【一連9日 每晚更新】四國關西復活節賞櫻遊記
波波球球
93
回覆
3 Like
1 Dislike
第 1 頁
第 2 頁
第 3 頁
第 4 頁
波波球球
2024-07-23 23:08:02
有馬名物:食碳酸煎餅
去到旅館大約2點,3點先check in,所以落返山去行市中心。有馬溫泉有樣好,全部主要餐廳同景點都係步行距離。由旅館出返去中心地帶,只需要行呢條隧道,好有千與千尋feel。
廣場個頭搞緊有馬溫泉祭,有班真馬騮喺到表演,氹到啲人好開心。
第一站先去食碳酸煎餅,成條街有幾間舖都有賣,我就求其揀咗間,¥100有兩塊,熱到會辣親手個隻。
波波球球
2024-07-23 23:11:25
參觀有馬玩具博物館
之後慢慢行入去,會經過玩日歸會去嘅金銀之湯,無過夜就應該會去咗呢度,勁多人。
然後就到有馬玩具博物館
如果有小朋友,我覺得一定要入,幾得意又有得互動,大朋友都可以去搵返童真!
博物館樓下有部舊式波子機,好多人排隊玩,自己玩咗兩次都贏唔到。
下一站去食雪糕,一日一雪糕係旅行must do
波波球球
2024-07-23 23:14:16
Day 5下午茶——雪糕——アリマ ジェラテリア スタジオーネ(Tabelog 3.60分)
(
https://tabelog.com/hyogo/A2801/A280112/28044218/
)
3點左右去到,呢間雪糕排到條人龍要轉彎,仲要有啲味已經賣哂。
無乜味揀嘅情況下,我揀咗¥580要兩個味,揀咗檸檬,同埋好少見嘅橙加蜜糖。個蜜糖幾特別,嚟到可以去試下。
食完雪糕就去食炸牛肉餅,都係另一間有馬名店。
波波球球
2024-07-23 23:18:25
Day 5下午茶(II)——炸牛肉餅——竹中肉店(Tabelog 3.45分)
(
https://tabelog.com//hyogo/A2801/A280112/28025664/
)
呢間係要行返轉頭,叫竹中肉店,都係好多人排隊。
買咗¥170嘅炸牛肉餅,價錢係抵到爆炸。佢有得室內食,但一入去成陣油煙味,我秒速出返嚟。舊餅幾好食,凍冰冰食一定好正。
波波球球
2024-07-23 23:26:11
正式Check in
食飽再行多陣就返旅館check in了,把握浸溫泉嘅時間
呢度個有龜印好出名,個個blogger都話必買,屋企無浴缸所以無買。後尾返旅館見到樓下商舖有得買,但貴啲嘅,要買就去返「名產 吉高屋」度買啦。
車站仲有有馬溫泉唯一一間Lawson,後尾發現近旅館原來仲有間7仔,晚餐食唔飽都可以落返便利店買。食咗件Lawson炸雞,再買多杯7仔Smoothie,就行返去旅館check in了。
旅館位置算係自己喺山上,加上要行個條千與千尋隧道,成件事真係好有電影感。
波波球球
2024-07-23 23:29:08
溫泉旅館Room Tour
由入大門個秒已經感受到個種享受,佢會收起你對鞋,要出去嘅話佢會拎返對鞋畀你。Check in完佢就會幫你搬行李上去,今晚住4樓,望樹景。
Room tour先,一入去就係玄關,個行李我就無拖入去,無謂整污糟人哋塊地毯。再入去就係大廳,呢一刻先有枱,食完dinner先會拍埋張枱鋪床。而我最鍾意係個露台仔,伸長對腳睇風景最舒服。
衣櫃已經有浴衣,襪都有一對畀你著落去,同埋膠袋方便你去浸溫泉。
想喺房簡單沖涼都有位,仲有個浴缸,裝修相對幾現代。
波波球球
2024-07-23 23:33:54
溫泉體驗
Check in時約定晚餐18:30食,所以Settle完就去浸溫泉了。呢度有兩個溫泉,分好咗一個男用、一個女用,所以total有4個;每個溫泉早、午都會男女對調,咁住客就可以試齊4個。影唔到相,下面係官網嘅相。
其中一個係古舊啲嘅,有個岩風呂,浸金色泉水,即係金泉。
另一個叫八角堂,就係樹景為主,相對現代啲,似平時見到個種。
兩個各有特色,人多極都係4、5個,但位置好闊落,所以真心好爽。浸完就返上房抖抖,等開飯。
波波球球
2024-07-23 23:38:44
旅館晚餐
大概18:25左右,就有人敲門話要入嚟set枱,係一個好有禮貌嘅嬸嬸。佢會先畀餐牌,然後就順序上菜,質素事前睇過啲blog,評價都一般般,早餐甚至話唔夠飽,我食完兩餐表示認同
照講講晚餐,前菜無乜特別,好多唔知咩嚟嘅食物,食落又正正常常。
個蜆湯就好鮮甜,仲要勁大隻,成餐入面相對幾好嘅嘢。
魚生正常發揮、燒魚、茶碗蒸水準都好一樣。
之後有個牛肉鍋,啲牛睇樣都好一般,同埋有個白飯任裝,所以其實晚餐唔會唔夠飽,因為飯嘅份量真心多,好似塞飽你咁
最後食埋甜品,呢個晚餐水準真係唔多掂,有待改善
波波球球
2024-07-23 23:40:37
夜晚嘅千與千尋隧道
食飽清潔好後,佢就會幫你搞床鋪,約埋聽朝早餐時間,搞掂哂我就換件衫出去行下。
再行返千與千尋隧道,夜晚真係仲有feel啲,同埋夜晚望旅館,點燈後又幾型喎。
便利店買啲嘢就返返去旅館,但天黑行係少少蕩失路,我都兜咗陣先知分叉路行錯咗,要行返轉頭
夜晚去浸多次溫泉,就瞓覺了。Day 5完!
波波球球
2024-07-24 23:26:20
Day 6 行程概要
- 去大阪
- 狹山池公園賞櫻
前一日晚餐時間,約定今日早餐8:00食,自己7點半醒咗,天氣非常好!8點前佢哋就會敲門話要準備,入嚟set枱準備食早餐。事前都睇過啲blog,話早餐係唔夠食同好清淡嘅,今日食完就正常份量啦,但無個種好食嘅感覺。有一堆前菜、沙律、玉子燒同燒魚,仲有一個勁清嘅豆腐湯,玉子燒最好食,其他嘢就真係無特別,好一般
波波球球
2024-07-24 23:29:49
Checkout溫泉旅館
Check out時間係11點,食飽大概9點幾,落去浸多次先走人。日頭係會同前一晚嘅溫泉男女對換,我覺得朝早正啲,可能因為日頭同天氣好,有陽光曬入去就幾有feel。
浸完去咗reception隔離間商店,有雪糕買,我就買咗支梳打水,飲完執完嘢就check out了。
一日嘅溫泉旅館體驗完結,今次有司機車返落去車站,唔使自己拎行李行落去。
波波球球
2024-07-24 23:33:16
大阪3日住宿:梅田APA
去車站搭車,前一晚book定巴士落大阪,11:30開車,唔使一個鐘就到大阪了。
今次應該係事隔6年再去大阪,同東京唔知點解感覺係有啲唔同,自己就鍾意東京多啲。
今次大阪會住三晚,揀咗東梅田站個面有幢好新嘅APA,先行過去放低行李,個大堂都已經好豪華。
波波球球
2024-07-24 23:40:56
多圖!狹山池公園賞櫻
放完行李就出發去賞櫻花!前幾日追連登,見到有人share狹山池公園,IG search過即時相片之後,就決定咗去望望。梅田出發要先去難波,再轉程車去狹山市站,大概40分鐘。公園地理位置其實喺狹山市站同金剛車站中間,我揀咗狹山市站落。
去咗便利店買少少食物先,再去公園野餐。
入到公園,真係wow出聲,公園勁大仲要真係每個area都有櫻花。
人流多但係公園真係好大,所以想搵個位坐低野餐都無問題,仲有啲長凳畀你坐添。
野餐時間
我喺呢度留咗個幾鐘,撞正盛開時間,我好推薦大家2025年去,繼續去圖
今個trip賞櫻部份都完了,亦為呢個櫻花環節畫上完美句號。
波波球球
2024-07-24 23:43:39
漫遊難波
之後就搭返車去難波站附近,今次酒店本身諗咗好耐住難波定梅田,最後衡量完各樣嘢就揀咗梅田。所以今日就先去難波個頭行下,會食埋晚餐先返去,天氣真係好好
呢頭mark咗啲扭蛋舖、夾公仔舖,同埋Luck Rack,真係好抵買啲衫。
之後夠鐘就去咗食晚餐,今日食拉麵。
波波球球
2024-07-24 23:46:03
Day 6晚餐——拉麵——なにわ 麺次郎(Tabelog 3.72分)
(
https://tabelog.com/osaka/A2701/A270202/27112089/
)
呢間拉麵店喺難波地鐵站入面,如果係出面入去,要拍卡的。呢間麵次郎細細間但都幾多人排隊,係米芝蓮推介嚟。
揀咗個蜆湯底,叉燒有兩款,一個係薄切、另外係炙燒。
正常發揮但無好大特別,如果有好多人排隊我未必會食,埋單¥1,330(港幣$69)。
波波球球
2024-07-24 23:48:00
漫遊心齋橋
食完就過心齋橋行下
有間數碼暴龍Pop up store,因為今年係25週年,細個真係好鍾意睇,周不時重溫01
呢幢好多卡通嘢,Chiikawa、蠟筆小新、KIDDYLAND等都好好行。
8點左右先返梅田酒店Check in。
波波球球
2024-07-24 23:51:31
Room Tour:大阪梅田站塔樓 APA 飯店及度假村
今次住「大阪梅田站塔樓 APA 飯店及度假村」,三晚港幣$1,795.61,大約$600一晚,唔平但間房真係好細。有張床、書枱同凳、廁所有浴缸沖涼,行李開完係要閂返嘅,無空位長開,下次真係未必住APA了。
樓下有大浴場,大到仆街但人流都多到傻,成間酒店真係長期都爆人。
最方便係呢幢嘢有間Lawson,宵夜可以食炸雞同Creme Brulee個個雪糕。
洗埋個衫就瞓覺,Day 6完!
波波球球
2024-07-25 23:31:33
Day 7 行程概要
- 去京都
- 米芝蓮一星午餐:室町 和久傳
- 嵐山
- 米芝蓮一星晚餐:燒鳥 市松
今日嘅午餐同晚餐一早book定,分別喺京都同大阪,所以行程無話好緊湊。8點幾起身沖個涼,住得高所以個view都ok,今日天氣正正常常,唔落雨都已經好好了。
之後就出發去京都,由梅田出發搭阪急京都線,一個鐘就到。
午餐book咗11:30,到京都大概11:00就周圍行下,餐廳附近有間BEAMS JAPAN,同普通個啲唔同,雜貨為主。
仲有間幾吸引嘅刨冰店,啲相幾吸引但最後無食,夠鐘就行過隔離食午餐。
波波球球
2024-07-25 23:34:14
Day 7午餐——日本料理——室町 和久傳(Tabelog 4.15分)
(
https://tabelog.com/kyoto/A2601/A260202/26000621/
)
事前喺Omakase.in上預約,米芝蓮一星再加上Tabelog好高分,但估唔到都幾易book。(今個trip有三間大阪嘅完全book唔到,Omakase鮨 三心、鮨 おおが,同埋燒鳥嘅鳥匠 いし井,希望有機會食到)。
午餐有個¥11,000(港幣$5XX)嘅Chef's Tasting Course,所以揀咗午餐嚟食。一坐低就會有餐單,7樣食物加最後白飯任食,最後個部分有3款飯同1款麵任添,唔會唔夠飽。
首先會畀杯「青竹生酒」,類似清酒,幾有特色。然後叫咗飲品應該係宇治抹茶啲friend,之後就正式食嘢了。
波波球球
2024-07-25 23:38:57
(續)Day 7午餐——日本料理——室町 和久傳
第一道係茶碗蒸,加咗白身魚、櫻花同無記錯有白子。本身唔好白子,麻麻哋呢個
第二道係青豆拌蒸鰻魚,下面有啲飯,成個感覺似壽司,幾好食。(利申:唔抗拒三色豆)
第三道係天婦羅,有魚同埋少少菜類,下面個篤係蜜糖,天婦羅點少少honey,個甜味我覺得昇華咗成道菜,呢碟天婦羅都好高質,今餐最愛之一。
第四道係高湯,加咗蜆同筍、牛蒡、水菜,清甜好飲。
第五道係刺身,少少煙燻feel令佢唔係普通一道魚生,好食。
第六道係一個醋啫喱,無個陣酸味,有時啲醋類好易出事,呢個就幾易入口。
第七道係和牛,師傅即場喺你面前切,一樣好好食。
波波球球
2024-07-25 23:43:20
(續)Day 7午餐——日本料理——室町 和久傳
之後就係今餐戲肉,主食有四樣嘢,分別係白飯、海藻拌白飯、毛蟹親子丼同埋蜆麵。每樣都有分大、中、小、超小4個size,你可以4樣都試晒,然後再添;個廚會先拎一大煲白飯出嚟。
第一款係齋米飯,先試咗一淡齋白飯。
然後就淋咗海藻上去,撈埋一齊食。呢個texture好似山葵、納豆,個質感好奇怪,唔鍾意。
呢個時候會上埋麵豉湯。
下一款我試咗毛蟹親子丼,好撚好食!入面有毛蟹肉、蟹膏,少少蔥,真係啖啖都食到蟹,勁好食。
最後試埋蜆麵,由於個毛蟹親子丼太震撼,個麵就無乜特別了。
波波球球
2024-07-25 23:44:35
(續)Day 7午餐——日本料理——室町 和久傳
食完4款,臨尾佢問你仲有無嘢要,我就n call咗個毛蟹親子丼,都仲係好多蟹,真係好好食。
最後一道上埋甜品羊羹,咁呢餐就完結啦。
今餐連埋個凍抹茶¥13,000(港幣$676),有星我覺得好抵食,同埋真係好食,下一次再去京都旅行我覺得我會再book。
食完嘢就過去嵐山,其實本身6年前嚟都有去過,今次想去嘅係IG大熱嘅御髪神社。由餐廳搭車過去嵐山係極塞車,未落車已經見到人,最後都搭咗成個鐘。落車後先去食雪糕,事前bookmark咗一間雪糕店。
波波球球
2024-07-25 23:46:10
Day 7下午茶——雪糕——新八茶屋(Tabelog 3.59分)
(
https://tabelog.com/kyoto/A2601/A260403/26001309/
)
呢間新八茶屋喺大街,勁多人排隊,條龍排到出門口,好彩20分鐘左右就排完。
佢啲味幾特別,有啲google translate完都唔知咩嚟。
最後要咗一隻味,開心果杯裝,正常發揮,¥680(港幣$35)。入面有得坐低食,不過位唔多,食完就出發行入去嵐山。
波波球球
2024-07-25 23:48:03
嵐山御髪神社
嵐山真係好多人,係每年去維園年宵個種迫法,而今次想去嘅御髪神社,就要穿過嵐山先入到去。最後行咗成粒鐘先入到去,腳都軟。
呢度除咗保佑啲做美髮事業嘅人,都可以自己去保佑啲頭髮,甚至有人會剪低頭髮畀神社祈福,不過就有quota,個日3點去到已經無哂位。
行完就出返去京都,下一站係夾公仔。
波波球球
2024-07-25 23:51:13
京都夾公仔:THE 3RD PLANET
話說京都有間夾公仔舖好出名,叫「THE 3RD PLANET」,我睇返日本唔同地方其實都有。出發前睇咗篇台灣blog,呢間THE 3RD PLANET係京阪夾公仔list中,被評為五粒星。交通唔叫太方便,但難得今次嚟到京都,當然要去朝一朝聖。(台灣blog:
https://forum.gamer.com.tw/C.php?bsn=60497&snA=1147
)
呢間嘢非常之大,除咗夾公仔仲有得打機,我會話係今個trip中去過嘅夾公仔舖中,最唔伏個間。但由於京都返大阪都要啲車程,所以無得夾太多,揀咗兩部都係小新嘅機,最後夾咗隻小葵,只係¥600,多得勾住咗佢條頭帶,順利帶佢返屋企!
之後就返大阪了,今晚晚餐book咗食燒鳥,喺北新地個頭,酒店步行距離內,所以返到大阪都直接過返梅田。梅田一帶都多商場,自己去LAKOLE都有啲收穫,同埋去咗Standard Products買啲雜物,差唔多時間就去食晚餐。
第 1 頁
第 2 頁
第 3 頁
第 4 頁
吹水台
自選台
熱 門
最 新
手機台
時事台
政事台
World
體育台
娛樂台
動漫台
Apps台
遊戲台
影視台
講故台
健康台
感情台
家庭台
潮流台
美容台
上班台
財經台
房屋台
飲食台
旅遊台
學術台
校園台
汽車台
音樂台
創意台
硬件台
電器台
攝影台
玩具台
寵物台
軟件台
活動台
電訊台
直播台
站務台
黑 洞