情緒病［抑鬱/焦慮/躁鬱/思覺失調/其他］圍爐區（19）

會唔會伴隨某啲性格問題？情緒方面係咩嘢多？唔介意講下食緊咩藥？

我估睇手勢 因為好似要醫生評估做邊個腦區域同手咩強度 呢點應該幾考醫生功力？

試下問下做情緒健康機構既社工 可以點幫手介入？

做緊

不過就到中年 都好搶心未來

你覺得可以應付到就做住先 唔係就試下搵方法搞好果問題先？

🙏🏼🙏🏼

佢肯去轉睇西醫都係一個新嘗試 佢都好想自己好返 希望佢早日康復🙏🏼

有一樣野想問問

我前一排上網睇左一段血腥片, 跟住個血腥畫面就一直出現係腦海入面
好似揮之不去咁, 想唔諗住 但就成日出現

雖然唔影響正常生活, 但會覺得成日出現好煩, 好嘔心咁

其實算唔算係有咩精神之類既病??

我以前考試壓力大就會睇血腥片，跟著個腦就不停諗住個畫面，一開頭失眠，之後就有自殺念頭。

加上考試壓力爆煲，最後睇精神科醫生，確診抑鬱症。

但我建議搵咗社工傾傾先，或者搵心理輔導，如果佢地都建議睇醫生既話，就睇醫生。

但食藥係以年計，所以如果有得唔食，盡量唔好食。睇吓心理輔導幫唔幫到。如果幫唔到或者嚴重到影響生活，就食藥。

我就咁睇覺得似強迫症多啲。你有冇長期情緒低落或者長期好緊張好焦慮？

食得藥多又傷肝又柏金遜又認知障礙
想死

係啊，所以我間唔中都係度諗，當時既我唔食藥，剩係靠做運動又好心理治療又好，好唔好得返

我頭先搵一搵你之前開既post, 發覺你都係過來人
我想講講我既經歷先

其實我唔係第一次有呢種情況
2016年果陣某一日, 我都係好奇上youtube睇左 血腥/嘔心 既片
跟住就開始個腦一直loop畫面, 完全是揮之不去
當時我係勁辛苦, 個腦一直有畫面出現, 不過唔影響正常生活, 我繼續訓教, 返工, 就係食飯果陣 諗起D血腥畫面出現, 搞到我無哂食慾咁

當時我係唔敢周圍同人講, 因為怕被人恥笑
我都唔敢向父母講, 因為我怕父母唔理解我
反正我個腦就一直出現畫面, 但表面扮到無野咁, 但內心係好難受
當時我就一直忍住忍住咁, 好絕望, 覺得自己會唔會成世係咁

但是經過大半年左右, 我又開始漸漸無事
即係個腦已經可以無再一直出現D血腥畫面
但有時候都會諗起D血腥畫面, 但我就試下諗其他野, 去轉移想法

再過多一段時間, 大約2017年尾左右, 已經算係回復正常, 唔會再一直諗起D血腥畫面
不過有時候都間唔中諗起, 但可以好快諗其他野轉移左

不過前一段時間, 我又好犯賤上youtube好奇睇左D 血腥畫面
結果又出事, 個腦又開始一直loop個畫面, 揮之不去咁
我真係好憎我自己點解咁好奇, 如果我無好奇去睇, 就唔會搞成咁
所以我家陣上youtube睇片變到好小心, 如果標題係知道血腥既, 就唔會去睇

但家陣唔睇都睇左, 個腦又係一直loop個畫面, 同2016年果陣一樣
我都唔明白點解會咁, 反正我家陣就想睇下過一段時間, 會唔會好似上次咁, 自動慢慢變返好

其實食藥會唔會好D??

因為我上一次中招果陣, 都上網搵過相關情況
我都覺得自己會唔會係 強迫症, 即係強迫思維
又或姐是「創傷後遺症」, 即係睇完驚嚇畫面, 跟住個腦一直諗住

當時我都有諗過睇精神科醫生, 但又唔知點樣開口同人講好
反正就一直拖住拖住, 結果拖拖下自己回復返正常

補充返先

其實我日常生活無乜壓力
我做地盤, 日日返工 放工, 壓力不大, 又唔緊張
同 其他師傅都無乜衝突, 大家平時有講有笑
又無金錢/感情既壓力, 反正好平凡咁過日子

不過可能我份人比較細膽
有時候睇 血腥片/恐怖片 都會嚇親, 所以一般唔敢睇

但有時上youtube見到又會好奇點入去睇
結果無諗過睇完會出事, 會嚇到個腦一直loop個畫面

而家連登開post寫慎入，我都唔會禁入去睇，睇咗只會令自己唔開心同埋一直記住

你可以試吓搵野分散吓注意力，心理治療有種技巧叫grounding，可以幫你返黎此時此刻

如果太影響生活就睇精神科醫生，但你預食只少半年至一年藥

做運動同早睡早起都好緊要

最重要就係唔好再睇埋啲血腥野 多多藥都幫你唔到

係呀, 有時候真係 好奇害死貓
見到D血腥片, 又會貪得意想睇睇, 結果一睇就出事
家陣受到教訓唔敢了

不過好奇怪, 我有時睇完 之後無野
例如之前睇 恐懼鬥室 都無乜野
但有時候睇完D血腥畫面, 例如斬手斬腳 (其實都是電影片段, 假野來), 但就會個腦一直諗住
所以我都理解唔到點解會咁

同埋想問問呢種情況是否會時間耐左, 慢慢康復
因為我上一次 2016年果次, 就係等時間耐左, 大約2017年年尾, 跟住個腦慢慢變返正常

想知道如果食左藥會點?? 個腦會變返正常咁, 唔會成日諗住D畫面??

其實食住藥都係會有呢啲畫面，食藥只係令你無咁焦慮, 咁緊張，幫助你瞓覺
都係要等時間慢慢忘記佢
如果想快啲忘記，最好搵埋臨床心理學家(CP)處理，一節1500-2000左右
CP最常用的治療方法是認知行為療法，旨在協助患者在一個安全、受控的環境下，協助重新處理該事件觸發的情緒，從而減輕痛苦。


因為你都係前一陣子先睇完，應該沒咁快忘記
我覺得你而家可以做既係慢慢觀察，睇吓過一段時間會唔會忘記，如果忘記唔到，加上情緒方面都出現問題，可以睇精神科醫生先，如果情緒方面冇問題，可以睇CP先。當然如果你而家覺得好困擾，可以隨時都睇CP都得

我以前響YouTube 睇過僧人自焚，令我好shocked，令我瞓覺、沖涼都諗住，影響埋讀書，都用咗好耐時間先忘記到

多謝你解答先


我家陣唯有希望可以好似上次咁, 等時間耐左, 慢慢唔再受到困擾啦
因為上一次即係2016年, 我好記得, 因為呢段時間真係我人生最痛苦既時間
每日都被D 畫面困擾住, 由一起床個畫面就好似自動波咁出現, 一直係腦海到直到夜晚訓教, 當時我都好驚, 以為成世人都會咁
不過去到2016年尾, 情況就慢慢好轉
但真正講到回復正常, 都係去到2017年中左右先得
大約一年幾時間啦........之後就變返正常生活

係前一段, 大約幾個星期前, 自己又手賤走去睇, 結果再次中招
真係好後悔, 點解自己成日咁好奇去睇呢D畫面

不過我覺得今次情況比2016年果次好, 起碼個畫面有時會消失一陣, 跟住又自動諗起
同埋想問問, 睇心理學家, 佢係唔係只係同你傾計, 就可以化解你既困擾??

同埋我睇一睇你以前既post, 發覺你好似都好多精神方面既問題, 要一直長期食藥??唔單止有恐怖畫面係腦海呢個問題
無意冒犯, 只係想多D了解一下

因為現實世界我唔敢同人講呢種情況, 怕其他人理解唔到, 覺得我只係細膽, 被血腥畫面嚇親, 先會一直諗住
所以只能夠上網問人
我咁難得遇到你呢個同路人, 原來呢個世界係有人同我一樣
所以真係好多野想一次過講出來

CP會一邊同你傾，一邊提供一啲新既角度思考問題，幫助你解決困擾你既問題。

我就應該唔會有停藥既一日，我係躁鬱症+焦慮症+強迫症，唔加藥已經偷笑

無意冒犯, 只係想了解多D 同病相憐既人

想問問你點解會有咁多精神類病?? 是壓力定咩問題造成??
同埋你家陣一直食藥 + 睇心理學家, 對日常生活有冇影響?
即係你可唔可以正常返工+社交之類

你有咁多病都可以繼續生存, 其實都算係堅強
我之前只係有血腥畫面一直係腦入到, 唔太影響正常生活, 我都想死

因為我唔想我既人生就係咁渡過

其實我唔求大富大貴, 只係想平平安安, 健健康康咁平凡生活
但發現原來 平凡生活 都好難做到
每次我覺得生活無問題, 日日返工放工好開心果陣, 總係會出事