【一連5日 每晚更新】台北5日遊

自己習慣寫完先會開post，以防爛尾，所以遊記已寫完，一連5晚瞓覺前都會更新

上次去台灣已經係2019年嘅事，個年去咗兩次台灣，一次去台南、墾丁，另一次就台北。事隔5年再去台灣，今次喺冬天時去台北5日4夜（不過落咗4日雨，打風咁款）出發前都係整入台證，同埋行程都係以食為主，無乜景點。事前book定3間餐廳，其他無得預約嘅就bookmark定，出發！

live咗可以舊文回顧先：【兩星期北海道～非自駕遊記】https://lihkg.com/thread/3423408/page/1 、 【東京8日遊記】https://lihkg.com/thread/3532967/page/1

今次二人行，去台灣係直接銀聯ATM禁錢。機場出關前已經有ATM可以直接禁錢，無乜人排所以就禁咗先。今個trip包晒機票、酒店、同所有使費，total用咗HK$26,000左右，覺得都幾貴，短期內都未必再去台灣了，夏天咁熱同日元低水，之後嘅trip都係去日本。

使費大概有以下類型：
1. 機票：今次搭長榮航空，兩張機票共HK$4,751
2. 保險：AXA，兩人共HK$442
3. 電話卡：KKday買，台灣大哥大4G無限data，兩張共HK$158；好用無伏
4. 住宿：今次住「洛碁大飯店忠孝館」，近忠孝敦化站，4晚HK$3,000
5. 交通：全程公共交通用悠遊卡，增值咗TWD2,000（一次一人TWD1,000）
6. 食：HK$9,400左右，事前book咗3間餐廳，燒肉Omakase、壽司Omakase、鐵板燒，之後再逐間再寫
7. 買：HK$5,500左右，去咗Outlet，但買衫嘅話去NET啦，抵到傻
8. 玩、景點：HK$1,670，主要去咗次不老松按摩，同埋夾下公仔、扭蛋

睇埋行程先就開始，今次total去5日4夜，中午機去、黃昏機返
Day 1：酒店 → 睇電影 → 板前中山（預約）
Day 2：野村壽司（預約）→ 多啦A夢展 → 西門町
Day 3：不老松按摩 → 林口Outlet → The Stage Canteen
Day 4：中山、赤峰區 → 買手信 → 和牛涮
Day 5：阪前和牛鐵板燒（預約）→ 返香港

Day 1 行程概要
- 香港出發去台北桃園機場
- 酒店check in
- 松山文創園區（去咗睇戲）
- 板前中山，食燒肉Omakase

正式出發，今次搭嘅機係長榮航空，平日嚟但機場都幾多人。早餐食M記，每日都要齋啡嘅都要飲返杯先得。


準時上機，個位好前排，班機就無乜人；無個人電視，不過個半鐘好快過所以無乜所謂。呢程機有個炒飯，炒得幾好食；上面兩舊係叉燒嚟，肉酸但係真係有叉燒味。食飽轉個頭就落機，13:00就到。


落機之後過關都好順暢，而入境前就去咗ATM禁台幣，因為幾年無嚟真係一蚊都無，然後就搭車去酒店。事前知道呢幾日都會落雨，所以都無乜安排戶外活動，但就真係落足4日，走個日先好天。

酒店Room Tour：洛碁大飯店忠孝館
今次酒店係喺忠孝敦化站隔離嘅「洛碁大飯店忠孝館」，4晚共HK$3,000，有兩張床，價錢包埋4日早餐。有啲房平啲但無窗，要有窗嘅人記得留意。間房超大，有張書枱，有浴缸；每日打掃、每日有兩枝水，下次再去台北可能會再住。加上酒店隔離有商場、樓下有間宵夜拉麵店同便利店，早餐又幾好食。


放低行李大約15:30，出去食個下午茶，落街就落緊雨要開遮。第一餐去咗食雪糕 係事前bookmark定嘅一間餐廳；聽聞台灣人用開Google Map評分，所以搵餐廳有啲難度。

Day 1下午茶——Cafe——Maccanti馬卡諦義大利冰淇淋（Google 4.6分）
（https://maps.app.goo.gl/S3ZJaCJ3dzzg8xmx6）

距離酒店行8分鐘，入面得幾個人。呢間除咗有雪糕、蛋糕，仲有意粉個啲熟食；前者就cashier有個櫃放哂出嚟。



今日叫咗個意粉，意粉完全無特別，可以慳返


雪糕有set可以配蛋糕，所以蛋糕叫咗個Tiramisu。雪糕本身想叫薄荷朱古力，但佢話口味係每日輪流供應，所以叫咗開心果。


雪糕好食過蛋糕同意粉，過下口癮ok嘅。最後再order咗個雙拼，要咗朱古力同一個叫松子蜂蜜嘅味，幾特別。


成間餐廳無乜特別，避雨食下ok嘅，唔使特登試（鍾意食雪糕嘅之後有推介，請睇埋落去）呢餐TWD600（HKD$150）。

台北睇電影初體驗
食飽就搭車去「松山文創園區」，原先訂行程時係mark咗行附近商場就算，不過因為夜晚餐廳book咗8點，見仲有幾個鐘就去松山算。好多舖頭行，雖然係室內但其實唔同大樓接駁都要行室外，但已經落咗幾個鐘雨，真係人都煩


最後行去誠品算，入面有個戲院，由於唔想再落雨周圍行，所以入咗去睇戲 二刷咗《年少日記》，廣東話版嚟，睇多次都係一樣震撼。戲院體驗就同香港無異，一張戲飛TWD310、近HKD$80。


套戲兩個鐘，睇完戲啱啱好可以去搭巴士，出發去預先訂咗嘅晚餐。今晚食板前中山，燒肉Omakase，喺新光三越。

Day 1晚餐——燒肉Omakase——板前中山（Google 4.7分）
（https://maps.app.goo.gl/RXX1qP1KYHqkVhzG9）

雖然佢叫「無菜單燒肉Omakase」，但其實網上食評都係個啲食物，有得另外單點食物咁解。事前上官網book定，要先比按金TWD4,000；之後會收到email問下有無敏感個啲，就confirm哂成個booking。


準時去到入場，樓底非常之高，侍應會負責所有燒嘅過程，坐低食就得。Bar枱式坐法方便侍應燒嘢，圍住個廚房所以會睇哂準備過程。當日坐爆哂，大概1個侍應應付2組客（每兩個人叫1組，所以1個侍應會對4個客）。

開始會畀個飲品menu你，叫咗個冷泡茶。呢個時候會問埋你有無需要單點，主要都係海鮮類，我哋就叫咗兩份「南非鮑魚 · 蟹膏味噌」。


之後枱上有張紙會叫你放上火燒下，有熱力就會出到字，係食物Menu，識得玩下gimmick。已經唔記得咗叫3,380定3,680，食嘅肉都唔多記得了，盡講。


前菜首先有呢個奶油娃娃菜


之後就有呢個research時見到，而吸引咗我嚟嘅呢個「和牛盒」，有60%係為咗呢兜嘢而嚟打卡必影，入面有和牛他他、海膽、三文魚子、飛魚子，撈埋一齊食。好食嘅（呢堆食材放埋一齊都唔好食就死啦），但未夠驚艷；前年去東京「蕃」食嘅和牛他他，好撚好食！


之後上沙律，有一粒大嘅燒帶子，半生熟啱啱好。

續：Day 1晚餐——燒肉Omakase——板前中山

之後開始食肉，牛舌有啲柚子物體，其他燒肉應該有嘅部位都有齊，但無好食到令我大讚。（Day 5食嘅平價鐵板燒抵食好多，真係一分錢一分貨）









去到中段會上一兜芭樂，有少少冰沙喺上面，唔同肉之間會食少少去清清前一道菜個味，呢兜抵讚嘅。


之後燒翠肉瓜、燒菠蘿，呢餐都幾多菜，關心到去旅行無菜食嘅人。


之後到返肉，和牛上有海膽同蟹肉（唔係好記得係咪蟹，個樣似，真係太耐了）。食完呢兩碟就完咗啲肉啦～

上個禮拜先去完，悶到仆街
松山文創園區冇乜嘢好睇

續：Day 1晚餐——燒肉Omakase——板前中山

然後就到單點嘅鮑魚，佢加咗啲蟹膏味噌，拌住啲本菇、前面係蒟蒻啲friend。無特別，加咗蟹膏唔會難食，完全但唔值得單點。



（sor睇漏咗原來仲有肉）下一道和牛會連蛋黃上，食完舊牛會畀粒炸米飯嘅嘢你，再加啲三文魚子食。


最後收尾都有和牛炒飯、有個湯，同一個金箔布甸，之後就完了。

今餐盛惠TWD9,229（HKD$2,307.25），但真係好普通下。我感覺係用好多大眾認知唔算平嘅食材，再加啲gimmick嘢，唔明點解台灣人捧到咁（google間舖頭啲新聞形容到勁浮誇），絕對有其他更好選擇。

今日最好食係呢個宵夜

食飽見停咗雨，所以就行15分鐘返酒店。中途見到幾間舖頭就bookmark定，過幾日再返嚟，呢頭真係算多嘢行，仲要開到夜一夜。酒店轉角位有間FamilyMart，呢個雪糕大福好味到癲，超推薦 個陣仲要買一送一，TWD59（HKD$15）有兩個，過兩日我再買多次。（花生好食過芝麻）



食飽瞓覺，Day 1完！

我個陣仲要struggle咗一陣 去華山定松山

手指唔夠長，hi左負評

晚餐就咁睇幾吸引呃到人

其實唔明點解香港人要飛去台灣食日本嘢
仲要預約同食足三餐
直接去日本食唔好？

Day 2 行程概要
- 野村壽司，米芝蓮一星Omakase
- 中正紀念堂多啦A夢展
- 西門町
- 劉山東牛肉麵

今次呢間酒店有包早餐，所以4日都喺度食咗，如果無包我應該會日日落街食蛋餅。早餐有好多款麵包，有個焗爐自己烘返熱。西式嘅腸蛋、穀物、炸物、菜同水果、中式嘅粥，飲品都有齊咖啡、奶、果汁個啲。自助餐嚟講水準算幾好，仲要款式都多，重點係同類型食物佢會日日唔同，例如蛋會係太陽蛋、炒蛋、烚蛋咁每日唔同。


午餐Omakase係十二點半先食，都係酒店步行距離之內，行12分鐘，未夠鐘就附近行下。酒店隔離有棟商場，Daiso、Uniqlo、GU個啲都有，對面街有間巨型Zara，所以今次酒店選址真係好唔錯，行到咁上下就出發去Lunch。

Day 2午餐——Omakase——野村壽司（Google 4.5分）
（https://maps.app.goo.gl/uRBwkf6B6QdzyXBc9）

今日午餐揀咗食呢間「野村壽司」Omakase，已經係多年米芝蓮一星，同樣網上預訂，要先畀TWD4,000按金。


Bar枱為主，坐到十幾個人，坐低會問你揀咩價錢，分TWD4,000、6,000及7,000。揀咗TWD6,000（HKD1,500），食咗21樣嘢，呢間我覺得抵食！


師傅會一路同你吹水，節奏好好唔會太趕急。前菜：

續：Day 2午餐——Omakase——野村壽司

之後就係壽司，蝦、蟹、海膽個啲都有齊。第4款蝦同第6款蟹肉好好食








壽司食咗一半時，佢會上個茶碗蒸，比較難忘；因為放咗切粒蝦落去，口感特別豐富。

續：Day 2午餐——Omakase——野村壽司

下半場壽司，成餐只計壽司total 14款再加個細卷。









最尾上面豉湯同甜品，係紅豆粥湯圓啲friend，覺得今餐好抵食，質素算幾高。食咗近兩個鐘，推薦大家一試，呢間一星抵食

中正紀念堂—多啦A夢展
食完就去下一站，中正紀念堂個多啦A夢展。中正紀念堂十年前嚟台北都有嚟，個多啦A夢展係有朋友去完post IG，我覺得幾有趣所以去咗，宜家個展已經完咗。天氣真係好差



入場費TWD1,220，一個人都HKD$150，唔算平，但入面啲展品全部好得意，值得一去。有啲暗黑系feel嘅展品，同埋動畫，可能有啲人會覺得不安。





臨走前買咗啲磁石貼放雪櫃，就出發去西門町了。

西門町行街、原來海邊走走有雪糕食！
成個西門町同以前唔同哂，今次嚟有兩個目的，去新開嘅POPMART同買老天祿鴨舌。周圍行嘅時候見到海邊走走，入面竟然有雪糕賣，係第一次見到有雪糕嘅舖頭


其實喺度買蛋卷夠指定金額就會送一杯雪糕，我就直接買雪糕食，TWD180（HKD$45）有兩球，仲有塊餅仔。芝麻味最好食，係exactly佢啲芝麻蛋卷個個味，超濃郁，鍾意芝麻嘅你唔好錯過！過幾日有返嚟買手信又食多次，好推薦大家食！

POPMART、老天祿，再出發大伏晚餐
下一站去老天祿，其實係想買返香港，所以去睇下使唔使預約定，同問下可以放幾耐。最後買咗少少即日食，帶返香港個啲就走個日先去買。之後去埋POPMART，近年愈開愈多嘅盲盒店，見佢係全新開幕所以就去咗，真係好大幢，仲要排隊入 對我就扭蛋、夾公仔更happy。


今晚原先係食天天利美食坊滷肉飯，後尾臨時改咗去牛肉麵，結果中大伏！

Day 2晚餐——牛肉麵——劉山東小吃店（Google 4.0分）
（https://maps.app.goo.gl/s7SNG1N1jb85m5jb8）

要去劉山東小吃店嘅話，台北車站出會近啲，西門町行過去都好快。間嘢收8點，7點去到勁多人排隊，唔少係韓國人，最後排咗10分鐘入得。


由於太晏去到，好多嘢都無哂，炸排骨、花生小食個啲都無晒。最後叫咗2碗紅燒牛肉麵同豆干，TWD370（HKD$93），平就真係好平，食物無特別，仲要環境實在太逼，張圓凳仲要坐得好唔舒服，所以極速食完走咗，真係無下次。（想知長龍原因係咪單純係因為平？）

不老松按摩摸門釘
食完去咗不老松，兩間分店離牛肉麵店都唔近，所以要搭車去，揀咗去信義個間。去到話無位walk in要等到11點（個陣8:30pm），除非有預約。佢開24小時，所以無等，因為之後兩日都周末，夜晚已經full booking，所以只可以book定第二朝晨早去按 之後就返咗酒店了，Day 2完！

我都係畀blogger啲食評氹咗佢 個budget食其他嘢算