀？」太一問。
「《自動勝利》或者《黃金入球》啦，多啲人識呀。」樂少講。

的確，要留住觀眾，唱一啲大家都識嘅歌係最有用，我哋準備嘅六首歌入面《自動勝利》同《黃金入球》係最多人識。

「我想唱新歌呀！」我講，我指嘅係啱啱仲未填好嘅嗰首歌。
「但係你填好喇咩？」樂少問我。
「嗯。應該算填好。」頭先有一剎那，我個腦浮現咗幾句出嚟，我覺得我已經可以。
「但係我哋仲未完整夾過喎，擺最後係咪穩陣啲呀。」太一講。

我都明白嘅，不過我有一種直覺，呢首歌一定留得住觀眾。

「既然阿錘咁講，就用呢首啦，歌名係咩呀？」Sky問。
「《忍樣》。」我講。

呢首《忍樣》，好明顯就係食諧音，班同學聽到就一定會覺得好奇，然後留低聽。我想將我對副校長嘅憤怒同對呢個世界嘅不滿都唱出嚟。

「係喎，咪嗰度點算呀？」樂少問。
「我試吓問李sir借啦。」我講。
「但係我哋要3枝咪喎。」樂少講，「用Canteen嗰Set得唔得呀？」
「Canteen個Set同音樂室一樣鎖死咗。」

於是我就上咗去搵李sir，佢今日喺4樓帶緊個活動。唔知佢肯唔肯借呢，始終呢啲事畀副校知道，佢都會好麻煩。

「咩事呀隨兄。」
「李sir，我想問你借枝咪。」
「借咪？做咩呀。」
「係咁嘅⋯⋯」我將我哋個計劃講咗畀李sir知。

「咁大單嘢，畀副校長知道我好難做喎。」
「所以咪淨係問你借咪囉。」
「等陣啦。」李sir落咗去教員室。

「枝咪依家係你嘅，唔關我事。」李sir畀咗枝咪我。

呢枝咪唔係平時佢上台用嗰枝冇牌子嘅咪，係一枝SM58。SM58係一枝專業歌手演出都會用嘅咪，可以話係Live嘅必備咪，估唔到李sir竟然會收埋一枝。

「以前買落嘅，擺喺到備用啫。嗱，記住枝SM58係你嘅，唔關我事。」李sir返咗入去繼續帶活動。

李sir就係咁，明明撐我哋又唔講，不過都明嘅，老師份工都唔易打。但係就算有咗枝SM58，都仲差兩枝咪，點搞好呢。

我拎住枝SM58落去SU房，太一同樂少都喺度，Sky就唔見咗。

「阿錘，點呀？」樂少問。
「原來李sir有枝SM58， 但係我哋而家都仲差兩枝。」我講。
「偷Prefect房嗰枝有冇得諗呀？」樂少講。
「好過冇嘅。」

「咁我去拎啦，你同小蘭講聲。」

Prefect組枝咪啲聲好差，平時早會嗌咪就係用呢枝，不過都好過冇嘅。雖然係就係主音有咪最緊要，但係冇Sky同樂少和音就差啲，所以都冇辦法啦。

「Sky呢？」我問。
「好似上咗去一樓還鎖匙呀。」太一講。
「要開始喇喎，佢仲上教員室？」我擔心Sky唔知時間。

＝＝＝＝＝＝

Sky為咗本身打算去教員室還鎖匙，但係中途就喺樓梯遇到Miss Lui。

「司徒天。」
「Miss Lui。」

「拎住啦。」Miss Lui交咗一枝咪畀Sky，「我見李sir鬼鬼鼠鼠，問兩問佢講晒畀我知喇。呢枝咪都OK㗎，你用啦。」

「唔⋯⋯該。」

「唔使驚我有麻煩呀，條匙我幫你還啦。」

Sky交咗條匙畀Miss Lui。

「Miss Lui你⋯⋯一陣記住睇呀。」Sky有啲緊張咁講。

Sky拎住Miss Lui枝咪落到嚟SU房。

就係咁「黑色西炒飯」就預備好晒表演用嘅器材，而家只係等待時間到。 

（Tbc.）

80 - 《忍樣》

「Yeah，我搵到咪喇。」Sky講。

Sky笑笑口咁拎住枝咪出現，我認得枝咪好似係Miss Lui用開嗰枝，不過係邊個都唔緊要啦，我哋而家要做嘅就係佔領籃球場。

「好啦，大家準備好未？」我問班低Form，「數三聲就照計劃衝出去。」

「三、二、一！」

一數完，班低Form同學就幫手搬啲器材出去，我哋就拎住啲樂器同埋線出去，其實畫面都有啲狼狽。不過多得佢哋幫手，好快就搬好晒啲嘢。太一嘅鼓組係最快搞掂嘅，佢自己再微調咗少少位就OK。雖然有拖轆，但係因為Amp嘅線好短，我哋係每人再駁咗個拖板再駁喇叭。而負責人聲輸出嘅喇叭就set咗喺我哋後面，我哋借咗Canteen個Mixer，然後我將3枝咪再經Mixer，傳去喇叭，咁就可以做到同時出3把聲。

圍觀嘅同學見到我哋咁大陣仗，個樣好似好神奇咁，特登望多兩眼。呢個都正正係我嘅目的之一，就係要盡量吸引觀眾。由於冇一個特定嘅舞台，觀眾同我哋嘅距離都好近，我見開始有人聚集，於是我就開始我嘅MC。
「Hello，各位同學，我係5D班嘅劉星隨，呢度有彈結他嘅司徒天、彈Bass嘅關志樂、打鼓嘅張太一，我哋係『黑色西炒飯』。」呢句嘢今年都講咗好多次。

「本身我哋會喺禮堂表演，但係因為副校長話我哋『意識不良』唔畀我哋喺禮堂表演。」

「但係我哋決定咗今日無論如何都要表演！所以而家喺籃球場呢度唱！送畀大家《忍樣》！」

《忍樣》嘅前奏係我哋準備嘅歌入面最嘈嘅一首，我都有少少擔心啲同學會接受唔到，但係太一嘅鼓聲好快就已經好似戰鼓咁敲響咗成間學校，Sky嘅結他聲亦都引起咗大家嘅注意，留意我哋嘅人即刻多咗。

 「～我已試過太多次退讓過～」

雖然份詞真係啱啱先出現，冇時間畀我改，不過事到如今⋯⋯唯有照唱，要信任我哋嘅音樂。

 「～再退我怕養出最壞惡魔～」

慢慢人流愈嚟愈多，圍觀嘅同學企晒出嚟走廊睇。多得「激情對話」班人叫囂，現場氣氛都慢慢炒起，講起上嚟，呢次都好似係第一次喺佢哋面前表演。自從開始夾Band之後，真係同佢哋疏遠咗，不過咁又唔代表我哋唔Friend，我都會繼續支持佢哋做啲無聊嘢。

「～太多忍讓太多太多忍樣～」

唱到副歌，今日呢個「忍樣」好明顯就係講副校長，但係更多嘅係想講呢個世界上嘅「忍樣」，永遠為求私利就傷害其他人。

唱到呢啲諧音粗口，班同學嘅反應話咗畀我聽，佢哋好興奮，但係隨住人數愈嚟愈多，開始都有班老師出嚟睇。

「～我都忍讓 堅守我嘅思想～」

呢個時候，班老師都只係睇緊，暫時未有行動，我見到4樓嘅李sir都有出嚟望吓我哋。

嚟到中間我最期待嘅Double Lead Solo，我同Sky已經練咗好耐，呢段好似對話咁嘅Solo，需要兩枝結他喺好相近嘅情緒先做到，睇嚟今日Sky同我係一樣咁嬲。

呢一年入面，我哋4個都成長咗好多，特別係Sky，自從走出咗陰影之後，佢每次彈結他都令我嘆為觀止，呢次嘅Solo都唔例外，但係既然佢講過我只要用心彈就可以，咁我就簡簡單單咁彈，做最好嘅劉星隨。

「～可惜你卻編造假象 裝著高尚刪掉音量～」

呢個時候，我留意到一樓開始有啲吵雜聲，可能副校長已經開完會，唯有希望班師弟頂到。

「～叫我怎樣虛偽的在忍讓～」

「啪啪啪啪！」我哋唱完第一首歌之後，觀眾嘅第一個反應係好大嘅掌聲。

我唔係未聽過全校一齊拍手，每次週會校長致辭之後，同學都要拍手，但係每次都係冇咩力，今次就係所有人都好畀力拍手。

食住個勢，我哋開始唱3首Cover歌，分別係《黃金入球》、《自動勝利》、《Somehow you just don't belong》，慶幸嘅係各位同學都好enjoy，似乎因為認識首歌，所以特別投入，好多仲跟住一齊唱，呢個氣氛真係好正。

「劉星隨！」、「關志樂！」、「司徒天！」、「張太一！」

開始有我哋嘅朋友大叫我哋幾個嘅名⋯⋯好感動，眼淚好似想湧出嚟咁，以前每次畀人大叫個名，都唔係咩好事，唔係某個老師叫我唔好瞓教，就係叫我去罰企⋯⋯今次佢哋叫我係支持我，代表我嘅音樂終於有人欣賞，呢一年嘅努力冇白費過⋯⋯

「～我懶到只想夾足一世Band～」

《懶》作為我第一首寫好歌詞嘅歌，某程度上都代表住最真實嘅我，我想夾Band，而且要夾一世，就算咩都唔做，我都夾Band！或者喺某啲人眼中，我的確係懶懶閑嘅一個壞學生，但係我有我存在嘅意義，我有我嘅目標同理想。

「黑色西炒飯！」估唔到連團名都有人嗌。

「多謝各位！跟住落嚟係我哋最後一首歌！歌名叫《Special Thanks》，我想多謝每一個幫過我嘅人，同埋畀靈感我寫嘅呢首歌嘅人。」

呢一刻，我嘗試喺茫茫人海入面搵出毛子蘭，不過完全睇唔到佢，不過佢一定喺度睇緊。

正當我哋準備唱嘅時候，學校嘅廣播突然間響起⋯⋯

「喺籃球場嘅同學即刻離開，喺籃球場嘅同學即刻離開，喺籃球場嘅同學即刻離開⋯⋯」
呢把聲係何副校⋯⋯

（Tbc.）

81 - 《Special Thanks》

弊喇，竟然喺呢個時候被副校嗌咪，但係我哋就差一首歌咋喎，我絕對唔可以喺呢度停。

「咁點算呀。」太一講。
「照唱埋佢啦，反正差一首啫。」Sky講。
「但係依家佢咁開咪法，好影響喎。」樂少講。

真係好麻煩，學校嘅廣播系統覆蓋晒成間學校，但係我哋而家嘅音響最多都係走廊同籃球場嘅同學聽到，點算好呢。

「如果有人繼續留喺籃球場將會被記一個缺點，我重覆繼續留喺籃球場嘅同學將會被記一個缺點。」副校長繼續開咪叫人走。

出到「記缺點」咁惡⋯⋯呢吓一定嚇走好多人，點算好呢⋯⋯

果然喺副校長嘅威脅之下，有好多同學慢慢離開咗籃球場，當有第一個人走，就會有第二個跟住走⋯⋯但係我唔可以畀呢次就咁結束，諗辦法啦劉星隨！

「所有人即刻離開籃球場⋯⋯所有人⋯⋯」副校長枝咪，好似突然冇咗聲，唔通PA系統壞咗？

我冇理咁多，我把握呢個空檔，即刻講嘢：「各位同學，如果你想而家離開嘅話，絕對冇問題。但係我哋『黑色西炒飯』喺唱完呢首歌之前，絕對唔會走！」

「我知一定有人唔想聽我哋唱，但係只要有一個人聽，我哋就會繼續夾。」

我望住我嘅隊友，大家都諗緊同一樣嘢，我哋知道咁多人裡面，一定有人想繼續聽，一定會有人感受到我哋嘅音樂，我要好好多謝呢啲人。

隨住太一四吓嘅Hi-hat，我哋開始彈《Special Thanks》，前奏一響起，突然又好似充滿力量咁。樂少、Sky、太一，對於我嚟講，佢哋三個係我最想多謝嘅人，冇佢哋我都冇辦法組成到「黑色西炒飯」，呢一年做咩都一切，呢一份友情會成為我回憶入面最寶貴嘅嘢。

雖然始終都有同學走咗，不過留守嘅人同埋喺走廊聽嘅人都仲有好多，我會繼續唱，為咗佢哋唱。

「～這次還有點怯慌 猶幸總算有你給我護航～」

我嘅歌詞或者寫得冇人哋咁優雅，但係我想誠實咁寫出我自己嘅諗法。

「～無事無刻糊塗地莽撞 但因有你撐不會陣亡～」

其實我哋都算幾亂嚟，都唔知點解會夠膽冇通知學校就喺籃球場開Band Show，都唔知最後會點收科，記一個缺點？定係要見家長呢？如果見家長就麻煩喇，特別係太一，如果畀佢阿爸知道我哋搞咁大單嘢，話唔定太一又要離家出走多次。

「～但現在 別理任何謾罵 就停留在我身邊好好聽我唱歌～」

嚟到Pre-Chorus，依然冇人阻止我哋，一於繼續上，後果，遲啲再諗啦。

「～只因我想對你講～」

講起上嚟，明明本身想寫一首情歌，但係就變咗而家呢個版本，可能多多少少都因為毛子蘭掛。我知你聽到㗎，呢啲係我想講畀你聽嘅嘢。

「～想起你在我身邊 我就斗膽去挑戰～」
「～所有記憶 能留低到下世紀～」

由初初令我明白到點樣熱血去唱嘅「芝士蛋糕論」，教我望住熟悉嘅嘢嚟唱，然後幫我練好英文咬字，每我怯場嘅時候支持我⋯⋯仲有太多太多次，原來一直都係毛子蘭，多謝你喺我身邊出現⋯⋯

「～感激你在我身邊 竭力的給我打氣～」
「～最好的你從來不會掉低我 我想說謝謝你～」

毛子蘭，我想特別多謝嘅係你。

「多謝大家！我哋係『黑色西炒飯』！」

「啪啪啪啪！！！」呢啲全間學校，同時發出嘅掌聲。

終於唱晒六首歌，好滿足⋯⋯學校走廊全部都係人，有同學有老師，籃球場上面都依然有好多同學喺度。

就喺呢個時候，何副校終於出現，佢喺人群裡面大呼小叫，叫人讓開先行到過嚟我哋度。

「劉星隨！關志樂！司徒天！張太一！我要即刻記你哋四個大過同埋見你哋家長！」副校長呢個時候塊面已經露晒青筋。

唔緊要啦，不過大過又真係估唔到佢咁重手，都預咗係呢啲嘢，所以我哋四個互相望一望大家，然後就得啖笑。

「等陣呀，副校。」Miss Lui同李sir走咗過嚟。
「咩事呀？」副校嬲爆爆講，應該係見我哋笑笑口，所以仲嬲啲。
「校長打嚟。」Miss Lui畀咗個電話副校。

如果今日校長喺度就好，平時佢一定會撳得住副校，咁我哋就唔使冒咁大風險搞咁多嘢。

「副校長，聽講『黑色西炒飯』擅自偷音樂室器材，呢啲真係要鬧，你記佢哋大過我唔反對。」校長通過電話同副校講。
「哈哈，咁就好喇。」副校哈哈大笑。

吓？估唔到校長竟然會咁講，又話自己以前都夾Band⋯⋯唉⋯⋯

「不過呢，佢哋又真係做咗場好精彩嘅表演，算係送咗份禮物畀努力咗成年嘅同學啦。咁我記佢哋一個大功啦。」校長講。

嘩！記大功？我真係諗都冇諗過喎⋯⋯

「吓？校長⋯⋯你⋯⋯」
「我聽日仲要開會呀，就咁先啦。」

校長咁就收咗線，估唔到我哋最後係記一個大功，咁樣一功一過就互相抵消⋯⋯

副校長嬲爆爆咁走咗走，睇嚟我同佢嘅恩怨都係冇辦法消除，就喺一片嘅喧嘩之中，Band Show就完滿結束。

「Miss Lui、李sir，係咪你哋搵校長㗎？」我問佢哋。
「你哋班主任搵㗎，不過校長打咗畀我。」Miss Lui講。

原來係文sir，真係估都估唔到，仲以為文sir唔會理我哋添。

「快啲執返啲嘢上去啦。」Miss Lui講。
「哦。」

「係喎，李sir，枝咪還返畀你吖。」我同李sir講。
「都話係你㗎咯，唔關我事。」李sir講。
「咁⋯⋯多謝李sir。」會唔會太開心呢，完咗場Show，仲收到枝SM58。
「咁頭先斷廣播嘅，係咪你哋呀？」我問。
「斷廣播呢啲樣我就唔知，可能有人熄咗個大掣掛。」李sir講。

熄大掣？我諗全間學校得一個人識咁做。

（Tbc.）

82 - 「中四嗰個女仔呀。」

完晒所有嘢之後，我哋將啲嘢搬返去音樂室，因為頭先走嘅時候冇撳鎖門掣，所以唔使用鎖匙。

「突然覺得好攰呀。」Sky攤咗喺張櫈。
「同平時練真係唔同，玩一首Live攰過練兩個鐘。」太一講。
「我哋都係第一次連續玩六首歌吖嘛。」樂少講。
「但係我仲想繼續夾多幾首，玩多100首我都可以呀。」我講，雖然有啲誇張，但係我講真㗎。

「吖。漏咗個咪Stand呀。」樂少講。
「我唔行多次呀。」太一講。
「咁猜包剪揼囉。」我講。

第一局，Sky出剪贏咗我哋，第二局係太一嘅揼贏咗我同樂少，最後一局，我出嘅揼輸咗畀樂少嘅包，咁冇辦法啦願賭服輸，我唯有落地下拎返枝咪Stand。

落到三樓嘅時候，我見到強哥喺電機房，我按捺唔到心入面嘅好奇。諗起關於副校廣播突然中斷呢件事，我諗成間學校得強哥一個識搞，不過照計強哥又冇理由會咁做，肯定有啲內情，所以我行去強哥隔離，問佢究竟發生咩事，唔知佢會唔會答我呢。

「強哥，今日副校開咪嗰陣⋯⋯係咪你熄佢咪㗎？」我問強哥。
「唔係我熄㗎。不過呢，今朝有個領袖生問咗我如果要停止廣播要熄邊個掣。」強哥講。
「領袖生？」
「中四嗰個女仔呀。」強哥講完就走咗。

中四嘅Prefect仲有邊個吖，我諗到呢到突然之間笑咗一笑。

我落到籃球場之後，好快就拎返枝咪Stand。路過Prefect房嘅時候，我聽到搬緊枱嘅聲，我望入窗裡面，見到毛子蘭喺Prefect房，好似因為我哋頭先搵佢哋枝咪，整亂咗間房，所以佢就自己執緊房。

「我幫你執啦。」我打開門，毛子蘭望住我。
「仲好講，整到間房亂晒。」毛子蘭停低咗手頭上嘅嘢。
「Sorry囉，啱啱心急吖嘛。」
「又話叫《蘭》嘅。」
「Demo通常同最後個名都唔同㗎啦。」

因為如果真係叫《蘭》嘅話，唔只「黑色西炒飯」班人會起晒哄，我估我哋班Friend都會覺得係專門寫畀毛子蘭⋯⋯雖然喺某個層面上，我都係寫畀毛子蘭，不過⋯⋯總之就係《Special Thanks》啦。

我一路執嘢，毛子蘭就望住我執。

「係咪你熄副校長枝咪㗎？」我問毛子蘭。
「可能近得某個人多，覺得間唔中唔守規矩都冇咩問題掛。」毛子蘭嘅語氣偷偷哋串緊我。
「我邊有唔守規矩喎。」

好快我就還原咗佢哋間房，我覺得仲乾淨過平時添。

「你覺得點呀？我哋個Show。」我靜靜咁問。
「好好呀，唱嗰個差啲囉。」毛子蘭笑笑口講。
「超～」好心佢啦，明明都笑晒，讚吓我都唔怕啦。

「作為教你唱歌嘅老師呢⋯⋯」毛子蘭講。
「你幾時教我唱歌呀。」我打斷毛子蘭。
「係邊個搵我教佢英文㗎。」
「咁係英文啫，你邊有教我唱歌喎。」
「算啦算啦。」毛子蘭輕輕揮一揮手，「都OK啦，唱得唔錯啦。」

我聽到毛子蘭咁講，忍唔住笑一笑。

「多謝你，我想⋯⋯特別多謝你一次。」我點都要親口講一次。
「咁你要請我食飯呀。暑假你搵日請我食嘢啦。」毛子蘭講。

吓⋯⋯唔通帶佢去「流星記」咩，爸爸媽媽一定煩住晒喎，地方再諗啦。

「咁你想食咩呀？」
「再話你知啦。」
「唔好咁貴呀。」希望佢唔會要我帶佢食貴嘢啦，我邊有錢吖，「我上去搵佢哋喇。」
「嗯。」

因為搞咗一段時間，我執埋枝咪Stand就上返去音樂室搵佢哋。

「搞咁耐嘅，阿錘你，碌咗落樓梯呀？」Sky講。
「唔係，都係樂少囉，整亂晒Prefect Room，我畀毛子蘭捉住執房呀。」我講。
「我邊有整亂間房呀，明明係你整嘅。」樂少講。
「是旦啦，去食嘢啦，我好肚餓呀。」太一講。

「咁行囉。」

同第一次出Show之後一樣，我哋又去咗「流星記」，其實唔係我話要去嘅，係佢哋三個想去啫，今日一定唔可以畀折頭佢哋。

雖然我唔係幾鍾意佢哋喺「流星記」食嘢，不過出Show之後嚟食嘢，可能可以成為我哋嘅傳統，以後每次有Show都可以返嚟慶功。

「係喎，我哋暑假點呀？」樂少問。
「繼續夾住Band先啦，暑假又冇Show玩。」我講。
「都好吖，又唔使日日補課。」太一講。
「仲諗住可以喺屋企休息添。」Sky講。

「唔得呀，我哋要善用呢個暑假，提升自己嘅功力。」我講。
「我哋今日都做得幾好吖，全校都畀足反憑。」樂少講。
「咁係因為學校啲人冇第二樣嘢做，而且冇人試過喺籃球場夾Band，所以先咁多觀眾咋。」我講。

呢個暑假，等住我哋做嘅嘢仲有好多，首先係要建立知名度，然後出Show表演，不過喺呢啲嘢之前，將實力提升先係最緊要。

「我都要諗方法提升我嘅唱功先得。」
「要唔要搵人學呀？」太一講。
「可以搵邊個呀？」我講。
「上次Rooftop個老闆？」樂少講。
「宋炎序？我又唔係要學Metal。」

Silas都係跟宋炎序學唱歌，我哋又唔係要唱Metal⋯⋯但係可能我會學到Silas嗰種唱歌嘅方法，或者搵宋炎序教我都係一個幾好嘅方法。

「唱歌方面，我覺得阿錘你繼續用自己嘅方法唱就可以，但係彈結他方面，都係時候要落地獄喇⋯⋯」Sky笑笑口咁講。

「吓？」我有冇聽錯Sky叫我落地獄？

「係《地獄結他訓練所》呀，一個日本大師寫嘅電結他教材。」Sky講，「我一開始就係靠佢嚟學結他，因為唔知你準備好死一次未，所以一直都冇叫你練。」呢個時候嘅Sky散發住一鼓寒氣。

「就連我都喺最後嘅一步停低咗⋯⋯」Sky語氣變得沉重，「之後就一直都冇挑戰過。」Sky笑笑口講。

《地獄結他訓練所》究竟係咩料⋯⋯竟然連Sky都話要死一次先⋯⋯我真係好想睇吓係咩料。

（Tbc.）