[遊記 - 重打] 慢慢打，希望唔好爛尾 - 京都富士山東京秋色之旅

之前遊記：
東北、北海道睇雪
https://lihkg.com/thread/3336882/page/1

京都、東京梅雨季睇繡球花新綠
https://lihkg.com/thread/3433882/page/1

東北睇櫻花
https://lihkg.com/thread/3689836/page/1

沖繩北海道夏日睇海睇花田之旅
https://lihkg.com/thread/3745078/page/1

點都想打埋呢一個遊記。所以就重新開個 post 打過啦 。

其實呢個係上年（2023）睇京都、富士山、東京秋色嘅旅程，最後出黎嘅相主要都係京都成大堆大堆寺嘅紅葉相 不過咁都正常嘅。
好，點解會有呢個旅程呢？人生第一次自己去旅行搭飛機，就係去京都睇紅葉，不過依家睇返果時候啲相都覺得值得影過京都紅葉啦。果一次就好似未變曬色就已經落大雨 好，結果計計畫畫下就加埋幾日關東咁樣啦。

大概行程係咁：
D1：京都（經台北轉機）
D2：京都（大概係哲學之道附近）
D3：京都（大概係嵐山附近）
D4：京都（大概係北野天滿宮附近）
D5：京都（大概係山科附近）
D6：京都（大概係琉璃光院附近）》東京
其實好難界定日日起京都邊個空間睇紅葉，因為有時候見有時間就去下第二個地方去睇，同埋有啲寺就去左幾次。咁可能下面如果打到京都之旅嘅話，就用相關嘅寺嘅身處地方去分類，而唔係用我邊日去界定啦。

D7：東京（銀杏一）
D8-9：河口湖
D10：東京（銀杏二）
D11：東京》香港 經台北

之後見紅葉繼續開緊，返工返左五日嘅週末日就快閃左京都再去影返幾個紅葉位

由於自己就鐘意影風景相多，同埋趕行程睇紅葉。所以相方面，可能中間啲隨影啊，野食相會少啲。同埋有啲細節可能都唔記得左

貼住十鬆張相先：

D0 - D1：一切從機場開始，請切較至飛行模式
想試下新 airline，人一世物一世，三年無飛過，咪去下台北轉下機，睇下因航以外嘅服務究竟係點呢。不過香港去台北果程都係搭因航最尾果一班去台北先。

咁都係放工去出發，一開始都係入去因航個 lounge 度等下先。我記得比較大，比較齊全嘅都係 the pier，咁我都只係入得business 果個。雖然就要行到去 gate 65 附近，比較遠水路。



內部環境。唔係第一次入 lounge。最入面休息區果啲床好硬，如果佢可以換下，個床嘅角度可以較下就好啦


略嫌因航 lounge 食物選擇唔夠豐富，中餐可以但西餐方便選擇好似唔夠多，不過都叫可以接受嘅。而最鍾意當然就係飲 cathay delight 啦。





咁飛台北咁短機程，唔好浪費 miles，都係飛 econ 就算數。雖然咁短機程，但係依家 因航 都叫會有個熱餐派俾你食下。不過都只係得一個選擇。



去到台北等轉機，因為係想試星宇嘅關係，最安全嘅方法都應該係入台灣境再出台灣境。所以果一晚就去左起T2嘅一間dorm度訓下啦。間dorm起 T2，而起 T1度入台灣境，T1去T2條路真係有啲難搞，又要上落斜路，又要搭下升降機，又要搭下無人列車 真係唔知道點解之前 TPE 可以排到最佳機場第十幾名咁前嘅位置 不過間dorm個環境都幾好嘅，幾舒服，有茶包附送，可以沖杯茶飲下。

其實果一晚都無點樣訓到，跟住就一早去返 T1 度搭飛機去關西啦。

總係感覺 TPE 指示牌都唔夠清楚。搵左一輪先知道星宇 checkin 起邊行，而佢就規定sharply起飛前三個鐘先處理你果一班嘅登機手續。所以我早到左，就算checkin counter開左有人搞緊登機手續都好都要起度等一輪。而佢開得一個 business 櫃位，果時候好似又要處理兩三班星宇航班，結果我好似要等左十分鐘，佢見勢色唔對路，先開多個 business counter 幫你check in。感覺好似慢左啲


過關條人龍都係長到喊。



總算去到星宇 T1個lounge

感覺星宇T1個lounge唔算大，自助bar野食嘅選擇都唔算多。個廁所又要起個lounge出面。去緊呢個trip嘅時候 T2 個 lounge好似仲未開。唔知道T2個環境會唔會有所改善呢。




一入到個 lounge ，果度嘅服務人員會比份 menu 你點野食。整嘅時間需時，同埋個份量其實唔係好夠。網上評論又話個豆漿應該要試試，不過食落又好似唔係好特別。 感覺上面個 lounge 個環境都叫 ok，不過可以改善嘅空間都有一堆。




之後就上機啦，今次搭嘅係星宇 A330 neo，商務嘅係1-2-1排列方式。個位嘅用色幾舒服，空間當然都夠啦。



一開始有迎賓飲品同埋毛巾。


星宇個 mon 果然夠大 佢地個 remote 係 touchpad 方式嘅，不過略嫌太過 sensitive，都係直接篤個電視螢光幕會更加方便。


headphone 就收埋起隔離個櫃果度。


佢有列印版嘅 menu 同埋個 mon 上面都有相關嘅資訊。其實呢排國泰econ 果啲都唔會派menu card，咁倒不如將menu資訊都放入去個 IFE 度啦，有時聽空姐介紹有mud食有mud飲都因為飛機聲都搞到有啲難聽清楚。如果擺入去咁就令乘客更加清楚啦 。



safety card 嘅一面。


起網上都可以預先睇有mud好食同選擇定。果程機就選擇左呢個：


如果再搭嘅話可以叫空姐遲少少先上餐，晨咁早就食呢個餐感覺上好似有少少 heavy。不過肉質方面唔乾，都係滑嘅而且有肉汁，真係幾好食 。另外就試試佢個特飲，奉勸各位如果係搭星宇嘅話，呢杯野就一定要叫空姐比個無酒精版本，唔好高估自己飲酒嘅能力




飛到咁上下都已經到日本附近啦。果時候見出面層雲咁得意所以就影低左。依家睇返原來係櫻島火山噴發嘅時候嘅情況。



總括黎講星宇嘅服務唔錯 ，不過不失，各個部分嘅人員都好有禮貌，如果個 lounge 執執佢，同埋 TPE 可以更加有效率嘅話應該會更加好。

正值關西紅葉季節，一出見到車站嘅人龍打左唔知幾個多蛇餅 ，雖然之前起網上買定左 haruka 個優惠車票，等等下去攞飛都係放棄啦，因為都唔知道要等幾耐，放棄搭火車啦，轉去搭巴士入京都好過

劉明睇靚相

靚相

留名學嘢
今年都會去京都睇紅葉

上次打就唔知點樣打京都呢一part，睇黎都係會進入紅葉洗版模式
搭巴士入到京都，都夠鐘可以check in 啦。擺低行李整理下，就開始睇紅葉之旅啦。咁起京都睇紅葉嘅行程主要係咁：

D1：東寺，清水寺，高台寺。
D2：清水寺，南禪寺，永觀堂，真如堂，詩仙堂，圓光寺
D3 ：佑齋亭，寶嚴院，常寂光寺，祇王寺，二尊院，天龍寺，
D4：醍醐寺，北野天滿宮，仁和寺
D5：酒店入面 hea 下打下卡，醍醐寺
D6：瑠璃光院，東福寺，西本願寺

之後隔多五日之後短遊京都兩日都補埋：建仁寺，法然院，安樂寺



所以我都係按地區咁貼唔同地方嘅相啦，費事大家覺得跳黎跳去。下面要寫嘅野就比較少啦，所以可以進入圖片模式架啦。

一：京都站周遭 - 東寺。東福寺。西本願寺
將呢三個擺埋一齊黎貼，東寺同西本願寺都係京都站可步行嘅範圍之內，而東福寺都係搭多一個 JR 站，交通黎講都比較方便。

東寺有夜間點燈嘅，不過距離日間同晚間開放之間會清場嘅。今次去東寺紅葉好似未係轉得好多色。最想就係影到紅葉同埋五重塔一齊嘅畫面。東寺都叫行得舒服嘅一個點，地方都算大。同埋可能有一部分嘅紅葉係櫻花樹，所以就來得比較疏同散。


而東寺個個都會爭位去影嘅係接近入口果個位，就有五重塔，配搭埋倒影。不過環境比較黑，小心唔好跌落水。

不過其他位都可以影到紅葉包圍住五重塔個樣！

而西本願寺其實就唔係睇紅葉嘅，主要就係睇銀杏樹。前面果棵銀杏樹好似同其他銀杏樹好似有啲分別咁，因為佢係橫向咁生，而其他地方見到嘅好似係打直為主咁。呢一棵銀杏樹好似話已經超過四百年架啦。





東福寺要去都係好方便，起 JR 京都站搭一個站就到 JR 東福寺站。東福寺俾我嘅感覺都係佔地好廣，當然最受歡迎當然就係入面個通天橋，長時間都會堆左成班人起度影紅葉。


未入寺入面都有個免費位叫臥雲橋，都係大家會黎東福寺會影嘅一個角度。

東福寺佔地大，都有其他位可以欣賞到紅葉，梯級等等都係值得成為構圖嘅一分子。


除左紅葉之外，呢度好多位都有其他植物，例如苔蘚，好似起最入果度有個位就有成堆苔蘚一個一個波咁，好得意下。另外都有個地方係有一格一格嘅苔蘚，應該都係日本庭園嘅一個元素？好似呢個一格一格苔蘚都係東福寺呢一度嘅標誌之一。




睇返資料好似東福寺有夜間點燈，不過好似係要 join 旅行團先入到？呢個唔清楚。如果係嘅話，夜間睇都應該會有另外一種感受。

-- 待續 --

我都研究緊快唔快閃返三日補影幾個位

樓主你人呢

我有打嘅，返工日會打得比較慢

二：嵐電附近 - 北野天滿宮，仁和寺
呢兩個點都係起嵐電附近嘅，兩者都有日頭版同夜晚點燈嘅紅葉環節，而兩者都係起嵐電沿線，所以都可以安排擺埋一齊。兩者佔地都算比較大，所以行起上黎都比較舒服。

未行到入北野天滿宮就已經有一大堆攤檔，好熱鬧。夜晚呢度好金碧輝煌，但係又唔係好土豪，都幾舒服。



北野天滿宮有特色嘅位就係入面果條紅色嘅橋，如果想影呢個位就要花少少時間排隊啦。



不過起北野天滿宮附近行都有好多影紅葉嘅好位。個人就覺得去到條路嘅尾段就好似無咁好睇。



同埋就建議早上黎，我下午大概兩三點到，行到最尾都已經開始被附近啲野擋到影出黎暗暗地啦。

另外我去果年憑入場券可以兌換入面茶屋嘅一份茶點，一路睇住夜楓，一路聽住人彈奏音樂，都幾寫意


月色之下嘅北野天滿宮，又係另外一個感受


----------------------

仁和寺黎講，呢度嘅櫻花可能會比較出名，因為如果京都其他地方嘅櫻花落曬嘅時候，呢度可能會幫到你，呢度好似咁多年黎櫻花都係最遲落果一批。咁紅葉季節呢度都有紅葉睇嘅。





就算唔係睇紅葉，其實我覺得仁和寺個園林都幾舒服。起個走廊度坐左起度好耐，望住月出伴隨住嘅五重塔，前面就係枯山水嘅園林景，個感覺好平靜。


夜間個點燈就應該貴絕全城嘅 - 盛惠 ¥3000 。不過點解咁貴就有少少原因嘅，就係佢加入左噴水霧嘅環節，起宣傳海報佢用左雲海黎形容呢件事。感唔感受到呢個意境就唔知大家啦


夜晚點燈都幾美麗。我仲記得之前睇啲書都被呢一個角度吸引左去。總算都見到。


佢起五重塔下面有個位可以俾錢擺燈籠，我記得話係俾一個機會你去思念一下你嘅親人之類咁。 不過人地擺低左就黎遠影埋啦。


仁和寺入面唔知邊座前面都有擺啲蠟燭點燈


呢兩個位都幾適合啲唔想太逼嘅人黎，北野天滿宮多人啲，可能要入到呢邊，又唔係近地鐵站，唔係咁就腳，所以唔多人黎人逼人掛

北野天滿宮PR做得幾好、行完會提供熱茶&和菓子
多人得來又無其他景點咁恐怖

無錯，諗起清水寺嘅盛況，北野呢邊真係輕鬆好多

樓主唔好搵啲靚相呃我入嚟之後又爛尾

無啦，都大概有靈感貼京都果堆紅葉點，應該無事嘅

lm

三：嵐山（一）：佑齋亭，寶筐院，常寂光寺
嵐山呢一帶係紅葉景點嘅集中地之一。打得嵐電，就貼埋嵐山啦。未行啲寺之前渡月橋同嵐山公園個展望塔就已經有好多紅葉睇。成個山都係紅葉，雖然未夠東北果啲大自然紅葉景咁壯觀，不過都頂住先啦。除左遊船之外，假日都有好多人起度租船仔去撐。幾驚佢地撞




時間所限，本來想去返保津峽個無人站影多次小火車，可能要下一次先有機會再黎補影返呢個位啦。

佑齋亭
佑齋亭係個染布家個展覽館黎嘅，所以除左睇紅葉之外，你都會起場入面見到藝術品嘅展覽。不過我估好多人都會朝住紅葉而來啦。去佑齋亭就要網上預約嘅，都有啲搶手。我果次就系統繁忙到預約左，load唔到 success個版同確定電郵都send唔到。要佢之後話我重複預約左先知。今年好似起預約果下已經要收費，可能會比較好啲掛。


排隊入佑齋亭嘅時候都可以影到河邊嘅紅葉。


起佑齋亭主要就係影紅葉倒影嘅。入面有幾個位都擺左啲反光檯，大家排住隊去影。




而個建築物外面就有幾個水池位俾人影倒影。

寶筐院
呢個園區唔算大嘅一個地方，不過唔知係因為去果陣係紅葉尾聲定因為唔係起常寂光寺果邊，所以感覺就係一個比較少人去嘅地方。呢個地方主要就係庭園式一個賞紅葉嘅地方。個人覺得呢度陪襯起日本建築嘅景色，同埋起條步道上面嘅紅葉隧道就最值得一看。

常寂光寺
可以話係嵐山地方最出名嘅一個紅葉景點吧。佔地大，但人潮都多，同夏天黎果陣時簡直係另外一個世界。最出名就應該係門口仁王門，茅草頂配襯出紅葉林。另外青苔斜坡搭配紅葉都係呢度嘅特色。後方面就有樓梯級，穿過竹林，就可以去到多寶塔度眺望下附近民房區嘅景色咁。而我最愛就係果個鐘樓果個位，成堆紅葉包住成個鐘樓咁真係好正。








不過可惜今次黎呢度個天氣麻麻。同埋建議就係早上黎，如果下午嘅話，有機會附近嘅山就擋住曬啲陽光搞到見到附近都陰暗曬。睇黎有機會要再黎呢度先得。

https://www.houkyouin.jp/contents/peak.html
宝筐院個網頁幾好、記錄左歷年有紅葉的日子

正！咁就可以攞個reference 去估紅葉期啦！

今年我27號先到
如果跟返2021 22年 已經開始枯葉

咁都係一個點姐，京都勝在多點都可以去其他地方度去博一博

寶筐院同佑齋亭影得靚 lm

三：嵐山（二）：寶嚴院，祇王寺，「雲龍圖」，天龍寺

寶嚴院就近佑齋亭嘅。一開始其實我都唔識路，睇個款個感覺似果頭就有十間八間寺擺埋一齊，都要睇地圖先知道寶嚴院係起邊一個角落。寶嚴院都係以庭園景為主體嘅。當中好似有一個叫「獅子岩」嘅巨石頭借景。不過舊石頭果個位我就唔太識得欣賞啦。

另外呢度有夜間點燈嘅。都可以起嵐山地方呢一度去埋呢一個地方睇夜楓。個人覺得最深印象嘅地方反而係出面嘅紅葉大道。人流又唔算人擠人。而睇番啲相都覺得夜晚版好似吸引過日頭版。







祇王寺就係起常寂光寺行入一啲嘅地方。呢度個地方係細嘅，不過都想黎呢一個地方行一圈，因為祇王寺最出名就係呢一度嘅青苔，上次夏天黎京都都去過呢一個地方慢慢睇下呢一度嘅青苔，感受下日本夏日嘅溫度咁，望住青苔個感覺涼涼地幾新鮮，可以睇返之前個遊記。而秋天黎就當然想睇下紅葉配襯起青苔會係一個點樣嘅感覺。




紅葉舖起青苔綠地毯上面個感覺都唔錯