[遊記 - 重打] 慢慢打，希望唔好爛尾 - 京都富士山東京秋色之旅

二尊院都係嵐山呢一度數一數二嘅紅葉人氣景點。對於我黎講，今次都係走入黎避下雨順便黎睇睇嘅一個地方。呢度最出名應該都係一入門口果一條紅葉參拜道。而入面嘅庭園景其實都幾好睇。睇番資料呢一度就有紅葉嘅馬場嘅稱呼。




天龍寺呢度就只係順路行一行嘅。因為從常寂光寺果邊走返去JR嵐山果個站，應該會經過竹林小徑，不過果度當然就係多人到喊啦 。所以就中間轉入去天龍寺咁過返出去啦。個人感覺天龍寺呢度又唔算係好特別嘅一個紅葉景點所以如果黎嵐山去睇紅葉，個人覺得呢個點唔太值得投放太多時間。好似最吸引我嘅都係果個曹源池庭園果個位。咁行到呢個位睇住啲紅葉感覺又真係會平靜嘅。不過睇番網上介紹好似入面法堂個天花板畫住「雲龍圖」果個位都可以黎睇一睇。

啊，應該係
三：嵐山（二）：寶嚴院，祇王寺，二尊院，天龍寺

copy and paste 錯位。

五：東山一帶 - 清水寺，高台寺，建仁寺

清水寺
其實八年前都去過呢一度睇紅葉，不過好似唔入一入去感覺就好似無去過京都嘅感覺 。所以都算啦，抽一抽時間入一入去呢度啦。咁出名嘅景點，人潮就最多架啦。睇清水舞台果個位長時期都有五六排人堆左起度咁樣睇紅葉。所以要影相嘅話唯有都暴力少少推入去先得。
呢個位我覺得就係一係睇夜景，一係就下午黎會好啲，如果係早上嘅話太陽都未升得太高嘅時候，陽光會被山擋住，結果影出黎就暗曬啦。下次都研究緊去返呢個位一次睇日落 ，呢一次去京都就預唔到時間黎。


紅葉包圍住京都塔一帶。



太早嘅話就暗曬，要花啲時間後製下先見得人。




咁除左最經典嘅角度，起清水寺入面都有其他位可以影下紅葉嘅。水池位可以影下倒影。



入門口果座塔，夜晚睇就有啲唔同感覺。

高台寺
清水寺隔離就係高台寺。個人感覺上高台寺都唔係幾夠其他京都嘅紅葉景點咁好睇。如果時間唔夠個人覺得可以 skip 左佢。不過我見係起隔離，咪順便過埋黎睇下咁囉。



夜晚會有燈光效果，有個位好似幻彩詠香港咁玩法，個人覺得好似太幻彩咁，同紅葉唔係咁夾咁。而竹林位啲燈光效果我覺得就都叫有啲心思嘅。一點點白色咁射上去啲竹度，睇上去都叫舒服。以前起嵐山臨近十二月中後左右會有點燈，竹林小徑會點曬燈，不過好似依家無左呢個活動啦。




建仁寺
如果錯過左一系列嘅紅葉景點，呢個點都可能幫到你。建仁寺就近花見小路果邊多嘅，而佢好似係比起其他一線景點黎講就遲變色嘅。所以呢一個都係起快閃京都果一次影。呢度主要係庭院景為主，行上去都覺得幾舒服，呢個庭園就燒我成個早上，起呢個點度慢慢享受下秋天嘅溫度同陽光。



呢個位都幾多人爭，所以要影到無人嘅一刻都真係要有啲耐性。


除左紅葉之外，佢入面有座野都收錄左一啲畫作，如果你有買過旅客版嘅icoca 或者你會覺得熟口熟面。


天花板更加有幅大畫。


智積院
呢個唔係好熱門嘅紅葉景點，因為都係得散散落落嘅紅葉，不過路過見到有幾個角度都幾好樣咁所以就影埋貼埋起度啦。勝在免費，哈。智積院應該就繡球花就比較出名，有興趣可以參考返之前嘅遊記。

清水寺維修就無人、之前去高台寺、多人到好似會比人推落池咁、下次大維修要50年後

正常嘅 清水寺都係個舞台值得睇

六：哲學之道（一）：南禪寺，永觀堂

哲學之道附近都係京都入面多紅葉寺廟嘅一個地方，如果跟住哲學之道咁行去睇紅葉都夠玩成日。去哲學之道嘅一邊係可以去搭京都地下鐵蹴上站。


入南禪寺會經過一座門樓，都可以俾錢入去上去參觀下，然後睇下南禪寺嘅全貌。




入面有一個庭園叫 天授庵，係一個庭園黎嘅，中間有個水池，而有段路仔嘅路係起個水池上面嘅。起京都紅葉人滿為患嘅時候，其實都驚驚地被人推左落水 。而另外一面就有枯山水嘅庭園。呢個地方起八年前黎京都果陣時都無入到黎睇，入面感覺都係一個幾舒服嘅地方。


南禪寺後面就有一個叫水路閣嘅地方，其實就係從琵琶湖引水道嘅建築物。個紅磚設計就有特色。不過呢個位紅葉就唔係咁密咁。


黃昏嘅時候返返黎呢邊等去永觀堂睇紅葉之前，都見到呢一日嘅黃昏。

離開南禪寺，向北大概行幾個街口，就到另外一個紅葉景點永觀堂啦。我唔記得左八年前黎京都就無睇到呢度秋天特別公開嘅寺院範圍入面行。感覺果度係一個依山而建嘅建築物，有幾個位又可以見到下層有路去山上面個多寶塔，感覺好似去左個迷宮咁，哈。而中間有啲庭園位感覺都幾正下。








行上後面可以去到多寶塔，就可以見到附近一帶嘅景色。我記得中間好似有間學校好似有特別嘅開放日，可以行上個天台度睇附近一帶嘅景色，不過我就無試到啦。




而永觀堂最出名嘅莫過於前面果個放生池啦。


夜晚我記得就無開放到後面果個特別公開嘅地方，不過前面果個放生池就有點燈。 起果條橋果度就長期有個人會叫人唔好停起上面度影相。而八年前我覺得一個近入口嘅一個角度都影唔返啦，因為果個位都放左堆 locker 塞住左而影唔返果度。



我都係起前面度排左一輪隊先入到去睇夜楓，不過啲人話如果遲少少去嘅話就唔使點排隊就入到。或者遲少少先入場啲夜楓會行得舒服一啲。

Ching紅葉季京都住邊度？

我果次住京都站隔離間 dormy inn。通常去京都我都鐘意京都站附近多啲。有晚豪啲住左另外一度，遲啲應該會講果間

支持
啲相好靚
Ching河口湖住邊間？

秀峰閣湖月

呢間我正有興趣，出年入住
但個官網好難搶到空缺
Ching你果陣點Book?

而家睇紅葉季千五蚊一晚

逆富士天花板

遲啲都會打返

一係住高規/新大阪？唔嫌累，搭新快速都接受到嘅。

喺 agoda 搵到話有房。我估有啲房係啲agent book 左

新大阪正
去京都同關西機場都係一程車

之前睇有啲人好似會考慮大津果邊，距離京都兩個站左右，咁就節省啲通勤時間。

lm等睇靚相

哲學之道：真如堂。詩仙堂。圓光寺

一路跟住哲學之道向住北走，就會去到其他睇紅葉嘅好地方。個人覺得哲學之道條路兩邊就唔係咁多地方睇紅葉，要去睇紅葉都係要入去啲寺要去睇紅葉。

首先就要介紹真如堂呢一個地方先。真如堂個人覺得就要去嘅。八年前就見到未紅曬就黎一場大雨打落曬啲紅葉所以無去到呢個地方。呢個地方睇紅葉果啲地方係免費嘅，而地方都算大。所以都睇得幾舒服。最特色嘅係呢度同五重塔一齊嘅角度，咁就好有日本賞楓嘅特色同角度啦。不過真如堂我記得就係起比較高少少嘅位置嘅，所以要行上黎都要少少腳骨力先得。

詩仙堂同圓光寺

詩仙堂同圓光寺就可以擺埋一齊去參觀嘅，因為都係隔離左右好近咁。我上年就要預約先入得圓光寺嘅，今年想去嘅話就要睇下係咪都係要預約先入得去。

圓光寺最出名就係個紅葉庭院，最多人影嘅都係呢個位。本身都好多人起度，但難得就係我走開左去第二個位度啦，我估應該都有一班人都係影相團黎嘅，見到個庭院果度空曬人，我都臨急臨忙去返果度影返張相啦。






起圓光寺後面上一上幾十級樓梯，會去到一個比較高嘅地點，而呢個位可以望返出去圓光寺嘅建築物同附近嘅京都景色。


圓光寺門口都有個枯山水嘅庭園



圓光寺隔離就係詩仙堂，相對黎講詩仙堂個佔地比較細小，一眼就睇曬咁濟。而紅葉好似唔係個景嘅主打而變成配角咁，而啲樹一個一個球體咁，都幾得意。不過個景睇落都舒服嘅。

暫時貼到咁：
#1 前言
#2 國泰飛台灣
#3 星宇航空 商務艙體驗
—- 京都車站周邊 —-
#7 京都：東福寺
#8 京都：西本願寺、東福寺
—- 嵐電周邊 —-
#12 京都：北野天滿宮、仁和寺
—- 嵐山 —-
#18 京都：佑齋亭、寶筐院
#19 京都：常寂光寺
#25 京都：寶嚴院、祇王寺
#26 京都：二尊院、天龍寺
—- 東山 —-
#28 京都：清水寺
#29 京都：高台寺、建仁寺、智積院
—- 哲學之道一帶 —-
#32 京都：南禪寺
#33 京都：永觀堂
#48 京都：真如堂
#49 京都：詩仙堂、圓光寺