[遊記] [有圖多廢話] 同屋企人嘅歐洲之旅

大家好話說我自從打咗兩篇遊記之後有啲上癮 所以決定寫埋上年嘅歐洲之旅

呢次旅程去咗希臘、瑞士、意大利、法國、列支敦士登，夏天去歐洲真係好正，好晏先日落，啲時間好夠用

Between 之前寫過嘅遊記，有興趣都可以去睇吓：
[回帶]南非exchange生活
https://lih.kg/3647636
- 分享自 LIHKG 討論區

［回帶］當地人帶路 土耳其遊記
https://lih.kg/3666451
- 分享自 LIHKG 討論區

Po幾張相試吓水溫先

LM

希臘




瑞士




法國




意大利




列支敦士登

正式開始寫啦

Day 1 話說如果有睇我上一個土耳其po嘅話，我嗰陣講到拖住個好似就嚟爛嘅行李篋，準備由伊斯坦堡飛去雅典，之後差唔多朝早九點就順利到咗希臘



冇錯，一落機攞返個篋就發現佢真係爛咗 不過好彩入面啲嘢冇跌出嚟，咁之後我就行去行李寄存嗰度搵阿媽因為本身唔肯定雅典機場有冇Wi-Fi，我媽又冇拮sim卡枝針喺身，驚到埗冇得即刻聯絡，所以就一早約定咗喺行李寄存嗰度等





之後亦都順利同阿媽集合 因為我哋今次嘅目的地係希臘嘅一個島——Paros，所以而家要先將啲暫時唔需要用嘅行李放低喺機場先

然後我哋兩個都好肚餓，要晏晝四點先有內陸機飛去Paros，所以就決定喺機場食啲嘢，呢個就係我哋嘅早餐

之後我哋就喺機場附近行吓，見到呢支希臘國旗好感動 因為希臘一直以嚟都係我好想去嘅地方，無論係藍白小屋定係愛琴海，都喺我bucket list入面，今次終於可以踏足呢片土地 而我老豆就因為對希臘冇乜興趣，所以今次希臘之旅係得我同阿媽，我老豆就會後之後喺瑞士先join我哋



晏晝我哋就share呢碟雞髀同薯條



之後就準備登機，啲職員叫我哋排好隊，但我哋排咗半個鐘都唔見有咩動靜，同埋都未見到架機，之後啲人就開始坐喺地下等

等到5:30，終於有得上機 本身以為要天都黑埋先有得飛



雖然只係飛45分鐘，但都有樽水飲，同埋有餅乾派 呢隻都幾好食




之後沿途就係愛琴海啦 呢隻藍色真係好靚，見到愛琴海終於出現喺自己眼前嘅感覺好震撼，仲要今日天氣好好，藍色嘅大海配埋晴天超靚 跟住好似都唔使45分鐘，只係飛咗半個鐘就已經降落

落機之後我哋就準備返酒店，本身我哋plan咗搭佢啲巴士，因為我哋都唔係攞住好多行李，應該唔會太論盡，點知因為架機delay，所以我哋嚟到Paros嗰陣啲巴士服務都收晒工

見住其他人逐個搭車走，我哋好徬徨 之後見到仲有兩架的士喺度，雖然好驚俾人劏，但冇計，因為如果呢兩架的士都走埋嘅話，我哋就要行路返酒店(由機場行去酒店要成兩個半鐘) 好彩咁啱都有對情侶都想搭的士，所以我哋就一齊share，唔記得咗最後俾咗幾多錢，但除返開個價錢係ok嘅



返酒店嘅路上



當然希臘嘅度假小島會有大量酒店，而我哋預咗比較多時間係喺出面玩，所以就冇特登book豪華酒店，Paros分咗唔同區域，有粒紅色星星嗰度就係我哋酒店嘅所在地，因為嗰度鄰近巴士站，方便我哋可以去個島上面唔同嘅地方玩



終於去到check-in話說book酒店嗰陣有啲驚險嘢發生 一開始book嗰陣間酒店明明叫做Cyclades Hotel，喺Google Maps都可以搵到佢，點知過咗一排我喺度搵有咩交通可以去到酒店嗰陣，就發現地圖上冇咗呢間酒店，嚇得我

之後我再聯絡酒店先發現，原來佢哋喺Google Maps個名改咗，而家叫做Cyclades studios，等我仲以為呢間酒店執咗 講返嗰陣book 4晚，每晚平均$350，都幾抵玩，除咗近巴士站之外，行幾步就可以到沙灘 每晚都可以坐喺沙灘睇日落，超正



間房仲有個露台 我哋放好啲嘢之後，就準備出去食晚餐，超肚餓

喺酒店轉左行出去就係沙灘 呢度啲花都開得好靚




咁啱係日落時間，所以梗係要坐低欣賞吓先




喺海邊一帶全部都係餐廳，所以可以慢慢揀 我哋就揀咗呢間，坐喺海邊食晚餐 我哋去嗰陣係五月，但其實呢度早晚都幾涼，而且全日都keep住好大風，所以帶多件褸嚟會更加穩陣



呢間啲嘢食冇話特別好食，但勝在可以對住個海 不過一路食都好大風





同場加映希臘真係有好多貓 之前去土耳其已經見到好多貓，仲日日去餵貓 之後嚟到希臘一樣都係有咁多貓 好正 我哋餵咗一隻之後，就越嚟越多貓嚟咗呢度

食完晚餐之後就周圍行吓



我喺希臘見到嘅第一座藍白色屋仔



仲有貓仔喺度



行當地超市係我每次去旅行嘅一大樂趣



準備返酒店嗰陣見到有間甜品店，梗係買啲嘢返去食吓



最後我哋就買咗呢個甜品，一人一件，超級甜 佢個樣有啲似之前喺土耳其食過嘅一款甜品，嗰陣食已經覺得好甜，點知呢個甜嘅程度係Double 一路食，啲糖水一路流出嚟，可能因為落得太多糖水，所以佢已經淋晒，加上甜味已經完全掩蓋晒本身嘅質感



跟住讕係有格調咁出去露台食宵夜，但呢度所有嘢都好甜，唯獨是超市買嗰支奶就幾好飲

好晏先日落

有好多影日落正嘅位
我屋企兩老都話夜啦返去啦
差唔多成九點半打後先開始黑
我要送佢地返去再出發
如果太遠果d真係miss曬

我老豆都係咁 話日落唔知有咩好睇 反而我媽仲玩得癲過我，有時我行到腳都軟，佢仲話想繼續行多陣

Day 2 今日七點幾就起咗身，準備迎接喺Paros嘅full day








起身刷牙嗰陣已經見到出面係藍天白雲，之後踏出酒店嗰下心情勁好 超好天



我哋求其揀咗間Cafe坐低食早餐

做research嗰陣已經見到話，呢度每朝都會有各式各樣嘅麵包新鮮出爐，所以今日就即刻買返隻嚟試吓 啲款真係多到不得了，完全唔知揀邊隻好，至於甜品 尋晚試過就夠啦



之後我哋嗌咗呢個share食

強po留名

食完嘢之後就去啲小巷行吓 每條巷都好靚，影相都影咗我哋成個朝早 加上間唔中先有幾個人行過，所以真係任影唔嬲

講起呢度咁少人，其實當初plan嚟希臘係想去santorini，始終未去過希臘，而santorini又係希臘最受歡迎嘅島，嗰度嘅景又真係好靚，但之後睇到唔少人都話嗰度太多遊客，喺山頂想影個日落都難，呢一點令到我同阿媽都有啲卻步，因為我哋去希臘係想chill吓，唔想去啲太多人嘅島，所以之後就揀咗Paros




之後繼續行就見到有間手信舖，頭先買咗啲Postcard，而家就睇吓啲磁石 買咗隻石頭造型嘅

多謝gchi！！

行多陣就準備去搭巴士



Paros有幾條巴士路線，所以即使唔係自駕遊都可以去島上面其他地方玩 想搭巴士嘅話就可以喺總站買飛，呢度嘅指示牌全部都有英文，而同時間會有好幾架巴士泊喺度，對清楚架車嘅Number之後就可以拎住張飛上車，而我哋今次係搭2號車去Naousa



等車期間有貓貓陪我哋



仲未有車，所以周圍影吓相先 巴士站附近就係碼頭，所以不時都會見到有船駛過



啲水好清



終於上車啦 都幾多外國人選擇搭巴士，所以架車都full

話咁快就到咗Naousa，呢度係一個小漁村，人流都比頭先嗰度多











希臘再配合晴天，真係令我瘋狂咁影相







大量貓出沒注意

之後我哋就去食晏，明明尋晚食甜品中咗伏，我哋今日又嚟食甜品 係因為我哋唔係好肚餓，但見到海邊啲Cafe個景幾正，所以想坐低食啲嘢




不過好彩今次冇中伏 係好食嘅甜品 pancake配埋啲醬啱啱好 之後仲叫咗個麵包拼盤，佢有四款醬俾你搽





食完嘢繼續行吓 話說中間嗰張Linardo除咗係餐廳之外，亦都係個出名嘅打卡位，頭先朝早嚟咗轉影相，但咁啱有人喺度做緊裝修，所以我哋食完嘢又嚟返呢度影相，而家冇人裝修，但個天就冇頭先咁靚

之後我哋就搭巴士返酒店



搭車嗰陣見到前面個女人攞住呢本書，喺希臘睇呢本真係好有feel



呢度係我哋酒店對面，每次經過見到啲花開得咁靚都忍唔住影




之後呢度係酒店lobby 雖然呢度只係三百幾蚊一晚，但其實裝修都好靚，而且員工服務態度都唔錯 當然如果有budget嘅話，我都真心推介可以book對正過海嘅酒店，經過見到有人坐喺露台，飲住杯嘢，對住個日落，勁chill

啲雲開始散



之後又行吓超市，啲雪糕筒勁得意



我哋行咗落沙灘，諗住試吓啲水溫，點知原來五月嘅水都仲係好涼 本身仲諗住可以玩吓水，而家最多淨係可以浸吓腳

土耳其遊記開始睇 呢度繼續追

多謝你！！！

繼續day 2 究竟簕杜鵑會出現喺我呢個po幾多次？ 真係生得好靚





之後我哋沿住碼頭一路行，見到有條樓梯可以行上去，原來上面好靚 仲有一望無際嘅愛琴海