廟街擬變「國際美食街」商會陸興發：無言、冷淡、好灰「歐美無人嚟，根本無遊客嚟」

心頭好 · 2023-09-18T14:33:10+08:00

【獨媒報導】政府要「搞活夜經濟」，如何令老牌景點廟街起死回生是一大難題。強調自己是「唯一代表」的油麻地廟街販商商會主席陳錦榮今早在電台節目表示，已經與政府商討，將100米廟街變成「國際美食街」，強調「係得廟街先有」，預計11月會推出。他又指正與政府商討放寬售賣包裝食品，讓旅客購買臘腸、腐乳、辣椒醬做手信。而廟街商會主席陸興發就直言「政府揀人傾，唔係揀我傾」、「未輪到我講」，他認為政府即使有措施，亦未必實際，「歐美無人嚟，根本無遊客嚟」，大嘆現時處境「好灰㗎！」陸興發一直不看好廟街前景，並批評政府推夜經濟太倉促。他今早在商台《在晴朗的一天出發》節目中表示，政府無邀請他出席上周四「香港夜繽紛」啟動禮，指政府是「揀人傾，唔係揀我哋傾」。對於現時「搞活」廟街的方案，陸興發坦言「聽吓先囉」、「你有你講，我有我做咋」。他不看好售賣包裝食品，形容只是「過眼雲煙」、「唔好咁傻啦」，旅客不會感到吸引，加上若果「每檔都賣呢啲嘢，有咩分別啊？」倡重推五六十年代「雜耍、口水歌」模式陸興發又指，廟街問題是經營模式死板，多年來都賣內地貨「無咩改變」。他主張將油麻地停車場空地變回「大笪地」，「整返個大紅招牌，賣椰汁、橙汁、炒返嘢」，亦可以有「雜耍、唱口水歌」，他自言從小在油麻地長大，深信「跟返嗰個模式做」，就可以吸引人流，「有人流，電台就做新聞，旅遊協會就會搞嘢㗎啦！」談到現時廟街景況，陸興發直言「好靜」，每日只做到約千元生意，扣除貨品成本，「得幾百蚊咁囉」，只剩低60個攤檔營業。他表示很多檔主都對政府措施「無嘢講，好冷淡」，因為即使實行，他們都認為未必實際，過往主要做旅客生意，但現時「連歐美無人嚟，根本無遊客嚟」，大嘆「好灰㗎！」「唯一代表」陳錦榮指方案框架已定成功被政府「揀中」商討的油麻地廟街販商商會主席陳錦榮，在港台節目《千禧年代》表示，現時實際措施「未必有好多」，但相信「香港夜繽紛」啟動禮後，「市民知道政府要搞好」，亦算「好事」。他透露正與食環署和環保署等部門商討，「基本上框框出咗嚟」，構思將廟街變成一條「國際美食街」，他稱鄰近地區例如深圳、珠海、台北、泰國都有夜街，「香港正正無咗條咁嘅街」。「係得廟街先有」他計劃將近佐敦道的一段100米廟街，擺設多檔攤檔售賣印度、巴基斯坦、尼泊爾、土耳其、墨西哥、越南菜，亦配合本地牛雜、雞蛋仔等小食，他稱「唔係話喺深圳，或者台北睇到，係得廟街先有」。現時正與食環署申請臨時牌照，有效期約5個月，因為攤檔鄰近民居，在噪音、消防、電力等安全措施都要時間籌備，預計11月才可以推出。另外他稱正游說政府放寬容許廟街攤檔售賣包裝食品，暫時署方「反應正面、成數好高」，他認為有利遊客購買具代表性有信，例如臘腸、腐乳，辣椒醬」。他亦正聯繫天后廟和玉器市場，希望延長開放時間。