有錢仔與公屋妹

仆街喇佢

（十九）

雖然楊小蘭係黎過我屋企，見過我父母，不過調返轉我就冇試過上去見楊生楊太。

當然呢個對我要搵到楊小蘭既地址並冇啲乜嘢影響，一來我已經成日車佢去到屋企樓下送佢返屋企，二來我響公司老闆，佢既個人資料我已經全部睇晒，所以我好快已經揸車黎到楊小蘭屋企附近。

我諗都唔駛諗，就直接踩入佢住既果幢公屋，然後再直接去到楊小蘭所住既單位門前停低，毫不猶豫咁㩒佢屋企門鐘。

點解？點解楊小蘭會突然間辭職，仲要關埋電話唔肯比我搵到？

我響門口等咗一陣見冇人開門，於是又㩒多次個門鐘，跟住就聽到入面有一把男人聲傳出黎︰「黎喇…黎喇…」

門一打開，就算隔住個鐵閘，我都認得出佢係楊小蘭既爸爸。

雖然楊小蘭比我睇過既相簿入面多數都係佢爸爸幫佢哋兩母女所影既相，但入面都有兩、三張楊爸爸同細個既楊小蘭既合照，所以我一見到佢就認得出眼前既人係邊個。

只不過…眼前呢個男人要比起相簿入面既照片要蒼老得多，而且行動都唔係幾方便，唔怪得要我等咗一陣佢先開到門。

但係…楊小蘭呢？仲有佢媽咪呢？尤其是楊小蘭咁有孝心，應該唔會由得呢位行動唔係幾方便既楊爸爸開門架？

我本來想望入去個單位入面，但咁樣係一件好冇禮貌既事情，所以我都係應付咗眼前既呢一位楊爸爸先。

我識佢，但係佢好明顯唔識我，楊爸爸露出疑惑既眼神，問︰「你搵邊位？」

「請問楊小蘭小姐響唔響度？」我用有禮貌既語氣問。

「你邊位搵佢？」楊爸爸問。

我定一定神，諗緊究竟用楊小蘭既男朋友定係老闆既身份去回答呢個問題好呢？

都係用老闆好啲，用男朋友既身份，我驚嚇親楊爸爸。

我響西裝褸拎出卡片盒出黎，再響入面拎出一張卡片，隔住個鐵閘遞咗入去，再裝出個有禮既微笑道︰「你好，你一定係楊小姐既爸爸嘞，我係楊小姐做嘢間公司既老闆，敝姓張。」

楊爸爸接過張卡片望咗兩眼，佢既表情即刻唔同咗，佢露出咗個親切既笑容，再打開咗個鐵閘，道︰「哦…張老闆…你好，你好！入黎坐吖入黎坐！」

我一入到屋就東張西望，想搵楊小蘭既身影，但成間屋啲房門係開晒，屋企都唔多嘢，可謂一眼睇晒，佢同佢媽咪都應該唔響度。

佢媽咪就應該係返咗工，咁楊小蘭呢？佢冇返到工，咁應該係響屋企吖？

咦？

唔通…楊小蘭佢辭職呢件事連佢屋企人都唔知道，所以佢而家係扮返工，而楊爸爸係乜都唔知？

如果係咁既話…要搵到佢都唔容易…

楊爸爸關上鐵閘同木門，因為年老既關係，所以佢動作好慢，亦有少少駝背，佢行得都唔係幾好，佢指一指一張破舊既黑梳化，道︰「張老闆，請坐…請坐…請問飲啲咩？我屋企有啲茶葉，唔介意既我沖啲茶過你飲？」

「唔駛咁客氣喇，世伯。」我都冇行過去梳化度坐低，因為我真係好心急想問出楊小蘭響邊，於是雖然係有啲冇禮貌，但我都單刀直入咁問︰「楊小姐佢今日突然間冇返工，我放心唔落，所以冒昧上黎打搞世伯你，想睇下佢係咪發生咗咩事？」

楊爸爸微一愕然，道︰「吓？乜個衰女冇同公司請假架咩？」

「請假？」我不明所以。

「唉，小蘭佢返到黎我一定要話下佢先得！」楊爸爸嘆咗口氣，道︰「仲驚動到公司老闆上黎，呢個女真係呢…」

「冇事冇事，好少事架啫…」

楊爸爸擔心地問︰「呢次佢咁樣…咁樣…冇返工，會唔會影響佢響公司既前途啊？」

「放心，冇事，我係老闆，我可以擔保。」如果楊小蘭肯收返辭職既決定，我連加佢人工都可以啊。

「咁佢…而家去咗邊啊？」我忍唔住追問。

「佢同我太太返咗大陸探親啊。」楊爸爸道。

咦？佢冇同我提過呢樣嘢喎。

「幾時既事黎？」我問，又補充多一句︰「因為如果佢係諗住返大陸探親既，應該一早請咗假，而我哋人事部應該唔會唔批先係架。」

最重要既，係佢冇同身為男朋友既我提起過呢件事，咁樣好唔合理喎。

楊爸爸諗咗一陣，道︰「太太去探親就一早決定好架喇，係我行動唔方便，所以唔跟住去啫。唉，人年紀大咗就係咁架喇。」

「唔好咁講，」我安慰咗一句，又急不及待地問︰「咁跟住呢？跟住又係點？楊小姐佢係幾時上去？」

「尋晚佢返到屋企之後，就同太太講，話佢攞咗假陪太太返鄉下，想比個驚喜太太喎。太太雖然同佢講話叫佢留低陪下我，但小蘭佢今次好硬頸咁話要陪太太返上去，所以今朝一早就同太太一齊返咗上大陸喇。」楊爸爸答道。

尋晚返到屋企之後先至突然話陪佢媽咪返大陸？尋晚究竟發生咗咩事？

唔，我尋晚去咗同某個客戶開會開到好夜（我係老闆，點都要作狀出席），冇陪到楊小蘭，呢度楊爸爸講既尋晚返到屋企，係指楊小蘭放工返到屋企？

「佢尋晚大概幾點返？」我問。

「唔…我諗大約九點半喇。」楊爸爸答道。

咁就奇嘞，我公司就算開OT都好少搞到咁晏，更何況呢排楊小蘭啲嘢上咗手，OT情況都少咗？

照咁講…即係話楊小蘭返到屋企之前有去過啲乜嘢地方？

定係佢比公司啲老同事逼佢OT？但如果係咁佢唔需要唔聽我電話，粒聲唔出就走咗去吖？

「唔好意思，請問尊夫人同楊小姐佢哋有冇話幾時返呢？」我又問。

「佢哋冇講低啊，我諗最快都要下個星期。」楊爸爸答。

「咁…如果楊小姐或者尊夫人打返黎既話，麻煩你同楊小姐講聲，我黎搵過佢吖。」

「冇問題。」楊爸爸又擔心地問︰「張老闆，小蘭…小蘭佢係咪真係可以保住份工？」

「放心，我係老闆，我唔會對佢點既。」

「係咁…我就放心喇。」楊爸爸嘆咗口氣，道︰「呢個女…真係出黎社會工作都要父母咁擔心…」

（待續）

唔通係俾啲咩人睇中咗

Rebecca 講左D野俾佢知
嬲得濟走人

但正常都應該會求證下啊

比家庭控制得多

講真，見john乜鳩咁嘅人，傻嘅都估到佢咩人啦

（二十）

我離開咗楊小蘭屋企之後，真係滿心都好煩亂，諗唔透點解楊小蘭會唔同我講一聲就跟咗佢媽咪上大陸探親，仲要最少返一個星期。

咁係咪應該最少都要同男朋友講聲啊？

尋晚到底係咪真係發生咗啲我唔知既事？

但再煩既事就接踵而至，我一上返車坐響司機位，媽咪就打比我。

「喂，媽咪？」

「仔，發生咗咩事？」媽咪響電話另一端著急地問︰「楊叔打黎話我知你唔尊重佢，覺得響公司做落去都冇意思，佢而家要辭職唔做啊。」

唉，我已經夠晒心煩，乜楊叔仲要搞單咁既嘢啊？

「媽咪啊，佢唔走就由得佢喇，公司又唔係冇咗佢唔得。」我唔耐煩地道。

「咁點得啊？你知唔知楊叔係媽咪果陣花咗幾多心機先搵到佢過黎幫手架。」媽咪一副冇得傾既語氣，道︰「你話比媽咪知，究竟發生咗咩事？」

照媽咪既語氣，我知道就算我唔講，佢都會搵楊叔一五一十咁問晒出黎，所以我諗咗一諗，有少少避重就輕咁講出發生咩事，而離職既對象係我女朋友楊小蘭呢樣嘢，我都講埋出黎，如果唔係由楊叔把口講出黎既話，都唔知佢會唔會加鹽加醋講咗啲咩出黎。尤其是我諗公司入面應該早已經有傳聞，話老闆係點樣點樣響公司入面食女，點解啲女同事新請黎之後又走咗，點解可以全權負責招聘時請親都係又靚又後生既女同事…

呢啲當然都係我估，我從來冇聽過呢啲嘢響公司同事口中傳出黎，諒佢哋都唔敢響我面前講，但以楊叔夠膽響我面前勸我唔好睇樣去請人，我估計唔多唔少同事都會有啲閒話既。

就係唔知楊叔知道幾多、佢又會向媽咪講幾多。所以，由我把口講出黎先，起碼打好咗個底，就算楊叔響媽咪前面亂講嘢，我都仲可以有得兜。

「仔啊…雖然媽咪對小蘭既印象係唔錯，但係萬一你同佢真係分咗手既，咁咪搵過第二個囉。」媽咪響電話入面講︰「你犯不著為咗佢向楊叔發咁大脾氣吖？楊叔同你講既嘢，其實都係為公司既前景著想，同埋教緊你點樣去做一個好老闆，一個可以好好咁發展公司既好老闆。」

「係…」

「咁喇，等媽咪再搵楊叔傾下，同佢講清楚你既情況，睇下會唔會一齊出黎食餐飯咁喇。」媽咪又勸道︰「其實後生仔女，男歡女愛，都好平常啫，仔，你都唔好咁放響心上面喇。」

我聽得有啲心煩…

明明楊小蘭只係返咗上去大陸探親啫，媽咪就講到佢好似同我分咗手咁…

不過收線之後，我自己坐咗響司機位，細心思考咗一陣…

萬一我真係搵唔到楊小蘭，然後就一直失聯落去，咁就算冇口頭講到分手，咁實際上同分手，又有咩唔同呢？

唉。

*

媽咪既效率好高，晏晝既時候，佢就已經親自抽空搵埋楊叔同我一齊去咗間幾出名既酒樓，三個人開咗間房食飯。

可能係驚我亂講嘢，媽咪佢響我開口之前已經講咗來龍去脈，包括楊小蘭係我既女朋友一事，又話我係因為唔想影響公司既運作，又唔想大家因為我既緣故而優待小蘭，所以先收收埋埋。

媽咪真係當楊叔係公司啲貴賓咁，係咁同佢為我講好說話，又要我親口同楊叔同道歉，老實講我係一個心高氣傲既人，要我道歉真係萬分唔願意，但係去到媽咪要求我既呢個層面，為咗公司可以好好地營運落去，唔好連間公司都比媽咪收返埋，我唯有壓住心中既不滿，低聲下氣咁響楊叔講咗聲「對唔住」。

大丈夫能屈能伸，我會記住今日呢一筆帳，總有一日會同楊叔你算清楚。

睇在媽咪既份上，楊叔最後勉為其難咁原諒咗我，應承響公司繼續做落去，咁媽咪先至鬆咗一口氣。

我心情非常唔好，返到公司就走返入自己間房，木無表情咁坐響度。

究竟小蘭去咗邊？

呢個時候Rebecca響房門口敲咗兩下，我唔耐煩咁向佢叫道︰「入黎喇。」

「老闆！」Rebecca走咗入黎。

「咩事啊？」我唔耐煩咁問。

「你冇事吖嘛？」Rebecca關心地道︰「你今日心情好似唔係幾好喎。」

「係啊，心情唔係幾好。」我望住佢︰「所以妳有咩事就講喇，冇事就出去，唔好煩我。」

「嗯。」Rebecca真係出返去。

佢係咪真係得閒得滯冇乜嘢做啊？

不過，好快我就知道唔係，佢應該係真係關心我所以先係咁黎打探一下我有冇事。

放工之後，平時一支箭走咗既佢，又走咗入黎我間房，問︰「老闆，你真係冇事？」

「好煩啊妳，我都話冇事咯。」

我晏晝其實都有打過幾次比楊小蘭，但理所當然地係冇人聽。

Rebecca靜靜地咁坐咗響我對面，話︰「我陪下你喇。」

「…」

Rebecca冇再出聲，真係就咁坐響我對面，陪住我就咁齋坐。

「…」

「…」

「妳究竟想點？」我問。

我真係想自己一個人靜下。

Rebecca搖搖頭，微笑道︰「冇啊，真係諗住陪下你囉。」

「哼。」

雖然之前因為Rebecca唔小心向我表露出不屑既表情所以搞到我好想向佢報復，但而家我響成人遊戲入面狠狠咁羞辱咗佢，出返啖氣之後，其實條氣都順返唔少，而家望住佢既時候，都冇咁覺得佢乞人憎。

可能同佢玩咗咁耐，都有少許感情。

而且…呢個時候有人肯陪住我，心情好似真係好啲。

（待續）

蘭姐係咪去咗買刀

仲以為今日大結局

下星期！

（二十一）

就咁過咗兩星期，楊小蘭就好似失咗踪咁音訊，一次都冇聯絡過我。

我甚至乎請咗相熟既私家偵探去搵楊小蘭，但係似乎楊小蘭真係未返香港，連偵探都搵唔到佢。

我真係百思不得其解，諗返起佢失聯之前既點點滴滴，想從其中搵到一啲蛛絲馬跡，但係我真係諗極都諗唔到，我哋之前果幾日既相處明明好正常、好甜蜜架，小蘭做乜會粒聲唔出就消失咗？

而家佢咁樣失踪，係咪想同我分手？

但分手都要有原因吖？

同咗楊小蘭一齊之後，初期我係仲有同Rebecca玩，但係後期已經修心養性架喇喎，佢冇理由之前唔懷疑，反而而家先黎懷疑架？

我仲係第一次有呢種為一個女人茶飯不思既感覺。

「老闆，其實…你一直咁失落係咪因為楊小蘭辭職既關係？」呢一日，收工之後，我都仲係響自己間房入面休息、發呆，而Rebecca就響度陪住我。

呢兩個星期其實都係咁。

「點解妳會咁問？」

「好似自從楊小蘭辭職果日開始你就一直係而家咁既狀態，一直心不在焉，仲同楊叔佢老人家嗌起交上黎。」Rebecca問︰「乜楊小蘭既離職對你黎講，真係咁大影響咩？」

「唔需要妳多事。」

「你以前對其他女同事都冇咁上心架，做咩今次非要呢個楊小蘭不可呢？」Rebecca問。

「我話，唔需要妳多事！」

「我唔係多事啊！」Rebecca帶住關心既語氣急道︰「分手咪分手囉，為咗個女人咁頹喪，值得咩？」

「唔駛妳理啊！我話！」

「女人，冇咪搵過個囉，呢間公司係Auntie為你而打造既心血黎，你…」

正當Rebecca想講落去既時候，我打斷咗佢既說話︰「妳啱啱話乜嘢話？」

Rebecca微一愕然，道︰「我話…呢間公司係…」

「之前果句！」

「女人，冇咗就再搵過？」Rebecca不明所以地問。

「仲有呢！」

「分手咪分手…」

「妳點知道小蘭係我女朋友！？」我怒問。

「我？我…我估架咋！」Rebecca冇估到我會咁樣質問佢，一時唔知比乜嘢反應好。

應該話…

佢係冇估到自己會唔小心漏咗口風…

「估！？」

「咁…咁…我知你拍緊拖…又估…又估你同楊小蘭佢…」Rebecca語塞，道︰「我係估架咋…」

「妳之前唔係先覺得我同佢冇進展架咩？」我怒問︰「點解而家又會突然估到係佢啊？」

「咁…咁你最近扯上咗關係既女人，應該得佢一個咋…」Rebecca道。

「妳唔比係我媽咪介紹既其他Uncle Auntie既女咩？」我道︰「邊個話妳知，我淨係同佢扯上關係啊？」

「都…都話估架咯…」Rebecca吞吞吐吐地道︰「咁…咁你以前都唔會show果啲女人既，而家又點會無端端show？」

「咁分手呢？邊個話妳知我哋分手啊？」我不饒人咁繼續問。

「吓…？我…我估下架咋…」Rebecca開始講得越黎越心虛咁。

「妳講！妳究竟做咗啲乜嘢！」我企起身拍枱暴怒地問。

「我？我乜嘢做咗啲乜嘢啊…？」Rebecca有啲啲驚惶失措咁答我。

其實我本身都係因為Rebecca漏咗口風而直覺地懷疑佢同楊小蘭失蹤一事有關，但而家佢既反應好明顯好似係心虛。

「妳唔好唔記得我手上面仲有果啲妳不知廉恥既相。」我恐嚇佢︰「妳跟咗我都一段日子，應該知道我唔係咁易呃。」

「唔係啊…老闆，真係唔係…」

「呢個世界，有錢使得鬼推磨…要搵偵探查妳唔係一件難事。」我冷冷地道︰「我而家已經對妳起咗疑心，妳自己諗清楚，如果真係妳做既話，妳係走唔出我既手指罅既。」

「…老闆…我…我…」Rebecca已經冇辦法再扮鎮定。

「講，妳究竟做咗乜嘢事。」我冷冷地問。

「我…我只係覺得…呢個女仔配你唔起啫…」Rebecca終於間接承認咗楊小蘭失蹤件事佢至少係知情既。

我唔想搞大件事，所以即使呢個時間啲同事已經走晒都好，我都行埋去關咗房門先。

「好，妳講比我知究竟發生咗啲乜嘢事。」我行去Rebecca面前問︰「妳最好唔好玩啲乜嘢花樣，唔好唔記得，我手上面仲有能夠令到妳身敗名裂既相片。」

Rebecca嘆咗口氣，道︰「既然你都估到我係有關既，咁我都唔再瞞你。」

「妳最好真係唔好瞞我。」我冷冷地道︰「妳講完我唔會信晒，我仲會暗中搵偵探去幫我查，妳應該唔會唔知，我用開果班既偵探，來頭有幾勁架喇？」

「我鍾意你。」Rebecca道︰「老闆，我其實…一直都鍾意你。」

「哦？」我承認，呢個答案有啲出乎我意料之外。

「我真係鍾意你，」Rebecca個樣好認真︰「如果唔係，我點會肯同你維持咁長既SP關係？如果唔係，點解你要擺埋啲咁羞恥既相、玩埋啲咁羞恥既調教遊戲我都肯玩？因為我鍾意你，我想滿足你啊，老闆！」

難以置信…我一直以黎都感覺唔到Rebecca對我既愛意。

…

我明白嘞。

一切都係錢。

「妳唔會係鍾意我，而係鍾意我屋企啲錢！妳驚楊小蘭搶走咗我，令妳冇得嫁入豪門！」冇錯…我諗Rebecca一定係用咗啲卑鄙既招數去威脅楊小蘭離開我！

「老闆，我雖然屋企冇你咁有錢，但家境唔會爭你太多，你真係覺得我係為咗錢先鍾意你？」Rebecca反問。

我登時語塞，因為佢講得啱，佢屋企都好有錢，根本唔需嫁入咩豪門。

…我失去咗冷靜添，唔得，唔得…冷靜啲響Rebecca身上查出楊小蘭既下落。

「咁唔係妳係想玩乜嘢把戲？」我冷笑道。

知道係Rebecca逼走楊小蘭，我覺得我走黎控制唔到自己，我想整死眼前呢個女人…而家！即刻！立即！

「我講…事到如今…我乜嘢都講…你信唔信都好，我真係鍾意你。」

「妳講，妳到底做咗啲乜嘢？」我唔在乎Rebecca係真係鍾意我定係為咗錢，我根本唔在乎眼前呢個女人，我而家望到佢就已經嬲到震。

Rebecca嘆咗口氣，似乎投咗降，道︰「我只不過係響佢辭職之前果晚，同佢講出咗我哋既關係啫。」

「妳講乜嘢話！？」我怒道︰「妳有冇搞錯，妳點可以咁做？」

「點解唔得！？」Rebecca反問︰「我識你識得早過佢、屋企同你又門當戶對、我對你…我對你…言聽計從，你叫我做乜我都肯做，比你影埋啲咁羞恥咁肉酸既相都肯，佢得唔得啊？楊小蘭有邊忽好過我啊？」

「妳收聲！」我冷冷地道︰「妳唔配叫佢個名！」

「我鍾意你，咁都唔得？」

「哼，妳憑乜嘢鍾意我啊？」我又冷笑一聲︰「妳只係我眼入面既一粒微塵咋！妳望下妳自己！配唔配啊？」

「我唔配，唔通楊小蘭配咩！」Rebecca都豁咗出去。

我一把打落Rebecca面上，冷道︰「我講過，妳把口唔配叫出小蘭既名！」

「佢先配你唔起啊！」Rebecca大叫。

「咁小蘭真係咁易就信咗妳？」就算楊小蘭真係蠢，都不至於Rebecca講乜佢就信乜啩？

「…」

「妳究竟做咗啲乜嘢！」睇到呢個反應，我諗Rebecca一定係用咗啲乜嘢卑鄙既手段…

咦…？

我心入面突然有一陣不祥既預感…

「妳話比我聽，小蘭係咪出咗啲乜嘢事！」我一諗到楊小蘭既安危，突然感覺到好不安…

我自己都係身處有錢人既社會，有權有勢有錢既人，係冇嘢做唔出既。

即使係我自己，都毀滅過唔少人既人生。

楊小蘭只不過係一個又窮又老既香港男人同埋一個新移民女人結婚生出黎既普通香港女仔罷了，如果Rebecca真係決定對佢出手既話，佢有乜嘢抵抗既能力？

難聽啲講，要買起佢個人而全身而退，有錢又有膽色既話，都唔係一件乜嘢難事啊！

意外地，Rebecca有啲急住否認︰「我冇做過啲乜嘢啊！」

不過我梗係唔信佢喇，怒道︰「妳乜嘢都冇做過？咁佢點會同佢媽媽同一時間消失架？仲要好似人間蒸發咁？我請既偵探搵咗佢哋咁耐，都搵佢哋唔到啊！」

「我點知佢去咗邊啊？」Rebecca道。

「妳唔知？妳究竟係咪對佢哋做咗啲乜？」我大聲追問︰「我上去佢屋企搵過佢，佢爸爸話佢哋返咗大陸，如果有消息既佢會聯絡我，但到而家佢都冇聯絡過我啊！」

「我真係唔知啊！」Rebecca否認︰「老闆…Jonathan，你信我喇好唔妳啊？你冷靜少少…冷靜少少諗下，我點夠膽對佢哋做啲乜嘢啊？真係買凶殺咗佢咩？你傻咗啊？」

「咁小蘭佢去咗邊啊！」我怒吼。

Rebecca道︰「Jonathan…你唔好咁…你冷靜少少…冷靜少少去諗吓…我未見過你咁唔冷靜架…乜果個楊小蘭，對你黎講真係咁重要咩？」

「妳話呢！」我怒道︰「如果妳唔係對佢哋做過啲乜… …佢哋而家究竟去咗邊！？小蘭佢個人係鈍鈍地，但我唔信單憑妳一句說話就可以令到佢連搵我求證對質都唔做，就咁直接消失當分手！」

我呢一刻可以話係同我一貫既優雅悠閒沾不上邊，但係Rebecca佢講得啱，楊小蘭對我黎講就係咁重要，所以佢先會令我好似而家咁發晒狂。

「我淨係比咗我哋啲相佢睇咋！」Rebecca急忙澄清道︰「我真係冇做過其他嘢架！」

「相？」

「我同你響床上既合照…」

雖然係盛怒同混亂當中，但我都呆咗一呆，問︰「咩合照…？」我冇印象有同Rebecca影過啲咁既相啊？

我淨係記得我同佢影過佢比我調教既羞恥照啫，但入面我係冇出過鏡架喎。

「係我…我偷影架…」Rebecca戰戰兢兢咁細細聲講。

「咩話！？」

「我…我鍾意你…所以…所以唔止一次趁你完事之後瞓著咗，我就用相機偷偷地影低我哋既合照…作為紀念…」Rebecca細聲答道。

「妳…妳…竟然…」

我自己都太大意，竟然會比Rebecca間中響我屋企過夜，搞到佢而家有機會拍低呢啲「合照」？

「唔止咁，連你果陣…果陣同我玩調教既相我都拎埋比佢睇…」

「咩話！？」我個腦一陣暈眩…Rebecca竟然拎咗果啲本身係威脅佢既相比楊小蘭睇？

我續問︰「妳…妳究竟係點樣得到果啲相…？」

「響你部電腦度搵，其實唔難搵到。」Rebecca答道。

睇黎我由頭到尾都實在太睇少Rebecca，我真係唔應該響帶佢返屋企做完愛之後，就完全唔理佢自己瞓覺，由得佢響我屋企自出自入咁。

我真係太睇少佢。

「Jonathan啊，楊小蘭佢已經知道咗其實你係個乜嘢人，我連你以前既感情史都同佢講埋。」呢個時候，Rebecca繼續將佢對楊小蘭做過既嘢講出黎。

「妳係咪痴咗線啊！？」我怒道︰「妳以為妳咁樣做唔駛付出任何代價？」

我返到去屋企就將妳啲相放通街！

「我唔在乎！」Rebecca大聲道︰「Jonathan，我係幫你認清緊呢個女人既真面目咋，如果佢真係愛你，唔會連你既呢啲過去都接受唔到！」

「妳係咪痴咗線？」我向Rebecca大吼︰「妳霎時間比呢啲嘢小蘭睇，佢邊有可能接受到啊！？」

「咁咪即係佢唔適合你囉！」Rebecca仲大言不慚︰「Jonathan，我就唔同佢啊，你係點樣我都接受架！你叫我做乜，我都照做！你鍾意…鍾意綁住我黎同你玩，我都好聽你話！比起果個冇用既屋邨妹，我先至係適合你果個啊！」

妳有咩資格叫楊小蘭做屋邨妹啊！？

我真係忍唔住心入面既怒火，然後響我張辦公抬上面拎起…

（待續）

唔通係殺咗Rebecca？

用咗两日時間追到Live!

都似啦 如果唔係都唔會上新聞

Push

星期一入黎睇都未大結局

因為我未寫完
講過呢個故係實時打冇存稿，所以麻煩大家再等多幾日

慢慢黎