【一連8日 每晚回帶】2022東京遊

一連8日，每晚回帶2022東京遊記 點解會隔成年先出？因為原本係唔打算寫 係早兩個月寫完北海道遊記，有少少寫上癮，發覺用圖文並茂嘅方式做記錄，他日拎返出嚟睇應該會另有一番感受。所以就決定寫返上年嘅東京遊記，因為呢個trip都好畀心機安排行程，所以都想自己寫出嚟、得閒回味吓 旅行日子係2022年秋天，共8日7夜，分別去咗橫濱及東京市內，亦有東京睇到少少紅葉。當然重點係跟住Tabelog去搵食，食咗唔少好西，大家有需要可參考。

作為通關後首個旅程，3年後再去旅行，日元個期大約0.056，仲係好平，所以都無太留意洗費。有mark洗費嘅習慣，今個旅程一行3人，計晒食買玩住機票一共用咗HK$76,000（包咗一次改機票價錢，盛惠HK$3,300）。去日本旅行就首選citi唱定，再去7仔atm禁錢，非常方便。

由於自己習慣係會寫好哂先開post，所以大家今晚起，一連8晚都會有得睇等唔切可以先回顧半年前嘅北海道之旅： https://lihkg.com/thread/3423408/page/1

講下大概使費先，大概有以下類型：

去前準備：
1. 機票：原先book咗CX早去晚返，HK$12,927（一張只係$4,309，家覺得算抵）；後尾改咗兩次機票 最後轉埋JAL午去晚返，一張要$6,000，仲未計啲改機票錢
2. 保險：揀咗AXA，3個人約HK$900
3. 電話卡：個陣追post後揀咗AIS - Sim2fly，8日plan，喺hktvmall買，一共3張盛惠HK$294。收得好好，完全無特別問題

當地消費：（有啲餐廳香港book定，之後會講）
1. 食：HK$18,000，事前book咗6間餐廳（所以排行程真係排死），2間燒肉、Omakase、牛扒、炸豬扒同壽喜燒，之後一樣逐間再寫
2. 買：HK$18,000，有日去咗Outlet，然後去Disney 都有買嘢，其他地方玩下夾公仔（有$10,000係買咗個手袋，所以實際shopping就$8,000啦）
3. 酒店：HK$9,000，橫濱住咗兩日、東京住咗五日
4. 交通：HK$3,152.80，有買pass，其他就用西瓜卡
5. 景點：HK$2,622.48，付費景點主要有Disney Sea、橫濱Gundam、東京六義園，同Shibuya Sky

最後剩返嘅都係雜費，例如酒店洗衫個啲。

大概行程如下，基本上無變動（book晒餐廳都無得點變），total計哂有8日，但Day 1午機出發，其實7日7夜啦

Day 1：香港直航去東京羽田機場 –> 直落橫濱 –> 宿2日橫濱
Day 2：江之島 –> 紅磚倉庫、聖誕市集
Day 3：橫濱Gundam –> 落東京 –> 六義園紅葉
Day 4：川越和服 –> 六本木燈飾
Day 5：Disney Sea
Day 6：木更津Outlet
Day 7：吉祥寺 –> Shibuya Sky
Day 8：台場 –> 成田機場返香港

Day 1 行程概要
- 香港出發去東京羽田機場
- 直落橫濱
- 酒店check in、晚餐食拉麵

2022年去日本仲係要強制visit japan web，個陣帶埋實體針紙，以防要check。當日搭JAL 15:35起飛個班，飛去羽田機場，一年前嘅香港機場無乜人，一年後就繽紛了


天氣好好，3年無飛個心有啲緊張


由於羽田落機，所以事前就plan好直落橫濱先，慳返啲交通時間。今次第一次搭JAL，飛機餐好似係雞嚟（太耐唔記得了），啲頭盤同沙律就好食嘅，配埋H記雪糕，正正常常嘅飛機餐啦。


日本時間20:30左右到達東京機揚，終於去到旅行，個刻勁興奮。上一次去旅行係2019年12月，事隔近3年，終於去到旅行！出到去搭車就搞咗近45分鐘左右，就狗衝出去搭京急機場線，由機場搭去橫濱站，車程約35分鐘。日本之旅開始

抵達酒店Check in、晚餐食拉麵
今次喺橫檳留兩晚，酒店揀咗「橫濱站東口相鐵FRESA INN飯店」，喺橫濱站行去都係幾分鐘，好方便。Book咗一間房，兩晚總共HKD$1,700左右，有浴缸。無影相，官網相：


其實原本諗住疫情後第一次去旅行，揀咗住「橫濱洲際度假酒店」，2千銀港紙一晚但因為畀錢改過機票，所以酒店又要跟住改，只好慳返少少Checkout完就出去食嘢，第一餐係食拉麵，天氣凍凍哋就最適合。

Day 1晚餐——拉麵——麺場 浜虎（Tabelog 3.65分）
（https://tabelog.com/kanagawa/A1401/A140101/14000361/）

出發前一早揀定拉麵店，由於land都8點半，所以附近好多拉麵店都食唔到（收8點）。最後filter剩兩間，呢間以及「鶴一家」（Tabelog 3.63分）（https://tabelog.com/kanagawa/A1401/A140101/14035352/），兩間其實喺正隔離街，我就揀咗高分啲個間。

去到喺門口禁機買拉麵，都幾多人排隊（又係無影相），等咗陣先入去。已經唔記得咗咩嚟，睇返menu有醬油、鹽味等選擇，只係記得係非常鹹的，同行個個都覺得唔啱食（我會記得下次mark低係咩嚟同早啲寫㗎啦）。3碗拉麵盛為¥2,710。


由於餐拉麵實在好麻麻，所以就去便利店宵夜。酒店樓下就係FamilyMart，所以就揀咗食FamilyMart炸雞，超好食又多汁，不過心目中第一係Lawson。仲有薄荷朱古力雪糕，呢款Glico已經喺網上見過好多次，終於試到，成功榮登心目中嘅薄荷朱古力雪糕第一名！都係網上圖片：

日本之旅Day 1完！我哋聽晚再見，早抖

留名先

留名

Lm

會追八日post

留名

食左邊間Omakase?
暫時我都麻麻地關東d omakase, 又貴又唔係話好好食

Day 2 行程概要
- 鐮倉、江之島一日遊
- 橫濱紅磚倉庫聖誕市集

Day 2起身，拉開窗簾見到火車軌，不過一啲都唔嘈，第一晚瞓得好好。已知會落雨，不過聽日就會返東京個頭，所以今日點都要去鐮倉、江之島一日遊，只希望唔好咁大雨啦。


今日早餐係FamilyMart飯糰，同埋溫泉蛋。飯糰食咗個明太子沙律，不過我都係鍾意香港華御結嘅明太子沙律飯糰，實在好適合我食。


食完大概10點鐘，就出發去車站，搭去鐮倉先。橫濱去鐮倉，車程約35分鐘，交通好方便。呢個一日遊嘅行程大概係鐮倉（小町通、鶴岡八幡宮），之後買呢個「江之電1日車票」落七里濱（食bills），再落鐮倉高校前（《男兒當入樽》打卡位）、江之島（想去岩屋），然後喺稚兒之淵睇埋日落。

鐮倉鶴岡八幡宮
第一站係鐮倉嘅小町通，其實行到尾就會到鶴岡八幡宮，所以非常方便。小町通好多舖頭都係賣玻璃製品，咁耐無去旅行所以都買咗啲嘢。




行到尾就係鶴岡八幡宮，門口就有棵黃葉（唔知點叫）大風一吹就周圍都係黃葉，勁靚，好多人打卡（個期適逢係銀杏、紅楓時期，所以今個trip唔少景點都係打卡位），行咗陣買咗個御守，就行返落車站去下一站。

Day 2午餐——Cafe——bills 七里ガ浜（Tabelog 3.60分）
（https://tabelog.com/kanagawa/A1404/A140402/14011661/）

第二站係七里濱，原因就係食bills，因為間舖打卡一流 原本諗住午餐係食鐮倉好出名嘅「生吻仔魚丼」，但因為少驚同行人唔食，所以最後揀咗去bills算。去到七里濱大概12:30，大風到傻咗，係個人會企唔穩個隻


幾經辛苦行到去bills，竟然要等位最後入舖頭企咗成個鐘先有位，仲要因為有人book咗所以無得坐窗邊。


食物都係非常大路個啲，食下主食之後就叫Pancake。食完主食後店員話畀我知窗邊個個人無嚟，問我想唔想調過去坐，即刻應承，多謝晒佢。


雖然今日天氣真係好差，但窗邊位依舊好啱打卡，呢個天氣其實另有一番感受。

鐮倉高校前《男兒當入樽》打卡位
第三站係鐮倉高校前，七里濱過嚟只係一個站，一落車基本上啲人都係去《男兒當入樽》個打卡位影相 班車係10分鐘先會出現一次，每次係十秒都無，我就喺呢度企咗半個鐘。


班車係10分鐘先會出現一次，每次係十秒都無。架車預備出現前，佢會落個閘，以防有人衝出去，呢一刻全世界會衝上前，係會一個畀一個前，然後企後邊個啲人係會變咗影背脊，我第一次影就係影咗一堆背脊。 如是者，我等多咗一班車，結果都係影背脊，好伏呢個景點，天氣又唔好，吹到人都行唔到，嬲嬲哋就走咗。喺我條片cap返圖：

江之島慘遇狂風暴雨、最終沿路折返
第四站就係江之島了，喺江之島站落車，要行條江之島大橋先入到去個島。


呢個時候開始落雨，毛毛雨嘅情況下，加上心諗難得嚟到，今次唔入去下一次都唔知幾時，所以就繼續行。入到本島就出事了，黑色暴雨咁款，成個人濕晒，點解11月都會咁


我個陣唔甘心想行上去，結果係大雨到想搵位擋都無 行到去呢度我就果斷返轉頭了。


本身入到江之島係打算咁玩：買「eno=pass」，行「弁財天仲見世通」或搭扶手電梯上去「江島神社」，之後去埋「江之島岩屋」，最後「稚兒之淵」睇日落，再搭船出返去「江之島大橋」，勁完美。結果只係淋濕晒而乜都行唔到，11、12月都咁大雨，下次要再嚟返！

鐮倉半日遊完結，回程返橫濱
就係咁，鐮倉一日遊就完啦，去唔成嘅江之島就等下次啦。出返去鐮倉站見停咗雨，於是就去搵預先mark咗嘅雪糕舖食 舖店叫Gelateria Il Brigante，Tabelog成3.91分（https://tabelog.com/kanagawa/A1404/A140402/14011873/），身為雪糕迷點可以唔試。啲Gelato要成¥2,000，一杯仔成$120其實係貴到傻，不過難得去旅行就唔理了。去到門口發現無開，明明Google Map話今日會開，懷疑係太大雨所以無開（每次plan都會check定餐廳定休日，所以我好肯定當日唔係定休日）。

乜都食唔到，就返咗橫濱站了。行咗陣商場就出發去紅磚倉庫，個陣聖誕夜市已經開始咗，而日本唔同嘅地方都已經有聖誕裝飾，好啱時間。原先係plan好搭到「櫻木町」站，再轉「橫濱空中纜車」去紅磚倉庫，呢個方法好似係有景睇之餘，仲要行得最少路。無奈太大雨又打風，佢早咗停，結果要喺附近車站行入去。

橫濱紅磚倉庫聖誕市集
紅磚倉庫嘅聖誕市集，入門口後兩邊係一堆攤檔，有食嘅同非食嘅。行到尾就係一堆枱凳，畀你坐低食嘢，但因為落完雨係濕晒的。



中間仲有一棵巨型聖誕樹，人流算幾多吓，如果無落雨就好了。


今晚book咗食燒肉，但一場嚟到市集，點都要食少少嘢。買咗一份德國腸加西班牙Churros，盛惠¥1,500，係好正常嘅食物，零特別，只係食個氣氛。


食完就出發去燒肉店，喺中華街個頭，選擇咗行過去，大概需時15分鐘。

Day 2晚餐——燒肉——食彩和牛 しげ吉 横浜元町店（Tabelog 3.65分）
（https://tabelog.com/kanagawa/A1401/A140105/14014011/）

呢間係呢個trip第一間事先預約嘅餐廳，Tabelog book定20:30。其實好晏，三年無去旅行體力已經不如以往，以後旅行dinner可能都要約早啲了 佢係一間要落地庫嘅日式燒肉店，落雨要小心樓梯。


除咗有牛肉，豚、雞等都有提供，而間餐廳都幾爆。最後當然要食菜，一個野菜盛盒唔該，確保有屎痾。呢餐3個人食盛惠¥11,902（港幣600幾），抵食而且質素幾好吓，好過尋晚拉麵好多，推介！






食飽就返酒店，執埋行李，因為聽日就返返東京了，Day 2完，聽晚再見！

無乜研究omakase，自問唔太識分高質唔高質所以我只係食咗tokyo ten，仲要係夾行程而喺橫濱食

上年我有research咗堆東京嘅，你可以望下
Omakase - 宇田津 鮨
Omakase - 豬股 Sushi Inomata
Omakase - 一㐂 Ginza Ichiki
Omakase - Sushi Hashimoto
Omakase - 鮨 龍次郎 Sushi Ryūjirō
Omakase - 海味 Umi
Omakase - 鮨 浩也

樓主多災多難

Day 3 行程概要
- Gundam Factory Yokohama（橫濱鋼彈工廠）
- 橫濱去東京
- 六義園賞紅葉

第三日嘅行程要跟得好好，因為基本上全部都係預約好嘅，先喺橫濱睇Gundam，食埋間Omakase就落東京，book咗黃昏時間去六義園賞紅葉，夜晚就book咗雞串燒，行程好緊湊。今日天氣算係咁


9點幾Checkout、寄存好行李就出門口，早餐去食麥當勞鬆餅包。呢個trip其實係人生第一次食麥當勞鬆餅包，聽人講過好多次嚟日本一定要食，終於可以親身食到。甜甜哋嘅包真係好好味，亦成功令到我以後去日本都一定會安排做早餐。

橫濱最後景點：Gundam Factory
食完就去咗行下橫濱市內嘅景點，再慢慢行過去Gundam Factory。慢慢行過去，再影下相，都大概行咗一個鐘。啲黃葉（定銀杏）真係好靚，現場睇成條大馬路都係黃色，打卡一流



預約咗11:00去到Gundam Factory，順利去到，離遠望到已經好震撼！Gundam Factory原本係去到2023年3月就完，之後宣佈extend到2024年，本人非gundam fans但都揀咗去，真係唔會後悔！事前官網預約定，唔上Tower每人要¥1,650。官網有時間表講明幾點會有咩movement，所以睇晒Awakening、起動實驗及Standby Mode，大概要2個鐘。個陣冬季有個「水星之魔女」嘅特別演出，不過行程關係就無夾到啦。

續—橫濱最後景點：Gundam Factory
11:00去到都已經好多人，入場佢會送一個mini版模型畀你砌，一人有一份（其中一個畀咗親戚個幾歲仔做手信），宜家好似已經無再派了。


個時場內已經有唔少香港人，有個帶咗隻姜濤公仔去打卡添 等到11:20第一個環節就開始，YouTube大嘅睇過少少片，都知會係做咩，但現實睇真係好震撼。先唔講佢高度係幾層樓高，加埋啲配樂，我敢擔保無睇過gundam嘅都唔會後悔（只少我隔離個兩個人都係咁先）。


入面有間Cafe mix商店，個個位可以影全景（我記得個期有架唔知咩母艦定郵輪泊喺個度，個景係更屈機）


一早book咗個日13:00喺橫濱站食Omakase，而由Gundam Factory搭地鐵要20分鐘以上，所以最後無睇Standby Mode就走咗了。今日午餐係食個陣連登追post，見到好多人讚抵食嘅「SUSHI TOKYO TEN」。