https://hk.on.cc/hk/bkn/cnt/sport/20240520/bkn-20240520205105342-0520_00882_001.html
盧卡斯回歸綠戰士 盼入選最佳11人
今季有不少熟悉面孔重返球隊的大埔,至今表現令人驚喜,季中另一位老熟人盧卡斯的加盟,更是將「綠戰士」進攻提升至另一層次。昔日港超神射手闊別3年間後重返本地賽場,Lucas說自己在心態及體能都有變強,唯一不變的是機敏的門前入球觸覺,他亦希望證明自己仍是港超賽場炙手可熱射手。
2015年首度來港,盧卡斯在本地賽場留下過驕人履歷,包括分別在2017/18及2019/20賽季幫助傑志奪得港超冠軍,Lucas承認「藍鳥」歲月對他而言尤其值得回味,但亦有遺憾:「我喺傑志踢咗3年,依家仲有好多朋友,就算之前離開咗香港,我都有繼續關注港超,尤其係傑志嘅比賽。」2021年Lucas暫別港超,若當初選擇留在香港,他或早已經成功入籍,但現實沒有如果,他承認難免有遺憾:「當時我非常接近入籍,如果成功當然對我嘅職業生涯係好事,不過
我試過向理文自薦,亦嘗試重返傑志,但都唔成功。」
昔日舊東家無論是傑志或東方,都被視為有力爭標的強隊,「以前踢傑志或東方,我通常只需要喺禁區內等機會,就可以入到好多波,當時自己攞住唔錯嘅人工,日子過得太安逸。」惟離開香港之後,在身邊環境的逼使下,Lucas意識到改變的必要:「去到巴西同馬來西亞搵食之後,先發覺自己已經跑得唔夠其他球員快,尤其馬來西亞聯賽各隊差距不大,比賽激烈,令我意識到要好好照顧自己嘅身體。」
昔日禁區之狐再戰港超,Lucas只用了半季時間就成為大埔頭號射手,亦經常願意為隊友做嫁衣,剛剛度過34歲的Lucas,自然被視為今季港超季中最佳引援之一。他指比起傑志時期,現時體重已減輕起碼7公斤,自己的心態與過往亦大有不同:「依家會更注意日常飲食,堅持去做尖,比起2016年,我覺得依家自己踢得更好,可能跑得仲快過當年。」Lucas現時已是兩位子女的爸爸,這位曾被視為「麻煩友」的巴西前鋒,也承認家庭責任讓自己變得更成熟:「我需要為子女做榜樣,為人處事方面都要做好啲。」
繼2016/17賽季之後再披「綠戰士」球衣,盧卡斯說能夠與「堅Sir」故劍重逢,一切都好像似曾相識:「2016年我第一次踢大埔之前喺南華踢得唔多,當時係『堅Sir』搵我過嚟,今次『堅Sir』再搵我幫手,情況幾乎一樣,作為外援我哋不嬲需要貢獻更多,但我感覺今次重返大埔,自己責任更大。」今季季中加盟的盧卡斯,好快就用入球成為「綠戰士」今季頭號射手,他認為球隊與自己有出色發揮,「堅Sir」功不可沒:「大埔今季預算唔多,我覺得可以搵到呢班咁好嘅球員,砌成一支好球隊,『堅Sir』係有好大功勞,話晒佢做呢行已經超過10年。」
出色表現亦令Lucas在季尾「香港足球明星選舉」的公眾票選中,獲得頗高票數,可見他的表現在球迷中已留下深刻印象,以及球迷的愛戴,對此他表示:「要攞獎唔容易,因為要同唔少球員競爭,我覺得自己喺呢半季嘅表現唔錯,大家都見到我嘅心態唔同咗,『堅Sir』亦好信任我,
我仲未知今季之後會唔會留喺香港,但我希望自己可以再次入選最佳11人。」