[遊記] 最南同最北嘅都道府縣感受日本夏日 [後經台北星宇首航返香港]

張銀河好靚

睇app見可以見到銀河，就book間可以近啲望向東面嘅酒店
仲有一張起美瑛度影，不過未搞

唔攰嘅咩
不斷飛

等睇靚相，今次唔好爛尾

都有啲攰 尤其是搵晒啲早班機飛
不過為左睇景都叫值得嘅

所以有啲日子行程都鬆鬆地算

精華既相已經好靚，留名支持

Lm樓主用咩相機

主要係 Sony a7riii + Tamron 17-28,28-200
之後遊記應該都會見到堆 iPhone 相

Lm

夏天去日本、諗起都覺超熱、LM持

Day 0：CX502 HKG->KIX 一切從機場開始

本來唔會起行程前面加入沖繩嘅，不過就好似之前所講啦，有啲俾沖繩嘅藍天碧海引左去，所以...其實沖繩呢兩日就係臨出發之前四五日安排出黎嘅 而要處理嘅就係飛機啦，好啦，睇落如果直飛沖繩，最早都係早上十一點幾到，呢排又成日話日本入境好慢，搞得黎咪無左大半日？結果就搵內陸機，飛羽田又難換位，咦？原來關西有得飛沖繩，最早早上九點左右到，好，就用關西入啦。拿拿林臨出發前兩日換埋張 CX 502，用成晚時間有得佢慢慢入境日本啦。


CX502 四點幾機，臨時請半日假都唔算過份嘅 港島返工都係飛機場快綫入機場好過。


原來依家門口整到咁。


光速咁check in 埋今日程機起 Gate 67 度開。咁 The Pier Business lounge 就起附近，太好。


入下 lounge，咁都唔係第一次黎呢個lounge，都係食下呢度啲中餐，感覺國泰lounge西式野好似選擇麻麻地咁。唔知 first class lounge 係咪另外一個故事啦。跟住就啪夠幾杯 Cathay Delight


飲飽食醉，夠鐘上機。今次換嘅係 PEY。其實講短中途黎講其實 PEY 有個footrest，而個座距又夠，其實都夠舒服，就算塞左個背囊起前方椅子下方都仲有好多空間。miles 漲價都係留返黎換下個trip 好過啦。


呢個係屬於夏天嘅雲。應該係風向因素，所以就向住港珠澳大橋果邊起飛，然後起香港下方轉個彎上返去。所以就見唔到中環一帶嘅高樓啦。


嗯，我記得呢個雞飯唔係我太鍾意嘅 texture，我覺得啲菜同啲飯好似有啲太硬，而件燒雞都ok ，略嫌少左啲汁去送飯， 不過程機嘅空中服務員都 nice 嘅。


睇睇下套《白日之下》 都日落黃昏啦。



搭 PEY 有樣麻麻就係食正引擎位。見到窗外嘅明石海峽大橋，表示差唔多到啦。


好，最緊張入境日本嘅時刻到啦。之前新聞就話入境慘過輪米，要成三四粒鐘過埋終電先入到境。而今次，一開始見到人龍有成大概三四班機，而佢就只係開左六個 counter 就覺得有啲不妙。雖然住臨空城姐，不過都睇下機場酒店有無位啦，用完佢個龜速 wifi check 完無死左條心之後，咦？其實都唔係咁差wor，用左大約一個鐘左右就入到境。唔使搭終電去臨空城

不過奉勸各位要 update 返個 QR code 資料，本來我寫入境係遲兩日，住起東京嘅酒店（因為本身個 plan 係咁嘛），跟住關員見到：
：you will stay in Tokyo, why you come to Osaka?
：because flight to Tokyo very expensive, esp during summer holiday.. i redeem this flight by using my points last min
：..... ok, welcome to Japan

不過過第二浸果個，用同一個 QR code，因為入境日期唔正確，部機食唔到，所以就被逼即刻填紙仔入境啦。


搞完一輪，今晚就住起 OMO 度。其實呢間都舒服，間房又唔係話好細，樓下已經係便利店，樓上又有個大浴場，最重要就係覺得水溫適中，夏日炎炎如果仲係溫泉果個水溫真係搞唔掂... 如果之後有機會早機從關西離開日本，都值得早一日黎呢間住一晚先。


Day 0 完。

都真係，果款熱我覺得係乾熱，焗爐果款，唔係香港果款濕熱，但係都係有啲難頂...
不過好在北海道我去果時候就比較涼啲

留名
Day 4
啱啱去完美瑛 真係好正#gj#

美瑛真係舒服啊 鄉郊好舒服
不過唔知點解我果幾日個天濛濛地 可能係吽雨掛

Day 1：第一次踏足沖繩縣
搞左一輪，終於開始慢慢進入行程啦！呢一日一開始當然就係搭飛機去沖繩啦。

酒店其實有免費穿梭巴士接駁機場，不過好唔好彩，酒店張床實在係太舒服，我係好完美咁 miss 左班車嘅 。好在前一晚已經搞好曬行李宅急便等問題，只要換好衫就可以衝落樓下搵的士衝去機場。

今次搭嘅係，如果凌晨機死都唔想搭嘅樂桃航空（啲位比 UO窄，又硬過 UO 啲位，真係寧願搭 UO 都唔想搭 MM，不過國內線長極有限，位頂唔頂都唔係問題啦）。國內線同國際線其實都係起 KIX T2 辦理登機手續。



都係無登機橋嘅，大家都係要咁樣行上去飛機。



天色都變化得幾快，一開始個天仲係密雲，慢慢開始雲層消散。


望返整個關西國際機場

咁內陸機一般乘客都會有野飲下，樂桃係廉航自然就唔會咁好人有免費野飲啦。不過兩個鐘機程，其實都無乜所謂。


唔知係飛到九州定四國嘅上空。上面睇一層一層嘅山脈。



而越飛近沖繩，就開始見到屬於沖繩嘅水－好乾淨，圍住成個小島都係綠色嘅海水！


終於踏足一個之前點都唔會點考慮嘅一個都道府縣啦。睇機場裝飾就見到大自然氣息，就知係好截然唔同嘅風情嘅地方。

成朝除左起關西機場食左個三文治之外都未食過野，就起等人黎接之時起機場入面食返個早餐先。呢一個應該都係沖繩當地先會有嘅蛋飯糰啦！咪睇佢細細件，食完都真係好飽肚！



待續。

Day 1 part 1：萬座毛

其實我就唔識渣車嘅，所以遊覽沖繩，又要節省時間，就只好豪少少搵包車啦。咁食完個早餐都夠鐘起那霸機場會合啦。今次佢好好咁安排到個識普通話嘅司機黎帶我周圍去。（我都做過少少功課，規劃左啲行程）。我覺得沖繩呢一個地方我應該唔會只會去一次，航程又夠近，應該可以黎一個快閃嘅。所以就採用一個策略就係南部交通應該比較無咁難搞，就留待下次再黎嘅時候再玩啦。

一開始就飛高速去第一個目的地：萬座毛
司機本身都係住起一啲內陸嘅地方，都係無咁多機會見到海。起車上就講，一開始黎到沖繩，好天嘅時候見到周圍都係綠樹碧海，真係嘩左好耐，係感動左好耐。又覺得成個地方又少高樓，成個感覺都好舒服。咁當我去到第一個景點望到個海嘅時候，雖然起香港周圍都係望海嘅機會，但係啲水咁清，我都真係嘩左好耐同感動左好耐。走過黎初探一下呢個地方都真係值得嘅。


google map 都記載左司機所講嘅野，以前萬座毛呢度就附近都係攤檔嘅。係最近先起好個觀光景點見到嘅旅客中心之類。


呢個係我今次去見到嘅樣。不過咁樣搞一搞，去萬座毛就要俾入場費 100 yen 一次啦，而且有限開放時間。日落之後就會關閉。（可能就係咁，網上比較舊嘅資料就係話萬座毛一帶係一個比較好嘅睇星星地方，之前都差啲被 fake）。

入面係變成咁嘅。

咁其實就係圍住個大草地咁行一圈嘅地方。不過見到咁清咁綠色嘅水，仲要起藍天白雲之下，都真係覺得值得。


啲水真係清到 真係好想跳落水


咁起左座野嘅好處就係起咁熱嘅天氣之下有個位涼下冷氣然後可以食下雪糕

Day 1 part 2：古宇利島心形岩

咁吹左一輪海風之後就去到下一個點啦。


揸車從萬座毛到古宇利島中間都好似要經過幾條橋。離遠已經見到屬於沖繩嘅海水藍色


橋上面兩邊就係呢個海嘅顏色 編排行程嘅時候都研究過停唔停古宇利島個海洋塔好，望下海都好，不過最後都係無停到。可能下一次再黎嘅時候應該上一上，咁樣就可以將綠色嘅水一覽無遺啦。


偶然見到嘅一個涼亭。


搭咁耐車就係想去呢一個地方，古宇利島嘅心形岩。呢度其實就有兩舊心形大石頭，睇返資料 2014 年嘅日本航空廣告入面，Arashi 嵐 就起呢一個地方取景，結果呢個地方就出左名啦。

咁成日見人地嘅相都係潮漲嘅時候黎到，咁今次就無夾過之下就起潮退嘅時候黎到心形石。要走落去條路都唔難，起好曬樓梯級。



潮退除左可以近距離咁去睇下心形岩之外，附近潮退嘅地貌都有趣。



啲水真係好清 每一個圓圈灘仔入面都係水黎，有啲海洋生物都住左起果度。有啲就甚至見到啲魚起度游黎游去，好似個小型水族魚缸咁 。我試過去玩下水，不過可惜好似水溫比我想像中高，無果一款透心涼嘅感覺。


泥灘天然咁露左條路出黎咁。

今日貼到呢度先

我去沖繩嘅時候係打風

沖繩打風真係唔知可以搞乜
我記得有一年有個好厲害嘅颱風起沖繩附近轉左好多個圈。聽返司機講，果次啲客人都係要靠酒店沖杯麵去頂住

上次沖繩打風打到斷水斷電
日本都係11至5月前先好去

lm

最南係東京都

係wor，小笠原群島唔知邊個島贏左