我俾人困咗喺青衣，有冇人可以救下我？

LM

要加更

推

推

lm

明明輝哥揹住咁多嘢，佢仲跑得快過我。我梗係繼續跟住佢跑啦。隻嘢唔係跑得特別快，但都幾乎同我嘅速度一樣，甚至快過我。我同輝哥被逼離開馬路。隻嘢撞爛晒啲路柱，遇到咩障礙物就直接撞爆，仲硬過部剷泥車。我哋走入青衣城二期同灝景灣之間，行人路隔離嗰條小路。

輝哥喺青衣城二期嘅扶手電梯停低，拎咗粒手榴彈出嚟望咗我兩秒，然後就抆開保險。

「輝哥你做乜鳩啊！」我見佢想掉個手檔彈落我度，佢喺掉嗰下同我講：「唔想死就咪撚停！」

佢好似棒球投手咁掉咗粒手榴彈去我後面度，我用百分之一百二十嘅力量衝過去佢身邊。唔夠兩秒，我就聽到後面有爆炸同埋重物跌到落下嘅聲。我擰轉頭，隻嘢又四腳朝天。

「咪撚望喇。」輝哥拍咗我一下，就跑上仲運行緊嘅扶手電梯。
「哈......哈......」我哋入到青衣城二期，啲冷氣好涼爽。「輝......輝哥，可唔可以休息陣先？」我個腦入面係咁出現我俾隻嘢撞死嘅情境，於是我更加用力喘氣。

「如果要休息，去差館休息唔係仲好？」輝哥唔知點解一下就否決咗我嘅提議。又係嘅，佢知道啲嘢。

「差館喎......」雖然有冷氣。但我冇啦啦感覺到比冷氣更凍嘅寒氣，係咁摸自己手臂。

「咩啊？驚俾狗咬啊？」輝哥扮狗兇咗我一下。

「咩狗先？警犬定比特犬？我唔想有瘋狗症。」我行入右手邊間OK拎咗枝水飲，今次冇畀錢。同馬路或者後樓梯唔同。青衣城二號同長發商場都好乾淨，乾淨到成個feel就好似世界仲正常運作緊，只係冇晒人咁。

我飲住水，心諗我返唔返到去原本嘅世界？冇人嘅世界係好好，但係如果要成世都留喺依座島......

「哈啊。」無論有咩煩惱，飲完枝水，成個人都爽晒。「輝哥，橋行唔到啫，有冇得游水或者坐船過對面？」我靈機一觸，問喺舖頭出面等我嘅輝哥。

「唔得。陣間你就知點解。我估隻嘢上唔到嚟先畀你嗚度飲嘢，我得返一粒菠蘿，如果再撞多佢兩次，我都唔知點好。」輝哥望住腰上面剩低嗰粒菠蘿。

佢望過嚟，見到我打算掉咗個樽，伸隻手同我講：「畀個水樽我。」

「做咩？」我交咗個樽畀佢，佢收個水樽落背囊話：「遲啲可能有用。」

水樽有咩用？你話玻璃樽就可能有用啫。

青衣城二期有三層，青衣唯一一間戲院就喺度。起咗冇幾年，放假都幾多人下。大部分都係餐廳，晏畫好多人嚟食嘢。喺一樓中間就望到二樓同三樓，都係同一般商場用開放式設計。

「輝哥，我哋去海皮嘅話嗰隻嘢會唔會追嚟？」飲完水，我喺二期行去青衣城嗰陣問佢。

青衣城啫係地鐵站對出個商場，一條天橋連接住二期同佢。有四層，比起二期，青衣城多好多嘢買，就算有咗二期人流都係不減。

「你都幾多問題。」輝哥好似對我唔耐煩，望都唔望下我。

「我同你都唔知發生咩事，多問題都正常──」

行到去門口，輝哥用隻手攔住我。我望向前面，見到青衣城入面俾喪屍塞滿晒。

數唔清嘅喪屍喺門後面冇目的咁行嚟行去，係名乎其實嘅行屍走肉。我係度諗，喺呢堆喪屍入面，會唔會有我識嘅人？我嘅屋企人、中學同學、成日去嗰間餐廳嘅伙記、樓下看更......佢哋會唔會變晒做喪屍？到底係邊個搞依單嘢出嚟？

「我哋去邊好？」我望住啲喪屍。

北橋就喺我哋頭頂，依條天橋都有路同𨋢上去，但同我頭先見到嘅一樣，上去只係送死。向前行又唔係，向上行又唔係，向後行又唔係，我哋得返一條冒險嘅路行，一係就留喺度。

（加更#2）
「向下行。但係依度離頭先個位好近，我驚隻嘢會返嚟。」輝哥靠住道門話：「你對自己跑步嘅速度有冇信心？」

「如果要話有定冇.....我會話冇。」隻嘢跑得快過我少少，俾佢追嘅話我應該跑一陣就俾佢撞死。

「好，咁你負責掟菠蘿。」佢畀咗粒手榴彈，「你落去先，跟住乜都唔好理，全力跑去差館。當你聽到我吹口哨嗰陣就擰轉頭。抆開保險之後粒菠蘿要三秒先爆炸。我建議你預好距離，一抆開就掟出去，掟到去隻嘢三秒之後會跑到嘅位。」

我望住粒手榴彈，「輝哥，萬一我炸到你點算？你肯將一條命交畀一個三唔識七，啱啱識咗差唔多一個鐘嘅人咩？」我質疑佢。

「就係喺依一個鐘入面，我知你同我一樣，都剩係想離開依個濕鳩地方。」佢拍咗我膊頭一下，「好，深呼吸完就落去。我會喺你後面，係驚都係我驚先。」

有咗計劃，我做好準備就衝落天橋嘅扶手電梯去地下。嗰度好空曠，右邊連住通向青衣泳池同運動場嘅馬路，左邊就係通向海皮。我乜都唔諗，搏晒老命咁跑去海皮。

一去到海皮，我下意識望向對岸，見到啲好得人驚嘅嘢。嗰啲唔係喺對岸，係喺個海入面。

一啲好似龍嘅嘢喺水裏面游嚟游去，佢哋間唔中會跳上水面。黑色嘅鱗片、山羊角咁大嘅白角、生喺背脊嘅刺，我只可以用生人勿近嚟形容。每一條目測有十米大，如果俾幾條纏住，唔止艇仔，我諗郵輪都會俾佢哋整沉。依啲嘢仲要成個海都係，好明顯係唔想我哋離開依度。

而且根據過咗咁耐都未有救護車或者警車由第二區嚟，我估對岸都冇人，或者對岸嘅人都變晒做喪屍。

唯一值得慶幸嘅係嗰啲怪物睇落唔會上岸，咁只要唔行落水就冇事。

我跑行到青衣城對出嗰個位，平時好多菲傭都會喺星期日坐喺草地度野餐；唔少情侶都會坐喺長櫈度放閃光彈......明明剩係過咗個幾鐘，點解我就開始懷念？我一定走到出去！唔可以咁快放棄！

我繼續跑，彷彿見到有人喺隔離陪我一齊咁。唔係掛？咁快有幻覺？我擰轉頭，一個人都望唔到，睇嚟我真係好掛住冇見到咩喪屍同怪獸嘅日子。

青衣碼頭就喺我哋前面少少嘅位置，依家已經冇當碼頭咁用，反而有好多阿伯坐喺度hea。無論日頭定夜晚都好，都會見到有人坐喺嗰個有瓦遮頭，有幾部汽水機嘅休憩空間。

連埋青衣碼頭對出位置，海皮嘅海邊有勁多尖到阿媽都唔認得嘅石，如果唔小心跌咗落去，唔死都危殆。為咗防止有人跌出去，成條海皮都用大約一米高嘅鐵欄杆或者石屎牆擋住個海。不 過有啲釣魚發燒友會爬出去，企喺海皮同啲石之間一道好窄嘅路上面釣魚。

我好似已經跑咗成分鐘，都係未聽到輝哥吹雞，如果去到差館都未聽到就好。

唔知係輝哥識讀心，定係我今日時運特別低，我一諗完，就聽到後面有人喺度跑步同有嘢喺度chok嘅聲。

我擰轉頭，輝哥即刻揮手同我講：「咪撚望，繼續跑！」

雖然我未見到隻嘢，但輝哥叫得我，隻嘢一定係喺後面追緊佢。

我跑到去青衣碼頭巴士站，然後feel到個地板喺到震。我知隻嘢嚟緊，但輝哥未吹雞之前......

「嗶嗶！」輝哥吹咗雞，我抆開手榴彈嘅保險。我同佢會唔會死就靠晒跟住落嚟嗰三秒，如果我估錯位，我哋就會好似保齡球咁俾佢撞死。就算我哋隔離就有商場，差館就喺我哋前面冇幾遠，我哋同差館之間有條大馬路，避到入商場都未免過到去差館。

我係咁叫自己唔好失手，強行壓制全身嘅震動擰轉身。

我見到隻嘢喺輝哥左後邊，我本身以為我、輝哥同隻嘢會係一直線，依家仲要預計埋隻嘢會行邊度，想點先？

唔理喇，掟咗先算！

「去死啦！」我掟粒菠蘿去輝哥度，然後就乜都唔理咁衝向馬路。身後嘅震動愈嚟愈勁，我已經做好俾隻嘢撞死嘅心理準備。我對現實嘅認知好似俾人切開咗無限嚿咁，粒菠蘿未爆之前我覺得每一毫秒都好長，呢三秒同永遠都冇分別。

我同輝哥彷彿俾人用超高速攝影機影住咁，仲未爆炸嘅時候，輝哥好似鬥快衝線咁超越咗我。咁隻嘢咪喺我後面？

live左

多謝支持

瞓前推下

青衣邨人lm

Lm打完風呢個setting幾有代入感
好似睇緊港產片咁

多謝支持個故都係因為打風先有idea

脅持我嗰條友係女人嚟，聽聲應該幾後生，不過我依家最在意嘅係佢把槍。槍口對住我條頸，萬一走火我就係咁先。

「妳殺囉。」輝哥垂低拎槍嘅手。

「輝哥你冇撚嘢啊？」「吓？佢唔係你朋友咩？」我好驚訝，條女應該都係。

「我假設妳殺到佢，咁妳估下妳舉槍快啲定係我開槍快啲？」輝哥笑咗笑，好似根本唔在乎我嘅死活。

「咁我殺咗你先！」條女將把槍指住輝哥。

「妳點解要殺我先？妳知我係咩人咩？」輝哥好似完全唔驚，仲行前咗一步。

「我話咪郁！再郁我就真係開槍！」條女拉住我褪後，「我就係唔知你哋係咩人先要殺你哋！」

我望咗望保安室前半部分嘅構造，Server隔離擺咗好多個杯麵，仲有部熱水機。條女係咪諗住喺依度過世？

「殺咗我哋之後呢？我假設妳有一個月食糧，咁一個月之後呢？一年之後呢？十年之後呢？妳匿唔到成世，跟我哋行可能仲有轉機。」

聽完輝哥講，條女好似有啲動搖，隻手微微震動。雖然我褲袋係𠝹刀，但我冇十成把握可以喺佢射瓜我之前制服佢，所以唔敢搏，都係交返畀輝哥。

「我點知你哋會唔會對我不利？」條女又問。

「我背囊有三粒閃光彈。如果我要對妳不利，我會一開門就掉粒閃光嘢入去閃盲妳對眼再綁起妳。但係我冇咁做，妳覺得點解？」輝哥個樣由始至終都好輕鬆。

「可能你依家先諗到可以咁做啫。」條女冇俾輝哥大到。

「咁就當我太蠢依家先諗到。但係妳唔對成條街都冇人依件事覺得有問題咩？妳唔會想搵真相咩？」輝哥改變咗策略。

「真相？唔關我事，我剩係唔想死。」條女把聲聽落有啲驚。

「咁又返返去頭先個問題。畀盡妳一個月唔死，一個月之後都係要走出依度，點解唔依家走？」輝哥句句都針住條女，條女又唔屈服，我毫無插嘴嘅空間。

「到時我會自己諗辦法，唔使你哋為我操心。」條女好似仲唔肯信輝哥。

交涉其中一樣好重要嘅嘢就係唔可以畀對手拎到主導權，如果輝哥問「咁妳點先肯信我哋？」依啲問題，我哋就可以執包袱返屋企。但我又諗唔到咩方法幫口，只可以睇住輝哥救我。

我哋遇過嘅嘢入面，有冇啲咩可能同佢有關連？

「啲杯麵妳自己儲㗎？」我轉移話題。

「唔關你事。」佢一句就foul咗我。

「妳留咗喺度幾耐？」我又問。

「唔關你事。」佢又foul我。

「咁妳──」

「𡃁仔，你再唔收聲，佢唔砰瓜你我都砰瓜你。」輝哥舉起把槍對住我。

「輝哥！依家係我俾人用槍脅持，你點會明我感受？」我就嚟喊出嚟。

「唔該你收聲，聽到你把聲我就想嘔。」條女同我講。

「啊......喂......妳叫咩名？」我諗唔到點稱呼佢。

「唔關你事。」

「小姐！妳要明白我感受先得㗎！我係人質，驚都好正常啫！妳唔可以怪我㗎喎，驚係人類嘅正常反應，我依家咁樣俾妳拎枝槍對住，冇係咁大嗌已經好畀面！我......」

就喺我同佢講緊嘢嘅時候，輝哥趁佢鬆懈嗰一刻衝上前。佢都察覺咗，即刻對住輝哥開槍。

「砰！」

「輝哥！」

開槍嘅聲大到我係咁耳鳴，個頭仲好暈，好似地球嘅轉動速度突然加快咗一百倍。我唔清楚發生咩事，但我擺脫咗條女，然後跌咗落地暈低。

喺我醒返嘅時候，我見到輝哥喺控制台前面騎住個女仔，用把槍對住佢個頭，睇嚟啱啱嗰槍冇打中佢。

個女仔著住白色波鞋、黑絲同白色短裙，係喺邊個方面講都係好唔尋常嘅配搭。

「放開我！放開我！」佢係咁嗌，但輝哥依然騎喺佢身上面。

「妳係咩人？點解會喺度？喺度幾耐？門口張紙係咪妳黐？係咪妳入過我個竇？」輝哥係用把槍隊住佢後腦，好似佢一唔合作就要射死佢咁。

「放開我！放開我......我唔知......」個女仔係咁喊，但輝哥依然冇放開佢。

「妳再唔答我就開槍！」

雖然佢頭先脅持我，但係咁對佢係咪太粗魯？佢......係扮嘢定真係驚？我應唔應該幫佢？

「唔好......我真係咩都唔知......」個女仔啲眼淚滴落地下，整濕咗地板。

見到個女仔俾人咁蝦，唔幫手我仲係男人？

我拎起跌咗喺我身邊嘅手槍，用佢對住輝哥話：「輝哥！放開佢！」

輝哥擰轉頭屌我：「𡃁仔！你青春期定斯德哥爾摩？佢頭先用槍隊住你你仲幫佢？」

「你當我兩樣都係，放開佢先。」

「算妳好命。」輝哥放開個女仔企起身。

個女仔挨住埲牆起身，用隻手抹眼淚。

輝哥搶走我把槍，喺我耳邊講：「如果你下次再咁做，唔好怪我唔客氣。」

我冇答佢，只係希望唔會再有咁嘅情況出現。

喺佢冷靜落嚟之後，我、輝哥同個女仔各自坐喺一張櫈度傾偈。佢一直用CCTV睇住我哋喺差館嘅一舉一動，但冇任何行動。

「妳叫咩名？」輝哥嘅語氣嚴厲到好似審犯咁。

「......」個女仔避開輝哥嘅視線，用一隻手摸住另一隻手。

「我問你叫咩名啊！」

個女仔嚇到好似驚行雷咁雙膝彎曲um住個頭。

「輝哥，不如都係等我嚟啦。」我忍唔住。

輝哥冇講嘢，繑住手望向第二度，應該係默許我同個女仔講嘢。

我挨前個身問佢：「妳叫咩名啊？」

「......」佢冇答我，不過望咗我一眼。

「我哋都係被困喺依度嘅人，或者我哋可以幫對方呢。我叫阿風，林逸風，妳呢？」我向佢伸出手示好。

「海，丘青海。」佢好細聲咁講，我差啲就聽唔到。

「青海啊？個名幾好啊，我同妳個名都幾夾，風同海，哈哈！」

「你係咪唔識同女仔講嘢？」

「係，對唔住。」

推

我今年廿二歲，連女仔隻手都未拖過，又點可以expect我識同女仔講嘢？我係有幾個女仔friend，但我同佢哋嘅交流都係幾句就完，未試過講好耐嘢。

「你話你哋都係被困喺度，困咗幾耐？」阿海問我。

我拎起電話，依家係十點四，依然係冇訊號。

「兩個鐘左右。」我答。

「咩兩個鐘？」輝哥望住我問。

「冇。」我收返埋電話，「阿海問我我哋困咗喺度幾耐，我咪答兩個鐘囉。」

「兩個鐘？我喺度成個星期。」阿海指住自己。

成個星期？差館唔會畀普通人留喺度，更莫講保安室。已經唔關打唔打風事，係一個正常市民唔可能留喺差館保安室成個禮拜。

「成個星期？我得一日。」輝哥指住自己。

點解我哋三個被困嘅時長會唔同。

「阿、阿叔，你叫咩名？」阿海望落有啲退縮咁問。

「唔關妳事。」

阿海望落有啲嬲。

「講笑。葉文輝，妳想點叫我就點叫我，我唔介意。」輝哥好難得咁露出單純嘅笑容。

「可唔可以叫你仆街？」

我本身以為阿海唔會講粗口，聽到佢講仆街我即刻打咗個冷震。

「俾後生女叫仆街，阿叔我個心會痛。」輝哥好認真咁講。

「咁可唔可以叫你死變態佬？」

「呢個仲hurt過仆街，不如叫返仆街？」輝哥擰咗擰頭。

「咁我以後叫你仆街喇喎。」

「有冇其他稱呼？」

「又話唔介意嘅？」

「妳條撚樣再得寸進尺，小心我──」

我同阿欣都打咗個突，雖然我知輝哥性格有啲古怪，但佢冇啦啦大聲咁講，我都俾佢嚇親。

「Sorry，妳想點叫我就點叫我啦。」輝哥似乎都意識到自己講得太over，語氣減輕咗。

「咁，輝叔，你隻手個傷口係？」阿海指住輝哥右手臂嘅繃帶。

「俾人射傷。」

輝哥同阿海解釋咗佢同病毒單嘢，阿海聽完都係好疑惑。

「咪住。」我突然諗到個問題，打斷輝哥，「尋日打緊風喎，打緊風先嚟病毒交易？仲有，乜嘢病毒交易？邊有人會喺公眾地方交易啲咁危險嘅嘢？」

「佢哋可能想趁打風冇乜人出街嗰陣交易。」輝哥判斷。

我諗到啲嘢，「阿海，輝哥，可唔可以拎你哋部電話出嚟？」

「可以嘅， 做咩？」阿海喺裙袋度拎咗部電話出嚟。

「開個mon畀我睇下。」我望住佢部電話個mon。

佢開咗個mon，日期顯示今日係2023年9月3日，啫係今日。輝哥都拎咗部電話我睇，一樣係2023年9月3日。

「做咩？」阿海收返埋部電話。

「冇，我本身諗緊我哋係咪嚟自唔同時間嘅人。」我托住腮講。

「你睇太多科幻電影啊？」輝哥都收返部電話。

「啊！」我又諗到啲嘢，「會唔會我哋嚟自同一個世界，但係喺唔同時間俾人帶到嚟依度？」

「不如你聽我講埋先。」輝哥打斷我。

「好。」

輝哥繼續講：「個病毒會將人變做喪屍，有『人』想喺香港釋放依種病毒，將全部人變晒做喪屍。係咩人我唔講得，但睇嚟佢哋成功咗。嗰場交易係嗰啲人想將病毒賣畀恐怖分子，而我收到料去阻止佢哋。」

「輝叔你做咩㗎？」阿海應該覺得佢講啲嘢好荒唐，忍唔住咁問。

「你當我係特工就得，再深一層嘅嘢唔方便透露。」輝哥清咗清喉嚨啲痰。

佢同我講係特工，但係咩特工？唔通係CIA？原來香港真係有外國勢力？等陣先，CIA點解要阻止香港嘅病毒交易？輝哥係CIA？五角大廈？定係？

「你諗幾耐都唔會諗到。」輝哥似乎見我好落力咁諗，叫我唔好依家諗。

「輝哥啊，差館門口張紙寫咩？」我見佢頭先見到張紙就走咗去停車場。

「張紙同我講門口有陷阱，叫我去停車場個入口。係咪妳黐上去？」輝哥望住阿海問。

「咩紙啊？」阿海個樣一望就知唔知張紙嘅存在，「我一直都留喺度冇出過去，入嚟嗰陣門口都冇黐咩紙。」

「輝叔你話隻病毒會將人變做喪屍......點解我哋冇事？」阿海答完問返佢。

「我打咗疫苗。我反而想問點解你兩個冇事。」輝哥望住我哋。

「阿海，妳係咪有啲嘢仲未講？」我問佢。

疫苗？我冇打過會將人變成喪屍嘅病毒嘅疫苗。

阿海閃閃縮縮咁望住地下，好似唔係好願答。我再畀啲時間佢，等咗一陣之後，佢終於肯開口。

「其實......我阿哥出咗去。」佢雙手放喺大脾度，睇落好擔心。

「阿哥？妳依家先同我哋講？佢叫咩名？」輝哥即刻問。

「丘秀涼。」阿海答：「佢係醫生嚟，大我十年，不過個樣老到好似我阿爸咁。兩個星期之前，佢喺我手度打咗枝針，咩都冇解釋。一個星期之後，我同佢出街嗰陣條街突然冇晒人，佢就帶我嚟依度，叫我絕對唔好出去，然後就自己一個人出咗去。」

輝哥低頭托腮，好似諗緊啲嘢。

「我諗嗰陣佢幫我打嘅就係疫苗。阿風，你最近有冇打過針？」阿海問我。

「我最近打咗流感針，都係兩個星期之前嘅事。」我回想打針嗰陣嘅情況。

「打針嗰陣有冇特別嘢？」

「我打咗一針，跟住個醫生拎第二枝針筒想幫我打多針。我問佢做咩，佢話嗰枝係加強劑。我覺得好可疑所以拒絕咗。」我再諗嗰日晏啲有冇奇怪嘢發生，「啊！嗰晚我去食飯嗰陣，我背脊好似俾人桔咗嘢咁痛！」

「咁係咪有人桔你？」阿海個樣好正經。

「我唔知。嗰晚我喺旺角，仲要六點幾，多人到我根本睇唔到係咪有人桔我。」

諗咗好耐嘢嘅輝哥開口：「桔你嗰個應該係醫生。佢幫你打針嗰陣想幫你打埋病毒疫苗，見你拒絕就跟蹤你再偷偷幫你打。」

「佢點跟蹤我？我走嗰陣佢都仲坐喺個位度。」我覺得雖然咁解釋到，但冇咩可能。佢都冇對我隨身物品或者衫褲做手腳，成個打針過程都冇位俾佢入。

「佢唔一定要喺你身上面放追蹤器先知你喺邊，可以係其他人幫佢監視你。」

有人會幫醫生監視一個陌生人？我真係唔信。但我都諗唔到否定依個可能嘅推理，話唔定佢真係有派佢啲friend跟住我，仲要係技術好到我唔覺嗰種。

「等陣先，點解三個唔同嘅醫生都有病毒疫苗？」阿海講咗我都好好奇嘅嘢：「輝叔你嗰個係特工團隊嘅醫生，有疫苗唔出奇。但係點解我阿哥都有？連一個幫人打流感針嘅醫生都有？」

輝哥聽到阿丘個名嗰陣冇反應，啫係佢哋應該唔係同一個人，咁點解？

「阿風，幫你打針個醫生咩樣？」阿海問。

「咩樣啊......成面鬚，望落似四廿幾歲......啊！」

同我今朝喺巴士站見過隻喪屍一樣樣。

「點啊！你諗到啲咩？」阿海褪前張櫈。

「我今朝見過佢，但係佢變咗喪屍。」我答。

「醫生冇理由唔幫埋自己打埋疫苗，打咗疫苗就唔會變喪屍......」輝哥好快咁細聲講。

「仲有撻我枝綠茶條友係邊個？阿海妳冇出過去㗎嘛？」我問佢。

「咩綠茶？冇。」佢擰頭。

死喇，樣樣嘢都合唔埋咁。一個禮拜、一日同兩個鐘，三個唔同嘅醫生，撻我綠茶嗰條友......

「𡃁妹，你大佬出去嗰陣有冇話去邊？」輝哥問。

「冇啊，佢剩係話出面好多喪屍，然後佢喺度整咗好多炸彈，畀咗把手槍我，叫我千祈唔好離開間房等佢返嚟就走咗。」阿海話。

「我諗你大佬應該係黐張紙喺門口度嗰條友，咁諗嘅話，你大佬入過我個竇。」輝哥提出咗個冇乜根據但有啲合理嘅假設。

「我阿哥入過輝叔個竇？點入？」阿海好驚訝咁問。

「我估妳大佬離開咗依度之後，喺我同阿樹出咗去嗰陣入過去，留咗張叫我嚟依度嘅字條，再搵方法del紀錄，然後又唔知去咗邊。」輝哥摸住下巴話。

「我阿哥識輝叔你哋咩？我冇聽過佢提起你哋嘅嘢。就算識，佢又點搵到條鎖匙開門，又點知你哋有出入記錄，又點知delete記錄嘅方法？」阿海問咗我同輝哥都有嘅問題。

「我同你有一樣問題。我冇聽過你阿哥個名，佢點解會知我同阿樹個竇喺邊？跟住就係頭先妳都講緊嘅嘢。」輝哥都好疑惑。

阿秀係咩人？點解會有疫苗？佢同輝哥佢哋有咩關連？係敵人嘅話就冇必要就提輝哥去差館搵阿海啦？

假設阿秀係入過去輝哥個竇嘅人，我唯一諗到嘅可能性係佢識輝哥，知道佢有能力幫阿海所以先叫輝哥去差館，但係輝哥又唔識佢，到底係咩一回事？

「阿海，妳喺保安室有冇睇過CCTV記錄？差館咁多差人，應該睇到佢哋幾時突然消失㗎嘛？」我問。

佢擰頭，「我有睇過，但啲記錄唔知俾咩人del晒，得我入嚟之後嘅記錄。」

「妳話妳阿哥出咗去，咁妳老豆老母呢？」輝哥問。

「佢哋唔喺香港。」阿海冇交代佢阿爸阿媽喺外國做咩，不過睇依家嘅情況，應該都係......

我諗唔到仲有咩路行，「輝哥，你唔係有條team㗎咩？點解唔問下佢哋？」

特工團隊喎，問幾嘢應該就知咩事啦？

「我聯絡到佢哋就唔使瞓超市啦。話說我中完彈，行樓梯去商場一樓，發現成個商場都冇人，原本追緊我嗰班契弟都唔見晒。我拎返粒子彈出嚟之後，喺商場附近行咗下就去咗超市過夜，然後就見到你。」

點解會冇訊號？同埋啲喪屍塞住晒啲橋，係咪有人命令緊佢哋？喺邊度命令？點樣命令？呢啲係咪叫問題天天都多啊？

「冇晒線索喎，點算？一係搵妳大佬出嚟。妳知唔知佢平時去開邊？」輝哥係咁𢯎頭。

「唔知。就算我知，已經過咗成個禮拜，佢要去邊度都去晒啦。我唯一肯定嘅係佢仲喺島度。」

「咪住先。」我搵到個盲點，「點解你阿哥會有槍？我同輝哥行晒成間差館，唔好話槍，一把刀仔都搵唔到。仲有，一個醫生點會識set炸彈？第三點，點解佢要帶妳嚟差館？」

香港要合法持槍條件好苛刻，更加唔好講自四年前起時勢已經唔同。

「唔知啊，其實我都唔係好了解佢。佢成日唔喺屋企，有時係OT，有時係出去玩，我好少同佢講嘢，不過我哋關係唔錯。」

「成座島咁大，點搵？」輝哥大聲講：「我驚搵到死都未搵到。」

青衣嘅市區只係佔成個島面積大約四分之一，南邊仲有工業區，中間仲有座山，就好似輝哥咁講，要喺青衣搵阿秀同大海撈針冇分別。

「咁唔係我哋可以點啫？」阿海講呢句嗰陣似乎有啲激動。

「係喇，𡃁妹，妳有冇見過呢張嘢？」輝哥拎咗張寫住怪獸資訊嘅紙畀阿海睇。

瞓前推下

青衣人留名