藍色係你嘅所謂質疑,紅色係回應,自己睇
問:彼得前書個作者係咪使徒彼得?
答:由初期教會開始,使徒彼得就被公認為彼得前書嘅作者。不過近代有學者質疑呢個講法,佢哋認為呢卷書可能係有人假冒使徒彼得個名去寫,或者原本書卷作者不明,後來先歸入彼得嘅作品。
根據初期教會嘅文獻,喺二世紀已經有教父引用彼得前書,例如坡旅甲(Polycarp)同愛任紐(Irenaeus),而且當時冇任何懷疑彼得係作者嘅記載。喺書信嘅內容上面,彼前嘅用詞丶思想同四福音書丶使徒行傳相似(例如彼前 四13-14同太 五11-12;彼前 五2同約 二十一16;彼前 一10-12同徒 二14-20等等)。我哋可以睇到彼前嘅作者熟悉耶穌傳道時期同初期教會嘅事蹟。作者喺書卷結束嗰陣稱呼馬可做自己個仔(五13),呢個都同教會傳統嘅記載相符,證明彼得係彼得前書嘅作者。
質疑彼得係作者嘅人,主要有三個論點:
1)一個加利利嘅漁夫冇可能寫到咁高造詣嘅希臘文,而且佢係一個「沒有學問的小民(徒 四13),好可能只喺會堂受過基本嘅猶太傳統教育,同希臘文化接觸有限,唔可能寫到咁典雅嘅文章。
2)新約同初期教會嘅歷史都冇記載彼得同小亞細亞嘅教會有任何接觸,彼得傳福音對象又係猶太人(加 二7-8),收信嘅小亞細亞教會主要成員係外邦人,彼得冇寫信嘅動機。
3)反對者認為彼前同保羅書信喺用詞同思想相似(例如彼前 二6-8同羅 九32-33;彼前 三22同弗 一20-22等等),而彼得唔可能抄襲保羅嘅作品,唯一可能解釋就係有人冒認彼得,模仿保羅嘅口吻同思想寫咗彼前。
上面嘅反對意見係片面同偏頗嘅,依家逐一回應:
1)加利利一直都係外邦人住嘅地方(太 四15;外邦人的加利利),因為商業往來同生活需要,當地嘅猶太人由細到大已經識兩種語言,母語亞蘭文同通用希臘文,所以彼得熟悉希臘文係唔出奇。耶穌個細佬雅各亦都只係木匠個仔,都寫得出優美嘅雅各書(冇乜人懷疑雅各係雅各書作者)。
第二,即使彼得嘅希臘文真係唔係咁掂,都證明唔到彼得唔係彼前作者,因為彼得可以請代筆人寫作,當時用代筆人寫信係好普遍。由彼前 五12我哋甚至睇到,西拉可能就係呢個代筆人。另外值得留意嘅係,彼得後書嘅文筆係比較差,如果彼得後書係彼得親手所寫,咁前書係代筆人寫嘅就顯然而見。當然,彼得亦都可以係請咗兩個唔同嘅代筆人寫前書同後書。
2)關於質疑嘅第二點,個講法有兩個問題。首先,缺乏記載唔代表冇發生過。彼得去過好多唔同嘅地方,包括敘利亞(加 二11)丶哥林多(林前 一12),教會傳統認為佢去過羅馬,而且喺嗰度殉道,彼得同小亞細亞嘅教會有接觸係有可能嘅。
第二,冇經文暗示彼得唔會服侍以外邦人為主嘅教會。雖然加拉太書二章7節話「反倒看見了主託我傳福音給那未受割禮的人,正如託彼得傳福音給那受割禮的人。」但我哋唔能夠拘泥於字面意思,嗰句說話只係區分保羅同彼得嘅服侍對象,但唔係硬性規定。呢個可以由保羅去到每個地方,都先去猶太人為主嘅會堂傳福音到睇得出。彼得用耶穌基督嘅使徒呢個身份寫信去勉勵呢啲喺患難入面嘅教會係好恰當嘅,尤其係保羅似乎同呢啲教會嘅關係唔係話好密切。
3)使徒嘅教導有共通之處根本唔出奇,佢哋可以係採用相同嘅資料來源,例如因為都係用主耶穌嘅教導做基礎,所以論述會有類似嘅表達,甚至大同小異嘅用字。另外,彼前大量引用舊約(僅次於啟示錄同希伯來書),我哋可以咁去理解,新約作者入面類似嘅陳述,因為作者係喺共同嘅傳統上面,再根據本身嘅經歷同領受,作個別嘅發揮同應用。
總括嚟講,反對彼得係作者嘅人,佢哋嘅論點唔足以推翻書信本身嘅證據同教會傳統一致嘅睇法,即係使徒彼得就係彼得前書嘅作者。
https://t.me/gospelsharing/1730