牙閃RunBarryRun
2024-05-22 08:44:21
Football Analyst
隨住足總盃被東方淘汰出局、聯賽又被理文提早一輪捧走冠軍,傑志喺本地球壇嘅壟斷局面似乎告一段落。會長伍健表示球隊過去變動溫和,針對坊間經常批評嘅高齡陣容,來季將會作出大轉變實行年青化。但傑志現時面對嘅問題絕非一個「老」字能夠概括,單以「年輕化」為目標其實唔能夠解決問題根源。
首先睇番傑志慣用嘅出場陣容,其實今年嘅人腳比起過去幾年成績較好時更為年輕。以對理文嘅聯賽比賽作為比較,今季嘅正選平均年齡只有31.4歲,22/23球季係32.3歲,21/22球季更達34.6歲。偏偏21/22球季係傑志近年戰績最好嘅一屆,以40歲超班老將丹恩奴域掛帥殺入亞冠十六強,年齡同成績掛鉤一論存在盲點。
而「年輕化」傑志唔係冇嘗試過,上季簽入嘅伊高沙托尼同沙根巴耶夫、今季引入嘅丹卓斯基同奧拿斯都只係接近30歲屬當打之齡,迪美路夫同拉美治更分別只有25同23歲。從年齡層面去睇呢啲引援問題不大,但踢出黎嘅表現總係未如理想,結果一係淪為邊緣球員一係黯然離隊,球隊收購球員嘅眼光值得懷疑。
所謂眼光唔好,唔係單純講緊錯判球員能力,而係未有了解到球隊嘅踢法需要邊一類profile嘅球員針對性引援。以中後場為例,傑志喺本地賽事通常主宰控球踢高防線,需要速度快、跑動能力強嘅球員作為rest defence。丹卓斯基同拉美治符唔符合呢啲條件?26歲嘅查理史葛又做唔做到當年32歲嘅巴爾拿回追緊纏嘅作用?
失落冠軍寶座並不可怕,只有痛定思痛才能捲土重來,最怕未能認清問題所在。將失利責任推卸予陣中老將係懶惰嘅做法,事實上37歲嘅基爾頓同費蘭度仍然係隊中能力同發揮較好嘅球員,相反20出頭嘅陳晉一同潘沛軒屢屢獲得機會表現卻令人失望。如何適當地以老帶新、重整陣容架構、用好手上球員,先係傑志真正要面對嘅課題。