【一連9日 每晚更新】四國關西復活節賞櫻遊記

9日多圖多美食遊記已寫完，按照慣例會一連9晚瞓覺前更新

人生第一次櫻花季去日本，今次一連9日去咗四國加關西。本身其實無特別話去睇櫻花，所以無刻意安排追櫻行程，搵好嘢食先係旅途重點。唔知做乜上年突然好想去四國，所以就揀咗高松入、大阪出；香港去高松只得HK Express，買飛就直接兩程都UO。今次撞咗少少復活假，所以包行李算貴，要近HK$4,500。事前book咗6間餐廳，出發！

live咗可以舊文回顧先：
【兩星期北海道～非自駕遊記】https://lihkg.com/thread/3423408/page/1
【東京8日遊記】https://lihkg.com/thread/3532967/page/1
【台北5日遊記】https://lihkg.com/thread/3716134/page/1

交通

夏天啦，post乜撚櫻花？留返拜山先post啦。

今次獨遊，成個trip計哂使費大概HK$26,000全包；貴在機票，然後係住宿，因為去咗住晚溫泉旅館 之後轉季又買下夏天衫

使費大概有以下類型：
1. 機票：坐UO，HK$4,443；去程包咗20kg行李、回程25kg；早機晚返，回程買咗U-First（我記得買個日高松做緊特價，望住佢由$500加到過千，即刻買咗先，之後每日無痕check都無減過價，千頭個陣無嘅話，分分鐘會因為太貴而唔去）
2. 保險：揀咗AXA，HK$414
3. 電話卡：KKday HK$158，高速每日2GB夠用
4. 食：HK$5,800，事前book咗6間餐廳，之後會逐間寫
5. 買：HK$6,800，最尾去咗臨空城Outlet，中間夾下公仔、扭下蛋、買下手信
6. 酒店：HK$6,800，住咗4間酒店，有近一半錢去咗住一晚溫泉旅館，所以先咁貴
7. 交通：HK$1,500，今次無買任何Pass，全交通卡
8. 景點：HK$280，入場費有少少
9. 其他：HK$80，洗衫乾衣咁

行程安排我覺得算輕鬆，今次total去9日，下午機到達四國，夜機關西走，時間算好充足：
Day 1：香港直航去高松機場 → 屋島 → 宿3晚高松
Day 2：高松城跡 → 粟林公園
Day 3：金都比羅宮
Day 4：去德島 → 大塚国際美術館 → 鳴門漩渦 → 宿1晚德島
Day 5：去有馬 → 宿1晚有馬溫泉
Day 6：去大阪 → 狹山池公園賞櫻 → 宿3晚大阪
Day 7：京都
Day 8：大阪市中心hea
Day 9：臨空城Outlet → 關西機場返香港

今次搬過酒店，高松 > 德島 > 神戶 > 大阪咁去，平均一程坐個幾鐘；直接高松去大阪要轉車，仲要坐3、4個鐘

Day 1 行程概要
- 香港直航去高松機場
- 狗衝上屋島
- 酒店check in
- 晚餐迴轉壽司

旅程開始！香港去高松只得UO有航班，09:40出發、14:05到達。我就07:40左右到，好耐無試過撞節日去旅行，假期真係幾多人下。


8點鬆啲Check in完，去食咗個麥當勞早餐，飲杯Americano開始呢個美好旅程。


最後上咗機先話Delay，遲咗一個鐘先起飛，最後近三點先完成入境。



出發個日香港天氣好差 去到高松就好好天

酒店Room Tour：Dormy Inn 高松
出去搭機場巴士，坐大半個鐘就出到市區。高松代表角色當然係小呆獸，機場巴士已經係佢個樣，今個trip喺唔同地方都有佢嘅樣㗎。記得之前睇另一個巴打四國遊記就好想去



今次會喺高松住3晚，揀咗Dormy Inn，市中心有兩間，揀咗近大街個間，大大間單人房3晚共HK$1,343，有大浴場、宵夜拉麵，連鎖中我偏好Dormy Inn，啲房基本上都開到成個行李唔使合埋都暢通無阻

狗衝上屋島
Day 1原本係緊湊嘅，Plan咗落機就去栗林公園，但遲咗落機所以臨時改plan。今日好好天，聽日起天氣預告都話落雨，所以即時轉行程，狗衝上屋島先。落樓去返車站都係幾分鐘路程


先搭去JR屋島駅或琴電屋島站，個頭會有巴士上屋島。要注意星期一至五山上落山尾班車係5點前，星期六、日先有得睇埋日落先落山。我個日其實上到山已經16:30，落山尾班車係16:54，得20分鐘行，但今日唔去屋島應該嚟緊幾日都無機會去，又唔想喺市中心hea，所以照上去。


車站有瓦遮頭，唔驚淋雨

人哋post乜要經過你審批？開post講嘅嘢有時間限制？你冇撚病？

呢度係fans club定討論區？唔畀得反面評語？一定要人讚嘅post上個人Facebook囉。

屋島極速遊、行高松商店街
原本想去屋島展望台，但計過去唔切，只係夠時間去神社行個圈就返去搭車。


天氣好其實咩景都靚，如果有得睇埋日落就好了。落山行路係要1個鐘，其實係可以睇埋日落先行落山，但山卡啦廢時亂嚟，搭巴士5分鐘就落返山。


落返山搭返電車去市中心，酒店行兩步就係高松商店街，所以遊走範圍都係附近。呢條商店街算多嘢行，有啲扭蛋舖，而大街就有幾棵櫻花，唔多但成世人第一次見到櫻花，所以都少少興奮。


今個trip另一樣想做嘅係去抽一番賞，呢期有個主題係愉快動物餅，最後中咗memo紙 同埋終於搵到爆紅嘅焦糖燉蛋雪糕，今晚宵夜有著落



行到咁上下就去食晚餐，原本mark咗去「酒甫手」居酒屋，最後見到間評分唔錯嘅迴轉壽司就決定食佢。

Day 1晚餐——迴轉壽司——瀬戸の祭寿し 兵庫町店（Tabelog 3.44分）
（https://tabelog.com/kagawa/A3701/A370101/37010375/）

行過商店街見到有間迴轉壽司，見到評分唔差就入咗去。我5點50幾分入到去，一坐低就愈嚟愈多人了，好彩趕得切入去。有平板可以自己order


叫咗杯細啤酒chill下，壽司望樣係唔靚仔嘅，但食落ok啦，件蛋好甜。其中幾樣食物：





今餐盛惠¥3,185（港幣$166），都好飽下，食咗半個鐘左右就走人了。

Dormy Inn宵夜拉麵
出到嚟6點半左右，個天開始黑，去返頭先間扭蛋舖玩咗陣。扭咗隻邪留丸，童年回憶，仲有好hit嘅生蠔BB 之後就返酒店沖涼抖下，然後9點半就落餐廳去食Dormy Inn最大特色之一：免費宵夜拉麵。聽講全國個味道都好似一樣的，每碗有埋紫菜、荀絲，我覺得真係好好食，任你攞無限quota的，見到有啲人直頭攞幾碗做晚餐


食完拉麵就出去便利店，買埋焦糖燉蛋雪糕返酒店食，第一次試，幾啱我口味，呢個trip應該會再買嚟食！



第一晚順利完結，Day 1完！

小呆獸

就係睇咗你個遊記 先揀高松

Day 2 行程概要
- 高松城跡
- 粟林公園
- 晚餐骨付鳥

今日原本有三個plan，第一係去紫雲出山賞櫻，玩埋高屋神社、父母之濱個面；第二係周邊跳島遊；第三係高松市區一日遊。最後由於紫雲出連山花蕾都未開，所以自己ban咗；跳島排唔啱時間，揀咗留喺市中心算。下年瀨戶內海藝術祭有諗過再嚟四國的，下年再plan玩深入啲 10點左右就出門口，今日天氣一般般。


早餐當然係食McGriddles！酒店對面街就係麥當勞，亦係其中一個我揀住呢度嘅原因。個包今次好樣衰，不過味道都係一流，已經榮登「我最喜愛日本早餐」，每次去日本最少會搵兩日食。溫馨提示，日本M記早餐只係到10點半，想食就要留意啦。

初訪高松城跡
食飽就慢慢行過去高松城跡，其實由酒店行過去都要大半個鐘，但搭車只係搭到一個站，而且落車仲要再行，所以直接行路。一路行都見到唔少小呆獸嘅嘢，包括郵箱。


呢個時候天氣開始放晴，慢慢行大約半個鐘左右就到咗。高松城跡呢度其實算係個公園，入場費要¥200。


原來呢度有一個好大個櫻花園，但90%都未開，所以影相效果真係麻麻哋，如果等多4、5日左右應該就滿開，咁嚟呢度賞櫻就一流啦。




行咗陣就出發去粟林公園，高松最主要景點之一，點都要去潮聖下。

初訪栗林公園
由高松城跡呢邊可以搭電車去栗林公園，落車要再行10分鐘。呢個時候個天開始暗，應該就嚟會落雨 去到公園非常之大，不過路線計劃係好方便遊人，沿住啲主要路線就可以行哂成個公園。仲有個地圖話你知有櫻花嘅地方，果然係重要景點。


周圍行下，同樣會有櫻花樹，係一大棵個款，但散開晒，加上天黑黑所以影唔到啲咩相。



睇人哋遊記，栗林公園必影係呢度，有條橋，不過天氣差到勁大舊黑雲


仲有個位有條瀑布仔，有人過嚟打下卡咁。


呢個公園如果天晴應該幾好影，不過今日天黑黑就無計了。

北濱alley午餐摸門釘
行完栗林公園，出到去有個「香川物產館 栗林庵」，係畀你買下手信。同樣有好多小呆獸精品，呢個手襪勁可愛，但小朋友用所以無買。


行完手信舖就出發去北濱alley，事前搵咗間海景Cafe。今次就搭巴士過去，沿路會見到好多櫻花。原先mark咗嘅係一間叫「umie」嘅Cafe（Tabelog 3.56分），但去到竟然畀人包咗場，明明望過唔係公休，有個日本妹同我一樣摸門釘。



北濱alley其他食物都唔多吸引，同埋本身都唔多舖頭，唯一想食嘅竟然無開。原本想搵呢間食士多啤梨甜品嘅做代替，不過最後無入，決定返商店街食另一間bookmark咗嘅雪糕店算。

Day 2午餐——雪糕——瀬戸内ジェラート MARE（Tabelog 3.47分）
（https://tabelog.com//kagawa/A3701/A370101/37010401/）

去到雪糕店，勁多人排隊。自己最鍾意食嘅甜品就係雪糕，每次旅行都會搵定一堆雪糕店


今次揀咗triple，要咗開心果、士多啤梨芝士同焙茶，盛惠¥710（港幣$37），開心果係要另外加錢嘅。店員最後會畀多一細啖另一隻味你試，勁好人，係士多啤梨味，所以total會食到4隻味！


我覺得好好食，所以第二日又再返嚟食多次。

要等一個鐘嘅骨付鳥名店
食完雪糕繼續行商店街，呢度其實幾好行，有間大MUJI、唔同買衫舖，同各式各樣嘅扭蛋舖，不過印象中無夾公仔，有埋就完美。


行咗陣去食FamilyMart炸雞，炸雞嚟講Lawson真係明顯高一班，個肉汁係正好多


行多陣就去食晚餐，因為今日晏晝真係skip咗正餐，所以決定早啲去食。今次揀呢間叫「骨付鳥 一鶴 高松店」，食骨付鳥。5點就開門，我05分去到竟然排晒隊，個陣仲要係勁大雨。排咗10分鐘入到去，要登記定，一個鐘後先有位。



由於太大雨，酒店其實喺附近5分鐘路程，所以去7仔買咗杯Smoothie就返酒店等，差唔多夠鐘再行返去食。

Day 2晚餐——骨付鳥——骨付鳥 一鶴 高松店（Tabelog 3.66分）
（https://tabelog.com//kagawa/A3701/A370101/37000546/）

準時去到，帶我上2樓坐4人枱，Menu有齊中英日文，仲有公仔喺上面。「骨付鳥」其實算係烤雞脾啲friend，唔知大家有無喺香港食過「鰹烏冬」，有幾間分店，就係食烏冬加骨付鳥，觀塘打工仔應該會好熟 而鰹烏冬個師傅聽聞就係喺高松學過點整，一場嚟到高松，當然要食下地道嘅骨付鳥。


事前search過大概有咩食，我就叫咗隻骨付鳥、雞肉飯同烏龍茶。骨付鳥佢有分母雞同雛雞，我就揀咗雛雞。佢仲有一碟椰菜包埋，啲菜真係勁甜 用嚟平衡骨付鳥嘅超多油非常有用；但隻雞我覺得同香港食嘅分別不大，因為調味都係個啲，但個雞肉飯我覺得好好食，大家記得要叫飯



今餐盛惠¥1,782（港幣$93），同香港食係差唔多價錢。

早瞓迎接Day 3打大佬
食飽都係7點鬆啲，去咗超市買生果，買咗盒士多啤梨，又甜又大粒好抵食。返去沖完涼等9點半又落去食宵夜拉麵，真係好好食


食完今日早啲瞓覺，因為聽日會打成個trip嘅大佬——行金刀比羅宮。Day 2完！

Day 3 行程概要
- 四國名物：烏冬早餐
- 金刀比羅宮
- 晚餐法國菜

今日係成個trip嘅重點——行金刀比羅宮，由於有少少遠，所以一早8點鐘就起身。高松過去金刀比羅宮，只需要搭一程電車，一個鐘去到琴電琴平，然後就係行幾個鐘山了。出門個刻天少少暗，但食完個早餐就出太陽了


早餐先去食名物烏冬，本人其實唔太好烏冬，但嚟到無理由唔食一次。Tabelog上高松高分烏冬一係就有啲遠，一係就無咁早開，所以揀咗間市中心嘅就算。

Day 3早餐——烏冬——麺処 綿谷 高松店（Tabelog 3.65分）
（https://tabelog.com//kagawa/A3701/A370101/37005730/）

呢間烏冬店都係酒店步行距離內，全自助形式，門口有個圖文menu，每款烏冬都有相睇。



配料就係預先整好嘅，其實同丸龜其實差唔多，自己夾完就去畀錢。

揀咗要個熱嘅牛肉烏冬，要咗粒溫泉蛋同夾咗件炸物，炸魷魚嚟。烏冬唔覺有咩咁特別，炸物好一般 今餐¥740（港幣$38），好平好平。