【一連9日 每晚更新】四國關西復活節賞櫻遊記

Day 7晚餐——燒鳥——焼鳥 市松（Tabelog 3.98分）
（https://tabelog.com/osaka/A2701/A270101/27013209/）

大阪最高分嘅燒鳥唔係佢，Tabelog佢排第三高分，但頭兩位book唔到，所以揀咗佢。焼鳥 市松係米芝蓮一星，Omakase.in上可以預約，唔難book。預約時揀埋個set，今次揀咗配清酒，包4杯，最後飲到醉醉哋。


入到去餐廳，有分bar枱同普通枱，自己就坐bar枱，望住師傅整嘢食。 其中一個侍應係日本人，但學緊普通話，所以負責serve我，仲會keep住聊人傾計。


坐低先上第一杯清酒，自己其實少飲，今次只係想試酒set。


然後就上咗個雞湯，浸住個舊唔係豆腐，係芝士，幾有趣。

（續）Day 7晚餐——燒鳥——焼鳥 市松

開始食燒鳥，第一串係雞肉，佢調味落晒，自己都唔需要食乜嘢。


食完就會畀第二杯清酒你。


第二串嘅雞有埋皮，夾住大蔥同雞腎（我估係）。


第三串係鵪鶉蛋。


然後就會上一份凍食，雞肉沙律。佢會抬隻脾出嚟畀你睇個樣，其中一樣主打嚟。



之後食返串燒，係燒雞翼，得返一隻骨方便食用。


食完雞翼會上第三杯清酒。


下一道係食菜，燒菇，唔會太乾仲有少少汁，唔鍾意食菇嘅我接受到。


之後上咗個雞肉多士。


同埋一個雞湯。

（續）Day 7晚餐——燒鳥——焼鳥 市松

然後會係表演時間，會好大火去燒雞肉，一人一碗，呢兜肉好好食。


之後雞肝、超巨型玉子燒、雞肉串等。





呢度上埋第四杯清酒，最後無飲哂因為真係少少醉，未死得但個人好熱，4杯清酒酒量係咪好weak？

（續）Day 7晚餐——燒鳥——焼鳥 市松

跟住會拎個大鍋出嚟，入面有隻雞，煮咗啲雞湯出嚟，一人一細啖。


然後再上個腐皮卷、免治雞肉串，無記錯去到呢度就完咗。



之後就係散叫時段，會畀個menu你，我先要咗串雞皮，無乜特別。


個餐仲包咗個飯，會連漬物，呢個時候上畀你。


另外再散叫要咗串提燈，今餐有少少係想食佢而嚟，熱辣辣然後啲蛋黃喺你個口入面爆開，又幾有趣。


最後食甜品、飲熱茶就完了，今餐包埋清酒同散叫要¥19,430（港幣$1,010），下次去大阪都想食下燒鳥，有機會再訪。


最後個人醉醉哋咁返酒店


沖完涼個人都好攰，連宵夜都無食就瞓咗。Day 7完！

Day 8 行程概要
- 梅田一日遊
- 晚餐Omakase

今日係最後一個full day，本身諗住去LaLaport門真Outlet，上年新開嘅，最後無去。呢日無乜行程，但都book咗午餐同晚餐，所以留咗喺大阪。朝早10點左右出門口，天氣好差好大雨。


早餐又先去食個McGriddles，之前睇Facebook有人話香港暑假都會有，希望真係食到。（聽朝有得食啦！）



食完早餐去阪急買手信，今次本身search定ECHRIE，買咗奶油餅乾，食後感係無特別。個日落緊雨，所以啲店員會幫你袋手信包多層膠袋，唔驚整濕。



買完一袋二袋，所以返酒店放低啲手信，然後出發去食午餐。

Day 8午餐——法國菜——俺のフレンチ 梅田（Tabelog 3.52分）
（https://tabelog.com/osaka/A2701/A270101/27092618/）

Plan餐廳個陣想食下鵝肝 所以就搵下有無相關餐廳，最後就book咗呢間試下，Tabelog上預約。為咗佢個鵝肝牛扒而嚟，叫咗個set，包飲品、沙律、法包。





鵝肝同件牛一樣大，底下薯蓉好食



最尾叫多個抹茶Mont Blanc做甜品，幾滿足。


埋單¥5,016（港幣$261），食完就去行街了。

梅田周圍遊
先去咗BANDAI NAMCO Cross Store，都係上年先開，除咗有扭蛋、夾公仔，仲有一個巨型一番賞專區，有埋舊款抽，見好多人排隊玩。


之後去埋附近啲namco、taito station，不過無乜收穫。


由於天氣太差keep住落雨，行唔到室外，自己又行到太攰，所以3點幾就返酒店hea下先。5點幾出返去行下，因為今晚book咗6點食Omakase，喺酒店附近，所以慢慢行過去。有間喺地下鐵商店街嘅GiGO，試咗兩三部機都係大伏。


6點前準時去到餐廳，同樣喺北新地個頭，即係尋晚燒鳥附近。呢度有唔少餐廳，應該都係中高檔為主，人流好旺。

Day 8晚餐——Omakase——寿司 赤酢（Tabelog 3.76分）
（https://tabelog.com/osaka/A2701/A270101/27114022/）

再高分啲嘅Omakase完全book唔到，高分至低分咁揀，最後揀咗佢，Tabelog上預約。Omakase價錢¥22,000（港幣$1,100），可以另加嘢飲同其他散叫壽司。


入去坐低會見到menu，中英日三個語言，中文仲要係繁體字，應該serve唔少旅客。



套餐包19樣食物，叫埋飲品就開飯。唔敢叫酒，前一晚有陰影

（續）Day 8晚餐——Omakase——寿司 赤酢

第一道煙燻鰹魚，今個trip食咗兩次呢樣嘢，覺得幾好食。


第二道西京燒，好滑，個舊好似係烏魚子，自己少食呢樣嘢，以為明太子啲friend，但烏魚子無咁鹹。


第三、四道都係浸柚子醋，分別係喜知次同蠔。



第五道就開始握壽司，連上三份吞拿魚，中拖、赤身、大拖，三個都正，無筋個款。

（續）Day 8晚餐——Omakase——寿司 赤酢

第八道係赤貝，爽口好食。


第九道茶碗蒸，加咗金目鯛。


第十道鵝肝鰻魚飯，估唔到今日會食兩次鵝肝，呢份好好食 兩樣食材原來幾夾，鰻魚無骨更開心。


第十一道繼續握壽司，小肌。


第十二道海膽，唔記得咩產地，但好撚好食，勁甜。


呢個時候個廚會問你加唔加¥3,000試特選海膽，一樣咁鮮甜好食


食到呢度已經覺得下次嚟大阪會n call呢間。

（續）Day 8晚餐——Omakase——寿司 赤酢

第十三道係蜆，好少喺壽司食到蜆。


第十四道鮑魚加鮑魚肝醬，自己撈埋食，個醬好濃。


第十五道斑節蝦，又係一隻高水準嘅蝦，好好食。


第十六道海鰻，食完就開始埋尾了。


第十七道係味增湯。


第十八道吞拿魚卷，佢會問你會大中小咩size，我好似要咗小。隔離位日本男士要咗大，真係好撚大。


第十九係雞蛋布甸，雪到凍一凍好好食。


今餐計埋飲品同另外加嘅特選海膽，埋單¥26,200（港幣$1,362），唔難book加上有水準，大阪Omakase我幾推薦佢。 食完返酒店執下行李，因為聽日就返香港了。Day 8完！

Day 9 行程概要
- 炸豬排 Manger
- 臨空PREMIUM OUTLETS
- 返香港

最後一日6點就起咗身，因為要去食炸豬扒。天氣唔叫好差，沖個涼執下嘢，未7點就check out了。




今日要食嘅係炸豬排 Manger，無得book位，必須親自晨早去排隊，所以先會咁就起身。事前諗過下今日活動路徑，決定帶埋行李去天王寺站啲locker寄存，然後直接起行去豬扒店登記攞位。

全日本排名第一炸豬扒
八尾Manger係喺全日本排名第一嘅炸豬扒店，對上一次六年前嚟大阪，都去咗試。個陣一試難忘，所以今次再嚟大阪，當然要預返時間嚟食。Manger每日分Lunch及Dinner，朝早8:30就會同時開放登記，所以要食晚餐都要一早到。我當日7:50去到，有兩個人排緊，到8:30開始登記，個陣已經排咗十幾個人。


為咗唔影響之後行程，我揀咗食最早嘅11:00，寫完名就返去天王寺食早餐。Last day同樣係食個McGriddles，本身以為今次食完又有排先食到，好彩香港引入咗。


喺M記食完hea到咁上下，去咗夾下公仔，就返去餐廳食嘢了。

Day 9午餐——炸豬扒——とんかつ マンジェ（Tabelog 4.23分）
（https://tabelog.com//osaka/A2707/A270705/27013624/）

準時11點去到，呢度係全Bar枱，會望到哂炸豬扒過程。抽油煙機效果一般，坐得耐會聞到油煙味。


佢呢度有set畀你揀，¥3,520起跳，我就散叫咗兩份，要咗個鵝肝餡嘅炸豬扒，同一份里肌。


先上醬料、椰菜沙律同前菜，然後就上炸豬扒了。

（續）Day 9午餐——炸豬扒——とんかつ マンジェ

先上咗鵝肝餡炸豬扒，6年前正正係因為呢道鵝肝餡炸豬扒，令我記到宜家，唔係佢我今次未必會返嚟，但我會形容今次質素係大退步。


今次完全無咗個種驚為天人嘅感覺，個樣都已經唔吸引。


另外里肌都係大退步，層皮一夾就散，對上一次去東京食成藏仲好過呢度。



今餐埋單¥7,040（港幣$366），價錢我覺得可接受，因為都叫有兩份主食，但質素大倒退。仲要8點嚟排隊先食到嘅話，應該無下次了，去返正常個啲算。

臨空城Outlet
食完嘢就返天王寺拎行李，然後就入臨空城Outlet了。


入到去天氣開始好，呢度先去咗夾公仔，呢兩部都係幾百円就夾到，勁抵玩。



然後就圍行下，行到攰再去Starbucks飲Frappuccino，補償午餐嘅失落，5點左右就入機場了。

關西機場中伏晚餐
今晚係坐20:45嘅機返香港，但由於聽過大多人話關西機場要預耐少少過關，所以我都預早咗入嚟。


回程搭UO，買咗U-First，極速就登記完入得去，所以實際18:30左右就過完關，勁快


之後去食晚餐，關西機場唔覺好多嘢食，原先mark咗拉麵MENSHO同nana's green tea，最後去食拉麵。¥1,830（港幣$95），細細兜無特別又貴，點解回程好似好多伏。

四國關西復活節賞櫻遊記，完
最後8點幾上機，香港時間23:45左右就land咗。


轉下shuttle凌晨12:30就去到的士站，飛的返歸準備第二日又返工了。


Day 9完！高松大阪攰爆之旅，完！多謝支持！